Chapter 104

yudhiṣṭhira uvāca |
kathaṃ mṛdau kathaṃ tīkṣṇe mahāpakṣe ca pārthiva |
arau varteta nṛpatistanme brūhi pitāmaha || 1 ||
[Analyze grammar]

bhīṣma uvāca |
atrāpyudāharantīmamitihāsaṃ purātanam |
bṛhaspateśca saṃvādamindrasya ca yudhiṣṭhira || 2 ||
[Analyze grammar]

bṛhaspatiṃ devapatirabhivādya kṛtāñjaliḥ |
upasaṃgamya papraccha vāsavaḥ paravīrahā || 3 ||
[Analyze grammar]

ahiteṣu kathaṃ brahmanvartayeyamatandritaḥ |
asamucchidya caivenānniyaccheyamupāyataḥ || 4 ||
[Analyze grammar]

senayorvyatiṣaṅgeṇa jayaḥ sādhāraṇo bhavet |
kiṃ kurvāṇaṃ na māṃ jahyājjvalitā śrīḥ pratāpinī || 5 ||
[Analyze grammar]

tato dharmārthakāmānāṃ kuśalaḥ pratibhānavān |
rājadharmavidhānajñaḥ pratyuvāca puraṃdaram || 6 ||
[Analyze grammar]

na jātu kalahenecchenniyantumapakāriṇaḥ |
bālasaṃsevitaṃ hyetadyadamarṣo yadakṣamā |
na śatrurvivṛtaḥ kāryo vadhamasyābhikāṅkṣatā || 7 ||
[Analyze grammar]

krodhaṃ balamamarṣaṃ ca niyamyātmajamātmani |
amitramupaseveta viśvastavadaviśvasan || 8 ||
[Analyze grammar]

priyameva vadennityaṃ nāpriyaṃ kiṃcidācaret |
viramecchuṣkavairebhyaḥ kaṇṭhāyāsaṃ ca varjayet || 9 ||
[Analyze grammar]

yathā vaitaṃsiko yukto dvijānāṃ sadṛśasvanaḥ |
tāndvijānkurute vaśyāṃstathā yukto mahīpatiḥ |
vaśaṃ copanayecchatrūnnihanyācca puraṃdara || 10 ||
[Analyze grammar]

na nityaṃ paribhūyārīnsukhaṃ svapiti vāsava |
jāgartyeva ca duṣṭātmā saṃkare'gnirivotthitaḥ || 11 ||
[Analyze grammar]

na saṃnipātaḥ kartavyaḥ sāmānye vijaye sati |
viśvāsyaivopasaṃnyāsyo vaśe kṛtvā ripuḥ prabho || 12 ||
[Analyze grammar]

saṃpradhārya sahāmātyairmantravidbhirmahātmabhiḥ |
upekṣamāṇo'vajñāte hṛdayenāparājitaḥ || 13 ||
[Analyze grammar]

athāsya praharetkāle kiṃcidvicalite pade |
daṇḍaṃ ca dūṣayedasya puruṣairāptakāribhiḥ || 14 ||
[Analyze grammar]

ādimadhyāvasānajñaḥ pracchannaṃ ca vicārayet |
balāni dūṣayedasya jānaṃścaiva pramāṇataḥ || 15 ||
[Analyze grammar]

bhedenopapradānena saṃsṛjannauṣadhaistathā |
na tveva celasaṃsargaṃ racayedaribhiḥ saha || 16 ||
[Analyze grammar]

dīrghakālamapi kṣāntvā vihanyādeva śātravān |
kālākāṅkṣī yāmayecca yathā visrambhamāpnuyuḥ || 17 ||
[Analyze grammar]

na sadyo'rīnvinirhanyāddṛṣṭasya vijayo'jvaraḥ |
na yaḥ śalyaṃ ghaṭṭayati navaṃ ca kurute vraṇam || 18 ||
[Analyze grammar]

prāpte ca praharetkāle na sa saṃvartate punaḥ |
hantukāmasya devendra puruṣasya ripuṃ prati || 19 ||
[Analyze grammar]

yaḥ kālo hi vyatikrāmetpuruṣaṃ kālakāṅkṣiṇam |
durlabhaḥ sa punaḥ kālaḥ kāladharmacikīrṣuṇā || 20 ||
[Analyze grammar]

aurjasthyaṃ vijayedevaṃ saṃgṛhṇansādhusaṃmatān |
kālena sādhayennityaṃ nāprāpte'bhinipīḍayet || 21 ||
[Analyze grammar]

vihāya kāmaṃ krodhaṃ ca tathāhaṃkārameva ca |
yukto vivaramanvicchedahitānāṃ puraṃdara || 22 ||
[Analyze grammar]

mārdavaṃ daṇḍa ālasyaṃ pramādaśca surottama |
māyāśca vividhāḥ śakra sādhayantyavicakṣaṇam || 23 ||
[Analyze grammar]

nihatyaitāni catvāri māyāṃ pratividhāya ca |
tataḥ śaknoti śatrūṇāṃ prahartumavicārayan || 24 ||
[Analyze grammar]

yadaivaikena śakyeta guhyaṃ kartuṃ tadācaret |
yacchanti sacivā guhyaṃ mitho vidrāvayantyapi || 25 ||
[Analyze grammar]

aśakyamiti kṛtvā vā tato'nyaiḥ saṃvidaṃ caret |
brahmadaṇḍamadṛṣṭeṣu dṛṣṭeṣu caturaṅgiṇīm || 26 ||
[Analyze grammar]

bhedaṃ ca prathamaṃ yuñjyāttūṣṇīṃdaṇḍaṃ tathaiva ca |
kāle prayojayedrājā tasmiṃstasmiṃstadā tadā || 27 ||
[Analyze grammar]

praṇipātaṃ ca gaccheta kāle śatrorbalīyasaḥ |
yukto'sya vadhamanvicchedapramattaḥ pramādyataḥ || 28 ||
[Analyze grammar]

praṇipātena dānena vācā madhurayā bruvan |
amitramupaseveta na tu jātu viśaṅkayet || 29 ||
[Analyze grammar]

sthānāni śaṅkitānāṃ ca nityameva vivarjayet |
na ca teṣvāśvaseddrugdhvā jāgratīha nirākṛtāḥ || 30 ||
[Analyze grammar]

na hyato duṣkaraṃ karma kiṃcidasti surottama |
yathā vividhavṛttānāmaiśvaryamamarādhipa || 31 ||
[Analyze grammar]

tathā vividhaśīlānāmapi saṃbhava ucyate |
yateta yogamāsthāya mitrāmitrānavārayan || 32 ||
[Analyze grammar]

mṛdumapyavamanyante tīkṣṇādudvijate janaḥ |
mātīkṣṇo māmṛdurbhūstvaṃ tīkṣṇo bhava mṛdurbhava || 33 ||
[Analyze grammar]

yathā vapre vegavati sarvataḥsaṃplutodake |
nityaṃ vivaraṇādbādhastathā rājyaṃ pramādyataḥ || 34 ||
[Analyze grammar]

na bahūnabhiyuñjīta yaugapadyena śātravān |
sāmnā dānena bhedena daṇḍena ca puraṃdara || 35 ||
[Analyze grammar]

ekaikameṣāṃ niṣpiṃṣañśiṣṭeṣu nipuṇaṃ caret |
na ca śakto'pi medhāvī sarvānevārabhennṛpaḥ || 36 ||
[Analyze grammar]

yadā syānmahatī senā hayanāgarathākulā |
padātiyantrabahulā svanuraktā ṣaḍaṅginī || 37 ||
[Analyze grammar]

yadā bahuvidhāṃ vṛddhiṃ manyate pratilomataḥ |
tadā vivṛtya prahareddasyūnāmavicārayan || 38 ||
[Analyze grammar]

na sāma daṇḍopaniṣatpraśasyate na mārdavaṃ śatruṣu yātrikaṃ sadā |
na sasyaghāto na ca saṃkarakriyā na cāpi bhūyaḥ prakṛtervicāraṇā || 39 ||
[Analyze grammar]

māyāvibhedānupasarjanāni pāpaṃ tathaiva spaśasaṃprayogāt |
āptairmanuṣyairupacārayeta pureṣu rāṣṭreṣu ca saṃprayuktaḥ || 40 ||
[Analyze grammar]

purāṇi caiṣāmanusṛtya bhūmipāḥ pureṣu bhogānnikhilānihājayan |
pureṣu nītiṃ vihitāṃ yathāvidhi prayojayanto balavṛtrasūdana || 41 ||
[Analyze grammar]

pradāya gūḍhāni vasūni nāma pracchidya bhogānavadhāya ca svān |
duṣṭāḥ svadoṣairiti kīrtayitvā pureṣu rāṣṭreṣu ca yojayanti || 42 ||
[Analyze grammar]

tathaiva cānyai ratiśāstravedibhiḥ svalaṃkṛtaiḥ śāstravidhānadṛṣṭibhiḥ |
suśikṣitairbhāṣyakathāviśāradaiḥ pareṣu kṛtyānupadhārayasva || 43 ||
[Analyze grammar]

indra uvāca |
kāni liṅgāni duṣṭasya bhavanti dvijasattama |
kathaṃ duṣṭaṃ vijānīyādetatpṛṣṭo bravīhi me || 44 ||
[Analyze grammar]

bṛhaspatiruvāca |
parokṣamaguṇānāha sadguṇānabhyasūyati |
parairvā kīrtyamāneṣu tūṣṇīmāste parāṅmukhaḥ || 45 ||
[Analyze grammar]

tūṣṇīṃbhāve'pi hi jñānaṃ na cedbhavati kāraṇam |
viśvāsamoṣṭhasaṃdaṃśaṃ śirasaśca prakampanam || 46 ||
[Analyze grammar]

karotyabhīkṣṇaṃ saṃsṛṣṭamasaṃsṛṣṭaśca bhāṣate |
adṛṣṭito vikurute dṛṣṭvā vā nābhibhāṣate || 47 ||
[Analyze grammar]

pṛthagetya samaśnāti nedamadya yathāvidhi |
āsane śayane yāne bhāvā lakṣyā viśeṣataḥ || 48 ||
[Analyze grammar]

ārtirārte priye prītiretāvanmitralakṣaṇam |
viparītaṃ tu boddhavyamarilakṣaṇameva tat || 49 ||
[Analyze grammar]

etānyevaṃ yathoktāni budhyethāstridaśādhipa |
puruṣāṇāṃ praduṣṭānāṃ svabhāvo balavattaraḥ || 50 ||
[Analyze grammar]

iti duṣṭasya vijñānamuktaṃ te surasattama |
niśāmya śāstratattvārthaṃ yathāvadamareśvara || 51 ||
[Analyze grammar]

bhīṣma uvāca |
sa tadvacaḥ śatrunibarhaṇe ratastathā cakārāvitathaṃ bṛhaspateḥ |
cacāra kāle vijayāya cārihā vaśaṃ ca śatrūnanayatpuraṃdaraḥ || 52 ||
[Analyze grammar]