Chapter 62

janamejaya uvāca |
kimarthaṃ rājaśārdūlo dharmarājo yudhiṣṭhiraḥ |
gāndhāryāḥ preṣayāmāsa vāsudevaṃ paraṃtapam || 1 ||
[Analyze grammar]

yadā pūrvaṃ gataḥ kṛṣṇaḥ śamārthaṃ kauravānprati |
na ca taṃ labdhavānkāmaṃ tato yuddhamabhūdidam || 2 ||
[Analyze grammar]

nihateṣu tu yodheṣu hate duryodhane tathā |
pṛthivyāṃ pāṇḍaveyasya niḥsapatne kṛte yudhi || 3 ||
[Analyze grammar]

vidrute śibire śūnye prāpte yaśasi cottame |
kiṃ nu tatkāraṇaṃ brahmanyena kṛṣṇo gataḥ punaḥ || 4 ||
[Analyze grammar]

na caitatkāraṇaṃ brahmannalpaṃ vai pratibhāti me |
yatrāgamadameyātmā svayameva janārdanaḥ || 5 ||
[Analyze grammar]

tattvato vai samācakṣva sarvamadhvaryusattama |
yaccātra kāraṇaṃ brahmankāryasyāsya viniścaye || 6 ||
[Analyze grammar]

vaiśaṃpāyana uvāca |
tvadyukto'yamanupraśno yanmāṃ pṛcchasi pārthiva |
tatte'haṃ saṃpravakṣyāmi yathāvadbharatarṣabha || 7 ||
[Analyze grammar]

hataṃ duryodhanaṃ dṛṣṭvā bhīmasenena saṃyuge |
vyutkramya samayaṃ rājandhārtarāṣṭraṃ mahābalam || 8 ||
[Analyze grammar]

anyāyena hataṃ dṛṣṭvā gadāyuddhena bhārata |
yudhiṣṭhiraṃ mahārāja mahadbhayamathāviśat || 9 ||
[Analyze grammar]

cintayāno mahābhāgāṃ gāndhārīṃ tapasānvitām |
ghoreṇa tapasā yuktāṃ trailokyamapi sā dahet || 10 ||
[Analyze grammar]

tasya cintayamānasya buddhiḥ samabhavattadā |
gāndhāryāḥ krodhadīptāyāḥ pūrvaṃ praśamanaṃ bhavet || 11 ||
[Analyze grammar]

sā hi putravadhaṃ śrutvā kṛtamasmābhirīdṛśam |
mānasenāgninā kruddhā bhasmasānnaḥ kariṣyati || 12 ||
[Analyze grammar]

kathaṃ duḥkhamidaṃ tīvraṃ gāndhārī prasahiṣyati |
śrutvā vinihataṃ putraṃ chalenājihmayodhinam || 13 ||
[Analyze grammar]

evaṃ vicintya bahudhā bhayaśokasamanvitaḥ |
vāsudevamidaṃ vākyaṃ dharmarājo'bhyabhāṣata || 14 ||
[Analyze grammar]

tava prasādādgovinda rājyaṃ nihatakaṇṭakam |
aprāpyaṃ manasāpīha prāptamasmābhiracyuta || 15 ||
[Analyze grammar]

pratyakṣaṃ me mahābāho saṃgrāme romaharṣaṇe |
vimardaḥ sumahānprāptastvayā yādavanandana || 16 ||
[Analyze grammar]

tvayā devāsure yuddhe vadhārthamamaradviṣām |
yathā sāhyaṃ purā dattaṃ hatāśca vibudhadviṣaḥ || 17 ||
[Analyze grammar]

sāhyaṃ tathā mahābāho dattamasmākamacyuta |
sārathyena ca vārṣṇeya bhavatā yaddhṛtā vayam || 18 ||
[Analyze grammar]

yadi na tvaṃ bhavennāthaḥ phalgunasya mahāraṇe |
kathaṃ śakyo raṇe jetuṃ bhavedeṣa balārṇavaḥ || 19 ||
[Analyze grammar]

gadāprahārā vipulāḥ parighaiścāpi tāḍanam |
śaktibhirbhiṇḍipālaiśca tomaraiḥ saparaśvadhaiḥ || 20 ||
[Analyze grammar]

vācaśca paruṣāḥ prāptāstvayā hyasmaddhitaiṣiṇā |
tāśca te saphalāḥ sarvā hate duryodhane'cyuta || 21 ||
[Analyze grammar]

gāndhāryā hi mahābāho krodhaṃ budhyasva mādhava |
sā hi nityaṃ mahābhāgā tapasogreṇa karśitā || 22 ||
[Analyze grammar]

putrapautravadhaṃ śrutvā dhruvaṃ naḥ saṃpradhakṣyati |
tasyāḥ prasādanaṃ vīra prāptakālaṃ mataṃ mama || 23 ||
[Analyze grammar]

kaśca tāṃ krodhadīptākṣīṃ putravyasanakarśitām |
vīkṣituṃ puruṣaḥ śaktastvāmṛte puruṣottama || 24 ||
[Analyze grammar]

tatra me gamanaṃ prāptaṃ rocate tava mādhava |
gāndhāryāḥ krodhadīptāyāḥ praśamārthamariṃdama || 25 ||
[Analyze grammar]

tvaṃ hi kartā vikartā ca lokānāṃ prabhavāpyayaḥ |
hetukāraṇasaṃyuktairvākyaiḥ kālasamīritaiḥ || 26 ||
[Analyze grammar]

kṣiprameva mahāprājña gāndhārīṃ śamayiṣyasi |
pitāmahaśca bhagavānkṛṣṇastatra bhaviṣyati || 27 ||
[Analyze grammar]

sarvathā te mahābāho gāndhāryāḥ krodhanāśanam |
kartavyaṃ sātvataśreṣṭha pāṇḍavānāṃ hitaiṣiṇā || 28 ||
[Analyze grammar]

dharmarājasya vacanaṃ śrutvā yadukulodvahaḥ |
āmantrya dārukaṃ prāha rathaḥ sajjo vidhīyatām || 29 ||
[Analyze grammar]

keśavasya vacaḥ śrutvā tvaramāṇo'tha dārukaḥ |
nyavedayadrathaṃ sajjaṃ keśavāya mahātmane || 30 ||
[Analyze grammar]

taṃ rathaṃ yādavaśreṣṭhaḥ samāruhya paraṃtapaḥ |
jagāma hāstinapuraṃ tvaritaḥ keśavo vibhuḥ || 31 ||
[Analyze grammar]

tataḥ prāyānmahārāja mādhavo bhagavānrathī |
nāgasāhvayamāsādya praviveśa ca vīryavān || 32 ||
[Analyze grammar]

praviśya nagaraṃ vīro rathaghoṣeṇa nādayan |
vidito dhṛtarāṣṭrasya so'vatīrya rathottamāt || 33 ||
[Analyze grammar]

abhyagacchadadīnātmā dhṛtarāṣṭraniveśanam |
pūrvaṃ cābhigataṃ tatra so'paśyadṛṣisattamam || 34 ||
[Analyze grammar]

pādau prapīḍya kṛṣṇasya rājñaścāpi janārdanaḥ |
abhyavādayadavyagro gāndhārīṃ cāpi keśavaḥ || 35 ||
[Analyze grammar]

tatastu yādavaśreṣṭho dhṛtarāṣṭramadhokṣajaḥ |
pāṇimālambya rājñaḥ sa sasvaraṃ praruroda ha || 36 ||
[Analyze grammar]

sa muhūrtamivotsṛjya bāṣpaṃ śokasamudbhavam |
prakṣālya vāriṇā netre ācamya ca yathāvidhi |
uvāca praśritaṃ vākyaṃ dhṛtarāṣṭramariṃdamaḥ || 37 ||
[Analyze grammar]

na te'styaviditaṃ kiṃcidbhūtabhavyasya bhārata |
kālasya ca yathā vṛttaṃ tatte suviditaṃ prabho || 38 ||
[Analyze grammar]

yadidaṃ pāṇḍavaiḥ sarvaistava cittānurodhibhiḥ |
kathaṃ kulakṣayo na syāttathā kṣatrasya bhārata || 39 ||
[Analyze grammar]

bhrātṛbhiḥ samayaṃ kṛtvā kṣāntavāndharmavatsalaḥ |
dyūtacchalajitaiḥ śaktairvanavāso'bhyupāgataḥ || 40 ||
[Analyze grammar]

ajñātavāsacaryā ca nānāveśasamāvṛtaiḥ |
anye ca bahavaḥ kleśāstvaśaktairiva nityadā || 41 ||
[Analyze grammar]

mayā ca svayamāgamya yuddhakāla upasthite |
sarvalokasya sāṃnidhye grāmāṃstvaṃ pañca yācitaḥ || 42 ||
[Analyze grammar]

tvayā kālopasṛṣṭena lobhato nāpavarjitāḥ |
tavāparādhānnṛpate sarvaṃ kṣatraṃ kṣayaṃ gatam || 43 ||
[Analyze grammar]

bhīṣmeṇa somadattena bāhlikena kṛpeṇa ca |
droṇena ca saputreṇa vidureṇa ca dhīmatā |
yācitastvaṃ śamaṃ nityaṃ na ca tatkṛtavānasi || 44 ||
[Analyze grammar]

kālopahatacitto hi sarvo muhyati bhārata |
yathā mūḍho bhavānpūrvamasminnarthe samudyate || 45 ||
[Analyze grammar]

kimanyatkālayogāddhi diṣṭameva parāyaṇam |
mā ca doṣaṃ mahārāja pāṇḍaveṣu niveśaya || 46 ||
[Analyze grammar]

alpo'pyatikramo nāsti pāṇḍavānāṃ mahātmanām |
dharmato nyāyataścaiva snehataśca paraṃtapa || 47 ||
[Analyze grammar]

etatsarvaṃ tu vijñāya ātmadoṣakṛtaṃ phalam |
asūyāṃ pāṇḍuputreṣu na bhavānkartumarhati || 48 ||
[Analyze grammar]

kulaṃ vaṃśaśca piṇḍaśca yacca putrakṛtaṃ phalam |
gāndhāryāstava caivādya pāṇḍaveṣu pratiṣṭhitam || 49 ||
[Analyze grammar]

etatsarvamanudhyātvā ātmanaśca vyatikramam |
śivena pāṇḍavāndhyāhi namaste bharatarṣabha || 50 ||
[Analyze grammar]

jānāsi ca mahābāho dharmarājasya yā tvayi |
bhaktirbharataśārdūla snehaścāpi svabhāvataḥ || 51 ||
[Analyze grammar]

etacca kadanaṃ kṛtvā śatrūṇāmapakāriṇām |
dahyate sma divārātraṃ na ca śarmādhigacchati || 52 ||
[Analyze grammar]

tvāṃ caiva naraśārdūla gāndhārīṃ ca yaśasvinīm |
sa śocanbharataśreṣṭha na śāntimadhigacchati || 53 ||
[Analyze grammar]

hriyā ca parayāviṣṭo bhavantaṃ nādhigacchati |
putraśokābhisaṃtaptaṃ buddhivyākulitendriyam || 54 ||
[Analyze grammar]

evamuktvā mahārāja dhṛtarāṣṭraṃ yadūttamaḥ |
uvāca paramaṃ vākyaṃ gāndhārīṃ śokakarśitām || 55 ||
[Analyze grammar]

saubaleyi nibodha tvaṃ yattvāṃ vakṣyāmi suvrate |
tvatsamā nāsti loke'sminnadya sīmantinī śubhe || 56 ||
[Analyze grammar]

jānāmi ca yathā rājñi sabhāyāṃ mama saṃnidhau |
dharmārthasahitaṃ vākyamubhayoḥ pakṣayorhitam |
uktavatyasi kalyāṇi na ca te tanayaiḥ śrutam || 57 ||
[Analyze grammar]

duryodhanastvayā cokto jayārthī paruṣaṃ vacaḥ |
śṛṇu mūḍha vaco mahyaṃ yato dharmastato jayaḥ || 58 ||
[Analyze grammar]

tadidaṃ samanuprāptaṃ tava vākyaṃ nṛpātmaje |
evaṃ viditvā kalyāṇi mā sma śoke manaḥ kṛthāḥ |
pāṇḍavānāṃ vināśāya mā te buddhiḥ kadācana || 59 ||
[Analyze grammar]

śaktā cāsi mahābhāge pṛthivīṃ sacarācarām |
cakṣuṣā krodhadīptena nirdagdhuṃ tapaso balāt || 60 ||
[Analyze grammar]

vāsudevavacaḥ śrutvā gāndhārī vākyamabravīt |
evametanmahābāho yathā vadasi keśava || 61 ||
[Analyze grammar]

ādhibhirdahyamānāyā matiḥ saṃcalitā mama |
sā me vyavasthitā śrutvā tava vākyaṃ janārdana || 62 ||
[Analyze grammar]

rājñastvandhasya vṛddhasya hataputrasya keśava |
tvaṃ gatiḥ saha tairvīraiḥ pāṇḍavairdvipadāṃ vara || 63 ||
[Analyze grammar]

etāvaduktvā vacanaṃ mukhaṃ pracchādya vāsasā |
putraśokābhisaṃtaptā gāndhārī praruroda ha || 64 ||
[Analyze grammar]

tata enāṃ mahābāhuḥ keśavaḥ śokakarśitām |
hetukāraṇasaṃyuktairvākyairāśvāsayatprabhuḥ || 65 ||
[Analyze grammar]

samāśvāsya ca gāndhārīṃ dhṛtarāṣṭraṃ ca mādhavaḥ |
drauṇeḥ saṃkalpitaṃ bhāvamanvabudhyata keśavaḥ || 66 ||
[Analyze grammar]

tatastvarita utthāya pādau mūrdhnā praṇamya ca |
dvaipāyanasya rājendra tataḥ kauravamabravīt || 67 ||
[Analyze grammar]

āpṛcche tvāṃ kuruśreṣṭha mā ca śoke manaḥ kṛthāḥ |
drauṇeḥ pāpo'styabhiprāyastenāsmi sahasotthitaḥ |
pāṇḍavānāṃ vadhe rātrau buddhistena pradarśitā || 68 ||
[Analyze grammar]

etacchrutvā tu vacanaṃ gāndhāryā sahito'bravīt |
dhṛtarāṣṭro mahābāhuḥ keśavaṃ keśisūdanam || 69 ||
[Analyze grammar]

śīghraṃ gaccha mahābāho pāṇḍavānparipālaya |
bhūyastvayā sameṣyāmi kṣiprameva janārdana |
prāyāttatastu tvarito dārukeṇa sahācyutaḥ || 70 ||
[Analyze grammar]

vāsudeve gate rājandhṛtarāṣṭraṃ janeśvaram |
āśvāsayadameyātmā vyāso lokanamaskṛtaḥ || 71 ||
[Analyze grammar]

vāsudevo'pi dharmātmā kṛtakṛtyo jagāma ha |
śibiraṃ hāstinapurāddidṛkṣuḥ pāṇḍavānnṛpa || 72 ||
[Analyze grammar]

āgamya śibiraṃ rātrau so'bhyagacchata pāṇḍavān |
tacca tebhyaḥ samākhyāya sahitastaiḥ samāviśat || 73 ||
[Analyze grammar]