Chapter 61

saṃjaya uvāca |
tataste prayayuḥ sarve nivāsāya mahīkṣitaḥ |
śaṅkhānpradhmāpayanto vai hṛṣṭāḥ parighabāhavaḥ || 1 ||
[Analyze grammar]

pāṇḍavāngacchataścāpi śibiraṃ no viśāṃ pate |
maheṣvāso'nvagātpaścādyuyutsuḥ sātyakistathā || 2 ||
[Analyze grammar]

dhṛṣṭadyumnaḥ śikhaṇḍī ca draupadeyāśca sarvaśaḥ |
sarve cānye maheṣvāsā yayuḥ svaśibirāṇyuta || 3 ||
[Analyze grammar]

tataste prāviśanpārthā hatatviṭkaṃ hateśvaram |
duryodhanasya śibiraṃ raṅgavadvisṛte jane || 4 ||
[Analyze grammar]

gatotsavaṃ puramiva hṛtanāgamiva hradam |
strīvarṣavarabhūyiṣṭhaṃ vṛddhāmātyairadhiṣṭhitam || 5 ||
[Analyze grammar]

tatraitānparyupātiṣṭhanduryodhanapuraḥsarāḥ |
kṛtāñjalipuṭā rājankāṣāyamalināmbarāḥ || 6 ||
[Analyze grammar]

śibiraṃ samanuprāpya kururājasya pāṇḍavāḥ |
avaterurmahārāja rathebhyo rathasattamāḥ || 7 ||
[Analyze grammar]

tato gāṇḍīvadhanvānamabhyabhāṣata keśavaḥ |
sthitaḥ priyahite nityamatīva bharatarṣabha || 8 ||
[Analyze grammar]

avaropaya gāṇḍīvamakṣayyau ca maheṣudhī |
athāhamavarokṣyāmi paścādbharatasattama || 9 ||
[Analyze grammar]

svayaṃ caivāvaroha tvametacchreyastavānagha |
taccākarottathā vīraḥ pāṇḍuputro dhanaṃjayaḥ || 10 ||
[Analyze grammar]

atha paścāttataḥ kṛṣṇo raśmīnutsṛjya vājinām |
avārohata medhāvī rathādgāṇḍīvadhanvanaḥ || 11 ||
[Analyze grammar]

athāvatīrṇe bhūtānāmīśvare sumahātmani |
kapirantardadhe divyo dhvajo gāṇḍīvadhanvanaḥ || 12 ||
[Analyze grammar]

sa dagdho droṇakarṇābhyāṃ divyairastrairmahārathaḥ |
atha dīpto'gninā hyāśu prajajvāla mahīpate || 13 ||
[Analyze grammar]

sopāsaṅgaḥ saraśmiśca sāśvaḥ sayugabandhuraḥ |
bhasmībhūto'patadbhūmau ratho gāṇḍīvadhanvanaḥ || 14 ||
[Analyze grammar]

taṃ tathā bhasmabhūtaṃ tu dṛṣṭvā pāṇḍusutāḥ prabho |
abhavanvismitā rājannarjunaścedamabravīt || 15 ||
[Analyze grammar]

kṛtāñjaliḥ sapraṇayaṃ praṇipatyābhivādya ca |
govinda kasmādbhagavanratho dagdho'yamagninā || 16 ||
[Analyze grammar]

kimetanmahadāścaryamabhavadyadunandana |
tanme brūhi mahābāho śrotavyaṃ yadi manyase || 17 ||
[Analyze grammar]

vāsudeva uvāca |
astrairbahuvidhairdagdhaḥ pūrvamevāyamarjuna |
madadhiṣṭhitatvātsamare na viśīrṇaḥ paraṃtapa || 18 ||
[Analyze grammar]

idānīṃ tu viśīrṇo'yaṃ dagdho brahmāstratejasā |
mayā vimuktaḥ kaunteya tvayyadya kṛtakarmaṇi || 19 ||
[Analyze grammar]

saṃjaya uvāca |
īṣadutsmayamānaśca bhagavānkeśavo'rihā |
pariṣvajya ca rājānaṃ yudhiṣṭhiramabhāṣata || 20 ||
[Analyze grammar]

diṣṭyā jayasi kaunteya diṣṭyā te śatravo jitāḥ |
diṣṭyā gāṇḍīvadhanvā ca bhīmasenaśca pāṇḍavaḥ || 21 ||
[Analyze grammar]

tvaṃ cāpi kuśalī rājanmādrīputrau ca pāṇḍavau |
muktā vīrakṣayādasmātsaṃgrāmānnihatadviṣaḥ |
kṣipramuttarakālāni kuru kāryāṇi bhārata || 22 ||
[Analyze grammar]

upayātamupaplavyaṃ saha gāṇḍīvadhanvanā |
ānīya madhuparkaṃ māṃ yatpurā tvamavocathāḥ || 23 ||
[Analyze grammar]

eṣa bhrātā sakhā caiva tava kṛṣṇa dhanaṃjayaḥ |
rakṣitavyo mahābāho sarvāsvāpatsviti prabho |
tava caivaṃ bruvāṇasya tathetyevāhamabruvam || 24 ||
[Analyze grammar]

sa savyasācī guptaste vijayī ca nareśvara |
bhrātṛbhiḥ saha rājendra śūraḥ satyaparākramaḥ |
mukto vīrakṣayādasmātsaṃgrāmādromaharṣaṇāt || 25 ||
[Analyze grammar]

evamuktastu kṛṣṇena dharmarājo yudhiṣṭhiraḥ |
hṛṣṭaromā mahārāja pratyuvāca janārdanam || 26 ||
[Analyze grammar]

pramuktaṃ droṇakarṇābhyāṃ brahmāstramarimardana |
kastvadanyaḥ sahetsākṣādapi vajrī puraṃdaraḥ || 27 ||
[Analyze grammar]

bhavatastu prasādena saṃgrāme bahavo jitāḥ |
mahāraṇagataḥ pārtho yacca nāsītparāṅmukhaḥ || 28 ||
[Analyze grammar]

tathaiva ca mahābāho paryāyairbahubhirmayā |
karmaṇāmanusaṃtānaṃ tejasaśca gatiḥ śubhā || 29 ||
[Analyze grammar]

upaplavye maharṣirme kṛṣṇadvaipāyano'bravīt |
yato dharmastataḥ kṛṣṇo yataḥ kṛṣṇastato jayaḥ || 30 ||
[Analyze grammar]

ityevamukte te vīrāḥ śibiraṃ tava bhārata |
praviśya pratyapadyanta kośaratnarddhisaṃcayān || 31 ||
[Analyze grammar]

rajataṃ jātarūpaṃ ca maṇīnatha ca mauktikān |
bhūṣaṇānyatha mukhyāni kambalānyajināni ca |
dāsīdāsamasaṃkhyeyaṃ rājyopakaraṇāni ca || 32 ||
[Analyze grammar]

te prāpya dhanamakṣayyaṃ tvadīyaṃ bharatarṣabha |
udakrośanmaheṣvāsā narendra vijitārayaḥ || 33 ||
[Analyze grammar]

te tu vīrāḥ samāśvasya vāhanānyavamucya ca |
atiṣṭhanta muhuḥ sarve pāṇḍavāḥ sātyakistathā || 34 ||
[Analyze grammar]

athābravīnmahārāja vāsudevo mahāyaśāḥ |
asmābhirmaṅgalārthāya vastavyaṃ śibirādbahiḥ || 35 ||
[Analyze grammar]

tathetyuktvā ca te sarve pāṇḍavāḥ sātyakistathā |
vāsudevena sahitā maṅgalārthaṃ yayurbahiḥ || 36 ||
[Analyze grammar]

te samāsādya saritaṃ puṇyāmoghavatīṃ nṛpa |
nyavasannatha tāṃ rātriṃ pāṇḍavā hataśatravaḥ || 37 ||
[Analyze grammar]

tataḥ saṃpreṣayāmāsuryādavaṃ nāgasāhvayam |
sa ca prāyājjavenāśu vāsudevaḥ pratāpavān |
dārukaṃ rathamāropya yena rājāmbikāsutaḥ || 38 ||
[Analyze grammar]

tamūcuḥ saṃprayāsyantaṃ sainyasugrīvavāhanam |
pratyāśvāsaya gāndhārīṃ hataputrāṃ yaśasvinīm || 39 ||
[Analyze grammar]

sa prāyātpāṇḍavairuktastatpuraṃ sātvatāṃ varaḥ |
āsasādayiṣuḥ kṣipraṃ gāndhārīṃ nihatātmajām || 40 ||
[Analyze grammar]