Chapter 22

saṃjaya uvāca |
vartamāne tathā yuddhe ghorarūpe bhayānake |
abhajyata balaṃ tatra tava putrasya pāṇḍavaiḥ || 1 ||
[Analyze grammar]

tāṃstu yatnena mahatā saṃnivārya mahārathān |
putraste yodhayāmāsa pāṇḍavānāmanīkinīm || 2 ||
[Analyze grammar]

nivṛttāḥ sahasā yodhāstava putrapriyaiṣiṇaḥ |
saṃnivṛtteṣu teṣvevaṃ yuddhamāsītsudāruṇam || 3 ||
[Analyze grammar]

tāvakānāṃ pareṣāṃ ca devāsuraraṇopamam |
pareṣāṃ tava sainye ca nāsītkaścitparāṅmukhaḥ || 4 ||
[Analyze grammar]

anumānena yudhyante saṃjñābhiśca parasparam |
teṣāṃ kṣayo mahānāsīdyudhyatāmitaretaram || 5 ||
[Analyze grammar]

tato yudhiṣṭhiro rājā krodhena mahatā yutaḥ |
jigīṣamāṇaḥ saṃgrāme dhārtarāṣṭrānsarājakān || 6 ||
[Analyze grammar]

tribhiḥ śāradvataṃ viddhvā rukmapuṅkhaiḥ śilāśitaiḥ |
caturbhirnijaghānāśvānkalyāṇānkṛtavarmaṇaḥ || 7 ||
[Analyze grammar]

aśvatthāmā tu hārdikyamapovāha yaśasvinam |
atha śāradvato'ṣṭābhiḥ pratyavidhyadyudhiṣṭhiram || 8 ||
[Analyze grammar]

tato duryodhano rājā rathānsaptaśatānraṇe |
preṣayadyatra rājāsau dharmaputro yudhiṣṭhiraḥ || 9 ||
[Analyze grammar]

te rathā rathibhiryuktā manomārutaraṃhasaḥ |
abhyadravanta saṃgrāme kaunteyasya rathaṃ prati || 10 ||
[Analyze grammar]

te samantānmahārāja parivārya yudhiṣṭhiram |
adṛśyaṃ sāyakaiścakrurmeghā iva divākaram || 11 ||
[Analyze grammar]

nāmṛṣyanta susaṃrabdhāḥ śikhaṇḍipramukhā rathāḥ |
rathairagryajavairyuktaiḥ kiṅkiṇījālasaṃvṛtaiḥ |
ājagmurabhirakṣantaḥ kuntīputraṃ yudhiṣṭhiram || 12 ||
[Analyze grammar]

tataḥ pravavṛte raudraḥ saṃgrāmaḥ śoṇitodakaḥ |
pāṇḍavānāṃ kurūṇāṃ ca yamarāṣṭravivardhanaḥ || 13 ||
[Analyze grammar]

rathānsaptaśatānhatvā kurūṇāmātatāyinām |
pāṇḍavāḥ saha pāñcālaiḥ punarevābhyavārayan || 14 ||
[Analyze grammar]

tatra yuddhaṃ mahaccāsīttava putrasya pāṇḍavaiḥ |
na ca nastādṛśaṃ dṛṣṭaṃ naiva cāpi pariśrutam || 15 ||
[Analyze grammar]

vartamāne tathā yuddhe nirmaryāde samantataḥ |
vadhyamāneṣu yodheṣu tāvakeṣvitareṣu ca || 16 ||
[Analyze grammar]

ninadatsu ca yodheṣu śaṅkhavaryaiśca pūritaiḥ |
utkṛṣṭaiḥ siṃhanādaiśca garjitena ca dhanvinām || 17 ||
[Analyze grammar]

atipravṛddhe yuddhe ca chidyamāneṣu marmasu |
dhāvamāneṣu yodheṣu jayagṛddhiṣu māriṣa || 18 ||
[Analyze grammar]

saṃhāre sarvato jāte pṛthivyāṃ śokasaṃbhave |
bahvīnāmuttamastrīṇāṃ sīmantoddharaṇe tathā || 19 ||
[Analyze grammar]

nirmaryāde tathā yuddhe vartamāne sudāruṇe |
prādurāsanvināśāya tadotpātāḥ sudāruṇāḥ |
cacāla śabdaṃ kurvāṇā saparvatavanā mahī || 20 ||
[Analyze grammar]

sadaṇḍāḥ solmukā rājañśīryamāṇāḥ samantataḥ |
ulkāḥ peturdivo bhūmāvāhatya ravimaṇḍalam || 21 ||
[Analyze grammar]

viṣvagvātāḥ prādurāsannīcaiḥ śarkaravarṣiṇaḥ |
aśrūṇi mumucurnāgā vepathuścāspṛśadbhṛśam || 22 ||
[Analyze grammar]

etānghorānanādṛtya samutpātānsudāruṇān |
punaryuddhāya saṃmantrya kṣatriyāstasthuravyathāḥ |
ramaṇīye kurukṣetre puṇye svargaṃ yiyāsavaḥ || 23 ||
[Analyze grammar]

tato gāndhārarājasya putraḥ śakunirabravīt |
yudhyadhvamagrato yāvatpṛṣṭhato hanmi pāṇḍavān || 24 ||
[Analyze grammar]

tato naḥ saṃprayātānāṃ madrayodhāstarasvinaḥ |
hṛṣṭāḥ kilakilāśabdamakurvantāpare tathā || 25 ||
[Analyze grammar]

asmāṃstu punarāsādya labdhalakṣā durāsadāḥ |
śarāsanāni dhunvantaḥ śaravarṣairavākiran || 26 ||
[Analyze grammar]

tato hataṃ paraistatra madrarājabalaṃ tadā |
duryodhanabalaṃ dṛṣṭvā punarāsītparāṅmukham || 27 ||
[Analyze grammar]

gāndhārarājastu punarvākyamāha tato balī |
nivartadhvamadharmajñā yudhyadhvaṃ kiṃ sṛtena vaḥ || 28 ||
[Analyze grammar]

anīkaṃ daśasāhasramaśvānāṃ bharatarṣabha |
āsīdgāndhārarājasya vimalaprāsayodhinām || 29 ||
[Analyze grammar]

balena tena vikramya vartamāne janakṣaye |
pṛṣṭhataḥ pāṇḍavānīkamabhyaghnanniśitaiḥ śaraiḥ || 30 ||
[Analyze grammar]

tadabhramiva vātena kṣipyamāṇaṃ samantataḥ |
abhajyata mahārāja pāṇḍūnāṃ sumahadbalam || 31 ||
[Analyze grammar]

tato yudhiṣṭhiraḥ prekṣya bhagnaṃ svabalamantikāt |
abhyacodayadavyagraḥ sahadevaṃ mahābalam || 32 ||
[Analyze grammar]

asau subalaputro no jaghanaṃ pīḍya daṃśitaḥ |
senāṃ nisūdayantyeṣa paśya pāṇḍava durmatim || 33 ||
[Analyze grammar]

gaccha tvaṃ draupadeyāśca śakuniṃ saubalaṃ jahi |
rathānīkamahaṃ rakṣye pāñcālasahito'nagha || 34 ||
[Analyze grammar]

gacchantu kuñjarāḥ sarve vājinaśca saha tvayā |
pādātāśca trisāhasrāḥ śakuniṃ saubalaṃ jahi || 35 ||
[Analyze grammar]

tato gajāḥ saptaśatāścāpapāṇibhirāsthitāḥ |
pañca cāśvasahasrāṇi sahadevaśca vīryavān || 36 ||
[Analyze grammar]

pādātāśca trisāhasrā draupadeyāśca sarvaśaḥ |
raṇe hyabhyadravaṃste tu śakuniṃ yuddhadurmadam || 37 ||
[Analyze grammar]

tatastu saubalo rājannabhyatikramya pāṇḍavān |
jaghāna pṛṣṭhataḥ senāṃ jayagṛdhraḥ pratāpavān || 38 ||
[Analyze grammar]

aśvārohāstu saṃrabdhāḥ pāṇḍavānāṃ tarasvinām |
prāviśansaubalānīkamabhyatikramya tānrathān || 39 ||
[Analyze grammar]

te tatra sādinaḥ śūrāḥ saubalasya mahadbalam |
gajamadhye'vatiṣṭhantaḥ śaravarṣairavākiran || 40 ||
[Analyze grammar]

tadudyatagadāprāsamakāpuruṣasevitam |
prāvartata mahadyuddhaṃ rājandurmantrite tava || 41 ||
[Analyze grammar]

upāramanta jyāśabdāḥ prekṣakā rathino'bhavan |
na hi sveṣāṃ pareṣāṃ vā viśeṣaḥ pratyadṛśyata || 42 ||
[Analyze grammar]

śūrabāhuvisṛṣṭānāṃ śaktīnāṃ bharatarṣabha |
jyotiṣāmiva saṃpātamapaśyankurupāṇḍavāḥ || 43 ||
[Analyze grammar]

ṛṣṭibhirvimalābhiśca tatra tatra viśāṃ pate |
saṃpatantībhirākāśamāvṛtaṃ bahvaśobhata || 44 ||
[Analyze grammar]

prāsānāṃ patatāṃ rājanrūpamāsītsamantataḥ |
śalabhānāmivākāśe tadā bharatasattama || 45 ||
[Analyze grammar]

rudhirokṣitasarvāṅgā vipraviddhairniyantṛbhiḥ |
hayāḥ paripatanti sma śataśo'tha sahasraśaḥ || 46 ||
[Analyze grammar]

anyonyaparipiṣṭāśca samāsādya parasparam |
avikṣatāḥ sma dṛśyante vamanto rudhiraṃ mukhaiḥ || 47 ||
[Analyze grammar]

tato'bhavattamo ghoraṃ sainyena rajasā vṛte |
tānapākramato'drākṣaṃ tasmāddeśādariṃdamān |
aśvānrājanmanuṣyāṃśca rajasā saṃvṛte sati || 48 ||
[Analyze grammar]

bhūmau nipatitāścānye vamanto rudhiraṃ bahu |
keśākeśisamālagnā na śekuśceṣṭituṃ janāḥ || 49 ||
[Analyze grammar]

anyonyamaśvapṛṣṭhebhyo vikarṣanto mahābalāḥ |
mallā iva samāsādya nijaghnuritaretaram |
aśvaiśca vyapakṛṣyanta bahavo'tra gatāsavaḥ || 50 ||
[Analyze grammar]

bhūmau nipatitāścānye bahavo vijayaiṣiṇaḥ |
tatra tatra vyadṛśyanta puruṣāḥ śūramāninaḥ || 51 ||
[Analyze grammar]

raktokṣitaiśchinnabhujairapakṛṣṭaśiroruhaiḥ |
vyadṛśyata mahī kīrṇā śataśo'tha sahasraśaḥ || 52 ||
[Analyze grammar]

dūraṃ na śakyaṃ tatrāsīdgantumaśvena kenacit |
sāśvārohairhatairaśvairāvṛte vasudhātale || 53 ||
[Analyze grammar]

rudhirokṣitasaṃnāhairāttaśastrairudāyudhaiḥ |
nānāpraharaṇairghoraiḥ parasparavadhaiṣibhiḥ |
susaṃnikṛṣṭaiḥ saṃgrāme hatabhūyiṣṭhasainikaiḥ || 54 ||
[Analyze grammar]

sa muhūrtaṃ tato yuddhvā saubalo'tha viśāṃ pate |
ṣaṭsahasrairhayaiḥ śiṣṭairapāyācchakunistataḥ || 55 ||
[Analyze grammar]

tathaiva pāṇḍavānīkaṃ rudhireṇa samukṣitam |
ṣaṭsahasrairhayaiḥ śiṣṭairapāyācchrāntavāhanam || 56 ||
[Analyze grammar]

aśvārohāstu pāṇḍūnāmabruvanrudhirokṣitāḥ |
susaṃnikṛṣṭāḥ saṃgrāme bhūyiṣṭhaṃ tyaktajīvitāḥ || 57 ||
[Analyze grammar]

neha śakyaṃ rathairyoddhuṃ kuta eva mahāgajaiḥ |
rathāneva rathā yāntu kuñjarāḥ kuñjarānapi || 58 ||
[Analyze grammar]

pratiyāto hi śakuniḥ svamanīkamavasthitaḥ |
na punaḥ saubalo rājā yuddhamabhyāgamiṣyati || 59 ||
[Analyze grammar]

tatastu draupadeyāśca te ca mattā mahādvipāḥ |
prayayuryatra pāñcālyo dhṛṣṭadyumno mahārathaḥ || 60 ||
[Analyze grammar]

sahadevo'pi kauravya rajomeghe samutthite |
ekākī prayayau tatra yatra rājā yudhiṣṭhiraḥ || 61 ||
[Analyze grammar]

tatasteṣu prayāteṣu śakuniḥ saubalaḥ punaḥ |
pārśvato'bhyahanatkruddho dhṛṣṭadyumnasya vāhinīm || 62 ||
[Analyze grammar]

tatpunastumulaṃ yuddhaṃ prāṇāṃstyaktvābhyavartata |
tāvakānāṃ pareṣāṃ ca parasparavadhaiṣiṇām || 63 ||
[Analyze grammar]

te hyanyonyamavekṣanta tasminvīrasamāgame |
yodhāḥ paryapatanrājañśataśo'tha sahasraśaḥ || 64 ||
[Analyze grammar]

asibhiśchidyamānānāṃ śirasāṃ lokasaṃkṣaye |
prādurāsīnmahāśabdastālānāṃ patatāmiva || 65 ||
[Analyze grammar]

vimuktānāṃ śarīrāṇāṃ bhinnānāṃ patatāṃ bhuvi |
sāyudhānāṃ ca bāhūnāmurūṇāṃ ca viśāṃ pate |
āsītkaṭakaṭāśabdaḥ sumahānromaharṣaṇaḥ || 66 ||
[Analyze grammar]

nighnanto niśitaiḥ śastrairbhrātṝnputrānsakhīnapi |
yodhāḥ paripatanti sma yathāmiṣakṛte khagāḥ || 67 ||
[Analyze grammar]

anyonyaṃ pratisaṃrabdhāḥ samāsādya parasparam |
ahaṃ pūrvamahaṃ pūrvamiti nyaghnansahasraśaḥ || 68 ||
[Analyze grammar]

saṃghātairāsanabhraṣṭairaśvārohairgatāsubhiḥ |
hayāḥ paripatanti sma śataśo'tha sahasraśaḥ || 69 ||
[Analyze grammar]

sphuratāṃ pratipiṣṭānāmaśvānāṃ śīghrasāriṇām |
stanatāṃ ca manuṣyāṇāṃ saṃnaddhānāṃ viśāṃ pate || 70 ||
[Analyze grammar]

śaktyṛṣṭiprāsaśabdaśca tumulaḥ samajāyata |
bhindatāṃ paramarmāṇi rājandurmantrite tava || 71 ||
[Analyze grammar]

śramābhibhūtāḥ saṃrabdhāḥ śrāntavāhāḥ pipāsitāḥ |
vikṣatāśca śitaiḥ śastrairabhyavartanta tāvakāḥ || 72 ||
[Analyze grammar]

mattā rudhiragandhena bahavo'tra vicetasaḥ |
jaghnuḥ parānsvakāṃścaiva prāptānprāptānanantarān || 73 ||
[Analyze grammar]

bahavaśca gataprāṇāḥ kṣatriyā jayagṛddhinaḥ |
bhūmāvabhyapatanrājañśaravṛṣṭibhirāvṛtāḥ || 74 ||
[Analyze grammar]

vṛkagṛdhraśṛgālānāṃ tumule modane'hani |
āsīdbalakṣayo ghorastava putrasya paśyataḥ || 75 ||
[Analyze grammar]

narāśvakāyasaṃchannā bhūmirāsīdviśāṃ pate |
rudhirodakacitrā ca bhīrūṇāṃ bhayavardhinī || 76 ||
[Analyze grammar]

asibhiḥ paṭṭiśaiḥ śūlaistakṣamāṇāḥ punaḥ punaḥ |
tāvakāḥ pāṇḍavāścaiva nābhyavartanta bhārata || 77 ||
[Analyze grammar]

praharanto yathāśakti yāvatprāṇasya dhāraṇam |
yodhāḥ paripatanti sma vamanto rudhiraṃ vraṇaiḥ || 78 ||
[Analyze grammar]

śiro gṛhītvā keśeṣu kabandhaḥ samadṛśyata |
udyamya niśitaṃ khaḍgaṃ rudhireṇa samukṣitam || 79 ||
[Analyze grammar]

athotthiteṣu bahuṣu kabandheṣu janādhipa |
tathā rudhiragandhena yodhāḥ kaśmalamāviśan || 80 ||
[Analyze grammar]

mandībhūte tataḥ śabde pāṇḍavānāṃ mahadbalam |
alpāvaśiṣṭaisturagairabhyavartata saubalaḥ || 81 ||
[Analyze grammar]

tato'bhyadhāvaṃstvaritāḥ pāṇḍavā jayagṛddhinaḥ |
padātayaśca nāgāśca sādinaścodyatāyudhāḥ || 82 ||
[Analyze grammar]

koṣṭakīkṛtya cāpyenaṃ parikṣipya ca sarvaśaḥ |
śastrairnānāvidhairjaghnuryuddhapāraṃ titīrṣavaḥ || 83 ||
[Analyze grammar]

tvadīyāstāṃstu saṃprekṣya sarvataḥ samabhidrutān |
sāśvapattidviparathāḥ pāṇḍavānabhidudruvuḥ || 84 ||
[Analyze grammar]

kecitpadātayaḥ padbhirmuṣṭibhiśca parasparam |
nijaghnuḥ samare śūrāḥ kṣīṇaśastrāstato'patan || 85 ||
[Analyze grammar]

rathebhyo rathinaḥ peturdvipebhyo hastisādinaḥ |
vimānebhya iva bhraṣṭāḥ siddhāḥ puṇyakṣayādyathā || 86 ||
[Analyze grammar]

evamanyonyamāyastā yodhā jaghnurmahāmṛdhe |
pitṝnbhrātṝnvayasyāṃśca putrānapi tathāpare || 87 ||
[Analyze grammar]

evamāsīdamaryādaṃ yuddhaṃ bharatasattama |
prāsāsibāṇakalile vartamāne sudāruṇe || 88 ||
[Analyze grammar]