Chapter 23

saṃjaya uvāca |
tasmiñśabde mṛdau jāte pāṇḍavairnihate bale |
aśvaiḥ saptaśataiḥ śiṣṭairupāvartata saubalaḥ || 1 ||
[Analyze grammar]

sa yātvā vāhinīṃ tūrṇamabravīttvarayanyudhi |
yudhyadhvamiti saṃhṛṣṭāḥ punaḥ punarariṃdamaḥ |
apṛcchatkṣatriyāṃstatra kva nu rājā mahārathaḥ || 2 ||
[Analyze grammar]

śakunestu vacaḥ śrutvā ta ūcurbharatarṣabha |
asau tiṣṭhati kauravyo raṇamadhye mahārathaḥ || 3 ||
[Analyze grammar]

yatraitatsumahacchatraṃ pūrṇacandrasamaprabham |
yatraite satalatrāṇā rathāstiṣṭhanti daṃśitāḥ || 4 ||
[Analyze grammar]

yatraiṣa śabdastumulaḥ parjanyaninadopamaḥ |
tatra gaccha drutaṃ rājaṃstato drakṣyasi kauravam || 5 ||
[Analyze grammar]

evamuktastu taiḥ śūraiḥ śakuniḥ saubalastadā |
prayayau tatra yatrāsau putrastava narādhipa |
sarvataḥ saṃvṛto vīraiḥ samareṣvanivartibhiḥ || 6 ||
[Analyze grammar]

tato duryodhanaṃ dṛṣṭvā rathānīke vyavasthitam |
sarathāṃstāvakānsarvānharṣayañśakunistataḥ || 7 ||
[Analyze grammar]

duryodhanamidaṃ vākyaṃ hṛṣṭarūpo viśāṃ pate |
kṛtakāryamivātmānaṃ manyamāno'bravīnnṛpam || 8 ||
[Analyze grammar]

jahi rājanrathānīkamaśvāḥ sarve jitā mayā |
nātyaktvā jīvitaṃ saṃkhye śakyo jetuṃ yudhiṣṭhiraḥ || 9 ||
[Analyze grammar]

hate tasminrathānīke pāṇḍavenābhipālite |
gajānetānhaniṣyāmaḥ padātīṃścetarāṃstathā || 10 ||
[Analyze grammar]

śrutvā tu vacanaṃ tasya tāvakā jayagṛddhinaḥ |
javenābhyapatanhṛṣṭāḥ pāṇḍavānāmanīkinīm || 11 ||
[Analyze grammar]

sarve vivṛtatūṇīrāḥ pragṛhītaśarāsanāḥ |
śarāsanāni dhunvānāḥ siṃhanādaṃ pracakrire || 12 ||
[Analyze grammar]

tato jyātalanirghoṣaḥ punarāsīdviśāṃ pate |
prādurāsīccharāṇāṃ ca sumuktānāṃ sudāruṇaḥ || 13 ||
[Analyze grammar]

tānsamīpagatāndṛṣṭvā javenodyatakārmukān |
uvāca devakīputraṃ kuntīputro dhanaṃjayaḥ || 14 ||
[Analyze grammar]

codayāśvānasaṃbhrāntaḥ praviśaitadbalārṇavam |
antamadya gamiṣyāmi śatrūṇāṃ niśitaiḥ śaraiḥ || 15 ||
[Analyze grammar]

aṣṭādaśa dinānyadya yuddhasyāsya janārdana |
vartamānasya mahataḥ samāsādya parasparam || 16 ||
[Analyze grammar]

anantakalpā dhvajinī bhūtvā hyeṣāṃ mahātmanām |
kṣayamadya gatā yuddhe paśya daivaṃ yathāvidham || 17 ||
[Analyze grammar]

samudrakalpaṃ tu balaṃ dhārtarāṣṭrasya mādhava |
asmānāsādya saṃjātaṃ goṣpadopamamacyuta || 18 ||
[Analyze grammar]

hate bhīṣme ca saṃdadhyācchivaṃ syādiha mādhava |
na ca tatkṛtavānmūḍho dhārtarāṣṭraḥ subāliśaḥ || 19 ||
[Analyze grammar]

uktaṃ bhīṣmeṇa yadvākyaṃ hitaṃ pathyaṃ ca mādhava |
taccāpi nāsau kṛtavānvītabuddhiḥ suyodhanaḥ || 20 ||
[Analyze grammar]

tasmiṃstu patite bhīṣme pracyute pṛthivītale |
na jāne kāraṇaṃ kiṃ nu yena yuddhamavartata || 21 ||
[Analyze grammar]

mūḍhāṃstu sarvathā manye dhārtarāṣṭrānsubāliśān |
patite śaṃtanoḥ putre ye'kārṣuḥ saṃyugaṃ punaḥ || 22 ||
[Analyze grammar]

anantaraṃ ca nihate droṇe brahmavidāṃ vare |
rādheye ca vikarṇe ca naivāśāmyata vaiśasam || 23 ||
[Analyze grammar]

alpāvaśiṣṭe sainye'sminsūtaputre ca pātite |
saputre vai naravyāghre naivāśāmyata vaiśasam || 24 ||
[Analyze grammar]

śrutāyuṣi hate śūre jalasaṃdhe ca paurave |
śrutāyudhe ca nṛpatau naivāśāmyata vaiśasam || 25 ||
[Analyze grammar]

bhūriśravasi śalye ca śālve caiva janārdana |
āvantyeṣu ca vīreṣu naivāśāmyata vaiśasam || 26 ||
[Analyze grammar]

jayadrathe ca nihate rākṣase cāpyalāyudhe |
bāhlike somadatte ca naivāśāmyata vaiśasam || 27 ||
[Analyze grammar]

bhagadatte hate śūre kāmboje ca sudakṣiṇe |
duḥśāsane ca nihate naivāśāmyata vaiśasam || 28 ||
[Analyze grammar]

dṛṣṭvā ca nihatāñśūrānpṛthaṅmāṇḍalikānnṛpān |
balinaśca raṇe kṛṣṇa naivāśāmyata vaiśasam || 29 ||
[Analyze grammar]

akṣauhiṇīpatīndṛṣṭvā bhīmasenena pātitān |
mohādvā yadi vā lobhānnaivāśāmyata vaiśasam || 30 ||
[Analyze grammar]

ko nu rājakule jātaḥ kauraveyo viśeṣataḥ |
nirarthakaṃ mahadvairaṃ kuryādanyaḥ suyodhanāt || 31 ||
[Analyze grammar]

guṇato'bhyadhikaṃ jñātvā balataḥ śauryato'pi vā |
amūḍhaḥ ko nu yudhyeta jānanprājño hitāhitam || 32 ||
[Analyze grammar]

yanna tasya mano hyāsīttvayoktasya hitaṃ vacaḥ |
praśame pāṇḍavaiḥ sārdhaṃ so'nyasya śṛṇuyātkatham || 33 ||
[Analyze grammar]

yena śāṃtanavo bhīṣmo droṇo vidura eva ca |
pratyākhyātāḥ śamasyārthe kiṃ nu tasyādya bheṣajam || 34 ||
[Analyze grammar]

maurkhyādyena pitā vṛddhaḥ pratyākhyāto janārdana |
tathā mātā hitaṃ vākyaṃ bhāṣamāṇā hitaiṣiṇī |
pratyākhyātā hyasatkṛtya sa kasmai rocayedvacaḥ || 35 ||
[Analyze grammar]

kulāntakaraṇo vyaktaṃ jāta eṣa janārdana |
tathāsya dṛśyate ceṣṭā nītiścaiva viśāṃ pate |
naiṣa dāsyati no rājyamiti me matiracyuta || 36 ||
[Analyze grammar]

ukto'haṃ bahuśastāta vidureṇa mahātmanā |
na jīvandāsyate bhāgaṃ dhārtarāṣṭraḥ kathaṃcana || 37 ||
[Analyze grammar]

yāvatprāṇā dhamiṣyanti dhārtarāṣṭrasya mānada |
tāvadyuṣmāsvapāpeṣu pracariṣyati pātakam || 38 ||
[Analyze grammar]

na sa yukto'nyathā jetumṛte yuddhena mādhava |
ityabravītsadā māṃ hi viduraḥ satyadarśanaḥ || 39 ||
[Analyze grammar]

tatsarvamadya jānāmi vyavasāyaṃ durātmanaḥ |
yaduktaṃ vacanaṃ tena vidureṇa mahātmanā || 40 ||
[Analyze grammar]

yo hi śrutvā vacaḥ pathyaṃ jāmadagnyādyathātatham |
avāmanyata durbuddhirdhruvaṃ nāśamukhe sthitaḥ || 41 ||
[Analyze grammar]

uktaṃ hi bahubhiḥ siddhairjātamātre suyodhane |
enaṃ prāpya durātmānaṃ kṣayaṃ kṣatraṃ gamiṣyati || 42 ||
[Analyze grammar]

tadidaṃ vacanaṃ teṣāṃ niruktaṃ vai janārdana |
kṣayaṃ yātā hi rājāno duryodhanakṛte bhṛśam || 43 ||
[Analyze grammar]

so'dya sarvānraṇe yodhānnihaniṣyāmi mādhava |
kṣatriyeṣu hateṣvāśu śūnye ca śibire kṛte || 44 ||
[Analyze grammar]

vadhāya cātmano'smābhiḥ saṃyugaṃ rocayiṣyati |
tadantaṃ hi bhavedvairamanumānena mādhava || 45 ||
[Analyze grammar]

evaṃ paśyāmi vārṣṇeya cintayanprajñayā svayā |
vidurasya ca vākyena ceṣṭayā ca durātmanaḥ || 46 ||
[Analyze grammar]

saṃyāhi bhāratīṃ vīra yāvaddhanmi śitaiḥ śaraiḥ |
duryodhanaṃ durātmānaṃ vāhinīṃ cāsya saṃyuge || 47 ||
[Analyze grammar]

kṣemamadya kariṣyāmi dharmarājasya mādhava |
hatvaitaddurbalaṃ sainyaṃ dhārtarāṣṭrasya paśyataḥ || 48 ||
[Analyze grammar]

saṃjaya uvāca |
abhīśuhasto dāśārhastathoktaḥ savyasācinā |
tadbalaughamamitrāṇāmabhītaḥ prāviśadraṇe || 49 ||
[Analyze grammar]

śarāsanavaraṃ ghoraṃ śaktikaṇṭakasaṃvṛtam |
gadāparighapanthānaṃ rathanāgamahādrumam || 50 ||
[Analyze grammar]

hayapattilatākīrṇaṃ gāhamāno mahāyaśāḥ |
vyacarattatra govindo rathenātipatākinā || 51 ||
[Analyze grammar]

te hayāḥ pāṇḍurā rājanvahanto'rjunamāhave |
dikṣu sarvāsvadṛśyanta dāśārheṇa pracoditāḥ || 52 ||
[Analyze grammar]

tataḥ prāyādrathenājau savyasācī paraṃtapaḥ |
kirañśaraśatāṃstīkṣṇānvāridhārā ivāmbudaḥ || 53 ||
[Analyze grammar]

prādurāsīnmahāñśabdaḥ śarāṇāṃ nataparvaṇām |
iṣubhiśchādyamānānāṃ samare savyasācinā || 54 ||
[Analyze grammar]

asajjantastanutreṣu śaraughāḥ prāpatanbhuvi |
indrāśanisamasparśā gāṇḍīvapreṣitāḥ śarāḥ || 55 ||
[Analyze grammar]

narānnāgānsamāhatya hayāṃścāpi viśāṃ pate |
apatanta raṇe bāṇāḥ pataṃgā iva ghoṣiṇaḥ || 56 ||
[Analyze grammar]

āsītsarvamavacchannaṃ gāṇḍīvapreṣitaiḥ śaraiḥ |
na prājñāyanta samare diśo vā pradiśo'pi vā || 57 ||
[Analyze grammar]

sarvamāsījjagatpūrṇaṃ pārthanāmāṅkitaiḥ śaraiḥ |
rukmapuṅkhaistailadhautaiḥ karmāraparimārjitaiḥ || 58 ||
[Analyze grammar]

te dahyamānāḥ pārthena pāvakeneva kuñjarāḥ |
samāsīdanta kauravyā vadhyamānāḥ śitaiḥ śaraiḥ || 59 ||
[Analyze grammar]

śaracāpadharaḥ pārthaḥ prajvalanniva bhārata |
dadāha samare yodhānkakṣamagniriva jvalan || 60 ||
[Analyze grammar]

yathā vanānte vanapairvisṛṣṭaḥ kakṣaṃ dahetkṛṣṇagatiḥ saghoṣaḥ |
bhūridrumaṃ śuṣkalatāvitānaṃ bhṛśaṃ samṛddho jvalanaḥ pratāpī || 61 ||
[Analyze grammar]

evaṃ sa nārācagaṇapratāpī śarārciruccāvacatigmatejāḥ |
dadāha sarvāṃ tava putrasenāmamṛṣyamāṇastarasā tarasvī || 62 ||
[Analyze grammar]

tasyeṣavaḥ prāṇaharāḥ sumuktā nāsajjanvai varmasu rukmapuṅkhāḥ |
na ca dvitīyaṃ pramumoca bāṇaṃ nare haye vā paramadvipe vā || 63 ||
[Analyze grammar]

anekarūpākṛtibhirhi bāṇairmahārathānīkamanupraviśya |
sa eva ekastava putrasenāṃ jaghāna daityāniva vajrapāṇiḥ || 64 ||
[Analyze grammar]