Chapter 21

saṃjaya uvāca |
putrastu te mahārāja rathastho rathināṃ varaḥ |
durutsaho babhau yuddhe yathā rudraḥ pratāpavān || 1 ||
[Analyze grammar]

tasya bāṇasahasraistu pracchannā hyabhavanmahī |
parāṃśca siṣice bāṇairdhārābhiriva parvatān || 2 ||
[Analyze grammar]

na ca so'sti pumānkaścitpāṇḍavānāṃ mahāhave |
hayo gajo ratho vāpi yo'sya bāṇairavikṣataḥ || 3 ||
[Analyze grammar]

yaṃ yaṃ hi samare yodhaṃ prapaśyāmi viśāṃ pate |
sa sa bāṇaiścito'bhūdvai putreṇa tava bhārata || 4 ||
[Analyze grammar]

yathā sainyena rajasā samuddhūtena vāhinī |
pratyadṛśyata saṃchannā tathā bāṇairmahātmanaḥ || 5 ||
[Analyze grammar]

bāṇabhūtāmapaśyāma pṛthivīṃ pṛthivīpate |
duryodhanena prakṛtāṃ kṣiprahastena dhanvinā || 6 ||
[Analyze grammar]

teṣu yodhasahasreṣu tāvakeṣu pareṣu ca |
eko duryodhano hyāsītpumāniti matirmama || 7 ||
[Analyze grammar]

tatrādbhutamapaśyāma tava putrasya vikramam |
yadekaṃ sahitāḥ pārthā nātyavartanta bhārata || 8 ||
[Analyze grammar]

yudhiṣṭhiraṃ śatenājau vivyādha bharatarṣabha |
bhīmasenaṃ ca saptatyā sahadevaṃ ca saptabhiḥ || 9 ||
[Analyze grammar]

nakulaṃ ca catuḥṣaṣṭyā dhṛṣṭadyumnaṃ ca pañcabhiḥ |
saptabhirdraupadeyāṃśca tribhirvivyādha sātyakim |
dhanuściccheda bhallena sahadevasya māriṣa || 10 ||
[Analyze grammar]

tadapāsya dhanuśchinnaṃ mādrīputraḥ pratāpavān |
abhyadhāvata rājānaṃ pragṛhyānyanmahaddhanuḥ |
tato duryodhanaṃ saṃkhye vivyādha daśabhiḥ śaraiḥ || 11 ||
[Analyze grammar]

nakulaśca tato vīro rājānaṃ navabhiḥ śaraiḥ |
ghorarūpairmaheṣvāso vivyādha ca nanāda ca || 12 ||
[Analyze grammar]

sātyakiścāpi rājānaṃ śareṇānataparvaṇā |
draupadeyāstrisaptatyā dharmarājaśca saptabhiḥ |
aśītyā bhīmasenaśca śarai rājānamārdayat || 13 ||
[Analyze grammar]

samantātkīryamāṇastu bāṇasaṃghairmahātmabhiḥ |
na cacāla mahārāja sarvasainyasya paśyataḥ || 14 ||
[Analyze grammar]

lāghavaṃ sauṣṭhavaṃ cāpi vīryaṃ caiva mahātmanaḥ |
ati sarvāṇi bhūtāni dadṛśuḥ sarvamānavāḥ || 15 ||
[Analyze grammar]

dhārtarāṣṭrāstu rājendra yātvā tu svalpamantaram |
apaśyamānā rājānaṃ paryavartanta daṃśitāḥ || 16 ||
[Analyze grammar]

teṣāmāpatatāṃ ghorastumulaḥ samajāyata |
kṣubdhasya hi samudrasya prāvṛṭkāle yathā niśi || 17 ||
[Analyze grammar]

samāsādya raṇe te tu rājānamaparājitam |
pratyudyayurmaheṣvāsāḥ pāṇḍavānātatāyinaḥ || 18 ||
[Analyze grammar]

bhīmasenaṃ raṇe kruddhaṃ droṇaputro nyavārayat |
tato bāṇairmahārāja pramuktaiḥ sarvatodiśam |
nājñāyanta raṇe vīrā na diśaḥ pradiśastathā || 19 ||
[Analyze grammar]

tāvubhau krūrakarmāṇāvubhau bhārata duḥsahau |
ghorarūpamayudhyetāṃ kṛtapratikṛtaiṣiṇau |
trāsayantau jagatsarvaṃ jyākṣepavihatatvacau || 20 ||
[Analyze grammar]

śakunistu raṇe vīro yudhiṣṭhiramapīḍayat |
tasyāśvāṃścaturo hatvā subalasya suto vibhuḥ |
nādaṃ cakāra balavānsarvasainyāni kampayan || 21 ||
[Analyze grammar]

etasminnantare vīraṃ rājānamaparājitam |
apovāha rathenājau sahadevaḥ pratāpavān || 22 ||
[Analyze grammar]

athānyaṃ rathamāsthāya dharmarājo yudhiṣṭhiraḥ |
śakuniṃ navabhirviddhvā punarvivyādha pañcabhiḥ |
nanāda ca mahānādaṃ pravaraḥ sarvadhanvinām || 23 ||
[Analyze grammar]

tadyuddhamabhavaccitraṃ ghorarūpaṃ ca māriṣa |
īkṣitṛprītijananaṃ siddhacāraṇasevitam || 24 ||
[Analyze grammar]

ulūkastu maheṣvāsaṃ nakulaṃ yuddhadurmadam |
abhyadravadameyātmā śaravarṣaiḥ samantataḥ || 25 ||
[Analyze grammar]

tathaiva nakulaḥ śūraḥ saubalasya sutaṃ raṇe |
śaravarṣeṇa mahatā samantātparyavārayat || 26 ||
[Analyze grammar]

tau tatra samare vīrau kulaputrau mahārathau |
yodhayantāvapaśyetāṃ parasparakṛtāgasau || 27 ||
[Analyze grammar]

tathaiva kṛtavarmā tu śaineyaṃ śatrutāpanam |
yodhayañśuśubhe rājanbalaṃ śakra ivāhave || 28 ||
[Analyze grammar]

duryodhano dhanuśchittvā dhṛṣṭadyumnasya saṃyuge |
athainaṃ chinnadhanvānaṃ vivyādha niśitaiḥ śaraiḥ || 29 ||
[Analyze grammar]

dhṛṣṭadyumno'pi samare pragṛhya paramāyudham |
rājānaṃ yodhayāmāsa paśyatāṃ sarvadhanvinām || 30 ||
[Analyze grammar]

tayoryuddhaṃ mahaccāsītsaṃgrāme bharatarṣabha |
prabhinnayoryathā saktaṃ mattayorvarahastinoḥ || 31 ||
[Analyze grammar]

gautamastu raṇe kruddho draupadeyānmahābalān |
vivyādha bahubhiḥ śūraḥ śaraiḥ saṃnataparvabhiḥ || 32 ||
[Analyze grammar]

tasya tairabhavadyuddhamindriyairiva dehinaḥ |
ghorarūpamasaṃvāryaṃ nirmaryādamatīva ca || 33 ||
[Analyze grammar]

te ca taṃ pīḍayāmāsurindriyāṇīva bāliśam |
sa ca tānpratisaṃrabdhaḥ pratyayodhayadāhave || 34 ||
[Analyze grammar]

evaṃ citramabhūdyuddhaṃ tasya taiḥ saha bhārata |
utthāyotthāya hi yathā dehināmindriyairvibho || 35 ||
[Analyze grammar]

narāścaiva naraiḥ sārdhaṃ dantino dantibhistathā |
hayā hayaiḥ samāsaktā rathino rathibhistathā |
saṃkulaṃ cābhavadbhūyo ghorarūpaṃ viśāṃ pate || 36 ||
[Analyze grammar]

idaṃ citramidaṃ ghoramidaṃ raudramiti prabho |
yuddhānyāsanmahārāja ghorāṇi ca bahūni ca || 37 ||
[Analyze grammar]

te samāsādya samare parasparamariṃdamāḥ |
vivyadhuścaiva jaghnuśca samāsādya mahāhave || 38 ||
[Analyze grammar]

teṣāṃ śastrasamudbhūtaṃ rajastīvramadṛśyata |
pravātenoddhataṃ rājandhāvadbhiścāśvasādibhiḥ || 39 ||
[Analyze grammar]

rathanemisamudbhūtaṃ niḥśvāsaiścāpi dantinām |
rajaḥ saṃdhyābhrakapilaṃ divākarapathaṃ yayau || 40 ||
[Analyze grammar]

rajasā tena saṃpṛkte bhāskare niṣprabhīkṛte |
saṃchāditābhavadbhūmiste ca śūrā mahārathāḥ || 41 ||
[Analyze grammar]

muhūrtādiva saṃvṛttaṃ nīrajaskaṃ samantataḥ |
vīraśoṇitasiktāyāṃ bhūmau bharatasattama |
upāśāmyattatastīvraṃ tadrajo ghoradarśanam || 42 ||
[Analyze grammar]

tato'paśyaṃ mahārāja dvaṃdvayuddhāni bhārata |
yathāprāgryaṃ yathājyeṣṭhaṃ madhyāhne vai sudāruṇe |
varmaṇāṃ tatra rājendra vyadṛśyantojjvalāḥ prabhāḥ || 43 ||
[Analyze grammar]

śabdaḥ sutumulaḥ saṃkhye śarāṇāṃ patatāmabhūt |
mahāveṇuvanasyeva dahyamānasya sarvataḥ || 44 ||
[Analyze grammar]