Chapter 67

saṃjaya uvāca |
athābravīdvāsudevo rathastho rādheya diṣṭyā smarasīha dharmam |
prāyeṇa nīcā vyasaneṣu magnā nindanti daivaṃ kukṛtaṃ na tattat || 1 ||
[Analyze grammar]

yaddraupadīmekavastrāṃ sabhāyāmānāyya tvaṃ caiva suyodhanaśca |
duḥśāsanaḥ śakuniḥ saubalaśca na te karṇa pratyabhāttatra dharmaḥ || 2 ||
[Analyze grammar]

yadā sabhāyāṃ kaunteyamanakṣajñaṃ yudhiṣṭhiram |
akṣajñaḥ śakunirjetā tadā dharmaḥ kva te gataḥ || 3 ||
[Analyze grammar]

yadā rajasvalāṃ kṛṣṇāṃ duḥśāsanavaśe sthitām |
sabhāyāṃ prāhasaḥ karṇa kva te dharmastadā gataḥ || 4 ||
[Analyze grammar]

rājyalubdhaḥ punaḥ karṇa samāhvayasi pāṇḍavam |
gāndhārarājamāśritya kva te dharmastadā gataḥ || 5 ||
[Analyze grammar]

evamukte tu rādheye vāsudevena pāṇḍavam |
manyurabhyāviśattīvraḥ smṛtvā tattaddhanaṃjayam || 6 ||
[Analyze grammar]

tasya krodhena sarvebhyaḥ srotobhyastejaso'rciṣaḥ |
prādurāsanmahārāja tadadbhutamivābhavat || 7 ||
[Analyze grammar]

taṃ samīkṣya tataḥ karṇo brahmāstreṇa dhanaṃjayam |
abhyavarṣatpunaryatnamakarodrathasarjane |
tadastramastreṇāvārya prajahārāsya pāṇḍavaḥ || 8 ||
[Analyze grammar]

tato'nyadastraṃ kaunteyo dayitaṃ jātavedasaḥ |
mumoca karṇamuddiśya tatprajajvāla vai bhṛśam || 9 ||
[Analyze grammar]

vāruṇena tataḥ karṇaḥ śamayāmāsa pāvakam |
jīmūtaiśca diśaḥ sarvāścakre timiradurdināḥ || 10 ||
[Analyze grammar]

pāṇḍaveyastvasaṃbhrānto vāyavyāstreṇa vīryavān |
apovāha tadābhrāṇi rādheyasya prapaśyataḥ || 11 ||
[Analyze grammar]

taṃ hastikakṣyāpravaraṃ ca bāṇaiḥ suvarṇamuktāmaṇivajramṛṣṭam |
kālaprayatnottamaśilpiyatnaiḥ kṛtaṃ surūpaṃ vitamaskamuccaiḥ || 12 ||
[Analyze grammar]

ūrjaskaraṃ tava sainyasya nityamamitravitrāsanamīḍyarūpam |
vikhyātamādityasamasya loke tviṣā samaṃ pāvakabhānucandraiḥ || 13 ||
[Analyze grammar]

tataḥ kṣureṇādhiratheḥ kirīṭī suvarṇapuṅkhena śitena yattaḥ |
śriyā jvalantaṃ dhvajamunmamātha mahārathasyādhirathermahātmā || 14 ||
[Analyze grammar]

yaśaśca dharmaśca jayaśca māriṣa priyāṇi sarvāṇi ca tena ketunā |
tadā kurūṇāṃ hṛdayāni cāpatanbabhūva hāheti ca nisvano mahān || 15 ||
[Analyze grammar]

atha tvarankarṇavadhāya pāṇḍavo mahendravajrānaladaṇḍasaṃnibham |
ādatta pārtho'ñjalikaṃ niṣaṅgātsahasraraśmeriva raśmimuttamam || 16 ||
[Analyze grammar]

marmacchidaṃ śoṇitamāṃsadigdhaṃ vaiśvānarārkapratimaṃ mahārham |
narāśvanāgāsuharaṃ tryaratniṃ ṣaḍvājamañjogatimugravegam || 17 ||
[Analyze grammar]

sahasranetrāśanitulyatejasaṃ samānakravyādamivātiduḥsaham |
pinākanārāyaṇacakrasaṃnibhaṃ bhayaṃkaraṃ prāṇabhṛtāṃ vināśanam || 18 ||
[Analyze grammar]

yuktvā mahāstreṇa pareṇa mantravidvikṛṣya gāṇḍīvamuvāca sasvanam |
ayaṃ mahāstro'pratimo dhṛtaḥ śaraḥ śarīrabhiccāsuharaśca durhṛdaḥ || 19 ||
[Analyze grammar]

tapo'sti taptaṃ guravaśca toṣitā mayā yadiṣṭaṃ suhṛdāṃ tathā śrutam |
anena satyena nihantvayaṃ śaraḥ sudaṃśitaḥ karṇamariṃ mamājitaḥ || 20 ||
[Analyze grammar]

ityūcivāṃstaṃ sa mumoca bāṇaṃ dhanaṃjayaḥ karṇavadhāya ghoram |
kṛtyāmatharvāṅgirasīmivogrāṃ dīptāmasahyāṃ yudhi mṛtyunāpi || 21 ||
[Analyze grammar]

bruvankirīṭī tamatiprahṛṣṭo ayaṃ śaro me vijayāvaho'stu |
jighāṃsurarkendusamaprabhāvaḥ karṇaṃ samāptiṃ nayatāṃ yamāya || 22 ||
[Analyze grammar]

teneṣuvaryeṇa kirīṭamālī prahṛṣṭarūpo vijayāvahena |
jighāṃsurarkendusamaprabheṇa cakre viṣaktaṃ ripumātatāyī || 23 ||
[Analyze grammar]

tadudyatādityasamānavarcasaṃ śarannabhomadhyagabhāskaropamam |
varāṅgamurvyāmapataccamūpaterdivākaro'stādiva raktamaṇḍalaḥ || 24 ||
[Analyze grammar]

tadasya dehī satataṃ sukhoditaṃ svarūpamatyarthamudārakarmaṇaḥ |
pareṇa kṛcchreṇa śarīramatyajadgṛhaṃ maharddhīva sasaṅgamīśvaraḥ || 25 ||
[Analyze grammar]

śarairvibhugnaṃ vyasu tadvivarmaṇaḥ papāta karṇasya śarīramucchritam |
sravadvraṇaṃ gairikatoyavisravaṃ gireryathā vajrahataṃ śirastathā || 26 ||
[Analyze grammar]

dehāttu karṇasya nipātitasya tejo dīptaṃ khaṃ vigāhyācireṇa |
tadadbhutaṃ sarvamanuṣyayodhāḥ paśyanti rājannihate sma karṇe || 27 ||
[Analyze grammar]

taṃ somakāḥ prekṣya hataṃ śayānaṃ prītā nādaṃ saha sainyairakurvan |
tūryāṇi cājaghnuratīva hṛṣṭā vāsāṃsi caivādudhuvurbhujāṃśca |
balānvitāścāpyapare hyanṛtyannanyonyamāśliṣya nadanta ūcuḥ || 28 ||
[Analyze grammar]

dṛṣṭvā tu karṇaṃ bhuvi niṣṭanantaṃ hataṃ rathātsāyakenāvabhinnam |
mahānilenāgnimivāpaviddhaṃ yajñāvasāne śayane niśānte || 29 ||
[Analyze grammar]

śarairācitasarvāṅgaḥ śoṇitaughapariplutaḥ |
vibhāti dehaḥ karṇasya svaraśmibhirivāṃśumān || 30 ||
[Analyze grammar]

pratāpya senāmāmitrīṃ dīptaiḥ śaragabhastibhiḥ |
balinārjunakālena nīto'staṃ karṇabhāskaraḥ || 31 ||
[Analyze grammar]

astaṃ gacchanyathādityaḥ prabhāmādāya gacchati |
evaṃ jīvitamādāya karṇasyeṣurjagāma ha || 32 ||
[Analyze grammar]

aparāhṇe parāhṇasya sūtaputrasya māriṣa |
chinnamañjalikenājau sotsedhamapatacchiraḥ || 33 ||
[Analyze grammar]

uparyupari sainyānāṃ tasya śatrostadañjasā |
śiraḥ karṇasya sotsedhamiṣuḥ so'pāharaddrutam || 34 ||
[Analyze grammar]

saṃjaya uvāca |
karṇaṃ tu śūraṃ patitaṃ pṛthivyāṃ śarācitaṃ śoṇitadigdhagātram |
dṛṣṭvā śayānaṃ bhuvi madrarājaśchinnadhvajenāpayayau rathena || 35 ||
[Analyze grammar]

karṇe hate kuravaḥ prādravanta bhayārditā gāḍhaviddhāśca saṃkhye |
avekṣamāṇā muhurarjunasya dhvajaṃ mahāntaṃ vapuṣā jvalantam || 36 ||
[Analyze grammar]

sahasranetrapratimānakarmaṇaḥ sahasrapatrapratimānanaṃ śubham |
sahasraraśmirdinasaṃkṣaye yathā tathāpatattasya śiro vasuṃdharām || 37 ||
[Analyze grammar]