Chapter 37

saṃjaya uvāca |
vartamāne tadā yuddhe kṣatriyāṇāṃ nimajjane |
gāṇḍīvasya mahānghoṣaḥ śuśruve yudhi māriṣa || 1 ||
[Analyze grammar]

saṃśaptakānāṃ kadanamakarodyatra pāṇḍavaḥ |
kosalānāṃ tathā rājannārāyaṇabalasya ca || 2 ||
[Analyze grammar]

saṃśaptakāstu samare śaravṛṣṭiṃ samantataḥ |
apātayanpārthamūrdhni jayagṛddhāḥ pramanyavaḥ || 3 ||
[Analyze grammar]

tāṃ vṛṣṭiṃ sahasā rājaṃstarasā dhārayanprabhuḥ |
vyagāhata raṇe pārtho vinighnanrathināṃ varaḥ || 4 ||
[Analyze grammar]

nigṛhya tu rathānīkaṃ kaṅkapatraiḥ śilāśitaiḥ |
āsasāda raṇe pārthaḥ suśarmāṇaṃ mahāratham || 5 ||
[Analyze grammar]

sa tasya śaravarṣāṇi vavarṣa rathināṃ varaḥ |
tathā saṃśaptakāścaiva pārthasya samare sthitāḥ || 6 ||
[Analyze grammar]

suśarmā tu tataḥ pārthaṃ viddhvā navabhirāśugaiḥ |
janārdanaṃ tribhirbāṇairabhyahandakṣiṇe bhuje |
tato'pareṇa bhallena ketuṃ vivyādha māriṣa || 7 ||
[Analyze grammar]

sa vānaravaro rājanviśvakarmakṛto mahān |
nanāda sumahannādaṃ bhīṣayanvai nanarda ca || 8 ||
[Analyze grammar]

kapestu ninadaṃ śrutvā saṃtrastā tava vāhinī |
bhayaṃ vipulamādāya niśceṣṭā samapadyata || 9 ||
[Analyze grammar]

tataḥ sā śuśubhe senā niśceṣṭāvasthitā nṛpa |
nānāpuṣpasamākīrṇaṃ yathā caitrarathaṃ vanam || 10 ||
[Analyze grammar]

pratilabhya tataḥ saṃjñāṃ yodhāste kurusattama |
arjunaṃ siṣicurbāṇaiḥ parvataṃ jaladā iva |
parivavrustadā sarve pāṇḍavasya mahāratham || 11 ||
[Analyze grammar]

te hayānrathacakre ca ratheṣāścāpi bhārata |
nigṛhya balavattūrṇaṃ siṃhanādamathānadan || 12 ||
[Analyze grammar]

apare jagṛhuścaiva keśavasya mahābhujau |
pārthamanye mahārāja rathasthaṃ jagṛhurmudā || 13 ||
[Analyze grammar]

keśavastu tadā bāhū vidhunvanraṇamūrdhani |
pātayāmāsa tānsarvānduṣṭahastīva hastinaḥ || 14 ||
[Analyze grammar]

tataḥ kruddho raṇe pārthaḥ saṃvṛtastairmahārathaiḥ |
nigṛhītaṃ rathaṃ dṛṣṭvā keśavaṃ cāpyabhidrutam |
rathārūḍhāṃśca subahūnpadātīṃścāpyapātayat || 15 ||
[Analyze grammar]

āsannāṃśca tato yodhāñśarairāsannayodhibhiḥ |
cyāvayāmāsa samare keśavaṃ cedamabravīt || 16 ||
[Analyze grammar]

paśya kṛṣṇa mahābāho saṃśaptakagaṇānmayā |
kurvāṇāndāruṇaṃ karma vadhyamānānsahasraśaḥ || 17 ||
[Analyze grammar]

rathabandhamimaṃ ghoraṃ pṛthivyāṃ nāsti kaścana |
yaḥ saheta pumāṃlloke madanyo yadupuṃgava || 18 ||
[Analyze grammar]

ityevamuktvā bībhatsurdevadattamathādhamat |
pāñcajanyaṃ ca kṛṣṇo'pi pūrayanniva rodasī || 19 ||
[Analyze grammar]

taṃ tu śaṅkhasvanaṃ śrutvā saṃśaptakavarūthinī |
saṃcacāla mahārāja vitrastā cābhavadbhṛśam || 20 ||
[Analyze grammar]

padabandhaṃ tataścakre pāṇḍavaḥ paravīrahā |
nāgamastraṃ mahārāja saṃprodīrya muhurmuhuḥ || 21 ||
[Analyze grammar]

yānuddiśya raṇe pārthaḥ padabandhaṃ cakāra ha |
te baddhāḥ padabandhena pāṇḍavena mahātmanā |
niśceṣṭā abhavanrājannaśmasāramayā iva || 22 ||
[Analyze grammar]

niśceṣṭāṃstu tato yodhānavadhītpāṇḍunandanaḥ |
yathendraḥ samare daityāṃstārakasya vadhe purā || 23 ||
[Analyze grammar]

te vadhyamānāḥ samare mumucustaṃ rathottamam |
āyudhāni ca sarvāṇi visraṣṭumupacakramuḥ || 24 ||
[Analyze grammar]

tataḥ suśarmā rājendra gṛhītāṃ vīkṣya vāhinīm |
sauparṇamastraṃ tvaritaḥ prāduścakre mahārathaḥ || 25 ||
[Analyze grammar]

tataḥ suparṇāḥ saṃpeturbhakṣayanto bhujaṃgamān |
te vai vidudruvurnāgā dṛṣṭvā tānkhacarānnṛpa || 26 ||
[Analyze grammar]

babhau balaṃ tadvimuktaṃ padabandhādviśāṃ pate |
meghavṛndādyathā mukto bhāskarastāpayanprajāḥ || 27 ||
[Analyze grammar]

vipramuktāstu te yodhāḥ phalgunasya rathaṃ prati |
sasṛjurbāṇasaṃghāṃśca śastrasaṃghāṃśca māriṣa || 28 ||
[Analyze grammar]

tāṃ mahāstramayīṃ vṛṣṭiṃ saṃchidya śaravṛṣṭibhiḥ |
vyavātiṣṭhattato yodhānvāsaviḥ paravīrahā || 29 ||
[Analyze grammar]

suśarmā tu tato rājanbāṇenānataparvaṇā |
arjunaṃ hṛdaye viddhvā vivyādhānyaistribhiḥ śaraiḥ |
sa gāḍhaviddho vyathito rathopastha upāviśat || 30 ||
[Analyze grammar]

pratilabhya tataḥ saṃjñāṃ śvetāśvaḥ kṛṣṇasārathiḥ |
aindramastramameyātmā prāduścakre tvarānvitaḥ |
tato bāṇasahasrāṇi samutpannāni māriṣa || 31 ||
[Analyze grammar]

sarvadikṣu vyadṛśyanta sūdayanto nṛpa dvipān |
hayānrathāṃśca samare śastraiḥ śatasahasraśaḥ || 32 ||
[Analyze grammar]

vadhyamāne tataḥ sainye vipulā bhīḥ samāviśat |
saṃśaptakagaṇānāṃ ca gopālānāṃ ca bhārata |
na hi kaścitpumāṃstatra yo'rjunaṃ pratyayudhyata || 33 ||
[Analyze grammar]

paśyatāṃ tatra vīrāṇāmahanyata mahadbalam |
hanyamānamapaśyaṃśca niśceṣṭāḥ sma parākrame || 34 ||
[Analyze grammar]

ayutaṃ tatra yodhānāṃ hatvā pāṇḍusuto raṇe |
vyabhrājata raṇe rājanvidhūmo'gniriva jvalan || 35 ||
[Analyze grammar]

caturdaśa sahasrāṇi yāni śiṣṭāni bhārata |
rathānāmayutaṃ caiva trisāhasrāśca dantinaḥ || 36 ||
[Analyze grammar]

tataḥ saṃśaptakā bhūyaḥ parivavrurdhanaṃjayam |
martavyamiti niścitya jayaṃ vāpi nivartanam || 37 ||
[Analyze grammar]

tatra yuddhaṃ mahaddhyāsīttāvakānāṃ viśāṃ pate |
śūreṇa balinā sārdhaṃ pāṇḍavena kirīṭinā || 38 ||
[Analyze grammar]