Chapter 38

saṃjaya uvāca |
kṛtavarmā kṛpo drauṇiḥ sūtaputraśca māriṣa |
ulūkaḥ saubalaścaiva rājā ca saha sodaraiḥ || 1 ||
[Analyze grammar]

sīdamānāṃ camūṃ dṛṣṭvā pāṇḍuputrabhayārditām |
samujjihīrṣurvegena bhinnāṃ nāvamivārṇave || 2 ||
[Analyze grammar]

tato yuddhamatīvāsīnmuhūrtamiva bhārata |
bhīrūṇāṃ trāsajananaṃ śūrāṇāṃ harṣavardhanam || 3 ||
[Analyze grammar]

kṛpeṇa śaravarṣāṇi vipramuktāni saṃyuge |
sṛñjayāḥ śātayāmāsuḥ śalabhānāṃ vrajā iva || 4 ||
[Analyze grammar]

śikhaṇḍī tu tataḥ kruddho gautamaṃ tvarito yayau |
vavarṣa śaravarṣāṇi samantādeva brāhmaṇe || 5 ||
[Analyze grammar]

kṛpastu śaravarṣaṃ tadvinihatya mahāstravit |
śikhaṇḍinaṃ raṇe kruddho vivyādha daśabhiḥ śaraiḥ || 6 ||
[Analyze grammar]

tataḥ śikhaṇḍī kupītaḥ śaraiḥ saptabhirāhave |
kṛpaṃ vivyādha subhṛśaṃ kaṅkapatrairajihmagaiḥ || 7 ||
[Analyze grammar]

tataḥ kṛpaḥ śaraistīkṣṇaiḥ so'tividdho mahārathaḥ |
vyaśvasūtarathaṃ cakre pārṣataṃ tu dvijottamaḥ || 8 ||
[Analyze grammar]

hatāśvāttu tato yānādavaplutya mahārathaḥ |
carmakhaḍge ca saṃgṛhya satvaraṃ brāhmaṇaṃ yayau || 9 ||
[Analyze grammar]

tamāpatantaṃ sahasā śaraiḥ saṃnataparvabhiḥ |
chādayāmāsa samare tadadbhutamivābhavat || 10 ||
[Analyze grammar]

tatrādbhutamapaśyāma śilānāṃ plavanaṃ yathā |
niśceṣṭo yadraṇe rājañśikhaṇḍī samatiṣṭhata || 11 ||
[Analyze grammar]

kṛpeṇa chāditaṃ dṛṣṭvā nṛpottama śikhaṇḍinam |
pratyudyayau kṛpaṃ tūrṇaṃ dhṛṣṭadyumno mahārathaḥ || 12 ||
[Analyze grammar]

dhṛṣṭadyumnaṃ tato yāntaṃ śāradvatarathaṃ prati |
pratijagrāha vegena kṛtavarmā mahārathaḥ || 13 ||
[Analyze grammar]

yudhiṣṭhiramathāyāntaṃ śāradvatarathaṃ prati |
saputraṃ sahasenaṃ ca droṇaputro nyavārayat || 14 ||
[Analyze grammar]

nakulaṃ sahadevaṃ ca tvaramāṇau mahārathau |
pratijagrāha te putraḥ śaravarṣeṇa vārayan || 15 ||
[Analyze grammar]

bhīmasenaṃ karūṣāṃśca kekayānsahasṛñjayān |
karṇo vaikartano yuddhe vārayāmāsa bhārata || 16 ||
[Analyze grammar]

śikhaṇḍinastato bāṇānkṛpaḥ śāradvato yudhi |
prāhiṇottvarayā yukto didhakṣuriva māriṣa || 17 ||
[Analyze grammar]

tāñśarānpreṣitāṃstena samantāddhemabhūṣaṇān |
ciccheda khaḍgamāvidhya bhrāmayaṃśca punaḥ punaḥ || 18 ||
[Analyze grammar]

śatacandraṃ tataścarma gautamaḥ pārṣatasya ha |
vyadhamatsāyakaistūrṇaṃ tata uccukruśurjanāḥ || 19 ||
[Analyze grammar]

sa vicarmā mahārāja khaḍgapāṇirupādravat |
kṛpasya vaśamāpanno mṛtyorāsyamivāturaḥ || 20 ||
[Analyze grammar]

śāradvataśarairgrastaṃ kliśyamānaṃ mahābalam |
citraketusuto rājansuketustvarito yayau || 21 ||
[Analyze grammar]

vikiranbrāhmaṇaṃ yuddhe bahubhirniśitaiḥ śaraiḥ |
abhyāpatadameyātmā gautamasya rathaṃ prati || 22 ||
[Analyze grammar]

dṛṣṭvāviṣahyaṃ taṃ yuddhe brāhmaṇaṃ caritavratam |
apayātastatastūrṇaṃ śikhaṇḍī rājasattama || 23 ||
[Analyze grammar]

suketustu tato rājangautamaṃ navabhiḥ śaraiḥ |
viddhvā vivyādha saptatyā punaścainaṃ tribhiḥ śaraiḥ || 24 ||
[Analyze grammar]

athāsya saśaraṃ cāpaṃ punaściccheda māriṣa |
sārathiṃ ca śareṇāsya bhṛśaṃ marmaṇyatāḍayat || 25 ||
[Analyze grammar]

gautamastu tataḥ kruddho dhanurgṛhya navaṃ dṛḍham |
suketuṃ triṃśatā bāṇaiḥ sarvamarmasvatāḍayat || 26 ||
[Analyze grammar]

sa vihvalitasarvāṅgaḥ pracacāla rathottame |
bhūmicāle yathā vṛkṣaścalatyākampito bhṛśam || 27 ||
[Analyze grammar]

calatastasya kāyāttu śiro jvalitakuṇḍalam |
soṣṇīṣaṃ saśirastrāṇaṃ kṣurapreṇānvapātayat || 28 ||
[Analyze grammar]

tacchiraḥ prāpatadbhūmau śyenāhṛtamivāmiṣam |
tato'sya kāyo vasudhāṃ paścātprāpa tadā cyutaḥ || 29 ||
[Analyze grammar]

tasminhate mahārāja trastāstasya padānugāḥ |
gautamaṃ samare tyaktvā dudruvuste diśo daśa || 30 ||
[Analyze grammar]

dhṛṣṭadyumnaṃ tu samare saṃnivārya mahābalaḥ |
kṛtavarmābravīddhṛṣṭastiṣṭha tiṣṭheti pārṣatam || 31 ||
[Analyze grammar]

tadabhūttumulaṃ yuddhaṃ vṛṣṇipārṣatayo raṇe |
āmiṣārthe yathā yuddhaṃ śyenayorgṛddhayornṛpa || 32 ||
[Analyze grammar]

dhṛṣṭadyumnastu samare hārdikyaṃ navabhiḥ śaraiḥ |
ājaghānorasi kruddhaḥ pīḍayanhṛdikātmajam || 33 ||
[Analyze grammar]

kṛtavarmā tu samare pārṣatena dṛḍhāhataḥ |
pārṣataṃ sarathaṃ sāśvaṃ chādayāmāsa sāyakaiḥ || 34 ||
[Analyze grammar]

sarathaśchādito rājandhṛṣṭadyumno na dṛśyate |
meghairiva paricchanno bhāskaro jaladāgame || 35 ||
[Analyze grammar]

vidhūya taṃ bāṇagaṇaṃ śaraiḥ kanakabhūṣaṇaiḥ |
vyarocata raṇe rājandhṛṣṭadyumnaḥ kṛtavraṇaḥ || 36 ||
[Analyze grammar]

tatastu pārṣataḥ kruddhaḥ śastravṛṣṭiṃ sudāruṇām |
kṛtavarmāṇamāsādya vyasṛjatpṛtanāpatiḥ || 37 ||
[Analyze grammar]

tāmāpatantīṃ sahasā śastravṛṣṭiṃ nirantarām |
śarairanekasāhasrairhārdikyo vyadhamadyudhi || 38 ||
[Analyze grammar]

dṛṣṭvā tu dāritāṃ yuddhe śastravṛṣṭiṃ duruttarām |
kṛtavarmāṇamabhyetya vārayāmāsa pārṣataḥ || 39 ||
[Analyze grammar]

sārathiṃ cāsya tarasā prāhiṇodyamasādanam |
bhallena śitadhāreṇa sa hataḥ prāpatadrathāt || 40 ||
[Analyze grammar]

dhṛṣṭadyumnastu balavāñjitvā śatruṃ mahāratham |
kauravānsamare tūrṇaṃ vārayāmāsa sāyakaiḥ || 41 ||
[Analyze grammar]

tataste tāvakā yodhā dhṛṣṭadyumnamupādravan |
siṃhanādaravaṃ kṛtvā tato yuddhamavartata || 42 ||
[Analyze grammar]