Chapter 34

saṃjaya uvāca |
tānabhidravato dṛṣṭvā pāṇḍavāṃstāvakaṃ balam |
krośatastava putrasya na sma rājannyavartata || 1 ||
[Analyze grammar]

tataḥ pakṣātprapakṣācca prapakṣaiścāpi dakṣiṇāt |
udastaśastrāḥ kuravo bhīmamabhyadravanraṇe || 2 ||
[Analyze grammar]

karṇo'pi dṛṣṭvā dravato dhārtarāṣṭrānparāṅmukhān |
haṃsavarṇānhayāgryāṃstānpraiṣīdyatra vṛkodaram || 3 ||
[Analyze grammar]

te preṣitā mahārāja śalyenāhavaśobhinā |
bhīmasenarathaṃ prāpya samasajjanta vājinaḥ || 4 ||
[Analyze grammar]

dṛṣṭvā karṇaṃ samāyāntaṃ bhīmaḥ krodhasamanvitaḥ |
matiṃ dadhre vināśāya karṇasya bharatarṣabha || 5 ||
[Analyze grammar]

so'bravītsātyakiṃ vīraṃ dhṛṣṭadyumnaṃ ca pārṣatam |
enaṃ rakṣata rājānaṃ dharmātmānaṃ yudhiṣṭhiram |
saṃśayānmahato muktaṃ kathaṃcitprekṣato mama || 6 ||
[Analyze grammar]

agrato me kṛto rājā chinnasarvaparicchadaḥ |
duryodhanasya prītyarthaṃ rādheyena durātmanā || 7 ||
[Analyze grammar]

antamadya kariṣyāmi tasya duḥkhasya pārṣata |
hantā vāsmi raṇe karṇaṃ sa vā māṃ nihaniṣyati |
saṃgrāmeṇa sughoreṇa satyametadbravīmi vaḥ || 8 ||
[Analyze grammar]

rājānamadya bhavatāṃ nyāsabhūtaṃ dadāmi vai |
asya saṃrakṣaṇe sarve yatadhvaṃ vigatajvarāḥ || 9 ||
[Analyze grammar]

evamuktvā mahābāhuḥ prāyādādhirathiṃ prati |
siṃhanādena mahatā sarvāḥ saṃnādayandiśaḥ || 10 ||
[Analyze grammar]

dṛṣṭvā tvaritamāyāntaṃ bhīmaṃ yuddhābhinandinam |
sūtaputramathovāca madrāṇāmīśvaro vibhuḥ || 11 ||
[Analyze grammar]

paśya karṇa mahābāhuṃ kruddhaṃ pāṇḍavanandanam |
dīrghakālārjitaṃ krodhaṃ moktukāmaṃ tvayi dhruvam || 12 ||
[Analyze grammar]

īdṛśaṃ nāsya rūpaṃ me dṛṣṭapūrvaṃ kadācana |
abhimanyau hate karṇa rākṣase vā ghaṭotkace || 13 ||
[Analyze grammar]

trailokyasya samastasya śaktaḥ kruddho nivāraṇe |
bibharti yādṛśaṃ rūpaṃ kālāgnisadṛśaṃ śubham || 14 ||
[Analyze grammar]

iti bruvati rādheyaṃ madrāṇāmīśvare nṛpa |
abhyavartata vai karṇaṃ krodhadīpto vṛkodaraḥ || 15 ||
[Analyze grammar]

tathāgataṃ tu saṃprekṣya bhīmaṃ yuddhābhinandinam |
abravīdvacanaṃ śalyaṃ rādheyaḥ prahasanniva || 16 ||
[Analyze grammar]

yaduktaṃ vacanaṃ me'dya tvayā madrajaneśvara |
bhīmasenaṃ prati vibho tatsatyaṃ nātra saṃśayaḥ || 17 ||
[Analyze grammar]

eṣa śūraśca vīraśca krodhanaśca vṛkodaraḥ |
nirapekṣaḥ śarīre ca prāṇataśca balādhikaḥ || 18 ||
[Analyze grammar]

ajñātavāsaṃ vasatā virāṭanagare tadā |
draupadyāḥ priyakāmena kevalaṃ bāhusaṃśrayāt |
gūḍhabhāvaṃ samāśritya kīcakaḥ sagaṇo hataḥ || 19 ||
[Analyze grammar]

so'dya saṃgrāmaśirasi saṃnaddhaḥ krodhamūrcchitaḥ |
kiṃkarodyatadaṇḍena mṛtyunāpi vrajedraṇam || 20 ||
[Analyze grammar]

cirakālābhilaṣito mamāyaṃ tu manorathaḥ |
arjunaṃ samare hanyāṃ māṃ vā hanyāddhanaṃjayaḥ |
sa me kadācidadyaiva bhavedbhīmasamāgamāt || 21 ||
[Analyze grammar]

nihate bhīmasene tu yadi vā virathīkṛte |
abhiyāsyati māṃ pārthastanme sādhu bhaviṣyati |
atra yanmanyase prāptaṃ tacchīghraṃ saṃpradhāraya || 22 ||
[Analyze grammar]

etacchrutvā tu vacanaṃ rādheyasya mahātmanaḥ |
uvāca vacanaṃ śalyaḥ sūtaputraṃ tathāgatam || 23 ||
[Analyze grammar]

abhiyāsi mahābāho bhīmasenaṃ mahābalam |
nirasya bhīmasenaṃ tu tataḥ prāpsyasi phalgunam || 24 ||
[Analyze grammar]

yaste kāmo'bhilaṣitaścirātprabhṛti hṛdgataḥ |
sa vai saṃpatsyate karṇa satyametadbravīmi te || 25 ||
[Analyze grammar]

evamukte tataḥ karṇaḥ śalyaṃ punarabhāṣata |
hantāhamarjunaṃ saṃkhye māṃ vā hantā dhanaṃjayaḥ |
yuddhe manaḥ samādhāya yāhi yāhītyacodayat || 26 ||
[Analyze grammar]

tataḥ prāyādrathenāśu śalyastatra viśāṃ pate |
yatra bhīmo maheṣvāso vyadrāvayata vāhinīm || 27 ||
[Analyze grammar]

tatastūryaninādaśca bherīṇāṃ ca mahāsvanaḥ |
udatiṣṭhata rājendra karṇabhīmasamāgame || 28 ||
[Analyze grammar]

bhīmaseno'tha saṃkruddhastava sainyaṃ durāsadam |
nārācairvimalaistīkṣṇairdiśaḥ prādrāvayadbalī || 29 ||
[Analyze grammar]

sa saṃnipātastumulo bhīmarūpo viśāṃ pate |
āsīdraudro mahārāja karṇapāṇḍavayormṛdhe |
tato muhūrtādrājendra pāṇḍavaḥ karṇamādravat || 30 ||
[Analyze grammar]

tamāpatantaṃ saṃprekṣya karṇo vaikartano vṛṣaḥ |
ājaghānorasi kruddho nārācena stanāntare |
punaścainamameyātmā śaravarṣairavākirat || 31 ||
[Analyze grammar]

sa viddhaḥ sūtaputreṇa chādayāmāsa patribhiḥ |
vivyādha niśitaiḥ karṇa navabhirnataparvabhiḥ || 32 ||
[Analyze grammar]

tasya karṇo dhanurmadhye dvidhā ciccheda patriṇā |
atha taṃ chinnadhanvānamabhyavidhyatstanāntare |
nārācena sutīkṣṇena sarvāvaraṇabhedinā || 33 ||
[Analyze grammar]

so'nyatkārmukamādāya sūtaputraṃ vṛkodaraḥ |
rājanmarmasu marmajño viddhvā suniśitaiḥ śaraiḥ |
nanāda balavannādaṃ kampayanniva rodasī || 34 ||
[Analyze grammar]

taṃ karṇaḥ pañcaviṃśatyā nārācānāṃ samārdayat |
madotkaṭaṃ vane dṛptamulkābhiriva kuñjaram || 35 ||
[Analyze grammar]

tataḥ sāyakabhinnāṅgaḥ pāṇḍavaḥ krodhamūrcchitaḥ |
saṃrambhāmarṣatāmrākṣaḥ sūtaputravadhecchayā || 36 ||
[Analyze grammar]

sa kārmuke mahāvegaṃ bhārasādhanamuttamam |
girīṇāmapi bhettāraṃ sāyakaṃ samayojayat || 37 ||
[Analyze grammar]

vikṛṣya balavaccāpamā karṇādatimārutiḥ |
taṃ mumoca maheṣvāsaḥ kruddhaḥ karṇajighāṃsayā || 38 ||
[Analyze grammar]

sa visṛṣṭo balavatā bāṇo vajrāśanisvanaḥ |
adārayadraṇe karṇaṃ vajravega ivācalam || 39 ||
[Analyze grammar]

sa bhīmasenābhihato sūtaputraḥ kurūdvaha |
niṣasāda rathopasthe visaṃjñaḥ pṛtanāpatiḥ || 40 ||
[Analyze grammar]

tato madrādhipo dṛṣṭvā visaṃjñaṃ sūtanandanam |
apovāha rathenājau karṇamāhavaśobhinam || 41 ||
[Analyze grammar]

tataḥ parājite karṇe dhārtarāṣṭrīṃ mahācamūm |
vyadrāvayadbhīmaseno yathendro dānavīṃ camūm || 42 ||
[Analyze grammar]