Chapter 35

dhṛtarāṣṭra uvāca |
suduṣkaramidaṃ karma kṛtaṃ bhīmena saṃjaya |
yena karṇo mahābāhū rathopasthe nipātitaḥ || 1 ||
[Analyze grammar]

karṇo hyeko raṇe hantā sṛñjayānpāṇḍavaiḥ saha |
iti duryodhanaḥ sūta prābravīnmāṃ muhurmuhuḥ || 2 ||
[Analyze grammar]

parājitaṃ tu rādheyaṃ dṛṣṭvā bhīmena saṃyuge |
tataḥ paraṃ kimakarotputro duryodhano mama || 3 ||
[Analyze grammar]

saṃjaya uvāca |
vibhrāntaṃ prekṣya rādheyaṃ sūtaputraṃ mahāhave |
mahatyā senayā rājansodaryānsamabhāṣata || 4 ||
[Analyze grammar]

śīghraṃ gacchata bhadraṃ vo rādheyaṃ parirakṣata |
bhīmasenabhayāgādhe majjantaṃ vyasanārṇave || 5 ||
[Analyze grammar]

te tu rājñā samādiṣṭā bhīmasenajighāṃsavaḥ |
abhyavartanta saṃkruddhāḥ pataṃgā iva pāvakam || 6 ||
[Analyze grammar]

śrutāyurdurdharaḥ krātho vivitsurvikaṭaḥ samaḥ |
niṣaṅgī kavacī pāśī tathā nandopanandakau || 7 ||
[Analyze grammar]

duṣpradharṣaḥ subāhuśca vātavegasuvarcasau |
dhanurgrāho durmadaśca tathā sattvasamaḥ sahaḥ || 8 ||
[Analyze grammar]

ete rathaiḥ parivṛtā vīryavanto mahābalāḥ |
bhīmasenaṃ samāsādya samantātparyavārayan |
te vyamuñcañśaravrātānnānāliṅgānsamantataḥ || 9 ||
[Analyze grammar]

sa tairabhyardyamānastu bhīmaseno mahābalaḥ |
teṣāmāpatatāṃ kṣipraṃ sutānāṃ te narādhipa |
rathaiḥ pañcāśatā sārdhaṃ pañcāśannyahanadrathān || 10 ||
[Analyze grammar]

vivitsostu tataḥ kruddho bhallenāpāharacchiraḥ |
sakuṇḍalaśirastrāṇaṃ pūrṇacandropamaṃ tadā |
bhīmena ca mahārāja sa papāta hato bhuvi || 11 ||
[Analyze grammar]

taṃ dṛṣṭvā nihataṃ śūraṃ bhrātaraḥ sarvataḥ prabho |
abhyadravanta samare bhīmaṃ bhīmaparākramam || 12 ||
[Analyze grammar]

tato'parābhyāṃ bhallābhyāṃ putrayoste mahāhave |
jahāra samare prāṇānbhīmo bhīmaparākramaḥ || 13 ||
[Analyze grammar]

tau dharāmanvapadyetāṃ vātarugṇāviva drumau |
vikaṭaśca samaścobhau devagarbhasamau nṛpa || 14 ||
[Analyze grammar]

tatastu tvarito bhīmaḥ krāthaṃ ninye yamakṣayam |
nārācena sutīkṣṇena sa hato nyapatadbhuvi || 15 ||
[Analyze grammar]

hāhākārastatastīvraḥ saṃbabhūva janeśvara |
vadhyamāneṣu te rājaṃstadā putreṣu dhanviṣu || 16 ||
[Analyze grammar]

teṣāṃ saṃlulite sainye bhīmaseno mahābalaḥ |
nandopanandau samare prāpayadyamasādanam || 17 ||
[Analyze grammar]

tataste prādravanbhītāḥ putrāste vihvalīkṛtāḥ |
bhīmasenaṃ raṇe dṛṣṭvā kālāntakayamopamam || 18 ||
[Analyze grammar]

putrāṃste nihatāndṛṣṭvā sūtaputro mahāmanāḥ |
haṃsavarṇānhayānbhūyaḥ prāhiṇodyatra pāṇḍavaḥ || 19 ||
[Analyze grammar]

te preṣitā mahārāja madrarājena vājinaḥ |
bhīmasenarathaṃ prāpya samasajjanta vegitāḥ || 20 ||
[Analyze grammar]

sa saṃnipātastumulo ghorarūpo viśāṃ pate |
āsīdraudro mahārāja karṇapāṇḍavayormṛdhe || 21 ||
[Analyze grammar]

dṛṣṭvā mama mahārāja tau sametau mahārathau |
āsīdbuddhiḥ kathaṃ nūnametadadya bhaviṣyati || 22 ||
[Analyze grammar]

tato muhūrtādrājendra nātikṛcchrāddhasanniva |
virathaṃ bhīmakarmāṇaṃ bhīmaṃ karṇaścakāra ha || 23 ||
[Analyze grammar]

viratho bharataśreṣṭhaḥ prahasannanilopamaḥ |
gadāhasto mahābāhurapatatsyandanottamāt || 24 ||
[Analyze grammar]

nāgānsaptaśatānrājannīṣādantānprahāriṇaḥ |
vyadhamatsahasā bhīmaḥ kruddharūpaḥ paraṃtapaḥ || 25 ||
[Analyze grammar]

dantaveṣṭeṣu netreṣu kambheṣu sa kaṭeṣu ca |
marmasvapi ca marmajño ninadanvyadhamadbhṛśam || 26 ||
[Analyze grammar]

tataste prādravanbhītāḥ pratīpaṃ prahitāḥ punaḥ |
mahāmātraistamāvavrurmeghā iva divākaram || 27 ||
[Analyze grammar]

tānsa saptaśatānnāgānsārohāyudhaketanān |
bhūmiṣṭho gadayā jaghne śaranmeghānivānilaḥ || 28 ||
[Analyze grammar]

tataḥ subalaputrasya nāgānatibalānpunaḥ |
pothayāmāsa kaunteyo dvāpañcāśatamāhave || 29 ||
[Analyze grammar]

tathā rathaśataṃ sāgraṃ pattīṃśca śataśo'parān |
nyahanatpāṇḍavo yuddhe tāpayaṃstava vāhinīm || 30 ||
[Analyze grammar]

pratāpyamānaṃ sūryeṇa bhīmena ca mahātmanā |
tava sainyaṃ saṃcukoca carma vahnigataṃ yathā || 31 ||
[Analyze grammar]

te bhīmabhayasaṃtrastāstāvakā bharatarṣabha |
vihāya samare bhīmaṃ dudruvurvai diśo daśa || 32 ||
[Analyze grammar]

rathāḥ pañcaśatāścānye hrādinaścarmavarmiṇaḥ |
bhīmamabhyadravaṃstūrṇaṃ śarapūgaiḥ samantataḥ || 33 ||
[Analyze grammar]

tānsasūtarathānsarvānsapatākādhvajāyudhān |
pothayāmāsa gadayā bhīmo viṣṇurivāsurān || 34 ||
[Analyze grammar]

tataḥ śakuninirdiṣṭāḥ sādinaḥ śūrasaṃmatāḥ |
trisāhasrā yayurbhīmaṃ śaktyṛṣṭiprāsapāṇayaḥ || 35 ||
[Analyze grammar]

tānpratyudgamya yavanānaśvārohānvarārihā |
vicaranvividhānmārgānghātayāmāsa pothayan || 36 ||
[Analyze grammar]

teṣāmāsīnmahāñśabdastāḍitānāṃ ca sārvaśaḥ |
asibhiśchidyamānānāṃ naḍānāmiva bhārata || 37 ||
[Analyze grammar]

evaṃ subalaputrasya trisāhasrānhayottamān |
hatvānyaṃ rathamāsthāya kruddho rādheyamabhyayāt || 38 ||
[Analyze grammar]

karṇo'pi samare rājandharmaputramariṃdamam |
śaraiḥ pracchādayāmāsa sārathiṃ cāpyapātayat || 39 ||
[Analyze grammar]

tataḥ saṃpradrutaṃ saṃkhye rathaṃ dṛṣṭvā mahārathaḥ |
anvadhāvatkiranbāṇaiḥ kaṅkapatrairajihmagaiḥ || 40 ||
[Analyze grammar]

rājānamabhi dhāvantaṃ śarairāvṛtya rodasī |
kruddhaḥ pracchādayāmāsa śarajālena mārutiḥ || 41 ||
[Analyze grammar]

saṃnivṛttastatastūrṇaṃ rādheyaḥ śatrukarśanaḥ |
bhīmaṃ pracchādayāmāsa samantānniśitaiḥ śaraiḥ || 42 ||
[Analyze grammar]

bhīmasenarathavyagraṃ karṇaṃ bhārata sātyakiḥ |
abhyardayadameyātmā pārṣṇigrahaṇakāraṇāt |
abhyavartata karṇastamardito'pi śarairbhṛśam || 43 ||
[Analyze grammar]

tāvanyonyaṃ samāsādya vṛṣabhau sarvadhanvinām |
visṛjantau śarāṃścitrānvibhrājetāṃ manasvinau || 44 ||
[Analyze grammar]

tābhyāṃ viyati rājendra vitataṃ bhīmadarśanam |
krauñcapṛṣṭhāruṇaṃ raudraṃ bāṇajālaṃ vyadṛśyata || 45 ||
[Analyze grammar]

naiva sūryaprabhāṃ khaṃ vā na diśaḥ pradiśaḥ kutaḥ |
prājñāsiṣma vayaṃ tābhyāṃ śarairmuktaiḥ sahasraśaḥ || 46 ||
[Analyze grammar]

madhyāhne tapato rājanbhāskarasya mahāprabhāḥ |
hṛtāḥ sarvāḥ śaraughaistaiḥ karṇamādhavayostadā || 47 ||
[Analyze grammar]

saubalaṃ kṛtavarmāṇaṃ drauṇimādhirathiṃ kṛpam |
saṃsaktānpāṇḍavairdṛṣṭvā nivṛttāḥ kuravaḥ punaḥ || 48 ||
[Analyze grammar]

teṣāmāpatatāṃ śabdastīvra āsīdviśāṃ pate |
uddhūtānāṃ yathā vṛṣṭyā sāgarāṇāṃ bhayāvahaḥ || 49 ||
[Analyze grammar]

te sene bhṛśasaṃvigne dṛṣṭvānyonyaṃ mahāraṇe |
harṣeṇa mahatā yukte parigṛhya parasparam || 50 ||
[Analyze grammar]

tataḥ pravavṛte yuddhaṃ madhyaṃ prāpte divākare |
yādṛśaṃ na kadāciddhi dṛṣṭapūrvaṃ na ca śrutam || 51 ||
[Analyze grammar]

balaughastu samāsādya balaughaṃ sahasā raṇe |
upāsarpata vegena jalaugha iva sāgaram || 52 ||
[Analyze grammar]

āsīnninādaḥ sumahānbalaughānāṃ parasparam |
garjatāṃ sāgaraughāṇāṃ yathā syānnisvano mahān || 53 ||
[Analyze grammar]

te tu sene samāsādya vegavatyau parasparam |
ekībhāvamanuprāpte nadyāviva samāgame || 54 ||
[Analyze grammar]

tataḥ pravavṛte yuddhaṃ ghorarūpaṃ viśāṃ pate |
kurūṇāṃ pāṇḍavānāṃ ca lipsatāṃ sumahadyaśaḥ || 55 ||
[Analyze grammar]

kurūṇāṃ garjatāṃ tatra avicchedakṛtā giraḥ |
śrūyante vividhā rājannāmānyuddiśya bhārata || 56 ||
[Analyze grammar]

yasya yaddhi raṇe nyaṅgaṃ pitṛto mātṛto'pi vā |
karmataḥ śīlato vāpi sa tacchrāvayate yudhi || 57 ||
[Analyze grammar]

tāndṛṣṭvā samare śūrāṃstarjayānānparasparam |
abhavanme matī rājannaiṣāmastīti jīvitam || 58 ||
[Analyze grammar]

teṣāṃ dṛṣṭvā tu kruddhānāṃ vapūṃṣyamitatejasām |
abhavanme bhayaṃ tīvraṃ kathametadbhaviṣyati || 59 ||
[Analyze grammar]

tataste pāṇḍavā rājankauravāśca mahārathāḥ |
tatakṣuḥ sāyakaistīkṣṇairnighnanto hi parasparam || 60 ||
[Analyze grammar]