Chapter 17

saṃjaya uvāca |
hastibhistu mahāmātrāstava putreṇa coditāḥ |
dhṛṣṭadyumnaṃ jighāṃsantaḥ kruddhāḥ pārṣatamabhyayuḥ || 1 ||
[Analyze grammar]

prācyāśca dākṣiṇātyāśca pravīrā gajayodhinaḥ |
aṅgā vaṅgāśca puṇḍrāśca māgadhāstāmraliptakāḥ || 2 ||
[Analyze grammar]

mekalāḥ kośalā madrā daśārṇā niṣadhāstathā |
gajayuddheṣu kuśalāḥ kaliṅgaiḥ saha bhārata || 3 ||
[Analyze grammar]

śaratomaranārācairvṛṣṭimanta ivāmbudāḥ |
siṣicuste tataḥ sarve pāñcālācalamāhave || 4 ||
[Analyze grammar]

tānsaṃmimardiṣurnāgānpārṣṇyaṅguṣṭhāṅkuśairbhṛśam |
pothitānpārṣato bāṇairnārācaiścābhyavīvṛṣat || 5 ||
[Analyze grammar]

ekaikaṃ daśabhiḥ ṣaḍbhiraṣṭābhirapi bhārata |
dviradānabhivivyādha kṣiptairgirinibhāñśaraiḥ |
pracchādyamāno dviradairmeghairiva divākaraḥ || 6 ||
[Analyze grammar]

paryāsuḥ pāṇḍupāñcālā nadanto niśitāyudhāḥ |
tānnāgānabhivarṣanto jyātantrīśaranāditaiḥ || 7 ||
[Analyze grammar]

nakulaḥ sahadevaśca draupadeyāḥ prabhadrakāḥ |
sātyakiśca śikhaṇḍī ca cekitānaśca vīryavān || 8 ||
[Analyze grammar]

te mlecchaiḥ preṣitā nāgā narānaśvānrathānapi |
hastairākṣipya mamṛduḥ padbhiścāpyatimanyavaḥ || 9 ||
[Analyze grammar]

bibhiduśca viṣāṇāgraiḥ samākṣipya ca cikṣipuḥ |
viṣāṇalagnaiścāpyanye paripeturvibhīṣaṇāḥ || 10 ||
[Analyze grammar]

pramukhe vartamānaṃ tu dvipaṃ vaṅgasya sātyakiḥ |
nārācenogravegena bhittvā marmaṇyapātayat || 11 ||
[Analyze grammar]

tasyāvarjitanāgasya dviradādutpatiṣyataḥ |
nārācenābhinadvakṣaḥ so'patadbhuvi sātyakeḥ || 12 ||
[Analyze grammar]

puṇḍrasyāpatato nāgaṃ calantamiva parvatam |
sahadevaḥ prayatnāttairnārācairvyahanattribhiḥ || 13 ||
[Analyze grammar]

vipatākaṃ viyantāraṃ vivarmadhvajajīvitam |
taṃ kṛtvā dviradaṃ bhūyaḥ sahadevo'ṅgamabhyagāt || 14 ||
[Analyze grammar]

sahadevaṃ tu nakulo vārayitvāṅgamārdayat |
nārācairyamadaṇḍābhaistribhirnāgaṃ śatena ca || 15 ||
[Analyze grammar]

divākarakaraprakhyānaṅgaścikṣepa tomarān |
nakulāya śatānyaṣṭau tridhaikaikaṃ tu so'cchinat || 16 ||
[Analyze grammar]

tathārdhacandreṇa śirastasya ciccheda pāṇḍavaḥ |
sa papāta hato mlecchastenaiva saha dantinā || 17 ||
[Analyze grammar]

ācāryaputre nihate hastiśikṣāviśārade |
aṅgāḥ kruddhā mahāmātrā nāgairnakulamabhyayuḥ || 18 ||
[Analyze grammar]

calatpatākaiḥ pramukhairhemakakṣyātanucchadaiḥ |
mimardiṣantastvaritāḥ pradīptairiva parvataiḥ || 19 ||
[Analyze grammar]

mekalotkalakāliṅgā niṣādāstāmraliptakāḥ |
śaratomaravarṣāṇi vimuñcanto jighāṃsavaḥ || 20 ||
[Analyze grammar]

taiśchādyamānaṃ nakulaṃ divākaramivāmbudaiḥ |
pari petuḥ susaṃrabdhāḥ pāṇḍupāñcālasomakāḥ || 21 ||
[Analyze grammar]

tatastadabhavadyuddhaṃ rathināṃ hastibhiḥ saha |
sṛjatāṃ śaravarṣāṇi tomarāṃśca sahasraśaḥ || 22 ||
[Analyze grammar]

nāgānāṃ prasphuṭuḥ kumbhā marmāṇi vividhāni ca |
dantāścaivātividdhānāṃ nārācairbhūṣaṇāni ca || 23 ||
[Analyze grammar]

teṣāmaṣṭau mahānāgāṃścatuḥṣaṣṭyā sutejanaiḥ |
sahadevo jaghānāśu te petuḥ saha sādibhiḥ || 24 ||
[Analyze grammar]

añjogatibhirāyamya prayatnāddhanuruttamam |
nārācairahanannāgānnakulaḥ kurunandana || 25 ||
[Analyze grammar]

tataḥ śaineyapāñcālyau draupadeyāḥ prabhadrakāḥ |
śikhaṇḍī ca mahānāgānsiṣicuḥ śaravṛṣṭibhiḥ || 26 ||
[Analyze grammar]

te pāṇḍuyodhāmbudharaiḥ śatrudviradaparvatāḥ |
bāṇavarṣairhatāḥ peturvajravarṣairivācalāḥ || 27 ||
[Analyze grammar]

evaṃ hatvā tava gajāṃste pāṇḍunarakuñjarāḥ |
drutaṃ senāmavaikṣanta bhinnakūlāmivāpagām || 28 ||
[Analyze grammar]

te tāṃ senāmavālokya pāṇḍuputrasya sainikāḥ |
vikṣobhayitvā ca punaḥ karṇamevābhidudruvuḥ || 29 ||
[Analyze grammar]

sahadevaṃ tataḥ kruddhaṃ dahantaṃ tava vāhinīm |
duḥśāsano mahārāja bhrātā bhrātaramabhyayāt || 30 ||
[Analyze grammar]

tau sametau mahāyuddhe dṛṣṭvā tatra narādhipāḥ |
siṃhanādaravāṃścakrurvāsāṃsyādudhuvuśca ha || 31 ||
[Analyze grammar]

tato bhārata kruddhena tava putreṇa dhanvinā |
pāṇḍuputrastribhirbāṇairvakṣasyabhihato balī || 32 ||
[Analyze grammar]

sahadevastato rājannārācena tavātmajam |
viddhvā vivyādha saptatyā sārathiṃ ca tribhistribhiḥ || 33 ||
[Analyze grammar]

duḥśāsanastadā rājaṃśchittvā cāpaṃ mahāhave |
sahadevaṃ trisaptatyā bāhvorurasi cārdayat || 34 ||
[Analyze grammar]

sahadevastataḥ kruddhaḥ khaḍgaṃ gṛhya mahāhave |
vyāvidhyata yudhāṃ śreṣṭhaḥ śrīmāṃstava sutaṃ prati || 35 ||
[Analyze grammar]

samārgaṇagaṇaṃ cāpaṃ chittvā tasya mahānasiḥ |
nipapāta tato bhūmau cyutaḥ sarpa ivāmbarāt || 36 ||
[Analyze grammar]

athānyaddhanurādāya sahadevaḥ pratāpavān |
duḥśāsanāya cikṣepa bāṇamantakaraṃ tataḥ || 37 ||
[Analyze grammar]

tamāpatantaṃ viśikhaṃ yamadaṇḍopamatviṣam |
khaḍgena śitadhāreṇa dvidhā ciccheda kauravaḥ || 38 ||
[Analyze grammar]

tamāpatantaṃ sahasā nistriṃśaṃ niśitaiḥ śaraiḥ |
pātayāmāsa samare sahadevo hasanniva || 39 ||
[Analyze grammar]

tato bāṇāṃścatuḥṣaṣṭiṃ tava putro mahāraṇe |
sahadevarathe tūrṇaṃ pātayāmāsa bhārata || 40 ||
[Analyze grammar]

tāñśarānsamare rājanvegenāpatato bahūn |
ekaikaṃ pañcabhirbāṇaiḥ sahadevo nyakṛntata || 41 ||
[Analyze grammar]

sa nivārya mahābāṇāṃstava putreṇa preṣitān |
athāsmai subahūnbāṇānmādrīputraḥ samācinot || 42 ||
[Analyze grammar]

tataḥ kruddho mahārāja sahadevaḥ pratāpavān |
samādhatta śaraṃ ghoraṃ mṛtyukālāntakopamam |
vikṛṣya balavaccāpaṃ tava putrāya so'sṛjat || 43 ||
[Analyze grammar]

sa taṃ nirbhidya vegena bhittvā ca kavacaṃ mahat |
prāviśaddharaṇīṃ rājanvalmīkamiva pannagaḥ |
tataḥ sa mumuhe rājaṃstava putro mahārathaḥ || 44 ||
[Analyze grammar]

mūḍhaṃ cainaṃ samālakṣya sārathistvarito ratham |
apovāha bhṛśaṃ trasto vadhyamānaṃ śitaiḥ śaraiḥ || 45 ||
[Analyze grammar]

parājitya raṇe taṃ tu pāṇḍavaḥ pāṇḍupūrvaja |
duryodhanabalaṃ hṛṣṭaḥ prāmathadvai samantataḥ || 46 ||
[Analyze grammar]

pipīlikāpuṭaṃ rājanyathāmṛdnānnaro ruṣā |
tathā sā kauravī senā mṛditā tena bhārata || 47 ||
[Analyze grammar]

nakulaṃ rabhasaṃ yuddhe dārayantaṃ varūthinīm |
karṇo vaikartano rājanvārayāmāsa vai tadā || 48 ||
[Analyze grammar]

nakulaśca tadā karṇaṃ prahasannidamabravīt |
cirasya bata dṛṣṭo'haṃ daivataiḥ saumyacakṣuṣā || 49 ||
[Analyze grammar]

yasya me tvaṃ raṇe pāpa cakṣurviṣayamāgataḥ |
tvaṃ hi mūlamanarthānāṃ vairasya kalahasya ca || 50 ||
[Analyze grammar]

tvaddoṣātkuravaḥ kṣīṇāḥ samāsādya parasparam |
tvāmadya samare hatvā kṛtakṛtyo'smi vijvaraḥ || 51 ||
[Analyze grammar]

evamuktaḥ pratyuvāca nakulaṃ sūtanandanaḥ |
sadṛśaṃ rājaputrasya dhanvinaśca viśeṣataḥ || 52 ||
[Analyze grammar]

praharasva raṇe bāla paśyāmastava pauruṣam |
karma kṛtvā raṇe śūra tataḥ katthitumarhasi || 53 ||
[Analyze grammar]

anuktvā samare tāta śūrā yudhyanti śaktitaḥ |
sa yudhyasva mayā śaktyā vineṣye darpamadya te || 54 ||
[Analyze grammar]

ityuktvā prāharattūrṇaṃ pāṇḍuputrāya sūtajaḥ |
vivyādha cainaṃ samare trisaptatyā śilīmukhaiḥ || 55 ||
[Analyze grammar]

nakulastu tato viddhaḥ sūtaputreṇa bhārata |
aśītyāśīviṣaprakhyaiḥ sūtaputramavidhyata || 56 ||
[Analyze grammar]

tasya karṇo dhanuśchittvā svarṇapuṅkhaiḥ śilāśitaiḥ |
triṃśatā parameṣvāsaḥ śaraiḥ pāṇḍavamārdayat || 57 ||
[Analyze grammar]

te tasya kavacaṃ bhittvā papuḥ śoṇitamāhave |
āśīviṣā yathā nāgā bhittvā gāṃ salilaṃ papuḥ || 58 ||
[Analyze grammar]

athānyaddhanurādāya hemapṛṣṭhaṃ durāsadam |
karṇaṃ vivyādha viṃśatyā sārathiṃ ca tribhiḥ śaraiḥ || 59 ||
[Analyze grammar]

tataḥ kruddho mahārāja nakulaḥ paravīrahā |
kṣurapreṇa sutīkṣṇena karṇasya dhanuracchinat || 60 ||
[Analyze grammar]

athainaṃ chinnadhanvānaṃ sāyakānāṃ śataistribhiḥ |
ājaghne prahasanvīraḥ sarvalokamahāratham || 61 ||
[Analyze grammar]

karṇamabhyarditaṃ dṛṣṭvā pāṇḍuputreṇa māriṣa |
vismayaṃ paramaṃ jagmū rathinaḥ saha daivataiḥ || 62 ||
[Analyze grammar]

athānyaddhanurādāya karṇo vaikartanastadā |
nakulaṃ pañcabhirbāṇairjatrudeśe samārdayat || 63 ||
[Analyze grammar]

uraḥsthairatha tairbāṇairmādrīputro vyarocata |
svaraśmibhirivādityo bhuvane visṛjanprabhām || 64 ||
[Analyze grammar]

nakulastu tataḥ karṇaṃ viddhvā saptabhirāyasaiḥ |
athāsya dhanuṣaḥ koṭiṃ punaściccheda māriṣa || 65 ||
[Analyze grammar]

so'nyatkārmukamādāya samare vegavattaram |
nakulasya tato bāṇaiḥ sarvato'vārayaddiśaḥ || 66 ||
[Analyze grammar]

saṃchādyamānaḥ sahasā karṇacāpacyutaiḥ śaraiḥ |
ciccheda sa śarāṃstūrṇaṃ śaraireva mahārathaḥ || 67 ||
[Analyze grammar]

tato bāṇamayaṃ jālaṃ vitataṃ vyomnyadṛśyata |
khadyotānāṃ gaṇaireva saṃpatadbhiryathā nabhaḥ || 68 ||
[Analyze grammar]

tairvimuktaiḥ śaraśataiśchāditaṃ gaganaṃ tadā |
śalabhānāṃ yathā vrātaistadvadāsītsamākulam || 69 ||
[Analyze grammar]

te śarā hemavikṛtāḥ saṃpatanto muhurmuhuḥ |
śreṇīkṛtā abhāsanta haṃsāḥ śreṇīgatā iva || 70 ||
[Analyze grammar]

bāṇajālāvṛte vyomni chādite ca divākare |
samasarpattato bhūtaṃ kiṃcideva viśāṃ pate || 71 ||
[Analyze grammar]

niruddhe tatra mārge tu śarasaṃghaiḥ samantataḥ |
vyarocatāṃ mahābhāgau bālasūryāvivoditau || 72 ||
[Analyze grammar]

karṇacāpacyutairbāṇairvadhyamānāstu somakāḥ |
avālīyanta rājendra vedanārtāḥ śarārditāḥ || 73 ||
[Analyze grammar]

nakulasya tathā bāṇairvadhyamānā camūstava |
vyaśīryata diśo rājanvātanunnā ivāmbudāḥ || 74 ||
[Analyze grammar]

te sene vadhyamāne tu tābhyāṃ divyairmahāśaraiḥ |
śarapātamapakramya tataḥ prekṣakavatsthite || 75 ||
[Analyze grammar]

protsārite jane tasminkarṇapāṇḍavayoḥ śaraiḥ |
vivyādhāte mahātmānāvanyonyaṃ śaravṛṣṭibhiḥ || 76 ||
[Analyze grammar]

nidarśayantau tvastrāṇi divyāni raṇamūrdhani |
chādayantau ca sahasā parasparavadhaiṣiṇau || 77 ||
[Analyze grammar]

nakulena śarā muktāḥ kaṅkabarhiṇavāsasaḥ |
te tu karṇamavacchādya vyatiṣṭhanta yathā pare || 78 ||
[Analyze grammar]

śaraveśmapraviṣṭau tau dadṛśāte na kaiścana |
candrasūryau yathā rājaṃśchādyamānau jalāgame || 79 ||
[Analyze grammar]

tataḥ kruddho raṇe karṇaḥ kṛtvā ghorataraṃ vapuḥ |
pāṇḍavaṃ chādayāmāsa samantāccharavṛṣṭibhiḥ || 80 ||
[Analyze grammar]

sa cchādyamānaḥ samare sūtaputreṇa pāṇḍavaḥ |
na cakāra vyathāṃ rājanbhāskaro jaladairyathā || 81 ||
[Analyze grammar]

tataḥ prahasyādhirathiḥ śarajālāni māriṣa |
preṣayāmāsa samare śataśo'tha sahasraśaḥ || 82 ||
[Analyze grammar]

ekacchāyamabhūtsarvaṃ tasya bāṇairmahātmanaḥ |
abhracchāyeva saṃjajñe saṃpatadbhiḥ śarottamaiḥ || 83 ||
[Analyze grammar]

tataḥ karṇo mahārāja dhanuśchittvā mahātmanaḥ |
sārathiṃ pātayāmāsa rathanīḍāddhasanniva || 84 ||
[Analyze grammar]

tathāśvāṃścaturaścāsya caturbhirniśitaiḥ śaraiḥ |
yamasya sadanaṃ tūrṇaṃ preṣayāmāsa bhārata || 85 ||
[Analyze grammar]

athāsya taṃ rathaṃ tūrṇaṃ tilaśo vyadhamaccharaiḥ |
patākāṃ cakrarakṣau ca dhvajaṃ khaḍgaṃ ca māriṣa |
śatacandraṃ tataścarma sarvopakaraṇāni ca || 86 ||
[Analyze grammar]

hatāśvo virathaścaiva vivarmā ca viśāṃ pate |
avatīrya rathāttūrṇaṃ parighaṃ gṛhya viṣṭhitaḥ || 87 ||
[Analyze grammar]

tamudyataṃ mahāghoraṃ parighaṃ tasya sūtajaḥ |
vyahanatsāyakai rājañśataśo'tha sahasraśaḥ || 88 ||
[Analyze grammar]

vyāyudhaṃ cainamālakṣya śaraiḥ saṃnataparvabhiḥ |
ārdayadbahuśaḥ karṇo na cainaṃ samapīḍayat || 89 ||
[Analyze grammar]

sa vadhyamānaḥ samare kṛtāstreṇa balīyasā |
prādravatsahasā rājannakulo vyākulendriyaḥ || 90 ||
[Analyze grammar]

tamabhidrutya rādheyaḥ prahasanvai punaḥ punaḥ |
sajyamasya dhanuḥ kaṇṭhe so'vāsṛjata bhārata || 91 ||
[Analyze grammar]

tataḥ sa śuśubhe rājankaṇṭhāsaktamahādhanuḥ |
pariveṣamanuprāpto yathā syādvyomni candramāḥ |
yathaiva ca sito meghaḥ śakracāpena śobhitaḥ || 92 ||
[Analyze grammar]

tamabravīttadā karṇo vyarthaṃ vyāhṛtavānasi |
vadedānīṃ punarhṛṣṭo vadhyaṃ māṃ tvaṃ punaḥ punaḥ || 93 ||
[Analyze grammar]

mā yotsīrgurubhiḥ sārdhaṃ balavadbhiśca pāṇḍava |
sadṛśaistāta yudhyasva vrīḍāṃ mā kuru pāṇḍava |
gṛhaṃ vā gaccha mādreya yatra vā kṛṣṇaphalgunau || 94 ||
[Analyze grammar]

evamuktvā mahārāja vyasarjayata taṃ tataḥ |
vadhaprāptaṃ tu taṃ rājannāvadhītsūtanandanaḥ |
smṛtvā kuntyā vaco rājaṃstata enaṃ vyasarjayat || 95 ||
[Analyze grammar]

visṛṣṭaḥ pāṇḍavo rājansūtaputreṇa dhanvinā |
vrīḍanniva jagāmātha yudhiṣṭhirarathaṃ prati || 96 ||
[Analyze grammar]

āruroha rathaṃ cāpi sūtaputrapratāpitaḥ |
niḥśvasanduḥkhasaṃtaptaḥ kumbhe kṣipta ivoragaḥ || 97 ||
[Analyze grammar]

taṃ visṛjya raṇe karṇaḥ pāñcālāṃstvarito yayau |
rathenātipatākena candravarṇahayena ca || 98 ||
[Analyze grammar]

tatrākrando mahānāsītpāṇḍavānāṃ viśāṃ pate |
dṛṣṭvā senāpatiṃ yāntaṃ pāñcālānāṃ rathavrajān || 99 ||
[Analyze grammar]

tatrākaronmahārāja kadanaṃ sūtanandanaḥ |
madhyaṃ gate dinakare cakravatpracaranprabhuḥ || 100 ||
[Analyze grammar]

bhagnacakrai rathaiḥ kecicchinnadhvajapatākibhiḥ |
sasūtairhatasūtaiśca bhagnākṣaiścaiva māriṣa |
hriyamāṇānapaśyāma pāñcālānāṃ rathavrajān || 101 ||
[Analyze grammar]

tatra tatra ca saṃbhrāntā vicerurmattakuñjarāḥ |
davāgninā parītāṅgā yathaiva syurmahāvane || 102 ||
[Analyze grammar]

bhinnakumbhā virudhirāśchinnahastāśca vāraṇāḥ |
bhinnagātravarāścaiva cchinnavālāśca māriṣa |
chinnābhrāṇīva saṃpeturvadhyamānā mahātmanā || 103 ||
[Analyze grammar]

apare trāsitā nāgā nārācaśatatomaraiḥ |
tamevābhimukhā yānti śalabhā iva pāvakam || 104 ||
[Analyze grammar]

apare niṣṭanantaḥ sma vyadṛśyanta mahādvipāḥ |
kṣarantaḥ śoṇitaṃ gātrairnagā iva jalaplavam || 105 ||
[Analyze grammar]

uraśchadairvimuktāśca vālabandhaiśca vājinaḥ |
rājataiśca tathā kāṃsyaiḥ sauvarṇaiścaiva bhūṣaṇaiḥ || 106 ||
[Analyze grammar]

hīnā āstaraṇaiścaiva khalīnaiśca vivarjitāḥ |
cāmaraiśca kuthābhiśca tūṇīraiḥ patitairapi || 107 ||
[Analyze grammar]

nihataiḥ sādibhiścaiva śūrairāhavaśobhibhiḥ |
apaśyāma raṇe tatra bhrāmyamāṇānhayottamān || 108 ||
[Analyze grammar]

prāsaiḥ khaḍgaiśca saṃsyūtānṛṣṭibhiśca narādhipa |
hayayodhānapaśyāma kañcukoṣṇīṣadhāriṇaḥ || 109 ||
[Analyze grammar]

rathānhemapariṣkārānsuyuktāñjavanairhayaiḥ |
bhramamāṇānapaśyāma hateṣu rathiṣu drutam || 110 ||
[Analyze grammar]

bhagnākṣakūbarānkāṃścicchinnacakrāṃśca māriṣa |
vipatākādhvajāṃścānyāñchinneṣāyugabandhurān || 111 ||
[Analyze grammar]

vihīnānrathinastatra dhāvamānānsamantataḥ |
sūryaputraśaraistrastānapaśyāma viśāṃ pate || 112 ||
[Analyze grammar]

viśastrāṃśca tathaivānyānsaśastrāṃśca bahūnhatān |
tāvakāñjālasaṃchannānuroghaṇṭāvibhūṣitān || 113 ||
[Analyze grammar]

nānāvarṇavicitrābhiḥ patākābhiralaṃkṛtān |
padātīnanvapaśyāma dhāvamānānsamantataḥ || 114 ||
[Analyze grammar]

śirāṃsi bāhūnūrūṃśca chinnānanyāṃstathā yudhi |
karṇacāpacyutairbāṇairapaśyāma vinākṛtān || 115 ||
[Analyze grammar]

mahānvyatikaro raudro yodhānāmanvadṛśyata |
karṇasāyakanunnānāṃ hatānāṃ niśitaiḥ śaraiḥ || 116 ||
[Analyze grammar]

te vadhyamānāḥ samare sūtaputreṇa sṛñjayāḥ |
tamevābhimukhā yānti pataṃgā iva pāvakam || 117 ||
[Analyze grammar]

taṃ dahantamanīkāni tatra tatra mahāratham |
kṣatriyā varjayāmāsuryugāntāgnimivolbaṇam || 118 ||
[Analyze grammar]

hataśeṣāstu ye vīrāḥ pāñcālānāṃ mahārathāḥ |
tānprabhagnāndrutānkarṇaḥ pṛṣṭhato vikirañśaraiḥ |
abhyadhāvata tejasvī viśīrṇakavacadhvajān || 119 ||
[Analyze grammar]

tāpayāmāsa tānbāṇaiḥ sūtaputro mahārathaḥ |
madhyaṃdinamanuprāpto bhūtānīva tamonudaḥ || 120 ||
[Analyze grammar]