Chapter 16

dhṛtarāṣṭra uvāca |
pāṇḍye hate kimakarodarjuno yudhi saṃjaya |
ekavīreṇa karṇena drāviteṣu pareṣu ca || 1 ||
[Analyze grammar]

samāptavidyo balavānyukto vīraśca pāṇḍavaḥ |
sarvabhūteṣvanujñātaḥ śaṃkareṇa mahātmanā || 2 ||
[Analyze grammar]

tasmānmahadbhayaṃ tīvramamitraghnāddhanaṃjayāt |
sa yattatrākarotpārthastanmamācakṣva saṃjaya || 3 ||
[Analyze grammar]

saṃjaya uvāca |
hate pāṇḍye'rjunaṃ kṛṣṇastvarannāha vaco hitam |
paśyātimānyaṃ rājānamapayātāṃśca pāṇḍavān || 4 ||
[Analyze grammar]

aśvatthāmnaśca saṃkalpāddhatāḥ karṇena sṛñjayāḥ |
tathāśvanaranāgānāṃ kṛtaṃ ca kadanaṃ mahat |
ityācaṣṭa sudurdharṣo vāsudevaḥ kirīṭine || 5 ||
[Analyze grammar]

etacchrutvā ca dṛṣṭvā ca bhrāturghoraṃ mahadbhayam |
vāhayāśvānhṛṣīkeśa kṣipramityāha pāṇḍavaḥ || 6 ||
[Analyze grammar]

tataḥ prāyāddhṛṣīkeśo rathenāpratiyodhinā |
dāruṇaśca punastatra prādurāsītsamāgamaḥ || 7 ||
[Analyze grammar]

tataḥ pravavṛte bhūyaḥ saṃgrāmo rājasattama |
karṇasya pāṇḍavānāṃ ca yamarāṣṭravivardhanaḥ || 8 ||
[Analyze grammar]

dhanūṃṣi bāṇānparighānasitomarapaṭṭiśān |
musalāni bhuśuṇḍīśca śaktiṛṣṭiparaśvadhān || 9 ||
[Analyze grammar]

gadāḥ prāsānasīnkuntānbhiṇḍipālānmahāṅkuśān |
pragṛhya kṣipramāpetuḥ parasparajigīṣayā || 10 ||
[Analyze grammar]

bāṇajyātalaśabdena dyāṃ diśaḥ pradiśo viyat |
pṛthivīṃ nemighoṣeṇa nādayanto'bhyayuḥ parān || 11 ||
[Analyze grammar]

tena śabdena mahatā saṃhṛṣṭāścakrurāhavam |
vīrā vīrairmahāghoraṃ kalahāntaṃ titīrṣavaḥ || 12 ||
[Analyze grammar]

jyātalatradhanuḥśabdāḥ kuñjarāṇāṃ ca bṛṃhitam |
tāḍitānāṃ ca patatāṃ ninādaḥ sumahānabhūt || 13 ||
[Analyze grammar]

bāṇaśabdāṃśca vividhāñśūrāṇāmabhigarjatām |
śrutvā śabdaṃ bhṛśaṃ tresurjaghnurmamluśca bhārata || 14 ||
[Analyze grammar]

teṣāṃ nānadyatāṃ caiva śastravṛṣṭiṃ ca muñcatām |
bahūnādhirathiḥ karṇaḥ pramamātha raṇeṣubhiḥ || 15 ||
[Analyze grammar]

pañca pāñcālavīrāṇāṃ rathāndaśa ca pañca ca |
sāśvasūtadhvajānkarṇaḥ śarairninye yamakṣayam || 16 ||
[Analyze grammar]

yodhamukhyā mahāvīryāḥ pāṇḍūnāṃ karṇamāhave |
śīghrāstrā divamāvṛtya parivavruḥ samantataḥ || 17 ||
[Analyze grammar]

tataḥ karṇo dviṣatsenāṃ śaravarṣairviloḍayan |
vijagāhe'ṇḍajāpūrṇāṃ padminīmiva yūthapaḥ || 18 ||
[Analyze grammar]

dviṣanmadhyamavaskandya rādheyo dhanuruttamam |
vidhunvānaḥ śitairbāṇaiḥ śirāṃsyunmathya pātayat || 19 ||
[Analyze grammar]

carmavarmāṇi saṃchindya nirvāpamiva dehinām |
viṣehurnāsya saṃparkaṃ dvitīyasya patatriṇaḥ || 20 ||
[Analyze grammar]

varmadehāsumathanairdhanuṣaḥ pracyutaiḥ śaraiḥ |
maurvyā talatrairnyavadhītkaśayā vājino yathā || 21 ||
[Analyze grammar]

pāṇḍusṛñjayapāñcālāñśaragocaramānayat |
mamarda karṇastarasā siṃho mṛgagaṇāniva || 22 ||
[Analyze grammar]

tataḥ pāñcālaputrāśca draupadeyāśca māriṣa |
yamau ca yuyudhānaśca sahitāḥ karṇamabhyayuḥ || 23 ||
[Analyze grammar]

vyāyacchamānāḥ subhṛśaṃ kurupāṇḍavasṛñjayāḥ |
priyānasūnraṇe tyaktvā yodhā jagmuḥ parasparam || 24 ||
[Analyze grammar]

susaṃnaddhāḥ kavacinaḥ saśirastrāṇabhūṣaṇāḥ |
gadābhirmusalaiścānye parighaiśca mahārathāḥ || 25 ||
[Analyze grammar]

samabhyadhāvanta bhṛśaṃ devā daṇḍairivodyataiḥ |
nadantaścāhvayantaśca pravalgantaśca māriṣa || 26 ||
[Analyze grammar]

tato nijaghnuranyonyaṃ petuścāhavatāḍitāḥ |
vamanto rudhiraṃ gātrairvimastiṣkekṣaṇā yudhi || 27 ||
[Analyze grammar]

dantapūrṇaiḥ sarudhirairvaktrairdāḍimasaṃnibhaiḥ |
jīvanta iva cāpyete tasthuḥ śastropabṛṃhitāḥ || 28 ||
[Analyze grammar]

parasparaṃ cāpyapare paṭṭiśairasibhistathā |
śaktibhirbhiṇḍipālaiśca nakharaprāsatomaraiḥ || 29 ||
[Analyze grammar]

tatakṣuścicchiduścānye bibhiduścikṣipustathā |
saṃcakartuśca jaghnuśca kruddhā nirbibhiduśca ha || 30 ||
[Analyze grammar]

peturanyonyanihatā vyasavo rudhirokṣitāḥ |
kṣarantaḥ svarasaṃ raktaṃ prakṛtāścandanā iva || 31 ||
[Analyze grammar]

rathai rathā vinihatā hastinaścāpi hastibhiḥ |
narā naravaraiḥ peturaśvāścāśvaiḥ sahasraśaḥ || 32 ||
[Analyze grammar]

dhvajāḥ śirāṃsi cchatrāṇi dvipahastā nṛṇāṃ bhujāḥ |
kṣurairbhallārdhacandraiśca chinnāḥ śastrāṇi tatyajuḥ || 33 ||
[Analyze grammar]

narāṃśca nāgāṃśca rathānhayānmamṛdurāhave |
aśvārohairhatāḥ śūrāśchinnahastāśca dantinaḥ || 34 ||
[Analyze grammar]

sapatākā dhvajāḥ peturviśīrṇā iva parvatāḥ |
pattibhiśca samāplutya dviradāḥ syandanāstathā || 35 ||
[Analyze grammar]

prahatā hanyamānāśca patitāścaiva sarvaśaḥ |
aśvārohāḥ samāsādya tvaritāḥ pattibhirhatāḥ |
sādibhiḥ pattisaṃghāśca nihatā yudhi śerate || 36 ||
[Analyze grammar]

mṛditānīva padmāni pramlānā iva ca srajaḥ |
hatānāṃ vadanānyāsangātrāṇi ca mahāmate || 37 ||
[Analyze grammar]

rūpāṇyatyarthakāmyāni dviradāśvanṛṇāṃ nṛpa |
samunnānīva vastrāṇi prāpurdurdarśatāṃ param || 38 ||
[Analyze grammar]