Chapter 123

dhṛtarāṣṭra uvāca |
tathā gateṣu śūreṣu teṣāṃ mama ca saṃjaya |
kiṃ vai bhīmastadākārṣīttanmamācakṣva saṃjaya || 1 ||
[Analyze grammar]

saṃjaya uvāca |
viratho bhīmaseno vai karṇavākśalyapīḍitaḥ |
amarṣavaśamāpannaḥ phalgunaṃ vākyamabravīt || 2 ||
[Analyze grammar]

punaḥ punastūbaraka mūḍha audariketi ca |
akṛtāstraka mā yodhīrbāla saṃgrāmakātara || 3 ||
[Analyze grammar]

iti māmabravītkarṇaḥ paśyataste dhanaṃjaya |
evaṃ vaktā ca me vadhyastena cokto'smi bhārata || 4 ||
[Analyze grammar]

etadvrataṃ mahābāho tvayā saha kṛtaṃ mayā |
yathaitanmama kaunteya tathā tava na saṃśayaḥ || 5 ||
[Analyze grammar]

tadvadhāya naraśreṣṭha smaraitadvacanaṃ mama |
yathā bhavati tatsatyaṃ tathā kuru dhanaṃjaya || 6 ||
[Analyze grammar]

tacchrutvā vacanaṃ tasya bhīmasyāmitavikramaḥ |
tato'rjuno'bravītkarṇaṃ kiṃcidabhyetya saṃyuge || 7 ||
[Analyze grammar]

karṇa karṇa vṛthādṛṣṭe sūtaputrātmasaṃstuta |
adharmabuddhe śṛṇu me yattvā vakṣyāmi sāṃpratam || 8 ||
[Analyze grammar]

dvividhaṃ karma śūrāṇāṃ yuddhe jayaparājayau |
tau cāpyanityau rādheya vāsavasyāpi yudhyataḥ || 9 ||
[Analyze grammar]

mumūrṣuryuyudhānena viratho'si visarjitaḥ |
yadṛcchayā bhīmasenaṃ virathaṃ kṛtavānasi || 10 ||
[Analyze grammar]

adharmastveṣa rādheya yattvaṃ bhīmamavocathāḥ |
yuddhadharmaṃ vijānanvai yudhyantamapalāyinam |
pūrayantaṃ yathāśakti śūrakarmāhave tathā || 11 ||
[Analyze grammar]

paśyatāṃ sarvasainyānāṃ keśavasya mamaiva ca |
viratho bhīmasenena kṛto'si bahuśo raṇe |
na ca tvāṃ paruṣaṃ kiṃciduktavānpaṇḍunandanaḥ || 12 ||
[Analyze grammar]

yasmāttu bahu rūkṣaṃ ca śrāvitaste vṛkodaraḥ |
parokṣaṃ yacca saubhadro yuṣmābhirnihato mama || 13 ||
[Analyze grammar]

tasmādasyāvalepasya sadyaḥ phalamavāpnuhi |
tvayā tasya dhanuśchinnamātmanāśāya durmate || 14 ||
[Analyze grammar]

tasmādvadhyo'si me mūḍha sabhṛtyabalavāhanaḥ |
kuru tvaṃ sarvakṛtyāni mahatte bhayamāgatam || 15 ||
[Analyze grammar]

hantāsmi vṛṣasenaṃ te prekṣamāṇasya saṃyuge |
ye cānye'pyupayāsyanti buddhimohena māṃ nṛpāḥ |
tāṃśca sarvānhaniṣyāmi satyenāyudhamālabhe || 16 ||
[Analyze grammar]

tvāṃ ca mūḍhākṛtaprajñamatimāninamāhave |
dṛṣṭvā duryodhano mando bhṛśaṃ tapsyati pātitam || 17 ||
[Analyze grammar]

arjunena pratijñāte vadhe karṇasutasya tu |
mahānsutumulaḥ śabdo babhūva rathināṃ tadā || 18 ||
[Analyze grammar]

tasminnākulasaṃgrāme vartamāne mahābhaye |
mandaraśmiḥ sahasrāṃśurastaṃ girimupāgamat || 19 ||
[Analyze grammar]

tato rājanhṛṣīkeśaḥ saṃgrāmaśirasi sthitam |
tīrṇapratijñaṃ bībhatsuṃ pariṣvajyedamabravīt || 20 ||
[Analyze grammar]

diṣṭyā saṃpāditā jiṣṇo pratijñā mahatī tvayā |
diṣṭyā ca nihataḥ pāpo vṛddhakṣatraḥ sahātmajaḥ || 21 ||
[Analyze grammar]

dhārtarāṣṭrabalaṃ prāpya devasenāpi bhārata |
sīdeta samare jiṣṇo nātra kāryā vicāraṇā || 22 ||
[Analyze grammar]

na taṃ paśyāmi lokeṣu cintayanpuruṣaṃ kvacit |
tvadṛte puruṣavyāghra ya etadyodhayedbalam || 23 ||
[Analyze grammar]

mahāprabhāvā bahavastvayā tulyādhikāpi vā |
sametāḥ pṛthivīpālā dhārtarāṣṭrasya kāraṇāt |
te tvāṃ prāpya raṇe kruddhaṃ nābhyavartanta daṃśitāḥ || 24 ||
[Analyze grammar]

tava vīryaṃ balaṃ caiva rudraśakrāntakopamam |
nedṛśaṃ śaknuyātkaścidraṇe kartuṃ parākramam |
yādṛśaṃ kṛtavānadya tvamekaḥ śatrutāpanaḥ || 25 ||
[Analyze grammar]

evameva hate karṇe sānubandhe durātmani |
vardhayiṣyāmi bhūyastvāṃ vijitāriṃ hatadviṣam || 26 ||
[Analyze grammar]

tamarjunaḥ pratyuvāca prasādāttava mādhava |
pratijñeyaṃ mayottīrṇā vibudhairapi dustarā || 27 ||
[Analyze grammar]

anāścaryo jayasteṣāṃ yeṣāṃ nātho'si mādhava |
tvatprasādānmahīṃ kṛtsnāṃ saṃprāpsyati yudhiṣṭhiraḥ || 28 ||
[Analyze grammar]

tavaiva bhāro vārṣṇeya tavaiva vijayaḥ prabho |
vardhanīyāstava vayaṃ preṣyāśca madhusūdana || 29 ||
[Analyze grammar]

evamuktaḥ smayankṛṣṇaḥ śanakairvāhayanhayān |
darśayāmāsa pārthāya krūramāyodhanaṃ mahat || 30 ||
[Analyze grammar]

śrīkṛṣṇa uvāca |
prārthayanto jayaṃ yuddhe prathitaṃ ca mahadyaśaḥ |
pṛthivyāṃ śerate śūrāḥ pārthivāstvaccharairhatāḥ || 31 ||
[Analyze grammar]

vikīrṇaśastrābharaṇā vipannāśvarathadvipāḥ |
saṃchinnabhinnavarmāṇo vaiklavyaṃ paramaṃ gatāḥ || 32 ||
[Analyze grammar]

sasattvā gatasattvāśca prabhayā parayā yutāḥ |
sajīvā iva lakṣyante gatasattvā narādhipāḥ || 33 ||
[Analyze grammar]

teṣāṃ śaraiḥ svarṇapuṅkhaiḥ śastraiśca vividhaiḥ śitaiḥ |
vāhanairāyudhaiścaiva saṃpūrṇāṃ paśya medinīm || 34 ||
[Analyze grammar]

varmabhiścarmabhirhāraiḥ śirobhiśca sakuṇḍalaiḥ |
uṣṇīṣairmukuṭaiḥ sragbhiścūḍāmaṇibhirambaraiḥ || 35 ||
[Analyze grammar]

kaṇṭhasūtrairaṅgadaiśca niṣkairapi ca suprabhaiḥ |
anyaiścābharaṇaiścitrairbhāti bhārata medinī || 36 ||
[Analyze grammar]

cāmarairvyajanaiścitrairdhvajaiścāśvarathadvipaiḥ |
vividhaiśca paristomairaśvānāṃ ca prakīrṇakaiḥ || 37 ||
[Analyze grammar]

kuthābhiśca vicitrābhirvarūthaiśca mahādhanaiḥ |
saṃstīrṇāṃ vasudhāṃ paśya citrapaṭṭairivāvṛtām || 38 ||
[Analyze grammar]

nāgebhyaḥ patitānanyānkalpitebhyo dvipaiḥ saha |
siṃhānvajrapraṇunnebhyo giryagrebhya iva cyutān || 39 ||
[Analyze grammar]

saṃsyūtānvājibhiḥ sārdhaṃ dharaṇyāṃ paśya cāparān |
padātisādisaṃghāṃśca kṣatajaughapariplutān || 40 ||
[Analyze grammar]

saṃjaya uvāca |
evaṃ saṃdarśayankṛṣṇo raṇabhūmiṃ kirīṭinaḥ |
svaiḥ sametaḥ sa muditaḥ pāñcajanyaṃ vyanādayat || 41 ||
[Analyze grammar]