Chapter 53

saṃjaya uvāca |
pratijñāte tu pārthena sindhurājavadhe tadā |
vāsudevo mahābāhurdhanaṃjayamabhāṣata || 1 ||
[Analyze grammar]

bhrātṝṇāṃ matamājñāya tvayā vācā pratiśrutam |
saindhavaṃ śvo'smi hanteti tatsāhasatamaṃ kṛtam || 2 ||
[Analyze grammar]

asaṃmantrya mayā sārdhamatibhāro'yamudyataḥ |
kathaṃ nu sarvalokasya nāvahāsyā bhavemahi || 3 ||
[Analyze grammar]

dhārtarāṣṭrasya śibire mayā praṇihitāścarāḥ |
ta ime śīghramāgamya pravṛttiṃ vedayanti naḥ || 4 ||
[Analyze grammar]

tvayā vai saṃpratijñāte sindhurājavadhe tadā |
siṃhanādaḥ savāditraḥ sumahāniha taiḥ śrutaḥ || 5 ||
[Analyze grammar]

tena śabdena vitrastā dhārtarāṣṭrāḥ sasaindhavāḥ |
nākasmātsiṃhanādo'yamiti matvā vyavasthitāḥ || 6 ||
[Analyze grammar]

sumahāñśabdasaṃpātaḥ kauravāṇāṃ mahābhuja |
āsīnnāgāśvapattīnāṃ rathaghoṣaśca bhairavaḥ || 7 ||
[Analyze grammar]

abhimanyuvadhaṃ śrutvā dhruvamārto dhanaṃjayaḥ |
rātrau niryāsyati krodhāditi matvā vyavasthitāḥ || 8 ||
[Analyze grammar]

tairyatadbhiriyaṃ satyā śrutā satyavatastava |
pratijñā sindhurājasya vadhe rājīvalocana || 9 ||
[Analyze grammar]

tato vimanasaḥ sarve trastāḥ kṣudramṛgā iva |
āsansuyodhanāmātyāḥ sa ca rājā jayadrathaḥ || 10 ||
[Analyze grammar]

athotthāya sahāmātyairdīnaḥ śibiramātmanaḥ |
āyātsauvīrasindhūnāmīśvaro bhṛśaduḥkhitaḥ || 11 ||
[Analyze grammar]

sa mantrakāle saṃmantrya sarvā naiḥśreyasīḥ kriyāḥ |
suyodhanamidaṃ vākyamabravīdrājasaṃsadi || 12 ||
[Analyze grammar]

māmasau putrahanteti śvo'bhiyātā dhanaṃjayaḥ |
pratijñāto hi senāyā madhye tena vadho mama || 13 ||
[Analyze grammar]

tāṃ na devā na gandharvā nāsuroragarākṣasāḥ |
utsahante'nyathā kartuṃ pratijñāṃ savyasācinaḥ || 14 ||
[Analyze grammar]

te māṃ rakṣata saṃgrāme mā vo mūrdhni dhanaṃjayaḥ |
padaṃ kṛtvāpnuyāllakṣyaṃ tasmādatra vidhīyatām || 15 ||
[Analyze grammar]

atha rakṣā na me saṃkhye kriyate kurunandana |
anujānīhi māṃ rājangamiṣyāmi gṛhānprati || 16 ||
[Analyze grammar]

evamuktastvavākśīrṣo vimanāḥ sa suyodhanaḥ |
śrutvābhiśaptavantaṃ tvāṃ dhyānamevānvapadyata || 17 ||
[Analyze grammar]

tamārtamabhisaṃprekṣya rājā kila sa saindhavaḥ |
mṛdu cātmahitaṃ caiva sāpekṣamidamuktavān || 18 ||
[Analyze grammar]

nāhaṃ paśyāmi bhavatāṃ tathāvīryaṃ dhanurdharam |
yo'rjunasyāstramastreṇa pratihanyānmahāhave || 19 ||
[Analyze grammar]

vāsudevasahāyasya gāṇḍīvaṃ dhunvato dhanuḥ |
ko'rjunasyāgratastiṣṭhetsākṣādapi śatakratuḥ || 20 ||
[Analyze grammar]

maheśvaro'pi pārthena śrūyate yodhitaḥ purā |
padātinā mahātejā girau himavati prabhuḥ || 21 ||
[Analyze grammar]

dānavānāṃ sahasrāṇi hiraṇyapuravāsinām |
jaghānaikarathenaiva devarājapracoditaḥ || 22 ||
[Analyze grammar]

samāyukto hi kaunteyo vāsudevena dhīmatā |
sāmarānapi lokāṃstrīnnihanyāditi me matiḥ || 23 ||
[Analyze grammar]

so'hamicchāmyanujñātuṃ rakṣituṃ vā mahātmanā |
droṇena sahaputreṇa vīreṇa yadi manyase || 24 ||
[Analyze grammar]

sa rājñā svayamācāryo bhṛśamākrandito'rjuna |
saṃvidhānaṃ ca vihitaṃ rathāśca kila sajjitāḥ || 25 ||
[Analyze grammar]

karṇo bhūriśravā drauṇirvṛṣasenaśca durjayaḥ |
kṛpaśca madrarājaśca ṣaḍete'sya purogamāḥ || 26 ||
[Analyze grammar]

śakaṭaḥ padmapaścārdho vyūho droṇena kalpitaḥ |
padmakarṇikamadhyasthaḥ sūcīpāśe jayadrathaḥ |
sthāsyate rakṣito vīraiḥ sindhurāḍyuddhadurmadaiḥ || 27 ||
[Analyze grammar]

dhanuṣyastre ca vīrye ca prāṇe caiva tathorasi |
aviṣahyatamā hyete niścitāḥ pārtha ṣaḍrathāḥ |
etānajitvā sagaṇānnaiva prāpyo jayadrathaḥ || 28 ||
[Analyze grammar]

teṣāmekaikaśo vīryaṃ ṣaṇṇāṃ tvamanucintaya |
sahitā hi naravyāghrā na śakyā jetumañjasā || 29 ||
[Analyze grammar]

bhūyaśca cintayiṣyāmi nītimātmahitāya vai |
mantrajñaiḥ sacivaiḥ sārdhaṃ suhṛdbhiḥ kāryasiddhaye || 30 ||
[Analyze grammar]

arjuna uvāca |
ṣaḍrathāndhārtarāṣṭrasya manyase yānbalādhikān |
teṣāṃ vīryaṃ mamārdhena na tulyamiti lakṣaye || 31 ||
[Analyze grammar]

astramastreṇa sarveṣāmeteṣāṃ madhusūdana |
mayā drakṣyasi nirbhinnaṃ jayadrathavadhaiṣiṇā || 32 ||
[Analyze grammar]

droṇasya miṣataḥ so'haṃ sagaṇasya vilapyataḥ |
mūrdhānaṃ sindhurājasya pātayiṣyāmi bhūtale || 33 ||
[Analyze grammar]

yadi sādhyāśca rudrāśca vasavaśca sahāśvinaḥ |
marutaśca sahendreṇa viśvedevāstathāsurāḥ || 34 ||
[Analyze grammar]

pitaraḥ sahagandharvāḥ suparṇāḥ sāgarādrayaḥ |
dyaurviyatpṛthivī ceyaṃ diśaśca sadigīśvarāḥ || 35 ||
[Analyze grammar]

grāmyāraṇyāni bhūtāni sthāvarāṇi carāṇi ca |
trātāraḥ sindhurājasya bhavanti madhusūdana || 36 ||
[Analyze grammar]

tathāpi bāṇairnihataṃ śvo draṣṭāsi raṇe mayā |
satyena te śape kṛṣṇa tathaivāyudhamālabhe || 37 ||
[Analyze grammar]

yaśca goptā maheṣvāsastasya pāpasya durmateḥ |
tameva prathamaṃ droṇamabhiyāsyāmi keśava || 38 ||
[Analyze grammar]

tasmindyūtamidaṃ baddhaṃ manyate sma suyodhanaḥ |
tasmāttasyaiva senāgraṃ bhittvā yāsyāmi saindhavam || 39 ||
[Analyze grammar]

draṣṭāsi śvo maheṣvāsānnārācaistigmatejanaiḥ |
śṛṅgāṇīva girervajrairdāryamāṇānmayā yudhi || 40 ||
[Analyze grammar]

naranāgāśvadehebhyo visraviṣyati śoṇitam |
patadbhyaḥ patitebhyaśca vibhinnebhyaḥ śitaiḥ śaraiḥ || 41 ||
[Analyze grammar]

gāṇḍīvapreṣitā bāṇā manonilasamā jave |
nṛnāgāśvānvidehāsūnkartāraśca sahasraśaḥ || 42 ||
[Analyze grammar]

yamātkuberādvaruṇādrudrādindrācca yanmayā |
upāttamastraṃ ghoraṃ vai taddraṣṭāro narā yudhi || 43 ||
[Analyze grammar]

brāhmeṇāstreṇa cāstrāṇi hanyamānāni saṃyuge |
mayā draṣṭāsi sarveṣāṃ saindhavasyābhirakṣiṇām || 44 ||
[Analyze grammar]

śaravegasamutkṛttai rājñāṃ keśava mūrdhabhiḥ |
āstīryamāṇāṃ pṛthivīṃ draṣṭāsi śvo mayā yudhi || 45 ||
[Analyze grammar]

kravyādāṃstarpayiṣyāmi drāvayiṣyāmi śātravān |
suhṛdo nandayiṣyāmi pātayiṣyāmi saindhavam || 46 ||
[Analyze grammar]

bahvāgaskṛtkusaṃbandhī pāpadeśasamudbhavaḥ |
mayā saindhavako rājā hataḥ svāñśocayiṣyati || 47 ||
[Analyze grammar]

sarvakṣīrānnabhoktāraḥ pāpācārā raṇājire |
mayā sarājakā bāṇairnunnā naṃkṣyanti saindhavāḥ || 48 ||
[Analyze grammar]

tathā prabhāte kartāsmi yathā kṛṣṇa suyodhanaḥ |
nānyaṃ dhanurdharaṃ loke maṃsyate matsamaṃ yudhi || 49 ||
[Analyze grammar]

gāṇḍīvaṃ ca dhanurdivyaṃ yoddhā cāhaṃ nararṣabha |
tvaṃ ca yantā hṛṣīkeśa kiṃ nu syādajitaṃ mayā || 50 ||
[Analyze grammar]

yathā hi lakṣma candre vai samudre ca yathā jalam |
evametāṃ pratijñāṃ me satyāṃ viddhi janārdana || 51 ||
[Analyze grammar]

māvamaṃsthā mamāstrāṇi māvamaṃsthā dhanurdṛḍham |
māvamaṃsthā balaṃ bāhvormāvamaṃsthā dhanaṃjayam || 52 ||
[Analyze grammar]

yathā hi yātvā saṃgrāme na jīye vijayāmi ca |
tena satyena saṃgrāme hataṃ viddhi jayadratham || 53 ||
[Analyze grammar]

dhruvaṃ vai brāhmaṇe satyaṃ dhruvā sādhuṣu saṃnatiḥ |
śrīrdhruvā cāpi dakṣeṣu dhruvo nārāyaṇe jayaḥ || 54 ||
[Analyze grammar]

saṃjaya uvāca |
evamuktvā hṛṣīkeśaṃ svayamātmānamātmanā |
saṃdideśārjuno nardanvāsaviḥ keśavaṃ prabhum || 55 ||
[Analyze grammar]

yathā prabhātāṃ rajanīṃ kalpitaḥ syādratho mama |
tathā kāryaṃ tvayā kṛṣṇa kāryaṃ hi mahadudyatam || 56 ||
[Analyze grammar]