Chapter 52

saṃjaya uvāca |
śrutvā tu taṃ mahāśabdaṃ pāṇḍūnāṃ putragṛddhinām |
cāraiḥ pravedite tatra samutthāya jayadrathaḥ || 1 ||
[Analyze grammar]

śokasaṃmūḍhahṛdayo duḥkhenābhihato bhṛśam |
majjamāna ivāgādhe vipule śokasāgare || 2 ||
[Analyze grammar]

jagāma samitiṃ rājñāṃ saindhavo vimṛśanbahu |
sa teṣāṃ naradevānāṃ sakāśe paridevayan || 3 ||
[Analyze grammar]

abhimanyoḥ piturbhītaḥ savrīḍo vākyamabravīt |
yo'sau pāṇḍoḥ kila kṣetre jātaḥ śakreṇa kāminā || 4 ||
[Analyze grammar]

sa ninīṣati durbuddhirmāṃ kilaikaṃ yamakṣayam |
tatsvasti vo'stu yāsyāmi svagṛhaṃ jīvitepsayā || 5 ||
[Analyze grammar]

atha vā stha pratibalāstrātuṃ māṃ kṣatriyarṣabhāḥ |
pārthena prārthitaṃ vīrāste dadantu mamābhayam || 6 ||
[Analyze grammar]

droṇaduryodhanakṛpāḥ karṇamadreśabāhlikāḥ |
duḥśāsanādayaḥ śaktāstrātumapyantakārditam || 7 ||
[Analyze grammar]

kimaṅga punarekena phalgunena jighāṃsatā |
na trāyeyurbhavanto māṃ samastāḥ patayaḥ kṣiteḥ || 8 ||
[Analyze grammar]

praharṣaṃ pāṇḍaveyānāṃ śrutvā mama mahadbhayam |
sīdantīva ca me'ṅgāni mumūrṣoriva pārthivāḥ || 9 ||
[Analyze grammar]

vadho nūnaṃ pratijñāto mama gāṇḍīvadhanvanā |
tathā hi hṛṣṭāḥ krośanti śokakāle'pi pāṇḍavāḥ || 10 ||
[Analyze grammar]

na devā na ca gandharvā nāsuroragarākṣasāḥ |
utsahante'nyathā kartuṃ kuta eva narādhipāḥ || 11 ||
[Analyze grammar]

tasmānmāmanujānīta bhadraṃ vo'stu nararṣabhāḥ |
adarśanaṃ gamiṣyāmi na māṃ drakṣyanti pāṇḍavāḥ || 12 ||
[Analyze grammar]

evaṃ vilapamānaṃ taṃ bhayādvyākulacetasam |
ātmakāryagarīyastvādrājā duryodhano'bravīt || 13 ||
[Analyze grammar]

na bhetavyaṃ naravyāghra ko hi tvā puruṣarṣabha |
madhye kṣatriyavīrāṇāṃ tiṣṭhantaṃ prārthayedyudhi || 14 ||
[Analyze grammar]

ahaṃ vaikartanaḥ karṇaścitraseno viviṃśatiḥ |
bhūriśravāḥ śalaḥ śalyo vṛṣaseno durāsadaḥ || 15 ||
[Analyze grammar]

purumitro jayo bhojaḥ kāmbojaśca sudakṣiṇaḥ |
satyavrato mahābāhurvikarṇo durmukhaḥ sahaḥ || 16 ||
[Analyze grammar]

duḥśāsanaḥ subāhuśca kaliṅgaścāpyudāyudhaḥ |
vindānuvindāvāvantyau droṇo drauṇiḥ sasaubalaḥ || 17 ||
[Analyze grammar]

tvaṃ cāpi rathināṃ śreṣṭhaḥ svayaṃ śūro'mitadyutiḥ |
sa kathaṃ pāṇḍaveyebhyo bhayaṃ paśyasi saindhava || 18 ||
[Analyze grammar]

akṣauhiṇyo daśaikā ca madīyāstava rakṣaṇe |
yattā yotsyanti mā bhaistvaṃ saindhava vyetu te bhayam || 19 ||
[Analyze grammar]

evamāśvāsito rājanputreṇa tava saindhavaḥ |
duryodhanena sahito droṇaṃ rātrāvupāgamat || 20 ||
[Analyze grammar]

upasaṃgrahaṇaṃ kṛtvā droṇāya sa viśāṃ pate |
upopaviśya praṇataḥ paryapṛcchadidaṃ tadā || 21 ||
[Analyze grammar]

nimitte dūrapātitve laghutve dṛḍhavedhane |
mama bravītu bhagavānviśeṣaṃ phalgunasya ca || 22 ||
[Analyze grammar]

vidyāviśeṣamicchāmi jñātumācārya tattvataḥ |
mamārjunasya ca vibho yathātattvaṃ pracakṣva me || 23 ||
[Analyze grammar]

droṇa uvāca |
samamācāryakaṃ tāta tava caivārjunasya ca |
yogādduḥkhocitatvācca tasmāttvatto'dhiko'rjunaḥ || 24 ||
[Analyze grammar]

na tu te yudhi saṃtrāsaḥ kāryaḥ pārthātkathaṃcana |
ahaṃ hi rakṣitā tāta bhayāttvāṃ nātra saṃśayaḥ || 25 ||
[Analyze grammar]

na hi madbāhuguptasya prabhavantyamarā api |
vyūhiṣyāmi ca taṃ vyūhaṃ yaṃ pārtho na tariṣyati || 26 ||
[Analyze grammar]

tasmādyudhyasva mā bhaistvaṃ svadharmamanupālaya |
pitṛpaitāmahaṃ mārgamanuyāhi narādhipa || 27 ||
[Analyze grammar]

adhītya vidhivadvedānagnayaḥ suhutāstvayā |
iṣṭaṃ ca bahubhiryajñairna te mṛtyubhayādbhayam || 28 ||
[Analyze grammar]

durlabhaṃ mānuṣairmandairmahābhāgyamavāpya tu |
bhujavīryārjitāṃllokāndivyānprāpsyasyanuttamān || 29 ||
[Analyze grammar]

kuravaḥ pāṇḍavāścaiva vṛṣṇayo'nye ca mānavāḥ |
ahaṃ ca saha putreṇa adhruvā iti cintyatām || 30 ||
[Analyze grammar]

paryāyeṇa vayaṃ sarve kālena balinā hatāḥ |
paralokaṃ gamiṣyāmaḥ svaiḥ svaiḥ karmabhiranvitāḥ || 31 ||
[Analyze grammar]

tapastaptvā tu yāṃllokānprāpnuvanti tapasvinaḥ |
kṣatradharmāśritāḥ śūrāḥ kṣatriyāḥ prāpnuvanti tān || 32 ||
[Analyze grammar]

saṃjaya uvāca |
evamāśvāsito rājanbhāradvājena saindhavaḥ |
apānudadbhayaṃ pārthādyuddhāya ca mano dadhe || 33 ||
[Analyze grammar]