Chapter 50

saṃjaya uvāca |
tasminnahani nirvṛtte ghore prāṇabhṛtāṃ kṣaye |
āditye'staṃgate śrīmānsaṃdhyākāla upasthite || 1 ||
[Analyze grammar]

vyapayāteṣu sainyeṣu vāsāya bharatarṣabha |
hatvā saṃśaptakavrātāndivyairastraiḥ kapidhvajaḥ || 2 ||
[Analyze grammar]

prāyātsvaśibiraṃ jiṣṇurjaitramāsthāya taṃ ratham |
gacchanneva ca govindaṃ sannakaṇṭho'bhyabhāṣata || 3 ||
[Analyze grammar]

kiṃ nu me hṛdayaṃ trastaṃ vākyaṃ sajjati keśava |
spandanti cāpyaniṣṭāni gātraṃ sīdati cācyuta || 4 ||
[Analyze grammar]

aniṣṭaṃ caiva me śliṣṭaṃ hṛdayānnāpasarpati |
bhuvi yaddikṣu cāpyugrā utpātāstrāsayanti mām || 5 ||
[Analyze grammar]

bahuprakārā dṛśyante sarva evāghaśaṃsinaḥ |
api svasti bhavedrājñaḥ sāmātyasya gurormama || 6 ||
[Analyze grammar]

vāsudeva uvāca |
vyaktaṃ śivaṃ tava bhrātuḥ sāmātyasya bhaviṣyati |
mā śucaḥ kiṃcidevānyattatrāniṣṭaṃ bhaviṣyati || 7 ||
[Analyze grammar]

saṃjaya uvāca |
tataḥ saṃdhyāmupāsyaiva vīrau vīrāvasādane |
kathayantau raṇe vṛttaṃ prayātau rathamāsthitau || 8 ||
[Analyze grammar]

tataḥ svaśibiraṃ prāptau hatānandaṃ hatatviṣam |
vāsudevo'rjunaścaiva kṛtvā karma suduṣkaram || 9 ||
[Analyze grammar]

dhvastākāraṃ samālakṣya śibiraṃ paravīrahā |
bībhatsurabravītkṛṣṇamasvasthahṛdayastataḥ || 10 ||
[Analyze grammar]

nādya nandanti tūryāṇi maṅgalyāni janārdana |
miśrā dundubhinirghoṣaiḥ śaṅkhāścāḍambaraiḥ saha |
vīṇā vā nādya vādyante śamyātālasvanaiḥ saha || 11 ||
[Analyze grammar]

maṅgalyāni ca gītāni na gāyanti paṭhanti ca |
stutiyuktāni ramyāṇi mamānīkeṣu bandinaḥ || 12 ||
[Analyze grammar]

yodhāścāpi hi māṃ dṛṣṭvā nivartante hyadhomukhāḥ |
karmāṇi ca yathāpūrvaṃ kṛtvā nābhivadanti mām || 13 ||
[Analyze grammar]

api svasti bhavedadya bhrātṛbhyo mama mādhava |
na hi śudhyati me bhāvo dṛṣṭvā svajanamākulam || 14 ||
[Analyze grammar]

api pāñcālarājasya virāṭasya ca mānada |
sarveṣāṃ caiva yodhānāṃ sāmagryaṃ syānmamācyuta || 15 ||
[Analyze grammar]

na ca māmadya saubhadraḥ prahṛṣṭo bhrātṛbhiḥ saha |
raṇādāyāntamucitaṃ pratyudyāti hasanniva || 16 ||
[Analyze grammar]

evaṃ saṃkathayantau tau praviṣṭau śibiraṃ svakam |
dadṛśāte bhṛśāsvasthānpāṇḍavānnaṣṭacetasaḥ || 17 ||
[Analyze grammar]

dṛṣṭvā bhrātṝṃśca putrāṃśca vimanā vānaradhvajaḥ |
apaśyaṃścaiva saubhadramidaṃ vacanamabravīt || 18 ||
[Analyze grammar]

mukhavarṇo'prasanno vaḥ sarveṣāmeva lakṣyate |
na cābhimanyuṃ paśyāmi na ca māṃ pratinandatha || 19 ||
[Analyze grammar]

mayā śrutaśca droṇena cakravyūho vinirmitaḥ |
na ca vastasya bhettāsti ṛte saubhadramāhave || 20 ||
[Analyze grammar]

na copadiṣṭastasyāsīnmayānīkavinirgamaḥ |
kaccinna bālo yuṣmābhiḥ parānīkaṃ praveśitaḥ || 21 ||
[Analyze grammar]

bhittvānīkaṃ maheṣvāsaḥ pareṣāṃ bahuśo yudhi |
kaccinna nihataḥ śete saubhadraḥ paravīrahā || 22 ||
[Analyze grammar]

lohitākṣaṃ mahābāhuṃ jātaṃ siṃhamivādriṣu |
upendrasadṛśaṃ brūta kathamāyodhane hataḥ || 23 ||
[Analyze grammar]

sukumāraṃ maheṣvāsaṃ vāsavasyātmajātmajam |
sadā mama priyaṃ brūta kathamāyodhane hataḥ || 24 ||
[Analyze grammar]

vārṣṇeyīdayitaṃ śūraṃ mayā satatalālitam |
ambāyāśca priyaṃ nityaṃ ko'vadhītkālacoditaḥ || 25 ||
[Analyze grammar]

sadṛśo vṛṣṇisiṃhasya keśavasya mahātmanaḥ |
vikramaśrutamāhātmyaiḥ kathamāyodhane hataḥ || 26 ||
[Analyze grammar]

subhadrāyāḥ priyaṃ nityaṃ draupadyāḥ keśavasya ca |
yadi putraṃ na paśyāmi yāsyāmi yamasādanam || 27 ||
[Analyze grammar]

mṛdukuñcitakeśāntaṃ bālaṃ bālamṛgekṣaṇam |
mattadviradavikrāntaṃ śālapotamivodgatam || 28 ||
[Analyze grammar]

smitābhibhāṣiṇaṃ dāntaṃ guruvākyakaraṃ sadā |
bālye'pyabālakarmāṇaṃ priyavākyamamatsaram || 29 ||
[Analyze grammar]

mahotsāhaṃ mahābāhuṃ dīrgharājīvalocanam |
bhaktānukampinaṃ dāntaṃ na ca nīcānusāriṇam || 30 ||
[Analyze grammar]

kṛtajñaṃ jñānasaṃpannaṃ kṛtāstramanivartinam |
yuddhābhinandinaṃ nityaṃ dviṣatāmaghavardhanam || 31 ||
[Analyze grammar]

sveṣāṃ priyahite yuktaṃ pitṝṇāṃ jayagṛddhinam |
na ca pūrvaprahartāraṃ saṃgrāme naṣṭasaṃbhramam |
yadi putraṃ na paśyāmi yāsyāmi yamasādanam || 32 ||
[Analyze grammar]

sulalāṭaṃ sukeśāntaṃ subhrvakṣidaśanacchadam |
apaśyatastadvadanaṃ kā śāntirhṛdayasya me || 33 ||
[Analyze grammar]

tantrīsvanasukhaṃ ramyaṃ puṃskokilasamadhvanim |
aśṛṇvataḥ svanaṃ tasya kā śāntirhṛdayasya me || 34 ||
[Analyze grammar]

rūpaṃ cāpratirūpaṃ tattridaśeṣvapi durlabham |
apaśyato'dya vīrasya kā śāntirhṛdayasya me || 35 ||
[Analyze grammar]

abhivādanadakṣaṃ taṃ pitṝṇāṃ vacane ratam |
nādyāhaṃ yadi paśyāmi kā śāntirhṛdayasya me || 36 ||
[Analyze grammar]

sukumāraḥ sadā vīro mahārhaśayanocitaḥ |
bhūmāvanāthavacchete nūnaṃ nāthavatāṃ varaḥ || 37 ||
[Analyze grammar]

śayānaṃ samupāsanti yaṃ purā paramastriyaḥ |
tamadya vipraviddhāṅgamupāsantyaśivāḥ śivāḥ || 38 ||
[Analyze grammar]

yaḥ purā bodhyate suptaḥ sūtamāgadhabandibhiḥ |
bodhayantyadya taṃ nūnaṃ śvāpadā vikṛtaiḥ svaraiḥ || 39 ||
[Analyze grammar]

chatracchāyāsamucitaṃ tasya tadvadanaṃ śubham |
nūnamadya rajodhvastaṃ raṇe reṇuḥ kariṣyati || 40 ||
[Analyze grammar]

hā putrakāvitṛptasya satataṃ putradarśane |
bhāgyahīnasya kālena yathā me nīyase balāt || 41 ||
[Analyze grammar]

sādya saṃyamanī nūnaṃ sadā sukṛtināṃ gatiḥ |
svabhābhirbhāsitā ramyā tvayātyarthaṃ virājate || 42 ||
[Analyze grammar]

nūnaṃ vaivasvataśca tvā varuṇaśca priyātithiḥ |
śatakraturdhaneśaśca prāptamarcantyabhīrukam || 43 ||
[Analyze grammar]

evaṃ vilapya bahudhā bhinnapoto vaṇigyathā |
duḥkhena mahatāviṣṭo yudhiṣṭhiramapṛcchata || 44 ||
[Analyze grammar]

kaccitsa kadanaṃ kṛtvā pareṣāṃ pāṇḍunandana |
svargato'bhimukhaḥ saṃkhye yudhyamāno nararṣabhaḥ || 45 ||
[Analyze grammar]

sa nūnaṃ bahubhiryattairyudhyamāno nararṣabhaiḥ |
asahāyaḥ sahāyārthī māmanudhyātavāndhruvam || 46 ||
[Analyze grammar]

pīḍyamānaḥ śarairbālastāta sādhvabhidhāva mām |
iti vipralapanmanye nṛśaṃsairbahubhirhataḥ || 47 ||
[Analyze grammar]

atha vā matprasūtaśca svasrīyo mādhavasya ca |
subhadrāyāṃ ca saṃbhūto naivaṃ vaktumihārhati || 48 ||
[Analyze grammar]

vajrasāramayaṃ nūnaṃ hṛdayaṃ sudṛḍhaṃ mama |
apaśyato dīrghabāhuṃ raktākṣaṃ yanna dīryate || 49 ||
[Analyze grammar]

kathaṃ bāle maheṣvāse nṛśaṃsā marmabhedinaḥ |
svasrīye vāsudevasya mama putre'kṣipañśarān || 50 ||
[Analyze grammar]

yo māṃ nityamadīnātmā pratyudgamyābhinandati |
upayāntaṃ ripūnhatvā so'dya māṃ kiṃ na paśyati || 51 ||
[Analyze grammar]

nūnaṃ sa patitaḥ śete dharaṇyāṃ rudhirokṣitaḥ |
śobhayanmedinīṃ gātrairāditya iva pātitaḥ || 52 ||
[Analyze grammar]

raṇe vinihataṃ śrutvā śokārtā vai vinaṃkṣyati |
subhadrā vakṣyate kiṃ māmabhimanyumapaśyatī |
draupadī caiva duḥkhārte te ca vakṣyāmi kiṃ nvaham || 53 ||
[Analyze grammar]

vajrasāramayaṃ nūnaṃ hṛdayaṃ yanna yāsyati |
sahasradhā vadhūṃ dṛṣṭvā rudatīṃ śokakarśitām || 54 ||
[Analyze grammar]

hṛṣṭānāṃ dhārtarāṣṭrāṇāṃ siṃhanādo mayā śrutaḥ |
yuyutsuścāpi kṛṣṇena śruto vīrānupālabhan || 55 ||
[Analyze grammar]

aśaknuvanto bībhatsuṃ bālaṃ hatvā mahārathāḥ |
kiṃ nadadhvamadharmajñāḥ pārthe vai dṛśyatāṃ balam || 56 ||
[Analyze grammar]

kiṃ tayorvipriyaṃ kṛtvā keśavārjunayormṛdhe |
siṃhavannadata prītāḥ śokakāla upasthite || 57 ||
[Analyze grammar]

āgamiṣyati vaḥ kṣipraṃ phalaṃ pāpasya karmaṇaḥ |
adharmo hi kṛtastīvraḥ kathaṃ syādaphalaściram || 58 ||
[Analyze grammar]

iti tānprati bhāṣanvai vaiśyāputro mahāmatiḥ |
apāyācchastramutsṛjya kopaduḥkhasamanvitaḥ || 59 ||
[Analyze grammar]

kimarthametannākhyātaṃ tvayā kṛṣṇa raṇe mama |
adhakṣyaṃ tānahaṃ sarvāṃstadā krūrānmahārathān || 60 ||
[Analyze grammar]

nigṛhya vāsudevastaṃ putrādhibhirabhiplutam |
maivamityabravītkṛṣṇastīvraśokasamanvitam || 61 ||
[Analyze grammar]

sarveṣāmeṣa vai panthāḥ śūrāṇāmanivartinām |
kṣatriyāṇāṃ viśeṣeṇa yeṣāṃ yuddhena jīvikā || 62 ||
[Analyze grammar]

eṣā vai yudhyamānānāṃ śūrāṇāmanivartinām |
vihitā dharmaśāstrajñairgatirgatimatāṃ vara || 63 ||
[Analyze grammar]

dhruvaṃ yuddhe hi maraṇaṃ śūrāṇāmanivartinām |
gataḥ puṇyakṛtāṃ lokānabhimanyurna saṃśayaḥ || 64 ||
[Analyze grammar]

etacca sarvavīrāṇāṃ kāṅkṣitaṃ bharatarṣabha |
saṃgrāme'bhimukhā mṛtyuṃ prapnuyāmeti mānada || 65 ||
[Analyze grammar]

sa ca vīrānraṇe hatvā rājaputrānmahābalān |
vīrairākāṅkṣitaṃ mṛtyuṃ saṃprāpto'bhimukho raṇe || 66 ||
[Analyze grammar]

mā śucaḥ puruṣavyāghra pūrvaireṣa sanātanaḥ |
dharmakṛdbhiḥ kṛto dharmaḥ kṣatriyāṇāṃ raṇe kṣayaḥ || 67 ||
[Analyze grammar]

ime te bhrātaraḥ sarve dīnā bharatasattama |
tvayi śokasamāviṣṭe nṛpāśca suhṛdastava || 68 ||
[Analyze grammar]

etāṃstvaṃ vacasā sāmnā samāśvāsaya mānada |
viditaṃ veditavyaṃ te na śokaṃ kartumarhasi || 69 ||
[Analyze grammar]

evamāśvāsitaḥ pārthaḥ kṛṣṇenādbhutakarmaṇā |
tato'bravīttadā bhrātṝnsarvānpārthaḥ sagadgadān || 70 ||
[Analyze grammar]

sa dīrghabāhuḥ pṛthvaṃso dīrgharājīvalocanaḥ |
abhimanyuryathā vṛttaḥ śrotumicchāmyahaṃ tathā || 71 ||
[Analyze grammar]

sanāgasyandanahayāndrakṣyadhvaṃ nihatānmayā |
saṃgrāme sānubandhāṃstānmama putrasya vairiṇaḥ || 72 ||
[Analyze grammar]

kathaṃ ca vaḥ kṛtāstrāṇāṃ sarveṣāṃ śastrapāṇinām |
saubhadro nidhanaṃ gacchedvajriṇāpi samāgataḥ || 73 ||
[Analyze grammar]

yadyevamahamajñāsyamaśaktānrakṣaṇe mama |
putrasya pāṇḍupāñcālānmayā gupto bhavettataḥ || 74 ||
[Analyze grammar]

kathaṃ ca vo rathasthānāṃ śaravarṣāṇi muñcatām |
nīto'bhimanyurnidhanaṃ kadarthīkṛtya vaḥ paraiḥ || 75 ||
[Analyze grammar]

aho vaḥ pauruṣaṃ nāsti na ca vo'sti parākramaḥ |
yatrābhimanyuḥ samare paśyatāṃ vo nipātitaḥ || 76 ||
[Analyze grammar]

ātmānameva garheyaṃ yadahaṃ vaḥ sudurbalān |
yuṣmānājñāya niryāto bhīrūnakṛtaniśramān || 77 ||
[Analyze grammar]

āhosvidbhūṣaṇārthāya varmaśastrāyudhāni vaḥ |
vācaśca vaktuṃ saṃsatsu mama putramarakṣatām || 78 ||
[Analyze grammar]

evamuktvā tato vākyaṃ tiṣṭhaṃścāpavarāsimān |
na smāśakyata bībhatsuḥ kenacitprasamīkṣitum || 79 ||
[Analyze grammar]

tamantakamiva kruddhaṃ niḥśvasantaṃ muhurmuhuḥ |
putraśokābhisaṃtaptamaśrupūrṇamukhaṃ tadā || 80 ||
[Analyze grammar]

nābhibhāṣṭuṃ śaknuvanti draṣṭuṃ vā suhṛdo'rjunam |
anyatra vāsudevādvā jyeṣṭādvā pāṇḍunandanāt || 81 ||
[Analyze grammar]

sarvāsvavasthāsu hitāvarjunasya manonugau |
bahumānātpriyatvācca tāvenaṃ vaktumarhataḥ || 82 ||
[Analyze grammar]

tatastaṃ putraśokena bhṛśaṃ pīḍitamānasam |
rājīvalocanaṃ kruddhaṃ rājā vacanamabravīt || 83 ||
[Analyze grammar]