Chapter 51

yudhiṣṭhira uvāca |
tvayi yāte mahābāho saṃśaptakabalaṃ prati |
prayatnamakarottīvramācāryo grahaṇe mama || 1 ||
[Analyze grammar]

vyūḍhānīkaṃ vayaṃ droṇaṃ varayāmaḥ sma sarvaśaḥ |
prativyūhya rathānīkaṃ yatamānaṃ tathā raṇe || 2 ||
[Analyze grammar]

sa vāryamāṇo rathibhī rakṣitena mayā tathā |
asmānapi jaghānāśu pīḍayanniśitaiḥ śaraiḥ || 3 ||
[Analyze grammar]

te pīḍyamānā droṇena droṇānīkaṃ na śaknumaḥ |
prativīkṣitumapyājau bhettuṃ tatkuta eva tu || 4 ||
[Analyze grammar]

vayaṃ tvapratimaṃ vīrye sarve saubhadramātmajam |
uktavantaḥ sma te tāta bhindhyanīkamiti prabho || 5 ||
[Analyze grammar]

sa tathā codito'smābhiḥ sadaśva iva vīryavān |
asahyamapi taṃ bhāraṃ voḍhumevopacakrame || 6 ||
[Analyze grammar]

sa tavāstropadeśena vīryeṇa ca samanvitaḥ |
prāviśattadbalaṃ bālaḥ suparṇa iva sāgaram || 7 ||
[Analyze grammar]

te'nuyātā vayaṃ vīraṃ sātvatīputramāhave |
praveṣṭukāmāstenaiva yena sa prāviśaccamūm || 8 ||
[Analyze grammar]

tataḥ saindhavako rājā kṣudrastāta jayadrathaḥ |
varadānena rudrasya sarvānnaḥ samavārayat || 9 ||
[Analyze grammar]

tato droṇaḥ kṛpaḥ karṇo drauṇiśca sa bṛhadbalaḥ |
kṛtavarmā ca saubhadraṃ ṣaḍrathāḥ paryavārayan || 10 ||
[Analyze grammar]

parivārya tu taiḥ sarvairyudhi bālo mahārathaiḥ |
yatamānaḥ paraṃ śaktyā bahubhirvirathīkṛtaḥ || 11 ||
[Analyze grammar]

tato dauḥśāsaniḥ kṣipraṃ tathā tairvirathīkṛtam |
saṃśayaṃ paramaṃ prāpya diṣṭāntenābhyayojayat || 12 ||
[Analyze grammar]

sa tu hatvā sahasrāṇi dvipāśvarathasādinām |
rājaputraśataṃ cāgryaṃ vīrāṃścālakṣitānbahūn || 13 ||
[Analyze grammar]

bṛhadbalaṃ ca rājānaṃ svargeṇājau prayojya ha |
tataḥ paramadharmātmā diṣṭāntamupajagmivān || 14 ||
[Analyze grammar]

etāvadeva nirvṛttamasmākaṃ śokavardhanam |
sa caivaṃ puruṣavyāghraḥ svargalokamavāptavān || 15 ||
[Analyze grammar]

saṃjaya uvāca |
tato'rjuno vacaḥ śrutvā dharmarājena bhāṣitam |
hā putra iti niḥśvasya vyathito nyapatadbhuvi || 16 ||
[Analyze grammar]

viṣaṇṇavadanāḥ sarve parigṛhya dhanaṃjayam |
netrairanimiṣairdīnāḥ pratyavekṣanparasparam || 17 ||
[Analyze grammar]

pratilabhya tataḥ saṃjñāṃ vāsaviḥ krodhamūrchitaḥ |
kampamāno jvareṇeva niḥśvasaṃśca muhurmuhuḥ || 18 ||
[Analyze grammar]

pāṇiṃ pāṇau viniṣpiṣya śvasamāno'śrunetravān |
unmatta iva viprekṣannidaṃ vacanamabravīt || 19 ||
[Analyze grammar]

satyaṃ vaḥ pratijānāmi śvo'smi hantā jayadratham |
na cedvadhabhayādbhīto dhārtarāṣṭrānprahāsyati || 20 ||
[Analyze grammar]

na cāsmāñśaraṇaṃ gacchetkṛṣṇaṃ vā puruṣottamam |
bhavantaṃ vā mahārāja śvo'smi hantā jayadratham || 21 ||
[Analyze grammar]

dhārtarāṣṭrapriyakaraṃ mayi vismṛtasauhṛdam |
pāpaṃ bālavadhe hetuṃ śvo'smi hantā jayadratham || 22 ||
[Analyze grammar]

rakṣamāṇāśca taṃ saṃkhye ye māṃ yotsyanti kecana |
api droṇakṛpau vīrau chādayiṣyāmi tāñśaraiḥ || 23 ||
[Analyze grammar]

yadyetadevaṃ saṃgrāme na kuryāṃ puruṣarṣabhāḥ |
mā sma puṇyakṛtāṃ lokānprāpnuyāṃ śūrasaṃmatān || 24 ||
[Analyze grammar]

ye lokā mātṛhantṝṇāṃ ye cāpi pitṛghātinām |
gurudāragāmināṃ ye ca piśunānāṃ ca ye tathā || 25 ||
[Analyze grammar]

sādhūnasūyatāṃ ye ca ye cāpi parivādinām |
ye ca nikṣepahartṝṇāṃ ye ca viśvāsaghātinām || 26 ||
[Analyze grammar]

bhuktapūrvāṃ striyaṃ ye ca nindatāmaghaśaṃsinām |
brahmaghnānāṃ ca ye lokā ye ca goghātināmapi || 27 ||
[Analyze grammar]

pāyasaṃ vā yavānnaṃ vā śākaṃ kṛsarameva vā |
saṃyāvāpūpamāṃsāni ye ca lokā vṛthāśnatām |
tānahnaivādhigaccheyaṃ na ceddhanyāṃ jayadratham || 28 ||
[Analyze grammar]

vedādhyāyinamatyarthaṃ saṃśitaṃ vā dvijottamam |
avamanyamāno yānyāti vṛddhānsādhūṃstathā gurūn || 29 ||
[Analyze grammar]

spṛśatāṃ brāhmaṇaṃ gāṃ ca pādenāgniṃ ca yāṃ labhet |
yāpsu śleṣma purīṣaṃ vā mūtraṃ vā muñcatāṃ gatiḥ |
tāṃ gaccheyaṃ gatiṃ ghorāṃ na ceddhanyāṃ jayadratham || 30 ||
[Analyze grammar]

nagnasya snāyamānasya yā ca vandhyātithergatiḥ |
utkocināṃ mṛṣoktīnāṃ vañcakānāṃ ca yā gatiḥ |
ātmāpahāriṇāṃ yā ca yā ca mithyābhiśaṃsinām || 31 ||
[Analyze grammar]

bhṛtyaiḥ saṃdṛśyamānānāṃ putradārāśritaistathā |
asaṃvibhajya kṣudrāṇāṃ yā gatirmṛṣṭamaśnatām |
tāṃ gaccheyaṃ gatiṃ ghorāṃ na ceddhanyāṃ jayadratham || 32 ||
[Analyze grammar]

saṃśritaṃ vāpi yastyaktvā sādhuṃ tadvacane ratam |
na bibharti nṛśaṃsātmā nindate copakāriṇam || 33 ||
[Analyze grammar]

arhate prātiveśyāya śrāddhaṃ yo na dadāti ca |
anarhate ca yo dadyādvṛṣalīpatyureva ca || 34 ||
[Analyze grammar]

madyapo bhinnamaryādaḥ kṛtaghno bhrātṛnindakaḥ |
teṣāṃ gatimiyāṃ kṣipraṃ na ceddhanyāṃ jayadratham || 35 ||
[Analyze grammar]

dharmādapetā ye cānye mayā nātrānukīrtitāḥ |
ye cānukīrtitāḥ kṣipraṃ teṣāṃ gatimavāpnuyām |
yadi vyuṣṭāmimāṃ rātriṃ śvo na hanyāṃ jayadratham || 36 ||
[Analyze grammar]

imāṃ cāpyaparāṃ bhūyaḥ pratijñāṃ me nibodhata |
yadyasminnahate pāpe sūryo'stamupayāsyati |
ihaiva saṃpraveṣṭāhaṃ jvalitaṃ jātavedasam || 37 ||
[Analyze grammar]

asurasuramanuṣyāḥ pakṣiṇo voragā vā pitṛrajanicarā vā brahmadevarṣayo vā |
caramacaramapīdaṃ yatparaṃ cāpi tasmāttadapi mama ripuṃ taṃ rakṣituṃ naiva śaktāḥ || 38 ||
[Analyze grammar]

yadi viśati rasātalaṃ tadagryaṃ viyadapi devapuraṃ diteḥ puraṃ vā |
tadapi śaraśatairahaṃ prabhāte bhṛśamabhipatya ripoḥ śiro'bhihartā || 39 ||
[Analyze grammar]

evamuktvā vicikṣepa gāṇḍīvaṃ savyadakṣiṇam |
tasya śabdamatikramya dhanuḥśabdo'spṛśaddivam || 40 ||
[Analyze grammar]

arjunena pratijñāte pāñcajanyaṃ janārdanaḥ |
pradadhmau tatra saṃkruddho devadattaṃ dhanaṃjayaḥ || 41 ||
[Analyze grammar]

sa pāñcajanyo'cyutavaktravāyunā bhṛśaṃ supūrṇodaraniḥsṛtadhvaniḥ |
jagatsapātālaviyaddigīśvaraṃ prakampayāmāsa yugātyaye yathā || 42 ||
[Analyze grammar]

tato vāditraghoṣāśca prādurāsansamantataḥ |
siṃhanādāśca pāṇḍūnāṃ pratijñāte mahātmanā || 43 ||
[Analyze grammar]