Chapter 7

tatas taiḥ sacivair yuktaḥ kramāc chrutadhipañcamaiḥ |
mṛgāṅkadattas tasyāṃ sa gacchan vindhyāṭavībhuvi || 1 ||
[Analyze grammar]

saṃprāpa saphalasnigdhatarucchāyamanoramam |
ekaṃ kānanamacchācchasvāduśītajalāśayam || 2 ||
[Analyze grammar]

tatra snātaḥ sasacivo bhuktanānāphalaś ca saḥ |
ekadeśe latācchanne samālāpamivāśṛṇot || 3 ||
[Analyze grammar]

gatvā dadāti yāvac ca dṛṣṭiṃ tatra latāntare |
tāvaddadarśa tatrāntarmahāntaṃ varavāraṇam || 4 ||
[Analyze grammar]

āśvāsayantaṃ puruṣaṃ pathi śrāntamacakṣuṣam |
kareṇopāhṛtaistoyaiḥ phalaiḥ karṇānilais tathā || 5 ||
[Analyze grammar]

kaccitkiṃcitsamāśvasto bhavāniti ca taṃ muhuḥ |
sādhumānuṣavatprītyā vadantaṃ vyaktayā girā || 6 ||
[Analyze grammar]

taṃ dṛṣṭvā sa sakhīnāha rājaputraḥ savismayaḥ |
paśyata kva gajo vanyaḥ kvācāro mānuṣocitaḥ || 7 ||
[Analyze grammar]

avaśyaṃ ko 'py ayaṃ hetoḥ kuto 'pyevamiha sthitaḥ |
ayaṃ pracaṇḍaśakteś ca sakhyuḥ susadṛśaḥ pumān || 8 ||
[Analyze grammar]

kiṃ tvandha eṣa tatkṣipraṃ paśyāma iti tānsakhīn |
uktvā mṛgāṅkadatto 'tra tasthau śṛṇvannalakṣitaḥ || 9 ||
[Analyze grammar]

tāvat sa taṃ samāśvastam andhaṃ papraccha vāraṇaḥ |
kas tvaṃ katham ihāyāto 'syandhaḥ san kathyatām iti || 10 ||
[Analyze grammar]

tataḥ so 'pi jagādaitaṃ pumānandho gajottamam |
astīhāmaradattākhyo rājāyodhyāpurīpatiḥ || 11 ||
[Analyze grammar]

mṛgāṅkadatta ityasti tasyottamaguṇaḥ sutaḥ |
tasya pracaṇḍaśaktyākhyo bhṛtyo 'haṃ śubhajanmanaḥ || 12 ||
[Analyze grammar]

sa rājaputraḥ kenāpi kāraṇena svadeśataḥ |
pitrā nirvāsito 'smābhiḥ sahāyair daśabhir vṛtaḥ || 13 ||
[Analyze grammar]

te śaśāṅkavatīhetorvayamujjayinīṃ tataḥ |
prasthitā nāgaśāpena sarve 'ṭavyāṃ viyojitāḥ || 14 ||
[Analyze grammar]

ahaṃ cāndhatvamāyātastacchāpena paribhraman |
iha prāpto yathālabdhaphalamūlajalāśanaḥ || 15 ||
[Analyze grammar]

śvabhrādipātānaśanair mṛtyuriṣṭatamo 'pi me |
anubhāvayatā kleśaṃ na datto bata vedhasā || 16 ||
[Analyze grammar]

jāne tvadya yathā śāntaṃ kṣudduḥkhaṃ tvatprasādataḥ |
tathāndhyam apime śāmyetkim apitvaṃ hi daivatam || 17 ||
[Analyze grammar]

ity ukte tena saṃjātaniścayo harṣaśokayoḥ |
mṛgāṅkadatto madhyasthaḥ sacivāṃstānabhāṣata || 18 ||
[Analyze grammar]

pracaṇḍaśaktirevāyaṃ kaṣṭametāṃ daśāṃ gataḥ |
na caiṣa saṃbhāvayituṃ yukto nastvarayādhunā || 19 ||
[Analyze grammar]

netropakāramasyaiṣa dvipaḥ kurvīta jātucit |
asmāndṛṣṭvā tvasau naśyeddraṣṭavyo 'ntastad atra naḥ || 20 ||
[Analyze grammar]

ity uktvā sānugaḥ śṛṇvaṃstasthau rājasuto 'tra saḥ |
pracaṇḍaśaktiś ca tatas taṃ sa papraccha vāraṇamf || 21 ||
[Analyze grammar]

idānīṃ brūhi vṛttāntaṃ mahātman mama ko bhavān |
kaiṣā te gajatā vāk ca samadasyāpi nirmadā || 22 ||
[Analyze grammar]

tadākarṇya sa niḥśvasya gajendrastam abhāṣata |
śṛṇvimaṃ nijavṛttāntamāmūlātkathayāmi te || 23 ||
[Analyze grammar]

nagaryāmekalavyāyāṃ purā śrutadharābhidhaḥ |
rājābhūttasya cābhūtāṃ sutau dvau bhāryayor dvayoḥ || 24 ||
[Analyze grammar]

tayoḥ śīladharaṃ nāma jyeṣṭhaṃ tasmindivaṃ gate |
rājyātsatyadharo nāma kanīyānniravāsayat || 25 ||
[Analyze grammar]

so 'tha śīladharo gatvā tenāmarṣeṇa śaṃkaram |
ārādhya tapasā tuṣṭāttasmādvaramayācata || 26 ||
[Analyze grammar]

bhūyāsaṃ deva gandharvo yenāmbaracaro bhavan |
taṃ satyadharadāyādaṃ hanyāmevāvahelayā || 27 ||
[Analyze grammar]

tac chrutvā bhagavānevaṃ śaṃbhurādiśati sma tam |
etatte bhāvi kiṃ tvadya sa śatruste mṛtaḥ svayam || 28 ||
[Analyze grammar]

janiṣyate ca rāḍhāyāṃ punarugrabhaṭasya saḥ |
nṛpasya putraḥ samarabhaṭo nāma pitṛpriyaḥ || 29 ||
[Analyze grammar]

tvaṃ ca bhīmabhaṭo nāma tasya dvaimāturo 'grajaḥ |
bhrātā janiṣyate taṃ ca hatvā rājyaṃ kariṣyasi || 30 ||
[Analyze grammar]

sāmarṣeṇa tvayā caitadyatastaptaṃ tapas tataḥ |
muniśāpātpadabhraṣṭo vanyo hastī bhaviṣyasi || 31 ||
[Analyze grammar]

jātismaro vyaktavān kva bhavān āśvāsayiṣyati |
yadāvasannam atithiṃ svavṛttāntaṃ ca vakṣyati || 32 ||
[Analyze grammar]

tadā gajatvān nirmukto gandharvas tvaṃ bhaviṣyasi |
upakāraś ca tasyāpi bhaviṣyaty atithes tadā || 33 ||
[Analyze grammar]

ityādiśya tirobhūte bharge śīladharo 'tra saḥ |
dṛṣṭvā ciratapaḥkṣīṇāṃ gaṅgāyāṃ tanumakṣipat || 34 ||
[Analyze grammar]

atrāntare kathāsaṃdhau pūrvoddiṣṭasya bhūpateḥ |
tasyograbhaṭasaṃjñasya rāḍhāyāṃ puri tulyayā || 35 ||
[Analyze grammar]

manoramākhyayā devyā samaṃ nivasataḥ sukham |
pārśvaṃ deśāntarādāgāllāsako nāma nartakaḥ || 36 ||
[Analyze grammar]

sa ca nāṭyaprayogaṃ taṃ rājñe tasmāyadarśayat |
daityānāṃ hariṇā yatra hṛtaṃ strīrūpiṇāmṛtam || 37 ||
[Analyze grammar]

tatra cāmṛtikābhūmau nṛtyantīṃ nartakasya saḥ |
dadarśa tanayāṃ tasya nāmnā lāsyavatīṃ nṛpaḥ || 38 ||
[Analyze grammar]

tasyāḥ sa rūpaṃ dṛṣṭvaiva viśvakṣobhitadānavam |
satyāmṛtāyā iva tadrājā kāmavaśaṃ yayau || 39 ||
[Analyze grammar]

nṛttānte ca dhanaṃ bhūri tatpitre pravitīrya saḥ |
prāveśayattāṃ tatkālaṃ kanyāmantaḥpuraṃ svakam || 40 ||
[Analyze grammar]

tatas tayā sa nartakyā vihitodvāhayā saha |
lāsyavatyā nṛpastasthau tanmukhāsaktalocanaḥ || 41 ||
[Analyze grammar]

ekadā sa yajuḥsvāmisaṃjñaṃ prāha purohitam |
putro nāstīha me tattvaṃ putreṣṭiṃ mama kurviti || 42 ||
[Analyze grammar]

tatas tatheti vidhivattāmiṣṭiṃ tasya bhūpateḥ |
purohitaḥ sa vidadhe vidvadbhir brāhmaṇaiḥ saha || 43 ||
[Analyze grammar]

prāśayanmantrapūtaṃ ca taddevīṃ tāṃ manoramām |
bhāgamagryaṃ carorjyeṣṭhāṃ sa pūrvārādhitastayā || 44 ||
[Analyze grammar]

śeṣaṃ tasyai dvitīyasyai lāsyavatyai dadau ca saḥ |
tataś ca tau tayoḥ śīladharasatyadharāvubhau || 45 ||
[Analyze grammar]

ubhayor udare rājñyoḥ pūrvoktau saṃbabhūvatuḥ |
prāpte ca samaye cātra devī tasya mahīpateḥ || 46 ||
[Analyze grammar]

manoramā prasūte sma putraṃ kalyāṇalakṣaṇam |
eṣa bhīmabhaṭo nāma jātaḥ khyātayaśā nṛpaḥ || 47 ||
[Analyze grammar]

ity uccacāra tatkālaṃ suspaṣṭā bhāratī divaḥ |
tato 'nyedyuḥ prasuṣuve sāpi lāsyavatī sutam || 48 ||
[Analyze grammar]

pitā cataṃ sa samarabhaṭaṃ nāmnākaronnṛpaḥ |
atha tau kṛtasaṃskārāvavardhetāṃ śanaiḥ śiśū || 49 ||
[Analyze grammar]

jyeṣṭho bhīmabhaṭastaṃ tu kaniṣṭhamajayadguṇaiḥ |
tatsaṃgharṣeṇa cānyonyaṃ tayor vairamavardhata || 50 ||
[Analyze grammar]

ekadā bāhunā bāhuyuddhakelau samatsaraḥ |
hanti sma kaṇṭhe samarabhaṭo bhīmabhaṭaṃ haṭhāt || 51 ||
[Analyze grammar]

tato bhīmabhaṭaḥ krodhādbhujābhyāṃ pariveṣṭya tam |
nyadhādutkṣipya samarabhaṭaṃ caṭaditi kṣitau || 52 ||
[Analyze grammar]

sa tenābhihato gāḍhaṃ sarvadvārair asṛgvaman |
samutthāpyāntikaṃ māturnīto 'bhūnnijasevakaiḥ || 53 ||
[Analyze grammar]

sā taṃ dṛṣṭvā ca buddhvā ca vṛttāntaṃ snehakātarā |
tasya mūrdhani mūrdhānamāsajya prārudadbhṛśam || 54 ||
[Analyze grammar]

tāvadrājñā praviṣṭena taddṛṣṭvākulacetasā |
kimetaditi pṛṣṭā sā lāsyavatyevam abravīt || 55 ||
[Analyze grammar]

iyaṃ bhīmabhaṭenāsya kṛtāvasthā sutasya me |
sadā cābhibhavatyenaṃ na cāhaṃ deva vacmi te || 56 ||
[Analyze grammar]

idaṃ dṛṣṭvā tu jāne 'haṃ tavaiva syācchivaṃ katham |
tasminnevaṃvidhe putre vicārayatu vā bhavān || 57 ||
[Analyze grammar]

evaṃ tayoktaḥ priyayā sa tamugrabhaṭo nṛpaḥ |
kruddho bhīmabhaṭaṃ svātmasaṃnikarṣānnyavārayat || 58 ||
[Analyze grammar]

hṛtavṛttiṃ ca kṛtvainaṃ rājaputraśataṃ vyadhāt |
rakṣārthaṃ tasya samarabhaṭasya saparicchadam || 59 ||
[Analyze grammar]

svādhīnaṃ cākarottasya bhāṇḍāgāraṃ kanīyasaḥ |
taṃ tu bhīmabhaṭaṃ jyeṣṭhaṃ sarvākāramapākarot || 60 ||
[Analyze grammar]

tato mātā tamāhūya sā vakti sma manoramā |
nartakīrāgiṇā tāvat pitrā tvaṃ parivarjitaḥ || 61 ||
[Analyze grammar]

tanmātāmahaśālāṃ tvaṃ gaccha pāṭaliputrakam |
tatra mātāmahaḥ svaṃ te rājyaṃ dāsyatyaputrakaḥ || 62 ||
[Analyze grammar]

iha tvāṃ caiṣa samarabhaṭo hanyādripurbalī |
iti māturvacaḥ śrutvā tāṃ sa bhīmabhaṭo 'bravīt || 63 ||
[Analyze grammar]

kṣatriyaḥ sanna deśaṃ svaṃ tyakṣyāmi klībavadbhayāt |
dhīrā bhavāmba kaḥ śakto varāko māṃ prabādhitum || 64 ||
[Analyze grammar]

ity uktavantaṃ taṃ mātā sābravīt tarhi bhūyasaḥ |
sahāyān kuru rakṣārthaṃ madīyais tvaṃ dhanair iti || 65 ||
[Analyze grammar]

tato bhīmabhaṭo 'vādīd etad amba na śobhate |
evaṃ hi satyaṃ tātasya prātipakṣyaṃ kṛtaṃ bhavet || 66 ||
[Analyze grammar]

tanme tvadāśiṣaiva syātkalyāṇaṃ nirvṛtā bhava |
ityāśvāsya sa tāṃ bhīmabhaṭo niragamattataḥ || 67 ||
[Analyze grammar]

tāvac ca tatra buddhvā tatpaurāḥ sarve vyacintayan |
anaucityaṃ paraṃ rājñā kṛtaṃ bhīmabhaṭasya tu || 68 ||
[Analyze grammar]

naivāsya rājyaṃ samarabhaṭo hartuṃ pragalbhate |
tadeṣa pūrvasevāyāḥ kālo bhīmabhaṭasya naḥ || 69 ||
[Analyze grammar]

iti niścitya guptaṃ te paurā bhīmabhaṭaṃ dhanaiḥ |
tathāpuṣyanyathā so 'tra tasthau bhṛtyaiḥ samaṃ sukham || 70 ||
[Analyze grammar]

kaniṣṭhaḥ sa tu tasyāsīdvadham eva nirūpayan |
pituḥ paricchadakṛtaḥ parikalpya tadāśayam || 71 ||
[Analyze grammar]

tāvac ca śaṅkadattākhyo vipraḥ śūro yuvā dhanī |
dvayor vayasyaḥ samarabhaṭam etya tam abravīt || 72 ||
[Analyze grammar]

bhrātrā vairaṃ na yuktaṃ te naiṣa dharmo na ca tvayā |
jyāyānsa bādhituṃ śakyaḥ syādakīrtiḥ paraṃ tava || 73 ||
[Analyze grammar]

iti bruvannadhikṣipya sa tena nirabhartsyata |
hitopadeśo mūrkhasya kopāyaiva na śāntaye || 74 ||
[Analyze grammar]

tatas tatkopato gatvā dhīrastadvijigīṣayā |
śaṅkhadatto vyadhādekasakhyaṃ bhīmabhaṭena saḥ || 75 ||
[Analyze grammar]

athātra maṇidattākhyaḥ ko'pi deśāntarāgataḥ |
ānītavān aśvaratnam ekam atyuttamaṃ vaṇik || 76 ||
[Analyze grammar]

śaśāṅkadhavalaṃ śuddhaśaṅkhādiśravyaniḥsvanam |
dugdhābdheriva kallolajālamucchritamutthitam || 77 ||
[Analyze grammar]

rocamānaiḥ samāyuktacūḍāmaṇyaṅgadādibhiḥ |
gandharvakulasaṃbhūtisaṃsiddhair iva bhūṣitam || 78 ||
[Analyze grammar]

ākhyātaṃ śaṅkhadattena taṃ ca gatvā hayottamam |
krīṇāti sma dhanair bhīmabhaṭastasmādvaṇigvarāt || 79 ||
[Analyze grammar]

tatkṣaṇaṃ cātra samarabhaṭo buddhvā tadaitya saḥ |
mūlyena dviguṇenāśvaṃ vaṇijo mārgati sma tam || 80 ||
[Analyze grammar]

paratantrīkṛtaṃ taṃ ca tasmai nādādvaṇigyadā |
tadā so 'śvaṃ balānnetuṃ taṃ prāvartata matsarāt || 81 ||
[Analyze grammar]

tenobhayostayo rājaputrayoḥ śastrapāṇiṣu |
bhṛtyeṣu dhāviteṣv atra samabhūdyuddhamuddhatam || 82 ||
[Analyze grammar]

tatra bhīmabhaṭoccaṇḍadordaṇḍanihatānugaḥ |
tyaktvā hayaṃ sa samarabhaṭo 'bhajyata tadbhayāt || 83 ||
[Analyze grammar]

bhajyamānaṃ ca dhāvitvā keśeṣvākṛṣya pṛṣṭhataḥ |
nihanti śaṅkhadattas taṃ yāvan manyubharākulaḥ || 84 ||
[Analyze grammar]

tāvadbhīmabhaṭaḥ paścādupetyainaṃ nyavārayat |
āstāṃ saṃprati tātasya duḥkhamevaṃ bhavediti || 85 ||
[Analyze grammar]

tataḥ sa śaṅkhadattena mukto raktaṃ vraṇair vaman |
trastaḥ palāyya samarabhaṭaḥ pārśvamagātpituḥ || 86 ||
[Analyze grammar]

tato 'tra svīkṛtāṃśvaṃ taṃ vīraṃ bhīmabhaṭaṃ kṣaṇāt |
upetya brāhmaṇaḥ kaścinnītvā vijanam abravīt || 87 ||
[Analyze grammar]

mātā manoramā devī yajuḥsvāmī purohitaḥ |
pitṛmantrī sa sumatistvāmidaṃ bruvate 'dhunā || 88 ||
[Analyze grammar]

jānāsi yādṛśo vatsa rājā tvayi viśeṣataḥ |
asminvyatikare vṛtte śatrutām eva te gataḥ || 89 ||
[Analyze grammar]

tadātmānaṃ ca dharmaṃ ca yaśaś ca yadi rakṣasi |
āyatiṃ yadi jānāsi yadyasmānmanyase hitān || 90 ||
[Analyze grammar]

tadarko 'staṃ gato yāvaditastāvadalakṣitaḥ |
nirgatya sāṃprataṃ siddhyai mātāmahagṛhaṃ vraja || 91 ||
[Analyze grammar]

iti saṃdiṣṭavadbhiś ca sadratnasvarṇapūritam |
tair idaṃ preṣitaṃ bhāṇḍaṃ maddhastena ca gṛhyatām || 92 ||
[Analyze grammar]

etattasmāddvijāc chrutvā sa tathetyabhinandya ca |
sudhīstatsvarṇasadratnabhāṇḍaṃ bhīmabhaṭo 'grahīt || 93 ||
[Analyze grammar]

dattvā ca pratisaṃdeśamanurūpaṃ visṛjya tam |
dvijaṃ kṛpāṇapāṇistamārūḍho 'bhūtturaṅgamam || 94 ||
[Analyze grammar]

gṛhītahemaratnena dvitīyāśvādhirohiṇā |
sahitaḥ śaṅkhadattena so 'tha prasthitavāṃs tataḥ || 95 ||
[Analyze grammar]

dūraṃ vyatītya cādhvānaṃ niśīthe sa nṛpātmajaḥ |
prāpadbhīmabhaṭo mārgamadhye śaravaṇaṃ mahāt || 96 ||
[Analyze grammar]

tatrānavarataṃ tasya savayasyasya gacchataḥ |
patadvājikhurakṣuṇṇaśaraśabdaprabodhitam || 97 ||
[Analyze grammar]

utthāya siṃhamitunamudgarjatpotakaiḥ saha |
apāṭayattu turagau nakhair udarayor adhaḥ || 98 ||
[Analyze grammar]

sadvitīyaś ca tānsarvānsiṃhāvīraḥ sa tatkṣaṇam |
khaḍgaprahāralūnāṅgānakarodgatajīvitān || 99 ||
[Analyze grammar]

samittro 'py avaruhyātha turagau yāvadīkṣate |
tāvadvigalitāntrau tau bhūmāv apatatāmubhau || 100 ||
[Analyze grammar]

taddṛṣṭvā sa viṣaṇṇastaṃ śaṅkhadattam abhāṣata |
sakhe viruddhātsvajanādvayaṃ yatnātpalāyitāḥ || 101 ||
[Analyze grammar]

brūhi yatnaśatenāpi kva palāyāmahe vidheḥ |
yenehāpi hatāḥ smo 'dya vāhamātrāsahiṣṇunā || 102 ||
[Analyze grammar]

yatkṛte vihito deśatyāgaḥ so 'pi hayo mṛtaḥ |
tadasmābhiḥ kathaṃ padbhyāṃ gamyeyamaṭavī niśi || 103 ||
[Analyze grammar]

ity uktastena sa suhṛcchaṅkhadattastam abravīt |
naitan navaṃ jayati yatpauruṣaṃ vidhuro vidhiḥ || 104 ||
[Analyze grammar]

nisarga evaṃ tasyāyaṃ dhairyeṇa tu sa jīyate |
vāto 'drer iva kiṃ kuryād dhīrasyākampitasya saḥ || 105 ||
[Analyze grammar]

tadehyārūḍhadhair yāśvau vrajāvo 'treti vādinā |
śaṅkhadattena sa samaṃ prāyādbhīmabhaṭas tataḥ || 106 ||
[Analyze grammar]

vyatikrāntasya śanakaiḥ kāntāramatha tasya tat |
śarapāṭitapādasya śarvarī paryahīyata || 107 ||
[Analyze grammar]

udite 'tha jagaddīpe bhānau naiśatamomuṣi |
mārgābjinīsarojeṣu madhurakvaṇitāliṣu || 108 ||
[Analyze grammar]

diṣṭyā siṃhādisaṃkīrṇā tīrṇo 'yamaṭavīmimām |
jalpatsvivotphullamukheṣv anyonyamavalokya tam || 109 ||
[Analyze grammar]

krameṇa gacchann uṭajaiḥ samakīrṇaṃ tapasvinām |
pulinaṃ jahnukanyāyāḥ prāpat sa savayasyakaḥ || 110 ||
[Analyze grammar]

tatra śārvaśirovāsalagnacandrāmṛtair iva |
tajjalaiḥ svādubhiḥ śītaiḥ snāto viśrāmyati sma saḥ || 111 ||
[Analyze grammar]

vyādhānmārgāgatātkrītair bhṛṣṭaiś ca hariṇāmiṣaiḥ |
śaṅkhadattopanītaiś ca dehavṛttiṃ vyadhatta saḥ || 112 ||
[Analyze grammar]

uttarītum aśakyāṃ ca pūrṇām ālokya jāhnvavīm |
taraṅgahastair asakṛd vārayantīm ivocchritaiḥ || 113 ||
[Analyze grammar]

tasyāḥ kūlena sa tato gatvā brāhmaṇaputrakam |
svādhyāyāsaktamadrākṣīdvijanasthoṭajāṅgaṇe || 114 ||
[Analyze grammar]

upetya tamapṛcchac ca kastvaṃ kimiha nirjane |
ekākyeva karoṣīti tataḥ so 'pyenam abhyadhāt || 115 ||
[Analyze grammar]

ahaṃ vārāṇasīvāsī śrīkaṇṭhākhyadvijātmajaḥ |
nīlakaṇṭhābhidhaḥ pitrā kṛtasaṃskārapaddhatiḥ || 116 ||
[Analyze grammar]

so 'haṃ gurukulādhītavidyo bālye nijaṃ gṛham |
upaimi yāvat tāvan me vinaṣṭāḥ sarvabāndhavāḥ || 117 ||
[Analyze grammar]

tenānātho 'rthahīnaś ca gārhasthyāsiddhiduḥsthitaḥ |
nirviṇṇo 'hamihāgatya tapastīvramaśiśriyam || 118 ||
[Analyze grammar]

tataḥ svapne 'bravīddevī gaṅgā dattvā phalāni me |
etāni khādaṃs tiṣṭheha yāvat prāpsyasi vāñchitam || 119 ||
[Analyze grammar]

etac chrutvā prabuddhyaiva gatvā snātvā niśākṣaye |
prāpaṃ phalāni gaṅgāyāmāgatāni jalāntare || 120 ||
[Analyze grammar]

tānyānīyāmṛtasvādūnyuṭaje 'haṃ ca bhuktavān |
evaṃ tānyanvahaṃ prāptānyāśnannahamiha sthitaḥ || 121 ||
[Analyze grammar]

iti tenodite śaṅkhadattaṃ bhīmabhaṭo 'bravīt |
asmai gārhasthyaparyāptaṃ dadāmi guṇine dhanam || 122 ||
[Analyze grammar]

tac chrutvā śraddhitavacāstena rājasuto 'tha saḥ |
mātrā nisṛṣṭaṃ taddravyamadāttasmai dvijanmane || 123 ||
[Analyze grammar]

aluptasattvakoṣāṇāṃ mahattvaṃ mahatāṃ hi kim |
ākarṇitāṃ parasyārtiṃ na cecchindanti tatkṣaṇam || 124 ||
[Analyze grammar]

kṛtārthīkṛtya taṃ vipraṃ tato gatvā sa sarvataḥ |
cinvannuttaraṇopāyaṃ gaṅgāyāṃ nāptavānyadā || 125 ||
[Analyze grammar]

tadā bhīmabhaṭo mūrdhanibaddhāsivibhūṣaṇaḥ |
śaṅkhadattayuto dorbhyāṃ tarītuṃ tāmavātarat || 126 ||
[Analyze grammar]

madhyabhāge ca vāryoghadūrīkṛtavayasyakaḥ |
kathaṃcit tīrṇavān pāraṃ hriyamāṇaḥ sa vīcibhiḥ || 127 ||
[Analyze grammar]

pāraṃ prāptasya mittraṃ taṃ śaṅkhadattamapaśyataḥ |
anviṣyataścānutaṭaṃ tasyāstamagamadraviḥ || 128 ||
[Analyze grammar]

tato nirāśo hā mittretyākrandannatiduḥkhitaḥ |
gaṅgāyāṃ kṣeptumātmānamudyato 'bhūnniśāgame || 129 ||
[Analyze grammar]

jīvitaṃ me sahā devi jāhnavyapahṛtastvayā |
tacchūnyaṃ deham apy etaṃ tvaṃ gṛhāṇādhunā mama || 130 ||
[Analyze grammar]

ity uktvā yāvadātmānaṃ kṣeptumicchati tatra saḥ |
tāvadāvirabhūtsākṣādgaṅgā tasyāmbumadhyataḥ || 131 ||
[Analyze grammar]

abravīttīvrasaṃvegatuṣṭā sā taṃ ca tatkṣaṇam |
mā putra sāhasaṃ kārṣīḥ sa te jīvansakhā sthitaḥ || 132 ||
[Analyze grammar]

acireṇa ca saṃyogastava tena bhaviṣyati |
pratilomānulomākhyāṃ vidyāṃ caitāṃ gṛhāṇa me || 133 ||
[Analyze grammar]

adṛśyaḥ syāt parasyaitām anulomāṃ paṭhan naraḥ |
pratilomāṃ paṭhan kuryād iṣṭarūpaprakāśanam || 134 ||
[Analyze grammar]

etatprabhāvā vidyeyaṃ yat sā saptākṣarobhitā |
etatprabhāvāt tvaṃ cāsyāṃ pṛthvyāṃ rājā bhaviṣyasi || 135 ||
[Analyze grammar]

ity uktvā dattavidyā sā tiro 'bhūttasya jāhnavī |
jātāsthaḥ sakhilābhādau maraṇātso 'py upāramat || 136 ||
[Analyze grammar]

mittraprāptyutsuko nītvā kṛcchrāt padma iva kṣapām |
prātar bhīmabhaṭas taṃ sa cinvan prasthitavāṃs tataḥ || 137 ||
[Analyze grammar]

athānveṣṭuṃ kramādetaṃ śaṅkhadattaṃ paribhraman |
deśaṃ sa lāṭaviṣayaṃ kadācitprāpadekakaḥ || 138 ||
[Analyze grammar]

yatrāsaṃkīrṇavarṇo 'pi janaścitrojjvalasthitiḥ |
nilayo 'pi kalānāṃ yo na doṣākaraśabdabhāk || 139 ||
[Analyze grammar]

tatrāntarnagare devakulāvāsānvilokayan |
bhrāntvā sa dyūtakārāṇāmekāṃ śālāmavāptavānf || 140 ||
[Analyze grammar]

tatra praviśya cāpaśyatkitavānakṣadevinaḥ |
kaṭikarpaṭamātraikavasanānapi peśalaiḥ || 141 ||
[Analyze grammar]

vibhaktaiḥ pīvaraiścāṅgair bhogavyāyāmasūcakaiḥ |
śaṃsato gūḍham aiśvaryam arthārthāśritatatkalam || 142 ||
[Analyze grammar]

kṛtālāpaiś ca taiḥ sākaṃ dyūtamārabhate sma saḥ |
ayaṃ sābharaṇo 'smākaṃ bhakṣya ityāttabuddhibhiḥ || 143 ||
[Analyze grammar]

tatastena hṛtaṃ teṣāṃ jitvākṣair akhilaṃ dhanam |
dhūrtair yadvañcayitvānyāṃstair abhūtsam upārjitam || 144 ||
[Analyze grammar]

hāritārthāṃś ca kitavān svagṛhān gantum udyatān |
dvārārpitabhujo ruddhvā sa tān bhīmabhaṭo 'bravīt || 145 ||
[Analyze grammar]

kva gacchathedaṃ gṛhṇīta dhanaṃ kimamunā mama |
mayaitaddeyamiṣṭebhyo yūyaṃ ceṣṭā na kiṃ mama || 146 ||
[Analyze grammar]

bhavadbhiḥ sadṛśān iṣṭān sakhīn prāpnomy ahaṃ kutaḥ |
iti tasmin vadaty eva teṣv agṛhṇatsu ca hriyā || 147 ||
[Analyze grammar]

akṣakṣapaṇako nāma tatraikaḥ kitavo 'bravīt |
taddyūtaparibhāṣaiṣā hāritaṃ yanna dīyate || 148 ||
[Analyze grammar]

tathāpyeṣa suhṛdbhūtvā yadyasmabhyaṃ prayacchati |
svecchayā jitam apy arthaṃ tadgṛhṇīmo vayaṃ na kim || 149 ||
[Analyze grammar]

tac chrutvā te 'bruvannanye sakhyaṃ cedeṣa śāśvatam |
tādṛśaṃ kurute 'smābhistadaitadupapadyate || 150 ||
[Analyze grammar]

evam uktavatastānsa matvā vīrāṃs tatheti taiḥ |
vyadhādbhīmabhaṭaḥ sakhyamadāttebhyaś ca taddhanam || 151 ||
[Analyze grammar]

tadarthitaś ca taiḥ sākamudyāne sakuṭumbakaiḥ |
gatvā bhojanapānādyair vyaharattadupāhṛtaiḥ || 152 ||
[Analyze grammar]

tato 'kṣakṣapaṇādyais taiḥ pṛṣṭas tebhyo 'bravīn nijam |
sa vaṃśanāmavṛttāntam apṛchac ca tathaiva tān || 153 ||
[Analyze grammar]

athaivamakṣakṣapaṇastasmai svodantam abhyadhāt |
śivadattābhidhāno 'bhūdbrāhmaṇo hastināpure || 154 ||
[Analyze grammar]

tasyāhaṃ vasudattākhyo mahādhanavataḥ sutaḥ |
bālye mayā śastravidyā vedavidyāś ca śikṣitāḥ || 155 ||
[Analyze grammar]

tato vivāhaḥ pitrā me vihitaḥ sadṛśātkulāt |
mātā tu me mahāraudrā durārādhyātikopanā || 156 ||
[Analyze grammar]

tayā codvejito 'py arthaṃ dṛṣṭvā māṃ saparigraham |
pitā me svagṛhaṃ tyaktvā sa gataḥ kvāpy atarkitaḥ || 157 ||
[Analyze grammar]

tad dṛṣṭvā sabhayo 'mbāyāś cittagrahavidhāvaham |
yatnān niyuktavān bhāryāṃ sāpi bhītā tathākarot || 158 ||
[Analyze grammar]

ambā tu tasyā nātuṣyatkathaṃcitkalahodyatā |
tūṣṇīṃsthānamavajñānaṃ dainyālāpaṃ ca kaitavam || 159 ||
[Analyze grammar]

pratyāyanaṃ vivādaṃ ca manyamānā durāśayā |
ko hi tyājayituṃ śakto vahneḥ svāṃ dahanātmatām || 160 ||
[Analyze grammar]

tatas tasyā viruddhaistaiśceṣṭitaiḥ sā mamācirāt |
khinnā bhāryāpi nirgatya na jāne kva gatā gṛhāt || 161 ||
[Analyze grammar]

athodvigno gṛhaṃ tyaktumanā api balādaham |
militvā bandhubhiḥ pāpair vivāhaṃ kārito 'param || 162 ||
[Analyze grammar]

sāpi bhāryā mama tayā tathā saṃtāpitāmbhayā |
udbadhya pāśenātmānaṃ vyāpāditavatī yathā || 163 ||
[Analyze grammar]

tato 'haṃ nitarāṃ khinno videśaṃ gantumudyataḥ |
nivārayadbhyo bandhubhyo 'varṇayaṃ mātṛduṣṭatām || 164 ||
[Analyze grammar]

pitṛpravāsanādau me kāraṇāntaravādinām |
teṣāṃ yatpratyayo nābhūttadyuktyā dāruputrikā || 165 ||
[Analyze grammar]

kārayitvā mayaikānte pariṇītā mṛṣā punaḥ |
ānīya sthāpitā cāntargṛhe 'nyatrārpitārgale || 166 ||
[Analyze grammar]

rakṣikaikā kṛtā cāsyā nārī karmakarīnibhā |
mayaiṣā nūtanā bhāryā sthāpitaiva pṛthaggṛhe || 167 ||
[Analyze grammar]

tvaṃ cāhaṃ cādhunātraiva svagṛhe pṛthagāsvahe |
na gantavyaṃ tvayā tatra nāgantavyamitastayā || 168 ||
[Analyze grammar]

ārādhanaṃ tavāprauḍhā na sā vetti hi saṃprati |
ityambām abravaṃ cāhamanvamanyata sāpi tat || 169 ||
[Analyze grammar]

tato dineṣu yāteṣu yadā tāṃ kapaṭasnuṣām |
na kathaṃcidapi prāpatsārgale 'ntargṛhe sthitām || 170 ||
[Analyze grammar]

tadāśmanā sā mūrdhānamāhatya svayamekadā |
tāramākrandati smāmbā raktāktā svagṛhāṅgaṇe || 171 ||
[Analyze grammar]

śrutvākrandaṃ praviṣṭena mayā sarvaiś ca bāndhavaiḥ |
dṛṣṭvā kim etad brūhīti pṛṣṭā sāsūyam abhyadhāt || 172 ||
[Analyze grammar]

īdṛśī snuṣayāgatya vināhetuḥ kṛtā mama |
avasthā tadidānīṃ me maraṇenaiva niṣkṛtiḥ || 173 ||
[Analyze grammar]

tac chrutvaiva sakopāste tāṃ sahādāya bāndhavāḥ |
tatrāgacchanmayā sākaṃ yatra sā dāruputrikā || 174 ||
[Analyze grammar]

apāsyārgalamuddhāṭya dvāraṃ yāvaddiśanti te |
tāvatkāṣṭhamayīṃ nārīmapaśyaṃs tatra kevalām || 175 ||
[Analyze grammar]

tato viḍambitātmānaṃ hasanto 'mbāṃ vilakṣitām |
utpannapratyayā yātā bāndhavāste yathāgatam || 176 ||
[Analyze grammar]

ahaṃ ca tyaktataddeśo bhrāmyannimamavāptavān |
pradeśamiha ca dyūtaśālāṃ daivātkilāviśam || 177 ||
[Analyze grammar]

atraitānahamadrākṣaṃ pañcākṣair dīvyato janān |
imaṃ caṇḍabhujaṃgākhyametaṃ pāṃsupaṭaṃ tathā || 178 ||
[Analyze grammar]

amuṃ śmaśānavetālamimaṃ kālavarāṭakam |
śāriprastarametaṃ ca śūrāṃstulyaparākramān || 179 ||
[Analyze grammar]

etaiḥ samaṃ ca dyūtena tatra krīḍitavānaham |
dāsaḥ syādvijito jeturiti baddhvā mithaḥ paṇam || 180 ||
[Analyze grammar]

tato dyūtena vijitā mama dāsyamime gatāḥ |
ahaṃ guṇair jitastveṣāṃ dāsatāmāgataḥ svayam || 181 ||
[Analyze grammar]

ebhiḥ samaṃ ca vasataḥ svaduḥkhaṃ vismṛtaṃ mama |
nāmnāvasthocitenātra viddhyakṣakṣapaṇaṃ ca mām || 182 ||
[Analyze grammar]

ityahaṃ satkulotpannair ihaivaṃ gūhitātmabhiḥ |
etaiḥ saha sthitaḥ puṇyaistvaṃ cādya milito 'tra naḥ || 183 ||
[Analyze grammar]

tadidānīṃ tvamasmākaṃ prabhuḥ prāgeva caitayāf |
buddhyā tavāttamasmābhistaddhanaṃ guṇarāgibhiḥ || 184 ||
[Analyze grammar]

ityakṣakṣapaṇenokte svavṛttānte krameṇa te |
sarve bhīmabhaṭāyānye 'pyudantānsvānavarṇayan || 185 ||
[Analyze grammar]

tato 'rthārtham upāttābhiḥ kalābhiś chāditātmanaḥ |
pravīrāṃstānsakhīnmatvā kṛtvānyā vividhāḥ kathāḥ || 186 ||
[Analyze grammar]

nītvā vihāreṇa dinaṃ dṛṣṭvā pauraṃdarīṃ diśam |
udbhāsamānaśītāṃśutilakālaṃkṛtānanām || 187 ||
[Analyze grammar]

agād bhīmabhaṭas tasmād udyānāt sa nṛpātmajaḥ |
akṣakṣapaṇakādyais taiḥ ṣaḍbhiḥ saha tadāspadam || 188 ||
[Analyze grammar]

taiḥ samaṃ tiṣṭhataścātra tasya prāvṛḍupāgamat |
śaṃsantīva suhṛtprāptiṃ pravṛṣṭaghanagarjitaiḥ || 189 ||
[Analyze grammar]

tadā cātra vipāśākhyā nadī mattā samudragā |
pratīpavāhinī jātā sāgaraugheṇa pūritā || 190 ||
[Analyze grammar]

samāpūrya mahāvāripūreṇa pulinaṃ ca sā |
oghapraśāntāv ambhodhisaṃmukhīva jagāma sā || 191 ||
[Analyze grammar]

tasmin kāle 'tra cānīya kṣiptas tenaughavāriṇā |
mahāmatsyo garīyas tvād vyāsakto 'bhūn nadītaṭe || 192 ||
[Analyze grammar]

dṛṣṭvā ca taṃ pradhāvyaiva nihantuṃ vividhāyudhaiḥ |
tatratyāḥ pāṭayāmāsurjanāstasyodaraṃ timeḥ || 193 ||
[Analyze grammar]

pāṭitānniragāccātra tasmājjīvanyuvā dvijaḥ |
taddarśanādbhutāttatra lokaḥ kolāhalaṃ vyadhāt || 194 ||
[Analyze grammar]

tac chrutvā saha mittraistair gato bhīmabhaṭo 'tra saḥ |
apaśyacchaṅkhadattaṃ taṃ mittraṃ matsyādvinirgatān || 195 ||
[Analyze grammar]

samāśliṣac ca dhāvitvā siñcandhārāśrubhiḥ sa tam |
mīnodaradarīvāsavisraṃ prakṣālayanniva || 196 ||
[Analyze grammar]

so 'pi tadvipaduttīrṇaḥ prāpya taṃ parirabhya ca |
suhṛdaṃ śaṅkhadatto 'gādutsavādutsavaṃ tadā || 197 ||
[Analyze grammar]

tato bhīmabhaṭenātra tena pṛṣṭaḥ sa kautukāt |
śaṅkhadattaḥ svavṛttāntaṃ saṃkṣepādevam abravīt || 198 ||
[Analyze grammar]

tadā gaṅgormivegena hṛtas tvaddṛṣṭigocarāt |
aśaṅkitaṃ nigīrṇo 'smi matsyenātimahīyasā || 199 ||
[Analyze grammar]

tasyodaramahāveśmapraviṣṭo 'haṃ tataś ciram |
atiṣṭhaṃ churikotkṛttaṃ tanmāṃsaṃ bhakṣayan kṣudhā || 200 ||
[Analyze grammar]

adya so 'yamihānīya dhātrā kṣiptaḥ kathaṃcana |
matsyo hato janair ebhiḥ kṛṣṭaś cāsyodarād aham || 201 ||
[Analyze grammar]

dṛṣṭo mayā tvamarkaś ca prakāśaṃ me gatā diśaḥ |
eṣa me mittra vṛttānto vedmi nāhamataḥ param || 202 ||
[Analyze grammar]

ity uktaḥ śaṅkhadattena tena bhīmabhaṭaś ca saḥ |
anye ca sarve tatrasthā vismayādevamabruvan || 203 ||
[Analyze grammar]

kva gaṅgāyāṃ nigaraṇaṃ matsyenābdhau kva tadgatiḥ |
kva ca tadvartmanā tasya vipāśāyāṃ niveśanam || 204 ||
[Analyze grammar]

kva vadhas tasya tasmāc ca jīvataḥ kvāsya nirgamaḥ |
aho vidheracintyaiva gatiradbhutakarmaṇaḥ || 205 ||
[Analyze grammar]

ityādi taiḥ saha vadannakṣakṣapaṇakādibhiḥ |
anayacchaṅkhadattaṃ sa dhāma bhīmabhaṭo nijam || 206 ||
[Analyze grammar]

tatra copācaratsnānavastrādyaistaṃ sa sotsavaḥ |
tenaiva vapuṣā jātam iva matsyodarātpunaḥ || 207 ||
[Analyze grammar]

tatas tena samaṃ deśe tasmin bhīmabhaṭe sthite |
āgād yātrotsavas tatra nāgarājasya vāsukeḥ || 208 ||
[Analyze grammar]

taddarśanāya sa prāyādrājaputraḥ suhṛdvṛtaḥ |
milanmahājanaṃ tasya nāgamukhyasya ketanam || 209 ||
[Analyze grammar]

tatra praṇamya tanmūrtiṃ prāsāde mālyadāmabhiḥ |
bhṛte bhogigaṇākāraiḥ pāstālodakasaṃnibhe || 210 ||
[Analyze grammar]

gatvā dakṣiṇato 'paśyanmahāntaṃ tasya sa hradam |
phaṇāratnaprabhāpuñjair iva raktāmbujaiścitam || 211 ||
[Analyze grammar]

viṣāgnidhūmapaṭalair iva nīlotpalair bhṛtam |
vṛtaṃ vātapatatpuṣpair arcadbhir iva pādapaiḥ || 212 ||
[Analyze grammar]

svalpaḥ samudro 'mudrasya puro 'sya pratibhāti me |
ananyahāriśrīkasya hṛtaśrīkaḥ sa śauriṇā || 213 ||
[Analyze grammar]

iti yāvac ca taṃ dṛṣṭvā sa cintayati vismitaḥ |
tāvat snānārthamāyātāmadrākṣīttatra kanyakām || 214 ||
[Analyze grammar]

rājño lāṭeśvarasyātra candrādityasya putrikām |
jātāṃ kuvalayāvalyāṃ nāmnā haṃsāvalīṃ śubhām || 215 ||
[Analyze grammar]

aṅgair apahnuto 'py anyair yasyā divyānukāribhiḥ |
cakṣuṣā capalenokto martyabhāvo nimeṣataḥ || 216 ||
[Analyze grammar]

sā puṣpapelavavapuṣkoṭiprāptasphuradguṇā |
muṣṭigrāhyeṇa madhyena mānmathīva dhanurlatā || 217 ||
[Analyze grammar]

dṛṣṭvaiva tiryag valitair api locanasāyakaiḥ |
amohayadbhīmabhaṭaṃ hṛdi nirbhidya taṃ tadā || 218 ||
[Analyze grammar]

so 'pi tasyāḥ praviśyaiva tiryaṅ nayanavartmanā |
hṛtkoṣamaharaddhair yaṃ jagatsaundaryataskaraḥ || 219 ||
[Analyze grammar]

tato guptavisṛṣṭāptadakṣaceṭīmukhena sā |
anviṣyati sma mittrebhyas tasya nāmāspadādikam || 220 ||
[Analyze grammar]

athāgātsā parijanair nīyamānā svamandiram |
snātā vivartitamukhī muhustadgatayā dṛśā || 221 ||
[Analyze grammar]

tato bhīmabhaṭaḥ so 'pi svāvāsaṃ sakhibhiḥ saha |
pratyāgāttatpriyāpremapāśabandhaskhaladgatiḥ || 222 ||
[Analyze grammar]

tatra tasmai kṣaṇāddūtīṃ tāṃ ceṭīṃ rājakanyakā |
haṃsāvalī sā vyasṛjaddattvā saṃdeśamīpsitam || 223 ||
[Analyze grammar]

sābhupetya tamāha sma ceṭī bhīmabhaṭaṃ rahaḥ |
deva haṃsāvalī rājasutā tvāmanunāthati || 224 ||
[Analyze grammar]

hriyamāṇaṃ smaraugheṇā dṛṣṭvā praṇayinaṃ janam |
imaṃ drutamanādṛtya na yuktā te taṭasthatā || 225 ||
[Analyze grammar]

iti saṃprāpya dūtīto dayitāvacanāmṛtam |
labdhajīvitahṛṣṭastāṃ so 'tha bhīmabhaṭo 'bravīt || 226 ||
[Analyze grammar]

oghastho na taṭastho 'hamiti vetti na kiṃ priyā |
tadvacastu kariṣyāmi kāmaṃ labdhāvalambanaḥ || 227 ||
[Analyze grammar]

etya saṃbhāvayiṣyāmi naktamantaḥpure 'dya tām |
vidyācchannaṃ viśantaṃ ca nahi drakṣyati ko'pi mām || 228 ||
[Analyze grammar]

ity uktā tena ceṭī sā tuṣṭā gatvā śaśaṃsa tat |
haṃsāvalyai tataḥ sāpi tasthau tatsaṃgamonmukhī || 229 ||
[Analyze grammar]

so 'pi pradoṣasamaye divyābharaṇabhūṣitaḥ |
gaṅgāvitīrṇavidyāyā ānulomyena pāṭhataḥ || 230 ||
[Analyze grammar]

adṛśyībhūya gatvā tattasyā antaḥpurottamam |
samāviśadbhīmabhaṭaḥ prāgviviktīkṛtaṃ tayā || 231 ||
[Analyze grammar]

ratiprītikare tatra kālāgurusugandhini |
daśārdhavarṇavinyastapuṣpaprakaraśobhite || 232 ||
[Analyze grammar]

kāmodyānanibhe kāntāṃ tāṃ vahaddivyasaurabhām |
so 'paśyadgāṅgasadvidyāvallīprasavasaṃnibhām || 233 ||
[Analyze grammar]

prātilomyena vidyāṃ ca tāṃ paṭhitvā sa dṛśyatām |
sahasā subhagastasyā rājaputryā gato 'bhavat || 234 ||
[Analyze grammar]

sā taṃ dṛṣṭvaiva sānandapulakotkampasādhvasā |
raṇatsvābharaṇātodyeṣv anṛtyadiva tatkṣaṇam || 235 ||
[Analyze grammar]

āsīc ca kanyakābhāvalajjayā vinatānanā |
kartavyam iva pṛcchantī hṛdayaṃ tatpravṛttikṛt || 236 ||
[Analyze grammar]

mugdhe prakāśitasyāpi hriyā kiṃ cetaso 'dhunā |
nigūhate na tadvastu kathameṣa tu gūhyate || 237 ||
[Analyze grammar]

pulako 'ṅgeṣu kiṃ caitadvidalatsaṃdhi kañcukam |
ityādibhir vacobhistāmanyaiś ca praṇayakramaiḥ || 238 ||
[Analyze grammar]

vidhāya sumukhīṃ muktalajjāṃ bhīmabhaṭo 'tha tām |
gāndharvodvāhavidhinā bhāryāṃ haṃsāvalīṃ vyadhāt || 239 ||
[Analyze grammar]

nītvā tayā samaṃ rātriṃ tanmukhābjālilīlayā |
kṛcchrāttāṃ naktameṣyāmītyāmantryāgātsvamāspadam || 240 ||
[Analyze grammar]

tāṃ ca haṃsāvalīṃ tatra praviṣṭāḥ svamahattarāḥ |
prātarantaḥpure 'drākṣuryuktāṃ saṃbhogalakṣaṇaiḥ || 241 ||
[Analyze grammar]

lulitālakakeśāntāmārdradantanakhakṣatām |
sākṣātsmaraśaraśreṇivraṇavyākulitāmiva || 242 ||
[Analyze grammar]

gatvā carājñe tatpitre te śaśaṃsus tathaiva tat |
so 'pi tatra vyadhādguptaṃ naktaṃ cārānavekṣitum || 243 ||
[Analyze grammar]

so 'tha bhīmabhaṭo mittraiḥ sahitaś ca sukhaṃ dinam |
nītvā pradoṣe bhūyastatpriyāntaḥ puramāgamat || 244 ||
[Analyze grammar]

alakṣitapraviṣṭaṃ taṃ tatra vidyāprabhāvataḥ |
dṛṣṭvā saṃbhāvya siddhaṃ ca cārāste niryayus tataḥ || 245 ||
[Analyze grammar]

gatvā carājñe jagaduḥ so 'pi tānevamādiśat |
adṛśyo yaḥ praviṣṭo 'tra sugupte na sa mānuṣaḥ || 246 ||
[Analyze grammar]

tattamānayatehaiva yāvat paśyāmi kiṃ tvidam |
brūta cāparuṣaṃ yūyam eva madvacanena tam || 247 ||
[Analyze grammar]

prakaṭaṃ prārthitā mattaḥ kiṃ na mattanayā tvayā |
rahasyaṃ kiṃ kṛtaṃ tvādṛgguṇavān hi varaḥ kutaḥ || 248 ||
[Analyze grammar]

ity uktvā preṣitā rājñā gatvā cārās tathaiva te |
dvārasthā eva tadvākyamāhurbhīmabhaṭāya tat || 249 ||
[Analyze grammar]

so 'pi jñāto 'smi rājñeti buddhvāpy abhyantarasthitaḥ |
sudhīro rājaputras tān prasahya pratyabhāṣata || 250 ||
[Analyze grammar]

madvākyādbrūta rājānaṃ prātarāsthānametya te |
tattvamāvedayiṣyāmi rātrirandhā hi saṃprati || 251 ||
[Analyze grammar]

tac chrutvā tair gatais tadvaduktas tūṣṇīm abhūn nṛpaḥ |
prātar bhīmabhaṭaḥ so 'tha tato 'yāsīt sakhīn prati || 252 ||
[Analyze grammar]

taiś ca sākaṃ kṛtoddāmaveṣo vīraiḥ sa saptabhiḥ |
āsthānamagamattasya candrādityasya bhūpateḥ || 253 ||
[Analyze grammar]

tattejovairyasaundaryadarśinā tena satkṛte |
nijocitāsanāsīne tasmin bhīmabhaṭe dvijaḥ || 254 ||
[Analyze grammar]

sa tatsakhā śaṅkhadatto rājānaṃ tam abhāṣata |
rājannugrabhaṭasyāyaṃ rājño rāḍhāpateḥ sutaḥ || 255 ||
[Analyze grammar]

atarkyavidyāmāhātmyād duratikramavikramaḥ |
nāmnā bhīmabhaṭo yuṣmatsutāhetor ihāgataḥ || 256 ||
[Analyze grammar]

tac chrutvā rātrivṛttāntaṃ smaranyogyamavekṣya tam |
hanta dhanyāḥ sma ity uktvā rājā śraddhitavāṃs tataḥ || 257 ||
[Analyze grammar]

prādāc ca racitodvāhavibhavaprakriyo 'tha tām |
sutāṃ haṃsāvalīṃ bhīmabhaṭāya vibhavottaram || 258 ||
[Analyze grammar]

tato bhīmabhaṭo bhūrihastyaśvagrāmalābhavān |
haṃsāvalyā ca lakṣmyā ca sahāsīttatra nirvṛtaḥ || 259 ||
[Analyze grammar]

dinaiś ca tasmai śvaśuro lāṭarājyaṃ samarpya tat |
candrādityaḥ sa vṛddhaḥ sannaputraḥ prāvrajadvanam || 260 ||
[Analyze grammar]

atha bhīmabhaṭaḥ prāpya tadrājyamaśiṣatkṛtī |
samyaktaiḥ saptabhir vīraiḥ śaṅkhadattādibhiḥ saha || 261 ||
[Analyze grammar]

gateṣv atha dineṣv atra cārebhyo jātu so 'śṛṇot |
prayāgametya pitaraṃ mṛtamugrabhaṭaṃ nṛpam || 262 ||
[Analyze grammar]

abhiṣiktaṃ ca tena sve rāḍhārājye mumūrṣatā |
putraṃ kaniṣṭhaṃ samarabhaṭaṃ taṃ nartakīsutam || 263 ||
[Analyze grammar]

tato 'nuśocya pitaraṃ kṛtvā tasyaurdhvadaihikam |
tasmai sa dūtaṃ samarabhaṭāya prāhiṇon nṛpaḥ || 264 ||
[Analyze grammar]

tātasiṃhāsane mūrkha nartakīputra kā tava |
yogyatā mama tat svaṃ hi lāṭarājye 'tra saty api || 265 ||
[Analyze grammar]

atastvayādhiroḍhavyaṃ na tasminniti tasya ca |
saṃdiṣṭavān sa lekhena dāyādasyāpakāriṇaḥ || 266 ||
[Analyze grammar]

sa ca dūto drutaṃ gatvā lekhaṃ tasmai samarpayat |
āveditātmā samarabhaṭāyāsthānavartine || 267 ||
[Analyze grammar]

so 'pi taṃ tādṛśaṃ bhīmabhaṭanāmāṅkamuddhatam |
vācayitvaiva samarabhaṭaḥ kruddho 'bhyabhāṣata || 268 ||
[Analyze grammar]

ayogya iti pitrā yo deśānnirvāsitaḥ purā |
tasyaiṣā durvinītasya yuktā mithyābhimānitā || 269 ||
[Analyze grammar]

siṃhāyate sṛgālo 'pi svaguhāgṛhasaṃsthitaḥ |
siṃhasya darśanaṃ prāpto jñāyate sa tu tādṛśaḥ || 270 ||
[Analyze grammar]

ityādyudgarjya lekhena saṃdiśya ca tathaiva tat |
so 'pi bhīmabhaṭāya svaṃ pratidūtaṃ visṛṣṭavān || 271 ||
[Analyze grammar]

pratidūto 'pi gatvā sa lāṭadeśeśvarāya tam |
tasmai bhīmabhaṭāyādāllekhaṃ kṣattṛniveditaḥ || 272 ||
[Analyze grammar]

so 'tha bhīmabhaṭastasmiṃllekhe tatrānuvācite |
muktāṭṭahāso dāyādapratidūtaṃ tam abhyadhāt || 273 ||
[Analyze grammar]

gaccha re dūta madvākyādbrūhi taṃ nartakīsutam |
aśvagrahe śaṅkhadattādrakṣito 'si mayā tadā || 274 ||
[Analyze grammar]

bālastātapriyaśceti kṣamiṣye na punaḥ punaḥ |
niścitaṃ tvāṃ praheṣyāmi vatsalasyāntikaṃ pituḥ || 275 ||
[Analyze grammar]

sajjo bhava dinair eva jānīhi prāptamatra mām |
ity uktvā preṣya dūtaṃ taṃ yātrāṃ bhīmabhaṭo vyadhat || 276 ||
[Analyze grammar]

tasmin gajādrim ārūḍhe rājendāv udayojjvale |
kṣubhyann udacalad baddhanādaḥ sainyamahāmbudhiḥ || 277 ||
[Analyze grammar]

samāpūryanta cāsaṃkhyair upasaṃkhyām upasthitaiḥ |
sāmantai rājaputraiś ca prasthitaiḥ sabalair diśaḥ || 278 ||
[Analyze grammar]

sākampā saṃpatad bhūrigajavājijavākulā |
barādvidalanatrāsādiva rauti sma medinī || 279 ||
[Analyze grammar]

evaṃ bhīmabhaṭo gatvā sa rāḍhābhyarṇamāptavān |
kurvansenārajorājimuṣitārkaprabhaṃ nabhaḥ || 280 ||
[Analyze grammar]

tāvac ca so 'pi samarabhaṭo buddhvā nṛpo 'kṣamī |
saṃnahya senayā tasya niragādyoddhumagrataḥ || 281 ||
[Analyze grammar]

milataḥ sma ca tau sainyajaladhī pūrvapaścimau |
prāvartata ca śūrāṇāmāhavapralayo mahān || 282 ||
[Analyze grammar]

saśabdakhaḍgasaṃpātajanmā tatrānalo nabhaḥ |
kupyatkṛtāntadantāgradalanottha ivāvṛṇot || 283 ||
[Analyze grammar]

vahanti sma ca nārācāstīkṣṇāgrāyatapakṣmalāḥ |
vīrāvalokinākastrīlocanāpātavibhramāḥ || 284 ||
[Analyze grammar]

tato reṇuvitānā sā sainyanirghoṣavāditā |
nṛtyatkabandhā vyarucat saṅgrāmāṅgaṇaraṅgabhūḥ || 285 ||
[Analyze grammar]

karaṅkavāhinī cātra pramattā muṇḍamālinī |
aharatkālarātrīva jantucakramasṛṅnadī || 286 ||
[Analyze grammar]

kṣaṇāc ca śaṅkhadattena tenākṣakṣapaṇena ca |
taiś ca caṇḍabhujaṃgādyair bāhuyuddhaviśāradaiḥ || 287 ||
[Analyze grammar]

samaṃ mahābalaiḥ śūrair durmadair dviradair iva |
sa tadbhīmabhaṭo 'bhāṅkṣītparasainyaṃ dhanurdharaḥ || 288 ||
[Analyze grammar]

bhagne ca sainye samarabhaṭaḥ so 'tha rathasthitaḥ |
pradhāvyārabhata kruddho raṇābdhau mandarāyitam || 289 ||
[Analyze grammar]

tato bhīmabhaṭas tasya vāraṇastho 'bhipatya saḥ |
dhanuśchittvāvadhīdbāṇaiścaturo 'pi rathe hayān || 290 ||
[Analyze grammar]

viratho 'py atha dhāvitvā tomareṇa gajottamam |
hanti sma kumbhe samarabhaṭo bhīmabhaṭasya saḥ || 291 ||
[Analyze grammar]

sa ca tattomarahato gajastasyāpatadbhuvi |
tatas tau virathau dvāvapyabhūtāṃ pādacāriṇau || 292 ||
[Analyze grammar]

gṛhītacarmakhaḍgau ca padātī eva tau tadā |
dvandvayuddhena nṛpatī ayudhyetāmamarṣaṇau || 293 ||
[Analyze grammar]

vidyāvaśādadṛśyatvaṃ kṛtvā śakto 'pi tadvadhe |
dharmāpekṣī na taṃ śatruṃ tathā bhīmabhaṭo 'vadhīt || 294 ||
[Analyze grammar]

prasahya yudhyamānastu tasya mūrdhānamacchinat |
khaḍgena khaḍgayuddhajño nartakītanayasya saḥ || 295 ||
[Analyze grammar]

hate ca tasminsamarabhaṭe samyaksasainike |
pradatte sādhuvāde ca gaganātsiddhacāraṇaiḥ || 296 ||
[Analyze grammar]

gate samāptiṃ saṅgrāme bandimāgadhasaṃstutaḥ |
rāḍhāpurīṃ bhīmabhaṭaḥ prāviśatsakhibhiḥ saha || 297 ||
[Analyze grammar]

cirapravāsopayāto hatāris tatra mātaram |
sa rāma iva kauśalyāṃ darśanotkāmanandayat || 298 ||
[Analyze grammar]

paurābhinanditaścātha kṛtī siṃhāsane pituḥ |
upāviśattatsacivaiḥ pūjyamāno guṇapriyaiḥ || 299 ||
[Analyze grammar]

saṃmānya prakṛtīḥ kṛtsnāstataś ca vihitotsavaḥ |
śubhe 'hni śaṅkhadattāya lāṭarājyaṃ sa dattavān || 300 ||
[Analyze grammar]

taṃ preṣya lāṭaviṣayaṃ taddeśajabalānvitam |
tebhyo 'kṣakṣapaṇādibhyo dadau grāmānvasūni ca || 301 ||
[Analyze grammar]

tair yukto 'tha sa tatrāsīt praśāsan paitṛkaṃ padam |
lāṭendrasutayā devyā haṃsāvalyā tayā saha || 302 ||
[Analyze grammar]

kramāc ca jitvā pṛthivīmāhṛtya nṛpakanyakāḥ |
tatsaṃbhogaikasakto 'bhūtso 'tha bhīmabhaṭo nṛpaḥ || 303 ||
[Analyze grammar]

mantriṣu nyastabhāraś ca krīḍannantaḥpuraiḥ saha |
abhyantarānna niragātpānādivyasanena saḥ || 304 ||
[Analyze grammar]

athaikadā munirdraṣṭuṃ tamuttaṅko yadṛcchayā |
pūrvaśarvasamādeśapākakāla ivāgamat || 305 ||
[Analyze grammar]

dvāraṃ prāpte munau cāsmindvāḥstheṣvāvedayatsu ca |
rājā rāgamadaiśvaryadarpāndho na kilāśṛṇot || 306 ||
[Analyze grammar]

tataḥ kruddho muniḥ so 'smai rājñe śāpamadādimam |
madāndha rājyād bhraṣṭas tvaṃ vanyo hastī bhaviṣyasi || 307 ||
[Analyze grammar]

tac chrutvā sa bhayādbhraṣṭamado nirgatya bhūpatiḥ |
dīnaiḥ prāsādayadvākyair muniṃ taṃ caraṇānataḥ || 308 ||
[Analyze grammar]

tataḥ sa śāntakopaḥ sanmaharṣistam abhāṣata |
bhaviṣyasi dvipastāvadrājanna syāttadanyathā || 309 ||
[Analyze grammar]

kiṃ tu pracaṇḍaśaktyākhyaṃ nāgaśāpāvasāditam |
mṛgāṅkadattasacivaṃ cakṣurvaikalyamāgatam || 310 ||
[Analyze grammar]

samāśvāsyātithībhūtaṃ yadā tasmai pravakṣyasi |
svavṛttāntaṃ tadaitasmānmokṣaṃ prāpsyasi śāpataḥ || 311 ||
[Analyze grammar]

tac ca prāggiriśādiṣṭaṃ gandharvatvamavāpsyasi |
sa cātithiste cakṣuṣmāneva saṃpadyate tadā || 312 ||
[Analyze grammar]

ity uktvaiva muniḥ prāyāduttaṅkaḥ sa yathāgatam |
so 'pi bhīmabhaṭo hastī saṃpanno rājyavicyutaḥ || 313 ||
[Analyze grammar]

tam imaṃ māṃ gajībhūtaṃ viddhi bhīmabhaṭaṃ sakhe |
sa ca pracaṇaśaktistvaṃ jāne śāpānta eṣa me || 314 ||
[Analyze grammar]

evam uktvā gajākāraṃ tyaktvā bhīmabhaṭo 'tra saḥ |
tatkṣaṇaṃ divyavibhavo gandharvaḥ samapadyata || 315 ||
[Analyze grammar]

pracaṇḍaśaktiś cotpannalocanālokanotsavaḥ |
tatkālam eva saṃjajñe paśyan gandharvam atra tam || 316 ||
[Analyze grammar]

tāvac ca vallījālāntaḥ sthitaḥ śrutvā tayoḥ kathām |
sahito 'nyaiḥ sa sacivaiḥ sudṛḍhotpannaniścayaḥ || 317 ||
[Analyze grammar]

mṛgāṅkadattaḥ kālajñaḥ pradhāvya rabhasāddrutam |
pracaṇḍaśaktiṃ jagrāha kaṇṭhe taṃ nijamantriṇam || 318 ||
[Analyze grammar]

so 'py akāṇasudhāvarṣasiktāṅga iva vīkṣya tam |
pracaṇḍaśaktiḥ sahasā pādayor agrahītprabhum || 319 ||
[Analyze grammar]

tatas tau ciraviśliṣṭasaṃśliṣṭau bhṛśaduḥkhitau |
sa bhīmabhaṭagandharvo rudantau paryasāntvayat || 320 ||
[Analyze grammar]

mṛgāṅkadatto 'pi sa taṃ gandharvaṃ praṇato 'bravīt |
yadasmābhir ayaṃ labdhaḥ sakhā yaccāmunā punaḥ || 321 ||
[Analyze grammar]

cakṣuṣmattvamavāptaṃ tattvanmāhātmyānnamo 'stu te |
śrutvaitatso 'pi gandharvo rājaputram uvāca tam || 322 ||
[Analyze grammar]

acirāt sacivāñ śeṣāṃl labdhvā kṛtsnān avāpsyasi |
tāṃ śaśāṅkavatīṃ bhāryāṃ sāmrājyaṃ ca mahītale || 323 ||
[Analyze grammar]

tadadhair yaṃ na kāryaṃ te kalyāṇinsādhayāmy aham |
tadā ca saṃnidhāsye te yadā tvaṃ māṃ smariṣyasi || 324 ||
[Analyze grammar]

iti sa vigataśāpaḥ prāptakalyāṇatoṣaḥ prakaṭitasakhibhāvo rājaputraṃ tamuktvā |
prasabhamudapataddyāṃ cārukeyūrahārakvaṇitamukharitāśo 'nanyagandharvadhuryaḥ || 325 ||
[Analyze grammar]

so 'pi pracaṇḍaśaktiṃ prāpya vane tatra mantribhiḥ sahitaḥ |
anayan mṛgāṅkadatto jātavṛtir nṛpasutas tadahaḥ || 326 ||
[Analyze grammar]