Chapter 5

tato 'nyedyuralaṃkāravatīvāsagṛhe sthitam |
naravāhanadattaṃ taṃ saṃnidhau sarvamantriṇām || 1 ||
[Analyze grammar]

etya vijñāpayām āsa marubhūtikasevakaḥ |
sodaryaḥ sauvidallasya tadantaḥ purarakṣiṇaḥ || 2 ||
[Analyze grammar]

marubhūtermayā deva sevā varṣadvayaṃ kṛtā |
bhojanācchādanaṃ dattaṃ sabhāryasyāmunā mama || 3 ||
[Analyze grammar]

ābhāṣitāstu tatpṛṣṭhe dīnārāḥ prativatsaram |
pañcāśadye mamānena tāneṣa na dadāti me || 4 ||
[Analyze grammar]

mṛgyamāṇena caitena caraṇenāhamāhataḥ |
tenopaviṣṭaḥ prāye 'haṃ siṃhadvāre 'sya tāvake || 5 ||
[Analyze grammar]

vicārayati cennātra devo me tatkaromy aham |
agnipraveśamadhikaṃ kiṃ vacmyeṣa hi me prabhuḥ || 6 ||
[Analyze grammar]

ity uktvā virate tasminmarubhūtirabhāṣata |
deyā mayāsmai dīnārāḥ sāṃprataṃ tu na santi me || 7 ||
[Analyze grammar]

ity uktavantaṃ sarveṣu prahasatsu svamantriṇam |
naravāhanadattas taṃ marubhūtim abhāṣata || 8 ||
[Analyze grammar]

kimevaṃ mūrkhabhāvas te nādhikeyaṃ matistava |
uttiṣṭha dīnāraśataṃ dehyasmā avilambitam || 9 ||
[Analyze grammar]

etatprabhorvacaḥ śrutvā marubhūtirvilajjitaḥ |
tadaivānīya tattasmai sa dīnāraśataṃ dadau || 10 ||
[Analyze grammar]

tato 'tra gomukho 'vādīnna vācyo marubhūtikaḥ |
vicitracittavṛttiryatsargo deva prajāpateḥ || 11 ||
[Analyze grammar]

yuṣmābhir eṣā kiṃ cātra ciradātur mahīpateḥ |
tatsevakasya ca kathā prasaṅgākhyasya na śrutā || 12 ||
[Analyze grammar]

ciradātetyabhūtpūrvaṃ rājā cirapureśvaraḥ |
sujanasyāpi tasyāsītparivāro 'tidurjanaḥ || 13 ||
[Analyze grammar]

deśāntarāgatas tasya prasaṅgo nāma bhūpateḥ |
mittrābhyāṃ sahito dvābhyāṃ babhūva kila sevakaḥ || 14 ||
[Analyze grammar]

sevāṃ cakurvatas tasya vyatītaṃ varṣapañcakam |
na sa rājā dadau kiṃcinnimitte 'pyutsavādike || 15 ||
[Analyze grammar]

sa ca tasya na saṃprāpa vijñaptyavasaraṃ prabhoḥ |
parivārasya dauratmyātsakhyoḥ prerayatoḥ sadā || 16 ||
[Analyze grammar]

ekadā tasya rājñaś ca bālaḥ putro vyapadyata |
duḥkhitaṃ caitya sarve 'pi bhṛtyāstaṃ paryavārayan || 17 ||
[Analyze grammar]

tanmadhye ca prasaṅgākhyaḥ śokādeva sa sevakaḥ |
sakhibhyāṃ vāryamāṇo 'pi rājānaṃ taṃ vyajijñapat || 18 ||
[Analyze grammar]

bahukālaṃ vayaṃ deva sevakā na ca nastvayā |
dattaṃ kiṃcittathāpīha sthitāḥ smastvatsutāśayā || 19 ||
[Analyze grammar]

tvayā yadi na dattaṃ tattvatputro 'smasu dāsyati |
so 'pi daivena nītaścettan naḥ kimiha sāṃpratam || 20 ||
[Analyze grammar]

vrajāma iti jalpitvā patitvā so 'sya pādayoḥ |
rājña prasaṅgo niragātsakhidvayayutas tataḥ || 21 ||
[Analyze grammar]

aho putre 'pi baddhāsthāḥ sevakā me dṛḍhā ime |
tadete mama na tyājyā iti saṃcintya tatkṣaṇam || 22 ||
[Analyze grammar]

sa rājā tān prasaṅgādīn ānāyyaiva tathā dhanaiḥ |
apūrayad yathā bhūyo naitān dāridryam aspṛśat || 23 ||
[Analyze grammar]

evaṃ vicitrā dṛśyante svabhāvā deva dehinām |
yatkāle sa nṛpo nādādakāle tu dadau tathā || 24 ||
[Analyze grammar]

ityākhyāya kathākhyānapaṭurbhūyaḥ sa gomukhaḥ |
vatseśvarasutādeśādimāmakathayatkathām || 25 ||
[Analyze grammar]

āsīdgaṅgātaṭe pūrvaṃ pūtapauraṃ tadambubhiḥ |
saurājyaramyaṃ kanakapurākhyaṃ nagarottamam || 26 ||
[Analyze grammar]

yatra bandhaḥ kavigirāṃ chedaḥ prattreṣv adṛśyata |
bhaṅgo 'lakeṣu nārīṇāṃ sasyasaṃgrahaṇe khalaḥ || 27 ||
[Analyze grammar]

tatra vāsukināgendratanayātpriyadarśanāt |
jāto yaśodharākhyāyāṃ rājaputryāṃ mahāyaśāḥ || 28 ||
[Analyze grammar]

āsītkanakavarṣākhyo nagare nṛpatiḥ purā |
kṛtsnabhūbhāravoḍhāpi yo 'śeṣaguṇabhūṣitaḥ || 29 ||
[Analyze grammar]

lubdho yaśasi na tvarthe bhītaḥ pāpānna śatrutaḥ |
mūrkhaḥ parāpavādeṣu na ca śāstreṣu yo 'bhavat || 30 ||
[Analyze grammar]

alpatvaṃ yasya kope 'bhūnna prasāde mahātmanaḥ |
cāpe ca baddhamuṣṭitvaṃ na dāne dhīracetasaḥ || 31 ||
[Analyze grammar]

yenātyadbhutarūpeṇa rakṣatā cākhilaṃ jagat |
māravyathākulaścakre dṛṣṭenaivābalājanaḥ || 32 ||
[Analyze grammar]

sa kadāciccharatkāle soṣmaṇyunmadavāraṇe |
rājahaṃsaparīvāre sotsavānanditapraje || 33 ||
[Analyze grammar]

ātmatulyaguṇe rantuṃ citraprāsādam āviśat |
ākṛṣṭakamalāmodavahanmārutaśītalam || 34 ||
[Analyze grammar]

tatra nirvarṇayanyāvattaccitraṃ sa praśaṃsati |
tāvat praviśya bhūpaṃ taṃ pratīhāro vyajijñapat || 35 ||
[Analyze grammar]

ihāgato vidarbhebhyo 'pūrvaścitrakaraḥ prabho |
ananyasamamātmānaṃ citrakarmaṇyudāharan || 36 ||
[Analyze grammar]

roladevābhidhānena siṃhadvāre 'tra tena ca |
etaddevābhilikhyādya cīrikollambitā kila || 37 ||
[Analyze grammar]

tac chrutvaivādarādbhūpenādiṣṭānayanaṃ sa tam |
ānināya pratīhāro gatvā citrakaraṃ kṣaṇāt || 38 ||
[Analyze grammar]

sa praviśya dadarśātra citrālokanalīlayā |
sthitaṃ kanakavarṣaṃ taṃ nṛpaṃ citrakaro rahaḥ || 39 ||
[Analyze grammar]

varanārīkucotsaṅgasamarpitatanūbharam |
sahelodañcitakaropāttatāmbūlavīṭikam || 40 ||
[Analyze grammar]

praṇamya copaviṣṭastāṃ rājānaṃ vihitādaram |
śanair vijñāpayām āsa roladevaḥ sa citrakṛt || 41 ||
[Analyze grammar]

cīrikollambitā deva tvatpādābjadidṛkṣayā |
mayā na vijñānamadāttatkṣantavyamidaṃ mama || 42 ||
[Analyze grammar]

ādiśyatāṃ ca citre kimalikhāmīha rūpakam |
bhavatvetatkalāśikṣāyatno me saphalaḥ prabho || 43 ||
[Analyze grammar]

iti citrakareṇokte sa rājā nijagāda tam |
upādhyāya yathākāmaṃ kiṃcidālikhyatāṃ tvayā || 44 ||
[Analyze grammar]

hlādayāmo vayaṃ cakṣurbhrāntistvatkauśale tu kā |
ity ukte tena rājñātra tatpārśvasthā babhāṣire || 45 ||
[Analyze grammar]

rājaivālikhyatāmanyair virūpaiḥ kiṃ prayojanam |
tac chrutva citrakṛttuṣṭaḥ sa taṃ rājānamālikhat || 46 ||
[Analyze grammar]

tuṅgena nāsāvaṃśena dīrgharaktena cakṣuṣā |
vipulena lalāṭena kutalaiḥ kuñcitāsitaiḥ || 47 ||
[Analyze grammar]

vistīrṇenorasā rūḍhabāṇādivraṇaśobhinā |
bhujayugmena digdantikarākāreṇa hāriṇā || 48 ||
[Analyze grammar]

madhyena muṣṭimeyena kesarīndrakiśorakaiḥ |
upāyanīkṛteneva parākramaparājitaiḥ || 49 ||
[Analyze grammar]

yauvanadviradālānanibhenoruyugeṇa ca |
aśokapallavanibhenāṅghriyugmena cāruṇā || 50 ||
[Analyze grammar]

dṛṣṭvaiva svānurūpeṇa rūpeṇālikhitaṃ nṛpam |
sādhuvādaṃ daduḥ sarve tasya citrakṛtastadā || 51 ||
[Analyze grammar]

jagadustaṃ ca necchāmo draṣṭumekākinaṃ prabhum |
citrabhittau tadetasyāmetāsvālikhitāsviha || 52 ||
[Analyze grammar]

rājñīṣu madhyād ekāṃ tvaṃ suvicāryānurūpikām |
likhopādhyāya pārśve 'tra pūrṇo netrotsavo 'stu naḥ || 53 ||
[Analyze grammar]

tac chrutvā sā vilokyātra citraṃ citrakaro 'bravīt |
bhūyasīṣvapi naitāsu tulyā rājño 'sti kācana || 54 ||
[Analyze grammar]

jāne ca pṛthvyām evāsya tulyarūpāsti nāṅganā |
astyekā rājaputrī ca śṛṇutākhyāmi tāṃ ca vaḥ || 55 ||
[Analyze grammar]

vidarbheṣv asti nagaraṃ śrīmatkuṇḍinasaṃjñakam |
devaśaktiriti khyātastatrāsti ca mahīpatiḥ || 56 ||
[Analyze grammar]

tasyānantavatītyasti rājñī prāṇādhikapriyā |
tasyāṃ tasya sutotpannā nāmnā madanasundarī || 57 ||
[Analyze grammar]

yasyā varṇayituṃ rūpam ekayā jihvayānayā |
mādṛśaḥ kaḥ pragalbheta kiṃ tv etāvad vadāmy aham || 58 ||
[Analyze grammar]

tāṃ nirmāya vidhirmanye saṃjāteccho 'pi tadrasāt |
nirmātumanyāṃ tadrūpāṃ yugair api na vetsyati || 59 ||
[Analyze grammar]

saikāsya rājñaḥ sadṛśī pṛthivyāṃ rājakanyakā |
rūpalāvaṇyavinayair vayasā ca kulena ca || 60 ||
[Analyze grammar]

ahaṃ tayā hi tatrasthaḥ kadācitpreṣya ceṭikām |
āhūto 'ntapuraṃ tasyā rājaputryā gato 'bhavam || 61 ||
[Analyze grammar]

tatrāpaśyamahaṃ tāṃ ca candanārdravilepanām |
mṛṇālahārāṃ bisinīpattraśayyāvivartinīm || 62 ||
[Analyze grammar]

kadalīpattrapavanair vījyamānāṃ sakhījanaiḥ |
pāṇḍukṣāmāmabhivyaktasmarasaṃjvaralakṣaṇām || 63 ||
[Analyze grammar]

he sakhyaś candanālepakadalīdalamārutaiḥ |
kṛtam ebhiḥ kim etena viphalena śrameṇa vaḥ || 64 ||
[Analyze grammar]

ete hi mandapuṇyāṃ māṃ dahanti śiśirā api |
evaṃ nivārayantīṃ ca sakhīr āśvāsanākulāḥ || 65 ||
[Analyze grammar]

vilokya tadavasthāṃ tāṃ tadvitarkasamākulaḥ |
kṛtapraṇāmas tasyāś ca purato 'ham upāviśam || 66 ||
[Analyze grammar]

upādhyāyedṛgālikhya citre me dehi rūpakam |
ity uktvā vepamānena pāṇinā dhṛtavartinā || 67 ||
[Analyze grammar]

śanair ālikhya sā bhūmau darśayantī nṛpātmajā |
alekhayanmayā kaṃcidyuvānaṃ rūpavattaram || 68 ||
[Analyze grammar]

ālikhya sundaraṃ taṃ ca deva cintitavānaham |
kāma evānayā sākṣādayamālekhito mayā || 69 ||
[Analyze grammar]

kiṃ tu puṣpamayaścāpo has te yannāsya lekhitaḥ |
tena jāne na kāmo 'yaṃ tadrūpaḥ ko 'py asau yuvā || 70 ||
[Analyze grammar]

ayaṃ ca nūnamanayā dṛṣṭaḥ kvāpi śruto 'pi vā |
etannibandhanaṃ cedamasyāḥ smaravijṛmbhitam || 71 ||
[Analyze grammar]

tadito me 'payātavyamugradaṇḍo hy ayaṃ nṛpaḥ |
etatpitā devaśaktirbuddhvedaṃ na kṣameta me || 72 ||
[Analyze grammar]

ityālocyeva natvā tāmahaṃ madanasundarīm |
rājakanyāṃ niragamaṃ tayā saṃmānitas tataḥ || 73 ||
[Analyze grammar]

śrutaṃ cātra mahārāja mayā parijanānmithaḥ |
svair aṃ kathayato yatsā sānurāgā śrute tvayi || 74 ||
[Analyze grammar]

tataścitrapaṭe guptaṃ likhitāṃ tāṃ nṛpātmajām |
ādāyāhaṃ bhavatpādamūlaṃ tvaritamāgataḥ || 75 ||
[Analyze grammar]

dṛṣṭvā ca devasyākāraṃ nivṛttaḥ saṃśayo mama |
deva eva tayā citre maddhastenābhilekhitaḥ || 76 ||
[Analyze grammar]

sā cāsakṛnna sadṛśī śakyā likhitumity aham |
citre devasya pārśve tāṃ na likhāmi samāmapi || 77 ||
[Analyze grammar]

ity uktavantaṃ taṃ roladevaṃ rājā jagāda saḥ |
tarhi tvayā sā taccittrapaṭasthā darśyatāmiti || 78 ||
[Analyze grammar]

tato valgulikātastaṃ kṛṣṭvā paṭamadarśayat |
sa citrakṛttāṃ citrasthāṃ rājñe madanasundarīm || 79 ||
[Analyze grammar]

rājā kanakavarṣo 'pi tāṃ sa citragatāmapi |
vicitrarūpām ālokya sadyaḥ smaravaśaṃ yayau || 80 ||
[Analyze grammar]

pūrayitvā ca bahunā hemnā citrakaraṃ sa tam |
āttapriyācitrapaṭo viveśābhyantaraṃ nṛpaḥ || 81 ||
[Analyze grammar]

tatra tadrūpalāvaṇyadarśanāttṛptalocanaḥ |
tyaktasarvakriyastasthau tadekamayamānasaḥ || 82 ||
[Analyze grammar]

babādhe dhair yahārī taṃ nighnaṃllabdhāntaraḥ śaraiḥ |
rūpaspardhāsamudbhūtamātsarya iva manmathaḥ || 83 ||
[Analyze grammar]

yā dattā rūpalubdhānāṃ smarārtistena yoṣitām |
phaliteva ca saivāsya śataśākhaṃ mahīkṣitaḥ || 84 ||
[Analyze grammar]

tato dinaiś ca virahakṣāmapāṇḍuḥ śasaṃsa saḥ |
āptebhyaḥ sacivebhyastatpṛcchyadbhyaḥ svaṃ manogatam || 85 ||
[Analyze grammar]

mantrayitvā ca taiḥ sākaṃ kanyāṃ madanasundarīm |
yācituṃ prāhiṇoddūtaṃ sa rājñe devaśaktaye || 86 ||
[Analyze grammar]

saṃgamasvāmināmānaṃ kālajñaṃ kāryavedinam |
vipramāttaṃ kulīnaṃ ca madhurodāttabhāṣiṇam || 87 ||
[Analyze grammar]

sa gatvā sumahārheṇa vipraḥ parikareṇa tān |
vidarbhānsaṃgamasvāmī prāviśatkuṇḍinaṃ puram || 88 ||
[Analyze grammar]

yathāvattatra rājānaṃ devaśaktiṃ dadarśa tam |
sa svāmino 'rthe tasmāc ca prārthayām āsa tatsutām || 89 ||
[Analyze grammar]

deyā tāvanmayānyasmai uhitaiṣā sa cocitaḥ |
bhūpaḥ kanakavarṣo 'smādṛśo 'pyetāṃ ca yācate || 90 ||
[Analyze grammar]

tadetasmai dadāmyenāmiti saṃmantrya so 'pi ca |
śraddadhe devaśaktistatsaṃgamasvāmino vacaḥ || 91 ||
[Analyze grammar]

darśayām āsa tasmai ca tasyā rūpamivādbhutam |
nṛttaṃ madanasundaryāḥ sutāyāḥ sa mahīpatiḥ || 92 ||
[Analyze grammar]

tatas taddarśanaprītaṃ saṃgamasvāminaṃ sa tam |
pratipannasutādānaḥ saṃmānya prāhiṇonnṛpaḥ || 93 ||
[Analyze grammar]

niścitya lagnamudvāhahetorāgamyatāmiha |
saṃdiśyeti samaṃ tena pratidūtaṃ sasarja ca || 94 ||
[Analyze grammar]

āgatya saṃgamasvāmī pratidūtayuto 'tha saḥ |
rājñe kanakavarṣāya siddhaṃ kāryaṃ nyavedayat || 95 ||
[Analyze grammar]

tato lagnaṃ viniścitya pratidūtaṃ prapūjya tam |
asakṛttāṃ ca vijñāya raktāṃ madanasundarīm || 96 ||
[Analyze grammar]

tadvivāhāya durvāravīryo niḥśaṅkamānasaḥ |
rājā kanakavarṣo 'sau prāyāttatkuṇḍinaṃ puram || 97 ||
[Analyze grammar]

aśokalatayārūḍhaḥ pratyantāraṇyavāsinaḥ |
prāṇiprāṇaharān nighnan siṃhādīñ śabarān iva || 98 ||
[Analyze grammar]

vidarbhān prāpya nagaraṃ kuṇḍinaṃ tadviveśa saḥ |
nirgatenāgrato rājñā sahito devaśaktinā || 99 ||
[Analyze grammar]

tatra paurapuraṃdhrīṇāṃ vilabdhanayanotsavaḥ |
sajjitodvāhasaṃbhāraṃ prāviśadrājamandiram || 100 ||
[Analyze grammar]

viśrāmyati sma tatraitatsa dinaṃ saparicchadaḥ |
devaśaktinṛpodārakṛtācārānurañjitaḥ || 101 ||
[Analyze grammar]

anyedyurdevaśaktistāṃ tasmai madanasundarīm |
sutāṃ rājyaikaśeṣeṇa sarvasvena samaṃ dadau || 102 ||
[Analyze grammar]

sthitvā ca tatra saptāhaṃ sa rājā nagaraṃ nijam |
āgātkanakavarṣo 'tha navavadhvā samaṃ tayā || 103 ||
[Analyze grammar]

prāpte kāntāyute tasmiñjagadānandadāyini |
sakaumudīke śaśinīvāsīttatsotsavaṃ puram || 104 ||
[Analyze grammar]

sātha prāṇādhikā tasya rājño madanasundarī |
āsīdbahvavarodhasyāpyacyutasyeva rukmiṇī || 105 ||
[Analyze grammar]

anyonyavadanāsaktalocanaiḥ smarasāyakaiḥ |
kīlitāviva tau cāstāṃ daṃpatī cārupakṣmabhiḥ || 106 ||
[Analyze grammar]

ekadā cājagāmātra vikasatkesarāvaliḥ |
dalayanmāninīmānamātaṅgaṃ madhukesarī || 107 ||
[Analyze grammar]

lagnālimālāmaurvīkāḥ puṣpeṣoḥ kusumākaraḥ |
sajjīcakāra cotphullacūtavallīdhanurlatāḥ || 108 ||
[Analyze grammar]

vavau copavanānīva cetāṃsyadhvagayoṣitām |
samuddīpitakāmāni kampayanmalayānilaḥ || 109 ||
[Analyze grammar]

pūrā nadīnāṃ puṣpāṇi tarūṇāṃ śaśinaḥ kalāḥ |
kṣīṇāni punarāyānti yauvanāni na dehinām || 110 ||
[Analyze grammar]

bho muktamānakalahā ramadhvaṃ dayitānvitāḥ |
itīva madhurālāpāḥ kokilā jagadur janān || 111 ||
[Analyze grammar]

tatkāle ca madhudyānaṃ vihartuṃ praviveśa saḥ |
rājā kanakavarṣo 'tra sarvair antaḥpuraiḥ saha || 112 ||
[Analyze grammar]

muṣṇañ śriyam aśokānāṃ raktaiḥ parijanāmbaraiḥ |
gītair varāṅganānāṃ ca kokilabhramaradhvanim || 113 ||
[Analyze grammar]

devyā madanasundaryā samaṃ tatra sa bhūpatiḥ |
cikrīḍa sāvarodho 'pi kusumāvacayādibhiḥ || 114 ||
[Analyze grammar]

vihṛtya cātra suciraṃ snātuṃ godāvarīṃ nṛpaḥ |
avatīrya jalakrīḍāṃ sāntaḥpurajano vyadhāt || 115 ||
[Analyze grammar]

mukhaiḥ padmāni nayanair utpalāni payodharaiḥ |
rathāṅganāmnāṃ yugmāni nitambaiḥ pulinasthalīḥ || 116 ||
[Analyze grammar]

vijitya tasyāḥ saritaḥ kṣobhayāmāsurāśayam |
tarāṅgadarśitāmarṣabhrūbhaṅgāyāstadaṅganāḥ || 117 ||
[Analyze grammar]

ambhovihāravicaladvastravyaktāṅgabhaṅgiṣu |
reme kanakavarṣasya tāsu tasya tadā manaḥ || 118 ||
[Analyze grammar]

ekāṃ cātāḍayadrājñīṃ hemakumbhadvayopame |
kucayugme ca visrastavasane karavāriṇā || 119 ||
[Analyze grammar]

taddṛṣṭvā sā cukopāsyai serṣyā madanasundarī |
kiyatkṣobhyā nadītyeva sodvegeva jagāda ca || 120 ||
[Analyze grammar]

uttīrya cāmbhasaḥ prāyādāttavastrāntarā ruṣā |
priyāparādhaṃ śaṃsantī taṃ sakhībhyaḥ svamandiram || 121 ||
[Analyze grammar]

tato jñātāśayastasyā jalakrīḍāṃ vimucya saḥ |
rājā kanakavarṣo 'pi tadvāsagṛham āyayau || 122 ||
[Analyze grammar]

vāryamāṇo ruṣā tatra pañjarasthaiḥ śukair api |
praviśya sa dadarśāntardevīṃ tāṃ manyupīḍitām || 123 ||
[Analyze grammar]

vāmahastatalanyastaviṣaṇṇavadanāmbujām |
svacchamuktāphalanibhaiḥ patadbhir bāṣpabindubhiḥ || 124 ||
[Analyze grammar]

ia jāṇiūṇa ṇiuṇaṃ ciṭṭhasu olambiūṇa ikkadaram |
uhaataadiṇṇapāo majjhaṇiviḍio dhuvaṃ viṇissihasi || 125 ||
[Analyze grammar]

itīmaṃ dvipadīkhaṇḍaṃ paṭhantīṃ sāśrugadgadam |
niryaddantāṃśuhāriṇyā girāpabhraṃśamugdhayā || 126 ||
[Analyze grammar]

vilokya ca tathābhūtāṃ tāṃ kope 'pi manoramām |
upāyayau salajjaś ca sabhayaś ca sa bhūpatiḥ || 127 ||
[Analyze grammar]

parāṅmukhīmathāśliṣya vacobhiḥ prītipeśalaiḥ |
pravṛtto 'bhūtsavinayaistāṃ prasādayituṃ ca saḥ || 128 ||
[Analyze grammar]

vakroktisūcitāvadye parivāre papāta ca |
tasyāścaraṇayor nindannātmānamaparādhinam || 129 ||
[Analyze grammar]

tatas tanmanyunevāśruvāsriṇā galitena sā |
siñcantī kaṇṭhalagnāsya prasasāda mahīpateḥ || 130 ||
[Analyze grammar]

athaiṣa hṛṣṭo nītvā taddinaṃ kupitatuṣṭayā |
rājā tayā sahāsevya rataṃ nidrāmagānniśi || 131 ||
[Analyze grammar]

supto dadarśa cākasmātsvapne vikṛtayā striyā |
hṛtāmekāvalīṃ kaṇṭhāccūḍāratnaṃ ca mūrdhataḥ || 132 ||
[Analyze grammar]

tato 'py apaśyad vetālaṃ nānāprāṇyaṅgavigraham |
bāhuyuddhe pravṛttaṃ ca taṃ sa bhūmāv apātayat || 133 ||
[Analyze grammar]

pṛṣṭhopaviṣṭaś coḍḍīya pakṣiṇeva vihāyasā |
nītvā tena nṛpo 'mbhodhau vetālena sa cikṣipe || 134 ||
[Analyze grammar]

tataḥ kathaṃciduttīrṇaḥ paramekāvalīṃ gale |
cūḍāmaṇiṃ ca taṃ mūrdhni pūrvavatsthitamaikṣata || 135 ||
[Analyze grammar]

etaddṛṣṭvā prabuddhaḥ sa prātaḥparicayāgatam |
asya kṣapaṇakaṃ rājā phalaṃ svapnasya pṛṣṭavān || 136 ||
[Analyze grammar]

na vācyamapriyaṃ kiṃ tu kathaṃ pṛṣṭo na vacmi ye || 137 ||
[Analyze grammar]

yā tvayaikāvalī dṛṣṭā hṛtā cūḍāmaṇis tathā |
saiṣa devyā viyogas te putreṇa ca bhaviṣyati || 138 ||
[Analyze grammar]

prāpte caikāvalīratne yaduttīrṇābdhinā tvayā |
duḥkhānte so 'pi bhāvī te devīputrasamāgamaḥ || 139 ||
[Analyze grammar]

iti kṣapaṇakenokte vimṛśya sa nṛpo 'bravīt |
putro me 'dyāpi nāstyeva sa tāvajjāyatāmiti || 140 ||
[Analyze grammar]

athopayātād aśrauṣīt sa rāmāyaṇapāṭhakāt |
putrārthaṃ vihitakleśaṃ rājā daśarathaṃ nṛpam || 141 ||
[Analyze grammar]

tenodbhūtasutaprāpticintaḥ kṣapaṇake gate |
rājā kanakavarṣastannināya vimanā dinam || 142 ||
[Analyze grammar]

rātrāv akasmāc caikākī vinidraḥ śayanasthitaḥ |
dvāre 'nudghāṭite 'py antaḥ praviṣṭāṃ striyam aikṣata || 143 ||
[Analyze grammar]

vinītā saumyarūpā ca sā taṃ sāścaryamutthitam |
kṛtapraṇāmaṃ dattāśīḥ kṣitīśvaram abhāṣata || 144 ||
[Analyze grammar]

putra māṃ viddhi tanayāṃ nāgarājasya vāsukeḥ |
tvatpiturbhaginīṃ jyeṣṭhāṃ nāmnā ratnaprabhāmimām || 145 ||
[Analyze grammar]

rakṣārthaṃ te 'ntike śaśvadadṛṣṭā ca vasāmy aham |
adya dṛṣṭvā sacintaṃ tvamātmā te darśito mayā || 146 ||
[Analyze grammar]

na draṣṭumutsahe glāniṃ tava tadbrūhi kāraṇam |
ity uktaḥ sa tayā rājā pitṛṣvasrā jagāda tām || 147 ||
[Analyze grammar]

dhanyo 'hamamba yasyaivaṃ tvaṃ prasādaṃ karoṣi me |
anirvṛtiṃ ca me viddhi putrāsaṃbhavahetukām || 148 ||
[Analyze grammar]

api rājarṣayo yatra purā daśarathādayaḥ |
svargārtham aicchaṃs tatrāmba kathaṃ necchantu mādṛśāḥ || 149 ||
[Analyze grammar]

etatkanakavarṣasya nṛpates tasya sā vacaḥ |
śrutvā ratnaprabhā nāgī bhrātuḥ putram uvāca tam || 150 ||
[Analyze grammar]

tarhi putra vadāmyekaṃ yam upāyaṃ kuruṣva tam |
gatvā svāmikumāraṃ tvametadarthaṃ prasādaya || 151 ||
[Analyze grammar]

kumāradhārāṃ vighnāya patantīṃ mūrdhni duḥsahām |
śarīrāntaḥpraviṣṭāyāḥ prabhavānme sahiṣyase || 152 ||
[Analyze grammar]

vighnajātaṃ vijityānyadapi prāpsyasi vāñchitam |
ity uktvāntardadhe nāgī rājā hṛṣṭo 'kṣipatkṣapām || 153 ||
[Analyze grammar]

prātarmantriṣu vinyasya rājyaṃ putrābhikāṅkṣayā |
yayau svāmikumārasya pādamūlaṃ sa bhūpatiḥ || 154 ||
[Analyze grammar]

tatra tīvraṃ tapaścakre tamārādhayituṃ prabhum |
tayārpitabalo nāgyā śarīrāntaḥpraviṣṭayā || 155 ||
[Analyze grammar]

tato 'śaninibhā rājñaḥ patituṃ tasya mūrdhani |
kumāravāridhārā sā pravṛttābhūdanāratam || 156 ||
[Analyze grammar]

sa ca sehe śarīrāntargatanāgībalena tām |
tatas tasyādhivighnārthaṃ herambaṃ prair ayadguhaḥ || 157 ||
[Analyze grammar]

herambaścāsṛjattatra dhārāmadhye mahāviṣam |
tasyājagaramatyugraṃ na sa tenāpyakampata || 158 ||
[Analyze grammar]

tato vināyakaḥ sākṣāddantāghātānuraḥsthale |
etya dātuṃ pravavṛte tasyājayyaḥ surair api || 159 ||
[Analyze grammar]

matvā taṃ durjayaṃ devaṃ so 'tha stutibhir arcitum |
rājā kanakavarṣastadviṣahyaivopacakrame || 160 ||
[Analyze grammar]

namaḥ sarvārthasaṃsiddhinidhikumbhopamātmane |
lambodarāya vighneśa vyālālaṃkaraṇāya te || 161 ||
[Analyze grammar]

līlotkṣiptakarāghātavidhutāsanapaṅkajam |
brahmāṇam apisotkampaṃ kurvañjaya gajānana || 162 ||
[Analyze grammar]

surāsuramunīndrāṇām apisanti na siddhayaḥ |
atuṣṭe tvayi lokaikaśaraṇye śaṃkarapriya || 163 ||
[Analyze grammar]

ghaṭodaraḥ śūrpakarṇo gaṇādhyakṣo madotkaṭaḥ |
pāśahasto 'mbarīṣaś ca jambakastriśikhāyudhaḥ || 164 ||
[Analyze grammar]

evamādyaiḥ stuvanti sma pāpaghnair aṣṭaṣaṣṭibhiḥ |
tatsaṃkhyasthānaniyatair nāmabhistvāṃ surottamāḥ || 165 ||
[Analyze grammar]

smarataḥ stuvataś ca tvāṃ vinaśyati bhayaṃ prabho |
raṇarājakuladyūtacaurāgniśvāpadādijam || 166 ||
[Analyze grammar]

iti stutipadair etair anyair bahuvidhaiś ca saḥ |
nṛpaḥ kanakavarṣastaṃ vighneśvaramapūjayat || 167 ||
[Analyze grammar]

tuṣṭo 'smi na kariṣyāmi vighnaṃ te putramāpnuhi |
ity uktvāntardadhe tatra rājñas tasya sa vighnajit || 168 ||
[Analyze grammar]

tataḥ svāmikumārastaṃ taddhārādhāriṇaṃ nṛpam |
uvāca dhīra tuṣṭo 'smi tava yācasva tadvaram || 169 ||
[Analyze grammar]

tac chrutvā sa prahṛṣṭastaṃ devaṃ rājā vyajijñapat |
tvatprasādena me nātha sūnurutpadyatāmiti || 170 ||
[Analyze grammar]

evamastu suto bhāvī bhavato madgaṇāṃśajaḥ |
nāmnā hiraṇyavarṣaś ca bhaviṣyati sa bhūpate || 171 ||
[Analyze grammar]

ity uktvā garbhagehāntaḥ praveśāya tamāhvayat |
saviśeṣaprasādepsur nṛpatiṃ barhivāhanaḥ || 172 ||
[Analyze grammar]

tenādṛśyāsya niragānnāgī dehānnṛpasya sā |
viśanti śāpabhītā hi na kumāragṛhaṃ striyaḥ || 173 ||
[Analyze grammar]

tataḥ kanakavarṣo 'sau svena mānuṣatejasā |
viveśa garbhabhavanaṃ tasya devasya pāvakeḥ || 174 ||
[Analyze grammar]

sa taṃ nāgyanadhiṣṭhānātpūrvatejovinākṛtam |
dṛṣṭvā nṛpaṃ kim etat syād iti devo 'py acintayat || 175 ||
[Analyze grammar]

jñātvā nāgībalavyājanirvyūḍhaviṣamavratam |
praṇidhānāc ca taṃ kruddhaḥ śaśāpa sa nṛpaṃ guhaḥ || 176 ||
[Analyze grammar]

vyājastvayā kṛto yasmādato jātena sūnunā |
mahādevyā ca durdānta viyogas te bhaviṣyati || 177 ||
[Analyze grammar]

nirghātadāruṇaṃ śrutvā śāpametaṃ sa bhūpatiḥ |
sūktaistuṣṭāva taṃ devaṃ mohaṃ muktvā mahākaviḥ || 178 ||
[Analyze grammar]

sa subhāṣitatuṣṭo 'tha ṣaṇmukhastam abhāṣata |
rājaṃstuṣṭo 'smi sūktaiste śāpāntaṃ tava vacmi tat || 179 ||
[Analyze grammar]

bhaviṣyatyabdamekaṃ te patnīputraviyuktatā |
mukto 'pamṛtyutritayāttau ca prāpsyasyataḥ param || 180 ||
[Analyze grammar]

ity uktvā viratālāpe ṣaṇmukhe sa praṇamya tam |
tatprasādasudhātṛpto rājā svapuramāyayau || 181 ||
[Analyze grammar]

tatra tasyāmṛtasyando jyotsnāyām iva śītagoḥ |
devyāṃ madanasundaryāṃ kramātsūnurajāyata || 182 ||
[Analyze grammar]

dṛṣṭvā sutamukhaṃ so 'tha rājā rājñī ca sā muhuḥ |
atyānandasamāyukte nāvartetāṃ tadātmani || 183 ||
[Analyze grammar]

tatkālaṃ cotsavaṃ cakre vasu varṣan sa bhūpatiḥ |
nijāṃ kanakavarṣākhyāṃ nayan bhuvi yathārthatām || 184 ||
[Analyze grammar]

pañcarātre gate ṣaṣṭhyāṃ rajanau jātaveśmani |
kṛte rakṣāvidhau tatra megho 'śaṅkitamāgataḥ || 185 ||
[Analyze grammar]

tena vṛddhimavāptena tatrāvavre nabhaḥ kramāt |
śatruṇopekṣiteneva rājyaṃ rājñaḥ pramādinaḥ || 186 ||
[Analyze grammar]

madasyeva kṣipandhārā varṣasyonmūlitadrumaḥ |
tato dhāvitumārebhe vātamattamataṅgajaḥ || 187 ||
[Analyze grammar]

tatkṣaṇaṃ sārgalam apidvāramudghāṭya bhīṣaṇā |
strī kāpi kṣurikāhastā jātaveśma viveśa tat || 188 ||
[Analyze grammar]

sā taṃ madanasundaryāḥ stanāsaktamukhaṃ sutam |
hṛtvā devyāḥ pradudrāva saṃmohyaiva paricchadam || 189 ||
[Analyze grammar]

hā hā hṛto me rākṣasyā suta ityatha vihvalā |
krandantī cānvadhāvattāṃ rājñī sā strīṃ tamasyapi || 190 ||
[Analyze grammar]

sā ca gatvā papāta strī sarasyantaḥ sabālakā |
rājñī cānvapatatsāpi tatraivāpatyatṛṣṇayā || 191 ||
[Analyze grammar]

kṣaṇānmegho nivavṛte jagāmāntaṃ ca yāminī |
jātaveśmani cākrandaḥ parivārasya śuśruve || 192 ||
[Analyze grammar]

rājā kanakavarṣo 'tha tac chrutvā jātavāsakam |
etya putrapriyāśūnyaṃ dṛṣṭvā mohaṃ jagāma saḥ || 193 ||
[Analyze grammar]

samāśvasya ca hā devi hā putraka śiśo iti |
vilapannatha sasmāra śāpaṃ taṃ vatsarāvadhim || 194 ||
[Analyze grammar]

bhagavañ śāpasaṃpṛkto mandapuṇyasya me varaḥ |
kathaṃ skanda tvayā dattaḥ saviṣāmṛtasaṃnibhaḥ || 195 ||
[Analyze grammar]

hāhā yugasahasrābhaṃ kathaṃ neṣyāmi vatsaram |
devyā madanasundaryā jīvitādhikayā vinā || 196 ||
[Analyze grammar]

ityākrandaṃś ca sa jñātavṛttāntair mantribhir nṛpaḥ |
bodhyamāno 'pi na prāpa devyā saha gatāṃ dhṛtim || 197 ||
[Analyze grammar]

kramāc ca madanāvegavivaśo nirgataḥ purāt |
viveśa vindhyakāntāramunmanībhūya sa bhraman || 198 ||
[Analyze grammar]

tatra bālamṛgīnetraiḥ priyāyā locanaśriyam |
kabarībhārasaundaryaṃ camarīvālasaṃcayaiḥ || 199 ||
[Analyze grammar]

dṛṣṭaiḥ karikareṇūnāṃ gatair mantharatāṃ gateḥ |
smaratas tasya jajvāla sutarāṃ madanānalaḥ || 200 ||
[Analyze grammar]

bhrāmyaṃstṛṣṇātapaklānto vindhyapādamavāpya saḥ |
pītanirjharapānīyastarumūla upāviśat || 201 ||
[Analyze grammar]

tāvadguhāmukhādvindhyasyāṭṭahāsa ivonnadan |
siṃhaḥ saṭālo nirgatya hantumabhyutpapāta tam || 202 ||
[Analyze grammar]

tatkṣaṇaṃ gaganāyātaḥ ko'pi vidyādharo javāt |
nipatyāsiprahāreṇa siṃhaṃ tamakaroddvidhā || 203 ||
[Analyze grammar]

samīpam etya cāpṛcchad rājānaṃ taṃ sa khecaraḥ |
rājan kanakavarṣaivaṃ prāpto 'syetāṃ kathaṃ bhuvam || 204 ||
[Analyze grammar]

tac chrutvā saṃsmṛtiṃ labdhā sa rājā pratyuvāca tam |
virahānalavikṣiptaṃ kutastvaṃ vetsi māmiti || 205 ||
[Analyze grammar]

tato vidyādharo 'vādīdahaṃ pravrājako bhavan |
mānuṣo bandhumittrākhyas tvatpure nyavasaṃ purā || 206 ||
[Analyze grammar]

sevayā prārthitenātra tvayā sāhāyake kṛte |
vidyādharatvaṃ prāpto 'smi vīravetālasādhanāt || 207 ||
[Analyze grammar]

tena tvaṃ pratyabhijñāya kartuṃ te pratyupakriyām |
tvajjighāṃsurayaṃ dṛṣṭvā siṃho vyapadito mayā || 208 ||
[Analyze grammar]

nāmnā bandhuprabhaścādya saṃvṛtto 'smīti vādinam |
rājā kanakavarṣastaṃ jātaprītirabhāṣata || 209 ||
[Analyze grammar]

hanta smarāmi sā ceha maittrī nirvāhitā tvayā |
tadbrūhi me kadā bhāvī bhāryāputrasamāgamaḥ || 210 ||
[Analyze grammar]

iti tasya vacaḥ śrutvā buddhvā vidyāprabhāvataḥ |
vidyādharo 'bravīdbandhuprabhastaṃ sa mahībhṛtam || 211 ||
[Analyze grammar]

dṛṣṭayā vindhyavāsinyā patnīputrau tvamāpsyasi |
tattatra gaccha siddhyai tvaṃ svalokaṃ ca vrajāmy aham || 212 ||
[Analyze grammar]

ity uktvā khaṃ gate tasminrājā labdhadhṛtiḥ śanaiḥ |
prāyātkanakavarṣo 'sau draṣṭuṃ tāṃ vindhyavāsinīm || 213 ||
[Analyze grammar]

gacchantam abhyadhāvat taṃ nṛpaṃ vanyo mahān pathi |
adhūtamastako mattaḥ prasāritakaraḥ karī || 214 ||
[Analyze grammar]

taṃ dṛṣṭvā śvabhramārgeṇa sa rājāpāsarat tathā |
yathānudhāvansa gajo vipede śvabhrapātataḥ || 215 ||
[Analyze grammar]

tataḥ so 'dhvaśramāyāsaklānto rājā vrajan kramāt |
uddaṇḍapuṇḍarīkāḍhyaṃ prāpad ekaṃ mahatsaraḥ || 216 ||
[Analyze grammar]

tatra snātvā ca pītvā ca jalaṃ jagdhamṛṇālakaḥ |
viśrāntaḥ pādapatale kṣaṇaṃ jahre sa nidrayā || 217 ||
[Analyze grammar]

tāvac ca tena mṛgayānivṛttāḥ śabarāḥ pathā |
āgatā dadṛśuḥ suptaṃ taṃ rājānaṃ sulakṣaṇam || 218 ||
[Analyze grammar]

te ca devyupahārāryaṃ baddhvā ninyustadaiva tam |
svasya muktāphalākhyasya pārśvaṃ śabarabhūbhṛtaḥ || 219 ||
[Analyze grammar]

so 'pyenaṃ śabarādhīśaḥ praśastaṃ vīkṣya nītavān |
ketanaṃ vindhyavāsinyāḥ paśūkartuṃ narādhipam || 220 ||
[Analyze grammar]

dṛṣṭvaiva ca sa devīṃ tāṃ praṇamaṃstadanugrahāt |
rājā skandaprasādācca babhūva srastabandhanaḥ || 221 ||
[Analyze grammar]

tadālokyādbhutaṃ matvā tasya taṃ devyanugraham |
mumoca taṃ sa rājānaṃ śabarādhipatirvadhāt || 222 ||
[Analyze grammar]

evaṃ kanakavarṣasya tṛtīyādapamṛtyutaḥ |
atikrāntasya tasyābhūtpūrṇaṃ tacchāpavatsaram || 223 ||
[Analyze grammar]

tāvac ca tasya sā nāgī rājño madanasundarīm |
devīṃ saputrām ādāya tatraivāgāt pitṛṣvasā || 224 ||
[Analyze grammar]

jagāda taṃ ca bho rājañ jñātakaumāraśāpayā |
etau te rakṣitau yuktvā nītvā svabhavanaṃ mayā || 225 ||
[Analyze grammar]

tasmāt kanakavarṣa svau gṛhāṇaitau priyāsutau |
bhuṅkṣvedaṃ pṛthivīrājyaṃ kṣīṇaśāpo 'dhunā hy asi || 226 ||
[Analyze grammar]

ity uktvā praṇataṃ sā taṃ nṛpaṃ nāgī tirodadhe |
nṛpo 'pi svapnam iva tanmene bhāryāsutāgamam || 227 ||
[Analyze grammar]

tato 'sya rājño rājñyāś ca cirād āśliṣṭayor mithaḥ |
agaladvirahakleśo harṣabāṣpāmbubhiḥ saha || 228 ||
[Analyze grammar]

tataḥ kanakavarṣaṃ taṃ buddhvā pṛthvīpatiṃ prabhum |
muktāphalo 'patattasya śabarendraḥ sa pādayoḥ || 229 ||
[Analyze grammar]

kṣamayitvā ca pallīṃ svāṃ praveśya ca nijocitaiḥ |
taistaiḥ sasutadāraṃ tam upacārair upācarat || 230 ||
[Analyze grammar]

so 'tha tatra sthito rājā dūtair ānāyayannṛpam |
śvaśuraṃ devaśaktiṃ taṃ svasainyaṃ ca nijātpurāt || 231 ||
[Analyze grammar]

athāsthitakareṇukā madanasundarī tāṃ priyāṃ sutaṃ ca śarajanmanoditahiraṇyavarṣābhidham |
vidhāya puratas tataḥ śvaśuraveśmavāsāditaś cacāla sa tadanvitaḥ kanakavarṣapṛthvīpatiḥ || 232 ||
[Analyze grammar]

avāpa ca sa vāsaraiḥ katipayair gṛhaṃ śvāśuraṃ vidarbhaviṣayāśritaṃ tadatha kuṇḍinākhyaṃ puram |
samṛddhimati tatra ca śvaśurasatkṛtaḥ kānicid dinānyabhajata sthitiṃ tanayadārasenāyutaḥ || 233 ||
[Analyze grammar]

prasthāya tataś ca śanaiḥ kanakapuraṃ prāptavānnijaṃ nagaram |
pauravadhūjananayanaiścirotsukaiḥ pīyamāna iva || 234 ||
[Analyze grammar]

aviśac ca rājadhānīṃ sutasahito madanasundarīyuktaḥ |
utsava iva vigrahavān pramodaśobhānvitaḥ sa nṛpaḥ || 235 ||
[Analyze grammar]

abhiṣicya baddhapaṭṭāṃ tatra ca tāṃ madanasundarīmakarot |
sarvāntaḥpuramukhyāmabhyudaye mānitaprakṛtiḥ || 236 ||
[Analyze grammar]

devyā tayā saha sutena ca tena baddhanityotsavaḥ punar adṛṣṭaviyogaduḥkhaḥ |
niṣkaṇṭakaṃ kanakavarṣanareśvaro 'tha bhūmaṇḍalaṃ sacaturantamidaṃ śaśāsa || 237 ||
[Analyze grammar]

iti gomukhataḥ svamantrimukhyād rucirāṃ tatra kathāmimāṃ niśamya |
naravāhanadattarājaputraḥ sadalaṃkāravatīyutastutoṣa || 238 ||
[Analyze grammar]