Kathasaritsagara [sanskrit]

by C. H. Tawney | 2014 | 226,424 words | ISBN-13: 9789350501351

The Sanskrit edition of the Kathasaritsagara referencing the English translation and grammatical analysis. Written by Somadeva and dating from the 12th century, the Kathasaritsagara (or Katha-sarit-sagara) represents an epic legend narrating the adventures of Naravahanadatta as he strives to become the destined emperor of the Vidyadharas. Alternative titles: (Kathāsaritsāgara, कथासरित्सागर, Kathā-sarit-sāgara)

Chapter 6

tataḥ sa gomukhākhyātakathātuṣṭaḥ priyāsakhaḥ |
dṛṣṭvā sakopavikṛtiṃ marubhūtiṃ tadīrṣyayā || 1 ||
[Analyze grammar]

naravāhanadattas taṃ nijagādānurañjayan |
marubhūte tvam apy ekāṃ kiṃ nākhyāsi kathām iti || 2 ||
[Analyze grammar]

tataḥ sa bāḍhamākhyāmīty uktvā tuṣṭena cetasā |
samākhyātuṃ kathāmetāṃ marubhūtiḥ pracakrame || 3 ||
[Analyze grammar]

candrasvāmītyabhūtpūrvaṃ rājñaḥ kamalavarmaṇaḥ |
nagare deva kamalapurākhye brahmaṇottamaḥ || 4 ||
[Analyze grammar]

tasya lakṣmīsarasvatyostṛtīyā vinayojjvalā |
bhāryā devamatir nāma samānā sumaterabhūt || 5 ||
[Analyze grammar]

tasyāṃ tasya ca viprasya patnyāṃ jajñe sulakṣaṇaḥ |
putraḥ sa yasya jātasya vāgevamudagāddivaḥ || 6 ||
[Analyze grammar]

candrasvāmīnmahīpālo nāmnā kāryaḥ sutastvayā |
rājā bhūtvā ciraṃ yasmātpālayiṣyatyayaṃ mahīm || 7 ||
[Analyze grammar]

etaddivyaṃ vacaḥ śrutvā sa mahīpālam eva tam |
candrasvāmisutaṃ nāmna cakāra racitotsavaḥ || 8 ||
[Analyze grammar]

kramāc ca sa mahīpālo vivṛddho grāhito 'bhavat |
śastrāstravedaṃ vidyāsu samaṃ sarvāsu śikṣitaḥ || 9 ||
[Analyze grammar]

tāvac ca suṣuve tasya sā candrasvāminaḥ punaḥ |
bhāryā devamatiḥ kanyāṃ sarvāvayavasundarīm || 10 ||
[Analyze grammar]

sā ca candravatī nāma mahīpālaḥ sa ca kramāt |
bhrātarau vavṛdhāte tau svapitus tasya veśmani || 11 ||
[Analyze grammar]

athāvṛṣṭikṛtas tatra deśe durbhikṣaviplavaḥ |
udapadyata dagdheṣu sasyeṣu raviraśmibhiḥ || 12 ||
[Analyze grammar]

taddoṣeṇa ca rājātra prārebhe taskarāyitum |
adharmeṇa prajābhyo 'rthamākarṣanmuktasatpathaḥ || 13 ||
[Analyze grammar]

tato 'vasīd atyatyarthaṃ deśe tasminn uvāca sā |
bhāryā devamatir vipraṃ candrasvāminam atra tam || 14 ||
[Analyze grammar]

āgaccha matpitṛgṛhaṃ vrajāmo nagarāditaḥ |
ete hy apatye naśyetāmāvayor iha jātucit || 15 ||
[Analyze grammar]

tac chrutvā tāṃ sa vakti sma candrasvāmī svagehinīm |
maivaṃ pāpaṃ mahadgehāddurbhikṣe hi palāyanam || 16 ||
[Analyze grammar]

tadahaṃ bālakāvetau nītvā tatpitṛveśmani |
sthāpayāmi tvamāsveha śīghraṃ caiṣyāmyahaṃ punaḥ || 17 ||
[Analyze grammar]

ity uktvā sthāpayitvā tāṃ tathety uktavatīṃ gṛhe |
bhāryāṃ ca candrasvāmī tau gṛhītvā dārakau nijau || 18 ||
[Analyze grammar]

mahīpālaṃ ca taṃ tāṃ ca kanyāṃ candravatīmubhau |
tataḥ pratasthe nagarātpatnīṃ pitṛgṛhaṃ prati || 19 ||
[Analyze grammar]

gacchan kramāt tricaturair dinaiḥ prāpa mahāṭavīm |
arkāṃśutaptasikatāṃ viśuṣkaviraladrumām || 20 ||
[Analyze grammar]

tasyāṃ tṛṣābhibhūtau tau sthāpayitvā sa dārakau |
candrasvāmī yayau dūramanveṣṭuṃ vāri tatkṛte || 21 ||
[Analyze grammar]

tatra tasyāyayāvagre sānugaḥ śabarādhipaḥ |
akasmātsiṃhadaṃṣṭrākhyaḥ kāryāya prasthitaḥ kva cit || 22 ||
[Analyze grammar]

sa taṃ dṛṣṭvānna pṛṣṭvā ca buddhvā bhillo jalārthinam |
saṃjñāṃ kṛtvābravīdbhṛtyānnītvāmbhaḥ prāpyatāmayam || 23 ||
[Analyze grammar]

tac chrutvā tasya bhṛtyāste dvitrā labdhāśayā ṛjum |
te candrasvāminaṃ pallīṃ nītvā baddhamakurvata || 24 ||
[Analyze grammar]

naropahārāyātmānaṃ tebhyo buddhvā sa saṃyatam |
candrasvāmī śuśoca svau dārakāvaṭavīgatau || 25 ||
[Analyze grammar]

hā mahīpāla hā vatse candravatyapade katham |
mayāraṇye yuvāṃ tyaktvā siṃhavyaghrāmiṣīkṛtau || 26 ||
[Analyze grammar]

ātmā ca ghātitaścaurair na cāsti śaraṇaṃ mama |
ityākrandansa vipro 'rkaṃ vyomnyapaśyadasaṃmadāt || 27 ||
[Analyze grammar]

hanta mohaṃ vihāyaitaṃ svaṃ prabhuṃ śaraṇaṃ śraye |
ityālocya dvijaḥ sūryaṃ sa stotum upacakrame || 28 ||
[Analyze grammar]

tubhyaṃ paraparākāśaśāyine jyotiṣe vibho |
ābhyantaraṃ ca bāhyaṃ ca tamaḥ praṇudate namaḥ || 29 ||
[Analyze grammar]

tvaṃ viṣṇustrijagadvyāpī tvaṃ śivaḥ śreyasāṃ nidhiḥ |
suptaṃ viceṣṭayanviśvaṃ paramastvaṃ prajāpatiḥ || 30 ||
[Analyze grammar]

aprakāśau prakāśetāmetāsvityagnicandrayoḥ |
nyastātmatejā dayayevāntardhiṃ yāsi yāminīm || 31 ||
[Analyze grammar]

vidravanty api rakṣāṃsi prabhavanti na dasyavaḥ |
pramodante ca guṇino bhāsvannabhyudite tvayi || 32 ||
[Analyze grammar]

tadrakṣa śaraṇāpannaṃ trailokyaikapradīpa mām |
idaṃ duḥkhāndhakāraṃ me vidāraya dayāṃ kuru || 33 ||
[Analyze grammar]

ityādibhistadā vākyair bhaktyā stutavato ravim |
candrasvāmidvijasyāsya gaganāduccacāra vāk || 34 ||
[Analyze grammar]

tuṣṭo 'smi candrasvāmiṃs te na tvaṃ vadhamavāpsyasi |
matprasādāc ca putrādisaṃgamas te bhaviṣyati || 35 ||
[Analyze grammar]

ity ukto divyayā vācā jātasthas tatra tasthivān |
candrasvāmī sa śabaropāhṛtasnānabhojanaḥ || 36 ||
[Analyze grammar]

tāvac ca taṃ mahīpālaṃ svasrā yuktamaraṇyagam |
pitary anāyaty ākrandavidhuraṃ śaṅkitāśubham || 37 ||
[Analyze grammar]

dadarśa tena mārgeṇa sārthavāhaḥ samāgataḥ |
mahānsārthadharo nāma vṛttāntaṃ pṛcchati sma ca || 38 ||
[Analyze grammar]

sa tamāśvāsya kṛpayā śiśuṃ dṛṣṭvā sulakṣaṇam |
sārthavāho nināya svaṃ deśaṃ svasṛsakhaṃ tataḥ || 39 ||
[Analyze grammar]

tatrāsītsa mahīpālo bālye 'py agnikriyārataḥ |
sadane tasya vaṇijaḥ putrasnehena paśyataḥ || 40 ||
[Analyze grammar]

ekadā nṛpatermantrī tārāpuranivāsinaḥ |
tārādharmābhidhānasya kāryāttenāgataḥ pathā || 41 ||
[Analyze grammar]

viveśa sārthavāhasya tasya mittraṃ dvijottamaḥ |
gṛhān anantasvāmīti sahastyaśvapadātikaḥ || 42 ||
[Analyze grammar]

sa viśrānto 'tra taṃ dṛṣṭvā mahīpālaṃ śubhākṛtim |
japāgnikāryādirataṃ vṛttāntaṃ paripṛcchya ca || 43 ||
[Analyze grammar]

anapatyo viditvā ca savarṇaṃ sārthavāhataḥ |
tasmādyayāce 'patyārthī mantrī tadbhaginīṃ ca tām || 44 ||
[Analyze grammar]

tatas tau tena vaiśyena dattāvādāya dārakau |
sārthavāhena so 'nantasvāmī tārāpuraṃ yayau || 45 ||
[Analyze grammar]

tatra putrīkṛtastena mahīpālaḥ sa mantriṇā |
tasthau tadbhavane 'py asya vidyāvipulasaṃpadi || 46 ||
[Analyze grammar]

atrāntare ca baddhaṃ taṃ candrasvāminametya saḥ |
bhillādhipaḥ siṃhadaṃṣṭraḥ pallyāṃ tasyām abhāṣata || 47 ||
[Analyze grammar]

brahmansvapne 'hamādiṣṭas tathā devena bhānunā |
yathā saṃpūjya moktavyo na hantavyo mayā bhavān || 48 ||
[Analyze grammar]

taduttiṣṭha vraja svecchamity uktvā sa mumoca tam |
prattamuktāmṛgamadaṃ kḷptāraṇyānuyātrikam || 49 ||
[Analyze grammar]

so 'tha muktastataścandrasvāmī tamanujāyutam |
aprāpyāraṇyataḥ putraṃ mahīpālaṃ gaveṣayan || 50 ||
[Analyze grammar]

bhramannabdhestaṭe prāpya nāmnā jalapuraṃ puram |
praviveśātithirbhūtvā gṛhaṃ viprasya kasyacit || 51 ||
[Analyze grammar]

tatra bhuktottarākhyātasvavṛttāntaṃ prasaṅgataḥ |
taṃ sa vipro gṛhapatiścandrasvāminam abhyadhāt || 52 ||
[Analyze grammar]

vaṇikkanakavarmākhyo 'tīteṣvāgāddineṣviha |
tenāṭavyāṃ svasṛsakhaḥ prāpto brāhmaṇadārakaḥ || 53 ||
[Analyze grammar]

tau cādāyātibhavyau dvau dārakau sa ito gataḥ |
nārikelamahādvīpe noktaṃ tannāma tena tu || 54 ||
[Analyze grammar]

tac chrutvā māmakāveva nūnaṃ tāviti cintayan |
candrasvāmī matiṃ cakre gantuṃ dvīpavaraṃ sa tam || 55 ||
[Analyze grammar]

nītvā ca rātrimanviṣya vaṇijā viṣṇuvarmaṇā |
sa vyadhātsaṃgatiṃ dvīpaṃ nārikelaṃ prayāsyatā || 56 ||
[Analyze grammar]

tenaiva ca sahāruhya yānapātraṃ jagāma saḥ |
candrasvāmī sutasnehād dvīpam abdhipathena tam || 57 ||
[Analyze grammar]

tatra pṛcchantamūcustaṃ vaṇijastannivāsinaḥ |
vaṇikkanakavarmākhyaḥ kāmamāsīdihāgataḥ || 58 ||
[Analyze grammar]

surūpāvaṭavīprāptāvādāya dvijadārakau |
gataḥ kaṭāhadvīpaṃ tu tadyuktaḥ sa ito 'dhunā || 59 ||
[Analyze grammar]

tac chrutvā sa tato vipro vaṇijā dānavarmaṇā |
potena gacchatā sākaṃ kaṭāhadvīpamabhyagāt || 60 ||
[Analyze grammar]

tatrāpi sa dvijo 'śrauṣīd gataṃ taṃ vaṇijaṃ tataḥ |
dvīpāt kanakavarmāṇaṃ dvīpaṃ karpūrasaṃjñakam || 61 ||
[Analyze grammar]

evaṃ krameṇa karpūrasuvarṇadvīpasiṃhalān |
vaṇigbhiḥ saha gatvāpi taṃ prāpa vaṇijaṃ na saḥ || 62 ||
[Analyze grammar]

siṃhalebhyastu śuśrāva gataṃ taṃ vaṇijaṃ nijam |
deśaṃ kanakavarmāṇaṃ citrakūṭābhidhaṃ puram || 63 ||
[Analyze grammar]

tataḥ koṭīśvarākhyena vaṇijā sa samaṃ yayau |
candrasvāmī citrakūṭaṃ tatpotottīrṇavāridhiḥ || 64 ||
[Analyze grammar]

tasmin kanakavarmāṇaṃ vaṇijaṃ tam avāpa saḥ |
ācakhyau cākhilaṃ tasmai svodantaṃ dārakotsukaḥ || 65 ||
[Analyze grammar]

tataḥ kanakavarmā tau jñātārtiḥ so 'sya dārakau |
darśayām āsa yau tena labdhā nītavaraṇyataḥ || 66 ||
[Analyze grammar]

candrasvāmī ca tau yāvadvīkṣate dārakāvubhau |
tāvannaiva tadīyau tau tāvanyāveva kaucana || 67 ||
[Analyze grammar]

tataḥ sabāṣpaṃ śokārto nirāśo vilalāpa saḥ |
iyadbhrāntvāpi hā prāpto na putro na sutā mayā || 68 ||
[Analyze grammar]

dhātrā kuprabhuṇevāśā darśitā me na pūritā |
bhrāmito 'smi ca mithyaiva dūrāddūraṃ durātmanā || 69 ||
[Analyze grammar]

ityādi śocanvaṇijā kramātkanakavarmaṇā |
āśvāsitaḥ sa tenātha candrasvāmī śucābravīt || 70 ||
[Analyze grammar]

vatsareṇātmajau tau cenna prāpsyāmi bhuvaṃ bhraman |
tatastyakṣyāmi tapasā gaṅgātīre śarīrakam || 71 ||
[Analyze grammar]

ity uktavantaṃ tatrastho jñānī ko'pi tam abhyadhat |
nārāyaṇyāḥ prasādāttau prāpsyasyevātmajau vraja || 72 ||
[Analyze grammar]

tac chrutvā sa prahṛṣṭātmā bhāskarānugrahaṃ smaran |
vaṇigbhiḥ pūjitaḥ prāyāccandrasvāmī purāttataḥ || 73 ||
[Analyze grammar]

tato 'grahārān grāmāṃś ca cinvan sa nagarāṇi ca |
bhraman prāpaikadā sāyaṃ vanaṃ prāṃśubahudrumam || 74 ||
[Analyze grammar]

tatra kṣapayituṃ rātriṃ kṛtvā vṛttiṃ phalāmbubhiḥ |
sa tasthau tarumāruhya siṃhavyāghrādiśaṅkayā || 75 ||
[Analyze grammar]

anidraś ca niśīthe 'tra dadarśa sa taroradhaḥ |
mahannārāyaṇīmukhyaṃ mātṛcakraṃ samāgatam || 76 ||
[Analyze grammar]

upahārānsamāhṛtya nānārūpānnijocitān |
pratīkṣamāṇaṃ devasya bhair avasya kilāgamam || 77 ||
[Analyze grammar]

cirayaty adya kiṃ deva iti tatra ca mātaraḥ |
nārāyaṇīm athāpṛcchan sā jahāsa tu nābravīt || 78 ||
[Analyze grammar]

atinirbandhapṛṣṭā ca tābhistāḥ pratyuvāca sā |
lajjāvahaṃ yadapyetatsakhyastadapi vacmy aham || 79 ||
[Analyze grammar]

astīha surasenākhyo rājā surapure pure |
tasya vidyādharī nāma khyātarūpāsti cātmajā || 80 ||
[Analyze grammar]

pradeyāyāś ca tenāsyā rājñā rūpasamaḥ śrutaḥ |
vimalākhyasya tanayo rājño nāmnā prabhākaraḥ || 81 ||
[Analyze grammar]

tasmai ditsati tāṃ tasminrājñi tenāpi sā śrutā |
vimalena sutā asya nijaputrānurūpikā || 82 ||
[Analyze grammar]

tataḥ sa vimalastasmātsurasenādayācata |
vidyādharīṃ dūtamukhātputrārthe tāṃ tadātmajām || 83 ||
[Analyze grammar]

so 'py apekṣitasaṃpattyā tatsutāya sutāmadāt |
prabhākarāya tasmai tāṃ suraseno yathāvidhi || 84 ||
[Analyze grammar]

tataḥ sā prapya vimalapurākhyaṃ śvāśuraṃ puram |
vidyādharī samaṃ bhartrā śayanīyam agān niśi || 85 ||
[Analyze grammar]

tatrāsaṃbhogasuptaṃ sā patiṃ sotkā prabhākaram |
yāvannirīkṣate tāvattamapaśyannapuṃsakam || 86 ||
[Analyze grammar]

hā hatāsmiḥ kathaṃ ṣaṇḍhaḥ patiḥ prāpto mayeti sā |
śocantī cetasā rātriṃ rājaputrī nināya tām || 87 ||
[Analyze grammar]

napuṃsakāya dattāhamananviṣya kathaṃ tvayā |
iti lekhaṃ likhitvā ca pitre sā prāhiṇottataḥ || 88 ||
[Analyze grammar]

sa lekhaṃ vācayitvaiva vimalenāsmi vañcitaḥ |
chadmanetyagamatkrodhaṃ tatpitā vimalaṃ prati || 89 ||
[Analyze grammar]

sutāṃ napuṃsakāyāhaṃ yadvyājād dāpitas tvayā |
putrāya tatphalaṃ bhuṅkṣva paśya tvām etya hanmy aham || 90 ||
[Analyze grammar]

iti tasmai svalekhena saṃdideśa sa bhūpatiḥ |
suraseno balodrikto vimalāya mahīkṣite || 91 ||
[Analyze grammar]

vimalaścādhigatyaitaṃ tallekhārthaṃ samantrikaḥ |
vimṛśandurjaye tasminnopāyaṃ kaṃcidaikṣata || 92 ||
[Analyze grammar]

tatas taṃ piṅgadattākhyo mantrī vimalam abhyadhāt |
eka evāstyupāyo 'tra taṃ deva śreyase kuru || 93 ||
[Analyze grammar]

asti sthūlaśirā nāma yakṣas tasya ca vedmy aham |
mantramārādhanaṃ yena varamiṣṭaṃ dadāti saḥ || 94 ||
[Analyze grammar]

tenopāttena mantreṇa yakṣamārādhya saṃprati |
liṅgaṃ yācasva putrārthaṃ sadyaḥ śāmyatu vigrahaḥ || 95 ||
[Analyze grammar]

ity ukto mantriṇā tasmān mantram ādāya taṃ nṛpaḥ |
sutārthaṃ yakṣamārādhya sa taṃ liṅgamayācata || 96 ||
[Analyze grammar]

tena saṃprati datte ca liṅge yakṣeṇa tatsutaḥ |
pumān prabhākaraḥ so 'bhūd yakṣas tvāsīn napuṃsakaḥ || 97 ||
[Analyze grammar]

sā tu vidyādharī dṛṣṭvā pumāṃsaṃ taṃ prabhākaram |
tena patyā sahāvāptaratasaukhyā vyacintayat || 98 ||
[Analyze grammar]

bhrāntāhaṃ madadoṣeṇa na me bhartā napuṃsakaḥ |
pumānevaiṣa subhago nātra kāryānyathā matiḥ || 99 ||
[Analyze grammar]

ityālocyainamevārthaṃ likhitvā lajjitā punaḥ |
pitre sā prāhiṇollekhaṃ śamaṃ bheje ca tena saḥ || 100 ||
[Analyze grammar]

etaṃ jñātvā ca vṛttāntaṃ bhair aveṇādya kupyatā |
ānāyya sa sthulaśirāḥ śapto devena guhyakaḥ || 101 ||
[Analyze grammar]

liṅgatyāgena ṣaṇḍhatvamāśritaṃ yattvayā tataḥ |
ṣaṇḍha eva bhavājīvaṃ pumān so 'stu prabhākaraḥ || 102 ||
[Analyze grammar]

evaṃ napuṃsakībhūto guhyakaḥ so 'dya duḥkhabhāk |
prabhākaraś ca puruṣībhūto bhogasukhāya saḥ || 103 ||
[Analyze grammar]

tadetenādya kāryeṇa devasyāgamane manāk |
jāto vilambaḥ kṣiprāc ca jānītāgatam eva tam || 104 ||
[Analyze grammar]

iti nārāyaṇī devī mātṛryāvadbravīti sā |
devaścakreśvarastāvadāyayau so 'tra bhair ava || 105 ||
[Analyze grammar]

saṃpūjitaś ca sarvābhir upahāraiḥ sa mātṛbhiḥ |
tāṇḍavena kṣaṇaṃ nṛtyannakrīḍadyoginīsakhaḥ || 106 ||
[Analyze grammar]

tac ca sarvaṃ taroḥ pṛṣṭhāccandrasvāmī vilokayan |
nārāyaṇyā dadarśaikāṃ dāsīṃ sāpi tamaikṣata || 107 ||
[Analyze grammar]

anyonyasābhilāṣau ca daivāddvau tau babhūvatuḥ |
sā ca nārāyaṇī devī tathābhūtau viveda tau || 108 ||
[Analyze grammar]

gate 'tha mātṛsahite bhair ave sā vilambya tam |
nārāyaṇī pādapasthaṃ candrasvāminamāhvayat || 109 ||
[Analyze grammar]

avaruhyāgataṃ taṃ ca svadāsīṃ tāṃ ca sā tataḥ |
papraccha kaccidanyonyamabhilāṣo 'sti vāmiti || 110 ||
[Analyze grammar]

asti devīti vijñaptā tābhyāṃ tathyaṃ tataś ca sā |
devī vimuktakopā taṃ candrasvāminam abhyadhāt || 111 ||
[Analyze grammar]

satyenoktena tuṣṭāhaṃ yuvayor na śapāmi vām |
dadāmyetāṃ tu dāsīṃ te bhavataṃ nirvṛtau yuvām || 112 ||
[Analyze grammar]

tac chrutvā so 'bravīdvipro devi yady api cañcalam |
mano ruṇadhmi tadapi spṛśāmi na parastriyam || 113 ||
[Analyze grammar]

manasaḥ prakṛtirhyeṣā rakṣyaṃ pāpaṃ tu kāyikam |
ityūcivāṃsaṃ taṃ dhīraṃ vipraṃ devī jagāda sā || 114 ||
[Analyze grammar]

prītāsmi te varaś cāyaṃ putrādīñ śīghram apsyasi |
idaṃ cotpalam amlāyi viṣādighnaṃ gṛhāṇa me || 115 ||
[Analyze grammar]

ity uktvā nīrajaṃ dattvā candrasvāmidvijasya sā |
nārāyaṇī sadāsīkā devī tasya tirodadhe || 116 ||
[Analyze grammar]

sa ca prāptotpalo rātrau kṣīṇāyāṃ prasthitas tataḥ |
tārāpuraṃ tan nagaraṃ prāpa vipraḥ paribhraman || 117 ||
[Analyze grammar]

yatrāsya sa sthitaḥ putro mahīpālaḥ sutā ca sā |
anantasvāminas tasya gṛhe viprasya mantriṇaḥ || 118 ||
[Analyze grammar]

tatra gatvā sa tasyaiva mantriṇo bhojanepsayā |
dvāre prādhyayanaṃ cakre śrutvā tamatithiṃ priyam || 119 ||
[Analyze grammar]

sa ca mantrī pratīhārair āvedyāntaḥ praveśitam |
nyamantrayata dṛṣṭvaiva vidvāṃsaṃ bhojanāya tam || 120 ||
[Analyze grammar]

nimantrito 'tha sa śrutvā tatra pāpaharaṃ saraḥ |
candrasvāmī yayau snātumanantahṛdasaṃjñakam || 121 ||
[Analyze grammar]

āgacchati tataḥ snātvā yāvattāvat samantataḥ |
hākaṣṭaśabdaṃ śuśrāva nagare tatra sa dvijaḥ || 122 ||
[Analyze grammar]

tatkāraṇaṃ ca pṛcchantaṃ tam evamavadajjanaḥ |
iha sthito mahīpālo nāma brāhmaṇaputrakaḥ || 123 ||
[Analyze grammar]

aṭavyāḥ sārthavāhena prāptaḥ sārthadhareṇa saḥ |
tasmātsulakṣaṇo dṛṣṭvā yācitvā bhaginīsakhaḥ || 124 ||
[Analyze grammar]

anantasvāminā yatnādihānītaḥ sa mantriṇā |
putrīkṛtaś cāputreṇa sa tena priyatāṃ gataḥ || 125 ||
[Analyze grammar]

tārāvarmanṛpasyeha rāṣṭrasyāsya ca sadguṇaḥ |
so 'dya kṛṣṇāhinā daṣṭastena hāhāravaḥ pure || 126 ||
[Analyze grammar]

etac chrutvā sa evaiṣa matputra iti cintayan |
āyayau tvaritaścandrasvāmī mantrigṛhaṃ sa tat || 127 ||
[Analyze grammar]

tatra sarvair vṛtaṃ dṛṣṭvā parijñāya ca taṃ sutam |
nandati sma sa hastasthadevīdattāgadotpalaḥ || 128 ||
[Analyze grammar]

aḍhaukayac ca nāsāyāṃ mahīpālasya tasya tat |
nīlotpalaṃ tadaivābhūttadgandhena sa nirviṣaḥ || 129 ||
[Analyze grammar]

uttasthau ca mahīpālo nidrāyukta ivāsta saḥ |
pure cātrotsavaṃ cakre janaḥ sarvaḥ sarājakaḥ || 130 ||
[Analyze grammar]

candrasvāmī ca sa tadā devāṃśaḥ ko 'py asāv iti |
anantasvāminā paurai rājñā cārthair apūjyata || 131 ||
[Analyze grammar]

tasthau ca tatraiva sukhaṃ mantriveśmani so 'rcitaḥ |
paśyan putraṃ mahīpālaṃ sutāṃ candravatīṃ ca tām || 132 ||
[Analyze grammar]

parijñāyāpi cānyonyaṃ tūṣṇīṃ tasthustrayo 'pi te |
kurvantyakāle 'bhivyaktiṃ na kāryāpekṣiṇo budhāḥ || 133 ||
[Analyze grammar]

atha tasmai mahīpālāyāntaḥ saṃtoṣito guṇaiḥ |
rājā bandhumatīṃ nāma tārāvarmā dadau sutām || 134 ||
[Analyze grammar]

pradattanijarājyārdhe tasminneva vyadhāttadā |
sukhī rājyabharaṃ kṛtsnaṃ sa nṛpo 'nanyaputrakaḥ || 135 ||
[Analyze grammar]

mahīpālo 'pi sa prāptarājyaḥ prakhyāpya taṃ nijam |
pitaraṃ svānujāṃ sthāne dattvā tasthau yathāsukham || 136 ||
[Analyze grammar]

ekadā taṃ pitā candrasvāmī svair am abhāṣata |
ehi svadeśaṃ gacchāvo māturānayanāya te || 137 ||
[Analyze grammar]

rājyasthaṃ tvāṃ hi buddhvā sā kathaṃ tenāsmi vismṛtā |
iti kruddhā śapejjātu putrāticiraduḥkhitā || 138 ||
[Analyze grammar]

matāpitṛbhyāṃ śaptaḥ sanna jātu sukhamaśnute |
tathā caitāṃ purāvṛttāṃ vaṇikputrakathāṃ śṛṇu || 139 ||
[Analyze grammar]

cakro nāma vaṇikputro dhavalākhye 'bhavatpure |
so 'nicchatoragātpitroḥ svarṇadvīpaṃ vaṇijyayā || 140 ||
[Analyze grammar]

tataḥ sa pañcabhir varṣair upārjitamahādhanaḥ |
āgacchannārurohābdhau vahanaṃ ratnapūritam || 141 ||
[Analyze grammar]

alpāvaśeṣe gantavye vāridhau tasya connadan |
udatiṣṭhanmahāvātavarṣavegākulo 'mbudaḥ || 142 ||
[Analyze grammar]

pitarāvavamanyaiṣa kimāyāta itīva tat |
krodhātpravahaṇaṃ tasya nirbabhañjurmahormayaḥ || 143 ||
[Analyze grammar]

tatsthāḥ ke 'pi hṛtāstoyair makaraiḥ ke 'pi bhakṣitāḥ |
cakrastvāyurbalānnītvā tīre kṣiptaś ca vīcibhiḥ || 144 ||
[Analyze grammar]

tatrastho niḥsahaḥ svapna iva raudrāsitākṛtim |
pāśahastaṃ dadarśaikaṃ puruṣaṃ sa vaṇiksutaḥ || 145 ||
[Analyze grammar]

tenotkṣipya ca nīto 'bhūtsa cakraḥ pāśaveṣṭitaḥ |
dūraṃ siṃhāsanasthena puruṣeṇāsthitāṃ sabhām || 146 ||
[Analyze grammar]

tasyājñayāsanasthasya tenaiva sa vaṇigyuvā |
nītvā pāśabhṛtā lohamaye gehe nyaveśyata || 147 ||
[Analyze grammar]

tatrāntaḥ pīḍyamānaṃ sa cakraḥ puruṣamaikṣata |
mūrdhni taptena lauhena cakreṇa bhramatāniśam || 148 ||
[Analyze grammar]

kastvaṃ kenāśubhenedaṃ tava jīvasyaho katham |
ityapṛcchatsa cakrastaṃ so 'pyevaṃ pratyuvāca tam || 149 ||
[Analyze grammar]

khaḍgākhyo 'haṃ vaṇikputraḥ pitroryac ca vaco mayā |
na kṛtaṃ tena saṃkruddhau tau māmaśapatāṃ krudhā || 150 ||
[Analyze grammar]

śiraḥsthāyasasaṃtaptacakrābhau nau dunoṣi yat |
tadīdṛśyeva te pīḍā durācāra bhaviṣyati || 151 ||
[Analyze grammar]

ity uktvā tau viramyobhau rudantaṃ māmavocatām |
mā rodīrekamevāstu māsaṃ pīḍā tavedṛśī || 152 ||
[Analyze grammar]

tacchruvāhaṃ śucā nītvā taddinaṃ śayanāśritaḥ |
niśi svapna ivādrākṣaṃ bhīmaṃ puruṣamāgatam || 153 ||
[Analyze grammar]

tenādāya balenāhamasmiṃllohamaye gṛhe |
kṣipto nyastaṃ ca me mūrdhni jvalaccakramidaṃ bhramat || 154 ||
[Analyze grammar]

iti me pitṛśāpo 'yaṃ tena prāṇa na yānti me |
sa ca māso 'dya saṃpūrṇo na ca mucye tathāpy aham || 155 ||
[Analyze grammar]

ity uktavantaṃ taṃ khaḍgaṃ sa cakraḥ sakṛpo 'bravīt |
pitroḥ pravasatārthārthaṃ mayāpi na kṛtaṃ vacaḥ || 156 ||
[Analyze grammar]

prāptaṃ naṅkṣyati te vittamiti māṃ śapataḥ sma tau |
tenābdhau me dhanaṃ naṣṭaṃ kṛtsnaṃ dvīpāntarārjitam || 157 ||
[Analyze grammar]

eṣaiva vārtā cānyatra tatko 'rtho jīvitena me |
dehyetanmūrdhni me cakraṃ khaḍga śāpo 'payātu te || 158 ||
[Analyze grammar]

iti cakre vadaty eva vāṇī divyātra śuśruve |
khaḍga mukto 'si cakrasya mūrdhny etac cakramarpaya || 159 ||
[Analyze grammar]

tac chrutvā cakraśirasi nyastacakrastadaiva saḥ |
khaḍgaḥ kenāpyadṛśyena ninye pitṛhṛhaṃ tataḥ || 160 ||
[Analyze grammar]

tatrāsītsa punaḥ pitroranullaṅghitaśāsanaḥ |
cakrastvādāya tanmūrdhni cakraṃ tatraivam abhyadhāt || 161 ||
[Analyze grammar]

papino 'nye 'pi mucyantāṃ pṛthvyāṃ tatpātakair api |
ā papakṣayametanme cakraṃ bhrāmyatu mūrdhani || 162 ||
[Analyze grammar]

ity uktavantaṃ taṃ cakraṃ dhīrasattvaṃ nabhaḥsthitāḥ |
puṣpavṛṣṭimuco devāḥ parituṣyaivam abruvan || 163 ||
[Analyze grammar]

sādhu sādhu mahāsattva śāntaṃ karuṇayānayā |
pāpaṃ te vraja vittaṃ ca tavākṣayyaṃ bhaviṣyati || 164 ||
[Analyze grammar]

ity uktavatsu deveṣu cakrasya śirasaḥ kṣaṇāt |
āyasaṃ tasya taccakraṃ jagāma kvāpy adarśanam || 165 ||
[Analyze grammar]

tathopetyāmbarādeko vidyādharakumārakaḥ |
tuṣṭendrapreṣitaṃ dattvā mahārghaṃ ratnasaṃcayam || 166 ||
[Analyze grammar]

aṅke kṛtvaiva taṃ cakraṃ nagaraṃ dhavalābhidham |
nijaṃ tatprāpayām āsa jagāma ca yathāgatam || 167 ||
[Analyze grammar]

so 'tha cakro 'ntikaṃ pitroḥ prāpyānanditabāndhavaḥ |
tasthāvākhyātavṛttāntas tatra dharmāparicyutaḥ || 168 ||
[Analyze grammar]

ityākhyāya mahīpālaṃ candrasvāmyavadatpunaḥ |
īdṛkpāpaphalaṃ putra mātāpitrorvirodhanam || 169 ||
[Analyze grammar]

kāmadhenus tu tadbhaktis tatrāpyetāṃ kathāṃ śṛṇu |
āsīt ko'pi muniḥ pūrvaṃ vanacārī mahātapāḥ || 170 ||
[Analyze grammar]

tarucchāyopaviṣṭasya tasyopari balākayā |
viṣṭhā kadācin muktābhūt so 'tha kruddho dadarśa tām || 171 ||
[Analyze grammar]

dṛṣṭam atraiva sā tena balākā bhasmasādabhūt |
tapaḥ prabhāvāhaṃkāraṃ sa ca bheje tato muniḥ || 172 ||
[Analyze grammar]

ekadā nagare kvāpi sa brāhmaṇagṛhaṃ muniḥ |
ekaṃ praviśya gṛhiṇīṃ tatra bhikṣāmayācata || 173 ||
[Analyze grammar]

pratīkṣasva manāgbhartuḥ paricaryāṃ samāpaye |
iti taṃ sā ca gṛhiṇī nijagāda pativratā || 174 ||
[Analyze grammar]

tatas taṃ kruddhayā dṛṣṭyā vīkṣamāṇaṃ vihasya sā |
abhāṣata mune nāhaṃ balākā mṛṣyatām iti || 175 ||
[Analyze grammar]

śrutvaitatsa munistasthavupaviśyātra sādbhutaḥ |
etatkatham iva jñātamanayeti vicintayan || 176 ||
[Analyze grammar]

tataḥ kṛtvāgnikāryādeḥ śuśrūṣāṃ bharturatra sā |
sādhvī bhikṣāṃ samādāya tasyāgādantikaṃ muneḥ || 177 ||
[Analyze grammar]

so 'tha baddhāñjalirbhūtvā munistāmavadatsatīm |
kathaṃ balākāvṛttāntaḥ parokṣo 'pi mama tvayā || 178 ||
[Analyze grammar]

jñāta ityādito brūhi bhikṣāṃ gṛhṇāmyahaṃ tataḥ |
ity uktavantaṃ tamṛṣiṃ sāvocatpatidevatā || 179 ||
[Analyze grammar]

na bhartṛbhakter aparaṃ dharmaṃ kaṃcana vedmy aham |
tena me tatprasādena vijñānabalamīdṛśam || 180 ||
[Analyze grammar]

kiṃ ceha dharmavyādhākhyaṃ māṃsavikrayajīvinasm |
gatvā paśya tataḥ śreyo nirahaṃkāramāpsyasi || 181 ||
[Analyze grammar]

evaṃ sarvavidā proktaḥ sa pativratayā muniḥ |
gṛhītāthitibhāgastāṃ praṇamya niragāttataḥ || 182 ||
[Analyze grammar]

anyedyuḥ sa munirdharmavyādhamanviṣya tatra tam |
vipaṇistham upāgacchatkurvāṇaṃ māṃsavikrayam || 183 ||
[Analyze grammar]

dharmavyādhaś ca dṛṣṭvaiva sa taṃ munim abhāṣata |
kiṃ pativratayā brahmanniha tvaṃ preṣitastayā || 184 ||
[Analyze grammar]

tac chrutvā vismito 'vādīddharmasvyādhamṛṣiḥ sa tam |
īdṛśaṃ te kathaṃ jñānaṃ māṃsavikrayiṇaḥ sataḥ || 185 ||
[Analyze grammar]

ity uktavantaṃ tamṛṣiṃ dharmavyādho jagāda saḥ |
mātāpitrorahaṃ bhaktastau mamaikaṃ parāyaṇam || 186 ||
[Analyze grammar]

tayoḥ snapitayoḥ snāmi bhuñje bhojitayostayoḥ |
śaye śayitayostena jñānam īdṛgvidhaṃ mama || 187 ||
[Analyze grammar]

māṃsaṃ cānyahatasyāhaṃ mṛgādervṛttaye param |
svadharmanirato bhūtvā vikrīṇe nārthagardhataḥ || 188 ||
[Analyze grammar]

jñānavighnamahaṃkāramahaṃ sā ca pativratā |
naiva kurvo mune tena nirbādhajñānamāvayoḥ || 189 ||
[Analyze grammar]

tasmāttvam apy ahaṃkāraṃ muktvā śuddhyai munivrataḥ |
svadharmaṃ cara yenāśu paraṃ jyotiravāpsyasi || 190 ||
[Analyze grammar]

iti tesnānuśiṣṭaś ca dharmavyādhena tadgṛhān |
gatvā dṛṣṭvā ca taccaryāṃ munistuṣṭo vanaṃ yayau || 191 ||
[Analyze grammar]

siddhastadupadeśāc ca so 'bhūttāvapi jagmatuḥ |
siddhiṃ pativratādharmavyādhau taddharmacaryayā || 192 ||
[Analyze grammar]

eṣa prabhāvo bhaktānāṃ patyau pitari mātari |
tadehi saṃbhāvaya tāṃ mātaraṃ darśanotsukām || 193 ||
[Analyze grammar]

evaṃ pitrā mahīpālaḥ sa candrasvāminoditaḥ |
pratipede svadeśāya gantuṃ mātranurodhataḥ || 194 ||
[Analyze grammar]

anantasvāmine sarvaṃ dharmapitre nivedya tat |
tenāttabhāraḥ sa tataḥ prāyātpitṛsakho niśi || 195 ||
[Analyze grammar]

kramātprāpya svadeśaṃ ca jananīṃ darśanena tām |
anandayaddevamatiṃ madhuḥ pikavadhūmiva || 196 ||
[Analyze grammar]

kaṃcitkālaṃ mahīpālastasthau bāndhavasatkṛtaḥ |
tatra mātṛyutaḥ pitrā vṛttāntākhyāyinā saha || 197 ||
[Analyze grammar]

tāvattārāpure tatra tadbhāryā tu nṛpātmajā |
niśākṣaye bandhumatī sāntaḥ suptā vyabudhyata || 198 ||
[Analyze grammar]

buddhvā ca taṃ patiṃ kvāpi gataṃ virahaviklavā |
na lebhe sā ratiṃ kvāpi prāsādopavanādiṣu || 199 ||
[Analyze grammar]

dviguṇīkṛtahāreṇa bāṣpeṇa rudatī param |
āsītpralāpaikamayī vāñchantī mṛtyunā sukham || 200 ||
[Analyze grammar]

yāmi kāryeṇa kenāpi śīghrameṣyāmi ceti me |
svair amuktvaiva sa gatastanmā putri śucaṃ kṛthāḥ || 201 ||
[Analyze grammar]

ityāśādarśibhir vākyair anantasvāminā tataḥ |
mantriṇāśvāsitābhyetya kṛcchrātsā dhṛtimādade || 202 ||
[Analyze grammar]

tataḥ pravṛttijñānārthaṃ bhartur deśāntarāgatān |
pūjayantī sadaivāsīd dānaiḥ sā dvijapuṃgavān || 203 ||
[Analyze grammar]

tena saṃgamadattākhyaṃ dīnaṃ dānāgataṃ dvijam |
bhartuḥ papraccha sā vārtāmuktvābhijñānanāmanī || 204 ||
[Analyze grammar]

tatastāṃ sa dvijo 'vādīdṛṣṭo naivaṃvidho mayā |
kaś cittathāpi devyatra kāryā naivādhṛtistvayā || 205 ||
[Analyze grammar]

cirādavāpyate 'bhīṣṭasaṃyogaḥ śubhakarmabhiḥ |
tathā ca yanmayā dṛṣṭamāścaryaṃ vacmi tacchṛṇu || 206 ||
[Analyze grammar]

tīrthānyaṭannahaṃ prāpaṃ himādrau mānasaṃ saraḥ |
tatrādarśamivāpaśyamantarmaṇimayaṃ gṛham || 207 ||
[Analyze grammar]

tato 'kasmāc ca nirgatya khaḍgapāṇiḥ pumān gṛhāt |
adhyārohat sarastīraṃ divyanārīgaṇānvitaḥ || 208 ||
[Analyze grammar]

tatrodyāne saha strībhiḥ so 'krīḍat pānalīlayā |
dūrāt sakautukaś cāhaṃ paśyan nāsamalakṣitaḥ || 209 ||
[Analyze grammar]

tāvatkuto 'pi tatrāgātsubhagaḥ puruṣo 'paraḥ |
militāya ca tattasmai yathādṛṣṭaṃ mayoditam || 210 ||
[Analyze grammar]

darśitaś ca sa sastrīkaḥ pumāndūrātkutūhalāt |
taddṛṣṭvaiva svavṛttāntam evamākhyātavānmama || 211 ||
[Analyze grammar]

pure tribhuvanākhye 'haṃ rājā tribhuvanābhidhaḥ |
tatra me suciraṃ sevāmekaḥ pāśupato vyadhāt || 212 ||
[Analyze grammar]

sa pṛṣṭaḥ kāraṇaṃ svair aṃ bilakhaḍgaprasādhane |
sahāyaṃ prārthayata māṃ pratipannaṃ mayā ca tat || 213 ||
[Analyze grammar]

tato mayā sahāraṇyaṃ gatvā homādinā niśi |
prakaṭīkṛtya vivaraṃ sa māṃ pāśupato 'bhyadhāt || 214 ||
[Analyze grammar]

vīra praviśa pūrvaṃ tvaṃ khaḍgaṃ prāpya ca māmapi |
praveśayestvaṃ nirgatya samayaṃ cātra me kuru || 215 ||
[Analyze grammar]

ity uktastena tasyāhaṃ kṛtvā samayamāśu tat |
praviśya vivaraṃ prāpamekaṃ ratnamayaṃ gṛham || 216 ||
[Analyze grammar]

tato nirgatya māṃ caikā pradhānāsurakanyakā |
antaḥ prāveśayatpremṇā prādāt khaḍgaṃ ca sātra me || 217 ||
[Analyze grammar]

sarvasiddhipradimimaṃ khaḍgaṃ khagatidāyinam |
rakṣerity uktavatyāhaṃ tayā tatrāvasaṃ saha || 218 ||
[Analyze grammar]

smṛtvātha khaḍgahasto 'haṃ nirgatya vivareṇa tam |
prāveśayaṃ pāśupataṃ tasminnasuramandire || 219 ||
[Analyze grammar]

tatrāhamādyayā sākaṃ tayā saparivārayā |
so 'pi dvitīyayā sākamāsīdasurakanyayā || 220 ||
[Analyze grammar]

ekadā pānamāttasya sa me pāśupataśchalāt |
hṛtvā pārśvasthitaṃ khaḍgamakaronnijahastagam || 221 ||
[Analyze grammar]

tasmin hastasthite labdhamahāsiddhiḥ sa pāṇitaḥ |
mām ādāyaiva niṣkālya vivarāt prākṣipadbahiḥ || 222 ||
[Analyze grammar]

tato dvādaśavarṣāṇi masyā bilamukheṣu saḥ |
gaveṣitaḥ kadācittaṃ nirgataṃ prāpnuyāmiti || 223 ||
[Analyze grammar]

so 'yamadyeha me dṛṣṭipathe nipatitaḥ śaṭhaḥ |
madīyayaitayā sākaṃ krīḍannasurakanyayā || 224 ||
[Analyze grammar]

iti yāvattribhuvanaḥ sa rājā devi vakti mām |
tāvat pānamadānnidrāmagātpāśupato 'tra saḥ || 225 ||
[Analyze grammar]

suptasya tasya gatvaiva pārśvātkhaḍgaṃ tamagrahīt |
sa rājā tena bhūyaś ca prabhāvaṃ divyamāptavān || 226 ||
[Analyze grammar]

tataḥ pāśupataṃ pādaprahāreṇa prabodhya tam |
nirabhartsayadāpannaṃ sa vīro nāvadhītpunaḥ || 227 ||
[Analyze grammar]

prāviśaccāsurapuraṃ saparicchadayā tayā |
prāptayā sa svayā sākaṃ siddhyaivāsurakanyayā || 228 ||
[Analyze grammar]

sa ca pāśupataḥ siddibhraṣṭaḥ kaṣṭamagātparam |
kṛtaghnāścirasiddhārthā api bhraśyanti hi dhruvam || 229 ||
[Analyze grammar]

etatsākṣādvilokyāhamiha prāptaḥ paribhraman |
taddevi priyasaṃyogastava bhāvī cirādapi || 230 ||
[Analyze grammar]

yathā tribhuvanasyābhūcchubhakṛnnahi sīdati |
iti tasmāddvijāc chrutvā toṣaṃ bandhumatī yayau || 231 ||
[Analyze grammar]

cakāra ca kṛtārthaṃ taṃ vipraṃ dattvā dhanaṃ bahu |
anyedyuś ca dvijo 'pūrvastatrāgāddūradeśajaḥ || 232 ||
[Analyze grammar]

taṃ ca bandhumatī sotkā proktābhijñānanāmakā |
bharturvārtāmapṛcchatsā so 'tha tāṃ brāhmaṇo 'bhyadhāt || 233 ||
[Analyze grammar]

na sa devi mayā dṛṣṭastvadbhartā kvāpi kiṃ tvaham |
anvarthaḥ sumanonāmā tavādya gṛhamāgataḥ || 234 ||
[Analyze grammar]

tadāsu saumanasyaṃ te bhāvītyākhyāti me manaḥ |
bhavatyeva ca saṃyogaściraviśleṣiṇāmapi || 235 ||
[Analyze grammar]

tathā ca kathayāmyetāmatra devi kathāṃ śṛṇu |
niṣadhādhipatī rājā nalo nāmābhavatpurā || 236 ||
[Analyze grammar]

yasya rūpeṇa vijitaḥ kāmo manye 'vamānataḥ |
kopitatripurārātinetrāgnāvajuhottanum || 237 ||
[Analyze grammar]

tenābhāryeṇa sadṛśī bhāryāśrāvi vicinvatā |
damayantīti bhīmasya vidarbhādhipateḥ sutā || 238 ||
[Analyze grammar]

bhīmenāpi vicitya kṣmāṃ dadṛśe tena rājasu |
na nalādaparo rājā tulyaḥ svaduhituḥ patiḥ || 239 ||
[Analyze grammar]

atrāntare svanagare damayantī sarovaram |
bhīmātmajā jalakrīḍāhetoravatatāra sā || 240 ||
[Analyze grammar]

tatraikaṃ rājahaṃsaṃ sā dṛṣṭvā daṣṭotpalāmbujam |
babandha krīḍayā bālā yuktikṣiptottarīyakā || 241 ||
[Analyze grammar]

sa baddho divyahaṃsastām uvāca vyaktayā girā |
rājaputryupakāraṃ te kariṣyāmi vimuñca mām || 242 ||
[Analyze grammar]

naiṣadho 'sti nalo nāma rājā hṛdi vahanti yam |
sadguṇair gumphitaṃ hāram iva divyāṅganā api || 243 ||
[Analyze grammar]

tasya tvaṃ sadṛśī bhāryā bhartā sa sadṛśastava |
tad atra tulyasaṃyoge kāmadūto bhavāmi vām || 244 ||
[Analyze grammar]

tac chrutvā divyahaṃsaṃ sā matvā satyābhibhāṣiṇam |
mumoca damayantī tam evamastviti vādinī || 245 ||
[Analyze grammar]

na mayā varaṇīyo 'nyo nalāditi jagāda ca |
śrutimārgapraviṣṭena tenāpahṛtamānasā || 246 ||
[Analyze grammar]

sa ca haṃsastato gatvā niṣedhaṣvāśu śiśriye |
jalakrīḍāpravṛttena nalenādhyāsitaṃ saraḥ || 247 ||
[Analyze grammar]

nalaḥ sa rājā dṛṣṭvā taṃ rājahaṃsaṃ manoramam |
babandha svottarīyeṇa līlākṣiptena kautukāt || 248 ||
[Analyze grammar]

so 'tha haṃso 'bravīnmuñca nṛpate māmahaṃ yataḥ |
iha tvadupakārārthamāgataḥ śṛṇu vacmi te || 249 ||
[Analyze grammar]

vidarbheṣv asti bhīmasya rājñaḥ kṣititilottamā |
damayantīti duhitā spṛhaṇīyā surair api || 250 ||
[Analyze grammar]

tvam eva ca madākhyātaguṇo baddhānurāgayā |
tayā bhartā vṛtastac ca tavāhaṃ vaktumāgataḥ || 251 ||
[Analyze grammar]

iti haṃsottamasyāsya vacobhiḥ satphalojjvalaiḥ |
viśikhaiś ca sa puṣpeṣornalaḥ samamavidhyata || 252 ||
[Analyze grammar]

abravītsa ca haṃsaṃ taṃ dhanyo 'haṃ vihagottama |
yo manorathasaṃpattyā mūrtayeva vṛtastayā || 253 ||
[Analyze grammar]

ity uktvā tena muktaḥ sa haṃso gatvā śaśaṃsa tat |
damayantyai yathāvastu yathākāmaṃ jagāma ca || 254 ||
[Analyze grammar]

damayantī ca sotkaṇṭhā yuktyā mātṛmukhena sā |
pituḥ svātprārthayām āsa nalaprāptyai svayaṃvaram || 255 ||
[Analyze grammar]

anumanya sa tasyāś ca svayaṃvarakṛte pitā |
bhīmaḥ pṛthivyāṃ sarveṣāṃ rājñāṃ dūtānvisṛṣṭavān || 256 ||
[Analyze grammar]

prāptadūtāś ca nikhilā vidarbhān prati bhūmipāḥ |
vrajanti sma nalo 'py utko rathārūḍhaś cacāla saḥ || 257 ||
[Analyze grammar]

tataś ca damayantyāstau nalapremasvayaṃvarau |
indrādayo lokapālāḥ śuśruvurnāradānmuneḥ || 258 ||
[Analyze grammar]

teṣāṃ ca balabhidvāyuyamāgnivaruṇās tataḥ |
saṃmantrya damayanty uktvā nalasyaivāntikaṃ yayuḥ || 259 ||
[Analyze grammar]

ūcuś ca prāpya taṃ prahvaṃ vidarbhān prasthitaṃ pathi |
gatvāsmadvacanād brūhi damayantīm idaṃ nṛpa || 260 ||
[Analyze grammar]

pañcānāṃ varayaikaṃ naḥ kiṃ martyena nalena te |
martyā maraṇadharmāṇastridaśāstvamarā iti || 261 ||
[Analyze grammar]

asmadvarāc ca tatpārśvamadṛṣṭo 'nyaiḥ pravekṣyasi |
tathetyetāṃ ca devājñāṃ pratipede nalo 'tha saḥ || 262 ||
[Analyze grammar]

gatvā cāntaḥpuraṃ tasyāḥ praviśyādṛṣṭa eva ca |
damayantyāḥ śaśaṃsaiva devādeśaṃ tathaiva tam || 263 ||
[Analyze grammar]

sā taṃ śrutvābravītsādhvī devāste santu tādṛśāḥ |
tathāpi me nalo bhartā na kāryaṃ tridaśair mama || 264 ||
[Analyze grammar]

iti samyagvacastasyāḥ śrutvātmānaṃ prakāśya ca |
nalo gatvā tathaivaitadindrādibhyaḥ śaśaṃsa saḥ || 265 ||
[Analyze grammar]

vaśyā vayamidānīṃ te smṛtamātropagāminaḥ |
tathyavādinniti ca te tuṣṭāstasmai dudurvarān || 266 ||
[Analyze grammar]

tato hṛṣṭe nale yāte vidarbhānvañcanepsubhiḥ |
damayantyāḥ sureśādyair nalarūpamakāri taiḥ || 267 ||
[Analyze grammar]

gatvā ca bhīmasya sabhāṃ martyadharmānupāśritāḥ |
svayaṃvare prastute te nalāntika upāviśan || 268 ||
[Analyze grammar]

athaitya damayantī sā bhrātrā svenaikaśo nṛpān |
āvedyamānān ujjhantī kramātpāpa nalāntikam || 269 ||
[Analyze grammar]

dṛṣṭvā chāyānimeṣādiguṇāṃs tatra ca ṣaṇnalān |
sā bhrātari samudbhrānte vyākulā samacintayat || 270 ||
[Analyze grammar]

nūnaṃ me lokapālaistair māyeyaṃ pañcabhiḥ kṛtā |
ṣaṣṭhaṃ manye nalaṃ tvatra na cānyatrāsti me gatiḥ || 271 ||
[Analyze grammar]

ityālocyaiva sādhvī sā nalaikāsaktamānasā |
ādityābhimukhī bhūtvā damayantyevam abravīt || 272 ||
[Analyze grammar]

bho lokapālāḥ svapne 'pi nalādanyatra cenna me |
manastattena satyena svaṃ darśayata me vapuḥ || 273 ||
[Analyze grammar]

varātpūrvavṛtāccānye kanyāyāḥ parapūruṣāḥ |
paradārāś ca sā teṣāṃ tatkathaṃ moha eṣa vaḥ || 274 ||
[Analyze grammar]

śrutvaitatpañca śakrādyāḥ svena rūpeṇa te 'bhavan |
ṣaṣṭhaḥ satyanalaścābhūtsvarūpasthaḥ sa bhūpatiḥ || 275 ||
[Analyze grammar]

tasminsā damayantī tāṃ phullendīvarasundarīm |
dṛśaṃ varaṇamālāṃ ca hṛṣṭā rājñi nale nyadhāt || 276 ||
[Analyze grammar]

papāta puṣpavṛṣṭiś ca nabhomadhyāttato nṛpaḥ |
vivāhamaṅgalaṃ bhīmaścakre tasya nalasya ca || 277 ||
[Analyze grammar]

vihitocitapūjāś ca tena vaidarbhabhūbhṛtā |
nṛpā yathāgataṃ jagmurdevāḥ śakrādayaś ca te || 278 ||
[Analyze grammar]

śakrādayastu dadṛśurdvau kalidvāparau pathi |
buddhvā ca damayantyarthamāgatau tau ca te 'bruvan || 279 ||
[Analyze grammar]

na gantavyaṃ vidarbheṣu tata evāgatā vayam |
vṛttaḥ svayaṃvaro rājā damayantyā nalo vṛtaḥ || 280 ||
[Analyze grammar]

tac chrutvaivocatuḥ pāpau tau kalidvāparau ruṣā |
devān bhavādṛśāṃs tyaktvā yat sa martyo vṛtas tayā || 281 ||
[Analyze grammar]

tadavaśyaṃ kariṣyāvo viyogamubhayostayoḥ |
evaṃ kṛtapratijñau tau nivartya yayatus tataḥ || 282 ||
[Analyze grammar]

nalaś ca sapta divasānsthitvā śvaśuraveśmani |
damayantyā samaṃ vadhvā kṛtārtho niṣadhānagāt || 283 ||
[Analyze grammar]

tatrāsītprema daṃpatyorgaurīśarvādhikaṃ tayoḥ |
śarvasya gaurī dehārdhaṃ tasya tvātmaiva sābhavat || 284 ||
[Analyze grammar]

kālena cenrasenākhyaṃ damayantī nalātsutam |
prasūte sma tadanvekāmindrasenāṃ ca kanyakām || 285 ||
[Analyze grammar]

tāvac ca sa kaliś chidraṃ tasyānucchāstravartinaḥ |
nalasyāsīc ciraṃ cinvan pratijñātārthaniścitaḥ || 286 ||
[Analyze grammar]

athaikadānupāsyaiva saṃdhyāmakṣālitāṅghrikaḥ |
sa suṣvāpa nalaḥ pānamadena muṣitasmṛtiḥ || 287 ||
[Analyze grammar]

chidrametadavāpyaiva dattadṛṣṭirdivāniśam |
kalis tasya śarīrāntarnalasya praviveśa saḥ || 288 ||
[Analyze grammar]

tena dehapraviṣṭena kalinā sa nalo nṛpaḥ |
vihāya dharmyamācāramācacāra yathāruci || 289 ||
[Analyze grammar]

akṣair adīvyad dāsībhir araṃstāsatyam abravīt |
asevata divā svapnaṃ sa jajāgara rātriṣu || 290 ||
[Analyze grammar]

cakārākāraṇaṃ kopamanyāyenārthamādade |
avamānaṃ satāṃ cakre saṃmānamasatāṃ ca saḥ || 291 ||
[Analyze grammar]

tadbhrātaraṃ puṣkarākhyaṃ tathaivotkrāntasatpatham |
chidraṃ prāpya śarīrāntaḥpraviṣṭo dvāparo vyadhāt || 292 ||
[Analyze grammar]

kadācit puṣkarākhyas ya gṛhe tasyānujasya saḥ |
nalo dadarśa dāntākhyaṃ sundaraṃ dhavalaṃ vṛṣam || 293 ||
[Analyze grammar]

lobhānmṛgayamānāya taṃ tasmai jyāyase na saḥ |
dvāparagrastatadbhaktiḥ puṣkarākhyo vṛṣaṃ dadau || 294 ||
[Analyze grammar]

jagāda taṃ ca yadyasti vāñchāsminvṛṣabhe tava |
taddyūtena vijityainaṃ mattaḥ svīkuru mā ciram || 295 ||
[Analyze grammar]

tac chrutvā sa nalo mohātpratipede tatheti tat |
tataḥ pravavṛte dyūtaṃ tayor bhātroḥ parasparam || 296 ||
[Analyze grammar]

puṣkarākhyas ya sa vṛṣo nalasyebhādayaḥ paṇaḥ |
jigāya puṣkarākhyaś ca nalo muhurajīyata || 297 ||
[Analyze grammar]

dinair dvitrair bale koṣe hārite 'pi durodarāt |
na nalo vāryamāṇo 'pi cacāla kaliviplutaḥ || 298 ||
[Analyze grammar]

tena matvā gataṃ rājyaṃ damayantī nijau śiśū |
rathottamaṃ samāropya prāhiṇotsvapitur gṛham || 299 ||
[Analyze grammar]

tāvannalena rājyaṃ svaṃ samagram apihāritam |
tataḥ sa puṣkarākhyena jagade jitakāśinā || 300 ||
[Analyze grammar]

tvayānyaddhāritaṃ sarvaṃ tattasyokṣṇaḥ paṇasya me |
damayantīmidānīṃ tvaṃ dyūte pratipaṇaṃ kuru || 301 ||
[Analyze grammar]

ity uktivātyayā tasya nalo 'nala iva jvalan |
na cākāle 'bravītkiṃcinna ca cakre paṇakriyām || 302 ||
[Analyze grammar]

tataḥ sa puṣkarākhyas tamavādīnna karoṣi cet |
bhāryāṃ paṇaṃ tadasmānme deśānniryāhi tatsakhaḥ || 303 ||
[Analyze grammar]

tac chrutvaiva nalo deśāddamayantyā samaṃ tataḥ |
niragādrājapuruṣair ā sīmāntaṃ pravāsitaḥ || 304 ||
[Analyze grammar]

hā nalasyāpi yatredṛgavasthā kalinā kṛtā |
tatrocyatāṃ kimanyeṣāṃ krimīṇām iva dehinām || 305 ||
[Analyze grammar]

dhigdhiṅnirdharma niḥsnehaṃ rājarṣīṇāmapīdṛśām |
vipadāmāspadaṃ dyūtaṃ kalidvāparajīvitam || 306 ||
[Analyze grammar]

atha bhrātṛhṛtaiśvaryo videśaṃ sa nalo brajan |
damayantyā saha prāpa kṣudhāklānto vanāntaram || 307 ||
[Analyze grammar]

tatra sākaṃ tayā darbhabhinnapeśalapādayā |
sa viśrāntaḥ sarastīre haṃsau dvāvaikṣatāgatau || 308 ||
[Analyze grammar]

āhārārthaṃ ca sa tayor grahaṇāyottarīyakam |
cikṣepa tac ca hṛtvaiva haṃsau tau tasya jagmatuḥ || 309 ||
[Analyze grammar]

haṃsarūpeṇa tāvetāvakṣau vāso 'py upetya te |
hṛtvā gatāviti nalaḥ sa vācaṃ cāśṛṇoddivaḥ || 310 ||
[Analyze grammar]

upaviśyaikavastro 'tha sa yuktyā vimanā nṛpaḥ |
panthānaṃ darśayām āsa damayantyāḥ pitur gṛhe || 311 ||
[Analyze grammar]

ayaṃ mārgo vidarbheṣu priye pitṛgṛhe iva |
ayamaṅgeṣu mārgo 'yamaparaḥ kośaleṣu ca || 312 ||
[Analyze grammar]

tac chrutvā damayantī sā śaṅkitevābhavattadā |
tyakṣyannivārya putro me mārgaṃ kiṃ vakty asāv iti || 313 ||
[Analyze grammar]

tatas tau phalamūlānnau vane tatra niśāgame |
śrāntau saṃviśataḥ smobhau daṃpatī kuśasaṃstare || 314 ||
[Analyze grammar]

damayantī śanair nidrāmadhvakhinnā jagāma sā |
nalo gantumanāstvāsīdanidraḥ kalimohitaḥ || 315 ||
[Analyze grammar]

utthāya caikavastrāṃ tāṃ damayantīṃ vimucya saḥ |
chinnaṃ taduttarīyārdhaṃ prāvṛtya ca tato yayau || 316 ||
[Analyze grammar]

damayantī ca rātryante prabuddhā taṃ patiṃ vane |
apaśyantī gataṃ tyaktvā vilalāpa vicintya sā || 317 ||
[Analyze grammar]

hāryaputra mahāsattva ripāvapi kṛpāpara |
hā madvatsala kenāsi mayi niṣkaruṇīkṛtaḥ || 318 ||
[Analyze grammar]

ekākī ca kathaṃ padbhyāmaṭavīṣu prayāsyasi |
kas te śramāpanodāya paricaryāṃ kariṣyati || 319 ||
[Analyze grammar]

maulimālāparāgeṇa rañjitau yau mahībhujām |
tau te pati kathaṃ pādau dhūliḥ kaluṣayiṣyati || 320 ||
[Analyze grammar]

haricandanacūrṇenāpyāliptaṃ sahate na yat |
aṅgaṃ sahiṣyate tatte madhyāhnārkātapaṃ katham || 321 ||
[Analyze grammar]

kiṃ me bālena putreṇa kiṃ duhitrā kimātmanā |
tavaikasya śivaṃ devāḥ kurvatāṃ yadyahaṃ satī || 322 ||
[Analyze grammar]

ityekakānuśocantī damayantī nalaṃ tadā |
tatpūrvadarśitenaiva pratasthe sā tataḥ pathā || 323 ||
[Analyze grammar]

kathaṃciccāticakrāma nadīśailavanāṭavīḥ |
nāticakrāma bhaktiṃ tu sā bhartari kathaṃcana || 324 ||
[Analyze grammar]

satītejaś ca mārge tāmarakṣadyena lubdhakaḥ |
bhasmīkṛto 'hestrātāyāṃ tasyāṃ gatamanāḥ kṣaṇāt || 325 ||
[Analyze grammar]

tatau daivād vaṇiksārthenāntarā militena sā |
saha gatvā puraṃ prāpa subāhvākhyasya bhūpateḥ || 326 ||
[Analyze grammar]

tatra sā rājasutayā durāddṛṣṭvaiva harmyataḥ |
saundaryaprītayānāyya svamātre prābhṛtīkṛtā || 327 ||
[Analyze grammar]

tasyāḥ pārśve mahādevyāḥ sā tasthau ca tadādṛtā |
tyaktvā gato māṃ bharteti pṛṣṭā caitāvadabravīt || 328 ||
[Analyze grammar]

tāvac ca tatpitā bhīmo nalodantamavetya tam |
tayor anveṣaṇāyāptānnarāndikṣu visṛṣṭavān || 329 ||
[Analyze grammar]

tanmadhyāc ca suṣeṇākhya ekastatsacivo bhraman |
subāho rājadhānīṃ tāṃ prāpa brāhmaṇarūpabhṛt || 330 ||
[Analyze grammar]

sa tatra damayantīṃ tāmāgantūṃścinvatīṃ sadā |
adrākṣītsāpy apaśyattaṃ duḥkhitā pitṛmantriṇam || 331 ||
[Analyze grammar]

anyonyaṃ pratyabhijñāya sametya rudataḥ sma tau |
tathā yathātra rājñī sā subāhostadabudhyata || 332 ||
[Analyze grammar]

yāvac cānāyya sā devī tau yathāvastu pṛcchati |
bubudhe damayantīm tāṃ tāvat svabhaginīsutām || 333 ||
[Analyze grammar]

tataḥ sā bharturāvedya tāṃ saṃmānya pitur gṛham |
rathe 'dhiropya vyasṛjat sasuṣeṇāṃ sasainikām || 334 ||
[Analyze grammar]

tatra sā damayantyāsītprāptāpatyadvayā tataḥ |
pitrāpi dṛśyamānā sā bharturvārtāṃ vicinvatī || 335 ||
[Analyze grammar]

tatpitā vyasṛjaccārānanveṣṭuṃ taṃ ca tatpatim |
sudūsyandanavidyābhyāṃ divyābhyām upalakṣitam || 336 ||
[Analyze grammar]

bālāṃ vane prasuptāṃ nṛśaṃsa saṃtyajya kumudinīkāntām |
prāpyaivāmbarakhaṇḍaṃ candrādṛśyaḥ kva yāto 'si || 337 ||
[Analyze grammar]

evaṃ bhavadbhir vaktavyaṃ sthitaḥ śaṅkyeta yatra saḥ |
ityādideśa cārāṃstānsa ca bhīmo mahīpatiḥ || 338 ||
[Analyze grammar]

atrāntare sa rājā ca nalastasminvane niśi |
prāvṛtārdhapaṭo dūraṃ gatvā dāvāgnimaikṣata || 339 ||
[Analyze grammar]

bho mahāsattva yāvanna dahye 'hamabalo 'munā |
apasāraya māṃ tāvaddāvāgnernikaṭāditaḥ || 340 ||
[Analyze grammar]

ityatra tadvacaḥ śrutvā dattadṛṣṭirdadarśa saḥ |
ābaddhamaṇḍalaṃ nāgaṃ nalo dāvānalāntike || 341 ||
[Analyze grammar]

phaṇāratnaprabhājālajaṭilaṃ vanavahninā |
gṛhītam iva tenograhetihastena mūrdhani || 342 ||
[Analyze grammar]

upetya kṛpayāṃse taṃ kṛtvā nītvā ca dūrataḥ |
tyaktumicchati yāvat sa tāvannāgo 'bravītsa tam || 343 ||
[Analyze grammar]

gaṇayitvā daśānyāni padāni naya māmitaḥ |
tataḥ sa prayayāvevaṃ padāni gaṇayannalaḥ || 344 ||
[Analyze grammar]

ekaṃ dve trīṇi catvāri pañca ṣaṭ sapta śṛṇvahe |
aṣṭau nava daśety uktavantamukticchalena tam || 345 ||
[Analyze grammar]

nalaṃ skandhasthito nāgo lalāṭānte dadaṃśa saḥ |
tena hasvabhujaḥ kṛṣṇo virūpaḥ so 'bhavannṛpaḥ || 346 ||
[Analyze grammar]

tato 'vatārya skandhāttaṃ sa rājā pṛṣṭavān ahim |
ko bhavān kā kṛtā ceyaṃ tvayā me pratyupakriyā || 347 ||
[Analyze grammar]

etan nalavacaḥ śrutvā sa nāgaḥ pratyuvāca tam |
rājan kārkoṭanāmānaṃ nāgarājam avehi mām || 348 ||
[Analyze grammar]

daṃśo guṇāya ca mayā dattas te tac ca vetsyasi |
gūḍhavāse ca vairūpyaṃ mahatāṃ kāryasiddhaye || 349 ||
[Analyze grammar]

gṛhāṇa cāgniśaucākhyamidaṃ vastrayugaṃ mama |
anena prāvṛtenaiva svaṃ rūpaṃ pratipatsyase || 350 ||
[Analyze grammar]

ity uktvā dattatadvastrayuge kārkoṭake gate |
nalastasmādvanādgatvā krameṇa prāpa kośalān || 351 ||
[Analyze grammar]

kośalādhipates tatra ṛtuparṇasya bhūpateḥ |
sa hrasvabāhunāmā sansūdatvaṃ śiśriye gṛhe || 352 ||
[Analyze grammar]

bhojanāni ca yat tasya cakre divyarasāni saḥ |
tena prasiddhiṃ prāpātra rathavijñānatas tathā || 353 ||
[Analyze grammar]

tatrasthe hrasvabāhvākhye nale tasmin kadācana |
vidarbharājacāreṣu teṣv eko 'tra kilāyayau || 354 ||
[Analyze grammar]

hrasvabāhuritīhāsti svavidyārathavidyayoḥ |
nalatulyo navaḥ sūda iti cāro 'tra so 'śṛṇot || 355 ||
[Analyze grammar]

nalaṃ saṃbhāvya taṃ buddhyā cāsthāne nṛpateḥ sthitam |
yuktyā sa tatra gatvaitāṃ papāṭhāryāṃ prabhūditām || 356 ||
[Analyze grammar]

bālāṃ vane prasuptāṃ nṛśaṃsa saṃtyajya kumudinīkāntām |
prāpyaivāmbarakhaṇḍaṃ candrādṛśyaḥ kva yāto 'si || 357 ||
[Analyze grammar]

tac chrutvonmattavākhyābhaṃ tatrasthā avajajñire |
sūdacchadmasthitastvatra sa nalaḥ pratyuvāca tam || 358 ||
[Analyze grammar]

kṣīṇo 'mbaraikadeśaṃ candraḥ prāpyānyamaṇḍalaṃ praviśan |
kumudinyā yadadṛśyo jātastatkā nṛśaṃsatā tasya || 359 ||
[Analyze grammar]

etattaduttaraṃ śrutvā satyaṃ saṃbhāvya taṃ nalam |
vipadudbhūtavair ūpyaṃ cāraḥ so 'tha yayau tataḥ || 360 ||
[Analyze grammar]

vidarbhān prāpya bhīmāya rājñe bhāryāyutāya saḥ |
damayantyai ca tatsarvaṃ dṛṣṭaśrutam avarṇayat || 361 ||
[Analyze grammar]

tato 'tra damayantī sā pitaraṃ svair am abravīt |
niḥsaṃdehaṃ sa evāryaputraḥ sūdamiṣaṃ śritaḥ || 362 ||
[Analyze grammar]

tattadānayane yuktirmanmatā kriyatāmiha |
ṛtuparṇasya nṛpates tasya dūto visṛjyatām || 363 ||
[Analyze grammar]

prāptamātraś ca taṃ bhūpamevaṃ tatra bravītu saḥ |
gataḥ kvāpi nalo rājā pravṛttirnāsya budhyate || 364 ||
[Analyze grammar]

tatprātaḥ kurute bhūyo damayantī svayaṃvaram |
ato 'dyaiva vidarbheṣu śighramāgamyatāmiti || 365 ||
[Analyze grammar]

tataḥ śrutaitadvārtena sa rathajñāninā nṛpaḥ |
ekāhenāryaputreṇa sākaṃ dhruvam ihaiṣyati || 366 ||
[Analyze grammar]

evaṃ sapitṛkālocya saṃdiśya ca tathaiva sā |
kośalānvyasṛjaddūtaṃ damayantī yathocitam || 367 ||
[Analyze grammar]

tenartuparṇo gatvā sa tathaivoktaḥ samutsukaḥ |
jagāda sūdarūpaṃ taṃ praṇayātpārśvagaṃ nalam || 368 ||
[Analyze grammar]

hrasvabāho rathajñānaṃ mamāstītyavadadbhavān |
tatprāpaya vidarbhānmāmadyaivotsahase yadi || 369 ||
[Analyze grammar]

tac chrutvaiva nalo bāḍhaṃ prāpayāmītyudīrya saḥ |
gatvā varāśvān saṃyojya sajjaṃ cakre rathottamam || 370 ||
[Analyze grammar]

svayaṃvarapravādo 'yaṃ jāne matprāptaye tayā |
kṛto na damayantī tu sā svapne 'pīdṛśī bhavet || 371 ||
[Analyze grammar]

tat tatra tāvad gacchāmi paśyāmīti vicintya saḥ |
rājñas tasyartuparṇasya sajjaṃ ratham upānayat || 372 ||
[Analyze grammar]

ārūḍhe ca nṛpe tasmiṃstaṃ saṃvāhayituṃ ratham |
nalaḥ pravavṛte tārkṣyajavajaitreṇa raṃhasā || 373 ||
[Analyze grammar]

rathavegacyutaṃ vastraṃ prāptaṃ rathavidhāraṇam |
bruvāṇamatha mārge tamṛtuparṇaṃ nalo 'bravīt || 374 ||
[Analyze grammar]

rājan kva tava tadvastram anenaiva kṣaṇena hi |
bahūni yojanāny eṣa vyatikrānto rathas tava || 375 ||
[Analyze grammar]

śrutvaitadṛtuparṇastamavādīdaṅga dehi me |
rathajñānamidaṃ tubhyamakṣajñānaṃ dadāmy aham || 376 ||
[Analyze grammar]

yena vaśya bhavantyakṣāḥ saṃkhyājñānaṃ ca jāyate |
saṃpratyeva ca paśyātra vadāmi pratyayaṃ tava || 377 ||
[Analyze grammar]

dṛśyate 'gre taruryo 'yaṃ saṃkhyāmetasya te 'dhunā |
vacmyahaṃ phalaparṇānāṃ gaṇayitvā ca paśya tām || 378 ||
[Analyze grammar]

ity uktvā phalaparṇāni yāvantyeva jagāda saḥ |
nalena gaṇitānyāsaṃstāvantyevātra śākhinaḥ || 379 ||
[Analyze grammar]

tato nalo rathajñānamṛtuparṇāya taddadau |
ṛtuparṇo 'py adādakṣajñānaṃ tasmai nalāya tat || 380 ||
[Analyze grammar]

parīkṣate sma tajjñānaṃ nalo gatvāpare tarau |
samyak ca bubudhe saṃkhyā pattrādiṣv atra tena sā || 381 ||
[Analyze grammar]

tato hṛṣyati yāvat sa tāvattasya śarīrataḥ |
niragātpuruṣaḥ kṛṣṇastaṃ sa ko 'sīti pṛṣṭavān || 382 ||
[Analyze grammar]

ahaṃ kaliḥ śarīrāntardamayantīvṛtasya te |
īrṣyayā prāviśaṃ tena bhraṣṭā dyūtena te śriyaḥ || 383 ||
[Analyze grammar]

tatastvāṃ daśatā tena kārkoṭena tadā vane |
na dagdhastvamahaṃ tveṣa paśya dagdhastvayi sthitaḥ || 384 ||
[Analyze grammar]

mithyā parāpakāro hi kṛtaḥ syātkasya śarmaṇe |
tadgacchāmyavakāśo hi nāstyanyeṣu na vatsa me || 385 ||
[Analyze grammar]

ity uktvā sa kalis tasya tiro 'bhūtso 'pi tatkṣaṇam |
jātadharmamatiḥ prāptatejāḥ prāgvadabhūnnalaḥ || 386 ||
[Analyze grammar]

āgatya cāruhya rathaṃ tasminnevāhni taṃ javāt |
vidarbhānṛtuparṇaṃ taṃ prāpayām āsa bhūpatim || 387 ||
[Analyze grammar]

sa copahasyamāno 'tra pṛṣṭāgamanakāraṇaiḥ |
ṛtuparṇo janai rājagṛhāsanne samāvasat || 388 ||
[Analyze grammar]

prāptaṃ taṃ tatra buddhvā sā śrutāścaryarathasvanā |
damayantī jaharṣāntaḥ saṃbhāvitanalāgamā || 389 ||
[Analyze grammar]

visasarjātha sā tattvamanveṣṭuṃ ceṭikāṃ nijām |
sā cānviṣyāgatā ceṭī tām uvāca priyotsukām || 390 ||
[Analyze grammar]

devi gatvā mayānviṣṭameṣa yaḥ kośaleśvaraḥ |
svayaṃvarapravādaṃ te mithyā śrutvā kilāgataḥ || 391 ||
[Analyze grammar]

ānīto rathavāhena sūdena hrasvabāhunā |
ekenaiva dinenādya rathavijñānaśālinā || 392 ||
[Analyze grammar]

sa ca tatsūdaśālāyāṃ gatvā sūdo mayekṣitaḥ |
kṛṣṇavarṇo virūpaś ca prabhāvaḥ ko'pi tasya tu || 393 ||
[Analyze grammar]

akṣiptam eva yat tasya pānīyaṃ caruṣūdgatam |
kāṣṭhānyanarpitāgnīti svayaṃ prajvalitāni ca || 394 ||
[Analyze grammar]

kṣaṇāc ca bhojanaistaistair niṣpannaṃ divyam eva ca |
etaddṛṣṭvā mahāścaryaṃ tataścāhamihāgatā || 395 ||
[Analyze grammar]

etacceṭīmukhāc chrutvā damayantī vyacintayat |
vaśyāgnivaruṇaḥ sūdo rathavidyārahasyavit || 396 ||
[Analyze grammar]

āryaputro bhavatyeṣa gato vairūpyamanyathā |
jāne madviprayogārtaṃ jijñāse 'haṃ tadapyamum || 397 ||
[Analyze grammar]

iti saṃkalpya yuktyā svau saha ceṭyā tayaiva sā |
tasyāntikaṃ darśayituṃ prāhiṇoddārakāvubhau || 398 ||
[Analyze grammar]

sa tau nijaśiśū dṛṣṭvā kṛtvā cāṅke nalaściram |
baddhadhārāpravāheṇa tūṣṇīmarudadaśruṇā || 399 ||
[Analyze grammar]

īdṛśāveva me bālau mātāmahagṛhe sthitau |
jātaṃ me tatsmṛterduḥkhamity uvāca ca ceṭikām || 400 ||
[Analyze grammar]

sā śiśubhyāṃ sahāgatya ceṭī sarvaṃ śaśaṃsa tat |
damayantyai tataḥ sāpi jātāsthā sutarāmabhūt || 401 ||
[Analyze grammar]

apareyuś ca tāṃ prātaḥ svaceṭīmādideśa sā |
gatvā tamṛtuparṇasya sūdaṃ madvacanādvada || 402 ||
[Analyze grammar]

śrutaṃ mayā yadbhavatā tulyo nānyo 'sti sūpakṛt |
tanmamādya tvayāgatya vyañjanaṃ sādhyatāmiti || 403 ||
[Analyze grammar]

tatheti sa tadā gatvā nalaśceṭyā tayārthitaḥ |
ṛtuparṇamanujñāpya damayantīm upāyayau || 404 ||
[Analyze grammar]

satyaṃ brūhi nalo rājā yadi tvaṃ sūdarūpabhṛt |
cintābdhimagnāṃ pāraṃ māṃ prāpayādyetyuvāca sā || 405 ||
[Analyze grammar]

tac chrutvā sa nalaḥ snehaharṣaduḥkhatrapākulaḥ |
avāṅmukhaḥ prāptakālaṃ tām uvācāśrugadgadam || 406 ||
[Analyze grammar]

sa evāsmi nalaḥ satyaṃ pāpaḥ kuliśakarkaśaḥ |
tvāṃ saṃtāpayatā yena vyamohādanalāyitam || 407 ||
[Analyze grammar]

ity uktavān sa pṛṣṭo 'bhūddamayantyā tayā nalaḥ |
yadyevaṃ tarhyarūpatvaṃ kathaṃ prāpto bhavāniti || 408 ||
[Analyze grammar]

tataḥ sa tasyai svodantaṃ nalaḥ kṛtsnamavarṇayat |
kārkoṭasakhyād ārabhya kalinirgamanāvadhim || 409 ||
[Analyze grammar]

tadaiva cāgniśaucaṃ taddattaṃ kārkoṭakena saḥ |
prāvṛtya vastrayugalaṃ rūpaṃ svaṃ pratyapadyata || 410 ||
[Analyze grammar]

dṛṣṭvā nalaṃ punaravāptanijābhir āmarūpaṃ tamāśu vikasadvadanāravindā |
netrāmbubhiḥ śamitaduḥkhadavānaleva harṣaṃ kam apy anupamaṃ damayantyavāpa || 411 ||
[Analyze grammar]

buddhvā ca tatparijanātpramadapravṛttād āgatya tatra sahasā sa vidarbharājaḥ |
bhīmo nalaṃ samabhinandya kṛtānurūpapūjaṃ mahotsavamayaṃ svapuraṃ cakāra || 412 ||
[Analyze grammar]

hasatā hṛdi bhīmabhūbhujā kṛtasaṃvṛttyupacārasatkriyaḥ |
ṛtuparṇanṛpo 'pi taṃ nalaṃ pratipūjyātha jagāma kośalān || 413 ||
[Analyze grammar]

atha niṣadhanareśvaro nijaṃ kalidaurātmyavijṛmbhitaṃ nalaḥ |
śvaśurāya sa tatra varṇayann avasat prāṇasamāsakhaḥ sukham || 414 ||
[Analyze grammar]

gatvālpaiś ca dinais tataḥ sa niṣadhānsainyaiḥ saha śvāśurair akṣajñānajitaṃ vidhāya vinataṃ taṃ puṣkarākhyaṃ punaḥ |
dharmātmā kṛtasaṃvibhāgamanujaṃ dehādgatadvāparaṃ rājyaṃ svaṃ damayantyavāptisukhito bheje yathāvannalaḥ || 415 ||
[Analyze grammar]

iti sa vyākhyāya kathāṃ nagare tārāpure dvijaḥ sumanāḥ |
rājasutāṃ bandhumatīṃ proṣitapatikām uvāca tāṃ bhūyaḥ || 416 ||
[Analyze grammar]

evaṃ devi mahānto viṣahya duḥkhaṃ bhajanti kalyāṇam |
anubhūyāstamanaṃ kila dinakṛtpramukhā vrajantyudayam || 417 ||
[Analyze grammar]

tasmātvam apitamāpsyasi patimanaghe proṣitāgataṃ nacirāt |
kuru dhṛtimaratiṃ parihara vihara ca patikāmanālābhaiḥ || 418 ||
[Analyze grammar]

iti taṃ dvijamuktayuktavākyaṃ bahunābhyasrcya dhanena sadguṇaṃ sā |
avalambya dhṛtiṃ pratīkṣamāṇā dayitaṃ bandhumatī svamatra tasthau || 419 ||
[Analyze grammar]

alpair eva ca tasyā dinaiḥ sa patirāyayau mahīpālaḥ |
deśāntare sthitāṃ tāṃ jananīmādāya pitṛsahitaḥ || 420 ||
[Analyze grammar]

āgatya cāmṛtāṃśuḥ pārvaṇa iva vārirāśijalalakṣmīm |
jananayanotsavadāyī bandhumatīṃ nandayāmāsa || 421 ||
[Analyze grammar]

aha tatra tayā sahitas tatpitrā pūrvadattarājyadhuraḥ |
sa mahīpālo bubhuje rājā sann īpsitān bhogān || 422 ||
[Analyze grammar]

ityātmamantrimarubhūtimukhānniśamya citrāṃ kathāmanupamāmanurāgaramyām |
rāmāsakhaḥ sa naravāhanadattadevo vatseśvarasya tanayo bhṛśamabhyatuṣyat || 423 ||
[Analyze grammar]

Other print editions:

Also see the following print editions of the Sanskrit text or (alternative) English translations of the Kathasaritsagara Chapter 6

Cover of edition (2014)

The Ocean of Story
by C.H. Tawney (2014)

Being C.H. Tawney's Translation of Somadeva's Katha Sarit Sagara (Kathasaritsagara): (Ten Volumes)

Buy now!
Cover of edition (2005)

Kathasaritsagar
by Kedarnath Sharma Saraswat (2005)

The Only Edition with the Sanskrit Text and its Hindi Translation (An Old and Rare Book) Set of 3 Vol.

Buy now!
Cover of edition (2013)

Kathasaritsagara of Somadeva Bhatta (Sanskrit Text Only)
by Vasudeva Laksmana Sastri (2013)

Buy now!
Cover of edition (1995)

Katha Sarit Sagar in Marathi
by H. A Bhave (1995)

Set of 5 Volumes; Published by Varada Books, Pune. 2256 pages (Throughout B/W Illustrations).

Buy now!
Cover of edition (2014)

Katha Sarit Sagara (Tamil)
by S. V. Ganapati (எஸ். வி. கணபதி) (2014)

[கதா சரித் சாகரம்] Published by Alliance Publications.

Buy now!
Cover of Bengali edition

Galpa Shono
by Abhijit Chattopadhyay (2014)

[গল্প শোনো] Galpa Shono: Bengali Translation of 'Suno Kahani From Katha Sarit Sagar'; 9788126015436; Published by Sahitya Akademi, Delhi.

Buy now!
Like what you read? Consider supporting this website: