Chapter 6

tataḥ sa senāviśrāntyai tatra lāvāṇake sthitaḥ |
rahasy uvāca vatseśo rājā yaugandharāyaṇam || 1 ||
[Analyze grammar]

tvadbuddhyā nirjitāḥ sarve pṛthivyāṃ bhūbhṛto mayā |
upāyasvīkṛtās te ca naiva vyabhicaranti me || 2 ||
[Analyze grammar]

vārāṇasīpatis tv eṣa brahmadatto durāśayaḥ |
jāne vyabhicaraty eko viśvāsaḥ kuṭileṣu kaḥ || 3 ||
[Analyze grammar]

iti vatseśvareṇokta āha yaugandharāyaṇaḥ |
na rājan brahmadattas te bhūyo vyabhicariṣyati || 4 ||
[Analyze grammar]

ākrāntopanatas tv eṣa bhṛśaṃ saṃmānitas tvayā |
śubhācārasya kaḥ kuryād aśubhaṃ hi sacetanaḥ || 5 ||
[Analyze grammar]

kurvīta vā yas tasyaiva tadātmany aśubhaṃ bhavet |
tathā ca śrūyatām atra kathāṃ te varṇayāmy aham || 6 ||
[Analyze grammar]

babhūva padmaviṣaye purā ko'pi dvijottamaḥ |
khyātimān agnidattākhyo bhūbhṛddattāgrahārabhuk || 7 ||
[Analyze grammar]

tasyaikaḥ somadattākhyaḥ putro jyāyān ajāyata |
dvitīyaś cābhavad vaiśvānaradattākhyayā sutaḥ || 8 ||
[Analyze grammar]

ādyas tayor abhūn mūrkhaḥ svākṛtir durvinītakaḥ |
aparaś cābhavad vidvān vinīto 'dhyayanapriyaḥ || 9 ||
[Analyze grammar]

kṛtadārāv ubhau tau ca pitary astaṃ gate tataḥ |
tadīyasyāgrahārāder ardham ardhaṃ vibhejatuḥ || 10 ||
[Analyze grammar]

tanmadhyāt sa kanīyāṃś ca rājñā saṃmānito 'bhavat |
jyeṣṭhas tu somadatto 'bhūc capalaḥ kṣatrakarmakṛt || 11 ||
[Analyze grammar]

ekadā baddhagoṣṭhīkaṃ śūdraiḥ saha vilokya tam |
somadattaṃ pitṛsuhṛddvijaḥ ko 'py evam abravīt || 12 ||
[Analyze grammar]

agnidattasuto bhūtvā śūdravan mūrkha ceṣṭase |
nijam evānujaṃ dṛṣṭvā rājapūjyaṃ na lajjase || 13 ||
[Analyze grammar]

tac chrutvā kupitaḥ so 'tha somadattaḥ pradhāvya tam |
vipraṃ pādaprahāreṇa jaghānojjhitagauravaḥ || 14 ||
[Analyze grammar]

tatra vipraḥ sa kṛtvānyān sākṣiṇas tatkṣaṇaṃ dvijān |
gatvā pādāhatikruddho rājānaṃ taṃ vyajijñapat || 15 ||
[Analyze grammar]

rājāpi somadattasya bandhāya prāhiṇod bhaṭān |
te ca nirgatya tanmittrair jaghnire śastrapāṇibhiḥ || 16 ||
[Analyze grammar]

tato bhūyo balaṃ preṣyāvaṣṭabdhasyāsya bhūpatiḥ |
krodhāndhaḥ somadattasya śūlāropaṇam ādiśat || 17 ||
[Analyze grammar]

āropyamāṇaḥ śūlāyām athākasmāt sa ca dvijaḥ |
prakṣipta iva kenāpi nipapāta tataḥ kṣitau || 18 ||
[Analyze grammar]

rakṣanti bhāvi kalyāṇaṃ bhāgyāny eva yato 'sya te |
andhībabhūvur vadhakāḥ punar āropaṇodyatāḥ || 19 ||
[Analyze grammar]

tatkṣaṇaṃ śrutavṛttāntas tuṣṭo rājā kanīyasā |
bhrātrāsya kṛtavijñaptir vadhād enam amocayat || 20 ||
[Analyze grammar]

tato maraṇanistīrṇaḥ somadatto gṛhaiḥ saha |
gantuṃ rājāvamānena deśāntaram iyeṣa saḥ || 21 ||
[Analyze grammar]

yadā ca naicchan gamanaṃ sametās tasya bāndhavāḥ |
tyaktarājāgrahārārdhāṃ pratipede tadā sthitim || 22 ||
[Analyze grammar]

tato vṛttyantarābhāvāt kartuṃ sa cakame kṛṣim |
tadyogyāṃ ca bhuvaṃ draṣṭuṃ śubhe 'hany aṭavīṃ yayau || 23 ||
[Analyze grammar]

tatra lebhe śubhāṃ bhūmiṃ saṃbhāvya phalasaṃpadam |
tanmadhye ca mahābhogam aśvatthatarum aikṣata || 24 ||
[Analyze grammar]

taṃ kalyāṇaghanacchāyāc channasūryāṃśuśītalam |
prāvṛṭkālam ivālokya kṛṣyarthī toṣam āpa saḥ || 25 ||
[Analyze grammar]

yo 'dhiṣṭhātātra tasyaiva bhakto 'smīty abhidhāya ca |
kṛtapradakṣiṇo 'śvatthavṛkṣaṃ taṃ praṇanāma saḥ || 26 ||
[Analyze grammar]

saṃyojyātha balīvardayugaṃ racitamaṅgalaḥ |
kṛtvā baliṃ tasya taror ārebhe kṛṣim atra saḥ || 27 ||
[Analyze grammar]

tasthau tasyaiva cādhastād drumasya sa divāniśam |
bhojanaṃ tasya cāninye tatraiva gṛhiṇī sadā || 28 ||
[Analyze grammar]

kāle tatra ca pakveṣu tasya sasyeṣv aśaṅkitam |
sā bhūmiḥ pararāṣṭreṇa daivād etya vyaluṇṭhyata || 29 ||
[Analyze grammar]

tataḥ parabale yāte naṣṭe sasye sa sattvavān |
āśvāsya rudatīṃ bhāryāṃ kiṃcic cheṣaṃ tadādadau || 30 ||
[Analyze grammar]

prāgvat kṛtabalis tasthau tatraivātha taror adhaḥ |
nisargaḥ sa hi dhīrāṇāṃ yad āpady adhikaṃ dṛḍhāḥ || 31 ||
[Analyze grammar]

atha cintāvinidrasya sthitasyaikākino niśi |
tasyāśvatthataros tasmād uccacāra sarasvatī || 32 ||
[Analyze grammar]

bhoḥ somadatta tuṣṭo 'smi tava tad gaccha bhūpateḥ |
ādityaprabhasaṃjñasya rāṣṭraṃ śrīkaṇṭhadeśagam || 33 ||
[Analyze grammar]

tatra tasyānavarataṃ dvāradeśe mahīpateḥ |
vadeḥ paṭhitvā saṃdhyāgnihotramantrān idaṃ vacaḥ || 34 ||
[Analyze grammar]

phalabhūtir ahaṃ nāmnā vipraḥ śṛṇuta vacmi yat |
bhadrakṛt prāpnuyād bhadram abhadraṃ cāpy abhadrakṛt || 35 ||
[Analyze grammar]

evaṃ vadaṃś ca tatra tvaṃ mahatīm ṛddhim āpsyasi |
saṃdhyāgnihotramantrāṃś ca matta eva paṭhādhunā || 36 ||
[Analyze grammar]

ahaṃ ca yakṣa ity uktvā svaprabhāveṇa tatkṣaṇam |
tam adhyāpya ca tān mantrān vaṭe vāṇī tirodadhe || 37 ||
[Analyze grammar]

prātaḥ sa somadattaś ca pratasthe bhāryayā saha |
phalabhūtir iti prāpya nāma yakṣakṛtaṃ kṛtī || 38 ||
[Analyze grammar]

atikramyāṭavīs tās tā viṣamāḥ parivartinīḥ |
durdaśā iva saṃprāpa śrīkaṇṭhaviṣayaṃ ca saḥ || 39 ||
[Analyze grammar]

tatra saṃdhyāgnikāryādi paṭhitvā dvāri bhūpateḥ |
yathāvan nāma saṃśrāvya phalabhūtir iti svakam || 40 ||
[Analyze grammar]

so 'vādīd bhadrakṛd bhadram abhadraṃ cāpy abhadrakṛt |
prāpnuyād iti lokasya kautukotpādakaṃ vacaḥ || 41 ||
[Analyze grammar]

muhuś ca tadvadantaṃ taṃ tatrādityaprabho nṛpaḥ |
buddhvā praveśayām āsa phalabhūtiṃ kutūhalī || 42 ||
[Analyze grammar]

so 'pi praviśya tasyāgre tad eva muhur abravīt |
jahāsa tena sa nṛpas tadā pārśvasthitaiḥ saha || 43 ||
[Analyze grammar]

sasāmantaś ca vastrāṇi dattvā cābharaṇāni saḥ |
grāmān rājā dadau tasmai na toṣo mahatāṃ mṛṣā || 44 ||
[Analyze grammar]

evaṃ ca tatkṣaṇaṃ prāpa guhyakānugraheṇa saḥ |
phalabhūtiḥ kṛśo bhūtvā vibhūtiṃ bhūbhṛdarpitām || 45 ||
[Analyze grammar]

sadā tad eva ca vadan pūrvoktaṃ prāpa bhūpateḥ |
vāllabhyam īśvarāṇāṃ hi vinodarasikaṃ manaḥ || 46 ||
[Analyze grammar]

kramād rājagṛhe cāsmin rāṣṭreṣv antaḥpureṣu ca |
rājapriya iti prītiṃ bahumānām avāpa saḥ || 47 ||
[Analyze grammar]

kadācid atha so 'ṭavyāḥ kṛtvākheṭakam āgataḥ |
ādityaprabhabhūpālaḥ sahasāntaḥpuraṃ yayau || 48 ||
[Analyze grammar]

dvāḥsthasaṃbhramasāśaṅkaḥ praviśyaiva dadarśa saḥ |
devīṃ devārcanavyagrāṃ nāmnā kuvalayāvalīm || 49 ||
[Analyze grammar]

digambarām ūrdhvakeśīṃ nimīlitavilocanām |
sthūlasindūratilakāṃ japaprasphuritādharām || 50 ||
[Analyze grammar]

vicitravarṇakanyastamahāmaṇḍalamadhyagām |
asṛksurāmahāmāṃsakalpitograbalikriyām || 51 ||
[Analyze grammar]

sāpi praviṣṭe nṛpatau saṃbhramākalitāṃśukā |
tena pṛṣṭā kṣaṇād evam avocad yācitābhayā || 52 ||
[Analyze grammar]

tadaivodayalābhārthaṃ kṛtavaty asmi pūjanam |
atra cāgamavṛttāntaṃ siddhiṃ ca śṛṇu me prabho || 53 ||
[Analyze grammar]

purāhaṃ pitṛveśmasthā kanyā madhumahotsave |
evam uktā vayasyābhiḥ sametyodyānavartinī || 54 ||
[Analyze grammar]

astīha pramadodyāne tarumaṇḍalamadhyagaḥ |
dṛṣṭaprabhāvo varado devadevo vināyakaḥ || 55 ||
[Analyze grammar]

tam upāgatya bhaktyā tvaṃ pūjaya prārthitapradam |
yena nirvighnam evāśu svocitaṃ patim āpsyasi || 56 ||
[Analyze grammar]

tac chrutvā paryapṛcchyanta sakhyas tā maugdhyato mayā |
kanyā labhante bhartāraṃ kiṃ vināyakapūjayā || 57 ||
[Analyze grammar]

atha tāḥ pratyavocan māṃ kim etāvat tvayocyate |
tasminn apūjite nāsti siddhiḥ kāpīha kasya cit || 58 ||
[Analyze grammar]

tathā caitatprabhāvaṃ te varṇayāmo vayaṃ śṛṇu |
ity uktvā ca vayasyā me kathām akathayann imām || 59 ||
[Analyze grammar]

purā purāres tanayaṃ senānyaṃ prāptum icchati |
tārakopadrute śakre dagdhe ca kusumāyudhe || 60 ||
[Analyze grammar]

ūrdhvaretasam atyugraṃ sudīrghatapasi sthitam |
gaurī kṛtatapāḥ prārthya prāpya ca tryambakaṃ patim || 61 ||
[Analyze grammar]

ācakāṅkṣa sutaprāptiṃ madanasya ca jīvitam |
na ca sasmāra siddhyarthaṃ sā vighneśvarapūjanam || 62 ||
[Analyze grammar]

abhīṣṭābhyarthinīṃ tāṃ ca kāntām ity avadac chivaḥ |
priye prajāpateḥ pūrvaṃ mānasād ajani smaraḥ || 63 ||
[Analyze grammar]

kaṃ darpayāmīti madāj jātamātro jagāda ca |
tena kaṃdarpanāmānaṃ taṃ cakāra caturmukhaḥ || 64 ||
[Analyze grammar]

atidṛpto 'si cet putra tat trinetrasya laṅghanam |
ekasya rakṣer mā nāma mṛtyuṃ tasmād avāpsyasi || 65 ||
[Analyze grammar]

itthaṃ ca vedhasokto 'pi saṃkṣobhāyāgataḥ śaṭhaḥ |
mayā dagdho na tasyāsti sadehasyodbhavaḥ punaḥ || 66 ||
[Analyze grammar]

bhavatyās tu svaśaktyaiva putram utpādayāmy aham |
na hi me madanotsāhahetukā lokavat prajā || 67 ||
[Analyze grammar]

evaṃ vadata evāsya pārvatīṃ vṛṣalakṣmaṇaḥ |
āvirbabhūva purato brahmā śatamakhānvitaḥ || 68 ||
[Analyze grammar]

tena stutvā sa vijñaptas tārakāsuraśāntaye |
aṅgīcakre śivaḥ sraṣṭuṃ devyām ātmajam aurasam || 69 ||
[Analyze grammar]

anumene ca kāmasya janma cetasi dehinām |
sargavicchedarakṣārtham amūrtasyaiva tadgirā || 70 ||
[Analyze grammar]

dadau ca nijacitte 'pi so 'vakāśaṃ manobhuvaḥ |
tena tuṣṭo yayau dhātā mudaṃ prāpa ca pārvatī || 71 ||
[Analyze grammar]

tato yāteṣu divaseṣv ekadā rahasi sthitaḥ |
siṣeve suratakrīḍām umayā saha śaṃkaraḥ || 72 ||
[Analyze grammar]

yadā nābhūd ratānto 'sya gateṣv abdaśateṣv api |
tadā tadupamardena cakampe bhuvanatrayam || 73 ||
[Analyze grammar]

tato jagannāśabhayād ratavighnāya śūlinaḥ |
vahniṃ smaranti sma surāḥ pitāmahanideśataḥ || 74 ||
[Analyze grammar]

so 'py agniḥ smṛtamātraḥ sann adhṛṣyaṃ madanāntakam |
matvā palāyya devebhyaḥ praviveśa jalāntaram || 75 ||
[Analyze grammar]

tattejodahyamānāś ca tatra bhekā divaukasām |
vicinvatāṃ śaśaṃsus tam agnim antarjalasthitam || 76 ||
[Analyze grammar]

tatas tān anabhivyaktavācaḥ śāpena tatkṣaṇam |
bhekān kṛtvā tirobhūya bhūyo 'gnir mandaraṃ yayau || 77 ||
[Analyze grammar]

tatra taṃ koṭarāntasthaṃ devāḥ śambūkarūpiṇam |
prāpur gajaśukākhyātaṃ sa caiṣāṃ darśanaṃ dadau || 78 ||
[Analyze grammar]

kṛtvā jihvāviparyāsaṃ śāpena śukadantinām |
pratipede ca devānāṃ sa kāryaṃ taiḥ kṛtastutiḥ || 79 ||
[Analyze grammar]

gatvā ca svoṣmaṇā so 'gnir nivārya suratāc chivam |
śāpabhītyā praṇamyāsmai devakāryaṃ nyavedayat || 80 ||
[Analyze grammar]

śarvo 'py ārūḍhavego 'gnau tasmin vīryaṃ svam ādadhe |
tad dhi dhārayituṃ śakto na vahnir nāmbikāpi vā || 81 ||
[Analyze grammar]

na mayā tanayas tvattaḥ saṃprāpta iti vādinīm |
khedakopākulāṃ devīm ity uvāca tato haraḥ || 82 ||
[Analyze grammar]

vighno 'tra tava jāto 'yaṃ vinā vighneśapūjanam |
tad arcayainaṃ yenāśu vahnau no janitā sutaḥ || 83 ||
[Analyze grammar]

ity uktā śaṃbhunā devī cakre vighneśvarārcanam |
analo 'pi sagarbho 'bhūt tena vīryeṇa dhūrjaṭeḥ || 84 ||
[Analyze grammar]

tat tejaḥ śāṃbhavaṃ bibhrat sa tadā divaseṣv api |
antaḥpraviṣṭatigmāṃśur iva saptārcir ābabhau || 85 ||
[Analyze grammar]

udvavāma ca gaṅgāyāṃ tat tejaḥ so 'tha durdharam |
gaṅgainam atyajan merau vahnikuṇḍe harājñayā || 86 ||
[Analyze grammar]

tatra saṃrakṣyamāṇaḥ san sa garbhaḥ śāṃbhavair gaṇaiḥ |
niḥsṛtyābdasahasreṇa kumāro 'bhūt ṣaḍānanaḥ || 87 ||
[Analyze grammar]

tato gaurīniyuktānāṃ kṛttikānāṃ payodharān |
ṣaṇṇāṃ ṣaḍbhir mukhaiḥ pītvā svalpaiḥ sa vavṛdhe dinaiḥ || 88 ||
[Analyze grammar]

atrāntare devarājas tārakāsuranirjitaḥ |
śiśriye meruśṛṅgāṇi durgāṇy ujjhitasaṃgaraḥ || 89 ||
[Analyze grammar]

devāś ca sākam ṛṣibhiḥ ṣaṇmukhaṃ śaraṇaṃ yayuḥ |
ṣaṇmukho 'pi surān rakṣann āsīt taiḥ parivāritaḥ || 90 ||
[Analyze grammar]

tad buddhvā hāritaṃ matvā rājyam indro 'tha cakṣubhe |
yodhayām āsa gatvā ca kumāraṃ sa samatsaraḥ || 91 ||
[Analyze grammar]

tadvajrābhihatasyāṅgāt ṣaṇmukhasyodbabhūvatuḥ |
putrau śākhaviśākhākhyāv ubhāv atulatejasau || 92 ||
[Analyze grammar]

saputraṃ ca tam ākrāntaśatakratuparākramam |
upetya tanayaṃ śarvaḥ svayaṃ yuddhād avārayat || 93 ||
[Analyze grammar]

jāto 'si tārakaṃ hantuṃ rājyaṃ cendrasya rakṣitum |
tat kuruṣva nijaṃ kāryam iti cainaṃ śaśāsa saḥ || 94 ||
[Analyze grammar]

tataḥ praṇamya prītena tatkṣaṇaṃ vṛtravairiṇā |
saināpatyābhiṣeko 'sya kumārasyopacakrame || 95 ||
[Analyze grammar]

svayam utkṣiptakalaśastabdhabāhur abhūd yadā |
tataḥ śakraḥ śucam agād athainam avadac chivaḥ || 96 ||
[Analyze grammar]

na pūjito gajamukhaḥ senānyaṃ vāñchatā tvayā |
tenaiṣa vighno jātas te tat kuruṣva tadarcanam || 97 ||
[Analyze grammar]

tac chrutvā tat tathā kṛtvā muktabāhuḥ śacīpatiḥ |
abhiṣekotsavaṃ samyak senānye niravartayat || 98 ||
[Analyze grammar]

tato jaghāna na cirāt senānīs tarakāsuram |
nananduḥ siddhakāryāś ca devā gaurī ca putriṇī || 99 ||
[Analyze grammar]

tad evaṃ devi devānām api santi na siddhayaḥ |
herambe 'narcite tasmāt pūjayainaṃ varārthinī || 100 ||
[Analyze grammar]

ity uktāhaṃ vayasyābhir udyānaikāntavartinam |
āryaputra purā gatvā vighnarājam apūjayam || 101 ||
[Analyze grammar]

pūjāvasāne cāpaśyam akasmād gaganāṅgaṇe |
utpatya viharantīs tāḥ svasakhīr nijasiddhitaḥ || 102 ||
[Analyze grammar]

tad dṛṣṭvā kautukād vyomnaḥ samāhūyāvatārya ca |
mayā siddhisvarūpaṃ tāḥ pṛṣṭāḥ sadyo 'bruvann idam || 103 ||
[Analyze grammar]

imā nṛmāṃsāśanajā ḍākinīmantrasiddhayaḥ |
kālarātrir iti khyātā brāhmaṇī gurur atra naḥ || 104 ||
[Analyze grammar]

evaṃ sakhībhir uktāhaṃ khecarīsiddhilolubhā |
nṛmāṃsāśanabhītā ca kṣaṇam āsaṃ sasaṃśayā || 105 ||
[Analyze grammar]

atha tatsiddhilubdhatvād avocaṃ tāḥ sakhīr aham |
upadeśo mamāpy eṣa yuṣmābhir dāpyatām iti || 106 ||
[Analyze grammar]

tato madabhyarthanayā gatvā tatkṣaṇam eva tāḥ |
āninyuḥ kālarātriṃ tāṃ tatraiva vikaṭākṛtim || 107 ||
[Analyze grammar]

miladbhruvaṃ kātarākṣīṃ nyañcaccipiṭanāsikām |
sthūlagaṇḍīṃ karālauṣṭhīṃ danturāṃ dīrghakaṃdharām || 108 ||
[Analyze grammar]

lambastanīm udariṇīṃ vidīrṇotphullapādukām |
dhātrā vairūpyanirmāṇavaidagdhīṃ darśitām iva || 109 ||
[Analyze grammar]

sā māṃ pādānatāṃ snātāṃ kṛtavighneśvarārcanām |
vivastrāṃ maṇḍale bhīmāṃ bhairavārcām akārayat || 110 ||
[Analyze grammar]

abhiṣicya ca sā mahyaṃ tāṃs tān mantrān nijān dadau |
bhakṣaṇāya nṛmāṃsaṃ ca devārcanabalīkṛtam || 111 ||
[Analyze grammar]

āttamantragaṇā bhuktamahāmāṃsā ca tatkṣaṇam |
nirambaraivotpatitā sasakhīkāham ambaram || 112 ||
[Analyze grammar]

kṛtakrīḍāvatīryātha gaganād gurvanujñayā |
gatābhūvam ahaṃ deva kanyakāntaḥpuraṃ nijam || 113 ||
[Analyze grammar]

evaṃ bālye 'pi jātāhaṃ ḍākinīcakravartinī |
bhakṣitās tatra cāsmābhiḥ sametya bahavo narāḥ || 114 ||
[Analyze grammar]

asmin kathāntare caitāṃ mahārāja kathāṃ śṛṇu |
viṣṇusvāmīty abhūt tasyāḥ kālarātryāḥ patir dvijaḥ || 115 ||
[Analyze grammar]

sa ca tasminn upādhyāyo deśe nānādigāgatān |
śiṣyān adhyāpayām āsa vedavidyāviśāradaḥ || 116 ||
[Analyze grammar]

śiṣyamadhye ca tasyaiko nāmnā sundarako yuvā |
babhūva śiṣyaḥ śīlena virājitavapurguṇaḥ || 117 ||
[Analyze grammar]

tam upādhyāyapatnī sā kālarātrīḥ kadācana |
vavre rahasi kāmārtā patyau kvāpi bahir gate || 118 ||
[Analyze grammar]

nūnaṃ virūpair adhikaṃ hāsanaiḥ krīḍati smaraḥ |
yat sānavekṣya svaṃ rūpaṃ cakre sundarakaspṛhām || 119 ||
[Analyze grammar]

sa tu sarvātmanā naicchad arthyamāno 'pi viplavam |
striyo yathā viceṣṭantāṃ niṣkampaṃ tu satāṃ manaḥ || 120 ||
[Analyze grammar]

tataḥ sāpasṛte tasmin kālarātriḥ krudhā tadā |
svam aṅgaṃ pāṭayām āsa svayaṃ dantanakhakṣataiḥ || 121 ||
[Analyze grammar]

vikīrṇavastrakeśāntā rudatī tāvad āsta ca |
gṛhaṃ yāvad upādhyāyo viṣṇusvāmī viveśa saḥ || 122 ||
[Analyze grammar]

praviṣṭaṃ tam avādīc ca paśya sundarakeṇa me |
avasthā vihitā svāmin balātkārābhilāṣiṇā || 123 ||
[Analyze grammar]

tac chrutvā sa upādhyāyaḥ krudhā jajvāla tatkṣaṇam |
pratyayaḥ strīṣu muṣṇāti vimarśaṃ viduṣām api || 124 ||
[Analyze grammar]

sāyaṃ ca taṃ sundarakaṃ gṛhaprāptaṃ pradhāvya saḥ |
saśiṣyo muṣṭibhiḥ pādair laguḍaiś cāpy atāḍayat || 125 ||
[Analyze grammar]

kiṃ ca prahāraniśceṣṭaṃ śiṣyān ādiśya taṃ bahiḥ |
tyājayām āsa rathyāyāṃ nirapekṣatayā niśi || 126 ||
[Analyze grammar]

tataḥ śanaiḥ sundarakaḥ sa niśānilavījitaḥ |
tathābhibhūtam ātmānaṃ paśyann evam acintayat || 127 ||
[Analyze grammar]

aho strīpreraṇā nāma rajasā laṅghitātmanām |
puṃsāṃ vātyeva sarasām āśayakṣobhakāriṇī || 128 ||
[Analyze grammar]

yenāvicārya vṛddho 'pi vidvān api ca tat tathā |
atikrodhād upādhyāyo viruddham akaron mayi || 129 ||
[Analyze grammar]

athavā daivasaṃsiddhāv ā sṛṣṭer viduṣām api |
kāmakrodhau hi viprāṇāṃ mokṣadvārārgalāv ubhau || 130 ||
[Analyze grammar]

tathā hi kiṃ na munayaḥ svadārabhraṃśaśaṅkinaḥ |
devadāruvane pūrvam api śarvāya cakrudhuḥ || 131 ||
[Analyze grammar]

na cainaṃ vividur devaṃ kṛtakṣapaṇakākṛtim |
umāyai darśayiṣyantam ṛṣīṇām apy aśāntatām || 132 ||
[Analyze grammar]

dattaśāpāś ca te sadyas trijagatkṣobhakāraṇam |
buddhvā taṃ devam īśānaṃ tam eva śaraṇaṃ yayuḥ || 133 ||
[Analyze grammar]

tad evaṃ kāmakopādiripuṣaḍvargavañcitāḥ |
munayo 'pi vimuhyanti śrotriyeṣu kathaiva kā || 134 ||
[Analyze grammar]

iti sundarakas tatra dhyāyan dasyubhayān niśi |
āruhya śūnyagovāṭaharmye tasthau samīpage || 135 ||
[Analyze grammar]

tatraikadeśe yāvac ca kṣaṇaṃ tiṣṭhaty alakṣitaḥ |
tāvat tatraiva harmye sā kālarātrir upāyayau || 136 ||
[Analyze grammar]

ākṛṣṭavīracchurikā muktaphūtkārabhīṣaṇā |
nayanānanavāntolkā ḍākinīcakrasaṃgatā || 137 ||
[Analyze grammar]

tāṃ dṛṣṭvā tādṛśīṃ tatra kālarātrim upāgatām |
sasmāra mantrān rakṣoghnān bhītaḥ sundarako 'tha saḥ || 138 ||
[Analyze grammar]

tanmantramohitā cātha taṃ dadarśa na sā tadā |
bhayasaṃpiṇḍitair aṅgair ekānte nibhṛtasthitam || 139 ||
[Analyze grammar]

athotpatanamantraṃ sā paṭhitvā sasakhījanā |
kālarātriḥ sagovāṭaharmyaivodapatan nabhaḥ || 140 ||
[Analyze grammar]

taṃ ca mantraṃ sa jagrāha śrutvā sundarakas tadā |
saharmyā sāpi nabhasā kṣipram ujjayinīṃ yayau || 141 ||
[Analyze grammar]

tatrāvatārya harmyaṃ sā mantrataḥ śākavāṭake |
gatvā smaśāne cikrīḍa ḍākinīcakramadhyagā || 142 ||
[Analyze grammar]

tatkṣaṇaṃ ca kṣudhākrāntaḥ śākavāṭe 'vatīrya saḥ |
tatra sundarakaś cakre vṛttim utkhātamūlakaiḥ || 143 ||
[Analyze grammar]

kṛtakṣutpratighāte 'smin prāgvad govāṭam āśrite |
pratyāyayau kālarātrī rātrimadhye niketanāt || 144 ||
[Analyze grammar]

tato 'dhirūḍhagovāṭā pūrvavan mantrasiddhitaḥ |
ākāśena saśiṣyā sā niśi svagṛham āyayau || 145 ||
[Analyze grammar]

sthāpayitvā yathāsthānaṃ tac ca govāṭavāhanam |
visṛjyānucarīs tāś ca śayyāveśma viveśa sā || 146 ||
[Analyze grammar]

so 'pi sundarako nītvā tāṃ niśāṃ vighnavismitaḥ |
prabhāte tyaktagovāṭo nikaṭaṃ suhṛdāṃ yayau || 147 ||
[Analyze grammar]

tatrākhyātasvavṛttānto videśagamanonmukhaḥ |
taiḥ samāśvāsito mittrais tanmadhye sthitim agrahīt || 148 ||
[Analyze grammar]

upādhyāyagṛhaṃ tyaktvā bhuñjānaḥ sattrasadmani |
uvāsa tatra viharan svacchandaḥ sakhibhiḥ saha || 149 ||
[Analyze grammar]

ekadā nirgatā kretuṃ gṛhopakaraṇāni sā |
dadarśa taṃ sundarakaṃ kālarātriḥ kilāpaṇe || 150 ||
[Analyze grammar]

upetya ca jagādainaṃ punar eva smarāturā |
bhaja sundarakādyāpi māṃ tvadāyattajīvitām || 151 ||
[Analyze grammar]

evam uktas tayā so 'tha sādhuḥ sundarako 'bravīt |
maivaṃ vadīr na dharmo 'yaṃ mātā me gurupatny asi || 152 ||
[Analyze grammar]

tato 'bravīt kālarātrir dharmaṃ ced vetsi dehi tat |
prāṇān me prāṇadānād dhi dharmaḥ ko 'bhyadhiko bhavet || 153 ||
[Analyze grammar]

atha sundarako 'vādīn mātar maivaṃ kṛthā hṛdi |
gurutalpābhigamanaṃ kutra dharmo bhaviṣyati || 154 ||
[Analyze grammar]

evaṃ nirākṛtā tena tarjayantī ca taṃ ruṣā |
pāṭayitvā svahastena svottarīyam agād gṛham || 155 ||
[Analyze grammar]

paśya sundarakeṇedaṃ dhāvitvā pāṭitaṃ mama |
ity uvāca patiṃ tatra darśayitvottarīyakam || 156 ||
[Analyze grammar]

sa ca tasyāḥ patiḥ krodhād gatvā vadhyam udīrya ca |
sattre sundarakasyāśu vārayām āsa bhojanam || 157 ||
[Analyze grammar]

tataḥ sundarakaḥ khedāt taṃ deśaṃ tyaktum udyataḥ |
jānann utpatane vyomni mantraṃ govāṭaśikṣitam || 158 ||
[Analyze grammar]

tato 'varohe 'py aparaṃ śikṣitaṃ śrutavismṛtam |
tad eva śūnyagovāṭaharmyaṃ niśi punar yayau || 159 ||
[Analyze grammar]

tatra tasmin sthite prāgvat kālarātrir upetya sā |
tathaivotpatya harmyasthā vyomnaivojjayinīṃ yayau || 160 ||
[Analyze grammar]

tatrāvatārya mantreṇa govāṭaṃ śākavāṭake |
jagāma rātricaryāyai punaḥ sā pitṛkānanam || 161 ||
[Analyze grammar]

taṃ ca sundarako mantraṃ bhūyaḥ śrutvāpi nāgrahīt |
vinā hi gurvādeśena saṃpūrṇāḥ siddhayaḥ kutaḥ || 162 ||
[Analyze grammar]

tato 'tra bhuktvā katicin mūlakāny aparāṇi ca |
netuṃ prakṣipya govāṭe tatra tasthau sa pūrvavat || 163 ||
[Analyze grammar]

athaityārūḍhagovāṭā sā gatvā nabhasā niśi |
viveśa kālarātriḥ svaṃ sadma sthāpitavāhanā || 164 ||
[Analyze grammar]

so 'pi sundarakaḥ prātar govāṭān nirgatas tataḥ |
yayau bhojanamūlyārthī vipaṇīm āttamūlakaḥ || 165 ||
[Analyze grammar]

vikrīṇānasya tasyātra mūlakaṃ rājasevakāḥ |
mālavīyā vinā mūlyaṃ jahrur dṛṣṭvā svadeśajam || 166 ||
[Analyze grammar]

tataḥ sa kalahaṃ kurvan baddhvā suhṛdanudrutaḥ |
pāṣāṇaghatadāyīti rājāgraṃ tair anīyata || 167 ||
[Analyze grammar]

mālavāt katham ānīya kānyakubje 'tra mūlakam |
vikrīṇīṣe sadety eṣa pṛṣṭo 'smābhir na jalpati || 168 ||
[Analyze grammar]

hanti pratyuta pāṣāṇair ity uktas taiḥ śaṭhair nṛpaḥ |
taṃ tad adbhutam aprākṣīt tatas tatsuhṛdo 'bruvan || 169 ||
[Analyze grammar]

asmābhiḥ saha yady eṣa prāsādam adhiropyate |
tadaitat kautukaṃ deva kṛtsnaṃ jalpati nānyathā || 170 ||
[Analyze grammar]

tathety āropito rājñā saprāsādo 'sya paśyataḥ |
utpapāta sa mantreṇa sadyaḥ sundarako nabhaḥ || 171 ||
[Analyze grammar]

samitras tena gatvā ca prayāgaṃ prāpya ca kramāt |
śrāntaḥ kam api rājānaṃ snātaṃ tatra dadarśa saḥ || 172 ||
[Analyze grammar]

saṃstabhya cātra prāsādaṃ gaṅgāyāṃ khān nipatya ca |
vismayodvīkṣitaḥ sarvais taṃ sa rājānam abhyagāt || 173 ||
[Analyze grammar]

kas tvaṃ kiṃ cāvatīrṇo 'si gaganād iti śaṃsa naḥ |
rājñā prahveṇa pṛṣṭaḥ sann evaṃ sundarako 'bravīt || 174 ||
[Analyze grammar]

ahaṃ murajako nāma gaṇo devasya dhūrjaṭeḥ |
prāpto mānuṣabhogārthī tvatsakāśaṃ tadājñayā || 175 ||
[Analyze grammar]

tac chrutvā satyam āśaṅkya sasyāḍhyaṃ ratnapūritam |
sastrīkaṃ sopakaraṇaṃ dadau tasmai puraṃ nṛpaḥ || 176 ||
[Analyze grammar]

praviśyātha pure tasminn utpatya divi sānugaḥ |
ciraṃ sundarakaḥ svecchaṃ nirdainyaṃ vicacāra saḥ || 177 ||
[Analyze grammar]

śayāno hemaparyaṅke vījyamānaś ca cāmaraiḥ |
sevyamāno varastrībhir aindraṃ sukham avāpa saḥ || 178 ||
[Analyze grammar]

athaikadā dadau tasmai mantraṃ vyomāvarohaṇe |
siddhaḥ ko'pi kilākāśacārī saṃjātasaṃstavaḥ || 179 ||
[Analyze grammar]

prāptāvatāramantraḥ sa gatvā sundarakas tataḥ |
kānyakubje nije deśe vyomamārgād avātarat || 180 ||
[Analyze grammar]

sapuraṃ pūrṇalakṣmīkam avatīrṇaṃ nabhastalāt |
buddhvā tatra svayaṃ rājā kautukāt tam upāyayau || 181 ||
[Analyze grammar]

parijñātaś ca pṛṣṭaś ca rājāgre so 'tha kālavit |
kālarātrikṛtaṃ sarvaṃ svavṛttāntaṃ nyavedayat || 182 ||
[Analyze grammar]

tataś cānāyya papraccha kālarātriṃ mahīpatiḥ |
nirbhayā sāpy avinayaṃ svaṃ sarvaṃ pratyapadyata || 183 ||
[Analyze grammar]

kupite ca nṛpe tasyāḥ karṇau ca cchettum udyate |
sā gṛhītāpi paśyatsu sarveṣv eva tirodadhe || 184 ||
[Analyze grammar]

tataḥ svarāṣṭre vāso 'syās tatra rājñā nyaṣidhyata |
tatpūjitaḥ sundarakaḥ śiśriye ca nabhaḥ punaḥ || 185 ||
[Analyze grammar]

ity uktvā tatra bhartāram ādityaprabhabhūpatim |
ābhāṣata punaś cainaṃ rājñī kuvalayāvalī || 186 ||
[Analyze grammar]

bhavanty evaṃvidhā deva ḍākinīmantrasiddhayaḥ |
etac ca matpitur deśe vṛttaṃ sarvatra viśrutam || 187 ||
[Analyze grammar]

kālarātreś ca śiṣyāham ity ādau varṇitaṃ mayā |
pativratātvāt siddhis tu tato 'py abhyadhikā mama || 188 ||
[Analyze grammar]

bhavatā cādya dṛṣṭāhaṃ śreyo 'rthaṃ te kṛtārcanā |
upahārāya puruṣaṃ mantreṇākraṣṭum udyatā || 189 ||
[Analyze grammar]

tad asmadīye 'tra naye tvam api praviśādhunā |
siddhiyogajitānāṃ ca rājñāṃ mūrdhni padaṃ kuru || 190 ||
[Analyze grammar]

tac chrutvā kva mahāmāṃsabhojanaṃ ḍākinīnaye |
kva ca rājatvam ity uktvā sa rājā niṣiṣedha tat || 191 ||
[Analyze grammar]

prāṇatyāgodyatāyāṃ tu rājñyāṃ tat pratyapadyata |
viṣayākṛṣyamāṇā hi tiṣṭhanti supathe katham || 192 ||
[Analyze grammar]

tataḥ sā taṃ praveśyaiva maṇḍale pūrvapūjite |
gṛhītasamayaṃ santaṃ rājānam idam abravīt || 193 ||
[Analyze grammar]

ya eṣa phalabhūtyākhyaḥ sthito vipras tavāntike |
sa mayātropahārārtham ākraṣṭum upakalpitaḥ || 194 ||
[Analyze grammar]

ākarṣaṇaṃ ca sāyāsaṃ tat kaścit sūpakṛd varam |
naye 'tra sthāpyatāṃ yas taṃ svayaṃ hanti pacaty api || 195 ||
[Analyze grammar]

na kāryā ca ghṛṇā yasmāt tanmāsabalibhakṣaṇāt |
samāpite 'rcane pūrṇā siddhiḥ syād uttamo hi saḥ || 196 ||
[Analyze grammar]

ity uktaḥ priyayā rājā pāpabhīto 'pi tat punaḥ |
aṅgīcakāra dhig aho kaṣṭāṃ strīṣv anurodhitām || 197 ||
[Analyze grammar]

ānāyya sūpakāraṃ ca tataḥ sāhasikābhidham |
viśvāsya dīkṣitaṃ kṛtvā daṃpatī tau sahocatuḥ || 198 ||
[Analyze grammar]

rājā devīdvitīyo 'dya bhokṣyate tat tvarāṃ kuru |
āhārasyeti yo 'bhyetya tvāṃ brūyāt taṃ nipātayeḥ || 199 ||
[Analyze grammar]

tanmāṃsaiś ca rahaḥ kuryāḥ prātar nau svādu bhojanam |
iti sūpakṛd ādiṣṭas tathety uktvā gṛhaṃ yayau || 200 ||
[Analyze grammar]

prātaś ca phalabhūtiṃ taṃ prāptaṃ rājā jagāda saḥ |
gaccha sāhasikaṃ brūhi sūpakāraṃ mahānase || 201 ||
[Analyze grammar]

rājā devīdvitīyo 'dya bhokṣyate svādu bhojanam |
atas tvaritam āhāram uttamaṃ sādhayer iti || 202 ||
[Analyze grammar]

tatheti nirgataṃ taṃ ca phalabhūtiṃ bahis tadā |
etya candraprabho nāma rājñaḥ putro 'bravīd idam || 203 ||
[Analyze grammar]

anena śīghraṃ hemnā me kārayādyaiva kuṇḍale |
yādṛśe bhavatā pūrvam āryatātasya kārite || 204 ||
[Analyze grammar]

ity ukto rājaputreṇa phalabhūtis tadaiva saḥ |
kṛtānurodhaḥ prahito yayau kuṇḍalayoḥ kṛte || 205 ||
[Analyze grammar]

rājaputro 'py agāt svairaṃ kathitaṃ phalabhūtinā |
rājādeśaṃ gṛhītvā tam ekāky eva mahānasam || 206 ||
[Analyze grammar]

tatroktarājādeśaṃ taṃ sthitasaṃvit sa sūpakṛt |
rājaputraṃ churikayā sadyaḥ sāhasiko 'vadhīt || 207 ||
[Analyze grammar]

tanmāṃsaiḥ sādhitaṃ tena bhojanaṃ ca kṛtārcanau |
abhuñjātām ajānantau tattvaṃ rājñī nṛpas tathā || 208 ||
[Analyze grammar]

nītvā ca sānutāpas tāṃ rātriṃ rājā dadarśa saḥ |
prātaḥ kuṇḍalahastaṃ taṃ phalabhūtim upāgatam || 209 ||
[Analyze grammar]

bibhrāntaḥ kuṇḍaloddeśāt taṃ ca papraccha tatkṣaṇam |
tenākhyātasvavṛttāntaḥ papāta ca bhuvas tale || 210 ||
[Analyze grammar]

hā putreti ca cakranda nindan bhāryāṃ sahātmanā |
pṛṣṭaś ca sacivaiḥ sarvaṃ yathātattvam avarṇayat || 211 ||
[Analyze grammar]

uvāca caitad uktaṃ tat pratyahaṃ phalabhūtinā |
bhadrakṛt prāpnuyād bhadram abhadraṃ cāpy abhadrakṛt || 212 ||
[Analyze grammar]

kanduko bhittiniḥkṣipta iva pratiphalan muhuḥ |
āpataty ātmani prāyo doṣo 'nyasya cikīrṣitaḥ || 213 ||
[Analyze grammar]

pāpācārair yad asmābhir brahmahatyāṃ cikīrṣubhiḥ |
svaputraghātanaṃ kṛtvā prāptaṃ tanmāṃsabhakṣaṇam || 214 ||
[Analyze grammar]

ity uktvā bodhayitvā ca mantriṇaḥ svān adhomukhān |
tam eva phalabhūtiṃ ca nije rājye 'bhiṣicya saḥ || 215 ||
[Analyze grammar]

rājā pradattadānaḥ sann aputraḥ pāpaśuddhaye |
sabhāryaḥ praviveśāgniṃ dagdho 'py anuśayāgninā || 216 ||
[Analyze grammar]

phalabhūtiś ca tad rājyaṃ prāpya pṛthvīṃ śaśāsa saḥ |
evaṃ bhadram abhadraṃ vā kṛtam ātmani kalpyate || 217 ||
[Analyze grammar]

iti vatseśvarasyāgre kathayitvā kathām imām |
yaugandharāyaṇo bhūyo bhūpatiṃ tam abhāṣata || 218 ||
[Analyze grammar]

tasmāt tava sa rājendra jitvāpy ācarataḥ śubham |
brahmadatto vikurvīta yadi hanyās tvam eva tam || 219 ||
[Analyze grammar]

ity ukto mantrimukhyena tadvākyam abhinandya saḥ |
utthāya dinakartavyaṃ vatseśo niravartayat || 220 ||
[Analyze grammar]

anyedyuś ca sa saṃpannasarvadigvijayaḥ kṛtī |
lāvāṇakād udacalat kauśāmbīṃ svapurīṃ prati || 221 ||
[Analyze grammar]

krameṇa nagarīṃ prāpa kṣitīśaḥ saparicchadaḥ |
utpatākābhujalatāṃ nṛtyantīm utsavād iva || 222 ||
[Analyze grammar]

viveśa caināṃ paurastrīnayanotpalakānane |
vitanvānaḥ pratipadaṃ pravātārambhavibhramam || 223 ||
[Analyze grammar]

cāraṇodgīyamānaś ca stūyamānaś ca bandibhiḥ |
nṛpaiḥ praṇamyamānaś ca rājā mandiram āyayau || 224 ||
[Analyze grammar]

tato vinamreṣv adhiropya śāsanaṃ sa vatsarājo 'khiladeśarājasu |
pūrvaṃ nidhānādhigataṃ kulocitaṃ prasahya siṃhāsanam āruroha tat || 225 ||
[Analyze grammar]

tatkālamaṅgalasamāhatatāradhīra tūryāravapratiravaiś ca nabhaḥ pupūre |
tanmantrimukhyaparitoṣitalokapāla dattair iva pratidiśaṃ samasādhuvādaiḥ || 226 ||
[Analyze grammar]

vividham atha vitīrya vītalobho vasu vasudhāvijayārjitaṃ dvijebhyaḥ |
akṛta kṛtamahotsavaḥ kṛtārthaṃ kṣitipatimaṇḍalam ātmamantriṇaś ca || 227 ||
[Analyze grammar]

kṣetreṣu varṣati tadānuguṇaṃ narendre tasmin dhvanadghanamṛdaṅganināditāyām |
saṃbhāvya bhāvi bahudhānyaphalaṃ jano 'pi tasyāṃ puri pratigṛhaṃ vihitotsavo 'bhūt || 228 ||
[Analyze grammar]

evaṃ vijitya jagatīṃ sa kṛtī rumaṇvady augandharāyaṇaniveśitarājyabhāraḥ |
tasthau yatheccham atha vāsavadattayātra padmāvatīsahitayā saha vatsarājaḥ || 229 ||
[Analyze grammar]

kīrtiśriyor iva tayor ubhayoś ca devyor madhyasthitaḥ sa varacāraṇagīyamānaḥ |
candrodayaṃ nijayaśodhavalaṃ siṣeve śatrupratāpam iva sīdhu papau ca śaśvat || 230 ||
[Analyze grammar]