Kathasaritsagara [sanskrit]
by C. H. Tawney | 2014 | 226,424 words | ISBN-13: 9789350501351
The Sanskrit edition of the Kathasaritsagara referencing the English translation and grammatical analysis. Written by Somadeva and dating from the 12th century, the Kathasaritsagara (or Katha-sarit-sagara) represents an epic legend narrating the adventures of Naravahanadatta as he strives to become the destined emperor of the Vidyadharas. Alternative titles: (Kathāsaritsāgara, कथासरित्सागर, Kathā-sarit-sāgara)
Chapter 5
tato vatseśvaraṃ prāha tatra yaugandharāyaṇaḥ |
rājan daivānukūlyaṃ ca vidyate pauruṣaṃ ca te || 1 ||
[Analyze grammar]
nītimārge ca vayam apy atra kiṃcitkṛtaśramāḥ |
tad yathācintitaṃ śīghraṃ kuruṣva vijayaṃ diśām || 2 ||
[Analyze grammar]
ity ukte mantrimukhyena rājā vatseśvaro 'bravīt |
astv etad bahuvighnās tu sadā kalyāṇasiddhayaḥ || 3 ||
[Analyze grammar]
atas tadarthaṃ tapasā śaṃbhum ārādhayāmy aham |
vinā hi tatprasādena kuto vāñchitasiddhayaḥ || 4 ||
[Analyze grammar]
tac chrutvā ca tapas tasya mantriṇo 'py anumenire |
setubandhodyatasyābdhau rāmasyeva kapīśvarāḥ || 5 ||
[Analyze grammar]
tatas taṃ saha devībhyāṃ sacivaiś ca tapaḥsthitam |
trirātropoṣitaṃ bhūpaṃ śivaḥ svapnaṃ samādiśat || 6 ||
[Analyze grammar]
tuṣṭo 'smi te tad uttiṣṭha nirvighnaṃ jayam āpsyasi |
sarvavidyādharādhīśaṃ putraṃ caivācirād iti || 7 ||
[Analyze grammar]
tataḥ sa bubudhe rājā tatprasādahṛtaklamaḥ |
arkāṃśuracitāpyāyaḥ pratipaccandramā iva || 8 ||
[Analyze grammar]
ānandayac ca sacivān prātaḥ svapnena tena saḥ |
vratopavāsaklānte ca devyau dve puṣpakomale || 9 ||
[Analyze grammar]
tatsvapnavarṇanenaiva śrotrapeyena tṛptayoḥ |
tayoś ca vibhavāyaiva jātaḥ svādvauṣadhakramaḥ || 10 ||
[Analyze grammar]
lebhe sa rājā tapasā prabhāvaṃ pūrvajaiḥ samam |
puṇyāṃ pativratānāṃ ca tatpatnyau kīrtim āpatuḥ || 11 ||
[Analyze grammar]
utsavavyagrapaure ca vihite vratapāraṇe |
yaugandharāyaṇo 'nyedyur iti rājānam abravīt || 12 ||
[Analyze grammar]
dhanyas tvaṃ yasya caivetthaṃ prasanno bhagavān haraḥ |
tad idānīṃ ripūñ jitvā bhaja lakṣmīṃ bhujārjitām || 13 ||
[Analyze grammar]
sā hi svadharmasaṃbhūtā bhūbhṛtām anvaye sthirā |
nijadharmārjitānāṃ hi vināśo nāsti saṃpadām || 14 ||
[Analyze grammar]
tathā ca cirabhūmiṣṭho nidhiḥ pūrvajasaṃbhṛtaḥ |
praṇaṣṭo bhavatā prāptaḥ kiṃ cātraitāṃ kathāṃ śṛṇu || 15 ||
[Analyze grammar]
babhūva devadāsākhyaḥ pure pāṭaliputrake |
purā ko'pi vaṇikputro mahādhanakulodgataḥ || 16 ||
[Analyze grammar]
abhavat tasya bhāryā ca nagarāt pauṇḍravardhanāt |
pariṇītā samṛddhasya kasyāpi vaṇijaḥ sutā || 17 ||
[Analyze grammar]
gate pitari pañcatvaṃ krameṇa vyasanānvitaḥ |
sa devadāso dyūtena sarvaṃ dhanam ahārayat || 18 ||
[Analyze grammar]
tataś ca tasya sā bhāryā duḥkhadāridryaduḥkhitā |
etya nītā nijaṃ gehaṃ svapitrā pauṇḍravardhanam || 19 ||
[Analyze grammar]
śanaiḥ so 'pi vipatkhinnaḥ sthātum icchan svakarmaṇi |
mūlyārthī devadāsas taṃ śvaśuraṃ yācituṃ yayau || 20 ||
[Analyze grammar]
prāptaś ca saṃdhyāsamaye tat puraṃ pauṇḍravardhanam |
rajorūkṣaṃ vivastraṃ ca vīkṣyātmānam acintayat || 21 ||
[Analyze grammar]
īdṛśaḥ praviśāmīha kathaṃ śvaśuraveśmani |
varaṃ hi mānino mṛtyur na dainyaṃ svajanāgrataḥ || 22 ||
[Analyze grammar]
ity ālocyāpaṇe gatvā sa kvāpi vipaṇer bahiḥ |
naktaṃ saṃkucitas tasthau tatkālaṃ kamalopamaḥ || 23 ||
[Analyze grammar]
kṣaṇāc ca tasyāṃ vipaṇau praviśantaṃ vyalokayat |
yuvānaṃ vaṇijaṃ kaṃcid udghāṭitakavāṭakam || 24 ||
[Analyze grammar]
kṣaṇāntare ca tatraiva niḥśabdapadam āgatām |
drutam antaḥ praviṣṭāṃ ca striyam ekāṃ dadarśa saḥ || 25 ||
[Analyze grammar]
jvalatpradīpe yāvac ca dadau dṛṣṭiṃ tadantare |
pratyabhijñātavāṃs tāvat tāṃ nijām eva gehinīm || 26 ||
[Analyze grammar]
tataḥ so 'rgalitadvārāṃ bhāryāṃ tām anyagāminīm |
dṛṣṭvā duḥkhāśanihato devadāso vyacintayat || 27 ||
[Analyze grammar]
dhanahīnena deho 'pi hāryate strīṣu kā kathā |
nisarganiyataṃ vāsāṃ vidyutām iva cāpalam || 28 ||
[Analyze grammar]
tad iyaṃ sā vipat puṃsāṃ vyasanārṇavapātinām |
gatiḥ seyaṃ svatantrāyāḥ striyāḥ pitṛgṛhasthiteḥ || 29 ||
[Analyze grammar]
iti saṃcintayaṃs tasyā bhāryāyāḥ sa bahiḥ sthitaḥ |
ratāntavisrambhajuṣaḥ kathālāpam ivāśṛṇot || 30 ||
[Analyze grammar]
upetya ca dadau dvāri sa karṇaṃ sāpi tatkṣaṇam |
ity abravīd upapatiṃ pāpā taṃ vaṇijaṃ rahaḥ || 31 ||
[Analyze grammar]
śṛṇv idaṃ kathayāmy adya rahasyaṃ te 'nurāgiṇī |
madbhartur vīravarmākhyaḥ purābhūt prapitāmahaḥ || 32 ||
[Analyze grammar]
svagṛhasyāṅgaṇe tena catvāraḥ svarṇapūritāḥ |
kumbhāś caturṣu koṇeṣu nigūḍhāḥ sthāpitā bhuvi || 33 ||
[Analyze grammar]
tad ekasyāḥ svabhāryāyāḥ sa cakre viditaṃ tadā |
tadbhāryā cāntakāle sā snuṣāyai tad avocata || 34 ||
[Analyze grammar]
sāpi snuṣāyai macchvaśrve macchvaśrūr abravīc ca me |
ity ayaṃ matpatikule śvaśrūkramamukhāgamaḥ || 35 ||
[Analyze grammar]
svabhartus tac ca na mayā daridrasyāpi varṇitam |
sa hi dyūtarato dveṣyas tvaṃ tu me paramaḥ priyaḥ || 36 ||
[Analyze grammar]
tat tatra gatvā madbhartuḥ sakāśāt tadgṛhaṃ dhanaiḥ |
krītvā tat prāpya ca svarṇam ihaitya bhaja māṃ sukham || 37 ||
[Analyze grammar]
evam uktaḥ kuṭilayā sa tayopapatir vaṇik |
tutoṣa tasyai manvāno nidhiṃ labdham ayatnataḥ || 38 ||
[Analyze grammar]
devadāso 'pi kuvadhūvākśalyais tair bahir gataḥ |
kīlitām iva tatkālaṃ dhanāśāṃ hṛdaye dadhau || 39 ||
[Analyze grammar]
jagāma ca tataḥ sadyaḥ puraṃ pāṭaliputrakam |
prāpya ca svagṛhaṃ labdhvā nidhānaṃ svīcakāra tat || 40 ||
[Analyze grammar]
athājagāma sa vaṇik tadbhāryācchannakāmukaḥ |
tam eva deśaṃ vāṇijyavyājena nidhilolupaḥ || 41 ||
[Analyze grammar]
devadāsasakāśāc ca krīṇāti sma sa tadgṛham |
devadāso 'pi mūlyena bhūyasā tasya tad dadau || 42 ||
[Analyze grammar]
tato gṛhasthitiṃ kṛtvā yuktyā śvaśuraveśmanaḥ |
sa devadāsaḥ śīghraṃ tām ānināya svagehinīm || 43 ||
[Analyze grammar]
evaṃ kṛte ca tadbhāryākāmukaḥ sa vaṇik śaṭhaḥ |
alabdhanidhir abhyetya devadāsam uvāca tam || 44 ||
[Analyze grammar]
etad bhavadgṛhaṃ jīrṇaṃ mahyaṃ na khalu rocate |
tad dehi me nijaṃ mūlyaṃ svagṛhaṃ svīkuruṣva ca || 45 ||
[Analyze grammar]
iti jalpaṃś ca sa vaṇig devadāsaś ca vibruvan |
ubhau vivādasaktau tau rājāgram upajagmatuḥ || 46 ||
[Analyze grammar]
tatra svabhāryāvṛttāntaṃ vakṣaḥsthaviṣaduḥsaham |
devadāso narendrāgre kṛtsnam udgirati sma tam || 47 ||
[Analyze grammar]
tataś cānāyya tadbhāryāṃ tattvaṃ cānviṣya bhūpatiḥ |
adaṇḍayat taṃ sarvasvaṃ vaṇijaṃ pāradārikam || 48 ||
[Analyze grammar]
devadāso 'pi kuvadhūṃ kṛtva tāṃ chinnanāsikām |
anyāṃ ca pariṇīyātra tasthau labdhanidhiḥ sukham || 49 ||
[Analyze grammar]
itthaṃ dharmārjitā lakṣmīr āsaṃtaty anapāyinī |
itarā tu jalapātatuṣārakaṇanaśvarī || 50 ||
[Analyze grammar]
ato yateta dharmeṇa dhanam arjayituṃ pumān |
rājā tu sutarāṃ yena mūlaṃ rājyataror dhanam || 51 ||
[Analyze grammar]
tasmād yathāvat saṃmānya siddhaye mantrimaṇḍalam |
kuru digvijayaṃ deva labdhuṃ dharmottarāṃ śriyam || 52 ||
[Analyze grammar]
śvaśuradvayabandhūnāṃ prasaktānuprasaktitaḥ |
vikurvate na bahavo rājānas te milanti ca || 53 ||
[Analyze grammar]
yas tv eṣa brahmadattākhyo vārāṇasyāṃ mahīpatiḥ |
nityaṃ vairī sa te tasmād vijayasva tam agrataḥ || 54 ||
[Analyze grammar]
tasmiñ jite jaya prācīprakrameṇākhilā diśaḥ |
uccaiḥ kuruṣva vai pāṇḍor yaśaś ca kumudojjvalam || 55 ||
[Analyze grammar]
ity ukto mantrimukhyena tatheti vijayodyataḥ |
vatsarājaḥ prakṛtiṣu prayāṇārambham ādiśat || 56 ||
[Analyze grammar]
dadau vaidehadeśe ca rājyaṃ gopālakāya saḥ |
satkārahetor nṛpatiḥ śvaśuryāyānugacchate || 57 ||
[Analyze grammar]
kiṃ ca padmāvatībhrātre prāyacchat siṃhavarmaṇe |
saṃmānya cediviṣayaṃ sainyaiḥ samam upeyuṣe || 58 ||
[Analyze grammar]
ānāyayac ca sa vibhur bhillarājaṃ pulindakam |
mittraṃ balair vyāptadiśaṃ prāvṛṭkālam ivāmbudaiḥ || 59 ||
[Analyze grammar]
abhūc ca yātrāsaṃrambho rāṣṭre tasya mahāprabhoḥ |
ākulatvaṃ tu śatrūṇāṃ hṛdi citram ajāyata || 60 ||
[Analyze grammar]
yaugandharāyaṇaś cāgre cārān vārāṇasīṃ prati |
prāhiṇod brahmadattasya rājño jñātuṃ viceṣṭitam || 61 ||
[Analyze grammar]
tataḥ śubhe 'hani prīto nimittair jayaśaṃsibhiḥ |
brahmadattaṃ prati prācyāṃ pūrvaṃ vatseśvaro yayau || 62 ||
[Analyze grammar]
ārūḍhaḥ procchritacchattraṃ prottuṅgaṃ jayakuñjaram |
giriṃ praphullaikataruṃ mṛgendra iva durmadaḥ || 63 ||
[Analyze grammar]
prāptayā siddhidūtyeva śaradā dattasaṃmadaḥ |
darśayantyātisugamaṃ mārgaṃ svalpāmbunimnagam || 64 ||
[Analyze grammar]
pūrayan bahunādābhir vāhinībhir bhuvas talam |
kurvann akāṇḍanirmeghavarṣāsamayasaṃbhramam || 65 ||
[Analyze grammar]
tadā ca sainyanirghoṣapratiśabdākulīkṛtāḥ |
parasparam ivācakhyus tadāgamabhayaṃ diśaḥ || 66 ||
[Analyze grammar]
celuś ca hemasaṃnāhasaṃbhṛtārkaprabhā hayāḥ |
tasya nīrājanaprītapāvakānugatā iva || 67 ||
[Analyze grammar]
virejur vāraṇāś cāsya sitaśravaṇacāmarāḥ |
vigaladgaṇḍasindūraśoṇadānajalāḥ pathi || 68 ||
[Analyze grammar]
śaratpāṇḍupayodāṅkāḥ sadhāturasanirjharāḥ |
yātrānupreṣitā bhītair ātmajā iva bhūdharaiḥ || 69 ||
[Analyze grammar]
naivaiṣa rājā sahate pareṣāṃ prasṛtaṃ mahaḥ |
itīva taccamūreṇur arkatejas tirodadhe || 70 ||
[Analyze grammar]
padāt padaṃ ca dve devyau mārge tam anujagmatuḥ |
nṛpaṃ nayaguṇākṛṣṭe iva kīrtijayaśriyau || 71 ||
[Analyze grammar]
namatātha palāyadhvam ity ūce vidviṣām iva |
pavanākṣiptavikṣiptais tasya senādhvajāṃśukaiḥ || 72 ||
[Analyze grammar]
evaṃ yayau sa digbhāgān paśyan phullasitāmbujān |
mahīmardabhayodbhrāntaśeṣotkṣiptaphaṇān iva || 73 ||
[Analyze grammar]
atrāntare ca te cārā dhṛtakāpālikavratāḥ |
yaugandharāyaṇādiṣṭāḥ prāpur vārāṇasīṃ purīm || 74 ||
[Analyze grammar]
teṣāṃ ca kuhakābhijño jñānitvam upadarśayan |
śiśriye gurutām ekaḥ śeṣās tacchiṣyatāṃ yayuḥ || 75 ||
[Analyze grammar]
ācāryo 'yaṃ trikālajña iti vyājaguruṃ ca tam |
śiṣyās te khyāpayām āsur bhikṣāśinam itas tataḥ || 76 ||
[Analyze grammar]
yad uvācāgnidāhādi sa jñānī bhāvi pṛcchatām |
tacchiṣyās tat tathā guptaṃ cakrus tena sa paprathe || 77 ||
[Analyze grammar]
rañjitaṃ kṣudrasiddhyā ca tatratyaṃ nṛpavallabham |
svīcakre sa kam apy ekaṃ rājaputram upāsakam || 78 ||
[Analyze grammar]
tanmukhenaiva rājñaś ca brahmadattasya pṛcchataḥ |
so 'bhūt tatra rahasyajñaḥ prāpte vatseśavigrahe || 79 ||
[Analyze grammar]
athāsya brahmadattasya mantrī yogakaraṇḍakaḥ |
cakāra vatsarājasya vyājān āgacchataḥ pathi || 80 ||
[Analyze grammar]
adūṣayat pratipathaṃ viṣādidravyayuktibhiḥ |
vṛkṣān kusumavalliś ca toyāni ca tṛṇāni ca || 81 ||
[Analyze grammar]
vidadhe viṣakanyāś ca sainye paṇyavilāsinīḥ |
prāhiṇot puruṣāṃś caiva niśāsu cchadmaghātinaḥ || 82 ||
[Analyze grammar]
tac ca vijñāya sa jñānaliṅgī cāro nyavedayat |
yaugandharāyaṇāyāśu svasahāyamukhais tadā || 83 ||
[Analyze grammar]
yaugandharāyaṇo 'py etad buddhvā pratipadaṃ pathi |
dūṣitaṃ tṛṇatoyādi pratiyogair aśodhayat || 84 ||
[Analyze grammar]
apūrvastrīsamāyogaṃ kaṭake niṣiṣedha ca |
avadhīd vadhakāṃs tāṃś ca labdhvā saha rumaṇvatā || 85 ||
[Analyze grammar]
tad buddhvā dhvastamāyaḥ san sainyapūritadiṅmukham |
vatseśvaraṃ brahmadatto mene durjayam eva tam || 86 ||
[Analyze grammar]
saṃmantrya dattvā dūtaṃ ca śiroviracitāñjaliḥ |
tataḥ sa nikaṭībhūtaṃ vatseśaṃ svayam abhyagāt || 87 ||
[Analyze grammar]
vatsarājo 'pi taṃ prāptaṃ pradattopāyanaṃ nṛpam |
prītyā saṃmānayām āsa śūrā hi praṇatipriyāḥ || 88 ||
[Analyze grammar]
itthaṃ tasmiñ jite prācīṃ śamayan namayan mṛdūn |
unmūlayaṃś ca kaṭhinān nṛpān vāyur iva drumān || 89 ||
[Analyze grammar]
prāpa ca prabalaḥ prācyaṃ caladvīcivighūrṇitam |
vaṅgāvajayavitrāsavepamānam ivāmbudhim || 90 ||
[Analyze grammar]
tasya velātaṭānte ca jayastambhaṃ cakāra saḥ |
pātālābhayayācñārthaṃ nāgarājam ivodgatam || 91 ||
[Analyze grammar]
avanamya kare datte kaliṅgair agragais tataḥ |
āruroha mahendrādriṃ yaśas tasya yaśasvinaḥ || 92 ||
[Analyze grammar]
mahendrābhibhavād bhītair vindhyakūṭair ivāgataiḥ |
gajair jitvāṭavīṃ rājñāṃ sa yayau dakṣiṇāṃ diśam || 93 ||
[Analyze grammar]
tatra cakre sa niḥsārapāṇḍurān apagarjitān |
parvatāśrayiṇaḥ śatrūñ śaratkāla ivāmbudān || 94 ||
[Analyze grammar]
ullaṅghyamānā kāverī tena saṃmardakāriṇā |
colakeśvarakīrtiś ca kāluṣyaṃ yayatuḥ samam || 95 ||
[Analyze grammar]
na paraṃ muralānāṃ sa sehe mūrdhasu nonnatim |
karair āhanyamāneṣu yāvat kāntākuceṣv api || 96 ||
[Analyze grammar]
yat tasya saptadhā bhinnaṃ papur godāvarīpayaḥ |
mātaṅgās tanmadavyājāt saptadhaivāmucann iva || 97 ||
[Analyze grammar]
athottirya sa vatseśo revām ujjayinīm agāt |
praviveśa ca tāṃ caṇḍamahāsenapuraskṛtaḥ || 98 ||
[Analyze grammar]
sa mālyaślathadhammillaśobhād vaiguṇyaśālinām |
mālavastrīkaṭākṣāṇāṃ yayau cātraiva lakṣyatām || 99 ||
[Analyze grammar]
tasthau ca nirvṛtas tatra tathā śvaśurasatkṛtaḥ |
visasmāra yathābhīṣṭān api bhogān svadeśajān || 100 ||
[Analyze grammar]
āsīd vāsavadattā ca pituḥ pārśvavivartinī |
smarantī bālabhāvasya saukhye 'pi vimanā iva || 101 ||
[Analyze grammar]
rājā caṇḍamahāsenas tayā tanayayā yathā |
tathaiva padmāvatyāpi nandati sma sam āgataḥ || 102 ||
[Analyze grammar]
viśramya ca niśāḥ kāścit prīto vatseśvaras tataḥ |
anvitaḥ śvāśuraiḥ sainyaiḥ prayayau paścimāṃ diśam || 103 ||
[Analyze grammar]
tasya khaḍgalatā nūnaṃ pratāpānaladhūmikā |
yaccakre lāṭanārīṇām udaśrukaluṣā dṛśaḥ || 104 ||
[Analyze grammar]
asau mathitum ambhodhiṃ mā mām unmūlayiṣyati |
itīva tadgajādhūtavano 'vepata mandaraḥ || 105 ||
[Analyze grammar]
satyaṃ sa ko'pi tejasvī bhāsvadādivilakṣaṇaḥ |
pratīcyām udayaṃ prāpa prakṛṣṭam api yajjayī || 106 ||
[Analyze grammar]
tataḥ kuberatilakām alakāsaṅgaśaṃsinīm |
kailāsahāsasubhagām āśām abhisasāra saḥ || 107 ||
[Analyze grammar]
sindhurājaṃ vaśīkṛtya harisainyair anudrutaḥ |
kṣapayām āsa ca mlecchān rāghavo rākṣasān iva || 108 ||
[Analyze grammar]
turuṣkaturagavrātāḥ kṣubdhasyābdher ivormayaḥ |
tadgajendraghaṭā velāvaneṣu dalaśo yayuḥ || 109 ||
[Analyze grammar]
gṛhītārikaraḥ śrīmān pāpasya puruṣottamaḥ |
rāhor iva sa ciccheda pārasīkapateḥ śiraḥ || 110 ||
[Analyze grammar]
hūṇahānikṛtas tasya mukharīkṛtadiṅmukhā |
kīrtir dvitīyā gaṅgeva vicacāra himācale || 111 ||
[Analyze grammar]
nadantīṣv asya senāsu bhayastimitavidviṣaḥ |
pratīpaḥ śuśruve nādaḥ śailarandhreṣu kevalam || 112 ||
[Analyze grammar]
apacchattreṇa śirasā kāmarūpeśvaro 'pi tam |
naman vicchāyatāṃ bheje yat tadā na tad adbhutam || 113 ||
[Analyze grammar]
taddattair anvito nāgaiḥ samrāḍ vivavṛte 'tha saḥ |
adribhir jaṅgamaiḥ śailaiḥ karīkṛtyārpitair iva || 114 ||
[Analyze grammar]
evaṃ vijitya vatseśo vasudhāṃ saparicchadaḥ |
padmāvatīpituḥ prāpa puraṃ magadhabhūbhṛtaḥ || 115 ||
[Analyze grammar]
magadheśaś ca devībhyāṃ sahite 'sminn upasthite |
sotsavo 'bhūn niśājyotsnāvati candra iva smaraḥ || 116 ||
[Analyze grammar]
avijñātasthitām ādau punaś ca vyaktim āgatām |
mene vāsavadattāṃ ca so 'dhikapraśrayāspadam || 117 ||
[Analyze grammar]
tato magadhabhūbhṛtā sanagareṇa tenārcitaḥ samagrajanamānasair anugato 'nurāgāgataiḥ |
nigīrṇavasudhātalo balabhareṇa lāvāṇakaṃ jagāma viṣayaṃ nijaṃ sa kila vatsarājo jayī || 118 ||
[Analyze grammar]
Other editions:
Also see the following editions of the Sanskrit text or (alternative) English translations of the Kathasaritsagara Chapter 5
The Ocean of Story
by C.H. Tawney (2014)
Being C.H. Tawney's Translation of Somadeva's Katha Sarit Sagara (Kathasaritsagara): (Ten Volumes)
Buy now!
Kathasaritsagar
by Kedarnath Sharma Saraswat (2005)
The Only Edition with the Sanskrit Text and its Hindi Translation (An Old and Rare Book) Set of 3 Vol.
Buy now!
Kathasaritsagara of Somadeva Bhatta (Sanskrit Text Only)
by Vasudeva Laksmana Sastri (2013)
Katha Sarit Sagar in Marathi
by H. A Bhave (1995)
Set of 5 Volumes; Published by Varada Books, Pune. 2256 pages (Throughout B/W Illustrations).
Buy now!
Katha Sarit Sagara (Tamil)
by S. V. Ganapati (எஸ். வி. கணபதி) (2014)
[கதா சரித் சாகரம்] Published by Alliance Publications.
Buy now!
Galpa Shono
by Abhijit Chattopadhyay (2014)
[গল্প শোনো] Galpa Shono: Bengali Translation of 'Suno Kahani From Katha Sarit Sagar'; 9788126015436; Published by Sahitya Akademi, Delhi.
Buy now!