Chapter 103

arjuna uvāca |
tataḥ parvatajālāni saritaśca sarāṃsi ca |
apaśyaṃ samatikramya sāgaraṃ makarālayam || 1 ||
[Analyze grammar]

tato'rghyamudadhiḥ sākādupaninye janārdane |
prāñjaliḥ samupasthāya kiṃ karomīti cābravīt || 2 ||
[Analyze grammar]

pratigṛhya tu tāṃ pūjāṃ tamuvāca janārdanaḥ |
rathapanthānamicchāmi dattaṃ nadanadīpate || 3 ||
[Analyze grammar]

athābravītsamudrastaṃ prāñjalirgaruḍadhvajam |
prasīda bhagavanmaivamanyo'pyevaṃ gamiṣyati || 4 ||
[Analyze grammar]

tvayaiva sthāpitaḥ pūrvamagādho'smi janārdana |
tvayā pravartite gādhe yāsyāmi gamanīyatām || 5 ||
[Analyze grammar]

anye'pyevaṃ gamiṣyanti rājāno darpamohitāḥ |
evaṃ niścitya govinda yatkṣamaṃ tatsamācara || 6 ||
[Analyze grammar]

vāsudeva uvāca |
brāhmaṇārthe madarthe ca kuru sāgara madvacaḥ |
māmṛte na pumān kaścidanyastvāṃ dharṣayiṣyati || 7 ||
[Analyze grammar]

athābravītsamudrastu punareva janārdanam |
abhiśāpabhayādbhīto bāḍhamevaṃ bhaviṣyati || 8 ||
[Analyze grammar]

śoṣayāmyeṣa mārgaṃ te yena tvaṃ tāta yāsyasi |
rathena sahasūtena sadhvajena ca keśava || 9 ||
[Analyze grammar]

vāsudeva uvāca |
mayā dattavaraḥ pūrvaṃ na śoṣaṃ tvamihārhasi |
mānuṣāste na jānīyurvividhān ratnasaṃcayān || 10 ||
[Analyze grammar]

jalaṃ stambhaya sādho tvaṃ tato yāsyāmyahaṃ rathī |
na hi kaścitpramāṇaṃ te ratnānāṃ vetsyate naraḥ || 11 ||
[Analyze grammar]

sāgareṇa tathetyukte prasthitāḥ sma jalena vai |
stambhitena yathā bhūmau maṇivarṇena bhāsvatā || 12 ||
[Analyze grammar]

tato'rṇavaṃ samuttīrya kurūnapyuttarānvayam |
kṣaṇena samatikrāntā gandhamādanameva ca || 13 ||
[Analyze grammar]

tatastu parvatāḥ sapta keśavaṃ samupasthitāḥ |
jayanto vaijayantaśca nīlo rajataparvataḥ || 14 ||
[Analyze grammar]

mahāmeruḥ sakailāsa indrakūṭaśca nāmataḥ |
varṇarūpāṇi bibhranto vividhānyadbhutāni ca || 15 ||
[Analyze grammar]

upasthāya ca govindaṃ kiṃ kurmetya bravaṃstadā |
tāṃścāpi pratijagrāha vidhivanmadhusūdanaḥ || 16 ||
[Analyze grammar]

tānuvāca hṛṣīkeśaḥ praṇāmāvanatān sthitān |
vivaraṃ gacchato me'dya rathamārgaḥ pradīyatām || 17 ||
[Analyze grammar]

te kṛṣṇasya vacaḥ śrutvā pratigṛhya ca parvatāḥ |
pradaduḥ kāmato mārgaṃ gacchato bharatarṣabha || 18 ||
[Analyze grammar]

tatraivāntarhitāste ca tadāścaryataraṃ mama |
asaktaṃ ca ratho yāti meghajāleṣvivāṃśumān || 19 ||
[Analyze grammar]

sapta dvīpān sasindhūṃśca sapta sapta girīnatha || 19 ||
[Analyze grammar]

lokālokaṃ tathātītya viveśa sumahattamaḥ || 19 ||
[Analyze grammar]

tataḥ kadā cidduḥkhena rathamūhusturaṃgamāḥ |
paṅkabhūtaṃ hi timiraṃ sparśādvijñāyate'nagha || 20 ||
[Analyze grammar]

atha parvatabhūtaṃ tattimiraṃ samapadyata |
aśvā nāśaknuvan gantuṃ tato'haṃ saṃbhramānvitaḥ |
tadāsādya hayā rājanniṣprayatnāstataḥ sthitāḥ || 21 ||
[Analyze grammar]

tataścakreṇa govindaḥ pāṭayitvā tu tattamaḥ |
ākāśaṃ darśayāmāsa rathapanthānamūttamam || 22 ||
[Analyze grammar]

niṣkramya tamasastasmādākāśe darśite tadā |
bhaviṣyāmīti saṃjñā me bhayaṃ ca vigataṃ mama || 23 ||
[Analyze grammar]

tatastejaḥ prajvalitamapaśyaṃ vadatāṃ vara |
sarvalokaṃ samāviśya sthitaṃ puruṣavigraham || 24 ||
[Analyze grammar]

taṃ praviṣṭo hṛṣīkeśo dīptaṃ tejonidhiṃ tadā |
ratha eva sthitaścāhaṃ sa ca brāhmaṇasattamaḥ || 25 ||
[Analyze grammar]

sa muhūrtāttataḥ kṛṣṇo niścakrāma tadā prabhuḥ |
caturo bālakān gṛhya brāhmaṇasyātmajāṃstadā || 26 ||
[Analyze grammar]

pradadau brāhmaṇāyātha putrān sarvāñjanārdanaḥ |
trayaḥ pūrvaṃ hṛtā ye ca sadyojātaśca bālakaḥ || 27 ||
[Analyze grammar]

prahṛṣṭo brāhmaṇastāta putrāndṛṣṭvā punaḥ prabho |
ahaṃ ca paramaprīto vismitaścābhavaṃ nṛpa || 28 ||
[Analyze grammar]

tato vayaṃ punaḥ sarve brāhmaṇasya ca te sutāḥ |
yathāgatā nivṛttāḥ sma tathaiva bharatarṣabha || 29 ||
[Analyze grammar]

tataḥ sma dvārakāṃ prāptāḥ kṣaṇena nṛpasattama |
asaṃprāpte'rdhadivase vismito'haṃ tataḥ punaḥ || 30 ||
[Analyze grammar]

saputraṃ bhojayitvā taṃ dvijaṃ kṛṣṇo mahāyaśāḥ |
dhanena tarpayitvā ca gṛhaṃ prāsthāpayattadā || 31 ||
[Analyze grammar]