Bhagavad-gita with four Commentaries [sanskrit]

140,673 words | ISBN-10: 8189564072 | ISBN-13: 9788189564070

The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)

arjuna uvāca
sthitaprajñasya bhāṣā samādhisthasya keśava |
sthitadhīḥ kiṃ prabhāṣeta kimāsīta vrajeta kim ||54||

The Subodhinī commentary by Śrīdhara

pūrvaślokoktasyātmatattvajñasya lakṣaṇaṃ jijñāsurarjuna uvāca sthitaprajñasyeti | svābhāvike samādhau sthitasya, ataeva sthitā niścalā prajñā buddhiryasya tasya bhāṣā ? bhāṣyate'nayā iti bhāṣā lakṣaṇamiti yāvat | sa kena lakṣaṇena sthitaprajña ucyate ityarthaḥ | tathā sthitadhīḥ kiṃ kathaṃ bhāṣaṇamāsanaṃ vrajanaṃ ca kuryādityarthaḥ ||54||

The Gūḍhārthadīpikā commentary by Madhusūdana

evaṃ labdhāvasaraḥ sthitaprajñalakṣaṇaṃ jñātumarjuna uvāca | yānyeva hi jīvanmuktānāṃ lakṣaṇāni tānyeva mumukṣūṇāṃ mokṣopāyabhūtānīti manvānaḥ | sthitā niścalā ahaṃbrahmāsmi iti prajñā yasya sa sthitaprajño'vasthādvayavān samādhistho vyutthitacittaśceti | ato viśinaṣṭi samādhisthasya sthitaprajñasya bhāṣā ? karmaṇi ṣaṣṭhī | bhāṣyate'nayeti bhāṣā lakṣaṇam | samādhisthaḥ sthitaprajñaḥ kena lakṣaṇenānyairvyavahriyata ityarthaḥ |

sa ca vyutthitacittaḥ sthitadhīḥ sthitaprajñaḥ svayaṃ kiṃ prabhāṣeta ? stutinindādāvabhinandanadveṣādilakṣaṇaṃ kiṃ kathaṃ prabhāṣeta ? sarvatra sambhāvanāyāṃ liṅ | tathā kimāsīteti vyutthitacittanigrahāya kathaṃ bahirindriyāṇāṃ nigrahaṃ karoti ? tannigrāhābhāvakāle kiṃ vrajeta kathaṃ viṣayān prāpnoti ? tatkartṛkabhāṣaṇāsanavrajanāni mūḍhajanavilakṣaṇāni kīdṛśānīityarthaḥ |

tadevaṃ catvāraḥ praśnāḥ samādhisthe sthitaprajña ekaḥ | vyutthite sthitaprajñe traya iti | keśaveti sambodhayan sarvāntaryāmitayā tvamevaitādṛśaṃ rahasyaṃ vaktuṃ samartho'sīti sūcayati ||54||

The Sārārthavarṣiṇī commentary by Viśvanātha

samādhāvacalā buddhiriti śrutvā tattvato yogino lakṣaṇaṃ pṛcchati sthitaprajñasyeti | sthitā sthirācalā prajña buddhiryasyeti | bhāṣā ? bhāṣyate'nayeti bhāṣā lakṣaṇaṃ kiṃ lakṣaṇamityarthaḥ | kīdṛśasya samādhisthasyeti samādhau sthāsyatīti | asyārthaḥ evaṃ ca sthitaprajña iti | samādhistha iti jīvanmuktasya saṃjñādvayam | kiṃ prabhāṣeteti sukhaduḥkhayormānāpamānayoḥ stutinindayoḥ snehadveṣayorvā samupasthitayoḥ kiṃ prabhāṣeta ? spaṣṭaṃ svagataṃ kiṃ vadedityarthaḥ | kim
āsīta ? tadindriyāṇāṃ bāhyaviṣayeṣu calanābhāvaḥ kīdṛśaḥ ? vrajeta kim ? teṣu calanaṃ kīdṛśamiti ||54||

The Gītābhūṣaṇa commentary by Baladeva

evamukto'rjunaḥ pūrvapadyoktasya sthitaprajñasya lakṣaṇaṃ jñātuṃ pṛcchati sthiteti | sthitaprajñe'tra catvāraḥ praśnāḥ samādhisthe ekaḥ, vyutthite tu trayaḥ | tathā hi sthitā sthirā prajña dhīryasya tasya samādhisthasya bhāṣā kiṃ lakṣaṇam ? bhāṣyate'nayeti vyutpatteḥ | kena lakṣaṇena sthitaprajño'bhidhīyata ityarthaḥ | tathā vyutthitaḥ sthitaprajñaḥ kathaṃ bhāṣaṇādīni kuryāt? tadīyāni tāni pṛthagjanavilakṣaṇāni kīdṛśānītyarthaḥ | tatra kiṃ prabhāṣeta ? svayoḥ stutinindayoḥ snehadveṣayośca prāptayor
mukhataḥ svagataṃ kiṃ brūyāt? kimāsīta bāhyaviṣayeṣu kathamindriyāṇāṃ nigrahaṃ kuryāt? vrajeta kim ? kiṃ tannigrāhābhāve ca kathaṃ viṣayānavāpnuyādityarthaḥ | triṣu sambhāvanāyām ||54||

__________________________________________________________

Let's grow together!

I humbly request your help to keep doing what I do best: provide the world with unbiased sources, definitions and images. Your donation direclty influences the quality and quantity of knowledge, wisdom and spiritual insight the world is exposed to.

Let's make the world a better place together!

Like what you read? Consider supporting this website: