1st akṣaya, Cittotpāda

[English text for this chapter is available]

akṣayamatir āha: bodhisattvānāṃ prathamacittotpādo'pi, bhadanta śāradvatīputrākṣayaḥ | tat kasya hetoḥ? asaṃsṛṣṭatvāt | tac cittaṃ sarvakleśāsaṃsṛṣṭam utpādyate, tac cittam asaṃsargam utpādyate'nyayānāspṛhaṇayā | tac cittaṃ sāram utpādyate sarvaparapravādyasaṃhāryāt | tac cittam abhedyam utpādyate sarvamāraiḥ | tac cittaṃ dṛḍham utpādyate sarvakuśalamūlasamudāgamatayā | tac cittaṃ nityam utpādyate saṃskṛtānityatāsuviditatvāt | tac cittam acalitam utpādyate sarvabuddhadharmasamudānayāt | tac cittam anavamṛdyam utpādyate sarvavipratipattiviprayogāt | tac cittaṃ supratiṣṭhitam utpādyate'prakampyatvāt | tac cittam anupamam utpādyate'pratipakṣatvāt | tac cittaṃ vajropamam utpādyate sarvadharmanirbhedatvāt | tac cittam aparyantam utpādyate'pramāṇapuṇyasaṃbhāropacayatvāt | tac cittaṃ samam utpādyate sarvasattvāśayebhyaḥ | tac cittam aviṣamam utpādyate'pṛthakkāryatvāt | tac cittaṃ viśuddham utpādyate svabhāvāsaṃkliṣṭatvāt | tac cittaṃ vimalam utpādyate prajñāprabhāsvaratayā | tac cittaṃ sunidhyaptam utpādyate'dhyāśayānutsargatvāt | tac cittam udāram utpādyate maitryākāśasamasadṛśatvāt | tac cittaṃ vistaram utpādyate sarvasattvāvakāśatvāt | tac cittam anāvaraṇam utpādyate'saṅgajñānopanāmitatvāt | tac cittaṃ sarvānugatam utpādyate mahākaruṇāpratipraśrabdhatvāt | tac cittam apratipraśrabdham utpādyate pariṇāmanavidhijñatvāt | tac cittam abhigamanīyam utpādyate sarvajñapraśaṃsitatvāt | tac cittaṃ darśanīyam anyayānapraveśatvāt | tac cittam adṛṣṭam utpādyate sarvasattvadṛśyeṣu | tac cittaṃ bījam utpādyate sarvabuddhadharmāṇām | tac cittam abhedyam utpādyate sarvadharmaiḥ | tac cittaṃ niśrayam utpadyate sarvasattvasukhabhāvānām | tac cittam alaṃkṛtam utpādyate puṇyasaṃbhāreṇa | tac cittaṃ supratividdham utpādyate jñānasaṃbhāreṇa | tac cittaṃ pravṛddham utpādayate dānasaṃbhāreṇa | tac cittaṃ praṇidhānodgatam utpādyate śīlasaṃbhāreṇa | tac cittaṃ durāsadam utpādyate kṣāntisaṃbhāreṇa | tac cittaṃ durjayam utpādyate vīryasaṃbhāreṇa | tac cittaṃ śāntilakṣaṇam utpādyate dhyānasaṃbhāreṇa | tac cittam apratihatam utpādyate prajñāsaṃbhāreṇa | tac cittam avyābādham utpādyate mahāmaitrīsaṃnicayena | tac cittaṃ sāradṛḍhamūlaṃ mahākaruṇāsaṃnicayena | tac cittaṃ tuṣṭiprasādaprāmodyavihāram utpādyate mahāmuditāsaṃnicayena | tac cittaṃ sukhaduḥkāprakampyam utpādyate mahopekṣāsaṃnicayena | tac cittam adhiṣṭhitam utpādyate sarvabuddhādhiṣṭhānaiḥ | tac cittam nayānupacchedam utpādyate triratnavaṃsānupacchedatayā | tac cittaṃ prakīrtitam utpādyate daśadigbuddhakṣetraparṣanmaṇḍaleṣu.

asti kaścit kṣayo, bhadanta śāradvatīputraivaṃrūpasya sarvajñatācittotpādasya?

śāradvatīputra āha: no hīdaṃ, kulaputrākāśaṃ sa kṣapayitavyaṃ manyeta ya evaṃvidhaṃ sarvajñatācittaṃ kṣapayitavyaṃ manyeta |

akṣayamatir āha: tat tathāgatasya cittaṃ, bhadanta śāradvatīputrākṣayaṃ, tad bodhicittaṃ tasya mūlam utpādyate, tasmād akṣayam |

tathāgatasya śīlasamādhiprajñāvimuktivimuktijñānadarśanaskandhā, bhadanta śāradvatīputrākṣayās, tad bodhicittaṃ teṣāṃ mūlam utpādyate, tasmād akṣayam |

tathāgatasya dhyānavimokṣasamādhisamāpattayo, bhadanta śāradvatīputrākṣayās, tad bodhicittaṃ teṣāṃ mūlam utpādyate, tasmād akṣayam |

tathāgatasya dānaśīlakṣāntivīryadhyānaprajñāpāramitā, bhadanta śāradvatīputrākṣayās, tad bodhicittaṃ teṣāṃ mūlam utpādyate, tasmād akṣayam |

tathāgatasya maitrīkaruṇāmuditopekṣā, bhadanta śāradvatīputrākṣayās, tad bodhicittaṃ teṣāṃ mūlam utpādyate, tasmād akṣayam |

tathāgatasya daśabalacaturvaiśāradyāṣṭādaśāvenikabuddhadharmā, bhadanta śāradvatīputrākṣayās, tad bodhicittaṃ teṣāṃ mūlam utpādyate, tasmād akṣayam |

saṃkṣepato, bhadanta śāradvatīputra, sarvabuddhadharmā akṣayās, tad bodhicittaṃ teṣāṃ mūlam utpādyate, tasmād akṣayam.

triratnavaṃsānupacchedatvād akṣayam | sattvadhātvakṣayatvād akṣayam | tajjñānopanāmitatvād akṣayam | sarvasattvānāṃ cittacaryāviniścayatvād akṣayam | pūrvapraṇidhānāpratiśrambhaṇatvād akṣayam | asaṃskṛtāya pariṇāmanatvād akṣayam | asaṃskṛtāya sattvaparipācanatvād akṣayam | kṣayajñānānutpādajñānākṣayatvād akṣayam | anudayāvyayatvād akṣayam | sarvadharmā ādyakṣayāḥ, tajjñānābhisamayatvād akṣayam.

idam ucyate, bhadanta śāradvatīputra, bodhisattvānām akṣayaṃ bodhicittam.