Yoga Vasistha [sanskrit]

223,437 words | ISBN-10: 8171101519

The Sanskrit edition of the Yoga-vasistha including English translation and grammatical analysis. The Yogavasistha is a Hindu spiritual text written by Valmiki (who also authored the Ramayana) dealing with the philosophical topics from the Advaita-vedanta school. Chronologically it precedes the Ramayana.

Chapter CLI

< Previous

Next >

anyamuniruvāca |
tatra te nagaraṃ tāni gṛhāṇi taravaśca te |
kṣipreṇa śuṣkatṛṇavatsarvaṃ bhasmatvamāgatam || 1 ||
[Analyze grammar]

tatraivaṃ bhasmatāṃ prāpte supte te bhavatastava |
tanū tathātisaṃtāpavidāritamahāśile || 2 ||
[Analyze grammar]

sa śaśāma śanairvahnirniḥśeṣīkṛtakānanaḥ |
paripītārṇavo'gastya ivāstaṃ samupāyayau || 3 ||
[Analyze grammar]

tasminnastaṃ gatevahnau tadbhasmeddhaṃ suśītalam |
dudhāva kaṇaśo vāyuraśeṣaṃ puṣparāśivat || 4 ||
[Analyze grammar]

tato na jñāyate nāsītkvāśramaḥ kva tanū tathā |
kva peṭakaṃ bahūnāṃ tatsvapnapūrjāgrato yathā || 5 ||
[Analyze grammar]

abhāvamupayāte te yadaivaṃ bhavatastanū |
svapataste bhramavataḥ saṃvideva vijṛmbhate || 6 ||
[Analyze grammar]

tasmātka tadgalabilaṃ virāḍātmā sa ca kva te |
dagdho dagdhasya saujaskaḥ saujaskasyaiva dehakaḥ || 7 ||
[Analyze grammar]

labdhavānasi no tasmāddhetordehadvayaṃ mune |
anante svapnasaṃsārajāgratīhāvatiṣṭhase || 8 ||
[Analyze grammar]

tadevaṃ svapna evāyaṃ jāgradbhāvamupāgataḥ |
sarve vayamiha svapnapuruṣāstava suvrata || 9 ||
[Analyze grammar]

asmākaṃ tvaṃ svapnanarastava svapnanarā vayam |
ayameva cidākāśaḥ sarvadātmātmani sthitaḥ || 10 ||
[Analyze grammar]

tataḥ prabhṛti saṃpanno bhavānsvapnanaro bhavan |
jāgratpratyayavāñjāgrannaro gārhasthyasusthitaḥ || 11 ||
[Analyze grammar]

etatte kathitaṃ sarvaṃ yathāvṛttamaśeṣataḥ |
anubhūtaṃ sudṛśyaṃ ca dhyānenaitacca paśyasi || 12 ||
[Analyze grammar]

ityādimadhyarahito'yamanantarūpaḥ saṃviddhanaḥ kacati kāñcanatāpavatkhe |
tatphālalolavapurātmani cinmayātmā sargātmabhirvikasitairasitaiḥ sitaiśca || 13 ||
[Analyze grammar]