Chapter 36

puṇyāhaṃ vācayettatra brāhmaṇaiḥ saha mantravit |
pañcabhārapramāṇaṃ vā tadardhaṃ vārdhameva vā || 1 ||
[Analyze grammar]

tannyūnaṃ na hi kartavyaṃ śālisaṃcayamuttamam |
tatrordhve vikiredvidvān tadardhaṃ taṇḍulaṃ tathā || 2 ||
[Analyze grammar]

taṇḍulopari vinyasya cāṣṭapatrābjamuttamam |
tatra madhye likhedbījaṃ dale cāṣṭākṣaraṃ nyaset || 3 ||
[Analyze grammar]

madhyame navakumbhaṃ tu sthāpayet sādhakottamaḥ |
sūtravastrasamāyuktaṃ ratnamālyeralaṃkṛtam || 4 ||
[Analyze grammar]

gandhodakena saṃpūrṇaṃ vastragyugmena veṣṭitam |
pūrvādi cāṣṭakumbhasya vastramekaikameva vā || 5 ||
[Analyze grammar]

diṅmūrtyādīni cāṣṭānāmekavastramathāpi vā |
karṇikāyāṃ nyaset kumbhaṃ daleṣvaṣṭaghaṭān nyaset || 6 ||
[Analyze grammar]

trisaptapañcadarbhairvā kṛtvā kūrcaṃ vinikṣipet |
tasmin pūrṇaghaṭe madhye devāgāraṃ tu cintayet || 7 ||
[Analyze grammar]

sahasraśīrṣā puruṣaḥ sahasrākṣāḥ sahasrapāt |
sahasrakuntalopetaṃ sahusramakuṭānvitam || 8 ||
[Analyze grammar]

sahasrādityasaṃkāśaṃ sahasrendunibhānanam |
śaṅkhacakragadāpāṇiṃ sarvapraharaṇānvitam |
prāsādarūpamityāhuḥ pūrvarātre'dhivāsayet || 10 ||
[Analyze grammar]

taddhyānenaiva devarṣe samyak snānamavāpnuyāt |
mokṣārthī mokṣamāpnoti tasmāddhyānaṃ viśiṣyate || 11 ||
[Analyze grammar]

maṇḍapādiṣu sarveṣu dhyānamevaṃ prakīrtitam |
tasmin madhye nayedvidvān smaran tat parameṣṭhinā || 12 ||
[Analyze grammar]

pūrvādi cottarānte tu tanmūrtiṃ tu vicintayet |
āgneyādiṣu koṇeṣu vainateyādikān nyaset || 13 ||
[Analyze grammar]

mṛtagasyādhipatiṃ siṃhaṃ vainateyāṃśakaṃ nyaset |
tasmin pūrṇaghaṭe madhye pauruṣaṃ sūktamabhyaset || 14 ||
[Analyze grammar]

digdevādiṣu kumbheṣu tattanmūrtiṃ japet kramāt |
ṛgādīnāṃ tu vedānāṃ sāramuddhṛtya nārada || 15 ||
[Analyze grammar]

pūrvādisomaparyantamuccaret susvareṇa tu |
tataḥ pūrṇaghaṭādīni cārcayettena mantrataḥ || 16 ||
[Analyze grammar]

havirnivedayet paścāt mantreṇa parameṣṭhinā |
mukhavāsaṃ tato dadyāt rakṣāṃ kṛtvāṣṭadikkrāmat || 17 ||
[Analyze grammar]

ghaṇṭādhvanisamāyuktaṃ gandhapuṣpādibhiḥ saha |
haviṣā balidānaṃ tu kārayedaṣṭadikṣu ca || 18 ||
[Analyze grammar]

kumudādīni sarvāṇi gṛhṇanti balimuttamam |
śaṅkṣadundubhinirghoṣaṃ kṛtvāsmin munisattama || 19 ||
[Analyze grammar]

tataḥ puṣpāñjaliṃ kṛtvā sādhakaḥ paramārthavit |
namaskṛtyākhilān sarvān maṅgalānuccaretkramāt || 20 ||
[Analyze grammar]

prabhātāyāṃ tu śarvaryāmācāryaḥ snānamācaret |
sūktena puruṣeṇaiva mantraṃ vā parameṣṭhinā || 21 ||
[Analyze grammar]

kumbhasthitena deveśaṃ pūjayet puruṣottamam |
gandhādi dīpaparyantaṃ tattanmantreṇa sādhakaḥ || 22 ||
[Analyze grammar]

pūrvādīśānaparyantamarcayedaṣṭadigghaṭān |
mahāmumbhādi saṃgṛhya prāsādaṃ tu paribhramet || 23 ||
[Analyze grammar]

śaṅkhabheryādinādaistu nṛttagītasamanvitam |
svastivācanasaṃyuktaṃ garbhāgāraṃ praveśayet || 24 ||
[Analyze grammar]

devasyāgre tu saṃsthāpya taṇḍulopari nārada |
mahākumbhasthadeveśaṃ vidhinādhipatiṃ param || 25 ||
[Analyze grammar]

tatpūrvapārśve saṃsthāpya taṇḍuleṣu ghaṭān kramāt |
arghyapādyādinābhyarcya mukhavāsāvasānakam || 26 ||
[Analyze grammar]

evamabhyarcya matimān kṣamyatāmiti coccaran |
mantrahīnaṃ kriyāhīnaṃ bhaktihīnaṃ janārdana || 27 ||
[Analyze grammar]

kṣantumarhasi deveśa paripūrṇaṃ tadastu me |
evaṃ kṛtvā tu mantrajño maṅgalāni samīrayet || 28 ||
[Analyze grammar]

ācāryaḥ puṣpamādāya namaskṛtya hariṃ prabhum |
kumbhasthitena deveśe mūlabere niyojayet || 29 ||
[Analyze grammar]

tathaivāṣṭaghaṭācchaktiṃ taddehe viniveśayet |
parameṣṭhyā nyaset pūrvaṃ diṅmūrtyādīn svavidyayā || 30 ||
[Analyze grammar]

mūlaberasya mūrdhneva secayettāṃstribindunā |
devapāde tu hastābhyāṃ puṣpaṃ datvā punaḥ punaḥ || 31 ||
[Analyze grammar]

tataḥ puruṣाsūktaṃ tu brāhmaṇaiḥ saha saṃjapet |
tasmin kāle mahāprājña ācāryaṃ pūjayeddhanaiḥ || 32 ||
[Analyze grammar]

navavastrāṅgulīyaistu kaṭakādivibhūṣaṇaiḥ |
kumbhasthitena toyena prokṣayedgehamuttamam || 33 ||
[Analyze grammar]

atropayuktaṃ yaddravyaṃ devatālaṃkṛtaṃ vinā |
ācāryāya pradātavyaṃ vastraṃ vrīhyādibhiḥ saha || 34 ||
[Analyze grammar]

niveditaṃ tu tatsarvaṃ sāttvatebhyo nivedayet |
śilpinaṃ pūjayettatra daivajñamanupūjayet || 35 ||
[Analyze grammar]

brāhmaṇān bhojayettatra vaiṣṇavān vedapāragān |
kriyāvasāne matimān citrakarma ca kārayet || 36 ||
[Analyze grammar]

havanaṃ maṇḍapādyeṣu evameva samācaret |
evamuktaprakāreṇa kārayedadhivāsanam || 37 ||
[Analyze grammar]

vāsādhivāsanaṃ caiva prāsādaprokṣaṇe mune |
aṅkurārpaṇakārye tu homamatra na vidyate || 38 ||
[Analyze grammar]

bālagehaṃ tu devarṣe kalpayet pūrvavat kramāt |
jagatī kumudādīni varjayettaruṇālaye || 39 ||
[Analyze grammar]

bālālayapratiṣṭhāyāṃ sthaṇḍile homamācaret |
adhivāsādikarmāṇi vāsavādīni kārayet || 40 ||
[Analyze grammar]

evamuktaprakāreṇa śaktimudvāsya nārada |
jīrṇoddhāraṃ tataḥ kuryāt śilpinā kuśalena tu || 41 ||
[Analyze grammar]

anyathā kurute mohāt grāmanāśo dhanakṣayaḥ |
sthānanāśo bhavettatra saṃbhavennātra saṃśayaḥ || 42 ||
[Analyze grammar]

tasmāt sarvaprayatnena vimānastha hariṃ param |
udvāsayenmahābere kramāt pūrvaṃ yathāvidhi || 43 ||
[Analyze grammar]

tasmāt sarvaprayatnena śaktyudvāsanamārabhet |
mārgeṇaikena saṃyojya prāsādasyādhidaivatam || 44 ||
[Analyze grammar]

vinodamaṇḍapaṃ caiva vapraprākārake tathā |
parivārālayādyeṣu bahiḥ prākārake tathā || 45 ||
[Analyze grammar]

evamuktaprakāreṇa kārayedadhivāsanam |
evaṃ saṃkṣepataḥ proktaṃ jīrṇoddhāramathārabhet || 46 ||
[Analyze grammar]

ataḥ paraṃ pravakṣyāmi jīrṇoddhāravidhiṃ param |
ācāryaṃ yajamānaṃ ca takṣācāryaṃ mahāmune || 47 ||
[Analyze grammar]

mṛṇmayapratimājīrṇe śūlamṛtpaṭarajjavaḥ |
punastu mṛṇmayāḥ kāryā śilayā vāpi kārayet || 48 ||
[Analyze grammar]

śailajapratimājīrṇe lohajāḥ śailajāstathā |
ratnajapratimājīrṇe sauvarṇaṃ vāpi rājatam || 49 ||
[Analyze grammar]

dārumṛcchailalohādyā rukmaratnādikāḥ kramāt |
uttamā iti vijñeyā uttarottaramagrataḥ || 50 ||
[Analyze grammar]

rukmaṃ ratnaṃ samānaṃ ca kecidāhurmanīṣiṇaḥ |
śilālohaṃ ca sadṛśaṃ devarṣe iti kecana || 51 ||
[Analyze grammar]

hāṭakaṃ rajataṃ tāmraṃ samānamiti nārada |
lohaśabdena saṃjñātvā kārayedutsavādikam || 52 ||
[Analyze grammar]

yajamānasya vāñchā cet yathāvittānusārataḥ |
asmin munivaraśreṣṭha trapukaṃ cāyasaṃ vinā || 53 ||
[Analyze grammar]

ātmārthe ca parārthe ca pratimākaraṇe mune |
adhamadravyasaṃpannaṃ parakāryamanuttamam || 54 ||
[Analyze grammar]

sadṛśane tu yatkāryaṃ madhyamaṃ procyate budhaiḥ |
nottamaṃ tvadhamaiḥ kāryaṃ kurvan mohāt praṇaśyati || 55 ||
[Analyze grammar]

rājarāṣṭraṃ ca sakalaṃ iti śāstrasya niścayaḥ |
dravya eva visaṃvādo mānonmānapramāṇakaiḥ || 56 ||
[Analyze grammar]

na nyūnamatiriktaṃ ca yadi cetsiddhimātmanaḥ |
mūlaberādiberāṇaṃ jīrṇoddhāravidhau mune || 57 ||
[Analyze grammar]

ātmārthe vā parārthe vā tulyametaddvijottama |
ātmārthe vaṃśanāśaḥ syāt parārthe rāṣṭranāśanam || 58 ||
[Analyze grammar]

tasmāt sarvaprayatnena kārayedvidhicoditam |
vimānaṃ pratimāṃ vāpi prākāraṃ gopuraṃ tathā || 59 ||
[Analyze grammar]

maṇḍapaṃ pūrvavat kuryāt navakarmānulepane |
naṣṭālayaṃ cettadbhūmau purāṇoktaṃ cārṣaṃ tu vā || 60 ||
[Analyze grammar]

daivikaṃ mānuṣaṃ vāpi yathākāmaṃ tu kārayet |
uttamālayamatraiva uttamottamameva vā || 61 ||
[Analyze grammar]

adhamottamaṃ vā viprendra jīrṇaṃ cenmunisattama |
madhyamenādhamenaiva kārayedālayaṃ punaḥ || 62 ||
[Analyze grammar]

yajamānasya vāñchā cenmadhyame'pyevameva tu |
adhamālayaṃ bhavettasmin adhamottamameva vā || 63 ||
[Analyze grammar]

adhamādhamamevātha jīrṇoddhāraṇakarmaṇi |
upapīṭhasamāyuktaṃ dvitalaṃ tritalaṃ tu vā || 64 ||
[Analyze grammar]

yathāvittānusāreṇa kuryādekatalaṃ tu vā |
uttamādikramaṃ jñātvā yathākāmaṃ tu vardhayet || 65 ||
[Analyze grammar]

vardhanācchriyamāpnoti rājño rāṣṭrasya nārada |
tathaiva nagarādīnāmālayasya viśeṣataḥ || 66 ||
[Analyze grammar]

bhavanaṃ gopurākāraṃ śālakūṭādikaṃ mune |
jīrṇaṃ cediha loke tu kārayedvā prapākṛtim || 67 ||
[Analyze grammar]

nagarādīni saṃjñātvā grāmarājānukūlataḥ |
yathāvittānusāreṇa kuryādveśma yathāparuci || 68 ||
[Analyze grammar]

grāmānukūlato vāpi dhāma kuryādanuttamama |
pratimāṃ punaratraiva kuryāt prāsādamātrataḥ || 69 ||
[Analyze grammar]

dvāramānena vā cāsmin garbhamānena vā mune |
uttamādhamamadhyena naṣṭoddhāraṇakarmaṇi || 70 ||
[Analyze grammar]

tadgehāt paścime yāmye nirgamākṛti neṣyate |
pūrvavat kārayejjīrṇasyoddhāre munisattama || 71 ||
[Analyze grammar]

saṃmohāt paściye yāmye nirgamaṃ kārayedyadi |
grāmasya kalahaṃ kuryāt dharmamārgaṃ vinaśyati || 72 ||
[Analyze grammar]

tadrāṣṭraṃ yajamānaśca naśyatyeva na saṃśayaḥ |
tasmāt sarvaprayatnene na kuryānnirgamākṛtim || 73 ||
[Analyze grammar]

pūrvadvārasya gehasya maṇḍapādi yathākramam |
yajamānasya vāñchā cedyathākāmaṃ tu vardhayet || 74 ||
[Analyze grammar]

sarvaśaḥ pratidikṣvādi paścimaṃ neṣyate mune |
pūrvadvārasya gehasya maṇḍapādi yathākramam || 75 ||
[Analyze grammar]

jīrṇoddhāre muniśreṣṭha sarvaṃ pūrvavadācaret |
tasmāt sarvaprayatnena yathākāmaṃ tu vardhayet || 76 ||
[Analyze grammar]

vardhanācchriyamāpnoti tadgehasya dine dine |
prākārādiṣu bhūṣāṇāṃ bhedo vā doṣakāraṇam || 77 ||
[Analyze grammar]

na bhavediti bhāṣante munayo nāradādayaḥ |
gopure'dhikabhāvaṃ ca prākāre'pi viśeṣataḥ || 78 ||
[Analyze grammar]

evaṃ parīkṣya matimān navakarmānulepane |
naṣṭoddhāre ca vai cāsmin jīrṇoddhārādiṣu kramāt || 79 ||
[Analyze grammar]

kārayet sādhakaḥ paścāt śilpācāryasamanvitaḥ |
mūlabere muniśreṣṭha bhinnaṃ chedyaṃ bhavedyadi || 80 ||
[Analyze grammar]

sphuṭitaṃ cettu tadberaṃ tyaktvā paścānmahāmune |
śaktimudvāsayedberāt kṣipraṃ śāntiṃ samācaret || 81 ||
[Analyze grammar]

tasyāgre vidhivat kumbhe saṃsthāpya harimavyayam |
tatkumbhamadhye mūlena mūlaberānnayeddharim || 82 ||
[Analyze grammar]

śāntihomaṃ tataḥ kṛtvā cakramantreṇa mantravit |
sudarśanamahāmantraṃ sarvaśantikaraṃ bhavet || 83 ||
[Analyze grammar]

āvāhanavisargaṃ tu kumbhāt pūrvavadācaret |
bālasthānaṃ kramāt kalpya sthāpayedvidhicoditam || 84 ||
[Analyze grammar]

jalādhivāsanaṃ tasya neṣyate munisattama |
sadyo'dhivāsanenaiva sthāpayeddharimavyayam || 85 ||
[Analyze grammar]

jīrṇoddhāre muniśreṣṭha kālavelādi neṣyate |
nirīkṣya bahudhā doṣān pūjākāle dine dine || 86 ||
[Analyze grammar]

paścāt saṃpūjayeddevaṃ doṣahīnaṃ bhavedyadi |
evaṃ doṣasamāyuktaṃ mohāllobhādyajeddharim || 87 ||
[Analyze grammar]

tatpūjā niṣphalā yāti kartā bhartā ca naśyati |
tadgrāmaṃ nidhanaṃ yāti rogavṛddhirbhaviṣyati || 88 ||
[Analyze grammar]

tasmāt sarvaprayatnena jīrṇoddhāraṇamācaret |
dhvaje vārohite paścāt vaiguṇyaṃ yadi dṛśyate || 89 ||
[Analyze grammar]

utsavaṃ ca muniśreṣṭha śāntihomasamanvitam |
bālasthāne samāsādya utsavaṃ tatra kārayet || 90 ||
[Analyze grammar]

anyathā cenmahādoṣo rājñaścaiva vināśakṛt |
tasmāt sarvaprayatnena śeṣakarma samācaret || 91 ||
[Analyze grammar]

nityotsavādi karmāṇi bālasthāne'pi nārada |
pūrvavat kārayeddhīmān iti śāstrasya niścayaḥ || 92 ||
[Analyze grammar]

mantrajño vaṃśasaṃpanno kulīnaḥ śāstrapāragaḥ |
tantrajño vedapāṭhī ca sthāpanādikriyāparaḥ || 93 ||
[Analyze grammar]

sarvāvayavasaṃpūrṇaḥ sarvarogavivarjitaḥ |
suśāntaḥ kuśalo dānto yadṛcchālābhatoṣakaḥ || 94 ||
[Analyze grammar]

amatsarī jitakrodhaḥ dhūdrasaṃkaravarjitaḥ |
varjyāvarjyaḥ kṛtajñaśca pūrvakārī ca bhaktimān || 95 ||
[Analyze grammar]

tadvaṃśyo vāpi śiṣyo vā praśiṣyastantrapāragaḥ |
tantravān dīkṣito vāpi guṇavān guṇavittamaḥ || 96 ||
[Analyze grammar]

rājayakṣmā ca kuṣṭhī ca gulmī ca śibi viṣṭakaḥ |
khalvāṭaḥ cātivṛddhaśca bālo vṛṣaṇarogavān || 97 ||
[Analyze grammar]

hrasvākāro'tidīrghaśca kṛśacibuka eva ca |
badhiro vikalāṅgaśca vipro radanadoṣayuk || 98 ||
[Analyze grammar]

varjayeddevakāryeṣu kunakhī ca viśeṣataḥ |
sthāpakācāryayoścaiva lakṣaṇaṃ viddhi nārada || 99 ||
[Analyze grammar]

saṃgrahellakṣaṇopetamācāryaṃ sthāpakaṃ tathā |
evaṃ parīkṣya matimān pratiṣṭhārādhanādiṣu || 100 ||
[Analyze grammar]

jīrṇoddhāre viśeṣeṇa lakṣayellakṣaṇān krāmat |
sumuhūrte sulagne ca sthāpakastakṣakānvitaḥ || 101 ||
[Analyze grammar]

tantreṇaikena kartavyaṃ karṣaṇādiṣu nārada |
yattantreṇa samārabdhaṃ tattantreṇa samācaret || 102 ||
[Analyze grammar]

anuktaṃ cānyatantreṣu nirīkṣyātra prayojayet |
viśeṣāṃśca muniśreṣṭha cānyathā rāṣṭranāśakṛt || 103 ||
[Analyze grammar]

cāturvarṇyasamopetaḥ sadācāraparāyaṇaḥ |
sadvaṃśyaḥ sarvaśāstrajño lokajñaḥ sarvadharmavit || 104 ||
[Analyze grammar]

bhaktimān dhanavān vāgmī sarvasaṃkalpavṛddhiyuk |
suśīlaśca surūpaśca śraddhāluḥ śuddhamānasaḥ || 105 ||
[Analyze grammar]

ācāryaḥ takṣakaścaiva vaṃśagaḥ sumukhottamaḥ |
śāstraprāmāṇyakaścaiva dīnaḥ subahubhṛtyavān || 106 ||
[Analyze grammar]

yathoktakārī matimān kuśalaḥ sarvakarmasu |
pūrvakārī ca tadvaṃśyaḥ tacchiṣyo vā praśiṣyakaḥ || 107 ||
[Analyze grammar]

tajjātīyo'nyajātīyaḥ pūrvāpūrvaguṇādhikaḥ |
pūrvāpalobhe tu gṛhṇīyāt uttaraṃ nānyathā mune || 108 ||
[Analyze grammar]

mohena yadi gṛhṇīyāt tasya syāt kartṛsaṃkaraḥ |
kartṛsaṃkaradoṣeṇa rājarāṣṭrasya rogakṛt || 109 ||
[Analyze grammar]

tasmāt sarvaprayatnena śāstradṛṣṭyā samācaret |
takṣakaṃ takṣasūtrajñaṃ kuśalaṃ sarvakarmasu || 110 ||
[Analyze grammar]

laghuhastaṃ surūpaṃ ca suśāntaṃ daivikaṃ tathā |
vaṃśānuvaṃśasampannaṃ kuśalaṃ satparāyaṇam || 111 ||
[Analyze grammar]

vaiṣṇavaṃ sūtrakālajñaṃ kriyājñaṃ pūrvakāriṇam |
dayāluṃ śāntamanasaṃ satīrthaṃ satsamādṛtam || 112 ||
[Analyze grammar]

tadalābhe tu tadvaṃśyān tacchiśyān vā praśiṣyakān |
saṃnimantritamevaṃ tat na kuryājjātisaṃkaram || 113 ||
[Analyze grammar]

anyajātisamālabdhamādikāle mahāmune |
anyajātyā kṛtaṃ mohādrājarāṣṭravināśakṛt || 114 ||
[Analyze grammar]

evaṃ lakṣaṇamālabhya karturicchāpuraḥsaram |
yo mohādanyamārgeṇa kārayenmunisattama || 115 ||
[Analyze grammar]

ācāryasya ca kartuśca takṣṇaścāpyaśubhaṃ bhavet |
iti subahu nirīkṣya buddhidṛṣṭyā |
satatamananyamatiḥ sa kartṛmatyā || 116 ||
[Analyze grammar]

sthapatimati ca kārayīta jīrṇo |
ddharaṇamasau jagatāṃ gururgururyaḥ |
viṣvaksenaḥ |
ataḥ paraṃ pravaṣyāmi prāsādasya viśeṣataḥ || 117 ||
[Analyze grammar]

rathādiśibikādīnāṃ prokṣaṇaṃ paramaṃ śubham |
sarvaśāntikaraṃ puṃsāṃ sarvatīrthaphalāpradam || 118 ||
[Analyze grammar]

pūrvoktamaṇḍape śuddhe sarvamaṅgalasaṃyute |
tanmadhye hastakāṃ vediṃ vṛttāṃ vā cutaraśrakām || 119 ||
[Analyze grammar]

kārayecchāstradṛṣṭena tannāma adhunocyate |
vṛttaṃ suśobhanaṃ nāma caturaśraṃ sumaṅgalam || 120 ||
[Analyze grammar]

rājarāṣṭravivṛddhyarthaṃ vṛttakāraṃ bhavet sadā |
grāmāyatanavṛddhyarthaṃ caturaśraṃ tu nārada || 121 ||
[Analyze grammar]

vṛttaṃ vākṛti vijñeyaḥ caturaśraṃ tu vādhiḥ |
āmeṣṭakābhiḥ pakvābhiḥ kuryādvedimanuttamām || 122 ||
[Analyze grammar]

hastocchrāyāṃ tadardhaṃ vā darpaṇodarasaṃnibhām |
pūrvavadvedimālipya prokṣayet pūrvavat kramāt || 123 ||
[Analyze grammar]

puṇyāhaṃ vācayettatra brāhmaṇānāmanujñayā |
pūrvavat sthaṇḍilaṃ kṛtvā śālinā munisattama || 124 ||
[Analyze grammar]

tadardhaṃ taṇḍulaṃ kṛtvā śālibhirvānyameva vā |
vedikāyāṃ tadūrdhve tu pīṭhaṃ kṛtvā likhet punaḥ || 125 ||
[Analyze grammar]

vedikāyāṃ tu paritaḥ śālibhirvedimācaret |
śālimadhye muniśreṣṭha cāṣṭadigdalamālikhet || 126 ||
[Analyze grammar]

chandomūlādivacanaṃ likhettaddalamadhyame |
sūtravastraparicchannaṃ sarvalakṣaṇasaṃyutam || 127 ||
[Analyze grammar]

candramaṇḍalamadhye tu sthāpayettena mantrataḥ |
tatkumbhajalamadhye tu sitapuṣpaṃ vinikṣipet || 128 ||
[Analyze grammar]

puṣpamālyairalaṃkṛtya vastrayugmairalaṃkṛtam |
navaratnasamāyuktaṃ navakūrcayutaṃ tathā || 129 ||
[Analyze grammar]

tasminnāvāhayenmadhye prāsādasyādhidaivatam |
madhye kumbhaṃ ca paritaḥ sthāpayedaṣṭadigdale || 130 ||
[Analyze grammar]

tattanmantreṇa matimān aṣṭakumbhānanukramāt |
navavastreṇa saṃchādya sūtrapuṣpajalānvitam || 131 ||
[Analyze grammar]

kūrcadvayasamopetaṃ puṣpamālyairalaṃkṛtam |
pūrvādīśānaparyantaṃ kumbhe pūrvavadānayet || 132 ||
[Analyze grammar]

ācāryaḥ samalaṃkṛtya hemavastrāṅgulīyakaiḥ |
kumbhasya dakṣiṇe pārśve uttarābhimukhaḥ sthitaḥ || 133 ||
[Analyze grammar]

puṇpāñjalipuṭaṃ kṛtvā imaṃ mantraṃ japedbudhaḥ |
sahasraśīrṣādīni sūktaṃ tu puruṣeṇa tu || 134 ||
[Analyze grammar]

mulaberānnayet kumbhe devaṃ prāsādarūpiṇam |
athavā muniśārdūla cānayet parameṣṭhinā || 135 ||
[Analyze grammar]

digdalāṣṭaghaṭe vidvān tattanmantreṇa cānayet |
pūrvavadbalidānaṃ tu kāreyanmantravittamaḥ || 136 ||
[Analyze grammar]

tathaiva prokṣayedvidvān sūktena puruṣeṇa tu |
garbhagehaṃ tathā prokṣya bahirantaḥ samantataḥ || 137 ||
[Analyze grammar]

kumbhasthitena deveśaṃ vimānādiṣu yojayet |
arghyapādyādinābhyarcya havistatra na vidyate || 138 ||
[Analyze grammar]

baliṃ tu kārayettatra cāṣṭadikṣu samantataḥ |
tasmin kāle mahāprājño ācārya pūjayet kramāt || 139 ||
[Analyze grammar]

hemavastrāṅgulīyaistu pūjayeddevavattadā |
śilpinaṃ pūjayettatra navavastrāṅgulīyakaiḥ || 140 ||
[Analyze grammar]

brāhmaṇān bhojayettatra vaiṣṇavān vedapāragān |
evameva tu kartavyaṃ triradhā śibikāni ca || 141 ||
[Analyze grammar]

rathādivāhanānāṃ tu khageśācchaktimānayet |
tena mantreṇa mantrajño prokṣayet pūrvavat kramāt || 142 ||
[Analyze grammar]

caṇḍālapatitodakyāniṣādyai stakṣakādikaiḥ |
lobhādvā yadi vā mohāt sparśanaṃ cenmunīśvara || 143 ||
[Analyze grammar]

prāsādaprokṣaṇenaiva prāsādaṃ śuddhyate'tra vai |
athavā muniśārdūla pañcagavyaṃ samānayet || 144 ||
[Analyze grammar]

devāgre hastamātraṃ tu samālipya samāhitaḥ |
droṇaśāliṃ tu vistīrya tadardhaṃ taṇḍulaṃ tathā || 145 ||
[Analyze grammar]

tatra madhye likhet padmaṃ pūrvoktena vidhānataḥ |
pañcagavyaṃ tu saṃsthāpya tena bījena sādhakaḥ || 146 ||
[Analyze grammar]

puṇyāhaṃ vācayettatra gandhapuṣpādinārcayet |
havirnivedayet paścāt smaran devasya rūpiṇam || 147 ||
[Analyze grammar]

prokṣayedgavyakairmantraiḥ pañcopaniṣadaiḥ kramāt |
tataḥ saptadaśā bhinnān kalaśān baliberage || 148 ||
[Analyze grammar]

snapanaṃ kārayettasmin śuddhyate nātra saṃśayaḥ |
caṇḍālādyaiśca saṃspṛṣṭaṃ prāyaścittamidaṃ smṛtam || 149 ||
[Analyze grammar]

prāsādaprokṣaṇaṃ paścāt kārayedvidhicoditam |
ācāryaṃ pūjayettatra yathāvittānusārataḥ || 150 ||
[Analyze grammar]

diṅmūrtīnāṃ tu sarveṣāṃ na śuddhiriha nārada |
atra kaścidviśeṣo'sti diṅmūrtisthāpanāvidhau || 151 ||
[Analyze grammar]

ardhacitrapratiṣṭhāyāṃ yatproktaṃ saṃhitāntare |
tathaiva kārayettasmin diṅmūrtīnāṃ tu nārada || 152 ||
[Analyze grammar]

āyurārogyaputrādīn labhate nātra saṃśayaḥ |
utsavānte pralepānte durjanasparśane tathā || 153 ||
[Analyze grammar]

durnimittā daye caiva kāryaṃ saṃprokṣaṇāvidhiḥ |
diṅmūrtīnāṃ tu sarveṣāṃ utsavānte na kārayet || 154 ||
[Analyze grammar]

ardhacitrapratiṣṭhāsmin śeṣaṃ sādhāraṇaṃ bhavet |
durjanasparśanaṃ cettu prāsādaṃ munisattama || 155 ||
[Analyze grammar]

caṇḍālādyaiśca saṃspṛṣṭaṃ prāyaścittaṃ samācaret |
tenaiva śuddhyate tasmin nātra kāryā vicāraṇā || 156 ||
[Analyze grammar]

diṅmūrtīnāṃ tu sarveṣāmasmiṃstenaiva tuṣyati |
gehasyālepanānte ca durjanasparśane'pi ca || 157 ||
[Analyze grammar]

diṅmūrtīnāṃ tu sarveṣāṃ viśeṣaṃ na tu kārayet |
tathaiva durnimitteṣu śeṣaṃ pūrvavadācaret || 158 ||
[Analyze grammar]

prāsādaprokṣaṇenaiva śuddhyate nātra saṃśayaḥ |
nāstikyenaiva yo mohāt anyathākurute mune || 159 ||
[Analyze grammar]

tat sthānaṃ nāśakṛdvāpi tadgrāmasya tathaiva ca |
tasmāttu vidhivat samyak kārayettantravittamaḥ || 160 ||
[Analyze grammar]