Chapter 30

jite mahendre'tibale rāvaṇasya sutena vai |
prajāpatiṃ puraskṛtya gatā laṅkāṃ surāstadā || 1 ||
[Analyze grammar]

taṃ rāvaṇaṃ samāsādya putrabhrātṛbhirāvṛtam |
abravīdgagane tiṣṭhan sāntvapūrvaṃ prajāpatiḥ || 2 ||
[Analyze grammar]

vatsa rāvaṇa tuṣṭo'smi tava putrasya saṃyuge |
aho'sya vikramaudāryaṃ tava tulyo'dhiko'pi vā || 3 ||
[Analyze grammar]

jitaṃ hi bhavatā sarvaṃ trailokyaṃ svena tejasā |
kṛtā pratijñā saphalā prīto'smi svasutena vai || 4 ||
[Analyze grammar]

ayaṃ ca putro'tibalastava rāvaṇarāvaṇiḥ |
indrajittviti vikhyāto jagatyeṣa bhaviṣyati || 5 ||
[Analyze grammar]

balavāñ śatrunirjetā bhaviṣyatyeṣa rākṣasaḥ |
yamāśritya tvayā rājan sthāpitāstridaśā vaśe || 6 ||
[Analyze grammar]

tanmucyatāṃ mahābāho mahendraḥ pākaśāsanaḥ |
kiṃ cāsya mokṣaṇārthāya prayacchanti divaukasaḥ || 7 ||
[Analyze grammar]

athābravīnmahātejā indrajit samitiṃjayaḥ |
amaratvamahaṃ deva vṛṇomīhāsya mokṣaṇe || 8 ||
[Analyze grammar]

abravīttu tadā devo rāvaṇiṃ kamalodbhavaḥ |
nāsti sarvāmaratvaṃ hi keṣāṃ cit prāṇināṃ bhuvi || 9 ||
[Analyze grammar]

athābravīt sa tatrasthamindrajit padmasaṃbhavam |
śrūyatāṃ yā bhavet siddhiḥ śatakratuvimokṣaṇe || 10 ||
[Analyze grammar]

mameṣṭaṃ nityaśo deva havyaiḥ saṃpūjya pāvakam |
saṃgrāmamavatartuṃ vai śatrunirjayakāṅkṣiṇaḥ || 11 ||
[Analyze grammar]

tasmiṃścedasamāpte tu japyahome vibhāvasoḥ |
yudhyeyaṃ deva saṃgrāme tadā me syādvināśanam || 12 ||
[Analyze grammar]

sarvo hi tapasā caiva vṛṇotyamaratāṃ pumān |
vikrameṇa mayā tvetadamaratvaṃ pravartitam || 13 ||
[Analyze grammar]

evamastviti taṃ prāha vākyaṃ devaḥ prajāpatiḥ |
muktaścendrajitā śakro gatāśca tridivaṃ surāḥ || 14 ||
[Analyze grammar]

etasminnantare śakro dīno bhraṣṭāmbarasrajaḥ |
rāma cintāparītātmā dhyānatatparatāṃ gataḥ || 15 ||
[Analyze grammar]

taṃ tu dṛṣṭvā tathābhūtaṃ prāha devaḥ prajāpatiḥ |
śakrakrato kimutkaṇṭhāṃ karoṣi smara duṣkṛtam || 16 ||
[Analyze grammar]

amarendra mayā bahvyaḥ prajāḥ sṛṣṭāḥ purā prabho |
ekavarṇāḥ samābhāṣā ekarūpāśca sarvaśaḥ || 17 ||
[Analyze grammar]

tāsāṃ nāsti viśeṣo hi darśane lakṣaṇe'pi vā |
tato'hamekāgramanāstāḥ prajāḥ paryacintayam || 18 ||
[Analyze grammar]

so'haṃ tāsāṃ viśeṣārthaṃ striyamekāṃ vinirmame |
yad yat prajānāṃ pratyaṅgaṃ viśiṣṭaṃ tattaduddhṛtam || 19 ||
[Analyze grammar]

tato mayā rūpaguṇairahalyā strī vinirmitā |
ahalyetyeva ca mayā tasyā nāma pravartitam || 20 ||
[Analyze grammar]

nirmitāyāṃ tu devendra tasyāṃ nāryāṃ surarṣabha |
bhaviṣyatīti kasyaiṣā mama cintā tato'bhavat || 21 ||
[Analyze grammar]

tvaṃ tu śakra tadā nārīṃ jānīṣe manasā prabho |
sthānādhikatayā patnī mamaiṣeti puraṃdara || 22 ||
[Analyze grammar]

sā mayā nyāsabhūtā tu gautamasya mahātmanaḥ |
nyastā bahūni varṣāṇi tena niryātitā ca sā || 23 ||
[Analyze grammar]

tatastasya parijñāya mayā sthairyaṃ mahāmuneḥ |
jñātvā tapasi siddhiṃ ca patnyarthaṃ sparśitā tadā || 24 ||
[Analyze grammar]

sa tayā saha dharmātmā ramate sma mahāmuniḥ |
āsannirāśā devāstu gautame dattayā tayā || 25 ||
[Analyze grammar]

tvaṃ kruddhastviha kāmātmā gatvā tasyāśramaṃ muneḥ |
dṛṣṭavāṃśca tadā tāṃ strīṃ dīptāmagniśikhāmiva || 26 ||
[Analyze grammar]

sā tvayā dharṣitā śakra kāmārtena samanyunā |
dṛṣṭastvaṃ ca tadā tena āśrame paramarṣiṇā || 27 ||
[Analyze grammar]

tataḥ kruddhena tenāsi śaptaḥ paramatejasā |
gato'si yena devendra daśābhāgaviparyayam || 28 ||
[Analyze grammar]

yasmānme dharṣitā patnī tvayā vāsava nirbhayam |
tasmāttvaṃ samare rājañ śatruhastaṃ gamiṣyasi || 29 ||
[Analyze grammar]

ayaṃ tu bhāvo durbuddhe yastvayeha pravartitaḥ |
mānuṣeṣvapi sarveṣu bhaviṣyati na saṃśayaḥ || 30 ||
[Analyze grammar]

tatrādharmaḥ subalavān samutthāsyati yo mahān |
tatrārdhaṃ tasya yaḥ kartā tvayyardhaṃ nipatiṣyati || 31 ||
[Analyze grammar]

na ca te sthāvaraṃ sthānaṃ bhaviṣyati puraṃdara |
etenādharmayogena yastvayeha pravartitaḥ || 32 ||
[Analyze grammar]

yaśca yaśca surendraḥ syāddhruvaḥ sa na bhaviṣyati |
eṣa śāpo mayā mukta ityasau tvāṃ tadābravīt || 33 ||
[Analyze grammar]

tāṃ tu bhāryāṃ vinirbhartsya so'bravīt sumahātapāḥ |
durvinīte vinidhvaṃsa mamāśramasamīpataḥ || 34 ||
[Analyze grammar]

rūpayauvanasaṃpannā yasmāttvamanavasthitā |
tasmād rūpavatī loke na tvamekā bhaviṣyasi || 35 ||
[Analyze grammar]

rūpaṃ ca tat prajāḥ sarvā gamiṣyanti sudurlabham |
yattavedaṃ samāśritya vibhrame'yamupasthitaḥ || 36 ||
[Analyze grammar]

tadā prabhṛti bhūyiṣṭhaṃ prajā rūpasamanvitāḥ |
śāpotsargāddhi tasyedaṃ muneḥ sarvamupāgatam || 37 ||
[Analyze grammar]

tat smara tvaṃ mahābāho duṣkṛtaṃ yattvayā kṛtam |
yena tvaṃ grahaṇaṃ śatrorgato nānyena vāsava || 38 ||
[Analyze grammar]

śīghraṃ yajasva yajñaṃ tvaṃ vaiṣṇavaṃ susamāhitaḥ |
pāvitastena yajñena yāsyasi tridivaṃ tataḥ || 39 ||
[Analyze grammar]

putraśca tava devendra na vinaṣṭo mahāraṇe |
nītaḥ saṃnihitaścaiva aryakeṇa mahodadhau || 40 ||
[Analyze grammar]

etacchrutvā mahendrastu yajñamiṣṭvā ca vaiṣṇavam |
punastridivamākrāmadanvaśāsacca devatāḥ || 41 ||
[Analyze grammar]

etadindrajito rāma balaṃ yat kīrtitaṃ mayā |
nirjitastena devendraḥ prāṇino'nye ca kiṃ punaḥ || 42 ||
[Analyze grammar]