Chapter 87

mahodaramahāpārśvau hatau dṛṣṭvā tu rākṣasau |
tasmiṃśca nihate vīre virūpākṣe mahābale || 1 ||
[Analyze grammar]

āviveśa mahān krodho rāvaṇaṃ tu mahāmṛdhe |
sūtaṃ saṃcodayāmāsa vākyaṃ cedamuvāca ha || 2 ||
[Analyze grammar]

nihatānāmamātyānāṃ ruddhasya nagarasya ca |
duḥkhameṣo'paneṣyāmi hatvā tau rāmalakṣmaṇau || 3 ||
[Analyze grammar]

rāmavṛkṣaṃ raṇe hanmi sītāpuṣpaphalapradam |
praśākhā yasya sugrīvo jāmbavān kumudo nalaḥ || 4 ||
[Analyze grammar]

sa diśo daśa ghoṣeṇa rathasyātiratho mahān |
nādayanprayayau tūrṇaṃ rāghavaṃ cābhyavartata || 5 ||
[Analyze grammar]

pūritā tena śabdena sanadīgirikānanā |
saṃcacāla mahī sarvā savarāhamṛgadvipā || 6 ||
[Analyze grammar]

tāmasaṃ sumahāghoraṃ cakārāstraṃ sudāruṇam |
nirdadāha kapīn sarvāṃste prapetuḥ samantataḥ || 7 ||
[Analyze grammar]

tānyanīkānyanekāni rāvaṇasya śarottamaiḥ |
dṛṣṭvā bhagnāni śataśo rāghavaḥ paryavasthitaḥ || 8 ||
[Analyze grammar]

sa dadarśa tato rāmaṃ tiṣṭhantamaparājitam |
lakṣmaṇena saha bhrātrā viṣṇunā vāsavaṃ yathā || 9 ||
[Analyze grammar]

ālikhantamivākāśamavaṣṭabhya mahaddhanuḥ |
padmapatraviśālākṣaṃ dīrghabāhumariṃdamam || 10 ||
[Analyze grammar]

vānarāṃśca raṇe bhagnānāpatantaṃ ca rāvaṇam |
samīkṣya rāghavo hṛṣṭo madhye jagrāha kārmukam || 11 ||
[Analyze grammar]

visphārayitumārebhe tataḥ sa dhanuruttamam |
mahāvegaṃ mahānādaṃ nirbhindanniva medinīm || 12 ||
[Analyze grammar]

tayoḥ śarapathaṃ prāpya rāvaṇo rājaputrayoḥ |
sa babhūva yathā rāhuḥ samīpe śaśisūryayoḥ || 13 ||
[Analyze grammar]

rāvaṇasya ca bāṇaughai rāmavispharitena ca |
śabdena rākṣasāstena petuśca śataśastadā || 14 ||
[Analyze grammar]

tamicchanprathamaṃ yoddhuṃ lakṣmaṇo niśitaiḥ śaraiḥ |
mumoca dhanurāyamya śarānagniśikhopamān || 15 ||
[Analyze grammar]

tānmuktamātrānākāśe lakṣmaṇena dhanuṣmatā |
bāṇānbāṇairmahātejā rāvaṇaḥ pratyavārayat || 16 ||
[Analyze grammar]

ekamekena bāṇena tribhistrīndaśabhirdaśa |
lakṣmaṇasya praciccheda darśayanpāṇilāghavam || 17 ||
[Analyze grammar]

abhyatikramya saumitriṃ rāvaṇaḥ samitiṃjayaḥ |
āsasāda tato rāmaṃ sthitaṃ śailamivācalam || 18 ||
[Analyze grammar]

sa saṃkhye rāmamāsādya krodhasaṃraktalocanaḥ |
vyasṛjaccharavarṣāni rāvaṇo rāghavopari || 19 ||
[Analyze grammar]

śaradhārāstato rāmo rāvaṇasya dhanuścyutāḥ |
dṛṣṭvaivāpatitāḥ śīghraṃ bhallāñjagrāha satvaram || 20 ||
[Analyze grammar]

tāñ śaraughāṃstato bhallaistīkṣṇaiściccheda rāghavaḥ |
dīpyamānānmahāvegān kruddhānāśīviṣāniva || 21 ||
[Analyze grammar]

rāghavo rāvaṇaṃ tūrṇaṃ rāvaṇo rāghavaṃ tathā |
anyonyaṃ vividhaistīkṣṇaiḥ śarairabhivavarṣatuḥ || 22 ||
[Analyze grammar]

ceratuśca ciraṃ citraṃ maṇḍalaṃ savyadakṣiṇam |
bāṇavegān samudīkṣya samareṣvaparājitau || 23 ||
[Analyze grammar]

tayorbhūtāni vitreṣuryugapat saṃprayudhyatoḥ |
raudrayoḥ sāyakamucoryamāntakanikāśayoḥ || 24 ||
[Analyze grammar]

saṃtataṃ vividhairbāṇairbabhūva gaganaṃ tadā |
ghanairivātapāpāye vidyunmālāsamākulaiḥ || 25 ||
[Analyze grammar]

gavākṣitamivākāśaṃ babhūva śūravṛṣṭibhiḥ |
mahāvegaiḥ sutīkṣṇāgrairgṛdhrapatraiḥ suvājitaiḥ || 26 ||
[Analyze grammar]

śarāndhakāraṃ tau bhīmaṃ cakratuḥ paramaṃ tadā |
gate'staṃ tapane cāpi mahāmeghāvivotthitau || 27 ||
[Analyze grammar]

babhūva tumulaṃ yuddhamanyonyavadhakāṅkṣiṇoḥ |
anāsādyamacintyaṃ ca vṛtravāsavayoriva || 28 ||
[Analyze grammar]

ubhau hi parameṣvāsāv ubhau śastraviśāradau |
ubhau cāstravidāṃ mukhyāv ubhau yuddhe viceratuḥ || 29 ||
[Analyze grammar]

ubhau hi yena vrajatastena tena śarormayaḥ |
ūrmayo vāyunā viddhā jagmuḥ sāgarayoriva || 30 ||
[Analyze grammar]

tataḥ saṃsaktahastastu rāvaṇo lokarāvaṇaḥ |
nārācamālāṃ rāmasya lalāṭe pratyamuñcata || 31 ||
[Analyze grammar]

raudracāpaprayuktāṃ tāṃ nīlotpaladalaprabhām |
śirasā dhārayan rāmo na vyathāṃ pratyapadyata || 32 ||
[Analyze grammar]

atha mantrānapi japan raudramastramudīrayan |
śarānbhūyaḥ samādāya rāmaḥ krodhasamanvitaḥ || 33 ||
[Analyze grammar]

mumoca ca mahātejāścāpamāyamya vīryavān |
tāñ śarān rākṣasendrāya cikṣepācchinnasāyakaḥ || 34 ||
[Analyze grammar]

te mahāmeghasaṃkāśe kavace patitāḥ śarāḥ |
avadhye rākṣasendrasya na vyathāṃ janayaṃstadā || 35 ||
[Analyze grammar]

punarevātha taṃ rāmo rathasthaṃ rākṣasādhipam |
lalāṭe paramāstreṇa sarvāstrakuśalo'bhinat || 36 ||
[Analyze grammar]

te bhittvā bāṇarūpāṇi pañcaśīrṣā ivoragāḥ |
śvasanto viviśurbhūmiṃ rāvaṇapratikūlatāḥ || 37 ||
[Analyze grammar]

nihatya rāghavasyāstraṃ rāvaṇaḥ krodhamūrchitaḥ |
āsuraṃ sumahāghoramanyadastraṃ samādade || 38 ||
[Analyze grammar]

siṃhavyāghramukhāṃścānyān kaṅkakākamukhānapi |
gṛdhraśyenamukhāṃścāpi sṛgālavadanāṃstathā || 39 ||
[Analyze grammar]

īhāmṛgamukhāṃścānyān vyāditāsyānbhayāvahān |
pañcāsyāṃl lelihānāṃśca sasarja niśitāñ śarān || 40 ||
[Analyze grammar]

śarān kharamukhāṃścānyān varāhamukhasaṃsthitān |
śvānakukkuṭavaktrāṃśca makarāśīviṣānanān || 41 ||
[Analyze grammar]

etāṃścānyāṃśca māyābhiḥ sasarja niśitāñ śarān |
rāmaṃ prati mahātejāḥ kruddhaḥ sarpa iva śvasan || 42 ||
[Analyze grammar]

āsureṇa samāviṣṭaḥ so'streṇa raghunandanaḥ |
sasarjāstraṃ mahotsāhaḥ pāvakaṃ pāvakopamaḥ || 43 ||
[Analyze grammar]

agnidīptamukhānbāṇāṃstathā sūryamukhānapi |
candrārdhacandravaktrāṃśca dhūmaketumukhānapi || 44 ||
[Analyze grammar]

grahanakṣatravarṇāṃśca maholkāmukhasaṃsthitān |
vidyujjihvopamāṃścānyān sasarja niśitāñ śarān || 45 ||
[Analyze grammar]

te rāvaṇaśarā ghorā rāghavāstrasamāhatāḥ |
vilayaṃ jagmurākāśe jagmuścaiva sahasraśaḥ || 46 ||
[Analyze grammar]

tadastraṃ nihataṃ dṛṣṭvā rāmeṇākliṣṭakarmaṇā |
hṛṣṭā nedustataḥ sarve kapayaḥ kāmarūpiṇaḥ || 47 ||
[Analyze grammar]