Chapter 88

tasminpratihate'stre tu rāvaṇo rākṣasādhipaḥ |
krodhaṃ ca dviguṇaṃ cakre krodhāccāstramanantaram || 1 ||
[Analyze grammar]

mayena vihitaṃ raudramanyadastraṃ mahādyutiḥ |
utsraṣṭuṃ rāvaṇo ghoraṃ rāghavāya pracakrame || 2 ||
[Analyze grammar]

tataḥ śūlāni niścerurgadāśca musalāni ca |
kārmukāddīpyamānāni vajrasārāṇi sarvaśaḥ || 3 ||
[Analyze grammar]

kūṭamudgarapāśāśca dīptāścāśanayastathā |
niṣpeturvividhāstīkṣṇā vātā iva yugakṣaye || 4 ||
[Analyze grammar]

tadastraṃ rāghavaḥ śrīmānuttamāstravidāṃ varaḥ |
jaghāna paramāstreṇa gandharveṇa mahādyutiḥ || 5 ||
[Analyze grammar]

tasminpratihate'stre tu rāghaveṇa mahātmanā |
rāvaṇaḥ krodhatāmrākṣaḥ sauramastramudīrayat || 6 ||
[Analyze grammar]

tataścakrāṇi niṣpeturbhāsvarāṇi mahānti ca |
kārmukādbhīmavegasya daśagrīvasya dhīmataḥ || 7 ||
[Analyze grammar]

tairāsīdgaganaṃ dīptaṃ saṃpatadbhiritastataḥ |
patadbhiśca diśo dīptaiścandrasūryagrahairiva || 8 ||
[Analyze grammar]

tāni ciccheda bāṇaughaiścakrāṇi tu sa rāghavaḥ |
āyudhāni vicitrāṇi rāvaṇasya camūmukhe || 9 ||
[Analyze grammar]

tadastraṃ tu hataṃ dṛṣṭvā rāvaṇo rākṣasādhipaḥ |
vivyādha daśabhirbāṇai rāmaṃ sarveṣu marmasu || 10 ||
[Analyze grammar]

sa viddho daśabhirbāṇairmahākārmukaniḥsṛtaiḥ |
rāvaṇena mahātejā na prākampata rāghavaḥ || 11 ||
[Analyze grammar]

tato vivyādha gātreṣu sarveṣu samitiṃjayaḥ |
rāghavastu susaṃkruddho rāvaṇaṃ bahubhiḥ śaraiḥ || 12 ||
[Analyze grammar]

etasminnantare kruddho rāghavasyānujo balī |
lakṣmaṇaḥ sāyakān sapta jagrāha paravīrahā || 13 ||
[Analyze grammar]

taiḥ sāyakairmahāvegai rāvaṇasya mahādyutiḥ |
dhvajaṃ manuṣyaśīrṣaṃ tu tasya ciccheda naikadhā || 14 ||
[Analyze grammar]

sāratheścāpi bāṇena śiro jvalitakuṇḍalam |
jahāra lakṣmaṇaḥ śrīmānnairṛtasya mahābalaḥ || 15 ||
[Analyze grammar]

tasya bāṇaiśca ciccheda dhanurgajakaropamam |
lakṣmaṇo rākṣasendrasya pañcabhirniśitaiḥ śaraiḥ || 16 ||
[Analyze grammar]

nīlameghanibhāṃścāsya sadaśvānparvatopamān |
jaghānāplutya gadayā rāvaṇasya vibhīṣaṇaḥ || 17 ||
[Analyze grammar]

hatāśvādvegavān vegādavaplutya mahārathāt |
krodhamāhārayattīvraṃ bhrātaraṃ prati rāvaṇaḥ || 18 ||
[Analyze grammar]

tataḥ śaktiṃ mahāśaktirdīptāṃ dīptāśanīmiva |
vibhīṣaṇāya cikṣepa rākṣasendraḥ pratāpavān || 19 ||
[Analyze grammar]

aprāptāmeva tāṃ bāṇaistribhiściccheda lakṣmaṇaḥ |
athodatiṣṭhat saṃnādo vānarāṇāṃ tadā raṇe || 20 ||
[Analyze grammar]

sā papāta tridhā chinnā śaktiḥ kāñcanamālinī |
savisphuliṅgā jvalitā maholkeva divaścyutā || 21 ||
[Analyze grammar]

tataḥ saṃbhāvitatarāṃ kālenāpi durāsadām |
jagrāha vipulāṃ śaktiṃ dīpyamānāṃ svatejasā || 22 ||
[Analyze grammar]

sā veginā balavatā rāvaṇena durātmanā |
jajvāla sumahāghorā śakrāśanisamaprabhā || 23 ||
[Analyze grammar]

etasminnantare vīro lakṣmaṇastaṃ vibhīṣaṇam |
prāṇasaṃśayamāpannaṃ tūrṇamevābhyapadyata || 24 ||
[Analyze grammar]

taṃ vimokṣayituṃ vīraścāpamāyamya lakṣmaṇaḥ |
rāvaṇaṃ śaktihastaṃ taṃ śaravarṣairavākirat || 25 ||
[Analyze grammar]

kīryamāṇaḥ śaraugheṇa visṛṣṭena mahātmanā |
na prahartuṃ manaścakre vimukhīkṛtavikramaḥ || 26 ||
[Analyze grammar]

mokṣitaṃ bhrātaraṃ dṛṣṭvā lakṣmaṇena sa rāvaṇaḥ |
lakṣmaṇābhimukhastiṣṭhannidaṃ vacanamabravīt || 27 ||
[Analyze grammar]

mokṣitaste balaślāghinyasmādevaṃ vibhīṣaṇaḥ |
vimucya rākṣasaṃ śaktistvayīyaṃ vinipātyate || 28 ||
[Analyze grammar]

eṣā te hṛdayaṃ bhittvā śaktirlohitalakṣaṇā |
madbāhuparighotsṛṣṭā prāṇānādāya yāsyati || 29 ||
[Analyze grammar]

ityevamuktvā tāṃ śaktimaṣṭaghaṇṭāṃ mahāsvanām |
mayena māyāvihitāmamoghāṃ śatrughātinīm || 30 ||
[Analyze grammar]

lakṣmaṇāya samuddiśya jvalantīmiva tejasā |
rāvaṇaḥ paramakruddhaścikṣepa ca nanāda ca || 31 ||
[Analyze grammar]

sā kṣiptā bhīmavegena śakrāśanisamasvanā |
śaktirabhyapatadvegāl lakṣmaṇaṃ raṇamūrdhani || 32 ||
[Analyze grammar]

tāmanuvyāharacchaktimāpatantīṃ sa rāghavaḥ |
svastyastu lakṣmaṇāyeti moghā bhava hatodyamā || 33 ||
[Analyze grammar]

nyapatat sā mahāvegā lakṣmaṇasya mahorasi |
jihvevoragarājasya dīpyamānā mahādyutiḥ || 34 ||
[Analyze grammar]

tato rāvaṇavegena sudūramavagāḍhayā |
śaktyā nirbhinnahṛdayaḥ papāta bhuvi lakṣmaṇaḥ || 35 ||
[Analyze grammar]

tadavasthaṃ samīpastho lakṣmaṇaṃ prekṣya rāghavaḥ |
bhrātṛsnehānmahātejā viṣaṇṇahṛdayo'bhavat || 36 ||
[Analyze grammar]

sa muhūrtamanudhyāya bāṣpavyākulalocanaḥ |
babhūva saṃrabdhataro yugānta iva pāvakaḥ || 37 ||
[Analyze grammar]

na viṣādasya kālo'yamiti saṃcintya rāghavaḥ |
cakre sutumulaṃ yuddhaṃ rāvaṇasya vadhe dhṛtaḥ || 38 ||
[Analyze grammar]

sa dadarśa tato rāmaḥ śaktyā bhinnaṃ mahāhave |
lakṣmaṇaṃ rudhirādigdhaṃ sapannagamivācalam || 39 ||
[Analyze grammar]

tāmapi prahitāṃ śaktiṃ rāvaṇena balīyasā |
yatnataste hariśreṣṭhā na śekuravamarditum |
arditāścaiva bāṇaughaiḥ kṣiprahastena rakṣasā || 40 ||
[Analyze grammar]

saumitriṃ sā vinirbhidya praviṣṭā dharaṇītalam |
tāṃ karābhyāṃ parāmṛśya rāmaḥ śaktiṃ bhayāvahām |
babhañja samare kruddho balavadvicakarṣa ca || 41 ||
[Analyze grammar]

tasya niṣkarṣataḥ śaktiṃ rāvaṇena balīyasā |
śarāḥ sarveṣu gātreṣu pātitā marmabhedinaḥ || 42 ||
[Analyze grammar]

acintayitvā tānbāṇān samāśliṣya ca lakṣmaṇam |
abravīcca hanūmantaṃ sugrīvaṃ caiva rāghavaḥ |
lakṣmaṇaṃ parivāryeha tiṣṭhadhvaṃ vānarottamāḥ || 43 ||
[Analyze grammar]

parākramasya kālo'yaṃ saṃprāpto me cirepsitaḥ |
pāpātmāyaṃ daśagrīvo vadhyatāṃ pāpaniścayaḥ |
kāṅkṣitaḥ stokakasyeva gharmānte meghadarśanam || 44 ||
[Analyze grammar]

asminmuhūrte nacirāt satyaṃ pratiśṛṇomi vaḥ |
arāvaṇamarāmaṃ vā jagaddrakṣyatha vānarāḥ || 45 ||
[Analyze grammar]

rājyanāśaṃ vane vāsaṃ daṇḍake paridhāvanam |
vaidehyāśca parāmarśaṃ rakṣobhiśca samāgamam || 46 ||
[Analyze grammar]

prāptaṃ duḥkhaṃ mahadghoraṃ kleśaṃ ca nirayopamam |
adya sarvamahaṃ tyakṣye hatvā taṃ rāvaṇaṃ raṇe || 47 ||
[Analyze grammar]

yadarthaṃ vānaraṃ sainyaṃ samānītamidaṃ mayā |
sugrīvaśca kṛto rājye nihatvā vālinaṃ raṇe || 48 ||
[Analyze grammar]

yadarthaṃ sāgaraḥ krāntaḥ seturbaddhaśca sāgare |
so'yamadya raṇe pāpaścakṣurviṣayamāgataḥ || 49 ||
[Analyze grammar]

cakṣurviṣayamāgamya nāyaṃ jīvitumarhati |
dṛṣṭiṃ dṛṣṭiviṣasyeva sarpasya mama rāvaṇaḥ || 50 ||
[Analyze grammar]

svasthāḥ paśyata durdharṣā yuddhaṃ vānarapuṃgavāḥ |
āsīnāḥ parvatāgreṣu mamedaṃ rāvaṇasya ca || 51 ||
[Analyze grammar]

adya rāmasya rāmatvaṃ paśyantu mama saṃyuge |
trayo lokāḥ sagandharvāḥ sadevāḥ sarṣicāraṇāḥ || 52 ||
[Analyze grammar]

adya karma kariṣyāmi yal lokāḥ sacarācarāḥ |
sadevāḥ kathayiṣyanti yāvadbhūmirdhariṣyati || 53 ||
[Analyze grammar]

evamuktvā śitairbāṇaistaptakāñcanabhūṣaṇaiḥ |
ājaghāna daśagrīvaṃ raṇe rāmaḥ samāhitaḥ || 54 ||
[Analyze grammar]

atha pradīptairnārācairmusalaiścāpi rāvaṇaḥ |
abhyavarṣattadā rāmaṃ dhārābhiriva toyadaḥ || 55 ||
[Analyze grammar]

rāmarāvaṇamuktānāmanyonyamabhinighnatām |
śarāṇāṃ ca śarāṇāṃ ca babhūva tumulaḥ svanaḥ || 56 ||
[Analyze grammar]

te bhinnāśca vikīrṇāśca rāmarāvaṇayoḥ śarāḥ |
antarikṣāt pradīptāgrā nipeturdharaṇītale || 57 ||
[Analyze grammar]

tayorjyātalanirghoṣo rāmarāvaṇayormahān |
trāsanaḥ sarvabūtānāṃ sa babhūvādbhutopamaḥ || 58 ||
[Analyze grammar]

sa kīryamāṇaḥ śarajālavṛṣṭibhirmahātmanā dīptadhanuṣmatārditaḥ |
bhayāt pradudrāva sametya rāvaṇo yathānilenābhihato balāhakaḥ || 59 ||
[Analyze grammar]