Chapter 48

sa praviśya purīṃ laṅkāṃ rāmabāṇabhayārditaḥ |
bhagnadarpastadā rājā babhūva vyathitendriyaḥ || 1 ||
[Analyze grammar]

mātaṃga iva siṃhena garuḍeneva pannagaḥ |
abhibhūto'bhavad rājā rāghaveṇa mahātmanā || 2 ||
[Analyze grammar]

brahmadaṇḍaprakāśānāṃ vidyutsadṛśavarcasām |
smaran rāghavabāṇānāṃ vivyathe rākṣaseśvaraḥ || 3 ||
[Analyze grammar]

sa kāñcanamayaṃ divyamāśritya paramāsanam |
vikprekṣamāṇo rakṣāṃsi rāvaṇo vākyamabravīt || 4 ||
[Analyze grammar]

sarvaṃ tat khalu me moghaṃ yattaptaṃ paramaṃ tapaḥ |
yat samāno mahendreṇa mānuṣeṇāsmi nirjitaḥ || 5 ||
[Analyze grammar]

idaṃ tadbrahmaṇo ghoraṃ vākyaṃ māmabhyupasthitam |
mānuṣebhyo vijānīhi bhayaṃ tvamiti tattathā || 6 ||
[Analyze grammar]

devadānavagandharvairyakṣarākṣasapannagaiḥ |
avadhyatvaṃ mayā prāptaṃ mānuṣebhyo na yācitam || 7 ||
[Analyze grammar]

etadevābhyupāgamya yatnaṃ kartumihārhatha |
rākṣasāścāpi tiṣṭhantu caryāgopuramūrdhasu || 8 ||
[Analyze grammar]

sa cāpratimagambhīro devadānavadarpahā |
brahmaśāpābhibhūtastu kumbhakarṇo vibodhyatām || 9 ||
[Analyze grammar]

sa parājitamātmānaṃ prahastaṃ ca niṣūditam |
jñātvā rakṣobalaṃ bhīmamādideśa mahābalaḥ || 10 ||
[Analyze grammar]

dvāreṣu yatnaḥ kriyatāṃ prākārāścādhiruhyatām |
nidrāvaśasamāviṣṭaḥ kumbhakarṇo vibodhyatām || 11 ||
[Analyze grammar]

nava ṣaṭ sapta cāṣṭau ca māsān svapiti rākṣasaḥ |
taṃ tu bodhayata kṣipraṃ kumbhakarṇaṃ mahābalam || 12 ||
[Analyze grammar]

sa hi saṃkhye mahābāhuḥ kakudaṃ sarvarakṣasām |
vānarān rājaputrau ca kṣiprameva vadhiṣyati || 13 ||
[Analyze grammar]

kumbhakarṇaḥ sadā śete mūḍho grāmyasukhe rataḥ |
rāmeṇābhinirastasya saṃgrāmo'smin sudāruṇe || 14 ||
[Analyze grammar]

bhaviṣyati na me śokaḥ kumbhakarṇe vibodhite |
kiṃ kariṣyāmyahaṃ tena śakratulyabalena hi || 15 ||
[Analyze grammar]

īdṛśe vyasane prāpte yo na sāhyāya kalpate |
te tu tadvacanaṃ śrutvā rākṣasendrasya rākṣasāḥ || 16 ||
[Analyze grammar]

jagmuḥ paramasaṃbhrāntāḥ kumbhakarṇaniveśanam |
te rāvaṇasamādiṣṭā māṃsaśoṇitabhojanāḥ || 17 ||
[Analyze grammar]

gandhamālyāṃstathā bhakṣyānādāya sahasā yayuḥ |
tāṃ praviśya mahādvārāṃ sarvato yojanāyatām || 18 ||
[Analyze grammar]

kumbhakarṇaguhāṃ ramyāṃ sarvagandhapravāhinīm |
pratiṣṭhamānāḥ kṛcchreṇa yatnāt praviviśurguhām || 19 ||
[Analyze grammar]

tāṃ praviśya guhāṃ ramyāṃ śubhāṃ kāñcanakuṭṭimām |
dadṛśurnairṛtavyāghraṃ śayānaṃ bhīmadarśanam || 20 ||
[Analyze grammar]

te tu taṃ vikṛtaṃ suptaṃ vikīrṇamiva parvatam |
kumbhakarṇaṃ mahānidraṃ sahitāḥ pratyabodhayan || 21 ||
[Analyze grammar]

ūrdhvaromāñcitatanuṃ śvasantamiva pannagam |
trāsayantaṃ mahāśvāsaiḥ śayānaṃ bhīmadarśanam || 22 ||
[Analyze grammar]

bhīmanāsāpuṭaṃ taṃ tu pātālavipulānanam |
dadṛśurnairṛtavyāghraṃ kumbhakarṇaṃ mahābalam || 23 ||
[Analyze grammar]

tataścakrurmahātmānaḥ kumbhakarṇāgratastadā |
māṃsānāṃ merusaṃkāśaṃ rāśiṃ paramatarpaṇam || 24 ||
[Analyze grammar]

mṛgāṇāṃ mahiṣāṇāṃ ca varāhāṇāṃ ca saṃcayān |
cakrurnairṛtaśārdūlā rāśimannasya cādbhutam || 25 ||
[Analyze grammar]

tataḥ śoṇitakumbhāṃśca madyāni vividhāni ca |
purastāt kumbhakarṇasya cakrustridaśaśatravaḥ || 26 ||
[Analyze grammar]

lilipuśca parārdhyena candanena paraṃtapam |
divyairācchādayāmāsurmālyairgandhaiḥ sugandhibhiḥ || 27 ||
[Analyze grammar]

dhūpaṃ sugandhaṃ sasṛjustuṣṭuvuśca paraṃtapam |
jaladā iva coneduryātudhānāḥ sahasraśaḥ || 28 ||
[Analyze grammar]

śaṅkhānāpūrayāmāsuḥ śaśāṅkasadṛśaprabhān |
tumulaṃ yugapaccāpi vineduścāpyamarṣitāḥ || 29 ||
[Analyze grammar]

nedurāsphoṭayāmāsuścikṣipuste niśācarāḥ |
kumbhakarṇavibodhārthaṃ cakruste vipulaṃ svanam || 30 ||
[Analyze grammar]

saśaṅkhabherīpaṭahapraṇādamāsphoṭitakṣveḍitasiṃhanādam |
diśo dravantastridivaṃ kirantaḥ śrutvā vihaṃgāḥ sahasā nipetuḥ || 31 ||
[Analyze grammar]

yadā bhṛśaṃ tairninadairmahātmā na kumbhakarṇo bubudhe prasuptaḥ |
tato musuṇḍīmusalāni sarve rakṣogaṇāste jagṛhurgadāśca || 32 ||
[Analyze grammar]

taṃ śailaśṛṅgairmusalairgadābhirvṛkṣaistalairmudgaramuṣṭibhiśca |
sukhaprasuptaṃ bhuvi kumbhakarṇaṃ rakṣāṃsyudagrāṇi tadā nijaghnuḥ || 33 ||
[Analyze grammar]

tasya niśvāsavātena kumbhakarṇasya rakṣasaḥ |
rākṣasā balavanto'pi sthātuṃ nāśaknuvanpuraḥ || 34 ||
[Analyze grammar]

tato'sya purato gāḍhaṃ rākṣasā bhīmavikramāḥ |
mṛdaṅgapaṇavānbherīḥ śaṅkhakumbhagaṇāṃstathā |
daśarākṣasasāhasraṃ yugapat paryavādayan || 35 ||
[Analyze grammar]

nīlāñjanacayākāraṃ te tu taṃ pratyabodhayan |
abhighnanto nadantaśca naiva saṃvivide tu saḥ || 36 ||
[Analyze grammar]

yadā cainaṃ na śekuste pratibodhayituṃ tadā |
tato gurutaraṃ yatnaṃ dāruṇaṃ samupākraman || 37 ||
[Analyze grammar]

aśvānuṣṭrān kharānnāgāñjaghnurdaṇḍakaśāṅkuśaiḥ |
bherīśaṅkhamṛdaṅgāṃśca sarvaprāṇairavādayan || 38 ||
[Analyze grammar]

nijaghnuścāsya gātrāṇi mahākāṣṭhakaṭaṃ karaiḥ |
mudgarairmusalaiścaiva sarvaprāṇasamudyataiḥ || 39 ||
[Analyze grammar]

tena śabdena mahatā laṅkā samabhipūritā |
saparvatavanā sarvā so'pi naiva prabudhyate || 40 ||
[Analyze grammar]

tataḥ sahasraṃ bherīṇāṃ yugapat samahanyata |
mṛṣṭakāñcanakoṇānāmasaktānāṃ samantataḥ || 41 ||
[Analyze grammar]

evamapyatinidrastu yadā naiva prabudhyata |
śāpasya vaśamāpannastataḥ kruddhā niśācarāḥ || 42 ||
[Analyze grammar]

mahākrodhasamāviṣṭāḥ sarve bhīmaparākramāḥ |
tad rakṣobodhayiṣyantaścakruranye parākramam || 43 ||
[Analyze grammar]

anye bherīḥ samājaghnuranye cakrurmahāsvanam |
keśānanye pralulupuḥ karṇāvanye daśanti ca |
na kumbhakarṇaḥ paspande mahānidrāvaśaṃ gataḥ || 44 ||
[Analyze grammar]

anye ca balinastasya kūṭamudgarapāṇayaḥ |
mūrdhni vakṣasi gātreṣu pātayan kūṭamudgarān || 45 ||
[Analyze grammar]

rajjubandhanabaddhābhiḥ śataghnībhiśca sarvataḥ |
vadhyamāno mahākāyo na prābudhyata rākṣasaḥ || 46 ||
[Analyze grammar]

vāraṇānāṃ sahasraṃ tu śarīre'sya pradhāvitam |
kumbhakarṇastato buddhaḥ sparśaṃ paramabudhyata || 47 ||
[Analyze grammar]

sa pātyamānairgiriśṛṅgavṛkṣairacintayaṃstān vipulānprahārān |
nidrākṣayāt kṣudbhayapīḍitaśca vijṛmbhamāṇaḥ sahasotpapāta || 48 ||
[Analyze grammar]

sa nāgabhogācalaśṛṅgakalpau vikṣipya bāhū giriśṛṅgasārau |
vivṛtya vaktraṃ vaḍavāmukhābhaṃ niśācaro'sau vikṛtaṃ jajṛmbhe || 49 ||
[Analyze grammar]

tasya jājṛmbhamāṇasya vaktraṃ pātālasaṃnibham |
dadṛśe meruśṛṅgāgre divākara ivoditaḥ || 50 ||
[Analyze grammar]

vijṛmbhamāṇo'tibalaḥ pratibuddho niśācaraḥ |
niśvāsaścāsya saṃjajñe parvatādiva mārutaḥ || 51 ||
[Analyze grammar]

rūpamuttiṣṭhatastasya kumbhakarṇasya tadbabhau |
tapānte sabalākasya meghasyeva vivarṣataḥ || 52 ||
[Analyze grammar]

tasya dīptāgnisadṛśe vidyutsadṛśavarcasī |
dadṛśāte mahānetre dīptāviva mahāgrahau || 53 ||
[Analyze grammar]

ādadbubhukṣito māṃsaṃ śoṇitaṃ tṛṣito'pibat |
medaḥ kumbhaṃ ca madyaṃ ca papau śakraripustadā || 54 ||
[Analyze grammar]

tatastṛpta iti jñātvā samutpeturniśācarāḥ |
śirobhiśca praṇamyainaṃ sarvataḥ paryavārayan || 55 ||
[Analyze grammar]

sa sarvān sāntvayāmāsa nairṛtānnairṛtarṣabhaḥ |
bodhanādvismitaścāpi rākṣasānidamabravīt || 56 ||
[Analyze grammar]

kimarthamahamāhatya bhavadbhiḥ pratibodhitaḥ |
kaccit sukuśalaṃ rājño bhayaṃ vā neha kiṃ cana || 57 ||
[Analyze grammar]

atha vā dhruvamanyebhyo bhayaṃ paramupasthitam |
yadarthameva tvaritairbhavadbhiḥ pratibodhitaḥ || 58 ||
[Analyze grammar]

adya rākṣasarājasya bhayamutpāṭayāmyaham |
pātayiṣye mahendraṃ vā śātayiṣye tathānalam || 59 ||
[Analyze grammar]

na hyalpakāraṇe suptaṃ bodhayiṣyati māṃ bhṛśam |
tadākhyātārthatattvena matprabodhanakāraṇam || 60 ||
[Analyze grammar]

evaṃ bruvāṇaṃ saṃrabdhaṃ kumbhakarṇamariṃdamam |
yūpākṣaḥ sacivo rājñaḥ kṛtāñjaliruvāca ha || 61 ||
[Analyze grammar]

na no devakṛtaṃ kiṃ cidbhayamasti kadā cana |
na daityadānavebhyo vā bhayamasti hi tādṛśam |
yādṛśaṃ mānuṣaṃ rājanbhayamasmānupasthitam || 62 ||
[Analyze grammar]

vānaraiḥ parvatākārairlaṅkeyaṃ parivāritā |
sītāharaṇasaṃtaptād rāmānnastumulaṃ bhayam || 63 ||
[Analyze grammar]

ekena vānareṇeyaṃ pūrvaṃ dagdhā mahāpurī |
kumāro nihataścākṣaḥ sānuyātraḥ sakuñjaraḥ || 64 ||
[Analyze grammar]

svayaṃ rakṣo'dhipaścāpi paulastyo devakaṇṭakaḥ |
mṛteti saṃyuge muktārāmeṇādityatejasā || 65 ||
[Analyze grammar]

yanna devaiḥ kṛto rājā nāpi daityairna dānavaiḥ |
kṛtaḥ sa iha rāmeṇa vimuktaḥ prāṇasaṃśayāt || 66 ||
[Analyze grammar]

sa yūpākṣavacaḥ śrutvā bhrāturyudhi parājayam |
kumbhakarṇo vivṛttākṣo yūpākṣamidamabravīt || 67 ||
[Analyze grammar]

sarvamadyaiva yūpākṣa harisainyaṃ salakṣmaṇam |
rāghavaṃ ca raṇe hatvā paścāddrakṣyāmi rāvaṇam || 68 ||
[Analyze grammar]

rākṣasāṃstarpayiṣyāmi harīṇāṃ māṃsaśoṇitaiḥ |
rāmalakṣmaṇayoścāpi svayaṃ pāsyāmi śoṇitam || 69 ||
[Analyze grammar]

tattasya vākyaṃ bruvato niśamya sagarvitaṃ roṣavivṛddhadoṣam |
mahodaro nairṛtayodhamukhyaḥ kṛtāñjalirvākyamidaṃ babhāṣe || 70 ||
[Analyze grammar]

rāvaṇasya vacaḥ śrutvā guṇadoṣu vimṛśya ca |
paścādapi mahābāho śatrūnyudhi vijeṣyasi || 71 ||
[Analyze grammar]

mahodaravacaḥ śrutvā rākṣasaiḥ parivāritaḥ |
kumbhakarṇo mahātejāḥ saṃpratasthe mahābalaḥ || 72 ||
[Analyze grammar]

taṃ samutthāpya bhīmākṣaṃ bhīmarūpaparākramam |
rākṣasāstvaritā jagmurdaśagrīvaniveśanam || 73 ||
[Analyze grammar]

tato gatvā daśagrīvamāsīnaṃ paramāsane |
ūcurbaddhāñjalipuṭāḥ sarva eva niśācarāḥ || 74 ||
[Analyze grammar]

prabuddhaḥ kumbhakarṇo'sau bhrātā te rākṣasarṣabha |
kathaṃ tatraiva niryātu drakṣyase tamihāgatam || 75 ||
[Analyze grammar]

rāvaṇastvabravīddhṛṣṭo yathānyāyaṃ ca pūjitam |
draṣṭumenamihecchāmi yathānyāyaṃ ca pūjitam || 76 ||
[Analyze grammar]

tathetyuktvā tu te sarve punarāgamya rākṣasāḥ |
kumbhakarṇamidaṃ vākyamūcū rāvaṇacoditāḥ || 77 ||
[Analyze grammar]

draṣṭuṃ tvāṃ kāṅkṣate rājā sarvarākṣasapuṃgavaḥ |
gamane kriyatāṃ buddhirbhrātaraṃ saṃpraharṣaya || 78 ||
[Analyze grammar]

kumbhakarṇastu durdharṣo bhrāturājñāya śāsanam |
tathetyuktvā mahāvīryaḥ śayanādutpapāta ha || 79 ||
[Analyze grammar]

prakṣālya vadanaṃ hṛṣṭaḥ snātaḥ paramabhūṣitaḥ |
pipāsustvarayāmāsa pānaṃ balasamīraṇam || 80 ||
[Analyze grammar]

tataste tvaritāstasya rājṣasā rāvaṇājñayā |
madyaṃ bhakṣyāṃśca vividhān kṣipramevopahārayan || 81 ||
[Analyze grammar]

pītvā ghaṭasahasraṃ sa gamanāyopacakrame || 82 ||
[Analyze grammar]

īṣatsamutkaṭo mattastejobalasamanvitaḥ |
kumbhakarṇo babhau hṛṣṭaḥ kālāntakayamopamaḥ || 83 ||
[Analyze grammar]

bhrātuḥ sa bhavanaṃ gacchan rakṣobalasamanvitaḥ |
kumbhakarṇaḥ padanyāsairakampayata medinīm || 84 ||
[Analyze grammar]

sa rājamārgaṃ vapuṣā prakāśayan sahasraraśmirdharaṇīmivāṃśubhiḥ |
jagāma tatrāñjalimālayā vṛtaḥ śatakraturgehamiva svayambhuvaḥ || 85 ||
[Analyze grammar]

ke ciccharaṇyaṃ śaraṇaṃ sma rāmaṃ vrajanti ke cidvyathitāḥ patanti |
ke ciddiśaḥ sma vyathitāḥ prayānti ke cidbhayārtā bhuvi śerate sma || 86 ||
[Analyze grammar]

tamadriśṛṅgapratimaṃ kirīṭinaṃ spṛśantamādityamivātmatejasā |
vanaukasaḥ prekṣya vivṛddhamadbhutaṃ bhayārditā dudruvire tatastataḥ || 87 ||
[Analyze grammar]