Chapter 49

tato rāmo mahātejā dhanurādāya vīryavān |
kirīṭinaṃ mahākāyaṃ kumbhakarṇaṃ dadarśa ha || 1 ||
[Analyze grammar]

taṃ dṛṣṭvā rākṣasaśreṣṭhaṃ parvatākāradarśanam |
kramamāṇamivākāśaṃ purā nārāyaṇaṃ prabhum || 2 ||
[Analyze grammar]

satoyāmbudasaṃkāśaṃ kāñcanāṅgadabhūṣaṇam |
dṛṣṭvā punaḥ pradudrāva vānarāṇāṃ mahācamūḥ || 3 ||
[Analyze grammar]

vidrutāṃ vāhinīṃ dṛṣṭvā vardhamānaṃ ca rākṣasaṃ |
savismayamidaṃ rāmo vibhīṣaṇamuvāca ha || 4 ||
[Analyze grammar]

ko'sau parvatasaṃkaśaḥ kirīṭī harilocanaḥ |
laṅkāyāṃ dṛśyate vīraḥ savidyudiva toyadaḥ || 5 ||
[Analyze grammar]

pṛthivyāḥ ketubhūto'sau mahāneko'tra dṛśyate |
yaṃ dṛṣṭvā vānarāḥ sarve vidravanti tatastataḥ || 6 ||
[Analyze grammar]

ācakṣva me mahān ko'sau rakṣo vā yadi vāsuraḥ |
na mayaivaṃvidhaṃ bhūtaṃ dṛṣṭapūrvaṃ kadā cana || 7 ||
[Analyze grammar]

sa pṛṣṭo rājaputreṇa rāmeṇākliṣṭakāriṇā |
vibhīṣaṇo mahāprājñaḥ kākutsthamidamabravīt || 8 ||
[Analyze grammar]

yena vaivasvato yuddhe vāsavaśca parājitaḥ |
saiṣa viśravasaḥ putraḥ kumbhakarṇaḥ pratāpavān || 9 ||
[Analyze grammar]

etena devā yudhi dānavāśca yakṣā bhujaṃgāḥ piśitāśanāśca |
gandharvavidyādharakiṃnarāśca sahasraśo rāghava saṃprabhagnāḥ || 10 ||
[Analyze grammar]

śūlapāṇiṃ virūpākṣaṃ kumbhakarṇaṃ mahābalam |
hantuṃ na śekustridaśāḥ kālo'yamiti mohitāḥ || 11 ||
[Analyze grammar]

prakṛtyā hyeṣa tejasvī kumbhakarṇo mahābalaḥ |
anyeṣāṃ rākṣasendrāṇāṃ varadānakṛtaṃ balam || 12 ||
[Analyze grammar]

etena jātamātreṇa kṣudhārtena mahātmanā |
bhakṣitāni sahasrāṇi sattvānāṃ subahūnyapi || 13 ||
[Analyze grammar]

teṣu saṃbhakṣyamāṇeṣu prajā bhayanipīḍitāḥ |
yānti sma śaraṇaṃ śakraṃ tamapyarthaṃ nyavedayan || 14 ||
[Analyze grammar]

sa kumbhakarṇaṃ kupito mahendro jaghāna vajreṇa śitena vajrī |
sa śakravajrābhihato mahātmā cacāla kopācca bhṛśaṃ nanāda || 15 ||
[Analyze grammar]

tasya nānadyamānasya kumbhakarṇasya dhīmataḥ |
śrutvā ninādaṃ vitrastā bhūyo bhūmirvitatrase || 16 ||
[Analyze grammar]

tataḥ kopānmahendrasya kumbhakarṇo mahābalaḥ |
vikṛṣyairāvatāddantaṃ jaghānorasi vāsavam || 17 ||
[Analyze grammar]

kumbhakarṇaprahārārto vicacāla sa vāsavaḥ |
tato viṣeduḥ sahasā devabrahmarṣidānavāḥ || 18 ||
[Analyze grammar]

prajābhiḥ saha śakraśca yayau sthānaṃ svayambhuvaḥ |
kumbhakarṇasya daurātmyaṃ śaśaṃsuste prajāpateḥ |
prajānāṃ bhakṣaṇaṃ cāpi devānāṃ cāpi dharṣaṇam || 19 ||
[Analyze grammar]

evaṃ prajā yadi tveṣa bhakṣayiṣyati nityaśaḥ |
acireṇaiva kālena śūnyo loko bhaviṣyati || 20 ||
[Analyze grammar]

vāsavasya vacaḥ śrutvā sarvalokapitāmahaḥ |
rakṣāṃsyāvāhayāmāsa kumbhakarṇaṃ dadarśa ha || 21 ||
[Analyze grammar]

kumbhakarṇaṃ samīkṣyaiva vitatrāsa prajāpatiḥ |
dṛṣṭvā niśvasya caivedaṃ svayambhūridamabravīt || 22 ||
[Analyze grammar]

dhruvaṃ lokavināśāya paurastyenāsi nirmitaḥ |
tasmāttvamadya prabhṛti mṛtakalpaḥ śayiṣyasi |
brahmaśāpābhibhūto'tha nipapātāgrataḥ prabhoḥ || 23 ||
[Analyze grammar]

tataḥ paramasaṃbhrānto rāvaṇo vākyamabravīt |
vivṛddhaḥ kāñcano vṛkṣaḥ phalakāle nikṛtyate || 24 ||
[Analyze grammar]

na naptāraṃ svakaṃ nyāyyaṃ śaptumevaṃ prajāpate |
na mithyāvacanaśca tvaṃ svapsyatyeṣa na saṃśayaḥ |
kālastu kriyatāmasya śayane jāgare tathā || 25 ||
[Analyze grammar]

rāvaṇasya vacaḥ śrutvā svayambhūridamabravīt |
śayitā hyeṣa ṣaṇ māsānekāhaṃ jāgariṣyati || 26 ||
[Analyze grammar]

ekenāhnā tvasau vīraścaranbhūmiṃ bubhukṣitaḥ |
vyāttāsyo bhakṣayel lokān saṃkruddha iva pāvakaḥ || 27 ||
[Analyze grammar]

so'sau vyasanamāpannaḥ kumbhakarṇamabodhayat |
tvatparākramabhītaśca rājā saṃprati rāvaṇaḥ || 28 ||
[Analyze grammar]

sa eṣa nirgato vīraḥ śibirādbhīmavikramaḥ |
vānarānbhṛśasaṃkruddho bhakṣayanparidhāvati || 29 ||
[Analyze grammar]

kumbhakarṇaṃ samīkṣyaiva harayo vipradudruvuḥ |
kathamenaṃ raṇe kruddhaṃ vārayiṣyanti vānarāḥ || 30 ||
[Analyze grammar]

ucyantāṃ vānarāḥ sarve yantrametat samucchritam |
iti vijñāya harayo bhaviṣyantīha nirbhayāḥ || 31 ||
[Analyze grammar]

vibhīṣaṇavacaḥ śrutvā hetumat sumukhodgatam |
uvāca rāghavo vākyaṃ nīlaṃ senāpatiṃ tadā || 32 ||
[Analyze grammar]

gaccha sainyāni sarvāṇi vyūhya tiṣṭhasva pāvake |
dvārāṇyādāya laṅkāyāścaryāścāpyatha saṃkramān || 33 ||
[Analyze grammar]

śailaśṛṅgāṇi vṛkṣāṃśca śilāścāpyupasaṃharan |
tiṣṭhantu vānarāḥ sarve sāyudhāḥ śailapāṇayaḥ || 34 ||
[Analyze grammar]

rāghaveṇa samādiṣṭo nīlo haricamūpatiḥ |
śaśāsa vānarānīkaṃ yathāvat kapikuñjaraḥ || 35 ||
[Analyze grammar]

tato gavākṣaḥ śarabho hanumānaṅgado nalaḥ |
śailaśṛṅgāṇi śailābhā gṛhītvā dvāramabhyayuḥ || 36 ||
[Analyze grammar]

tato harīṇāṃ tadanīkamugraṃ rarāja śailodyatavṛkṣahastam |
gireḥ samīpānugataṃ yathaiva mahanmahāmbhodharajālamugram || 37 ||
[Analyze grammar]