Chapter 29

guhāṃ praviṣṭe sugrīve vimukte gagane ghanaiḥ |
varṣarātroṣito rāmaḥ kāmaśokābhipīḍitaḥ || 1 ||
[Analyze grammar]

pāṇḍuraṃ gaganaṃ dṛṣṭvā vimalaṃ candramaṇḍalam |
śāradīṃ rajanīṃ caiva dṛṣṭvā jyotsnānulepanām || 2 ||
[Analyze grammar]

kāmavṛttaṃ ca sugrīvaṃ naṣṭāṃ ca janakātmajām |
buddhvā kālamatītaṃ ca mumoha paramāturaḥ || 3 ||
[Analyze grammar]

sa tu saṃjñāmupāgamya muhūrtānmatimānpunaḥ |
manaḥsthāmapi vaidehīṃ cintayāmāsa rāghavaḥ || 4 ||
[Analyze grammar]

āsīnaḥ parvatasyāgre hemadhātuvibhūṣite |
śāradaṃ gaganaṃ dṛṣṭva jagāma manasā priyām || 5 ||
[Analyze grammar]

dṛṣṭvā ca vimalaṃ vyoma gatavidyudbalāhakam |
sārasāravasaṃghuṣṭaṃ vilalāpārtayā girā || 6 ||
[Analyze grammar]

sārasāravasaṃnādaiḥ sārasāravanādinī |
yāśrame ramate bālā sādya me ramate katham || 7 ||
[Analyze grammar]

puṣpitāṃścāsanāndṛṣṭvā kāñcanāniva nirmalān |
kathaṃ sa ramate bālā paśyantī māmapaśyatī || 8 ||
[Analyze grammar]

yā purā kalahaṃsānāṃ svareṇa kalabhāṣiṇī |
budhyate cārusarvāṅgī sādya me budhyate katham || 9 ||
[Analyze grammar]

niḥsvanaṃ cakravākānāṃ niśamya sahacāriṇām |
puṇḍarīkaviśālākṣī kathameṣā bhaviṣyati || 10 ||
[Analyze grammar]

sarāṃsi sarito vāpīḥ kānanāni vanāni ca |
tāṃ vinā mṛgaśāvākṣīṃ carannādya sukhaṃ labhe || 11 ||
[Analyze grammar]

api tāṃ madviyogācca saukumāryācca bhāminīm |
na dūraṃ pīḍayet kāmaḥ śaradguṇanirantaraḥ || 12 ||
[Analyze grammar]

evamādi naraśreṣṭho vilalāpa nṛpātmajaḥ |
vihaṃga iva sāraṅgaḥ salilaṃ tridaśeśvarāt || 13 ||
[Analyze grammar]

tataścañcūrya ramyeṣu phalārthī girisānuṣu |
dadarśa paryupāvṛtto lakṣmīvāṃl lakṣmaṇo'grajam || 14 ||
[Analyze grammar]

taṃ cintayā duḥsahayā parītaṃ visaṃjñamekaṃ vijane manasvī |
bhrāturviṣādāt paritāpadīnaḥ samīkṣya saumitriruvāca rāmam || 15 ||
[Analyze grammar]

kimārya kāmasya vaśaṃgatena kimātmapauruṣyaparābhavena |
ayaṃ sadā saṃhṛiyate samādhiḥ kimatra yogena nivartitena || 16 ||
[Analyze grammar]

kriyābhiyogaṃ manasaḥ prasādaṃ samādhiyogānugataṃ ca kālam |
sahāyasāmarthyamadīnasattva svakarmahetuṃ ca kuruṣva hetum || 17 ||
[Analyze grammar]

na jānakī mānavavaṃśanātha tvayā sanāthā sulabhā pareṇa |
na cāgnicūḍāṃ jvalitāmupetya na dahyate vīravarārha kaścit || 18 ||
[Analyze grammar]

salakṣmaṇaṃ lakṣmaṇamapradhṛṣyaṃ svabhāvajaṃ vākyamuvāca rāmaḥ |
hitaṃ ca pathyaṃ ca nayaprasaktaṃ sasāmadharmārthasamāhitaṃ ca || 19 ||
[Analyze grammar]

niḥsaṃśayaṃ kāryamavekṣitavyaṃ kriyāviśeṣo hyanuvartitavyaḥ |
nanu pravṛttasya durāsadasya kumārakāryasya phalaṃ na cintyam || 20 ||
[Analyze grammar]

atha padmapalāśākṣīṃ maithilīmanucintayan |
uvāca lakṣmaṇaṃ rāmo mukhena pariśuṣyatā || 21 ||
[Analyze grammar]

tarpayitvā sahasrākṣaḥ salilena vasuṃdharām |
nirvartayitvā sasyāni kṛtakarmā vyavasthitaḥ || 22 ||
[Analyze grammar]

snigdhagambhīranirghoṣāḥ śailadrumapurogamāḥ |
visṛjya salilaṃ meghāḥ pariśrāntā nṛpātmaja || 23 ||
[Analyze grammar]

nīlotpaladalaśyāmaḥ śyāmīkṛtvā diśo daśa |
vimadā iva mātaṅgāḥ śāntavegāḥ payodharāḥ || 24 ||
[Analyze grammar]

jalagarbhā mahāvegāḥ kuṭajārjunagandhinaḥ |
caritvā viratāḥ saumya vṛṣṭivātāḥ samudyatāḥ || 25 ||
[Analyze grammar]

ghanānāṃ vāraṇānāṃ ca mayūrāṇāṃ ca lakṣmaṇa |
nādaḥ prasravaṇānāṃ ca praśāntaḥ sahasānagha || 26 ||
[Analyze grammar]

abhivṛṣṭā mahāmeghairnirmalāścitrasānavaḥ |
anuliptā ivābhānti girayaścandraraśmibhiḥ || 27 ||
[Analyze grammar]

darśayanti śarannadyaḥ pulināni śanaiḥ śanaiḥ |
navasaṃgamasavrīḍā jaghanānīva yoṣitaḥ || 28 ||
[Analyze grammar]

prasannasalilāḥ saumya kurarībhirvināditāḥ |
cakravākagaṇākīrṇā vibhānti salilāśayāḥ || 29 ||
[Analyze grammar]

anyonyabaddhavairāṇāṃ jigīṣūṇāṃ nṛpātmaja |
udyogasamayaḥ saumya pārthivānāmupasthitaḥ || 30 ||
[Analyze grammar]

iyaṃ sā prathamā yātrā pārthivānāṃ nṛpātmaja |
na ca paśyāmi sugrīvamudyogaṃ vā tathāvidham || 31 ||
[Analyze grammar]

catvāro vārṣikā māsā gatā varṣaśatopamāḥ |
mama śokābhitaptasya saumya sītāmapaśyataḥ || 32 ||
[Analyze grammar]

priyāvihīne duḥkhārte hṛtarājye vivāsite |
kṛpāṃ na kurute rājā sugrīvo mayi lakṣmaṇa || 33 ||
[Analyze grammar]

anātho hṛtarājyo'yaṃ rāvaṇena ca dharṣitaḥ |
dīno dūragṛhaḥ kāmī māṃ caiva śaraṇaṃ gataḥ || 34 ||
[Analyze grammar]

ityetaiḥ kāraṇaiḥ saumya sugrīvasya durātmanaḥ |
ahaṃ vānararājasya paribhūtaḥ paraṃtapa || 35 ||
[Analyze grammar]

sa kālaṃ parisaṃkhyāya sītāyāḥ parimārgaṇe |
kṛtārthaḥ samayaṃ kṛtvā durmatirnāvabudhyate || 36 ||
[Analyze grammar]

tvaṃ praviśya ca kiṣkindhāṃ brūhi vānarapuṃgavam |
mūrkhaṃ grāmya sukhe saktaṃ sugrīvaṃ vacanānmama || 37 ||
[Analyze grammar]

arthināmupapannānāṃ pūrvaṃ cāpyupakāriṇām |
āśāṃ saṃśrutya yo hanti sa loke puruṣādhamaḥ || 38 ||
[Analyze grammar]

śubhaṃ vā yadi vā pāpaṃ yo hi vākyamudīritam |
satyena parigṛhṇāti sa vīraḥ puruṣottamaḥ || 39 ||
[Analyze grammar]

kṛtārthā hyakṛtārthānāṃ mitrāṇāṃ na bhavanti ye |
tānmṛtānapi kravyādaḥ kṛtaghnānnopabhuñjate || 40 ||
[Analyze grammar]

nūnaṃ kāñcanapṛṣṭhasya vikṛṣṭasya mayā raṇe |
draṣṭumicchanti cāpasya rūpaṃ vidyudgaṇopamam || 41 ||
[Analyze grammar]

ghoraṃ jyātalanirghoṣaṃ kruddhasya mama saṃyuge |
nirghoṣamiva vajrasya punaḥ saṃśrotumicchati || 42 ||
[Analyze grammar]

kāmamevaṃgate'pyasya parijñāte parākrame |
tvatsahāyasya me vīra na cintā syānnṛpātmaja || 43 ||
[Analyze grammar]

yadarthamayamārambhaḥ kṛtaḥ parapuraṃjaya |
samayaṃ nābhijānāti kṛtārthaḥ plavageśvaraḥ || 44 ||
[Analyze grammar]

varṣāsamayakālaṃ tu pratijñāya harīśvaraḥ |
vyatītāṃścaturo māsān viharannāvabudhyate || 45 ||
[Analyze grammar]

sāmātyapariṣat krīḍanpānamevopasevate |
śokadīneṣu nāsmāsu sugrīvaḥ kurute dayām || 46 ||
[Analyze grammar]

ucyatāṃ gaccha sugrīvastvayā vatsa mahābala |
mama roṣasya yadrūpaṃ brūyāścainamidaṃ vacaḥ || 47 ||
[Analyze grammar]

na ca saṃkucitaḥ panthā yena vālī hato gataḥ |
samaye tiṣṭha sugrīvamā vālipathamanvagāḥ || 48 ||
[Analyze grammar]

eka eva raṇe vālī śareṇa nihato mayā |
tvāṃ tu satyādatikrāntaṃ haniṣyāmi sabāndhavam || 49 ||
[Analyze grammar]

tadevaṃ vihite kārye yaddhitaṃ puruṣarṣabha |
tattadbrūhi naraśreṣṭha tvara kālavyatikramaḥ || 50 ||
[Analyze grammar]

kuruṣva satyaṃ mayi vānareśvara pratiśrutaṃ dharmamavekṣya śāśvatam |
mā vālinaṃ pretya gato yamakṣayaṃ tvamadya paśyermama coditaiḥ śaraiḥ || 51 ||
[Analyze grammar]

sa pūrvajaṃ tīvravivṛddhakopaṃ lālapyamānaṃ prasamīkṣya dīnam |
cakāra tīvrāṃ matimugratejā harīśvaramānavavaṃśanāthaḥ || 52 ||
[Analyze grammar]