Chapter 28

samīkṣya vimalaṃ vyoma gatavidyudbalāhakam |
sārasāravasaṃghuṣṭaṃ ramyajyotsnānulepanam || 1 ||
[Analyze grammar]

samṛddhārthaṃ ca sugrīvaṃ mandadharmārthasaṃgraham |
atyarthamasatāṃ mārgamekāntagatamānasaṃ || 2 ||
[Analyze grammar]

nivṛttakāryaṃ siddhārthaṃ pramadābhirataṃ sadā |
prāptavantamabhipretān sarvāneva manorathān || 3 ||
[Analyze grammar]

svāṃ ca pātnīmabhipretāṃ tārāṃ cāpi samīpsitām |
viharantamahorātraṃ kṛtārthaṃ vigatajvalam || 4 ||
[Analyze grammar]

krīḍantamiva deveśaṃ nandane'psarasāṃ gaṇaiḥ |
mantriṣu nyastakāryaṃ ca mantriṇāmanavekṣakam || 5 ||
[Analyze grammar]

utsannarājyasaṃdeśaṃ kāmavṛttamavasthitam |
niścitārtho'rthatattvajñaḥ kāladharmaviśeṣavit || 6 ||
[Analyze grammar]

prasādya vākyairmadhurairhetumadbhirmanoramaiḥ |
vākyavidvākyatattvajñaṃ harīśaṃ mārutātmajaḥ || 7 ||
[Analyze grammar]

hitaṃ tathyaṃ ca pathyaṃ ca sāmadharmārthanītimat |
praṇayaprītisaṃyuktaṃ viśvāsakṛtaniścayam |
harīśvaramupāgamya hanumān vākyamabravīt || 8 ||
[Analyze grammar]

rājyaṃ prāptaṃ yaśaścaiva kaulī śrīrabhivarthitā |
mitrāṇāṃ saṃgrahaḥ śeṣastadbhavān kartumarhati || 9 ||
[Analyze grammar]

yo hi mitreṣu kālajñaḥ satataṃ sādhu vartate |
tasya rājyaṃ ca kīrtiśca pratāpaścābhivardhate || 10 ||
[Analyze grammar]

yasya kośaśca daṇḍaśca mitrāṇyātmā ca bhūmipa |
samavetāni sarvāṇi sa rājyaṃ mahadaśnute || 11 ||
[Analyze grammar]

tadbhavān vṛttasaṃpannaḥ sthitaḥ pathi niratyaye |
mitrārthamabhinītārthaṃ yathāvat kartumarhati || 12 ||
[Analyze grammar]

yastu kālavyatīteṣu mitrakāryeṣu vartate |
sa kṛtvā mahato'pyarthānna mitrārthena yujyate || 13 ||
[Analyze grammar]

kriyatāṃ rāghavasyaitadvaidehyāḥ parimārgaṇam |
tadidaṃ vīra kāryaṃ te kālātītamariṃdama || 14 ||
[Analyze grammar]

na ca kālamatītaṃ te nivedayati kālavit |
tvaramāṇo'pi sanprājñastava rājan vaśānugaḥ || 15 ||
[Analyze grammar]

kulasya ketuḥ sphītasya dīrghabandhuśca rāghavaḥ |
aprameyaprabhāvaśca svayaṃ cāpratimo guṇaiḥ || 16 ||
[Analyze grammar]

tasya tvaṃ kuru vai kāryaṃ pūrvaṃ tena kṛtaṃ tava |
harīśvara hariśreṣṭhānājñāpayitumarhasi || 17 ||
[Analyze grammar]

na hi tāvadbhavet kālo vyatītaścodanādṛte |
coditasya hi kāryasya bhavet kālavyatikramaḥ || 18 ||
[Analyze grammar]

akarturapi kāryasya bhavān kartā harīśvara |
kiṃ punaḥ pratikartuste rājyena ca dhanena ca || 19 ||
[Analyze grammar]

śaktimānasi vikrānto vānararṣka gaṇeśvara |
kartuṃ dāśaratheḥ prītimājñāyāṃ kiṃ nu sajjase || 20 ||
[Analyze grammar]

kāmaṃ khalu śarair śaktaḥ surāsuramahoragān |
vaśe dāśarathiḥ kartuṃ tvatpratijñāṃ tu kāṅkṣate || 21 ||
[Analyze grammar]

prāṇatyāgāviśaṅkena kṛtaṃ tena tava priyam |
tasya mārgāma vaidehīṃ pṛthivyāmapi cāmbare || 22 ||
[Analyze grammar]

na devā na ca gandharvā nāsurā na marudgaṇāḥ |
na ca yakṣā bhayaṃ tasya kuryuḥ kimuta rākṣasāḥ || 23 ||
[Analyze grammar]

tadevaṃ śaktiyuktasya pūrvaṃ priyakṛtastathā |
rāmasyārhasi piṅgeśa kartuṃ sarvātmanā priyam || 24 ||
[Analyze grammar]

nādhastādavanau nāpsu gatirnopari cāmbare |
kasya cit sajjate'smākaṃ kapīśvara tavājñayā || 25 ||
[Analyze grammar]

tadājñāpaya kaḥ kiṃ te kṛte vasatu kutra cit |
harayo hyapradhṛṣyāste santi koṭyagrato'nagha || 26 ||
[Analyze grammar]

tasya tadvacanaṃ śrutvā kāle sādhuniveditam |
sugrīvaḥ sattvasaṃpannaścakāra matimuttamām || 27 ||
[Analyze grammar]

sa saṃdideśābhimataṃ nīlaṃ nityakṛtodyamam |
dikṣu sarvāsu sarveṣāṃ sainyānāmupasaṃgrahe || 28 ||
[Analyze grammar]

yathā senā samagrā me yūthapālāśca sarvaśaḥ |
samāgacchantyasaṃgena senāgrāṇi tathā kuru || 29 ||
[Analyze grammar]

ye tvantapālāḥ plavagāḥ śīghragā vyavasāyinaḥ |
samānayantu te sainyaṃ tvaritāḥ śāsanānmama |
svayaṃ cānantaraṃ sainyaṃ bhavānevānupaśyatu || 30 ||
[Analyze grammar]

tripañcarātrādūrdhvaṃ yaḥ prāpnuyānneha vānaraḥ |
tasya prāṇāntiko daṇḍo nātra kāryā vicāraṇā || 31 ||
[Analyze grammar]

harīṃśca vṛddhānupayātu sāṅgado bhavānmamājñāmadhikṛtya niścitām |
iti vyavasthāṃ haripuṃgaveśvaro vidhāya veśma praviveśa vīryavān || 32 ||
[Analyze grammar]