Chapter 24

[English text for this chapter is available]

śrīmārkaṃḍeya uvāca |
pitṝṇāṃ pretarūpāṇāṃ kṛtvā vākyaṃ mahīpate |
caṃdraśarmā dvijaśreṣṭho dvārakāṃ samupāgataḥ || 1 ||
[Analyze grammar]

rukmiṇīsahitaḥ kṛṣṇo yatra tiṣṭhati cānvaham |
yatra tiṣṭhaṃti tīrthāni tatra yāto dvijottamaḥ || 2 ||
[Analyze grammar]

yatra tiṣṭhaṃti yajñāśca yatra tiṣṭhaṃti devatāḥ |
yatra tiṣṭhaṃti ṛṣayo munayo yogavittamāḥ || 3 ||
[Analyze grammar]

yā purī siddhagaṃdharvaiḥ sevyate kiṃnarairnareḥ |
apsarogaṇayakṣaiśca dvārakā sarvakāmadā || 4 ||
[Analyze grammar]

svargārohaṇaniśreṇī vahate yatra gomatī |
sā purī mokṣadā nṛṇāṃ dṛṣṭā vipravareṇa hi || 5 ||
[Analyze grammar]

yasyāḥ sīmāṃ praviṣṭasya brahmahatyādipātakam |
naśyate darśanādeva tāṃ purīṃ ko na sevate || 6 ||
[Analyze grammar]

gatvā kṛṣṇapurīṃ dṛṣṭvā gomatīṃ caiva sāgaram |
manye kṛtārthamātmānaṃ jīvitaṃ yauvanaṃ dhanam || 7 ||
[Analyze grammar]

dṛṣṭvā kṛṣṇapurīṃ ramyāṃ kṛṣṇasya mukhapaṃkajam |
dhanyo'haṃ kṛtyakṛtyohaṃ sabhāgyo'haṃ dharātale || 8 ||
[Analyze grammar]

dṛṣṭvā kṛṣṇamukhaṃ ramyaṃ rukmiṇīṃ dvārakāṃ purīm |
tīrthakoṭisahasraistu sevitaiḥ kiṃ prayojanam || 9 ||
[Analyze grammar]

puṇyairlakṣasahasraistu prāptā dvāravatī śubhā |
śuklā vaiśākhamāse tu saṃprāptā madhusūdanī || 10 ||
[Analyze grammar]

dvādaśī trispṛśānāma pāpakoṭiśatāpahā |
dhanyāḥ sarve manuṣyāste vaiśākhe madhusūdanī || 11 ||
[Analyze grammar]

saṃprāptā trispṛśā yaistu budhavāreṇa saṃyutā |
na yajñaistu na vedaistu na tīrthaiḥ koṭisevitaiḥ |
prāpyate tatphalaṃ naiva dvārakāyāṃ yathā nṛṇām || 12 ||
[Analyze grammar]

evamuktvā dvijaśreṣṭho gomatītīramāśritaḥ |
upaspṛśya yathānyāyaṃ śāstradṛṣṭena karmaṇā || 13 ||
[Analyze grammar]

kṛtvā snānaṃ yathoktaṃ tu saṃtarpya pitṛdevatāḥ |
cakratīrthātsamādāya śilāṃścakrāṃkitāñchubhān |
pūjitāḥ puruṣasūktena yathoktavidhinā nṛpa || 14 ||
[Analyze grammar]

śivapūjā kṛtā paścātsaṃsmṛtya pitṛbhāṣitam |
dattvā piṃḍodakaṃ samyakpitṝṇāṃ vidhipūrvakam || 15 ||
[Analyze grammar]

vilepanaṃ ca vastrāṇi puṣpāṇi dhūpadīpako |
naivedyāni manojñāni kaṃdamūlaphalāni ca || 16 ||
[Analyze grammar]

tāṃbūlaṃ ca sakarpūraṃ kṛtvā nīrājanādikam |
pradakṣiṇāṃ namaskāraṃ stutipūrvaṃ punaḥpunaḥ || 17 ||
[Analyze grammar]

kṣamāpayitvā deveśaṃ cakre jāgaraṇaṃ tataḥ |
yāmatraye vyatīte tu caṃdraśarmā hyuvāca ha || 18 ||
[Analyze grammar]

āturasya ca dīnasya śṛṇu kṛṣṇa vaco mama |
saṃsārabhayasaṃtrastaṃ māṃ tvamuddhara keśava || 19 ||
[Analyze grammar]

tvatpādāṃbuja bhaktānāṃ na duḥkhaṃ pāpināmapi |
kiṃ punaḥ pāpahīnānāṃ dvādaśīsevināṃ nṛṇām || 20 ||
[Analyze grammar]

daśamīvedhajaṃ pāpaṃ kathitaṃ mama pūrvajaiḥ |
duṣkṛtaṃ nāśamāyātu tvatprasādājjanārddana || 21 ||
[Analyze grammar]

saviddhaṃ tvaddinaṃ kṛṣṇa yatkṛtaṃ jāgaraṃ hare |
tatpāpaṃ vilayaṃ yātu yathālavaṇamaṃbhasi || 22 ||
[Analyze grammar]

saviddhaṃ vāsaraṃ yasmā tkṛtaṃ mama pitāmahaiḥ |
pretatvaṃ tena saṃprāptaṃ mahāduḥkhaprasādhakam || 23 ||
[Analyze grammar]

yathā pretatvanirmuktā mama pūrvapitāmahāḥ |
muktiṃ prayāṃti deveśa tathā kuru jagatpate || 24 ||
[Analyze grammar]

punareva yaduśreṣṭha prasādaṃ kartumarhasi |
avidyāmohitenāpi na kṛtaṃ tava pūjanam || 25 ||
[Analyze grammar]

mayā pāpena deveśa śivabhaktiḥ samāśritā |
tava bhaktiḥ kṛtā naiva na kṛtaṃ tava vāsaram || 26 ||
[Analyze grammar]

na dṛṣṭā dvārakā kṛṣṇa na snāto gomatījale |
na dṛṣṭaṃ pādapadmaṃ ca tvadīyaṃ mokṣadā yakam || 27 ||
[Analyze grammar]

na kṛtā dvārakāyātrā dṛṣṭvā someśvaraṃ prabhum |
viphalaṃ sukṛtaṃ jātaṃ yanmayā samupārjitam || 28 ||
[Analyze grammar]

matpūrvajaistu kathitaṃ sarvameva sureśvara |
tatpuṇyaṃ mā vṛthā yātu prasādāttava keśava || 29 ||
[Analyze grammar]

dṛṣṭaṃ tu tava vaktraṃ ca durllabhaṃ bhuvanatraye |
tannāsti devakīputra purāṇeṣu śrutaṃ mayā || 30 ||
[Analyze grammar]

sāparādhāstu ye kecicchiśupālādayaḥ smṛtāḥ |
tvatkareṇa hatāḥ kopānmuktiṃ prāptā mahīvarāḥ || 31 ||
[Analyze grammar]

adyaprabhṛti karttavyaṃ pūjanaṃ pratyahaṃ ca tat |
palārdhenāpi viddhaṃ syādbhoktavyaṃ vāsare tava || 32 ||
[Analyze grammar]

tvatpriyā ca mayā kāryyā dvādaśī vratasaṃyutā |
bhaktirbhāgavatānāṃ ca kāryyā prāṇairddhanairapi || 33 ||
[Analyze grammar]

nityaṃ nāmasahasraṃ tu paṭhanīyaṃ tava priyam |
pūjā tu tulasīpatrairmayā kāryā sadaiva hi || 34 ||
[Analyze grammar]

tulasīkāṣṭhasaṃbhūtā mālā dhāryyā sadā mayā |
nṛtyaṃ gītaṃ ca karttavyaṃ saṃprāpte jāgare tava || 35 ||
[Analyze grammar]

dvārakāyāṃ prakarttavyaṃ pratyahaṃ gamanaṃ mayā |
tvatkathāśravaṇārthaṃ ca nityaṃ pustakavācanam || 36 ||
[Analyze grammar]

nityaṃ pādodakaṃ mūrdhnā mayā dhāryaṃ subhaktitaḥ |
naivedyabhakṣaṇaṃ caiva kariṣyāmi subhaktitaḥ || 37 ||
[Analyze grammar]

nirmālyaṃ śirasā dhāryyaṃ tvadīyaṃ sādaraṃ mayā |
tava dattvā yadiṣṭaṃ tu bhakṣaṇīyaṃ sadā mayā || 38 ||
[Analyze grammar]

tathā tathā prakarttavyaṃ yena tuṣṭirbhavettava |
tathyametanmayā kṛṣṇa tavāgre parikīrtitam || 39 ||
[Analyze grammar]

śrīkṛṣṇa uvāca |
sādhusādhu mahābhāga candraśarmandvijottama |
āgamiṣyaṃti malloke tvayā saha pitāmahāḥ || 40 ||
[Analyze grammar]

paśya pretatvanirmuktā matprasādāddvijottama |
ākāśe garuḍārūḍhāstava pūrvapitāmahāḥ || 41 ||
[Analyze grammar]

pitāmahā ūcuḥ |
tvatprasādādvayaṃ putra muktiṃ prāptā na saṃśayaḥ |
pretayonervinirmuktāḥ kṛṣṇavaktrāvalokanāt || 42 ||
[Analyze grammar]

dhanyāste mānuṣe loke putrapautraprapautrakāḥ |
dṛṣṭvā śrīsomanāthaṃ tu kṛṣṇaṃ paśyaṃti dvārakām || 43 ||
[Analyze grammar]

dhanyā ca vidhavā nārī kṛṣṇayātrāṃ karoti yā |
uddhariṣyati loke'sminkulānāṃ nirayācchatam || 44 ||
[Analyze grammar]

śvapaco'pi karotyevaṃ yātrāṃ ca hariśāṃkarīm |
sa yāti paramāṃ muktiṃ pitṛbhiḥ parivāritaḥ || 45 ||
[Analyze grammar]

yaḥ punastīrthasaṃnyāsaṃ kṛtvā tiṣṭhati tatra vai |
viṣṇulokānnivṛttirna kalpakoṭiśatairapi || 46 ||
[Analyze grammar]

vaṃcitāste na sandeho dṛṣṭvā someśvaraṃ prabhum |
dṛṣṭaṃ kṛṣṇamukhaṃ naiva na snātā gomatījale || 47 ||
[Analyze grammar]

kiṃ jalairbahubhiḥ puṇyaistīrthakoṭisamudbhavaiḥ |
dṛṣṭvā someśvaraṃ yastu dvārakāṃ naiva gacchati |
dhikkurvaṃti ca taṃ pāpaṃ pitaro divi saṃsthitāḥ || 48 ||
[Analyze grammar]

dṛṣṭvā someśvaraṃ devaṃ kṛṣṇaṃ dṛṣṭvā punaḥ śivam |
sauparṇe kathitaṃ puṇyaṃ yātrāśatasamudbhavam || 49 ||
[Analyze grammar]

dṛṣṭvā someśvaraṃ devaṃ kṛṣṇaṃ naiva prapaśyati |
mohādvyarthagataṃ tasya sarvaṃ saṃsārakarma vai || 50 ||
[Analyze grammar]

āgatya yaḥ prabhāse ca kṛṣṇaṃ paśyati vai naraḥ |
prabhāsāyutasaṃkhyaṃ tu phalamāpnoti yatnataḥ || 51 ||
[Analyze grammar]

yasmātsarvāṇi tīrthāni sarve devāstathā makhāḥ |
dvārakāyāṃ samāyāṃti trikālaṃ kṛṣṇasaṃnidhau || 52 ||
[Analyze grammar]

tīrthairnānāvidhaiḥ putra tatsthānaiḥ kiṃ prayojanam |
phalaṃ samastatīrthānāṃ dṛṣṭvā dvāravatīṃ labhet || 53 ||
[Analyze grammar]

hate kaṃse jarāsandhe narake ca nipātite |
uttārite bhuvo bhāre kṛṣṇo devakinaṃdanaḥ |
cakre dvāravatīṃ ramyāṃ sannidhau sāgarasya ca || 54 ||
[Analyze grammar]

sthitaḥ prītamanāḥ kṛṣṇo lapsyate kāminīsukham || 55 ||
[Analyze grammar]

brahmāgnivāyusūryāśca vāsavādyā divaukasaḥ |
marttyā viprāśca rājānaḥ pātālātpannageśvarāḥ || 56 ||
[Analyze grammar]

nadyo nadāśca śailāśca vanānyupavanāni ca |
puragrāmā hyaraṇyāni sāgarāśca sarāṃsi ca || 57 ||
[Analyze grammar]

yakṣāścāsuragaṃdharvāḥ siddhā vidyādharāstathā |
rambhādyapsarasaścaiva prahlādādyā diteḥ sutāḥ |
rakṣā vibhīṣaṇādyāśca dhanado rakṣa nāyakaḥ || 58 ||
[Analyze grammar]

ṛṣayo munayaḥ siddhāḥ sanakādyāśca yoginaḥ |
grahā ṛkṣāṇi yogāśca dhruvaḥ paramavaiṣṇavaḥ || 59 ||
[Analyze grammar]

yatkiṃcittriṣu lokeṣu tiṣṭhate sthāṇujaṃgamam |
śrīkṛṣṇasannidhau nityaṃ pratyahaṃ tiṣṭhate sadā || 60 ||
[Analyze grammar]

na tyajaṃti purīṃ puṇyāṃ dvārakāṃ kṛṣṇasevitām |
sā tvayā sevitā putra sāṃprataṃ kṛṣṇadarśanāt |
piśācayoninirmuktā yāsyāmaḥ paramāṃ gatim || 61 ||
[Analyze grammar]

dvādaśīvedhajaṃpāpaṃ dvārakāyāḥ prabhāvataḥ |
naṣṭaṃ putra na sandehaḥ saṃprāptāḥ paramaṃ padam || 62 ||
[Analyze grammar]

dvādaśīvedhasambhūtaṃ yattvayā pāpamarjitam |
kṛṣṇasya darśanātkṣīṇaṃ na jahyaṃ dvādaśīvratam || 63 ||
[Analyze grammar]

rakṣaṇīyaṃ prayatnena vedho daśamisambhavaḥ |
no cetputra na saṃdehaḥ pretayonimavāpsyasi || 64 ||
[Analyze grammar]

trailokya saṃbhavaṃ pāpaṃ teṣāṃ bhavati bhūtale |
saśalyaṃ ye prakurvaṃti vāsaraṃ kṛṣṇasaṃjñakam || 65 ||
[Analyze grammar]

prāyaścittaṃ na tasyāsti saśalyaṃ vāsaraṃ hareḥ |
ye kurvaṃti na te yāṃti manvataraśatairdivam || 66 ||
[Analyze grammar]

pretatvaṃ duḥsahaṃ putra duḥsahā yamayātanā |
tasmātputra na karttavyaṃ saśalyaṃ dvādaśīvratam || 67 ||
[Analyze grammar]

kārayaṃti hi ye tvajñāḥ kūṭayuktāśca hetukāḥ |
pretayoniṃ prayāsyaṃti pitṛbhiḥ saha sarvataḥ || 68 ||
[Analyze grammar]

dvādaśī daśamīviddhā saṃtānapravināśinī |
dhvaṃsinī pūrvapuṇyānāṃ kṛṣṇabhaktivināśinī || 69 ||
[Analyze grammar]

svasti te'stu gamiṣyāmaḥ prasādādrukmiṇīpateḥ |
prāptaṃ viṣṇupadaṃ putra apunarbhavasaṃjñakam || 70 ||
[Analyze grammar]

śrīkṛṣṇa uvāca |
caṃdraśarmanprasanno'haṃ tava bhaktyā dvijottama |
śaivabhāvaprapanno'pi yastvaṃ jāto'si vaiṣṇavaḥ || 71 ||
[Analyze grammar]

navasaptativarṣāṇi na kṛtaṃ vāsare mama |
saṃpūrṇaṃ matprasādena tava jātaṃ na saṃśayaḥ || 72 ||
[Analyze grammar]

ekenaivopavāsena trispṛśāsaṃbhavena hi |
dvārakāyāḥ prasādena maddṛṣṭyālokanena hi || 73 ||
[Analyze grammar]

avidyāmohitenaiva śivabhaktyā mamārcanam |
na kṛtaṃ matprasādena kṛtaṃ caiva bhaviṣyati || 74 ||
[Analyze grammar]

vaiśākhe yairahaṃ dṛṣṭo dvārakāyāṃ dvijottama |
trispṛśāvāsare caiva vaṃjulīvāsare tathā || 75 ||
[Analyze grammar]

unmīlinīdine prāpte prāpte vā pakṣavarddhinī |
naiteṣāṃ cāparādho'sti yadyapi brahmaghātakāḥ || 76 ||
[Analyze grammar]

janmaprabhṛti puṇyasya prakṛtasyāpi bhūsura |
matpurīdarśanenāpi phalabhāgī bhavennaraḥ || 77 ||
[Analyze grammar]

dṛṣṭvā samastatīrthāni prabhāsādīni bhūtale |
matpurīdarśanenaiva pṛṣṭvā'pīha bhavetphalam || 78 ||
[Analyze grammar]

māhātmyaṃ dvārakāyāstu maddine yatra tatra vā |
paṭhenmama purīṃ puṇyāṃ labhate matprasādataḥ || 79 ||
[Analyze grammar]

matpurīṃ vasatāṃ puṇyaṃ trikālaṃ mama darśanāt |
tatphalaṃ samavāpnoti yastvidaṃ paṭhate kalau || 80 ||
[Analyze grammar]

kalau kāśī ca mathurā hyavaṃtī ca dvijottama |
ayodhyā ca tathā māyā kāṃcī caiva ca matpurī || 81 ||
[Analyze grammar]

śāligrāmabhavaṃ caiva badarī ca tathottamā |
kurukṣetraṃ bhṛgukṣetraṃ puṣkaraṃ śubhasaṃjñakam || 82 ||
[Analyze grammar]

prayāgaṃ ca prabhāsaṃ ca kṣetraṃ vai hāṭakeśvaram |
gaṃgādvāraṃ śaukaraṃ ca gaṃgāsāgarasaṃgamam || 83 ||
[Analyze grammar]

naimiṣaṃ daṇḍakāraṇyaṃ tathā vṛndāvanaṃ dvija |
saiṃdhavaṃ cārbudākhyaṃ ca sarvāṇyāyatanāni ca || 84 ||
[Analyze grammar]

vanāni māgadhādīni puṣkarāṇi dvijottama |
śailarājādayaḥ śailā himādripramukhā hi ye || 85 ||
[Analyze grammar]

gaṃgādayaśca sarito bhūtale saṃti yāni vai |
tīrthāni triṣu kāleṣu samāni dvārakāpuraḥ || 86 ||
[Analyze grammar]

kalinā kalitaṃ sarvaṃ varjayitvā tu matpurīm |
vipra varṣaśate prāpte matpuryāṃ mama darśane || 87 ||
[Analyze grammar]

tava mṛtyurmahīdeva matprasādādbhaviṣyati |
trispṛśāvāsare prāpte vaiśākhe śuklapakṣataḥ || 88 ||
[Analyze grammar]

saṃgame budhavārasya divā bhūmau mamāgrataḥ |
daśamaṃ dvāramāsādya tava prāṇasya nirgamam |
bhaviṣyati na saṃdeho matprasādena bhūsura || 89 ||
[Analyze grammar]

svasthānaṃ gaccha vipreṃdra sarvānkāmānavāpsyasi |
madbhaktānāṃ yugāṃte'pi vināśo nopapadyate || 90 ||
[Analyze grammar]

madbhaktiṃ vahatāṃ puṃsāmiha loke pare'pi vā |
nāśubhaṃ vidyate kiṃcitkulakoṭiṃ nayeddivam || 91 ||
[Analyze grammar]

mārkaṇḍeya uvāca |
tato varṣaśate prāpte gatvā dvāravatīṃ purīm |
prāṇānkṛṣṇopadeśena tyaktvā mokṣaṃ jagāma ha || 92 ||
[Analyze grammar]

indradyumna tadākhyātaṃ māhātmyaṃ dvārakābhavam |
punarev pravakṣyāmi yatte manasi varttate || 93 ||
[Analyze grammar]

śṛṇvatāṃ paṭhatāṃ caiva māhā tmyaṃ dvārakābhavam |
sarvaṃ phalamavāpnoti kṛṣṇena kathitaṃ ca yat || 94 ||
[Analyze grammar]

vistārayaṃti loke'smiṃllikhitaṃ yasya veśmani |
pratyakṣaṃ dvārakāpuṇyaṃ prāpyate kṛṣṇasaṃbhavam || 95 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakākhaṇḍe candraśarmopākhyāne candraśarmaṇo dvārakāgamanapūrvaka kṛṣṇadattavaragrahaṇādi dvārakānagarīśraiṣṭhyamāhātmyavarṇanaṃnāma caturviṃśatitamo'dhyāyaḥ || 24 ||
[Analyze grammar]