Chapter 37

[English text for this chapter is available]

devyuvāca |
kimarthaṃ kaṃkaṇaṃ deva kṣipyate lavaṇāṃbhasi |
tasyā puṇyaṃ na pūrvoktaṃ yathāvadvaktumarhasi || 1 ||
[Analyze grammar]

ke maṃtrāḥ kiṃ vidhānaṃ tatkasminkāle mahatphalam |
kiṃ purābhūcca tadvṛttaṃ bhagavankaṃkaṇāśritam || 2 ||
[Analyze grammar]

īśvara uvāca |
āsītpurā mahīpālo bṛhadratha iti śrutaḥ |
tasya bhāryā'bhavatsādhvī nāmnā ceṃdumatī priyā || 3 ||
[Analyze grammar]

na devī na ca gandharvī nāsurī na ca kiṃnarī |
tādṛgrūpā mahādevi yādṛśī sā sumadhyamā || 4 ||
[Analyze grammar]

śīlarūpaguṇopetā nityaṃ sā tu pativatā |
sarvayoṣidguṇairyuktā yathā sādhvī hyarundhatī || 5 ||
[Analyze grammar]

pradhāna hasrasya saubhāgyamadagarvitā |
na vinā sa tayā reme muhūrttamapi pārthivaḥ || 6 ||
[Analyze grammar]

ekadā tasyarājarṣerarddhāsanagatā satī |
yāvattiṣṭhati rājeṃdramṛṣistāvadupāgataḥ |
kaṇvo nāma mahātejāstapasvī vedapāragaḥ || 7 ||
[Analyze grammar]

tamāgatamatho dṛṣṭvā sahasotthāya pārthivaḥ |
pūjāṃ kṛtvā yathānyāyaṃ dattvā cārghyamanuttamam || 8 ||
[Analyze grammar]

sukhāsīnaṃ tato matvā viśrāṃtaṃ munipuṃgavam |
āpṛcchatkuśalaṃ rājā sa sarvaṃ cānvamodayat || 9 ||
[Analyze grammar]

tato dharmakathāṃ cakre sa ṛṣirnṛpasannidhau || 10 ||
[Analyze grammar]

tataḥ kathāvasāne sā bhāryā tasya mahīpateḥ |
abravīdamṛtaṃ vākyaṃ kṛtāṃjalipuṭā satī || 11 ||
[Analyze grammar]

indumatyuvāca |
tvaṃ vetsi bhagavansarvamatītānāgataṃ vibho |
pṛcche tvāṃ kautukāviṣṭā tasmāttvaṃ kṣaṃtumarhasi || 12 ||
[Analyze grammar]

anyadehodbhavaṃ karma mama sarvaṃ prakīrttaya |
īdṛśaṃ mama saubhāgyaṃ patirdevasutopamaḥ || 13 ||
[Analyze grammar]

saubhāgyaṃ patidevatvaṃ śīlaṃ trailokyaviśrutam |
kiṃ prabhāvo vratasyaiṣa utāhopoṣitasya vā || 14 ||
[Analyze grammar]

dānasya vā muniśreṣṭha yanme saubhāgyamuttamam |
vaśo rājā mahābāhurmama vākyānugaḥ sadā || 15 ||
[Analyze grammar]

etanme sarvamācakṣva paraṃ kautūhalaṃ hi me || 16 ||
[Analyze grammar]

sūta uvāca |
tasyāstadvacanaṃ śrutvā dhyātvā ca suciraṃ muniḥ |
abravītprahasanvākyaṃ kaṇvo vedavidāṃ varaḥ || 17 ||
[Analyze grammar]

kaṇva uvāca |
śṛṇu rājñi pravakṣyāmi anyadehodbhavaṃ tava |
na roṣaśca tvayā kāryo lajjā vāpi sumadhyame || 18 ||
[Analyze grammar]

tvamāsīdanyadehe tu ābhīrī paṃcabhartṛkā |
saurāṣṭraviṣaye hīnā devaṃ someśvaraṃ gatā || 19 ||
[Analyze grammar]

tataḥ snātuṃ praviṣṭā ca sāgare lavaṇāṃbhasi |
hatā kallolamālābhirvihvalatvamupāgatā || 20 ||
[Analyze grammar]

tava hastāccyutaṃ tatra haimaṃ kaṃkaṇameva ca |
naṣṭaṃ samudrasalile paścāttāpastu te sthitaḥ || 21 ||
[Analyze grammar]

atha kālena mahatā paṃcatvaṃ tvamupāgatā |
daśārṇādhipatergehe tato jātāsi sundari || 22 ||
[Analyze grammar]

bṛhadrathena coḍhāsi kaṃkaṇasya prabhā vataḥ |
na vrataṃ na tapo dānaṃ tvayā cīrṇaṃ purā śubhe || 23 ||
[Analyze grammar]

etatte sarvamākhyātaṃ yanmāṃ tvaṃ paripṛcchasi |
tacchrutvā sā viśālākṣī trapayā'dho mukhī tathā |
āsīttūṣṇīṃ tadā devī śrutvā vākyaṃ ca tādṛśam || 24 ||
[Analyze grammar]

evaṃ nivedya sa munī rājapatnīṃ varānane |
jagāma bhavanaṃ svaṃ ca āmaṃtrya vasudhādhipam || 25 ||
[Analyze grammar]

jñātvā phalaṃ kaṃkaṇasya munestasya prabhāvataḥ |
gatvā someśvaraṃ devaṃ snātvā ca lavaṇāṃbhasi || 26 ||
[Analyze grammar]

prākṣipatkaṃkaṇaṃ tatra prativarṣaṃ mahāprabhe |
tato devatvamāpannā prabhāvāttasya bhāmini || 27 ||
[Analyze grammar]

īśvara uvāca |
eṣa prabhāvaḥ sumahānkaṃkaṇasya prakīrtitaḥ |
sarvakāmaprado devi sarvapāpapraṇāśanaḥ || 28 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmye someśvaramāhātmye kaṃkaṇamāhātmyavarṇanaṃnāma saptatriṃśo'dhyāyaḥ || 37 ||
[Analyze grammar]