Chapter 210

[English text for this chapter is available]

viśvāmitra uvāca |
tacchrutvā vacanaṃ tasya devarṣernāradasya ca |
siddhaseno mahīpālaḥ prāpya taṃ yogamuttamam || 1 ||
[Analyze grammar]

mādhave māsi saṃprāpte aṣṭamyāṃ sūryavāsare |
sūryodaye tu saṃprāpte yāvatsnātvā'rcayedravim || 2 ||
[Analyze grammar]

tāvatkuṣṭhavinirmuktaḥ sahasā samapadyata |
tato divyavapurbhūtvā santoṣaṃ paramaṃ gataḥ || 3 ||
[Analyze grammar]

prāyaścittaṃ tataścakre tāṃbūlasya ca bhakṣaṇam |
ajñānena kṛtaṃ yacca cūrṇapatrasamanvitam || 4 ||
[Analyze grammar]

tataśca paramāṃ lakṣmīṃ saṃprāptaḥ sa mahīpatiḥ |
pitṛpaitāmahaṃ rājyaṃ sa pracakre yathā purā || 5 ||
[Analyze grammar]

etatte sarvamākhyātaṃ śaṃkhatīrthasamudbhavam |
māhātmyaṃ pārthivaśreṣṭha kiṃ bhūyaḥ śrotumi cchasi || 6 ||
[Analyze grammar]

ānarta uvāca |
atyāścaryamidaṃ brahmanyattvayā parikīrtitam |
yallakṣmīstasya sannaṣṭā cūrṇapatrasya bhakṣaṇāt || 7 ||
[Analyze grammar]

kīdṛktena kṛtaṃ tasya prāyaścittaṃ viśuddhayre |
kīdṛktena kṛtaṃ tacca nijarājyaṃ yathā purā || 8 ||
[Analyze grammar]

viśvāmitra uvāca |
eṣā puṇyatamā medhyā nāgavallī narādhipa |
ayathāvatkṛtā vaktre bahūndoṣānprayacchati |
tasmādyatnena saṃbhakṣyā dattvā caiva svaśaktitaḥ || 9 ||
[Analyze grammar]

ānarta uvāca |
nāgavallī kathaṃ jātā kasmāddoṣo mahānsmṛtaḥ |
ayathāvadbhakṣaṇācca tanme vaktumihārhasi || 10 ||
[Analyze grammar]

viśvāmitra uvāca |
praśnabhāro mahāneṣa tvayā me parikīrtitaḥ |
tathāpi ca vadiṣyāmi yadi te kautukaṃ nṛpa |
yasmātsañjāyate doṣaścūrṇapatrasya bhakṣaṇāt || 11 ||
[Analyze grammar]

amṛtārthaṃ purā devairmathitaḥ kalaśodadhiḥ |
manthānaṃ mandaraṃ kṛtvā netraṃ kṛtvā tu vāsukim || 12 ||
[Analyze grammar]

mukhadeśe balirlagnaḥ pucchadeśe'khilāḥ surāḥ |
vāsudevamatenaiva sandadhārātha kacchapaḥ || 13 ||
[Analyze grammar]

mandare bhramamāṇe tu prāgeva nṛpasattama |
ānarta sahasā jātaṃ ratnatritayameva ca || 14 ||
[Analyze grammar]

nīlāṃbaradharaḥ kṛṣṇaḥ puruṣo vakranāsikaḥ |
kṛṣṇadantaḥ sthūlaśirā dīrghagrīvo mahodaraḥ |
śūrpākārāṃghrirevā'sau cipiṭākṣo bhayāvahaḥ || 15 ||
[Analyze grammar]

tathā tadrūpiṇī tasya kubhāryā rākṣasī yathā |
śiśunāṃgulilagnena garbhaśramaparāyaṇā || 16 ||
[Analyze grammar]

tato devagaṇāḥ sarve dānavāśca viśeṣataḥ |
manthānaṃ tatparityajya tāngrahītuṃ pradhāvitāḥ || 17 ||
[Analyze grammar]

atha tānvikṛtāndṛṣṭvā sarve śaṃkāsamanvitāḥ |
jagṛhurnaiva rājeṃdra jahasuśca parasparam || 18 ||
[Analyze grammar]

athovāca balirdaityaḥ kṛtāṃjalipuṭaḥ sthitaḥ |
brahmā'di yallabhetsarvaṃ yatpurastātprajāyate || 19 ||
[Analyze grammar]

ratnatritayametaddhi tasmādgṛhṇātu padmajaḥ |
yena siddhirbhavedasminmanthane kasya cā'rpaṇāt || 20 ||
[Analyze grammar]

tadvākyaṃ viṣṇunā tasya śaṃsitaṃ śaṃkareṇa tu |
iṃdrādyaiśca suraiḥ sarvairdānavaiśca viśeṣataḥ || 21 ||
[Analyze grammar]

etasminnaṃtare brahmā jagrāha tritayaṃ ca tat |
dākṣiṇyātsarvadevānāmanicchannapi pārthiva |
mamanthuḥ sāgaraṃ rājanpunaste yatnamāśritāḥ || 22 ||
[Analyze grammar]

tataśca vāruṇī jātā divyagandhasamanvitā |
balinā saṃgṛhītā sā pratyakṣaṃ balavidviṣaḥ || 23 ||
[Analyze grammar]

āvarte cāpare jāte niṣkrāṃtaḥ kaustubho maṇiḥ |
sa gṛhīto mahārāja viṣṇunā prabhaviṣṇunā || 24 ||
[Analyze grammar]

athāpare sthite tatra mahāvarte niśāpatiḥ |
sañjātaḥ sa vṛṣāṃkena saṃgṛhītaśca tatkṣaṇāt || 25 ||
[Analyze grammar]

pārijātastato jāto divyagandhasamanvitaḥ |
sa gṛhītvā suraiḥ sarvaiḥ sthāpito naṃdane vane || 26 ||
[Analyze grammar]

tasyānaṃtaramevātha surabhī vatsasaṃyutā |
niṣkrāṃtā vyomamārgeṇa golokaṃ samavasthitā || 27 ||
[Analyze grammar]

tato dhanvaṃtarirjāto bibhraddhaste kamaṃḍalum |
saṃpūrṇamamṛtenaiva sa devairdānavainṛpa || 28 ||
[Analyze grammar]

gṛhīto yugapatkruddhaiḥ parasparajigīṣayā |
devānāṃ hastago vaidyo daityānāṃ ca kamaṇḍaluḥ || 29 ||
[Analyze grammar]

tatastaṃ lobhasaṃyuktā mamaṃthuḥ sāgaraṃ nṛpa |
padmahastātra saṃjātā tato lakṣmīḥ sitāṃbarā || 30 ||
[Analyze grammar]

svayameva vṛto viṣṇustayā pārthivasattama |
mathyamāne tatotīva samudre devadānavaiḥ || 31 ||
[Analyze grammar]

kālakūṭaṃ samutpannaṃ yena sarve surāsurāḥ |
saṃprāptāḥ paramaṃ kaṣṭaṃ prabhagnāśca diśo daśa || 32 ||
[Analyze grammar]

taṃ dṛṣṭvā bhagavāñchaṃbhustīvraṃ tīvaparākramaḥ |
bhakṣayāmāsa rājeṃdra nīlakaṇṭhastato'bhavat || 33 ||
[Analyze grammar]

atha saṃtyajya maṃthānaṃ maṃdaraṃ vāsukiṃ tathā |
amṛtārthe'bhavadyuddhaṃ daityānāṃ vibudhaiḥ saha || 34 ||
[Analyze grammar]

atha strīrūpamādhāya viṣṇurdaityānuvāca tān |
tato hṛṣṭo balistasyai dattvā pīyūṣameva tat || 35 ||
[Analyze grammar]

viśvāsaṃ paramaṃ gatvā yuddhaṃ cakre suraiḥ saha |
tato viṣṇuḥ parityajya strīrūpaṃ puruṣākṛtiḥ || 36 ||
[Analyze grammar]

tadevāmṛtamādāya yayau yatra divaukasaḥ |
abravīttānsuhṛṣṭātmā pivadhvamamṛtaṃ surāḥ || 37 ||
[Analyze grammar]

yenāmaratvamāsādya vyāpādayata dānavān |
te tatheti pratijñāya papuḥ pīyūṣamuttamam || 38 ||
[Analyze grammar]

amarāśca tato jātā jaghnuḥ saṃkhye mahāsurān || 39 ||
[Analyze grammar]

teṣāṃ pānavidhau tatra vartamāne mahīpate |
rāhurvibudharūpeṇa papau pīyūṣamutsukaḥ || 40 ||
[Analyze grammar]

sa lakṣito mahādaityaścaṃdrārkābhyāṃ ca tatkṣaṇāt |
nivedito hare rājannāyaṃ devo mahāsuraḥ || 41 ||
[Analyze grammar]

tacchrutvā vāsudevena tasya cakraṃ sudarśanam |
vadhāya pārthivaśreṣṭha muktaṃ vajrasamaprabham || 42 ||
[Analyze grammar]

yāvanmātraṃ śarīraṃ tattasya vyāptaṃ mahīpate |
amṛtena tataḥ kṛttamamoghenāpi tacchiraḥ || 43 ||
[Analyze grammar]

tato'maratvamāpannaḥ sa yāvatsiṃhikāsutaḥ |
tāvatprokto'cyutenātha sāmnā paramavalgunā || 44 ||
[Analyze grammar]

tyaja daityānmahābhāga devānāṃ saṃmato bhava |
saṃprāpsyasi parāṃ pūjāṃ sadā tvaṃ grahamaṃḍale || 45 ||
[Analyze grammar]

sa tatheti pratijñāya tyaktvā tāndaityasattamān |
pūjāṃ prāpnoti martyānāṃ saṃsthito grahamaṇḍale || 46 ||
[Analyze grammar]

etasminnaṃtare daityā nirjitāḥ surasattamaiḥ |
diśo jagmuḥ paritrastāḥ kecinmṛtyumupāgatāḥ || 47 ||
[Analyze grammar]

pītaśeṣaṃ ca pīyūṣaṃ sthāpitaṃ nandane vane |
nāgarājasya yatraiva sthitamālānameva ca || 48 ||
[Analyze grammar]

aharniśaṃ madasrāvī karīṃdraḥ so'pi saṃsthitaḥ |
tatprabhāvaiḥ prabhinnaḥ sa pīyūṣasya kamaṃḍaluḥ || 49 ||
[Analyze grammar]

tato vallī samutpannā tasmāccaiva kamaṇḍaloḥ |
tatrālānasamārūḍhā vṛddhiṃ ca paramāṃ gatā || 50 ||
[Analyze grammar]

tadudbhavāni patrāṇi gṛhītvā surasattamāḥ |
apūrvāṇi sugaṃdhīni matvā te bhakṣayaṃti ca || 51 ||
[Analyze grammar]

vaktraśuddhikṛte rājanviśeṣeṇa praharṣitāḥ || 52 ||
[Analyze grammar]

atha dhanvatarirvaidyaḥ svabuddhyā pṛthivīpate |
nāgālāne yato jātā nāgavallī bhaviṣyati || 53 ||
[Analyze grammar]

sadā smarasya saṃsthānaṃ mama vākyādbhaviṣyati |
nāgavallīti vai nāma tasyāścakre tataḥ param || 54 ||
[Analyze grammar]

saṃyogaṃ ca cakārātha tāṃbūlaṃ jāyate yathā |
pūgīphalena cūrṇena khadireṇāpi pārthiva || 55 ||
[Analyze grammar]

kasyacittvatha kālasya vāṇīvatsarako nṛpaḥ |
pratoṣaṃ nītavāñchakraṃ tapasā nirmalena ca || 56 ||
[Analyze grammar]

tatastattapasā tuṣṭa indro vacanamabravīt || 57 ||
[Analyze grammar]

indra uvāca |
bhobhoḥ pārthiva tuṣṭo'smi tapasā'nena sāṃpratam |
brūhi yatte varaṃ dadmi manasā vāṃchitaṃ sadā || 58 ||
[Analyze grammar]

so'bravīdyadi me tuṣṭo yadi deyo varo mama |
vimānaṃ khecaraṃ dehi yenāgacchāmi te gṛhe |
nityameva dharāpṛṣṭhādvaṃdanārthaṃ tava prabho || 59 ||
[Analyze grammar]

sa tatheti pratijñāya haṃsabarhiṇanāditam |
vimānaṃ pradadau tasmai manomārutavegadhṛk || 60 ||
[Analyze grammar]

sa tatra nityamāruhya prayāti tridaśālayam |
bhaktyā paramayā yuktaḥ sahasrākṣaṃ pravaṃditum || 61 ||
[Analyze grammar]

tasya śakraḥ svahastena tāṃbūlaṃ ca prayacchati |
sa ca tadbhakṣayāmāsa prahṛṣṭenāṃtarātmanā || 62 ||
[Analyze grammar]

vṛddhabhāve'pi saṃprāpte tasya kāmo'tyavarddhata |
tāṃbūlasya prabhāvena sumahānpṛthivīpate || 63 ||
[Analyze grammar]

atha śakramuvācedaṃ sa rājā vinayānvitaḥ |
nāgavallīpradānena prasādo me vidhīyatām || 64 ||
[Analyze grammar]

martyaloke samānetuṃ pracāraṃ yena gacchati |
sa tatheti pratijñāya tasmai tāṃ pradadau tadā || 65 ||
[Analyze grammar]

gatvā nijapuraṃ sopi svodyāne'sthāpayattadā |
tataḥ kālena mahatā pracāraṃ sā gatā kṣitau || 66 ||
[Analyze grammar]

yasyāḥ svādanato lokaḥ kāmātmā samapadyata |
na kaścidyajanaṃ cakre yājanaṃ ca viśeṣataḥ |
anyā dharmakriyāḥ sarvāḥ praṇaṣṭā dharmasaṃbhavāḥ || 67 ||
[Analyze grammar]

tato devagaṇāḥ sarve yajñabhāgavivarjitāḥ |
pīḍyamānāḥ krudhā viṣṭā gatvā procuḥ pitāmaham || 68 ||
[Analyze grammar]

martyaloke suraśreṣṭha naṣṭā dharmakriyā bhṛśam |
kāmāsakto yato lokastāṃbūlasya ca bhakṣaṇāt |
tasmātkuru prasādaṃ no yenāsmākaṃ kriyā bhavet || 69 ||
[Analyze grammar]

etasminneva kāle tu puṣkarasthaṃ pitāmaham |
yajanārthe samāyātaṃ daridro vīkṣya pārthiva || 70 ||
[Analyze grammar]

praṇipatya tataḥ prāha vinayāvanataḥ sthitaḥ |
nirviṇṇo'haṃ suraśreṣṭha brāhmaṇānāṃ gṛhe sthitaḥ || 71 ||
[Analyze grammar]

tasmātkīrtaya me sthānaṃ śreṣṭhaṃ vittavatāṃ hi yat |
tatra sañjāyate tṛptiḥ śāśvatī pracurā prabho || 72 ||
[Analyze grammar]

tasya tadvacanaṃ śrutvā ciraṃ dhyātvā pitāmahaḥ |
abravīcca daridraṃ taṃ chidrārthaṃ dhaninā miha || 73 ||
[Analyze grammar]

cūrṇapatre tvayā vāsaḥ sadā kāryo daridra bhoḥ |
tāṃbūlasya tu parṇāgre bhāryayā mama vākyataḥ || 74 ||
[Analyze grammar]

parṇānāṃ caiva vṛṃteṣu sarveṣu tvatsutena ca |
rātrau khadirasāre ca tvaṃ tābhyāṃ sarvadā vasa || 75 ||
[Analyze grammar]

dhanināṃ chidrakṛtproktametatsthānacatuṣṭayam |
pārthivānāṃ viśeṣeṇa mama vākyā dvraja drutam || 76 ||
[Analyze grammar]

nārada uvāca |
etatte sarvamākhyātaṃ yatpṛṣṭo'smi narādhipa || 77 ||
[Analyze grammar]

tāṃbūlotthāni chidrāṇi yathā syurdhanināmiha |
tāni sarvāṇi cīrṇāni tvayā rājannajānatā |
tena vai vibhavocchittiḥ saṃjātā sahasā nṛpa || 78 ||
[Analyze grammar]

rājovāca |
tadarthamapi me brūhi prāyaścittaṃ munīśvara |
kadācidbhakṣaṇaṃ me syāttāṃbūlasya tathāvidham || 79 ||
[Analyze grammar]

yena sañjāyate śuddhiḥ kutāṃbūlasamudbhavā || 80 ||
[Analyze grammar]

viśvā mitra uvāca |
śṛṇu rājanpravakṣyāmi prāyaścittaṃ tu yaccaret |
āśvāsanena śuddhyarthaṃ kutāṃbūlasya bhakṣaṇāt || 81 ||
[Analyze grammar]

parvakālaṃ samuddiśya samyakchraddhāsamanvitaḥ |
ānayedbrāhmaṇaṃ rājanvedavedāṃgapāragam || 82 ||
[Analyze grammar]

prakṣālya caraṇau tasya vāsasī paridhāpayet |
saṃpūjya gaṃdhapuṣpādyaistataḥ patraṃ hiraṇmayam |
svaśaktyā kārayitvā'tha cūrṇe muktāphalaṃ nyaset || 83 ||
[Analyze grammar]

pūgīphalaṃ ca vaiḍūryaṃ khadiraṃ rūpyameva ca |
mantreṇānena viprāya tathaiva ca samarpayet || 84 ||
[Analyze grammar]

yanmayā bhakṣitaṃ pūrvaṃ vṛntaṃ patrasamudbhavam |
cūrṇapatraṃ tathaivānyadrātrau khadirameva ca || 85 ||
[Analyze grammar]

tasya pāpasya śuddhyarthaṃ tāṃbūlaṃ pratigṛhyatām |
tatastu brāhmaṇo maṃtramevaṃ rājannudāharet || 86 ||
[Analyze grammar]

yajamānahitārthāya sarvapāpaviśuddhaye |
ajñānājjñānato vāpi kutāṃbūlaṃ prabhakṣitam || 87 ||
[Analyze grammar]

bhakṣayiṣyasi yaccānyatkadācinme prasādanāt |
tasya doṣo na te bhāvī mama vākyādasaṃśayam || 88 ||
[Analyze grammar]

anena vidhinā dattvā tāṃbūlaṃ śuddhimāpnuyāt |
kutāṃbūlasya doṣeṇa gṛhyate na naro nṛpa || 89 ||
[Analyze grammar]

tasmāttvaṃ hi mahārāja vratametatsamācara |
bahu puṇyatamaṃ hyetanmahābhogavivarddhanam || 90 ||
[Analyze grammar]

yaḥ prayacchati rājendra vidhinānena bhaktitaḥ |
janmajanmāntare vāpi na tāṃbūlena mucyate || 91 ||
[Analyze grammar]

tāṃbūlaṃ bhakṣayitvā yo naitaddānaṃ prayacchati |
tāṃbūlavarjitaḥ so'tra bhavejjanmanijanmani || 92 ||
[Analyze grammar]

tāṃbūlavarjitaṃ yasya mukhaṃ syātpṛthivīpate |
kṛpaṇasya daridrasya tadbilaṃ na hi tanmukham || 93 ||
[Analyze grammar]

tāṃbūlaṃ brāhmaṇendrāya yo dattvā prākprabhakṣayet |
surūpo bhāgyavāndakṣo bhavejjanmanijanmani || 94 ||
[Analyze grammar]

etatte sarvamākhyātaṃ kutāṃbūlasya bhakṣaṇāt |
yatphalaṃ jāyate puṃsāṃ yaddānena mahīpate || 95 ||
[Analyze grammar]

śaṃkhādityānuṣaṃgeṇa tāṃbūlasya ca bhakṣaṇe |
ye doṣā ye guṇā rājandānaṃ caiva prabhakṣaṇe || 96 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye tāṃbūlotpatti tāṃbūlamāhātmyavarṇanaṃnāma daśottaradviśatatamo'dhyāyaḥ || 210 ||
[Analyze grammar]