Chapter 131

[English text for this chapter is available]

deva uvāca |
eṣā rātriḥ samādiṣṭā dānavānāṃ sureśvari |
piśācānāṃ ca bhūtānāṃ rākṣasānāṃ viśeṣataḥ || 1 ||
[Analyze grammar]

yatkiṃcitkriyate karma tatra snānādikaṃ śubham |
tatsarvaṃ jāyate teṣāṃ purā dattaṃ svayaṃbhuvā || 2 ||
[Analyze grammar]

maryādā taiḥ samaṃ yena devānāṃ ca yadā kṛtā |
arhāṇāṃ yajñabhāgasya kāśyapānāmathāgrajām || 3 ||
[Analyze grammar]

tadarthaṃ daśasāhasrā dānavā yuddha durmadāḥ |
kuṃtaprāsakarā bhānuṃ ruṃdhantyudgatakārmukāḥ || 4 ||
[Analyze grammar]

tamuddiśya sahasrāṃśuṃ yajjalaṃ parikṣipyate |
sāvitreṇa ca mantreṇa teṣāṃ tajjāyate phalam || 5 ||
[Analyze grammar]

te hatāstena toyena vajratulyena tatkṣaṇāt |
pramuṃcaṃti sahasrāṃśuṃ nityameva sureśvari || 6 ||
[Analyze grammar]

etasmātkāraṇāttoyamastrarūpaṃ kṣipāmyaham |
saṃdhyā kālaṃ samuddiśya bhānuṃ saṃdhyāṃ na pārvati || 7 ||
[Analyze grammar]

yadyadācarati śreṣṭhastattaduttarataḥ sthitaḥ |
udayārthaṃ raviṃ yāntaṃ nirundhanti ca dāruṇāḥ || 8 ||
[Analyze grammar]

te'pi saṃdhyājalairdevi nihatā brāhmaṇottamaiḥ |
mayā ca taṃ vimuñcaṃti mūrcchitā nipatanti ca || 9 ||
[Analyze grammar]

etasmātkāraṇāddevi sandhyayorubhayorapi |
ahaṃ cānye ca viprā ye te namaṃti divākaram || 10 ||
[Analyze grammar]

tasmāttvaṃ gṛhamāgaccha tyaktverṣyāṃ parvatātmaje |
praśasyāṃ tvāṃ parityaktvā nānyāsti hṛdaye mama || 11 ||
[Analyze grammar]

devyuvāca |
niṣkāmo vā sakāmo vā saṃdhyāṃ strīsaṃjñitāmimām |
yattvaṃ namasi deveśa tanme duḥkhaṃ prajāyate || 12 ||
[Analyze grammar]

tasmādgaṅgāparityāgaṃ sandhyāyāśca viśeṣataḥ |
yāvanna kuruṣe deva tāvattuṣṭirna me bhavet || 13 ||
[Analyze grammar]

evamuktvā'tha sā devī viśeṣavratamāsthitā |
avamanya mahādevaṃ prārthayānamapi svayam || 14 ||
[Analyze grammar]

tataḥ sa cintayāmāsa kimetatkāraṇaṃ sthitam |
viraktā'pi mamotkaṇṭhāṃ yenaiṣā prakaroti na || 19 ||
[Analyze grammar]

na ca sāmnā vrajettuṣṭiṃ kathaṃcidapi pārvatī |
mṛṣerṣyāṃdhāriṇī devī naitatsvalpaṃ hi kāraṇam || 16 ||
[Analyze grammar]

tato mantraprabhāvaṃ taṃ vijñāya parameśvaraḥ |
dhyānaṃ dhṛtvā susūkṣmeṇa jñānenātha svayaṃ tataḥ || 17 ||
[Analyze grammar]

tameva mantraṃ mantreṇa nyāsena ca viśeṣataḥ |
samyagārādhayāmāsa saṃpūjyātmānamātmanā || 18 ||
[Analyze grammar]

yathā devyātmabhūtāni pṛthakkṛtvā ca paṃca ca |
pūjitāni tathā devaḥ sarveṣāmaṃtare gataḥ || 19 ||
[Analyze grammar]

tānyeva pūjayāmāsa pṛthakkṛtvā samādhitaḥ |
niyojya ca punarbāhye tataḥ pūjāṃ samācarat || 2 ||
[Analyze grammar]

tasmānnāsti paraḥ kaścitpūjyapūjyaḥ sa eva ca |
aiśvaryātsarvadevānāmīśānastena nirmitaḥ || 21 ||
[Analyze grammar]

evaṃ yāvatsa īśānaḥ samārādhayati prabhuḥ |
tāvaddevī samāyātā mantrākṛṣṭā ca yatra saḥ || 22 ||
[Analyze grammar]

tataḥ provāca taṃ devaṃ praṇipatyakṛtāṃjaliḥ |
jñātaṃ mayā vibho sarvaṃ na māṃ tyaja tava priyām || 23 ||
[Analyze grammar]

tasmādāgaccha gacchāvo yatra tvaṃ vāñchasi prabho |
kṣamyatāṃ deva me sarvaṃ na kṛtaṃ yadvacastava || 24 ||
[Analyze grammar]

tatastuṣṭo mahādevastāmāliṅgya śucismitām |
idamūce vihasyoccairmeghagambhīrayā girā || 25 ||
[Analyze grammar]

yaiṣā tvayā'tmabhūtotthā nirmitā paramā tanuḥ |
etāṃ yā kāminī kācitpūjayiṣyati bhaktitaḥ |
anenaiva vidhānena tasyā bhartā bhaviṣyati || 26 ||
[Analyze grammar]

tṛtīyāyāṃ viśeṣeṇa yāvatsaṃvatsaraṃ śubhe |
sā labhiṣyati satkāntaṃ putradaṃ sarvakāmadam || 27 ||
[Analyze grammar]

tathaitāṃ māmakīṃ mūrtimīśānākhyāṃ ca ye narāḥ |
teṣāṃ duṣṭāpi yā kāntā saumyā caiva bhaviṣyati || 28 ||
[Analyze grammar]

ye punaḥ kanyakāhetoḥ pūjayiṣyaṃti bhaktitaḥ |
yāṃ kanyāṃ manasi sthāpya tāṃ labhiṣyantyasaṃśayam || 29 ||
[Analyze grammar]

niṣkāmāścāpi ye martyā pūjayiṣyaṃti sarvadā |
te yāsyaṃti parāṃ siddhiṃ jarāmaraṇavarjitām || 30 ||
[Analyze grammar]

evamuktvā mahādevo vṛṣamāropya tāṃ priyām |
svayamāruhya paścācca kailāsaṃ parvataṃ gataḥ || 31 ||
[Analyze grammar]

nārada uvāca ||
tasmāttava suteyaṃ yā tāmārādhayatu drutam |
pañcapiṇḍamayā gaurīṃ yāvatsaṃvatsaraṃ śubhām || 32 ||
[Analyze grammar]

tṛtīyāyāṃ viśeṣeṇa tataḥ prāpsyati satpatim |
mukhaprekṣamatiprītaṃ rūpādibhirguṇairyutam || 33 ||
[Analyze grammar]

śāṃḍilyuvāca |
evamuktvā muniśreṣṭho nāradaḥ prayayau tataḥ |
tīrthayātrāṃ prati prītyā mama mātrā visarjitaḥ || 34 ||
[Analyze grammar]

mayāpi ca tadādeśātkaumāryepi ca saṃsthayā |
pūjayā vatsaraṃ yāvatpūjitā patikāmyayā || 35 ||
[Analyze grammar]

tṛtīyāyāṃ viśeṣeṇa mārgamāsāditaḥ śubhe |
naivedyairvividhairdānairgaṃdhamālyānulepanaiḥ || 36 ||
[Analyze grammar]

tatprabhāvādayaṃ prāpto jaiminirnāma saddvijaḥ |
kātyāyani yathā dṛṣṭastvayā kiṃ kīrtitaiḥ paraiḥ || 37 ||
[Analyze grammar]

tasmāttvamapi kalyāṇi pūjayaināṃ samāhitā |
saṃprāpsyasi susaubhāgyaṃ maitreyyā sadṛśaṃ śubhe || 38 ||
[Analyze grammar]

tvayā na pūjitā ceyaṃ kaumārye vartamānayā |
yāvatsaṃvatsaraṃ gaurī tṛtīyāyāṃ na cādhikam || 39 ||
[Analyze grammar]

sāpatnyaṃ tena saṃjātaṃ saubhāgyepi nirargale |
yathoktavidhinā devī satyametanmayoditam || 40 ||
[Analyze grammar]

sūta uvāca |
śrutvā kātyāyanī sarvaṃ śāṃḍilyā yatprakīrtitam |
tataḥ praṇamya tāṃ pṛṣṭvā svameva bhavanaṃ yayau || 41 ||
[Analyze grammar]

mārgaśīrṣe'tha saṃprāpte tṛtīyādivase site |
tāṃ devīṃ pūjayāmāsa varṣaṃ yāvakṛtakṣaṇā || 42 ||
[Analyze grammar]

gauriṇīrbhojayāmāsa mṛṣṭānnairbhojanai rasaiḥ |
tailakṣāraparityaktairgandhaiḥ kuṃkumapūrvakaiḥ || 43 ||
[Analyze grammar]

tatastu vatsare pūrṇe yājñavalkyastadantikam |
gatvā provāca kiṃ kaṣṭaṃ tvaṃ karoṣi śucismite || 44 ||
[Analyze grammar]

mayā kāṃtena raktena kāmadena sadaiva tu |
tasmādāgaccha gacchāva svameva bhavanaṃ śubhe || 45 ||
[Analyze grammar]

evamuktvā tu tāṃ hṛṣṭāṃ gṛhītvā dakṣiṇe kare |
jagāma bhavanaṃ paścātpulakāṃkitagātrajām || 46 ||
[Analyze grammar]

tataḥ paraṃ tayā sārdhaṃ vartate harṣitānanaḥ |
maitreyyā sahito yadvadaviśeṣeṇa sarvadā || 47 ||
[Analyze grammar]

tataḥ saṃjanayāmāsa tasyāṃ putraṃ guṇānvitam |
kātyāyanābhidhānaṃ ca yajña vidyāvicakṣaṇam || 48 ||
[Analyze grammar]

putro vararuciryasya babhūva guṇasāgaraḥ |
sarvajñaḥ sarvakṛtyeṣu vedavedāṃgapāragaḥ || 49 ||
[Analyze grammar]

sthāpito'tra śubhe kṣetre yena vidyārthināṃ kṛte |
samārādhya viśeṣeṇa caturthyāṃ śuklavāsare || 50 ||
[Analyze grammar]

mahāgaṇapatirbhaktyā sarvavidyāpradāyakaḥ |
yastasya purato viprāḥ śāṃtipāṭhavidhānataḥ || 51 ||
[Analyze grammar]

gṛhṇāti puṣpamālāṃ yaḥ paṭhecchaktyā dvijottamāḥ |
vedāṃtakṛtsa vipraḥ syātsadā janmanijanmani || 52 ||
[Analyze grammar]

aśaktyā cātha pāṭhasya yo gṛhṇāti dhanena ca |
sa viśeṣādbhavedvipro vedavedāṃgapāragaḥ || 53 ||
[Analyze grammar]

viduṣāṃ sa gṛhe janma yājñikānāṃ sadā labhet |
na kadācittu mūrkhārṇāṃ ninditānāṃ kathañcana || 54 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmya īśānotpattipaṃcapiṃḍikāgaurīmāhātmya vararucisthāpitagaṇapatimāhātmyavarṇanaṃ nāmaikatriṃśaduttaraśatatamo'dhyāyaḥ || 131 ||
[Analyze grammar]