Chapter 132

[English text for this chapter is available]

ṛṣaya ūcuḥ ||
tvayā sūtaja tatrasthaṃ yājñavalkyasya kīrtitam |
tīrthaṃ vararuceścaiva vaināyakyaṃ pravidyate || 1 ||
[Analyze grammar]

kātyāyanasya na proktaṃ kiñcittatra mahāmate |
kiṃ vā tena kṛtaṃ naiva kiṃ vā te vismṛtiṃ gatam || 2 ||
[Analyze grammar]

tasmādācakṣva naḥ śīghraṃ yadi kiṃcinmahātmanā |
kṣetretra nirmitaṃ tīrthaṃ sarvasiddhipradāyakam || 3 ||
[Analyze grammar]

sūta uvāca |
tena vāstupadaṃnāma tatra tīrthavinirmitam |
kātyāyanena vipreṇa sarvakāmapradaṃ nṛṇām || 4 ||
[Analyze grammar]

catvāriṃśattribhiryuktā devatā yatra paṃca ca |
pūjyaṃte pūjitāścāpi siddhiṃ yacchaṃti tatkṣaṇāt || 5 ||
[Analyze grammar]

ṛṣaya ūcuḥ |
kasmāttā devatāḥ sūta pūjyaṃte tatra saṃsthitāḥ |
nāmataśca vibhāgena kīrtayasva pṛthakpṛthak || 6 ||
[Analyze grammar]

sūta uvāca |
pūrvaṃ kiṃcinmahadbhūtaṃ nirgataṃ dharaṇītalāt |
apūrvaṃ raudramatyugraṃ kṛṣṇa daṃtaṃ bhayānakam || 7 ||
[Analyze grammar]

śaṃkukarṇaṃ kṛśāsyaṃ ca ūrdhvakeśaṃ bhayānakam |
devānāṃ nāśanārthāya mānuṣāṇāṃ viśeṣataḥ |
ākṛṣṭaṃ dānaveṃdreṇa maṃtraiḥ śukrapradarśitaiḥ |
avadhyaṃ sarvaśastrāṇāmastrāṇāṃ ca viśeṣataḥ || 9 ||
[Analyze grammar]

atha devāḥ samālokya tattādṛksubhayāvaham |
jaghnuḥ śastraiḥ śitaiścitraiḥ kopena mahatānvitāḥ || 10 ||
[Analyze grammar]

naiva śekustadaṃgeṣu prahartuṃ yatnamāsthitāḥ |
bhakṣyaṃte kevalaṃ tena śataśo'tha sahasraśaḥ || 11 ||
[Analyze grammar]

atha te yatnamāsthāya sarve devāḥ savāsavāḥ |
brahmāṇamagrataḥ kṛtvā tadbhūtamabhidudruvuḥ || 12 ||
[Analyze grammar]

tataḥ saṃgṛhya yatnena sarvagātreṣu sarvataḥ |
tacca paṃcaguṇairdevaiḥ pātitaṃ dharaṇītale || 13 ||
[Analyze grammar]

upaviṣṭāstatastasya sarve bhūtvā samaṃtataḥ |
prahārānsaṃprayacchaṃti na lagaṃti ca tasya te || 14 ||
[Analyze grammar]

ātharvaṇena sūktena jātaṃ cāmṛtabiṃdunā |
tadbhūtaṃ preṣitaṃ daityairmuṃḍena ca tadaṃtikam || 15 ||
[Analyze grammar]

evaṃ varṣasahasrāṃtaṃ tattathaiva vyavasthitam |
na muṃcaṃti bhayātte tu na haṃtuṃ śaknuvaṃti ca || 16 ||
[Analyze grammar]

tasyodare sthito brahmā śakrādyā amarāśca ye |
caturdikṣu sthitāḥ kruddhā mahadyatnena saṃsthitāḥ |
tataste dānavāḥ sarve maṃtraṃ cakruḥ parasparam || 17 ||
[Analyze grammar]

asya bhūtasya raudrasya śukrasṛṣṭasya tatkṣaṇāt |
eka evātra nirdiṣṭa upāyo devasaṃkṣayaḥ || 18 ||
[Analyze grammar]

tataḥ śastrāṇi tīkṣṇāni dānavāste mahābalāḥ |
muṃcaṃto vividhānnādānsamājagmuḥ sahasraśaḥ || 19 ||
[Analyze grammar]

etasminnaṃtare viṣṇurāgatastatra tatkṣaṇāt |
āha bhūtaṃ tadā viṣṇurvacasā hlādayanniva || 20 ||
[Analyze grammar]

yo yasminsaṃsthito gātre devastava samudbhave |
tatra pūjāṃ samādāya tasmāttvāṃ tarpayiṣyati || 21 ||
[Analyze grammar]

naivaṃvidhā tu loke'sminpūjā devasya saṃsthitā |
kasyacidyādṛśī te'dya mayā saṃpratipāditā || 22 ||
[Analyze grammar]

tatastena pratijñātamavikalpena cetasā |
evaṃ te'haṃ kariṣyāmi paraṃ me vacanaṃ śṛṇu || 23 ||
[Analyze grammar]

yadi kaścinna me pūjāṃ kariṣyati kadācana |
kathaṃcinmānavaḥ kaścitsa me bhakṣyo bhaviṣyati || 24 ||
[Analyze grammar]

sūta uvāca |
bāḍhamityeva ca prokte tato devena cakriṇā |
tadbhūtaṃ niścalaṃ jātaṃ harṣeṇa mahatānvitam || 25 ||
[Analyze grammar]

tato devāḥ samutthāya tattyaktvā śastrapāṇayaḥ |
jaghnuśca niśitaiḥ śastraiḥ palāyanasamutsukān |
lajjāhīnāngatāmarṣāndīnavākyaprajalpakān || 26 ||
[Analyze grammar]

tataḥ svasthaḥ sa bhūtvā tu harirdaityairnipātitaiḥ |
provāca padmajaṃ nāma bhūtasyāsya kuruṣva bhoḥ || 27 ||
[Analyze grammar]

brahmovāca || |
anena tava vākyasya proktaṃ vākyaṃ hare yataḥ |
vāstvetaditi yasmācca tasmādvāstu bhaviṣyati || 28 ||
[Analyze grammar]

evamuktvā hṛṣīkeśa āhūya viśvakarmaṇe |
vidhānaṃ kathayāmāsa pūjārthaṃ vistarānvitam || 29 ||
[Analyze grammar]

etasminnaṃtare prāha yājñavalkyasutaḥ sudhīḥ |
viśvakarmāṇamāhūya prathamaṃ dvijasattamāḥ || 30 ||
[Analyze grammar]

hāṭakeśvaraje kṣetre mamāśramapadaṃ kuru |
anenaiva vidhānena proktena tu mahāmate || 31 ||
[Analyze grammar]

tatohaṃ sakalaṃ buddhvā vṛddhiṃ neṣyāmi bhūtale |
bālāvabodhanārthāya tasmādāgaccha satvaram || 32 ||
[Analyze grammar]

tataḥ saṃpreṣayāmāsa taṃ brahmāpi tadaṃtikam |
viśvakarmāṇamāhūya svasutasya hite sthitaḥ || 33 ||
[Analyze grammar]

viśvakarmāpi tatraitya vāstupūjāṃ yathoditām |
cakāra brahmaṇā proktāṃ yādṛśīṃ sakalāṃ tataḥ || 34 ||
[Analyze grammar]

kātyāyano'pi tāṃ sarvāṃ dṛṣṭvā cakre sahasraśaḥ |
tadā viśvahitārthāya śālākarmādi pūrvikām || 35 ||
[Analyze grammar]

evaṃ vāstupadaṃ jātaṃ tasminkṣetre dvijottamāḥ |
asminkṣetre naraḥ pāpātspṛṣṭo mucyeta karmaṇā || 36 ||
[Analyze grammar]

tathā na prāpnuyāddoṣaṃ gṛhajātaṃ kathaṃcana |
śilpotthaṃ kupadotthaṃ ca kuvāstujamathāpi ca || 37 ||
[Analyze grammar]

vaiśākhasya tṛtīyāyāṃ śuklāyāṃ rohiṇīṣu ca |
tatpadaṃ nihitaṃ tatra vāstostena mahātmanā || 38 ||
[Analyze grammar]

tasminnapi ca yaḥ pūjāṃ tenaiva vidhinā naraḥ |
tasya yaḥ kurute samyaksa bhūpatvamavāpnuyāt || 39 ||
[Analyze grammar]

gṛhaṃ doṣānvitaṃ prāpya śilpādibhirupadrutam |
tasyopasaṃgamaṃ prāpya samṛddhiṃ yāti taddine || 40 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgara khaṇḍe hāṭakeśvarakṣetramāhātmye vāstupadotpattimāhātmyavarṇanaṃnāma dvātriṃśaduttaraśatatamo'dhyāyaḥ || 132 ||
[Analyze grammar]