Chapter 130

[English text for this chapter is available]

ṛṣaya ūcuḥ |
yājñavalkyasutaḥ sūta yastvayā parikīrtitaḥ |
katamā tasya mātābhūtsarvaṃ no brūhi vistarāt || 1 ||
[Analyze grammar]

sūta uvāca |
tasya bhāryādvayaṃ śreṣṭhamāsītsarvaguṇānvitam |
ekā guṇavatī tasya maitreyīti prakīrtitā || 2 ||
[Analyze grammar]

jyeṣṭhā cānyātha kalyāṇī khyātā kātyāyanīti ca |
yasyāḥ kātyāyanaḥ putro vedārthānāṃ prajalpakaḥ || 3 ||
[Analyze grammar]

tābhyāṃ kuṇḍadvayaṃ tatra saṃtiṣṭhati suśobhanam |
yatra snātā narā yāṃti lokāṃstāṃśca mahodayān || 4 ||
[Analyze grammar]

kātyāyanyāśca tīrthasya śāṃḍilyāstīrthamuttamam |
pativratātvayuktāyāstathānyattatra saṃsthitam || 5 ||
[Analyze grammar]

yatra kātyāyanī prāptā śāṃḍilyā pratibodhitā |
vairāgyaṃ paramaṃ prāptā sapatnīduḥkhaduḥkhitā || 6 ||
[Analyze grammar]

tatra yā kurute snānaṃ tṛtīyāyāṃ samāhitā |
nārī mārgasite pakṣe sā saubhāgyavatī bhavet |
atha daurbhāgyasaṃpannā kāṇā vṛddhā'tha vāmanā |
abhīṣṭā jāyate sā ca tatprabhāvāddvijottamāḥ || 8 ||
[Analyze grammar]

ṛṣaya ūcuḥ |
kīdṛksapatnijaṃ duḥkhaṃ kātyāyanyā upasthitam |
upadeśaḥ kathaṃ labdhaḥ śāṃḍilyāḥ sūta kīdṛśaḥ || 9 ||
[Analyze grammar]

kātyāyanyā samācakṣva kautukaṃ no vyavasthitam |
sāmānyo bhavitā naiṣa upadeśastayeritaḥ || 10 ||
[Analyze grammar]

sūta uvāca |
maitreyyā saha saṃsaktaṃ yājñavalkyaṃ vilokya sā |
kātyāyanī suduḥkhārtā saṃjātā cerṣyayā tataḥ || 11 ||
[Analyze grammar]

sā na snāti na bhuṃkte ca na hāsyaṃ kurute kvacit |
kevalaṃ bāṣpapūrṇākṣī niḥśvāsāḍhyā babhūva ha || 12 ||
[Analyze grammar]

tataḥ kadācidevātha phalārthaṃ nirgatā bahiḥ |
apaśyacchāṃḍilīnāma patipārśve vyavasthitām || 13 ||
[Analyze grammar]

kṛtāṃjalipuṭāṃ sādhvī vinayāvanatā sthitām |
so'pi tasyā mukhāsaktaḥ sānurāgaḥ prasannadṛk || 14 ||
[Analyze grammar]

guṇadoṣodbhavāṃ vārtāmāpṛcchyākathayattathā |
sā ca tau daṃpatī dṛṣṭvā saṃhṛṣṭāvitaretaram || 15 ||
[Analyze grammar]

citte sve ciṃtayāmāsa sudhanyeyaṃ tapasvinī |
yasyāḥ patirmukhāsakto guṇadoṣaprajalpakaḥ |
sānurāgaśca susnigdho nānyāṃ nārīṃ bibhartti ca || 16 ||
[Analyze grammar]

evaṃ saṃcitya sā sādhvī bhūyobhūyo dvijottamāḥ |
jagāma svāśramaṃ paścānniṃdyamānā svakaṃ vapuḥ || 17 ||
[Analyze grammar]

tataḥ kadācidekāṃte sthitāṃ tāṃ śāṃḍilīṃ dvijāḥ |
bahirgate bhartari ca tasyāḥ kāryeṇa kenacit || 18 ||
[Analyze grammar]

kātyāyanī samāgamya tataḥ papraccha sādaram |
vada kalyāṇi me kaṃcidupadeśaṃ mahodayam || 19 ||
[Analyze grammar]

mukhaprekṣaḥ sadā bharttā yena strīṇāṃ prajāyate |
nāpamānaṃ karotyeva duruktavacanaiḥ kvacit || 20 ||
[Analyze grammar]

nānyāṃ saṃgacchate nārīṃ cittenāpi kathaṃcana |
ahaṃ bhartuḥ kṛtairduḥkhairatīva paripīḍitā |
sapatnījairviśeṣeṇa tasmānme tvaṃ prakīrtaya || 21 ||
[Analyze grammar]

yathā te vaśago bharttā saṃjātaḥ kāmadaḥ sadā |
manasāpi na saṃdadhyānnārīmeṣa kathaṃcana || 22 ||
[Analyze grammar]

śāṃḍilyuvāca |
śṛṇu sādhvi pravakṣyāmi tavāhaṃ guhyamuttamam |
yathā mamābhavadvaśyo mukhaprekṣastathā patiḥ || 23 ||
[Analyze grammar]

mama tātaḥ kurukṣetre śāṃḍilyo munisattamaḥ |
vānaprasthāśrame'tiṣṭhatpūrve vayasi saṃsthitaḥ || 24 ||
[Analyze grammar]

tatraikāhaṃ samutpannā kanyā tasya mahātmanaḥ |
vṛddhiṃ gatā krameṇātha tasminneva tapovane || 25 ||
[Analyze grammar]

karomi tatra śuśrūṣāṃ homakāle yathocitām |
nīvārādīni dhānyāni nityaṃ caivānayāmyaham || 26 ||
[Analyze grammar]

kasyacittvatha kālasya nārado munisattamaḥ |
āśrame mama tātasya suśrāṃtaḥ samupāgataḥ || 27 ||
[Analyze grammar]

tātādeśāttatastatra mayā sa viśramaḥ kṛtaḥ |
pādaśaucādibhiḥ kṛtyaiḥ snānādyaiśca tathāparaiḥ || 28 ||
[Analyze grammar]

tato bhuktāvasāne'tha niviṣṭaḥ mukhasaṃsthita |
mama mātrā paripṛṣṭo vinayādvaravarṇini || 29 ||
[Analyze grammar]

ekeyaṃ kanyakāsmākaṃ jāte vayasi saṃsthite |
saṃjātā muniśārdūla prāṇebhyo'pi garīyasī || 30 ||
[Analyze grammar]

tadasyāḥ kīrtaya kṣipraṃ sukhopāyaṃ sukhodayam |
vrataṃ vā niyamaṃ vā tvaṃ homaṃ vā mantrameva vā || 31 ||
[Analyze grammar]

yena cīrṇena bharttā syātsusaumyaḥ sadguṇānvitaḥ |
priyaṃvado mukhaprekṣaḥ paranārīparāṅmukhaḥ || 32 ||
[Analyze grammar]

tasyāstadvacanaṃ śrutvā sa munistadanaṃtaram |
ciraṃ dhyātvā vacaḥ prāha prasannavadanastataḥ || 33 ||
[Analyze grammar]

hāṭakeśvaraje kṣetre pañcapiṃḍā vyavasthitā |
gaurī gauryā svayaṃ tatra sthāpitā parameśvarī || 34 ||
[Analyze grammar]

tāmeṣā vatsaraṃ yāvacchraddhayā parayā yutā |
sadā pūjayatu prītyā tṛtīyāyāṃ viśeṣataḥ || 35 ||
[Analyze grammar]

tato varṣāṃtamāsādya saṃprāpsyati yathocitam |
bharttāraṃ nātra saṃdeho yādṛgrūpaṃ yathocitam || 36 ||
[Analyze grammar]

tatra pūrvaṃ gatā gaurī parityajya maheśvaram |
gaṃgerṣyayā mahābhāge jñātvā kṣetraṃ susiddhidam || 37 ||
[Analyze grammar]

tataḥ sā ciṃtayāmāsa kāṃ devīṃ pūjayāmyaham |
saubhāgyārthaṃ yato'nyā māṃ pūjayaṃti surastriyaḥ || 38 ||
[Analyze grammar]

tasmādahaṃ prabhaktyāḍhyā svayamātmānameva ca |
ātmanaiva kṛtotsāhā pūjayiṣyāmi siddhaye || 39 ||
[Analyze grammar]

tataḥ prāṇāgnihotrotthairmaṃtrairātharvaṇaiḥ śubhaiḥ |
mṛtpiṃḍānpaṃca saṃyojya hyekasthāne samāhitā || 40 ||
[Analyze grammar]

pṛthvīmapaśca tejaśca vāyumākāśameva ca |
teṣu saṃyojayāmāsa mṛtpiṃḍeṣu nidhāya sā || 41 ||
[Analyze grammar]

mahadbhūtāni caitāni pañca devī yatavratā |
tataḥ saṃpūjayāmāsa puṣpadhūpānulepanaiḥ || 42 ||
[Analyze grammar]

atha tāṃ tatra vijñāya tapaḥsthāṃ girajāṃ bhavaḥ |
tanmaṃtrākṛṣṭacittaśca satvaraṃ samupāgataḥ || 43 ||
[Analyze grammar]

provāca ca prahṛṣṭātmā kasmāttvamiha cāgatā |
māṃ muktvā doṣanirmuktaṃ mukhaprekṣaṃ sadā ratam || 44 ||
[Analyze grammar]

tasmādāgaccha kailāsaṃ vṛṣārūḍhā mayā saha |
athavā kāraṇaṃ brūhi yadi doṣo'sti me kvacit || 45 ||
[Analyze grammar]

devyuvāca |
tvaṃ mūrdhnā jāhnavīṃ dhatse mūrtāṃ padajalātmikām |
tasmānnāhaṃ gamiṣyāmi maṃdiraṃ te kathaṃcana || 46 ||
[Analyze grammar]

yāvanna tyajasi vyaktaṃ mama sāpatnyatāṃ gatām |
tathā nityaṃ praṇāmaṃ tvaṃ karoṣi vṛṣabhadhvaja || 47 ||
[Analyze grammar]

pratyakṣamapi me nityaṃ saṃdhyāyāśca na lajjase |
tasmādetatparityajya karma lajjākaraṃ param || 48 ||
[Analyze grammar]

ākārayasi māṃ deva tatsyādyadi mataṃ mama |
anyathāhaṃ na yāsyāmi tava harmye kathaṃcana |
etacchrutvā yadiṣṭaṃ te kuruṣva vṛṣabhadhvaja || 49 ||
[Analyze grammar]

deva uvāca ||
nāhaṃ saukhyena tāṃ gaṃgāṃ dhārayāmi sureśvari || 50 ||
[Analyze grammar]

bhagīrathena bhūpena prārthito jñāti kāraṇāt |
divyaṃ varṣasahasraṃ tu tapastaptvā sudāruṇam || 51 ||
[Analyze grammar]

yena no yāti pātālaṃ gaṃgā svargaparicyutā |
tasmāttvaṃ deva madvākyātsvamūrdhnā vaha jāhnavīm || 52 ||
[Analyze grammar]

mayā tasya pratijñātaṃ dhārayiṣyāmyasaṃśayam |
ākāśājjāhnavīvegaṃ pataṃtaṃ dharaṇītale || 53 ||
[Analyze grammar]

no cedvrajeta pātālaṃ yadatra viṣayesthim |
tato'haṃ saṃpravakṣyāmi tadihaikamanāḥ śṛṇu || 54 ||
[Analyze grammar]

eṣā gaṃgā varārohe mama mūrdhno vinirgatā |
himavaṃtaṃ nagaṃ bhittvā dvidhā jātā tataḥ param || 55 ||
[Analyze grammar]

tataḥ siṃdhvabhidhānā sā paścimaṃ sāgaraṃ gatā |
śatāni nava saṃgṛhya nadīnāṃ parameśvari || 56 ||
[Analyze grammar]

tathā gaṃgābhidhānā ca saiva prāksāgaraṃ gatā |
tāvatīśca samādāya nadīḥ parvatanandini || 57 ||
[Analyze grammar]

evamaṣṭādaśaitāni nadīnāṃ parvatātmaje |
śatāni sāgare yāṃti tena nityaṃ sa tiṣṭhati || 58 ||
[Analyze grammar]

satataṃ śoṣyamāṇo'pi vāḍavena divāniśam |
samudrasalilaṃ meghāḥ samādāya tataḥ param || 59 ||
[Analyze grammar]

martyaloke pravarṣaṃti tataḥ sasyaṃ prajāyate |
sasyena jīvate lokaḥ prabhavanti makhāstathā |
makhāṃśena surāḥ sarve tṛptiṃ yāṃti tataḥ param || 60 ||
[Analyze grammar]

etasmātkāraṇānmūrdhni devi gaṃgāṃ dadhāmyaham |
na snehātkāmato naiva jagadyena pravartate || 61 ||
[Analyze grammar]

athavā santyajāmyenāṃ yadi mūrdhnaḥ kathaṃcana |
taddūraṃ vegato bhittvā pṛthvīṃ yāti rasātalam || 62 ||
[Analyze grammar]

tataḥ śoṣaṃ vrajedāśu samudraḥ saritāṃ patiḥ |
aurveṇa pīyamāno'tra tato vṛṣṭirna jāyate |
vṛṣṭyabhāvājjagannāśaḥ satyametanmayoditam || 63 ||
[Analyze grammar]

evaṃ gaṃgākṛte proktaṃ mayā tava sureśvari |
śṛṇu sandhyākṛte'nyacca yena tāṃ praṇamāmyaham || 64 ||
[Analyze grammar]