Chapter 119

[English text for this chapter is available]

ṛṣaya ūcuḥ |
yatvayā sūtaja proktaṃ devī kātyāyanī ca sā |
mahiṣāṃtakarī jātā kathaṃ sā me prakīrtaya || |
kīdṛgdānavavaryaḥ sa māhiṣaṃ rūpamāśritaḥ |
kasmātsa sūdito devyā tanme vistarato vada || 2 ||
[Analyze grammar]

sūta uvāca |
atra vaḥ kīrtayiṣyāmi devyā māhātmyamuttamam |
śrutamātre'pi martyānāṃ yena śatrukṣayo bhavet || 3 ||
[Analyze grammar]

hiraṇyākṣasutaḥ pūrvaṃ mahiṣonāma dānavaḥ |
āsīnmahiṣarūpeṇa yena bhuktaṃ jagattrayam || 4 ||
[Analyze grammar]

ṛṣaya ūcuḥ |
māhiṣeṇa svarūpeṇa kiṃjātaḥ sūtanaṃdana |
athavā śāpadoṣeṇa sañjātaḥ kenacidvada || 5 ||
[Analyze grammar]

sūta uvāca |
saṃjāto hi surūpāḍhyaḥ śatapatranibhānanaḥ |
dīrghabāhuḥ pṛthugrīvaḥ sarvalakṣaṇalakṣitaḥ |
nāmnā citrasamaḥ proktastejovīryasamanvitaḥ || 6 ||
[Analyze grammar]

sabālyātprabhṛti prāyo mahiṣāṇāṃ prabodhanam |
karoti saṃparityajya sarvamaśvādivāhanam || 7 ||
[Analyze grammar]

kadācinmahiṣārūḍhaḥ sa pratasthe danoḥ sutaḥ |
jāhnavītīramāsādya vinighnañjalapakṣiṇaḥ || 9 ||
[Analyze grammar]

athāsītsusamādhistho durvāsā munisattamaḥ |
gaṃgātīre vidhāyoccaiḥ padmā sanamanuttamam || 9 ||
[Analyze grammar]

vihaṃgāsaktacittena śūnyena sa munīśvaraḥ |
dṛṣṭo na mahiṣakṣuṇṇaḥ khurairvegavaśāddvijaḥ || 10 ||
[Analyze grammar]

tataḥ kṣatajadigdhāṃgaḥ sa dṛṣṭvā dānavaṃ puraḥ |
atha dṛṣṭvā praṇāmena rahitaṃ kopamāviśat || |
tataḥ provāca taṃ kruddhastoyamādāya pāṇinā |
yasmātpāpa mama kṣuṇṇaṃ gātraṃ mahiṣajaiḥ khuraiḥ || 12 ||
[Analyze grammar]

samādheśca kṛto bhaṃgastasmāttvaṃ mahiṣo bhava |
yāvajjīvasi durbuddhe samyagjñānasamanvitaḥ || 13 ||
[Analyze grammar]

athā'sau mahiṣo jātaḥ kṛṣṇagātradharo mahān |
atidīrghaviṣāṇaśca aṃjanādririvāparaḥ || 14 ||
[Analyze grammar]

tataḥ prasādayāmāsa taṃ muniṃ vinayānvitaḥ |
śāpātaṃ kuru me vipra bālyabhāvādajānataḥ || 15 ||
[Analyze grammar]

atha taṃ sa muniḥ prāha na me syādvacanaṃ vṛthā |
tasmādyāvatsthitāḥ prāṇāstāvaditthaṃ bhaviṣyati || 16 ||
[Analyze grammar]

mahiṣasya svarūpeṇa ninditasya sudurmate |
evaṃ sa taṃ parityajya gaṃgātīraṃ munīśvaraḥ |
jagāmā'nyatra so'pyāśu gatvā śukramuvāca ha || 17 ||
[Analyze grammar]

ahaṃ durvāsasā śaptaḥ kasmiṃścitkāraṇāṃtare |
mahiṣatvaṃ samānītastasmāttvaṃ me gatirbhava || 18 ||
[Analyze grammar]

yathā syātpūrvajaṃ dehaṃ tiryaktvaṃ naśyate yathā |
prasādāttava vipreṃdra tathā nītirvidhīyatām || 19 ||
[Analyze grammar]

śukra uvāca |
tasya śāpo'nyathā kartuṃ naiva śakyaḥ kathaṃcana |
kenāpi saṃparityajya devamekaṃ maheśvaram || 20 ||
[Analyze grammar]

tasmādārādhayā'śu tvaṃ gatvā liṃgamanuttamam |
hāṭakeśvaraje kṣetre sarvasiddhipradāyake || 21 ||
[Analyze grammar]

tatra sañjāyate siddhiḥ śīghraṃ dānavasattama |
api pāpayuge prāpte kiṃ punaḥ prathame yuge || 22 ||
[Analyze grammar]

evamuktaḥ sa śukreṇa dānavaḥ satvaraṃ yayau |
hāṭakeśvarajaṃ kṣetraṃ tapastepe tataḥ param || 23 ||
[Analyze grammar]

sthāpayitvā mahalligaṃ bhaktyā devasya śūlinaḥ |
prāsādaṃ ca tataścakre kailāsaśikharopamam || 094 ||
[Analyze grammar]

tasyaivaṃ vartamānasya tapaḥsthasya mahātmanaḥ |
jagāma sumahānkālaḥ kṛcchre tapasi vartataḥ || 25 ||
[Analyze grammar]

tatastuṣṭo mahādevo gatvā taddṛṣṭigocaram |
provāca parituṣṭo'smi varaṃ varaya dānava || 26 ||
[Analyze grammar]

mahiṣa uvāca |
ahaṃ durvāsasā śapto mahiṣatve niyojitaḥ |
tiryaktvaṃ nāśamāyātu tasmānme tvatprasādataḥ || 27 ||
[Analyze grammar]

śrībhagavānuvāca |
nānyathā śakyate kartuṃ tasya vākyaṃ kathaṃcana |
tasmāttava kariṣyāmi sukhopāyaṃ śṛṇuṣva tam || 28 ||
[Analyze grammar]

ye kecinmānavā bhogā daivikā ye tathā'surāḥ |
te sarve tava gātre'tra samprayāsyaṃti saṃśrayam || 29 ||
[Analyze grammar]

bhogārthamiṣyate kāyaṃ yato martyaṃ surāsuraiḥ |
samavāpsyasi tānsarvāṃstasmāttava kalevaram || 37 ||
[Analyze grammar]

mahiṣa uvāca |
yadyevaṃ devadeveśa bhogaprāptirbhavenmama |
tasmādavadhyamevāstu gātrametanmama prabho || 31 ||
[Analyze grammar]

daśānāṃ devayonīnāṃ manuṣyāṇāṃ viśeṣataḥ |
tiryañcānāṃ ca nāgānāṃ pakṣiṇāṃ surasattama || 32 ||
[Analyze grammar]

śrībhagavānuvāca |
nāvadhyo'sti dharāpṛṣṭhe kaściddehī ca dānava |
tasmādekaṃ parityaktvā śeṣānprārthaya daityapa || 33 ||
[Analyze grammar]

tataḥ sa suciraṃ dhyātvā provāca vṛṣabhadhvajam |
striyamekāṃ parityaktvā nānyebhyastu vadho mama || 34 ||
[Analyze grammar]

tathātra māmake tīrthe yaḥ kaścicchraddhayā naraḥ |
karoti snānamavyagrastvāṃ paśyati tataḥ param || 35 ||
[Analyze grammar]

tasya syāttvatprasādena saṃsiddhiḥ sārvakāmikī |
sarvopadravanāśaśca tejovṛddhiśca śaṃkara || 36 ||
[Analyze grammar]

śrībhagavānuvāca |
mārgaśuklacaturdaśyāṃ tīrthe snātvā'tra tāvake |
vilokayiṣyati prītyā mama liṃgaṃ tataḥ param || 37 ||
[Analyze grammar]

bhūtapretapiśācādi saṃbhavāstasya tatkṣaṇāt |
doṣā nāśaṃ prayāsyaṃti tathā rogā jvarādayaḥ || 38 ||
[Analyze grammar]

evamuktvā'tha deveśastataścādarśanaṃ gataḥ |
mahiṣo'pi nijaṃ sthānaṃ prajagāma tataḥ param || 39 ||
[Analyze grammar]

sa gatvā dānavānsarvānsamāhūya tataḥ param |
provācāmarṣasaṃyuktaḥ sabhāmadhye vyavasthitaḥ || 40 ||
[Analyze grammar]

pitā mama pitṛvyaśca ye cānye mama pūrvajāḥ |
dānavā nihatā devairvāsudevapurogamaiḥ || 41 ||
[Analyze grammar]

tasmāttānnāśayiṣyāmi devānapi mahāhave |
ahaṃ trailokyarājyaṃ hi grahīṣyāmi tataḥ param || 42 ||
[Analyze grammar]

atha te dānavāḥ procuryuktametadanuttamam |
asmadīyamidaṃ rājyaṃ yacchakraḥ kurute divi || 43 ||
[Analyze grammar]

tasmādadyaiva gatvā'śu hatvendraṃ raṇamūrdhani |
divyānbhogānprabhuñjānāḥ sthāsyāmaḥ sukhino divi || 44 ||
[Analyze grammar]

evaṃ te dānavāḥ sarve kṛtvā maṃtraviniścayam |
meruśṛṃgaṃ tato jagmuḥ sabhṛtyabalavāhanaḥ || 45 ||
[Analyze grammar]

atha śakrādayo devā dṛṣṭvā taddānavodbhavam |
akasmādeva saṃprāptaṃ balaṃ śastrāstrasaṃyutam |
yuddhārthaṃ svapuradvāri niryayustadanaṃtaram || 46 ||
[Analyze grammar]

ādityā vasavo rudrā nāsatyau ca bhiṣagvarau |
viśvedevāstathā sādhyāḥ siddhā vidyādharāśca ye || 47 ||
[Analyze grammar]

tataḥ samabhavadyuddhaṃ devānāṃ saha dānavaiḥ |
mithaḥ prabhartsyamānānāṃ mṛtyuṃ kṛtvā nivartanam || 48 ||
[Analyze grammar]

evaṃ samabhavadyuddhaṃ yāvadvarṣatrayaṃ divi |
raktanadyotivipulāstatrātīva prasusruvuḥ || 49 ||
[Analyze grammar]

anyasmindivase śakraṃ dṛṣṭaivārāvaṇasaṃsthitam |
taṃ śuklenātapatreṇa dhriyamāṇena mūrdhani |
devaiḥ parivṛtaṃ divyaśastrapāṇibhireva ca || 50 ||
[Analyze grammar]

tataḥ kopaparītātmā mahiṣo dānavādhipaḥ |
mahāvegaṃ samāsādya tasyaivābhimukho yayau || 51 ||
[Analyze grammar]

śṛṃgābhyāṃ ca sutīkṣṇābhyāṃ tataścairāvaṇaṃ gajam |
vivyādha hṛdaye so'tha cakre rāvaṃ sudāruṇam || 52 ||
[Analyze grammar]

tataḥ parāṅmukho bhūtvā palāyanaparāyaṇaḥ |
abhidudrāva vegena purī yatrāmarāvatī || 53 ||
[Analyze grammar]

aṃkuśotthaprahāraiśca kṣatakuṃbho'pi bhūriśaḥ |
mahāmātraniruddho'pi na sa tasthau kathaṃcana || 54 ||
[Analyze grammar]

athābravītsahasrākṣo mahiṣaṃ vīkṣya garvitam |
garjamānāṃstathā daityānkṣveḍanāsphoṭanādibhiḥ || 55 ||
[Analyze grammar]

mā daitya pravijānīhi yannaṣṭastridaśādhipaḥ |
eṣa nāgo raṇaṃ hitvā vivaśo yāti me balāt || 56 ||
[Analyze grammar]

tasmāttiṣṭha muhūrtaṃ tvaṃ yāvadāsthāya sadratham |
nāśayāmi ca te darpaṃ nihatya niśitaiḥ śaraiḥ || 57 ||
[Analyze grammar]

etasminnaṃtare prāpto mātaliḥ śakrasārathiḥ |
sahasraidarśabhiryuktaṃ vājināṃ vātaraṃhasām || 58 ||
[Analyze grammar]

te 'tha mātalinā aśvāḥ pratodena samāhatāḥ |
utpataṃta ivākāśe satvaṃ saṃpradudruvuḥ || 59 ||
[Analyze grammar]

atha cāpaṃ samāropya satvaraṃ pākaśāsanaḥ |
śarairāśīviṣākāraiśchādayāmāsa dānavam || 60 ||
[Analyze grammar]

tataḥ sa vegamāsthāya bhūyo'pi krodhamūrchitaḥ |
abhidudrāva vegena sa yatra tridaśādhipaḥ || 61 ||
[Analyze grammar]

tatastānsuhayāṃstasya śṛṃgābhyāṃ vegamāśritaḥ |
dārayāmāsa saṃkruddha āvidhyāvidhya cāsakṛt || 62 ||
[Analyze grammar]

tataste vājinastrastāḥ saṃjagmuḥ kṣatavakṣasaḥ |
raktaplāvitasarvāṃgā mārgamairāvaṇasya ca || 63 ||
[Analyze grammar]

tataḥ śakrarathaṃ dṛṣṭvā vimukhaṃ surasattamāḥ |
sarve pradudruvurbhītāstasya mārgamupāśritāḥ || 64 ||
[Analyze grammar]

tatastu dānavāḥ sarve bhagnāndṛṣṭvā raṇe surān |
śastravṛṣṭiṃ pramuṃcaṃto garjamānā yathā ghanāḥ || 65 ||
[Analyze grammar]

etasminnaṃtare prāptā rajanī tamasāvṛtā |
na kiṃcittatra saṃyāti kasyaciddṛṣṭigocare || 66 ||
[Analyze grammar]

tatastu dānavāḥ sarve yuddhānnirvṛtya sarvataḥ |
meruśṛṃgaṃ samāśritya ramyaṃ vāsaṃ pracakramuḥ || 67 ||
[Analyze grammar]

vijayena samāyuktāstuṣṭiṃ ca paramāṃ gatāḥ |
kathāścakruśca yuddhotthā yuddhaṃ tasya yathā bhavat || 68 ||
[Analyze grammar]

devāścāpi hatotsāhāḥ prahāraiḥ kṣatavikṣatāḥ |
maṃtraṃ cakrurmitho bhūtvā bṛhaspatipuraḥsarāḥ || 69 ||
[Analyze grammar]

sāṃprataṃ dānavaiḥ sainyamasmākaṃ vimukhaṃ kṛtam |
vidhvastaṃ sunirutsāhamakṣamaṃ yuddhakarmaṇi || 70 ||
[Analyze grammar]

tasmāttyaktvā pravekṣyāmaḥ purīṃ caivāmarāvatīm |
brahmaṇaḥ sadanaṃ yatra na syāddānavajaṃ bhayam || 7 ||
[Analyze grammar]

evaṃ te niścayaṃ kṛtvā brahmalokaṃ tato gatāḥ |
śūnyāṃ śakrapurīṃ kṛtvā sarve devāḥ savāsavāḥ || 72 ||
[Analyze grammar]

tataḥ prātaḥ samutthāya dānavāste praharṣitāḥ |
śūnyāṃ śakrapurīṃ dṛṣṭvā viviśustadanaṃtaram || 73 ||
[Analyze grammar]

atha śākre pade daityaṃ mahiṣaṃ saṃnidhāya ca |
praṇemustuṣṭisaṃyuktāścakruścaiva mahotsavam || 74 ||
[Analyze grammar]

jagṛhuryajñabhāgāṃśca sarveṣāṃ tridivaukasām |
devasthāneṣu sarveṣu devatā'bhimatāśca ye || 76 ||
[Analyze grammar]