Chapter 34

[English text for this chapter is available]

| sanatkumāra uvāca |
tīrthamanyattathā vakṣye śaktibhedamiti smṛtam |
skaṃdasya ca jaṭābhadraṃ cakre yatra purā śivaḥ || 1 ||
[Analyze grammar]

tārakaṃ ca tathā daityaṃ hatvā yatra suradviṣam |
śaktiṃ skaṃdaḥ svayaṃ kruddho niścikṣepa mahītale || 2 ||
[Analyze grammar]

vyāsa uvāca |
bhagavanbrūhi yatnena saṃśayo me mahāmune |
kathaṃ skaṃdaḥ samutpanna etadicchāmi veditum || 3 ||
[Analyze grammar]

sanatkumāra uvāca |
purā devāsure yuddhe nirjitā dānavaiḥ surāḥ |
divaṃ tyaktvā diśo yātāḥ śakrādyā bhayavihvalāḥ || 4 ||
[Analyze grammar]

tatra tu deva rājena tapasogreṇa vai mune |
ārādhito mahādevastryaṃbakastripurāṃtakaḥ || 5 ||
[Analyze grammar]

tatastuṣṭo mahādevaḥ śakrasyābhimukhaḥ sthitaḥ |
uvāca vacanaṃ ślakṣṇaṃ varamiṣṭaṃ dadāmi te || 6 ||
[Analyze grammar]

śakra uvāca |
yadi tuṣṭo'si bhagavankāruṇyānmama śaṃkara |
mahāsenāpatiṃ deva prayaccha parameśvara || 7 ||
[Analyze grammar]

hara uvāca |
utpādayāmi deveṣu svavīryādūrjitaṃ sutam |
senānyāṃ ca mahāsenaṃ surāṇāṃ bhayahārakam || 8 ||
[Analyze grammar]

sanatkumāra uvāca |
ityuktvāṃtardadhe devaḥ sarvabhūtapatirharaḥ |
sutaciṃtāparo devo jagāma ca himālayam || 9 ||
[Analyze grammar]

devadāruvane tasthau jñānadhyānaparo'bhavat |
brahmādayo'pi yaṃ devaṃ yogino dhyānaciṃtakāḥ || 10 ||
[Analyze grammar]

dhyāyaṃti niyatātmanaḥ prāṇāyāmaparā mune |
liṃgamūrtiśca yo nityaṃ pūjyate sarvajaṃtubhiḥ || 11 ||
[Analyze grammar]

sa dhyāyati kimarthaṃ tanna vidmaḥ paramārthinaḥ |
vaṃ dhyānapare deve devī himavato gṛhe || 12 ||
[Analyze grammar]

madhye vayasi vartaṃtī yāsīddākṣāyaṇī satī |
 piturgehe nijo deho yayā yogādvisarjitaḥ || 13 ||
[Analyze grammar]

nimaṃtrito na me bhartā iti kopaṃ cakāra yā |
tāṃ devīṃ himavānpūrvaṃ śrutvā devarṣināradāt || 14 ||
[Analyze grammar]

bhavabhāryā bhavitrīti nānyaṃ varamaciṃtayat |
tapasyati ca rudrāya sā sakhībhyāṃ samanvitā || 15 ||
[Analyze grammar]

kathaṃ hi śaṃkaro devo mama bhartā bhaviṣyati |
yāvadevaṃ gato devo devī himavataḥ sutā || 16 ||
[Analyze grammar]

tataḥ samāgatā devāḥ kṛtvāgre balasūdanam |
jagmurbrahmasadaḥ puṇyaṃ draṣṭuṃ brahmāṇama vyayam || 17 ||
[Analyze grammar]

te surāstatstuti kṛtvā vākyametatsamairayan |
śaraṇaṃ bhava devānāṃ dānavairvijitātmanām || 18 ||
[Analyze grammar]

tato'vocatsurānbrahmā jñātaṃ kāryaṃ samāhitam |
naitacchaṃbhorvinā vīryātkāryasiddhirbhaviṣyati || 19 ||
[Analyze grammar]

tathā yatadhvaṃ deveśaṃ yathā vāṃchati pārvatīm |
ityuktvāṃtardadhe brahmā svapne labdhaṃ dhanaṃ yathā || 20 ||
[Analyze grammar]

tato meruṃ samāgatya punarmaṃtraṃ pracakrire |
teṣāmāhedṛśaṃ śakrastuṣṭaḥ śaṃbhuḥ purā mama || 21 ||
[Analyze grammar]

pratipannaṃ ca devena svāṃgātsenā patiṃ prati |
tasmādevaṃ gate kārye kāraṇaṃ makaradhvajaḥ || 22 ||
[Analyze grammar]

iti saṃcitya deveśaḥ kāmamāhūya satvaram |
uvāca vacanaṃ hṛdyaṃ devānā manukaṃpayā || 23 ||
[Analyze grammar]

yathā devo bhajeddevīṃ tathā kāma vidhīyatām |
kāraṇaṃ mahadetadvai devānāṃ samupasthitam || 24 ||
[Analyze grammar]

kāmo vākyaṃ hareḥ śrutvā prahasyedamuvāca ha |
kariṣye sarvamevaṃ hi sakhā me cedbhavenmadhuḥ || 25 ||
[Analyze grammar]

tasminkṣaṇe'tha śakreṇa kāmavākyādanaṃtaram |
samādiṣṭo madhuḥ kṣipraṃ kāmasyānucaro bhava || 26 ||
[Analyze grammar]

labdhvā kāmo madhuṃ mitraṃ pratasthe bhāryayā saha |
kṛtvā sajyaṃ dhanurbāṇaṃ pauṣpaṃ pāṇau samāhitaḥ || 27 ||
[Analyze grammar]

yatra devādhideveśo devadāruvane sthitaḥ |
nandīśvaraḥ pratīhāraḥ kṛtadhyāno'vatiṣṭhati || 28 ||
[Analyze grammar]

cūtavṛkṣāśritaḥ kāmo yāvadbāṇaṃ sumohanam |
saṃdadhātyaṃtare cāsmindevī prāpa bhavāśramam || 29 ||
[Analyze grammar]

tyaktadhyānavrato devo hṛṣṭaścāhrādacetanaḥ |
tato vilokayāmāsa diśaḥ sarvāḥ prayatnataḥ || 30 ||
[Analyze grammar]

cūtavṛkṣāśritaṃ kāmamapaśyacca ruṣānvitaḥ |
bhasmīkṛtastṛtīyākṣṇā vahnijvālāvatā tataḥ || 31 ||
[Analyze grammar]

devo'pyantardadhe tasmātsthānādāśu gaṇaiḥ saha |
pārvatī vismitā sādhvī lajjitā duḥkhitā'bhavat || 32 ||
[Analyze grammar]

himavāṃstāṃ samutthāpya nināyāśu nijaṃ gṛham |
gate deve ca devyāṃ ca kāmapatnī suduḥ khitā || 23 ||
[Analyze grammar]

bhasmīkṛtaṃ patiṃ dṛṣṭvā vilalāpa suduḥkhitā |
dṛṣṭvā ratiṃ suduḥkhārtā vāguvācāśarīriṇī || 34 ||
[Analyze grammar]

āśvāsayaṃtīṃ kṛpayā sakhīmiva suduḥ khitām |
mā rodīstvaṃ śubhāpāṃgi tava bhartā kariṣyati || 35 ||
[Analyze grammar]

sarvakāryāṇyanaṃgopi mitrakāryaṃ vidhānataḥ |
yadā cāyaṃ mahādevaḥ pariṇeṣyati pārvatīm || 36 ||
[Analyze grammar]

tataḥ śaṃbhoranudhyānātthāsyati na saṃśayaḥ |
dvāparāṃte yadā kṛṣṇo dvārakāyāṃ nivatsyati || 37 ||
[Analyze grammar]

tatputro bhavitā dehī pradyumnonāma te patiḥ |
ityuktā sā'jahācchokamākāśājjātayā girā || 38 ||
[Analyze grammar]

aciṃtayattadā devī umāpi himavadgṛhe |
kāmasya dahanaṃ tejaḥ śaṃbhoryattadanuttamam || 39 ||
[Analyze grammar]

kathaṃ bharttā bhaveddevaḥ kāmasyotthāpanaṃ katham |
naitattapo vinā kāryaṃ kvacitkasyāpi sidhyati || 40 ||
[Analyze grammar]

evaṃ saṃciṃtayitvātha sakhībhiḥ sahitā tataḥ |
tapaścakāra sumahatpitrādeśācchubhavratā || 41 ||
[Analyze grammar]

varṣāsvabhrāvakāśasthā hemaṃte jalaśāyinī |
grīṣme paṃcāgnitaptāṃgī tapasyugre samā sthitā || 42 ||
[Analyze grammar]

tāṃ dṛṣṭvā tapasopetāṃ brahmacārivayā haraḥ |
ājagāmāśramaṃ devyāḥ kṛtātithyo'bravīdidam || 43 ||
[Analyze grammar]

kṛśamadhye kṛśāpāṃgi kimarthaṃ navayauvane |
tapaḥ karoṣi kalyāṇi kasyārthe kāraṇaṃ vada || 44 ||
[Analyze grammar]

uvāca cottaraṃ sā vai satyaṃ ca madhuraṃ tathā |
baṭo tapaḥsamāraṃbhaḥ kriyate śaṃkarā ptaye || 45 ||
[Analyze grammar]

vicārya ca haraḥ śrutvā'naṃdayatkāryamātmanaḥ |
umābhaktiparīkṣārthaṃ śivaṃ vācā nininda vai || 46 ||
[Analyze grammar]

tasya tadvacanaṃ śrutvā na sehe sā gireḥ sutā |
gaṃtukāmāmumāṃ matvā tasmātsthānānmaheśvaraḥ |
svaṃ vapurdarśayāmāsa trinetraṃ śūlapāṇinam || 47 ||
[Analyze grammar]

lajjitābhūdbhavānīśaṃ dṛṣṭvā tasthāvadhomukhī |
vijayāthāha yogīndraṃ prārthyā cābhijane tviyam |
pārvatīharaṇārthāya yatnaṃ ca prakaromyaham || 48 ||
[Analyze grammar]

ityuktvāṃtardadhe devo devyāgācca piturgṛham |
devīlābhāya saptarṣīnsasmāra smaraśāsanaḥ || 49 ||
[Analyze grammar]

praṇemustepyathāgamya saṃsmṛtāḥ parameśvaram |
ūcuśca prāṃja lipuṭāḥ kurma kiṃ śādhi no bhṛśam || 50 ||
[Analyze grammar]

tato'bravīnmunīnīśaḥ samastāṃśca girergṛham |
gatvā tathā kurudhvaṃ me pārvatī syādyathā priyā || 51 ||
[Analyze grammar]

tatheti te pratijñāya saṃketaṃ śaṃbhunā samam |
kṛtvā jagmuḥ sapatnīkā girīṃdrasya niveśanam || 52 ||
[Analyze grammar]

dattārghā bhūdhareṃdreṇa kṛtāsana parigrahāḥ |
ūcuradrimumāṃ yaccha śaṃkarāyārthine priyām || 53 ||
[Analyze grammar]

dattetyuktā girīṃdreṇa nirūpyodvāhavāsaram |
labdhvānujñāṃ samāyātā yatrāste sa maheśvaraḥ || 54 ||
[Analyze grammar]

ūcuste śaṃkaraṃ sarve dattā himavatā śivā |
kṛtakāryāśca sarve'pi vavrajuste yathāgatam || 55 ||
[Analyze grammar]

cakrurvivāha sāmagrīṃ brahmendrādisurāstadā |
vṛṣāsano jagāmātha naṃdīśapramukhairgaṇaiḥ || 56 ||
[Analyze grammar]

śaṃkhaduṃdubhinādaiśca brahmādyairamaraiḥ saha |
prāpyāgeṃdrālayaṃ hīśaḥ kṛtakautukamaṃgalaḥ || 57 ||
[Analyze grammar]

vivāhyemāṃ vidhānena jagāma svālayaṃ punaḥ |
tatraikāṃtaratirdevo yāvattiṣṭhati kāmavān || 58 ||
[Analyze grammar]

tāvattrastaiḥ surairagniḥ preṣito'gānmaheśvaram |
agnau tatra gate devo ratiṃ kṛtvā maheśvaraḥ || 59 ||
[Analyze grammar]

nicikṣepa mukhe vahneḥ svareto vrīḍito bhṛśam |
retasā tena tapto 'gnirgaṃgātoye nikṣiptavān || 60 ||
[Analyze grammar]

harareto'gninodgīrṇaṃ gaṃgāmadhye papāta ha |
tayā tu svataṭe nyastaṃ dagdhayā rudraretasā || 61 ||
[Analyze grammar]

saptarṣīṇāṃ ca ṣaṭpatnyaḥ snānārthaṃ jāhnavīṃ yayuḥ |
śītārtāstāḥ kṛtasnānā dṛṣṭvā tejastaṭe jvalat || 62 ||
[Analyze grammar]

matvāgnimiti tāḥ sarvāstapaṃti sma yathecchayā |
tapaṃtīnāṃ ca vai tāsāṃ tadbījasaṃbhava mune || 63 ||
[Analyze grammar]

ṣaḍānanaṃ samārūḍhaṃ śroṇidvāreṇa satvaram |
yadānyonyamutpatituṃ śaktā nāgnipurogamāt || 64 ||
[Analyze grammar]

ciṃtāṃ jagmustadā sarvā munitrāsāttato bhayāt |
tataśca tapaso vīryānniṣkṛṣya svodarāttataḥ || 65 ||
[Analyze grammar]

ṣaḍbhirekatvamāpadya śvetaparvatamastake |
madhye śarāṇāṃ vai kṛtya nikṣiptaṃ vīryamuttamam || 66 ||
[Analyze grammar]

śuklāyāṃ pratipadyāsīddvitīyāyāṃ samīkṛtaḥ |
tṛtīyāyāṃ ca sākāraḥ sarvalakṣaṇalakṣitaḥ || 67 ||
[Analyze grammar]

caturthyāṃ paripūrṇāṃgaḥ ṣaṇmukho dvādaśekṣaṇaḥ |
alaṃkṛtastu paṃcamyāṃ ṣaṣṭhyāṃ ca sa samutthitaḥ || 68 ||
[Analyze grammar]

tejasā śvetatāmreṇa tatāpa sa jagattrayam |
jātamitthaṃ samākarṇya sarve śakramukhāḥ surāḥ || 69 ||
[Analyze grammar]

samāgatyāsya saṃskāraṃ brahmā cakre yathāvidhi |
tuṣṭena pārvatīśena śaktirdattā dṛḍhā śubhā || 70 ||
[Analyze grammar]

tato gauryā mayūraśca vāhane parikalpitaḥ |
chāgaścaivāgninā dattaḥ kukkuṭaṃ saritāṃ patiḥ || 71 ||
[Analyze grammar]

śūlena kṛttikābhiśca vardhitaḥ putrakāmyayā |
tatastu prāptasaṃskāro brahmādyairabhinaṃditaḥ || 72 ||
[Analyze grammar]

śaktihasto'bhiṣiktastu devasenāsamādṛtaḥ |
vittādhipena sāhyena pāvakiḥ paṇmukhoṃ 'śataḥ || 73 ||
[Analyze grammar]

gāṃgeyaḥ kārtikeyaśca guhaḥ skaṃda umāsutaḥ |
devasenāpatiḥ svāmī senānīśca śikhidhvajaḥ || 74 ||
[Analyze grammar]

kumāraḥ śaktidhārī ca tasya nāmāni ṣoḍaśa |
yaḥ paṭhenmānavo bhaktyā bādhā tasya na jāyate || 75 ||
[Analyze grammar]

evaṃ jāto mahāseno dānavānāṃ kṣayakaraḥ |
kuśasthalyāṃ samānītaḥ śaṃbhunā sthānakāraṇāt || 76 ||
[Analyze grammar]

abhiṣiktaḥ sa tenāsau bhadritaḥ sa jaṭāḥ purā |
tena bhadrajaṭaṃnāma devatīrthaṃ ca kathyate || 77 ||
[Analyze grammar]

kṛtābhiṣekaṃ labdhāstraṃ mahāsenaṃ maheśvaraḥ |
tamuvāca samadhuraṃ sarvadevasamāgame || 78 ||
[Analyze grammar]

rakṣā kāryā tvayā putra sāmarasya śatakratoḥ |
devānāṃ bādhakāḥ sarve nihaṃtavyāḥ suradviṣaḥ || 79 ||
[Analyze grammar]

itthaṃ mahotsave jāte dṛptapramathasāgare |
mātaro'nvāgatāḥ sarvāḥ pātālatalasaṃsthitāḥ || 80 ||
[Analyze grammar]

tāsāmāhārasaṃjñābhiścakre nāmāni śaṃkaraḥ |
yāni tāni pravakṣyāmi śṛṇu tvaṃ munipuṃgava || 81 ||
[Analyze grammar]

vaṭabhojanakāmā yā jñeyāstā vaṭamātaraḥ |
bhuñjate carpaṭānyāstu tā vai carpaṭamātaraḥ || 82 ||
[Analyze grammar]

krīḍārthaṃ śaṃbhunā cātha prāptā yāḥ paulabhojane |
ṣaṇṇavatimātaraḥ satyāḥ sarvāstāḥ paulamātaraḥ || 83 ||
[Analyze grammar]

sarvāsāṃ darśanaṃ puṇyaṃ grahabhūtavināśanam |
prayatnataḥ sadā devyo draṣṭavyā mānavairmune || 84 ||
[Analyze grammar]

labdhvā śaktiṃ mahāseno devaseno mahāvrataḥ |
jaghāna dānaveṃdraṃ taṃ tārakaṃ tarasā tadā || 85 ||
[Analyze grammar]

dattvā rājyaṃ tatheṃdrāya sphītaṃ nihatakaṃṭakam |
kuśasthalīṃ samāgamya tatra vāsaṃ samācarat || 86 ||
[Analyze grammar]

evaṃ nihatya daityeṃdraṃ sa gāṃgeyo mahāba laḥ |
śaktiṃ śiprājale muktvā pātālaṃ ca bibheda sā || 87 ||
[Analyze grammar]

tato bhogavatī vyāsa śaktibhedena nirgatā |
vaṃditā sarvadevaiśca munibhiśca tapodhanaiḥ || 88 ||
[Analyze grammar]

pṛthivyāṃ yāni tīrthāni samudrādigatāni ca |
śaktibhede tu nyastāni śatakoṭisahasraśaḥ || 89 ||
[Analyze grammar]

ato'tipuṇyaṃ trailokye koṭitīrthamudāhṛtam |
brahmaṇā sthāpitastatra koṭitīrtheśvaraḥ śivaḥ || 90 ||
[Analyze grammar]

koṭitīrthe naraḥ snātvā dṛṣṭvā koṭīśvaraṃ śivam |
mucyate sarvapāpebhyo nirmokādiva pannagaḥ || 91 ||
[Analyze grammar]

śrāddhaṃ karoti yastatra pitṛbhakto naro mune |
daśānāmaśvamedhānāṃ prāpnoti sakalaṃ phalam || 92 ||
[Analyze grammar]

pitṝnuddiśya yatkiñcitkoṭitīrthe pradīyate |
tatsarvaṃ koṭiguṇitaṃ jāyate nātra saṃśayaḥ || 93 ||
[Analyze grammar]

tatra tīrthe naro yastu gāṃ dadāti payasvinīm |
sarvalokānatikramya sa gacchetpa ramāṃ gatim || 94 ||
[Analyze grammar]

yāvantyaṃgeṣu romāṇi tatprasūtikuleṣu ca |
tāvadyugasahasrāṇi śivaloke mahīyate || 95 ||
[Analyze grammar]

paurṇamāsyāmamāvāsyāṃ paśyecchaktidharaṃ tu yaḥ |
nāputro nādhano rogī saptajanmasu jāyate || 96 ||
[Analyze grammar]

jalapraveśaṃ yaḥ kuryāttatra tīrthe narottamaḥ |
so'kṣayaṃ labhate lokaṃ yāvaccandra divākarau || 97 ||
[Analyze grammar]

vṛṣotsargaṃ tu yaḥ kuryātpitṛbhakto naro mune |
so'kṣayaṃ labhate sthānaṃ yatsurairapi durlabham || 98 ||
[Analyze grammar]