Chapter 37

[English text for this chapter is available]

śrīsūta uvāca |
bhobhostapodhanāḥ sarve naimiṣāraṇyavāsinaḥ |
yāvadrāmadhanuṣkoṭicakratīrthamukhāni vaḥ || 1 ||
[Analyze grammar]

caturviṃśatitīrthāni kathitāni mayādhunā |
ito'nyadadbhutaṃ yūyaṃ kiṃ bhūyaḥ śrotumicchatha || 2 ||
[Analyze grammar]

munaya ūcuḥ |
kṣīrakuṃḍasya māhātmyaṃ śrotumicchāmahe mune |
yatsamīpe tvayā cakratīrthamityuditaṃ purā || 3 ||
[Analyze grammar]

kṣīrakuṃḍaṃ ca tatkutra kīdṛśaṃ tasya vaibhavam |
kṣīrakuṇḍamiti khyātiḥ kathaṃ vāsya samāgatā || 4 ||
[Analyze grammar]

etannaḥ śraddadhānānāṃ vistarādvaktumarhasi |
śrīsūta uvāca |
bravīmi munayaḥ sarve śṛṇudhvaṃ susamāhitāḥ || 5 ||
[Analyze grammar]

devīpurānmahāpuṇyātpratīcyāṃ diśyadūrataḥ |
phullagrāmamiti khyātaṃ sthānamasti mahattaram || 6 ||
[Analyze grammar]

yata ārabhya rāmeṇa setubandho mahārṇave |
taddhi puṇyatamaṃ kṣetraṃ phullagrāmābhidhaṃ puram || 7 ||
[Analyze grammar]

kṣīrakuṇḍaṃ tu tatraiva mahāpātakanāśanam |
darśanātsparśanāddhyānātkīrtanāccāpi mokṣadam || 8 ||
[Analyze grammar]

tasya tīrthasya puṇyasya kṣīrakuṇḍamiti prathām |
bhavatāṃ sādaraṃ vakṣye śṛṇudhvaṃ śraddhayā saha || 9 ||
[Analyze grammar]

purā hi mudgalonāma munirvedoktamārgakṛt |
dakṣiṇāṃbunidhestīre phullagrāmetipāvane || 10 ||
[Analyze grammar]

nārāyaṇaprītikarama karodyajñamuttamam |
tasya viṣṇuḥ prasannātmā yāgena paritoṣitaḥ || 11 ||
[Analyze grammar]

prādurbabhūva purato yajñavāṭe dvijottamāḥ |
taṃ dṛṣṭvā mudgalo viṣṇuṃ lakṣmīśobhitavigraham || 12 ||
[Analyze grammar]

kālameghatanuṃ kāṃtyā pītāṃbaravirājitam |
vinatānaṃdanārūḍhaṃ kaustubhālaṃkṛtorasam || 13 ||
[Analyze grammar]

śaṃkhacakragadāpadmarājadbāhucatu ṣṭayam |
bhaktyā paravaśo dṛṣṭvā pulakāṃkuramaṃḍitaḥ |
mudgalaḥ parituṣṭāva śabdaiḥ śrotrasukhāvahaiḥ || 14 ||
[Analyze grammar]

mudgala uvāca |
prathamaṃ jagataḥ sraṣṭre pālakāya tataḥ param || 15 ||
[Analyze grammar]

saṃhartre ca tataḥ paścānnamo nārāyaṇāya te |
namaḥ śaphararūpāya kamaṭhāya cidātmane || 16 ||
[Analyze grammar]

namo varāhavapuṣe namaḥ paṃcāsyarūpiṇe |
vāmanāya namastubhyaṃ jamadagnisutāya te || 17 ||
[Analyze grammar]

rāghavāya namastubhyaṃ balabhadrāya te namaḥ |
kṛṣṇāya kalkaye tubhyaṃ namo vijñānarūpiṇe || 18 ||
[Analyze grammar]

rakṣa māṃ karuṇāsiṃdho nārāyaṇa jagatpate |
nirlajjaṃ kṛpaṇaṃ krūraṃ piśunaṃ dāṃbhikaṃ kṛśam || 19 ||
[Analyze grammar]

paradāraparadravyaparakṣetraikalo lupam |
asūyāviṣṭamanasaṃ māṃ rakṣa kṛpayā hare || 20 ||
[Analyze grammar]

iti stuto hariḥ sākṣānmudgalena dvijottamāḥ |
tamāha mudgalamuniṃ meghagaṃbhīrayā girā || 21 ||
[Analyze grammar]

śrīhariruvāca |
prīto'smyanena stotreṇa mudgala kratunā ca te |
pratyakṣeṇa havirbhoktumahaṃ te kratumāgataḥ || 22 ||
[Analyze grammar]

ityukto hariṇā tatra mudgalastuṣṭamānasaḥ |
uvācādhokṣajaṃ vipro bhaktyā paramayā yutaḥ || 23 ||
[Analyze grammar]

mudgala uvāca |
kṛtārtho'smi hṛṣīkeśa patnī me dhanyatāṃ yayau |
adya me saphalaṃ janma hyadya me saphalaṃ tapaḥ || 24 ||
[Analyze grammar]

adaya me saphalo vaṃśo hyadya me saphalāḥ sutāḥ |
āśramaḥ saphalo'dyaiva sarvaṃ saphalamadya me || 25 ||
[Analyze grammar]

yadbhavānyajñavāṭaṃ me havirbhoktumihāgataḥ |
yogino yoganiratā hṛdaye mṛgayaṃti yam || 26 ||
[Analyze grammar]

tamadya sākṣāttvāṃ paśye sapha lo'yaṃ mama kratuḥ |
itīrayitvā taṃ viṣṇumarcayitvā'sanādibhiḥ || 27 ||
[Analyze grammar]

caṃdanaiḥ kusumairanyairdattvā cārghyaṃ sa viṣṇave |
pradadau viṣṇave prītyā puro ḍāśādikaṃ haviḥ || 28 ||
[Analyze grammar]

svayameva samādāya pāṇinā lokabhāvanaḥ |
havistadbubhuje viṣṇurmudgalena samarpitam || 29 ||
[Analyze grammar]

tasminhaviṣi bhukte tu viṣṇunā prabhaviṣṇunā |
sāgnayastridaśāḥ sarve tṛptāḥ samabhavandvijāḥ || 30 ||
[Analyze grammar]

ṛtvijo yajamānaśca tatratyā brāhmaṇāstathā |
yatkiṃcitprāṇiloke' smiṃścaraṃ vā yadi vā'caram || 31 ||
[Analyze grammar]

sarvameva jagattṛptaṃ bhukte haviṣi viṣṇunā |
tato hariḥ prasannātmā mudgalaṃ pratyabhāṣata || 32 ||
[Analyze grammar]

prīto'haṃ varado'smyeṣa varaṃ varaya suvrata |
ityukte keśavenātha maharṣistamabhāṣata || 33 ||
[Analyze grammar]

mudgala uvāca |
yattvayā me havirbhuktaṃ yāge pratyakṣarūpiṇā |
anenaiva kṛtārtho'smi kimasmādadhikaṃ varam || 34 ||
[Analyze grammar]

tathāpi bhagavanviṣṇo tvayi me niścalā sadā |
bhaktirniṣkapaṭā bhūyādidaṃ me prathamaṃ varam || 35 ||
[Analyze grammar]

mādhavāhaṃ pratidinaṃ sāyaṃprātarihāgnaye |
tvadrūpāya tava prītyai surabheḥ payasā hare || 36 ||
[Analyze grammar]

hotumicchāmi varada tanme dehi varāṃtaram |
payasā nityahomo hi dvikālaṃ śruticoditaḥ || 37 ||
[Analyze grammar]

na me surabhayaḥ saṃti tāpasasyādhanasya ca |
ityukte mudgalenātha devo nārāyaṇo hariḥ || 38 ||
[Analyze grammar]

āhūya viśvakarmāṇaṃ tvaṣṭāramamṛtāśinam |
ekaṃ saraḥ kārayitvā śilpinā tena śobhanam || 39 ||
[Analyze grammar]

sphaṭikādi śilābhedaistenāsau viśvakarmaṇā |
samīcakāra ca punastatprākārādyalaṃkṛtam |
tata āhūya bhagavānsurabhiṃ vākyamabravīt || 40 ||
[Analyze grammar]

śrīhariruvāca |
mudgalo mama bhakto'yaṃ surabhe pratyahaṃ mudā || 41 ||
[Analyze grammar]

matprītyarthaṃ payohomaṃ kartumicchati sāṃpratam |
matprītyarthamito devi tvamato matpracoditā || 42 ||
[Analyze grammar]

sāyaṃprātarihāgatya pratyahaṃ surabhe śubhe |
payasā tvatprasūtena sara etatprapūraya || 43 ||
[Analyze grammar]

tenāsau payasā nityaṃ sāyaṃprātaśca hoṣyati |
omityuktvātha surabhirevaṃ nārayaṇeritā || 44 ||
[Analyze grammar]

atha nārāyaṇo devo mudgalaṃ pratyabhāṣata |
surabheḥ payasā nityamasminsarasi tiṣṭhatā || 45 ||
[Analyze grammar]

sāyaṃprātaḥ pratidinaṃ matprītyarthamihāgnaye |
juhudhi tvaṃ mahābhāga tena prīṇāmyahaṃ tava || 46 ||
[Analyze grammar]

matprītyā te'khilā siddhirbhaviṣyati ca mudgala |
idaṃ kṣīrasaronāma tīrthaṃ khyātaṃ bhaviṣyati || 47 ||
[Analyze grammar]

asminkṣīrasarastīrthe snātānāṃ paṃcapātakam |
anyānyapi ca pāpāni nāśaṃ yāsyaṃti tatkṣaṇāt || 48 ||
[Analyze grammar]

mudgala tvaṃ ca māṃ yāhi dehāṃte muktabaṃdhanaḥ |
ityuktvā bhagavānviṣṇustaṃ samāliṃgya mudgalam || 49 ||
[Analyze grammar]

namaskṛtaśca tenāyaṃ tatraivāṃtaradhīyata |
mudgalo'pi gate viṣṇāvanekaśatavatsaram || 50 ||
[Analyze grammar]

surabheḥ payasā juhvannagnaye harituṣṭaye |
uvāsa prayato nityaṃ phulla grāme vimuktide |
dehāṃte muktimagamadviṣṇusāyujyarūpiṇīm || 51 ||
[Analyze grammar]

śrīsūta uvāca |
evametaddvijavarā yuṣmākaṃ kathitaṃ mayā || 52 ||
[Analyze grammar]

yathā kṣīrasaro nāma tīrthasyāsya purā'bhavat |
idaṃ kṣīrasaraḥ puṇyaṃ sarvalokeṣu viśrutam || 53 ||
[Analyze grammar]

kāśyapasya muneḥ patnī kadrūryatra dvijottamāḥ |
snātvā svabhartṛvākyena noditā niyamānvitā || 54 ||
[Analyze grammar]

chalena mumuce sadyaḥ sapatnījayadoṣataḥ |
ato'tra tīrthe ye snāṃti mānavāḥ śudamānasāḥ || 55 ||
[Analyze grammar]

teṣāṃ vimuktabaṃdhānāṃ muktānāṃ puṇyakarmiṇām |
kiṃ yāgaiḥ kimu vā vedaiḥ kiṃ vā tīrthaniṣevaṇaiḥ || 56 ||
[Analyze grammar]

japairvā niyamairvāpi kṣīra kuṃḍavilokinām |
kṣīrakuṃḍasya vātena spṛṣṭadeho naro dvijāḥ || 57 ||
[Analyze grammar]

brahmalokamanuprāpya tatraiva parimucyate |
nimagnāḥ kṣīrakuṃḍe'sminnavamatyāpi bhāskarim || 58 ||
[Analyze grammar]

tasya mūrddhani tiṣṭheyurjvalataḥ pāvakopamāḥ |
magnānāṃ kṣīrakuṃḍesmiñchītā vaitaraṇī nadī || 59 ||
[Analyze grammar]

sarvāṇi narakāṇyaddhā vyarthāni ca bhavaṃti hi |
kāmadhenusame tasminkṣīrakuṃḍe sthitepyaho || 60 ||
[Analyze grammar]

yonyatra bhramate snātuṃ sa naro viprasattamāḥ |
gokṣīre vidyamāne'pi hyarkakṣīrāya gacchati || 61 ||
[Analyze grammar]

snātānāṃ kṣīrakuṃḍe'sminnālabhyaṃ kiṃcidasti hi |
karaprāptaiva muktiḥ syātkimanyairbahubhāṣaṇaiḥ || 62 ||
[Analyze grammar]

bravīmi bhujamuddhatya satyaṃsatyaṃ bravīmi vaḥ |
yaḥ paṭhedimamadhyāyaṃ śṛṇuyādvā samāhitaḥ |
sa kṣīrakuṃḍasnānasya labhate phalamuttamam || 63 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye kṣīrakuṃḍapraśaṃsāyāṃ kṣīrakuṃḍasvarūpakathanaṃ nāma saptatriṃśo'dhyāyaḥ || 37 ||
[Analyze grammar]