Chapter 12

[English text for this chapter is available]

śrīsūta uvāca |
sītākuṇḍe mahāpuṇye naraḥ snātvā dvijottamāḥ |
tatastu maṃgalaṃ tīrthamabhigacchetsamāhitaḥ || 1 ||
[Analyze grammar]

sannidhatte sadā yatra kamalā viṣṇuvallabhā |
alakṣmīparihārāya yasminsarasi vai surāḥ || 2 ||
[Analyze grammar]

śatakratumukhāḥ sarve samāgacchaṃti nityaśaḥ |
tadetattīrthamuddiśya ṛṣayo lokapāvanam || 3 ||
[Analyze grammar]

itihāsaṃ pravakṣyāmi puṇyaṃ pāpavināśanam |
purā manojavo nāma rājā somakulodbhavaḥ || 4 ||
[Analyze grammar]

pālayāmāsa dharmeṇa dharāṃ sāgaramekhalām |
ayaṣṭa sa surānyajñai rbrāhmaṇānannasaṃcayaiḥ || 5 ||
[Analyze grammar]

tarpayāmāsa kavyena pratyabdaṃ pitṛdevatāḥ |
trayīmadhyaiṣṭa satatamapāṭhīcchāstramarthavat || 6 ||
[Analyze grammar]

vyajeṣṭa śatrūnvīryeṇa prāṇaṃ sīdīśakeśavau |
araṃsta nītiśāstreṣu tathāpāṭhīnmahāmanūn || 7 ||
[Analyze grammar]

evaṃ sa dharmato rājā pālayāmāsa medinīm |
rakṣatastasya rājño'bhūdrājyaṃ nihata kaṃṭakam || 8 ||
[Analyze grammar]

ahaṃkāro'bhavattasya putrasaṃpadvināśanaḥ |
ahaṃkāro bhavedyatra tatra lobho madastathā || 9 ||
[Analyze grammar]

kāmaḥ krodhaśca hiṃsā ca tathā'sūyā vimohinī |
bhavaṃtyetāni vipreṃdrāḥ saṃpadāṃ nāśahetavaḥ || 10 ||
[Analyze grammar]

etāni yatra vidyaṃte puruṣe sa vinaśyati |
kṣaṇena putrapautraiśca sārddhaṃ cākhilasaṃpadā || 11 ||
[Analyze grammar]

babhūva tasyāsūyā ca janavidveṣiṇī sadā |
asūyākulacittasya vṛthāhaṃkāriṇastathā || 12 ||
[Analyze grammar]

lubdhasya kāmaduṣṭasya matirevaṃ babhūva ha |
vipragrāme karādānaṃ kariṣyāmīti niścitaḥ || 13 ||
[Analyze grammar]

akarocca tathā rājā niścitya manasā tadā |
 dhanaṃ dhānyaṃ ca viprāṇāṃ jahāra kila lobhataḥ || 14 ||
[Analyze grammar]

śivaviṣṇvādidevānāṃ vittānyādatta rāgataḥ |
śivaviṣṇvādidevānāṃ viprāṇāṃ ca mahātmanām || 15 ||
[Analyze grammar]

kṣetrāṇyapajahārāyamahaṃkāra vimūḍhadhīḥ |
evamanyāyayuktasya devadvijavirodhinaḥ || 16 ||
[Analyze grammar]

duṣkarmaparipākena krūreṇa dvijapuṃgavāḥ |
puraṃ rurodha balavānparadeśādhipo ripuḥ || 17 ||
[Analyze grammar]

golabhonāma vipreṃdrāścaturaṃgabalairyutaḥ |
ṣaṇmāsaṃ yuddhamabhavadgolabhena durātmanaḥ || 19 ||
[Analyze grammar]

manojavasya nṛpaterahaṃkāraratātmanaḥ |
tataḥ sa golabhenājau jito rājyātparicyutaḥ || 19 ||
[Analyze grammar]

vanaṃ saputradāraḥ sanprapede sa manojavaḥ |
golabhaḥ pālayannāste manojavapure ciram || 20 ||
[Analyze grammar]

caturaṃgabalopetastamudvāsya raṇe balī |
manojavopi vipreṃdrāḥ śocanstrīputrasaṃyutaḥ || 21 ||
[Analyze grammar]

kṣutkṣāmaḥ praskhalañchaśvatpraviveśa mahāvanam |
jhillikāgaṇasaṃghuṣṭaṃ vyāghraśvāpada bhīṣaṇam || 22 ||
[Analyze grammar]

vyāptadviradacītkāraṃ varāhamahiṣākulam |
tasminvane mahāghore kṣudhayā paripīḍitaḥ || 23 ||
[Analyze grammar]

ayācatānnaṃ pitaraṃ manojavasutaḥ śiśuḥ |
aṃba mennaṃ prayaccha tvaṃ kṣudhā māṃ bādhate bhṛśam || 24 ||
[Analyze grammar]

evaṃ svajananīṃ cāpi prārthayāmāsa bālakaḥ |
tanmātāpitarau tatra śrutvā putrasya bhāṣitam || 25 ||
[Analyze grammar]

śokābhibhūtau sahasā mohaṃ samupajagmatuḥ |
bhāryāmathābravīdrājā sumitrānāma nāmataḥ || 26 ||
[Analyze grammar]

muhyamānaśca sa muhuḥ śuṣkakaṃṭhauṣṭhatālukaḥ |
sumitre kiṃ kariṣyāmi kutra yāsyāmi kā gatiḥ || 27 ||
[Analyze grammar]

mariṣyatyacirādeṣa suto me kṣudhayārditaḥ |
kimarthaṃ sasṛje vedhā durbhāgyaṃ māṃ vṛthā priye || 28 ||
[Analyze grammar]

ko vā mocayitā duḥkhametadduṣkarmajaṃ mama |
na pūjito mayā śaṃbhurharirvā pūrvajanmasu || 29 ||
[Analyze grammar]

tathānyā devatāḥ sūryavibhāvasumukhāḥ priye |
tena pāpena cādyāhamasmiñjanmani śobhane || 30 ||
[Analyze grammar]

ahaṃkārābhibhūto'smi viprakṣetrāṇyapāharam |
śivaviṣṇvādidevānāṃ vittaṃ cāpahṛtaṃ mayā || 31 ||
[Analyze grammar]

evaṃ duṣkarmabāhulyādgolabhena parājitaḥ |
vanaṃ yātosmi vijanaṃ tvayā saha sutena ca || 32 ||
[Analyze grammar]

niranno nirdhano duḥkhī kṣudhito 'haṃ pipāsitaḥ |
kathamannaṃ pradāsyāmi kṣudhitāya sutāya me || 33 ||
[Analyze grammar]

na mayānnāni dattāni brāhmaṇebhyaḥ śucismite |
na mayā pūjitaḥ śaṃbhurviṣṇurvā devatāṃtaram || 34 ||
[Analyze grammar]

tena pāpena me tvadya duḥkhametatsamāgatam |
na mayāgnau hutaṃ pūrvaṃ na tīrthamapi sevitam || 35 ||
[Analyze grammar]

mātṛśrāddhaṃ pitṛśrāddhaṃ mṛtāha divase tayoḥ |
naikoddiṣṭavidhānena pārvaṇenāpi vai priye || 36 ||
[Analyze grammar]

kṛtaṃ na hi mayā bhadre bhūribhojanameva vā |
tena pāpena me tvadya duḥkhametatsamāgatam || 37 ||
[Analyze grammar]

caitramāse priye citrānakṣatre pānakaṃ mayā |
panasānāṃ phalaṃ svādu kadalīphalameva vā || 38 ||
[Analyze grammar]

tathā chatraṃ sadaṃḍaṃ ca ramyaṃ pādukayordvayam |
tāṃbūlāni ca puṣpāṇi caṃdanaṃ cānulepanam || 39 ||
[Analyze grammar]

na dattaṃ vedavidbhyastu citraguptasya tuṣṭaye |
tena pāpena me tvadya duḥkhametatsamāgatam || 40 ||
[Analyze grammar]

nāśvatthaścūtavṛkṣo vā nyagrodhastiṃtiṇī tathā |
picumaṃdaḥ kapittho vā tathaivāmalakītaruḥ || 41 ||
[Analyze grammar]

nārikelatarurvāpi sthāpito'dhvagaśāṃtaye |
tena pāpena me tvadya duḥkhametatsamāgatam || 42 ||
[Analyze grammar]

sammārjanaṃ ca na kṛtaṃ śivaviṣṇvālaye mayā |
na khānitaṃ taṭākaṃ ca na kūpopi hrado'pivā || 43 ||
[Analyze grammar]

na ropitaṃ puṣpavanaṃ tathaiva tulasīvanam |
śivaviṣṇvālayau vāpi nirmito na mayā priye || 44 ||
[Analyze grammar]

tena pāpena me tvadya duḥkhametatsamāgatam |
na mayā paitṛke māsi pitṝnuddiśya śobhane |
mahālayaṃ kṛtaṃ śrāddhamaṣṭakāśrāddhameva vā || 45 ||
[Analyze grammar]

nityaśrāddhaṃ tathā kāmyaṃ śrāddhaṃ naimittikaṃ priye |
na kṛtāḥ kratavaścāpi vidhivadbhūridakṣiṇāḥ || 46 ||
[Analyze grammar]

māsopavāso na kṛtaḥ ekādaśyāmupoṣaṇam |
dhanurmāsepyuṣaḥkāle śaṃbhuviṣṇvādidevatāḥ || 47 ||
[Analyze grammar]

saṃpūjya vidhivadbhadre naivedyaṃ na kṛtaṃ mayā |
tena pāpena me tvadya duḥkhametatsamā gatam || 48 ||
[Analyze grammar]

hariśaṃkarayornāmnāṃ kīrtanaṃ na mayā kṛtam |
uddhūlanaṃ tripuṇḍraṃ ca jābāloktaiśca saptabhiḥ || 49 ||
[Analyze grammar]

na dhṛtaṃ bhasmanā bhadre rudrākṣaṃ na dhṛtaṃ mayā |
japaśca rudrasūktānāṃ paṃcākṣarajapastathā || 50 ||
[Analyze grammar]

tathā puruṣasūktasya japo'pyaṣṭākṣarasya ca |
naivakāri mayā bhadre naivānyo dharmasaṃcayaḥ || 51 ||
[Analyze grammar]

tena pāpena me tvadya duḥkhametatsamāgatam |
evaṃ sa vilapanrājā bhāryāmābhāṣya khinnadhīḥ || 52 ||
[Analyze grammar]

mūrcchāmupāyayau viprāḥ papāta ca dharātale |
sumitrā patitaṃ dṛṣṭvā bhāryā sā patimaṃganā || 53 ||
[Analyze grammar]

āliṃgya vilalāpātha saputrā bhṛśaduḥkhitā |
mama nātha mahārāja somānvayadhuraṃdhara || 54 ||
[Analyze grammar]

māṃ vihāya kva yāto'si saputrāṃ vijane vane |
anāthāṃ tvāmanugatāṃ siṃhatrastāṃ mṛgīmiva || 55 ||
[Analyze grammar]

mṛto'si yadi rājeṃdra tarhi tvāmahamapyaram |
anuvrajāmi vidhavā na sthāsye kṣaṇamapyuta || 56 ||
[Analyze grammar]

pitaraṃ paśya patitaṃ candrakāṃta suta kṣitau |
ityuktaścaṃdrakāṃto'pi suto rājñaḥ kṣudhārditaḥ || 57 ||
[Analyze grammar]

pitaraṃ parirabhyātha niḥśabdaṃ praruroda saḥ |
etasminnaṃtare viprā jaṭāvalkalasaṃvṛtaḥ || 58 ||
[Analyze grammar]

bhasmoddhūlitasarvāṃgastripuṇḍrāṃkitamastakaḥ |
rudrākṣamālābharaṇaḥ sitayajñopavītavān || 59 ||
[Analyze grammar]

parāśaronāma munirājagāma yadṛcchayā |
taṃ śabdamabhilakṣyāsau sādhusajjanasaṃmataḥ || 60 ||
[Analyze grammar]

tataḥ sumitrā taṃ dṛṣṭvā parāśaramupāgatam |
vavaṃde caraṇau tasya saputrā sā pativratā || 61 ||
[Analyze grammar]

tataḥ parāśareṇeyaṃ sumitrā parisāṃtvitā |
āśvāsitā ca muninā mā śocasveti bhāmini |
tataḥ sumitrāṃ papraccha śaktiputro mahāmuniḥ || 62 ||
[Analyze grammar]

parāśara uvāca |
kā tvaṃ suśroṇi kaścāsau yaścāyaṃ patito'grataḥ || 63 ||
[Analyze grammar]

ayaṃ śiśuśca kaste syādvada tattvena me śubhe |
pṛṣṭaivaṃ muninā sādhvī tamuvāca mahāmunim || 64 ||
[Analyze grammar]

sumitrovāca |
patirmamāyamasyāhaṃ bhāryā vai munisattama |
āvābhyāṃ janitaścāyaṃ caṃdrakāṃtābhidhaḥ sutaḥ || 65 ||
[Analyze grammar]

ayaṃ manojavo nāma rājā somakulodbhavaḥ |
vikramāḍhyasya tanayaḥ śaurye viṣṇusamo balī || 66 ||
[Analyze grammar]

sumitrā nāma tasyāhaṃ bhāryā patimanuvratā |
yuddhe vinirjito rājā golabhena manojavaḥ || 67 ||
[Analyze grammar]

rājyādbhraṣṭo nirālaṃbo mayā putreṇa cānvitaḥ |
vanaṃ viveśa brahmarṣe krūrasattvabhayānakam || 68 ||
[Analyze grammar]

kṣudhayā pīḍitaḥ putro hyāvāmannamayācata |
niranno vidhuro rājā dṛṣṭvā putraṃ kṣudhārditam || 69 ||
[Analyze grammar]

śokākulamanā brahmanmūrcchitaḥ patito bhuvi |
iti tadvacanaṃ śrutvā śokaparyākulākṣaram || 70 ||
[Analyze grammar]

śaktiputro muniḥ prāha sumitrāṃ tāṃ pativratām |
manojavasya nṛpaterbhāryāmagniśikhopamām || 71 ||
[Analyze grammar]

parāśara uvāca |
manojavasya bhārye te mā bhīrbhūyātkathaṃcana |
yuṣmākamaśubhaṃ satyamacirānnāśameṣyati || 72 ||
[Analyze grammar]

mūrcchāṃ vihāya te bhadre kṣaṇādutthāsyate patiḥ |
tataḥ parāśaro vipraḥ pāṇinā taṃ narādhipam || 73 ||
[Analyze grammar]

pasparśa maṃtraṃ prajapandhyātvā devaṃ triyaṃbakam |
tato manojavo rājā karaspṛṣṭo mahāmuneḥ || 74 ||
[Analyze grammar]

utthitaḥ sahasā tatra tyaktvā mūrcchāṃ tamomayīm |
tataḥ parāśaramuniṃ praṇamya jagatīpatiḥ |
uvāca paramaprītaḥ prāṃjalirviprasattamam || 75 ||
[Analyze grammar]

manojava uvāca |
parāśaramune tvadya tvatpādābjaniṣevaṇāt || 76 ||
[Analyze grammar]

mūrcchā me vigatā sadyaḥ pātakaṃ caiva nāśitam |
tvaddarśanamapuṇyānāṃ naiva sidhyetkadācana || 77 ||
[Analyze grammar]

rakṣa māṃ karuṇādṛṣṭyā cyāvitaṃ śatrubhiḥ purāt |
ityuktaḥ sa muniḥ prāha rājānaṃ taṃ manojavam || 78 ||
[Analyze grammar]

parāśara uvāca |
upāyaṃ te pravakṣyāmi rājañcchatrujayāya vai |
rāmasetau mahāpuṇye gaṃdhamādanaparvate || 79 ||
[Analyze grammar]

vidyate maṃgalaṃ tīrthaṃ sarvaiśvaryapradāyakam |
sarvalokopakārāya tasminsarasi rāghavaḥ || 80 ||
[Analyze grammar]

sannidhatte sadā lakṣmyā sītayā rājasattama |
saputrabhāryastvaṃ tatra gatvā snātvā sabhaktikam || 81 ||
[Analyze grammar]

kṣetraśrāddhādikaṃ cāpi tattīre kuru bhūpate |
evaṃ kṛte tvayā rājannalakṣmīḥ kleśakāriṇī || 92 ||
[Analyze grammar]

vaibhavāttasya tīrthasya nāśaṃ yāsyatyasaṃśayam |
maṃgalāni ca sarvāṇi prāpsyase na cirānnṛpa || 83 ||
[Analyze grammar]

vijitya śatrūṃśca raṇe punarbhūmiṃ prapatsyase |
atastvaṃ bhāryayā sārddhaṃ putreṇa ca manojava || 84 ||
[Analyze grammar]

gaccha maṃgalatīrthaṃ tadgandhamādanaparvate |
ahamapyāgamiṣyāmi tavānugrahakāmyayā || 85 ||
[Analyze grammar]

parāśarastvevamuktvā rājamukhyaistribhiḥ saha |
prāyātsetuṃ samuddiśya snātuṃ maṃgalatīrthake || 86 ||
[Analyze grammar]

rājādibhiḥ saha munirvilaṃghya vividhaṃ vanam |
vanapradeśadeśāṃśca dasyugrāmānanekaśaḥ || 87 ||
[Analyze grammar]

prayayau maṃgalaṃ tīrthaṃ gandhamādanaparvate |
tatra saṃkalpya vidhivatsasnau sa munipuṃgavaḥ || 88 ||
[Analyze grammar]

tānapi snāpayāmāsa rājādīnvidhipūrvakam |
tatra śrāddhaṃ ca bhūpālaścakāra pitṛtṛptaye || 89 ||
[Analyze grammar]

tatra māsatrayaṃ sasnau rājā patnīsutastathā |
tataḥ parāśaramuniḥ sasnau niyamapūrvakam || 90 ||
[Analyze grammar]

evaṃ māsatrayaṃ sasnau taiḥ sākaṃ munipuṃgavaḥ |
maṃgalākhye mahāpuṇye sarvāmaṃgalanāśane || 91 ||
[Analyze grammar]

tataḥ parāśaramuniḥ sarvānarthavināśanam |
rāmasyaikākṣaraṃ maṃtraṃ tadaṃte samupādiśat || 92 ||
[Analyze grammar]

catvāriṃśaddinaṃ tatra maṃtramekākṣaraṃ nṛpaḥ |
tatra tīrthe jajāpāsau munyuktenaiva vartmanā || 93 ||
[Analyze grammar]

evamabhyasatastasya maṃtramekākṣaraṃ dvijāḥ |
muniprasādātpurato dhanuḥ prādurabhūddṛḍham || 94 ||
[Analyze grammar]

akṣayāviṣudhī cāpi khaḍgau ca kanakatsarū |
ekaṃ carma gadā caikā tathaiko musalottamaḥ || 95 ||
[Analyze grammar]

ekaḥ śaṃkho mahānādo vājiyukto rathastathā |
sasārathiḥ patākā ca tīrthāduttasthuragrataḥ || 96 ||
[Analyze grammar]

kavacaṃ kāṃcanamayaṃ vaiśvānarasamaprabham |
prādurbabhūva tattīrthātprasādena munestathā || 97 ||
[Analyze grammar]

hārakeyūramukuṭakaṭakādivibhūṣaṇam |
tīrthānāṃ pravarāttasmādutthitaṃ nṛpateḥ puraḥ || 98 ||
[Analyze grammar]

divyāṃbarasahasraṃ ca tīrthātprādurabhūttadā |
mālā ca vaijayaṃtyākhyā svarṇapaṃkajaśobhitā || 99 ||
[Analyze grammar]

etatsarvaṃ samālokya munaye'sau nyavedayat |
tataḥ parāśaramunirjalamādāya tīrthataḥ || 100 ||
[Analyze grammar]

abhyaṣiṃcannarapatiṃ maṃtrapūtenavāriṇā |
tato'bhiṣikto nṛpatirmuninā pariśobhitaḥ || 101 ||
[Analyze grammar]

sannaddhaḥ kavacī khaḍgī cāpabāṇadharo yuvā |
hārakeyūramukuṭakaṭakādivibhūṣitaḥ || 102 ||
[Analyze grammar]

divyāṃbaradharaścāpi vājiyukta rathasthitaḥ |
śuśubhe'tīva nṛpatirmadhyāhna iva bhāskaraḥ || 103 ||
[Analyze grammar]

tasmai nṛpataye tatra brahmādyastraṃ mahāmuniḥ |
sāṃgaṃ ca sarahasyaṃ ca sotsargaṃ sopa saṃhṛti || 104 ||
[Analyze grammar]

upādiśacchaktiputraḥ sumitrājānaye tadā |
manojavo'tha muninā hyāśīrvādapuraḥsaram || 105 ||
[Analyze grammar]

prerito rathamāsthāya praṇamya munipuṃgavam |
pradakṣiṇīkṛtya tadābhyanujñāto maharṣiṇā || 106 ||
[Analyze grammar]

sārddhaṃ patnyā ca putreṇa prayayau vijayāya saḥ |
sa gatvā svapuraṃ rājā pradadhmau jalajaṃ tadā || 107 ||
[Analyze grammar]

tataḥ śaṃkharavaṃ śrutvā golabhastu sasainikaḥ |
yuddhāya niryayau tūrṇaṃ manojavanṛpeṇa saḥ || 108 ||
[Analyze grammar]

dinatrayaṃ raṇaṃ jajñe golabhena nṛpasya vai |
tataścaturthe divase golabhaṃ tu sasainikam || 109 ||
[Analyze grammar]

manojavo nṛpo yuddhe brahmāstreṇa vyanāśayat |
tataḥ saputra bhāryo'yaṃ puraṃ prāpya nijaṃ nṛpaḥ || 110 ||
[Analyze grammar]

pālayanpṛthivīṃ sarvāṃ bubhuje bhāryayā saha |
tadāprabhṛti rājāsau nāhaṃkāraṃ cakāra vai || 111 ||
[Analyze grammar]

asūyādīṃstathā doṣānvarjayāmāsa bhūpatiḥ |
ahiṃsānirato dāṃtaḥ sadā dharmaparo'bhavat || 112 ||
[Analyze grammar]

sahasraṃ vatsarānevaṃ rarakṣa sa mahīpatiḥ |
tato virakto rājendraḥ putre rājyaṃ nidhāya tu || 113 ||
[Analyze grammar]

jagāma maṃgalaṃ tīrthaṃ gandhamādanaparvate |
tapaścacāra tatrāsau dhyāyanhṛdi sadāśivam || 114 ||
[Analyze grammar]

tato'cireṇa kālena tyaktvā dehaṃ manojavaḥ |
śivalokaṃ yayau rājā tasya tīrthasya vaibhavāt || 115 ||
[Analyze grammar]

tasya bhāryā sumitrāpi tasyāliṃgya tanuṃ tadā |
anvārūḍhā citāṃ viprāḥ prāpa tallokameva sā || 116 ||
[Analyze grammar]

śrīsūta uvāca |
evaṃ prabhāvaṃ tattīrthaṃ śrīmanmaṃgalanāmakam |
manojavo nṛpo yatra snātvā tīrthe mahattare || 117 ||
[Analyze grammar]

śatrūnvijitya dehāṃte śivalokaṃ yayau striyā |
tasmātsarvaprayatnena sevyaṃ maṃgalatīrthakam || 118 ||
[Analyze grammar]

tīrthametadatiśobhanaṃ śivaṃ bhuktimuktiphaladaṃ nṛṇāṃ sadā |
pāparāśitṛṇatūlapāvakaṃ sevata dvijavarā vimuktaye || 119 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye maṃgalatīrthapraśaṃsāyāṃ manojavālakṣmīvināśavarṇanaṃnāma dvādaśo'dhyāyaḥ || 12 ||
[Analyze grammar]