Chapter 13

[English text for this chapter is available]

śrīsūta uvāca |
maṃgalākhye mahātīrthe naraḥ snātvā vikalmaṣaḥ |
ekāṃtarāmanāthākhyaṃ kṣetraṃ gacchettataḥ param || 1 ||
[Analyze grammar]

tatra rāmo jagannātho jānakyā lakṣmaṇena ca |
hanumatpramukhaiścāpi vānaraiḥ parivāritaḥ || 2 ||
[Analyze grammar]

sannidhatte sadā viprā lokānugrahakāmyayā |
vidyate puṇyadā tatra nāmnā hyamṛtavāpikā || 3 ||
[Analyze grammar]

tasyāṃ nimajjatāṃ nṛṇāṃ na jarāṃtakajaṃ bhayam |
asyāmamṛtavāpyāṃ yaḥ saśraddhaṃ snāti mānavaḥ || 4 ||
[Analyze grammar]

amṛtatvaṃ bhajatyeṣa śaṃkarasya prasādataḥ |
mahāpātakanāśinyāmasyāṃ vāpyāṃ nimajjatām || 5 ||
[Analyze grammar]

amṛtatvaṃ haro dātuṃ sannidhatte sadā taṭe |
|ṛṣaya ūcuḥ |
iyaṃ hyamṛtavāpīti kuto hetornigadyate || 6 ||
[Analyze grammar]

asmākametadbrūhi tvaṃ kṛpayā vyāsaśāsita |
tathaivāmṛtanāminyā vāpikāyāśca vaibhavam |
tṛptirna jāyate'smākaṃ tvadvaco'mṛtapāyinām || 7 ||
[Analyze grammar]

śrīsūta uvāca |
asyā amṛtanāmatvaṃ vaibhavaṃ ca manoharam || 8 ||
[Analyze grammar]

pravakṣyāmi viśeṣeṇa śṛṇuta dvijasattamāḥ |
purā himavataḥ pārśve nānāmunisamākule || 9 ||
[Analyze grammar]

siddhacāraṇagaṃdharvadevakinnarasevite |
siṃhavyāghravarāhebhamahiṣādisamākule || 10 ||
[Analyze grammar]

tamālatālahiṃtālacaṃpakāśokasaṃtate |
haṃsakokiladātyūhacakravākādiśobhite || 11 ||
[Analyze grammar]

padmeṃdīvarakahlārakumudāḍhyasaro vṛte |
satyavāñchīlavānvāgmī vaśī kuṃbhajasodaraḥ || 12 ||
[Analyze grammar]

āste tapaścarannityaṃ mokṣārthī śaṃkarapriyaḥ |
trikālamarcayañchaṃbhu vanyairmūlaphalādibhiḥ || 13 ||
[Analyze grammar]

āgatānsvāśramābhyāśamatithīnvanyabhojanaiḥ |
pūjayannarcayannagniṃ saṃdhyopāsanatatparaḥ || 14 ||
[Analyze grammar]

gāyatryādīnmahāmaṃtrānkālekāle japanmudā |
nidrāṃ parityajanbrāhme muhūrte viṣṇuciṃtakaḥ || 15 ||
[Analyze grammar]

snānaṃ kurvannuṣaḥkāle namansaṃdhyāṃ prasannadhīḥ |
gāyatrīṃ prajapanviprāḥ pūjayanhariśaṃkarau || 16 ||
[Analyze grammar]

vedādhyāyī śāstrapāṭhī madhyāhne'tithipūjakaḥ |
śrotāpurāṇapāṭhānāmagnikāryeṣvataṃdritaḥ || 17 ||
[Analyze grammar]

paṃcayajñaparo nityaṃ vaiśvadevabalipradaḥ |
pratyabdaṃ śrāddhakṛtpitrostathānyaśrāddhakṛddvijāḥ || 18 ||
[Analyze grammar]

evaṃ nināya kālaṃ sa nityānuṣṭhānatatparaḥ |
tasyaivaṃ vartamānasya tapaścarata uttamam || 19 ||
[Analyze grammar]

sahasravarṣāṇyagamañcchaṃkarāsaktacetasaḥ |
tathāpi śaṃkaro nāsyāyayau pratyakṣatāṃ tadā || 20 ||
[Analyze grammar]

tatastvagastyabhrātāsau grīṣme paṃcānimadhyagaḥ |
bhāskaraṃ dattadṛṣṭiśca maunavratasamanvitaḥ || 21 ||
[Analyze grammar]

tiṣṭhankaniṣṭhikāṃgulyāṃ vāmapādasya niścalaḥ |
ūrdhvabāhurnirālaṃbastapastepe'tidāruṇam || 22 ||
[Analyze grammar]

atha tasya prasannātmā mahādevo ghṛṇānidhiḥ |
prādurāsītsvayā dīptyā diśo daśa vibhāsayan || 23 ||
[Analyze grammar]

tato'drākṣīnmuniḥ śaṃbhuṃ sāṃbaṃ vṛṣabhasaṃsthi tam |
dṛṣṭvā praṇamya tuṣṭāva bhavānīpatimīśvaram || 24 ||
[Analyze grammar]

muniruvāca |
namaste pārvatīnātha nīlakaṃṭha maheśvara |
śiva rudra mahādeva nama ste śaṃbhave vibho || 25 ||
[Analyze grammar]

śrīkaṃṭhomāpate śūlinbhaganetraharāvyaya |
gaṃgādhara virūpākṣa namaste rudra manyave || 26 ||
[Analyze grammar]

aṃtakāre kāmaśatro devadeva jagatpate |
svāminpaśupate śarva namaste śatadhanvane |
dakṣayakṣavināśāya snāyūnāṃ pataye namaḥ |
nicerave namastubhyaṃ puṣṭānāṃ pataye namaḥ || 28 ||
[Analyze grammar]

bhūyobhūyo namastubhyaṃ mahādeva kṛpālaya |
dustarādbhavasiṃdhormāṃ tārayasva trilocana || 29 ||
[Analyze grammar]

agastyasodareṇaivaṃ stutaḥ śaṃbhurabhāṣata || |
prīṇayanvacasā svena kuṃbhajasyānujaṃ munim || 30 ||
[Analyze grammar]

īśvara uvāca |
kuṃbhajānuja vakṣyāmi muktyupāyaṃ tavānagha |
setumadhye mahātīrthaṃ gaṃdhamādanaparvate || 31 ||
[Analyze grammar]

maṃgalākhyasya tīrthasya nātidūreṇa vartate |
tatra gatvā kuru snānaṃ tato muktimavāpsyasi || 32 ||
[Analyze grammar]

tattīrthasevanānnānyomokṣo pāyo laghustava |
na hi tattīrthavaiśiṣṭyaṃ vaktuṃ śakyaṃ mayāpi ca || 33 ||
[Analyze grammar]

saṃdeho nātra kartavyastvayādya munisattama |
tasmāttatraiva gaccha tvaṃ yadīcchasi bhavakṣayam || 34 ||
[Analyze grammar]

ityuktvā bhagavānīśastatraivāṃtaradhīyata |
tato devasya vacanādagastyasya sahodaraḥ || 35 ||
[Analyze grammar]

gatvā setuṃ samudre tu gaṃdhamādanaparvate |
īśvaraṇaiva gaditaṃ tīrthaṃ tacchīghramāsadat || 36 ||
[Analyze grammar]

tatra tīrthe mahāpuṇye snātānāṃ muktidāyini |
ekāṃtarāmanāthākhye kṣetrālaṃkaraṇe śubhe || 37 ||
[Analyze grammar]

sasnau niyamapūrvaṃ sa trīṇi varṣāṇi vai dvijaḥ |
tataścaturthavarṣe tu samādhistho mahāmuniḥ || 38 ||
[Analyze grammar]

brahmanāḍyā prāṇavāyuṃ mūrddhanyāropyayogataḥ |
prāṇānnirgamayāmāsa brahmaraṃdhreṇa tatra saḥ || 39 ||
[Analyze grammar]

tato'gastyānujaḥ soyaṃ parityajya kalevaram |
avāpa muktiṃ paramāṃ tasya tīrthasya vaibhavāt || 4 ||
[Analyze grammar]

vinaṣṭāśeṣaduḥkhasya tattīrthasnānavaibhavāt |
mṛtatvamabhūdyasmādagastyānujajanmanaḥ || 41 ||
[Analyze grammar]

tato hyamṛtavāpītiprathā'syāsīnmunīśvarāḥ |
atra tīrthe narā ye tu varṣatrayamataṃdritāḥ || 42 ||
[Analyze grammar]

snānaṃ kurvaṃti te satyamamṛtatvaṃ prayāṃti hi |
evaṃ tvamṛtavāpīti prathā tadvaibhavaṃ tathā |
yuṣmākaṃ kathitaṃ viprāḥ kiṃbhūyaḥ śrotumicchatha || 43 ||
[Analyze grammar]

ṛṣaya ūcuḥ |
ekāṃtarāmanāthākhyā tasya kṣetrasya vai mune || 44 ||
[Analyze grammar]

kathaṃ samāgatā sūta vaktumetattvamarhasi |
asmākaṃ muniśārdūla tacchuśrūṣātibhūyasī || 45 ||
[Analyze grammar]

śrīsūta uvāca |
purā dāśarathī rāmaḥ sasugrīvabhibhīṣaṇaḥ |
lakṣmaṇena yuto bhrātrā maṃtrajñena hanūmatā || 46 ||
[Analyze grammar]

vānarairbadhyamāne tu setāvaṃbudhimadhyataḥ |
ciṃtayanmanasā sītāmekāṃte samamaṃtrayat || 47 ||
[Analyze grammar]

teṣu maṃtra yamāṇeṣu rāvaṇādivadhaṃ prati |
ullolatarakallolo jughoṣa jaladhirbhṛśam || 48 ||
[Analyze grammar]

arṇavasya mahābhīme jṛṃbhamāṇe mahādhvanau |
anyonyakathitāṃ vārtāṃ nāśṛṇvaṃste parasparam || 49 ||
[Analyze grammar]

tataḥ kiṃcidiva kruddho bhṛkuṭīkuṭilekṣaṇaḥ |
bhrūbhaṃgalīlayā rāmo niyamya jaladhiṃ tadā || 50 ||
[Analyze grammar]

nyamaṃtrayata vipreṃdrā rākṣasānāṃ vadhaṃ prati |
ekāṃte'maṃtrayattatra taiḥ sārdhaṃ rāghavo yataḥ || 51 ||
[Analyze grammar]

ekāṃtarāmanāthākhyaṃ tatkṣetramabhavadvijāḥ |
soyaṃ niyamito vārdhī rāmabhrūbhaṃgalīlayā || 52 ||
[Analyze grammar]

adyāpi niścalajalastatpradeśeṣu dṛśyate |
ekāṃtarāmanāthākhyaṃ tadetatkṣetramuttamam || 53 ||
[Analyze grammar]

āgatyāmṛtavāpyāṃ ca snātvā niyamapūrvakam |
rāmādīnapi sevaṃte te sarve muktimāpnuyuḥ || 54 ||
[Analyze grammar]

advaitavijñānavivekaśūnyā viraktihīnāśca samādhi hīnāḥ |
yāgādyanuṣṭhānavivarjitāśca snātvātra yāsyaṃtyamṛtaṃ dvijeṃdrāḥ || 55 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe setumāhātmye amṛtavāpīpraśaṃsāyām agastyabhrātṛvimuktivarṇanaṃnāma trayodaśo'dhyāyaḥ || 13 ||
[Analyze grammar]