Chapter 11

[English text for this chapter is available]

śrīsūta uvāca |
pāpanāśe naraḥ snātvā sarvapāpanibarhaṇe |
tataḥ sītāsaro gacchetsnātuṃ niyamapūrvakam || 1 ||
[Analyze grammar]

yāni kāni ca puṇyāni brahmāṃḍāṃtargatāni vai |
tāni gaṃgāditīrthāni svapāpapariśuddhaye || 2 ||
[Analyze grammar]

sītāsarasi vartaṃte mahāpātakanāśane |
kṣetrāṇyapi mahārhāṇi kāśyādīni divāniśam || 3 ||
[Analyze grammar]

sītāsarotra sevaṃte svasvakalmaṣaśāṃtaye |
tasyāḥ sarasi saṃgītaguṇenākṛṣya bāliśaḥ || 4 ||
[Analyze grammar]

paṃcānano'pi vasate paṃcapātakanāśanaḥ |
tadetattīrthamāgatya snātvā vai śraddhayā saha |
puraṃdaraḥ purā viprā mumuce brahmahatyayā || 5 ||
[Analyze grammar]

ṛṣaya ūcuḥ |
brahmahatyā kathamabhūdvāsavasya purā mune |
sītāsarasi snānātkathaṃ mukto'bhavattayā || 6 ||
[Analyze grammar]

śrīsūta uvāca |
kapālābharaṇonāma rākṣaso'bhūtpurā dvijāḥ || 7 ||
[Analyze grammar]

avadhyaḥ sarvadevānāṃ so'bhavadbrahmaṇo varāt |
śavabhakṣaṇanāmā tu tasyāsīnmaṃtrisattamaḥ || 8 ||
[Analyze grammar]

akṣauhiṇīśataṃ tasya hayebharathasaṃkulam |
asti tasya puraṃ cāpi vaijayaṃtamiti śrutam || 9 ||
[Analyze grammar]

vasatyasminpure so'yaṃ kapālābharaṇo balī |
śavabhakṣaṃ samāhūya babhāṣe maṃtriṇaṃ dvijāḥ || 10 ||
[Analyze grammar]

śavabhakṣa mahāvīrya maṃtraśāstreṣu kovida |
vayaṃ devapurīṃ gatvā vinirjitya surānraṇe || 11 ||
[Analyze grammar]

śakrasya bhavane ramye sthāsyāmassainikaiḥ saha |
ramāvo naṃdane tasya raṃbhādyapsarasāṃ gaṇaiḥ || 12 ||
[Analyze grammar]

kapālābharaṇasyedaṃ niśamya vacanaṃ tadā |
śavabhakṣo'bravīdviprā vacastatra tathāstviti || 13 ||
[Analyze grammar]

tataḥ kapālābharaṇaḥ putraṃ durmedhasaṃ balī |
pratiṣṭhāpya pure śūraṃ senayā parivāritaḥ || 14 ||
[Analyze grammar]

yuyutsuramaraiḥ sākaṃ prayayāvamarāvatīm |
gajāśvarathapādātairuddhatai reṇusaṃcayaiḥ || 15 ||
[Analyze grammar]

śoṣayañjaladhīnsiṃdhūṃścūrṇayanparvatānapi |
niḥsāṇadhvaninā viprā nādayanrodasī tathā || 16 ||
[Analyze grammar]

aśvānāṃ heṣitaravairgajānāmapi bṛṃhitaiḥ |
rathanemisvanairugraiḥ siṃhanādaiḥ padātinām || 17 ||
[Analyze grammar]

śrotrāṇi diggajānāṃ ca vitanvanbadhirāṇi saḥ |
agamaddevanagarīṃ yuyutsuramaraiḥ saha || 18 ||
[Analyze grammar]

tata indrādayo devāḥ senākalakaladhvanim |
śrutvābhiniryyayuḥ puryā yuddhābhimanaso dvijāḥ || 19 ||
[Analyze grammar]

tato yuddhaṃ samabhavaddevānāṃ rākṣasaiḥ saha |
adṛṣṭapūrvaṃ jagati tathaivāśrutapūrvakam || 20 ||
[Analyze grammar]

tata indrādayo devā rākṣasāñjaghnurāhave |
rākṣasāśca surāñjaghnuḥ samare vijigīṣavaḥ || 21 ||
[Analyze grammar]

dvandvayuddhaṃ ca samabhūdanyonyaṃ surarakṣasām |
kapālābharaṇenājau yuyudhe balavṛtrahā || 22 ||
[Analyze grammar]

yamena śavabhakṣaśca varuṇena ca kauśikaḥ |
kubero rudhirākṣeṇa yuyudhe brāhmaṇottamāḥ || 23 ||
[Analyze grammar]

māṃsapriyo madyasevī krūradṛṣṭirbhayāvahaḥ |
catvāra ete vikrāṃtāḥ kapālābharaṇānujāḥ || 24 ||
[Analyze grammar]

aśvibhyāmagnivāyubhyāṃ yuddhe yuyudhire mithaḥ |
tato yamo mahāvīryaḥ kāladaṇḍena vegavān || 25 ||
[Analyze grammar]

śavabhakṣaṃ nihatyājāvanayadyamasādanam |
tasya cākṣauhiṇīstriṃśannijaghne samare yamaḥ || 26 ||
[Analyze grammar]

varuṇaḥ kauśikasyājau prāsena prāharacchiraḥ |
kubero rudhirākṣasya kuntenābhyaharacchiraḥ || 27 ||
[Analyze grammar]

aśvibhyāmagnivāyubhyāṃ kapālābharaṇānujāḥ |
nihatāḥ samare viprāḥ prayayuryamasādanam || 28 ||
[Analyze grammar]

akṣauhiṇīśataṃ cāpi devendreṇa mṛdhe dvijāḥ |
yāmārddhena hataṃ yuddhe prayayau yamasādanam || 29 ||
[Analyze grammar]

tataḥ kapālābharaṇaḥ prekṣya senāṃ nijāṃ hatām |
cāpamādāya niśitāñcharāṃścāpi mahājavān || 30 ||
[Analyze grammar]

abhyayātsamare śakraṃ tiṣṭhatiṣṭheti cābravīt |
tataḥ śakrasya śirasi vyadhamaccharapaṃcakaiḥ || 31 ||
[Analyze grammar]

tānaprāptānpraciccheda śarairyuddhe sa vṛtrahā |
tataḥ śūlaṃ samādāya kapālābharaṇo mṛdhe || 32 ||
[Analyze grammar]

deveṃdrāya pracikṣepa taṃ śaktyā nijaghāna saḥ |
tataḥ kapālābharaṇaḥ śatahastāyatāṃ gadām || 33 ||
[Analyze grammar]

āyasīṃ paṃcasāhasratulābhāreṇanirmitām |
ādade samare śakraṃ vakṣodeśe jaghāna ca || 34 ||
[Analyze grammar]

tataḥ sa mūrcchitaḥ śakro rathopastha upāviśat |
mṛtasaṃjīvinīṃ vidyāṃ japitvātha bṛhaspatiḥ || 35 ||
[Analyze grammar]

pulomajāpatiṃ yuddhe samajīvayadadbhutam |
airāvataṃ tadāruhya kapālābharaṇāṃtikam || 36 ||
[Analyze grammar]

ājagāma śacībhartā prahartuṃ kuliśena tam |
ekaprahāreṇa tadā maheṃdraḥ pākaśāsanaḥ || 37 ||
[Analyze grammar]

kapālābharaṇaṃ yuddhe vajreṇa sarathāśvakam |
sacāpaṃ sadhvajaṃ caiva satūṇīraṃ savarmakam || 38 ||
[Analyze grammar]

cūrṇayāmāsa kupitastilaśaḥ kaṇaśastathā |
hate tasminmahāvīre kapālābharaṇe raṇe || 39 ||
[Analyze grammar]

sukhaṃ sarvasya lokasya babhūva ciraduḥkhinaḥ |
rākṣasasya vadhotpannā brahmahatyā puraṃdaram |
anvadhāvattadā bhīmā nādayaṃtī diśo daśa || 40 ||
[Analyze grammar]

ṛṣaya ūcuḥ |
na vipro rākṣasaḥ sūta kapālābharaṇo mune |
tatkathaṃ brahmahatyeṃdraṃ tadvadhātsamupādravat || 41 ||
[Analyze grammar]

śrīsūta uvāca |
vakṣyāmi paramaṃ guhyaṃ munīṃdrāḥ paramādbhutam || 42 ||
[Analyze grammar]

śṛṇuta śraddhayā yūyaṃ samādhāya svamānasam |
purā viṃdhyapradeśeṣu trivakro nāma rākṣasaḥ || 43 ||
[Analyze grammar]

tasya bhāryā guṇopetā sauṃdaryaguṇaśālinī |
suśīlā nāma suśroṇī sarvalakṣaṇalakṣitā || 44 ||
[Analyze grammar]

sā kadācinmanojñāṃgī suveṣā cāruhāsinī |
viṃdhyapādavanoddeśe vicacāra vilāsinī || 45 ||
[Analyze grammar]

tasminvane śucirnāma vartatesma mahāmuniḥ |
tapasamādhisaṃyukto vedādhyayanatatparaḥ || 46 ||
[Analyze grammar]

tasyāśramasamīpaṃ tu sā yayau varavarṇinī |
tāṃ dṛṣṭvā sa munirdhairyaṃ mumocānaṃgapīḍitaḥ |
tāmāsādya varārohāṃ babhāṣe munisattamaḥ || 47 ||
[Analyze grammar]

śuciruvāca |
lalane svāgataṃ te'stu kasya bhāryā śucismite || 48 ||
[Analyze grammar]

kimāgamanakṛtyaṃ te vane'sminnatibhīṣaṇe |
śrāṃtāsi tvaṃ varārohe vasāsminnuṭaje mama || 49 ||
[Analyze grammar]

tathoktā sā tu suśroṇī taṃ muniṃ pratyabhāṣata |
trivakrarakṣobhāryāhaṃ suśīlā nāmato mune || 5 ||
[Analyze grammar]

puṣpāvacayakāmena vanametatsamāgatā |
aputrāhaṃ mune bhartrā preritā putramicchatā || 51 ||
[Analyze grammar]

śuciṃ muniṃ samārādhya tasmātputramavāpnuhi |
iti pratisamādiṣṭā patinā tvāṃ samāgatā || 52 ||
[Analyze grammar]

putramutpādaya tvaṃ me kṛpāṃ kuru mune mayi |
evamuktaḥ sa tu śuciḥ suśīlāṃ tāmabhāṣata || 53 ||
[Analyze grammar]

śuciruvāca |
tvāṃ dṛṣṭvā mama ca prītiḥ suśīle vidyate'dhunā |
manorathamahāṃbhodhiṃ tvamāpūraya māmakam || 54 ||
[Analyze grammar]

ityuktvā sa munistatra tayā reme dinatrayam |
tāmuvāca muniḥ prītaḥ suśālāṃ sundarākṛtim || 55 ||
[Analyze grammar]

tavodare mahāvīryaḥ kapālābharaṇābhidhaḥ |
bhaviṣyati ciraṃ rājyaṃ pālayiṣyati medinīm || 56 ||
[Analyze grammar]

sahasraṃ vatsarānvatsastapasā prīṇayanvidhim |
puraṃdaraṃ vinānyebhyo devebhyo nāsya vadhyatā || 57 ||
[Analyze grammar]

īdṛśaste suto bhūyādiṃdratulyaparākramaḥ |
ityuktvā sa munirnārīṃ kāśīṃ śivapurīṃ yayau || 58 ||
[Analyze grammar]

suśīlā sāpi suṣuve kapālābharaṇaṃ sutam |
taṃ jaghāna mṛdhe śakro vajreṇa munipuṃgavāḥ || 59 ||
[Analyze grammar]

śucerbījasamudbhūtaṃ tamiṃdro nyavadhīdyataḥ |
tataḥ puraṃdaraḥ śakro jagṛhe brahmahatyayā || 60 ||
[Analyze grammar]

dhāvati sma tadā śakraḥ sarvāṃllokānbhayākulaḥ |
dhāvaṃtamanudhāvaṃtī brahmahatyā tamanvagāt || 61 ||
[Analyze grammar]

anudruto hi vipreṃdrāḥ śakro'yaṃ brahmahatyayā |
pitāmahasadaḥ prāpa saṃtaptahṛdayo bhṛśam || 62 ||
[Analyze grammar]

nyavedayadbrahmahatyāṃ brahmaṇe sa puraṃdaraḥ |
bhagavaṃllokanātheyaṃ brahmahatyāti bhīṣaṇā || 63 ||
[Analyze grammar]

bādhate māṃ prajānātha tasyā nāśaṃ bravīhi me |
puraṃdareṇaivamukto brahmā prāha divaspatim || 64 ||
[Analyze grammar]

brahmovāca |
sītākuṇḍaṃ prayāhīṃdra gaṃdhamādanaparvate |
sītākuṇḍasya tīre tvaṃ iṣṭvā yāgaiḥ sadāśivam || 65 ||
[Analyze grammar]

tasminsarasi ca snāyāḥ sarvapāpahare śubhe |
tataḥ pūto bhaveśśakra bahmahatyāvimocitaḥ || 66 ||
[Analyze grammar]

devalokaṃ punaryāyāḥ sarvaduḥkhavivarjitaḥ |
sarvapāpaharaṃ puṇyaṃ sītākuṇḍaṃ vimuktidam || 67 ||
[Analyze grammar]

mahāpātakasaṃghānāṃ nāśakaṃ paramāmṛtam |
sarvaduḥkhapraśamanaṃ sarvadāridryanāśanam || 69 ||
[Analyze grammar]

dhanadhānyapradaṃ śuddhaṃ vaikuṇṭhādipadapradam |
tasmāttatra kuruṣveṣṭiṃ sītāsarasi vṛtrahan || 69 ||
[Analyze grammar]

ityuktaḥ surarājo'sau prayayau gaṃdhamādanam |
prāpya sītāsaro viprāḥ snātveṣṭvā ca tadaṃtike || 70 ||
[Analyze grammar]

prayayau svapurīṃ bhūyo brahmahatyāvimocitaḥ |
evaṃ prabhāvaṃ tattīrthaṃ sītāyāḥ kuṇḍamuttamam || 71 ||
[Analyze grammar]

rāghavapratyayārthaṃ hi praviśya hutavāhanam |
saṃnidhau sarvadevānāṃ maithilī janakātmajā || 72 ||
[Analyze grammar]

vinirgatā punarvahneḥ sthitā sarvāṃgaśobhanā |
nirmame lokarakṣārthaṃ svanāmnā tīrthamuttamam || 73 ||
[Analyze grammar]

tatra sasnau svayaṃ sītā tena sītāsaraḥ smṛtam |
tatra yo mānavaḥ snāti sarvānkāmāṃllabheta saḥ || 74 ||
[Analyze grammar]

tasminnupaspṛśya naro dvijeṃdrā dattvā ca dānāni pṛthagvidhāni |
kṛtvā ca yajñānbahudakṣiṇābhirlokaṃ prayāyātparameśvarasya || 75 ||
[Analyze grammar]

yuṣmākamevaṃ prathitaṃ munīṃdrāḥ sītāsaro vaibhavametaduktam |
śṛṇvanpaṭhanvai tadihaiva bhogānbhuktvā paratrāpi sukhaṃ labheta || 76 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīyebrahmakhaṇḍe setumāhātmye sītāsaraḥpraśaṃsāyāmiṃdrabrahmahatyāvimokṣaṇanāmaikādaśo'dhyāyaḥ || 11 ||
[Analyze grammar]