Chapter 24

[English text for this chapter is available]

śrīnārāyaṇa uvāca |
atha jñānasvarūpaṃ te vacmi sāṃkhyena niścitam |
kṣetrādi jñāyate yena tajjñānaṃ hi nirucyate || 1 ||
[Analyze grammar]

vāsudevaḥ paraṃ brahma bṛhatyakṣaradhāmani |
ādāveko'dvitīyo'bhūnnirguṇo divyavigrahaḥ || 2 ||
[Analyze grammar]

sa kāryamūlaprakṛtiḥ sakālā'kṣaratejasi |
prakāśe'rkasya rātrīva tirobhūtā tadā'bhavat || 3 ||
[Analyze grammar]

sisṛkṣāthābhavattasya brahmāṇḍānāṃ yadā tadā |
sakālāvirbabhūvādau mahāmāyā tato hi sā || 4 ||
[Analyze grammar]

tāṃ kālaśaktimādāya vāsudevo'kṣarātmanā |
sisṛkṣayaikṣata yadā sā cukṣobha tadaiva hi || 5 ||
[Analyze grammar]

tasyāḥ pradhānapuruṣakoṭayo jajñire mune |
yujyante sma pradhānaiste puruṣāścecchayā prabhoḥ || 6 ||
[Analyze grammar]

pumāṃso nidadhurgarbhāṃsteṣu tebhyaśca jajñire |
brahmāṇḍāni hyasaṅkhyāni tatraikaṃ tu vivicyate || 7 ||
[Analyze grammar]

ādau jajñe mahāṃstasmātpuṃso vīryāddhiraṇmayāt |
ahaṅkārastatastasmādguṇāḥ sattvādayastrayaḥ || 8 ||
[Analyze grammar]

tamasaḥ pañca tanmātrā mahābhūtāni jajñire |
daśendriyāṇi rajaso buddhyā saha mahānasuḥ || 9 ||
[Analyze grammar]

sattvādindriyadevāśca jāyante sma manastathā |
sāmānyatastattvasaṃjñā ete devāḥ prakīrttitāḥ || 10 ||
[Analyze grammar]

preritā vāsudevena svasvāṃśairaiśvaraṃ vapuḥ |
ajījananvirāṭsañjñaṃ te carācarasaṃśrayam || 11 ||
[Analyze grammar]

sa ca vairājapuruṣaḥ svasṛṣṭāsvapsvaśeta yat |
tena nārāyaṇa iti procyate nigamādibhiḥ || 12 ||
[Analyze grammar]

tannābhipadmādbrahmāsīdrājaso'tha hṛdambujāt |
jajñe viṣṇuḥ sattvaguṇo lalāṭāttāmaso haraḥ || 13 ||
[Analyze grammar]

etebhya eva sthānebhyastisra āsaṃśca śaktayaḥ |
tatrāsīttāmasī durgā sāvitrī rājasī tathā |
sāttvikī śrīśceti sarvā vastrālaṃkāraśobhitāḥ || 14 ||
[Analyze grammar]

tā vairājājñayā trīṃśca brahmādīnpratipedire |
durgā rudraṃ ca sāvitrī brahmāṇaṃ viṣṇumantimā || 15 ||
[Analyze grammar]

caṇḍikādyāśca durgāyā aṃśenāsansahasraśaḥ |
trayīmukhyāśca sāvitryāḥ śaktayoṃśena jajñire |
dussahāpramukhāścāsannaṃśenaiva śriyo mune || 16 ||
[Analyze grammar]

tatrādito yo brahmāsīdvairājanābhipadmataḥ |
ekārṇave tadabjasthaḥ sa kaścidapi naikṣata || 17 ||
[Analyze grammar]

visargabuddhimaprāpto nātmānaṃ ca viveda saḥ |
kohaṃ kuta iti dhyāyannadidṛkṣatkajāśrayam || 18 ||
[Analyze grammar]

nālaṃ praviśyā'dho yātustanmūlaṃ ca vicinvataḥ |
saṃvatsaraśataṃ yātaṃ tasya nāntaṃ tu solabhat || 19 ||
[Analyze grammar]

ūrdhvaṃ punarupetyā'tha śrāntaśca niṣasāda saḥ |
adṛśyamūrtirbhagavānūce tapatapeti tam || 20 ||
[Analyze grammar]

tacchrutvā tatpravaktāramadṛṣṭvā ca sa sarvataḥ |
gurūpadiṣṭavattepe divyaṃ varṣasahasrakam || 21 ||
[Analyze grammar]

padme tapasyate tasmai tapaḥ śuddhātmane tataḥ |
samādhau darśayāmāsa dhāma vaikuṇṭhamacyutaḥ || 22 ||
[Analyze grammar]

prādhānikā guṇā yatra trayopi rajaādayaḥ |
na bhavantyalpamapi yatkālamāyābhayaṃ na ca || 23 ||
[Analyze grammar]

sahoditārkāyutavadbhāsvare tatra tejasi |
vāsudevaṃ dadarśā'sau ramyadivyāsitākṛtim || 24 ||
[Analyze grammar]

caturbhujaṃ gadāpadmaśaṃkhacakradharaṃ vibhum |
pītāmbaraṃ mahāratnakirīṭādivibhūṣaṇam || 25 ||
[Analyze grammar]

nandatārkṣyādibhirjjuṣṭaṃ pārṣadaiśca caturbhujaiḥ |
siddhibhiścāṣṭabhiḥ ṣaḍbhirbaddhāñjalipuṭairbhagaiḥ || 26 ||
[Analyze grammar]

siṃhāsane śriyā sākamupaviṣṭaṃ tamīśvaram |
praṇamya prāñjalistasthau viriñco hṛṣṭamānasaḥ || 27 ||
[Analyze grammar]

taṃ prāha bhagavānbrahmaṃstuṣṭohaṃ tapasā tava |
varaṃ varaya mattastvaṃ svābhīṣṭaṃ yatpriyosi me || 28 ||
[Analyze grammar]

ityuktastena taṃ jānaṃstapasi prerakaṃ prabhum |
svaṃ ca viśvasṛjaṃ brahmā yayāce'bhimataṃ varam || 29 ||
[Analyze grammar]

prajāvisargaśaktiṃ me dehi tubhyaṃ namaḥ prabho |
tatrāpi ca na baddhyeyaṃ yathā kuru tathā kṛpām || 30 ||
[Analyze grammar]

tatastaṃ bhagavānūce setsyate te manorathaḥ |
vairājena mayātmaikyaṃ bhāvayitvā samādhinā |
prajāḥ sṛjā'tha svāsādhye kārye smaryohamiṣṭadaḥ || 31 ||
[Analyze grammar]

ityuktvāntardadhe viṣṇurbrahmāpyekasamādhinā |
vairājenā'tha lokānprāglīnānsarvānsva aikṣata || 32 ||
[Analyze grammar]

visargaśaktiṃ saṃprāpya sa sargāya mano dadhe |
brahmajyotirmayastāvadādityaḥ prādurāsa ha || 33 ||
[Analyze grammar]

sthāpayitvāṇḍamadhye taṃ tataḥ sa manasā'sṛjat |
tapobhaktiviśuddhena munīnādyāṃścatuḥsanān || 34 ||
[Analyze grammar]

prajāḥ sṛjata cetyūce tāṃstadā te tu tadvacaḥ |
na jagṛhurnnaiṣṭhikendrāstebhyaścukrodha viśvasṛṭ || 35 ||
[Analyze grammar]

kruddhasya tasya bhālācca rudra āsīttamomayaḥ |
manyuṃ niyamya manasā prajeśānso'sṛjattataḥ || 36 ||
[Analyze grammar]

marīcimatriṃ pulahaṃ pulastyaṃ ca bhṛguṃ kratum |
vasiṣṭhaṃ kardamaṃ caiva dakṣamaṃgirasaṃ tathā || 37 ||
[Analyze grammar]

dharmaṃ tataḥ sa hṛdayādadharmaṃ pṛṣṭhatastathā |
manasaḥ kāmamāsyācca vāṇīṃ krodhaṃ bhruvo'sṛjat || 38 ||
[Analyze grammar]

śaucaṃ tapo dayā satyamiti dharmapadāni ca |
caturbhyo vadanebhyaśca catvāri sasṛje tataḥ || 39 ||
[Analyze grammar]

ṛgvedaṃ vadanātpūrvādyajurvedaṃ ca dakṣiṇāt |
sasarja paścimātsāma saumyāccātharvasaṃjñitam || 40 ||
[Analyze grammar]

itihāsapurāṇāni yajñānvipraśataṃ tathā |
vasvādityamarudviśvānsādhyāṃśca mukhato'sṛjat || 41 ||
[Analyze grammar]

bāhubhyaḥ kṣatriyaśatamūrubhyāṃ ca viśāṃ śatam |
padbhyāṃ śūdraśataṃ caitānsasarja saha vṛttibhiḥ || 42 ||
[Analyze grammar]

brahmacaryaṃ ca hṛdayādgārhasthyaṃ jaghanasthalāt |
vanāśramaṃ tathorastaḥ saṃnyāsaṃ śiraso'sṛjat || 43 ||
[Analyze grammar]

vakṣaḥsthalātpitṛgaṇānasurāñjaghanasthalāt |
sasarja ca gudānmṛtyuṃ nirṛtiṃ nirayāṃśca saḥ || 44 ||
[Analyze grammar]

gandharvāṃścāraṇānsiddhānsarpānyakṣāṃśca rākṣasān |
nagānmeghānvidyutaśca samudrānsaritastathā || 45 ||
[Analyze grammar]

vṛkṣānpaśūnpakṣiṇaśca sarvānsthāvarajaṅgamān |
svāṅgebhya eva sosrākṣīdbrahmā nārāyaṇātmakaḥ || 46 ||
[Analyze grammar]

sṛṣṭimetāṃ vilokyāpi nātiprīto yadā tadā |
hariṃ dhyātvā sa sasṛje tapovidyāsamādhibhiḥ |
ṛṣīnsvāyambhuvādīṃśca manūṃśca manujānapi || 47 ||
[Analyze grammar]

tataḥ prītaḥ sa sarveṣāṃ nivāsāya yathocitam |
svarlokaṃ ca bhuvarlokaṃ bhūrlokaṃ samakalpayat || 48 ||
[Analyze grammar]

yeṣāṃ tu yādṛśaṃ karma prākkālīnaṃ hi tānvidhiḥ |
saṃsthāpya tādṛśe sthāne vṛttīsteṣāmakalpayat || 49 ||
[Analyze grammar]

devānāmamṛtaṃ nṝṇāmṛṣīṇāṃ cānnamoṣadhīḥ |
yakṣarakṣosuravyāghrasarpādīnāṃ surāmiṣam |
caklṛpe gomṛgādīnāṃ vṛttiṃ sa yavasādi ca || 50 ||
[Analyze grammar]

sa devānāṃ tu viśveṣāṃ havyaṃ vṛttimakalpayat |
amūrtānāṃ ca mūrtānāṃ pitṝṇāṃ kavyameva ca || 51 ||
[Analyze grammar]

durgodbhavānāṃ śaktīnāṃ tadupāsanatatparaiḥ |
daityarakṣaḥpiśācādyairdattaṃ madyāmiṣādi ca || 52 ||
[Analyze grammar]

tathā sāvitryudbhavānāṃ śaktīnāṃ tadupāsakaiḥ |
dattamṛṣyādibhiryajñe munyannaṃ cānnamoṣadhīḥ || 53 ||
[Analyze grammar]

śrījātānāṃ ca śaktīnāṃ tadupāstiparāyaṇaiḥ |
dattaṃ devāsuranaraiḥ pāyasājyasitādi ca || 54 ||
[Analyze grammar]

prajāpatīnāṃ sa patistataḥ prāhā'khilāḥ prajāḥ |
ijyā devāśca pitaro havyakavyātmakairmakhaiḥ || 55 ||
[Analyze grammar]

iṣṭāḥ saṃpūrayiṣyanti hyete yuṣmanmanorathān |
etānye nārcayiṣyanti te vai nirayagāminaḥ || 56 ||
[Analyze grammar]

itthaṃ kṛtā hi maryādā tena nārāyaṇātmanā |
daivaṃ pitryamato nityaṃ janaiḥ kāryaṃ yathāvidhi || 57 ||
[Analyze grammar]

tato brahmā sa sarveṣāṃ dharmasetvavanāya ca |
tattajjātiṣu ye mukhyāstānmanūṃścāpyatiṣṭhipat || 58 ||
[Analyze grammar]

vāsudevecchayaivetthaṃ vairājādbrahmarūpiṇaḥ |
kalpekalpe bhavatyeva sṛṣṭirbahuvidhā mune || 59 ||
[Analyze grammar]

prākkalpe yādṛśī saṃjñā vedāḥ śāstrāṇi ca kriyāḥ |
kalpe'nye tādṛśāḥ sarve dharmāḥ syuścā'dhikāriṇaḥ || 60 ||
[Analyze grammar]

viṣṇuryaḥ kathitaḥ sopi vairājapuruṣātmakaḥ |
poṣayatyakhilāṃllokānmaryādāḥ paripālayan || 61 ||
[Analyze grammar]

manvādibhiḥ pālyamānāḥ setavastvasurairyadā |
kāmarūpairvibhidyante vāsudevastadā svayam |
brahmādibhiḥ prārthyamānaḥ prādurbhavati bhūtale || 62 ||
[Analyze grammar]

avatārā bhagavato bhūtā bhāvyāśca santi ye |
kartuṃ na śakyate teṣāṃ saṃkhyāṃ saṃkhyāviśāradaiḥ || 63 ||
[Analyze grammar]

saddharmadevasādhūnāṃ guptyai taddrohimṛtyave |
śreyase sarvabhūtānāmāvirbhāvosti satpateḥ || 64 ||
[Analyze grammar]

sa vāsudevaḥ prakṛtau puṃsi kāryeṣu caitayoḥ |
anvitaśca pṛthakcāste sarvādhīśaḥ svadhāmani || 65 ||
[Analyze grammar]

vyāpya svāṃśairimāṃllokānyathāgnivaruṇādayaḥ |
svastyāsate svasvaloke tathaiṣa bhagavānmune || 66 ||
[Analyze grammar]

sargātprāksaccidānandaḥ śuddha ekaśca nirguṇaḥ |
yathāsīttādṛgevāsāvanvitopyasti nirmalaḥ || 67 ||
[Analyze grammar]

vāyutejojalakṣmāsu tattatkāryeṣu khaṃ yathā |
anvīyāpyasti nirlepaṃ yathā pūrvaṃ tathaiṣa hi || 68 ||
[Analyze grammar]

sarvopāsyo niyantā ca vyāpakaścaiṣa kīrtitaḥ |
ātyantike laye'thaiṣa bhavatyeva yathā purā || 69 ||
[Analyze grammar]

vairājaḥ puruṣo yo'tra prokto'sāvīśvarābhidhaḥ |
jñeyaḥ svatantraḥ sarvajño vaśyamāyaśca nārada || 70 ||
[Analyze grammar]

etasyaiva svarūpāṇi brahmaviṣṇuśivāstrayaḥ |
rajaādiguṇopetāḥ svaguṇānuguṇakriyāḥ || 71 ||
[Analyze grammar]

brahmaṇo ye samutpannā devāsuranarādayaḥ |
te jīvasaṃjñā hyalpajñāḥ paratantrā bhavanti ca || 72 ||
[Analyze grammar]

jīvānāmīśvarāṇāṃ ca tanavaḥ kṣetrasañjñakāḥ |
mahadāditattvamayyaḥ kṣetrajñākhyāstu tadvidaḥ || 73 ||
[Analyze grammar]

kṣetrāṇāṃ ca kṣetravidāṃ pradhānapuruṣasya ca |
māyāyāḥ kālaśakteścā'kṣarasya ca parātmanaḥ |
pṛthakpṛthaglakṣaṇairyajjñānaṃ tajjñānamucyate || 74 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye jñānasvarūpanirūpaṇaṃ nāma caturviśo'dhyāyaḥ || 24 ||
[Analyze grammar]