Chapter 25

[English text for this chapter is available]

śrīnārāyaṇa uvāca |
vairāgyasyātha te vacmi lakṣaṇaṃ munisattama |
kṣayiṣṇuvastuṣvaruciḥ sarvatheti tadīritam || 1 ||
[Analyze grammar]

ārabhya māyāpuruṣātsarvā hyākṛtayastu yāḥ |
kālaśaktyā bhagavato nāśyante tāśca tadvaśāḥ || 2 ||
[Analyze grammar]

pratyakṣeṇānumānena śābdena ca vivekibhiḥ |
asatyatā kṛtīnāṃ ca niścitā satyatātmanām || 3 ||
[Analyze grammar]

nityena pralayenaiṣa kālo naimittikena ca |
prākṛtikena rūpeṇa caratyātyantikena ca || 4 ||
[Analyze grammar]

dehidehā ime nityaṃ kṣīyante pariṇāminaḥ |
krameṇa dṛśyate yatra bālyatāruṇyavārddhakam || 5 ||
[Analyze grammar]

sūkṣmatvānnekṣyate tattu gatirdīpārciṣo yathā |
phalavṛddhirvā'nupadaṃ jāyamānā drume yathā || 6 ||
[Analyze grammar]

tasyāṃtasyāmavasthāyāṃ duḥkhaṃ ca mahadīkṣyate |
jāgradādiṣvavasthāsu duḥkhaṃ caiva punaḥpunaḥ || 7 ||
[Analyze grammar]

duḥkhamādhyātmikaṃ bhūri dṛśyate cādhibhautikam |
ādhidaivikamapyatra duḥkhamevāsti dehinām || 8 ||
[Analyze grammar]

hāhā mamāra matputro hā patnī mriyate mama |
tātaṃ me'bhakṣayadvyāghro daṣṭā sarpeṇa me vadhūḥ || 9 ||
[Analyze grammar]

mahāsaudhogninā dagdho hāhā sopaskaro'dya me |
svakuṭumbaṃ kathaṃ pokṣye nāvarṣatpākaśāsanaḥ || 10 ||
[Analyze grammar]

sasyaiḥ samṛddhaṃ matkṣetraṃ hāhā dagdhaṃ himāgninā |
hriyante taskarairgāvaḥ sarvasvaṃ mama luṇṭhitam || 11 ||
[Analyze grammar]

nṛpeṇa daṇḍito'tyarthaṃ śatruṇā hā'titāḍitaḥ |
kiṃ karomi ca kaṃ brūyāṃ mātā me vyabhicāriṇī || 12 ||
[Analyze grammar]

viṣaṃ pāsyāmi hāhā'dya matpatnīṃ śatrurākṛṣat |
hā svasā me hṛtā mlecchairhāhā'riḥ prāpa marmabhit || 13 ||
[Analyze grammar]

priye jvarātivyathayā yamadūtā ime hahā |
itthaṃ rorūyamāṇā hi dṛśyante sarvato janāḥ || 14 ||
[Analyze grammar]

avasthānāṃ śarīrasya janmamṛtyū pratikṣaṇam |
kālena prāpnuvadbhiḥ svaṃ prārabdhaṃ duḥkhamaśyate || 15 ||
[Analyze grammar]

prārabdhānte mṛtyuduḥkhaṃ bhavatyapratimaṃ hi tat |
mṛtvāpi ca mahadduḥkhaṃ prāpyate yamayātanāḥ || 16 ||
[Analyze grammar]

tato jarāyujodbhijjasvedajāṇḍajayoniṣu |
bhūtvābhūtvā yathākarma mriyate duḥkhitaiḥ punaḥ || 17 ||
[Analyze grammar]

nityaḥ pralaya evaṃ te kīrttitaḥ sūkṣmayā dṛśā |
sa jñeyo'tha mune vacmi layaṃ naimittikābhidham || 18 ||
[Analyze grammar]

nimittīkṛtya rajanīṃ bhavedviśvasṛjastu yaḥ |
naimittikaḥ sa kathito layo dainaṃdinaśca saḥ || 19 ||
[Analyze grammar]

caturyugānāṃ sāhasraṃ dinaṃ viśvasṛjo mune |
niśā ca tāvatī tasya taddvayaṃ kalpa ucyate || 20 ||
[Analyze grammar]

ekaikasmindine tasya caturdaśa caturdaśa |
bhavanti manavo brahmandharmasetvabhirakṣakāḥ || 21 ||
[Analyze grammar]

ādyaḥ svāyambhuvastatra manuḥ svārociṣastataḥ |
uttamastāmasaścā'tha raivataścākṣuṣastataḥ || 22 ||
[Analyze grammar]

śrāddhadevaśca sāvarṇi bhautyo raucyastataḥ param |
brahmasāvarṇināmā ca rudrasāvarṇireva ca || 23 ||
[Analyze grammar]

merusāvarṇisaṃjño'tha dakṣasāvarṇirantimaḥ |
caturdaśaite manavaḥ proktā brahmaikavāsare || 24 ||
[Analyze grammar]

ekaikasya manoḥ kālo yugānāṃ caikasaptatiḥ |
divyairdvādaśasāhasrairyugakālaśca vatsaraiḥ || 25 ||
[Analyze grammar]

caturdaśasyaiva manorantarentamupeyuṣi |
sāyaṃsaṃdhyā viśvasṛjo jāyate munisattama || 26 ||
[Analyze grammar]

dināvasāne vairājaḥ śaktīrākarṣati sthiteḥ |
vairājātmā tadā rudrastrilokīṃ hartumīhate || 27 ||
[Analyze grammar]

ādau bhavatyanāvṛṣṭiratyugrā śatavārṣikī |
tadālpasārasattvāni kṣīyante sarvaśo bhuvi || 28 ||
[Analyze grammar]

sāṃvarttakasya cārkasya raśmayo'tyulbaṇā rasam |
āpātālātpibantyāśu dharaṇyāṃ sarvameva hi || 29 ||
[Analyze grammar]

sārasaṃ caiva nādeyaṃ sāmudraṃ cāmbu sarvaśaḥ |
śoṣayitvā'khilāṃllokānso'rko nayati saṃkṣayam || 30 ||
[Analyze grammar]

tato bhavati niḥsnehā naṣṭasthāvarajaṅgamā |
kūrmapṛṣṭhopamā bhūmiḥ śuṣkā saṃkucitā bhṛśam || 31 ||
[Analyze grammar]

kālāgnirudraḥ śeṣasya mukhādutpadyate tataḥ |
adholokānsaptabhūmiṃ bhuvaḥ svaśca dahatyasau || 32 ||
[Analyze grammar]

nirdagdhalokadaśako jvālāvarttabhayaṃkaraḥ |
udvāsitamaharlokaḥ kālāgniḥ parivarttate || 33 ||
[Analyze grammar]

gatādhikārāstridaśā bhuvaḥsvarganivāsinaḥ |
maharlokājjanaṃ yānti vahnijvālābhṛśārditāḥ || 34 ||
[Analyze grammar]

nivṛttidharmā ṛṣayaḥ prāptāḥ siddhadaśāṃ tu ye |
bhūtalāttepi tarhyeva ṛṣilokaṃ prayānti ca || 35 ||
[Analyze grammar]

uttiṣṭhanti tato ghorā vyomni sāṃvarttakā ghanāḥ |
mahāgajakulaprakhyāstaḍitvanto'tinādinaḥ || 36 ||
[Analyze grammar]

dhūmravarṇāḥ pītavarṇā kecitkumudasannibhāḥ |
lākṣārasanibhāḥ keciccāṣapatranibhāstathā || 37 ||
[Analyze grammar]

śamayitvā mahāvahniṃ śataṃ varṣāṇyaharnniśam |
varṣamāṇāḥ sthūladhārāḥ stanantaste ghanā ghanāḥ |
brahmāṇḍasyāntarālaṃ ca pūrayanti dhruvāvadhi || 38 ||
[Analyze grammar]

ekārṇavajale tasminvairājapuruṣaḥ sa tu |
aniruddhātmakaḥ śete nāgendraśayane prabhuḥ || 39 ||
[Analyze grammar]

tadā devāśca ṛṣayo rajaḥsattvatamovaśāḥ |
ye te saha viriñcena svakīyaguṇakarṣitāḥ |
praviśya tasya jaṭhare śerate dīrghanidrayā || 40 ||
[Analyze grammar]

ye tu brahmātmaikyabhāvā vaśīkṛtaguṇatrayāḥ |
nivṛttenaiva dharmeṇa vāsudevamupāsate || 41 ||
[Analyze grammar]

maharādiṣu lokeṣu te caturṣu kṛtālayāḥ |
taṃ vairājaṃ saṃstuvanto nivasanti yathāsukham || 42 ||
[Analyze grammar]

nārāyaṇaḥ sa bhagavānsvarūpaṃ paramātmanaḥ |
cintayanvāsudevākhyaṃ śete vai yoganidrayā || 43 ||
[Analyze grammar]

niśānte brahmaṇā sākaṃ sarve te tasya jāṭharāḥ |
utpadyante yathāpūrvaṃ yathākarmādhikāriṇaḥ || 44 ||
[Analyze grammar]

evaṃ naimittiko nāma trilokīkṣayalakṣaṇaḥ |
pralayaḥ kathitastubhyaṃ prākṛtaṃ kīrttayāmyatha || 45 ||
[Analyze grammar]

ya eṣa kalpaḥ kathitastādṛśānāṃ śatatrayam |
ṣaṣṭyādhikaṃ ca yaḥ kālo vedhasaḥ sa tu vatsaraḥ || 46 ||
[Analyze grammar]

pañcāśatā taiḥ parārddho brahmāyustaddvayaṃ matam |
parākhyakāle saṃpūrṇe mahānbhavati saṃkṣayaḥ || 47 ||
[Analyze grammar]

saṃhārarudrarūpeṇa saṃhṛtya svaṃ virāḍvapuḥ |
svaparaṃ nirguṇaṃ rūpaṃ vairājo yātumicchati || 48 ||
[Analyze grammar]

tadā bhavatyanāvṛṣṭiḥ pūrvavacchatavārṣikī |
sāṅkarṣaṇaśca kālāgnirdahatyaṇḍamaśeṣataḥ || 49 ||
[Analyze grammar]

sāṃvarttakāstato meghā varṣantyati bhayānakāḥ |
śataṃ varṣāṇi dhārābhirmusalākṛtibhirmune || 50 ||
[Analyze grammar]

mahadādervikārasya viśeṣāntasya saṃkṣayaḥ |
sarvasyāpi bhavatyeva vāsudevecchayā tataḥ || 51 ||
[Analyze grammar]

āpo grasanti vai pūrvaṃ bhūmergandhātmakaṃ guṇam |
āttagandhā tato bhūmiḥ pralayatvāya kalpate || 52 ||
[Analyze grammar]

grasatembuguṇaṃ tejo rasaṃ tallīyate tataḥ |
rūpaṃ tejoguṇaṃ vāyurgrasate līyate'tha tat || 53 ||
[Analyze grammar]

vāyorapi guṇaṃ sparśamākāśo grasate tataḥ |
praśāmyati tadā vāyuḥ khaṃ tu tiṣṭhatyanāvṛtam || 54 ||
[Analyze grammar]

bhūtādistadguṇaṃ śabdaṃ grasate līyate ca kham |
indriyāṇi vilīyante taijasāhaṃkṛtau tataḥ || 55 ||
[Analyze grammar]

ahaṅkāre vilīyante sāttvike devatā manaḥ |
yadyadyasmātsamutpannaṃ tattattasminhi līyate || 56 ||
[Analyze grammar]

ahaṃkāro mahattattve trividhopi pralīyate |
tatpradhāne ca tatpuṃsi sa mūlaprakṛtau tataḥ || 57 ||
[Analyze grammar]

eṣa prākṛtiko nāma pralayaḥ parigīyate |
tirobhavanti jīveśā yatrā'vyakte harīcchayā || 58 ||
[Analyze grammar]

yadā ca māyā puruṣau kālo'tyakṣaratejasi |
tadicchayā tiro yānti sa tveko vartate prabhuḥ |
tadā sa pralayo jñeyo nāradātyantikābhidhaḥ || 59 ||
[Analyze grammar]

itthaṃ prabhoḥ kālaśaktyā layairetaiścaturvidhaiḥ |
asadbaddhvā'khilaṃ tatrā'rucirvairāgyamucyate || 60 ||
[Analyze grammar]

vāsudevetarāndevānkālamāyāvaśīkṛtān |
viditvā teṣu ca prītiṃ hitvā tasyaiva nityadā |
gāḍhasnehena yā sevā sā bhaktiriti gīyate || 61 ||
[Analyze grammar]

śravaṇaṃ kīrtanaṃ tasya smṛtiścaraṇasevanam |
pūjā praṇāmo dāsyaṃ ca sakhyaṃ cātmanivedanam || 62 ||
[Analyze grammar]

ityetairnnavabhirbhāvairyaḥ seveta tamādarāt |
ananyayā dhiṣaṇayā sa hi bhakta itīryate || 63 ||
[Analyze grammar]

tribhiḥ svadharmapramukhairyuktābhaktiriyaṃ mune |
dharma ekāntika iti prokto bhāgavataśca saḥ || 64 ||
[Analyze grammar]

sākṣādbhagavataḥ saṅgāttadbhaktānāṃ ca vedṛśām |
dharmo hyekāntikaḥ pumbhiḥ prāpyate nānyathā kvacit || 65 ||
[Analyze grammar]

naitādṛśaṃ paraṃ kiñcitsādhanaṃ hi mumukṣatām |
niḥśreyasakaraṃ puṃsāṃ sarvābhadravināśanam || 66 ||
[Analyze grammar]

ekāntadharmasiddhyarthaṃ kriyāyogaparo bhavet |
pumānsyādyena naiṣkarmyaṃ karmaṇāṃ munisattama || 67 ||
[Analyze grammar]

etanmayā vedapurāṇaguhyaṃ tattvaṃ paraṃ proktamaghaughanāśam |
ekāgrayā śuddhadhiyāvadhārya sacchraddhayā cetasi te maharṣe || 68 ||
[Analyze grammar]

na vāsudevātparamasti pāvanaṃ na vāsudevātparamasti maṅgalam |
na vāsudevātparamasti daivataṃ na vāsudevātparamasti vāñchitam || 69 ||
[Analyze grammar]

yannāmadheyaṃ sakṛdapyabuddhyā dehāvasānepi gṛṇāti yo'tra |
sa puṣkasopyāśu bhavapravāhādvimucyate taṃ bhaja vāsudevam || 70 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye vairāgyabhaktinirūpaṇaṃ nāma pañcaviṃśo'dhyāyaḥ || 25 ||
[Analyze grammar]