Chapter 12

[English text for this chapter is available]

skanda uvāca |
tato hṛṣṭāḥ kāśyapeyā manthasthānamupetya te |
punarvarṣasahasraṃ ca manthanti sma payonidhim || 1 ||
[Analyze grammar]

mathyamānāttathā sindhoḥ sarvestairapi kiñcana |
nāsīcca śithilā āsanmaṃthitāraḥ śvasanmukhāḥ || 2 ||
[Analyze grammar]

vāsukiśca mahāsarpaḥ prāṇavaiklavyamāptavān |
manthakāle mandaropi naikatrāsītsthirasthitiḥ || 3 ||
[Analyze grammar]

sarvāndṛṣṭvā nirutsāhānpradyumno viṇvanujñayā |
devāsurāhirājeṣu praviśya balamādadhau || 4 ||
[Analyze grammar]

aniruddhopi tarhyeva tamākramya nagādhipam |
sahasrabāhubhistasthau mahācala ivā'paraḥ || 5 ||
[Analyze grammar]

tato mamanthustarasā saṃprāptaparamojasaḥ |
savismayā mahābdhiṃ te surāsuragaṇā mudā || 6 ||
[Analyze grammar]

nārāyaṇānubhāvena nāpurddevādayaḥ śramam |
śuśubhe manthanaṃ tacca samamākarṣaṇāttadā || 7 ||
[Analyze grammar]

mathyamāne mahāmbhodhau susruvuḥ paritastadā |
mahādrumāṇāṃ niryāsā bahavaścauṣadhīrasāḥ || 8 ||
[Analyze grammar]

tathābhūtādambunidherāvirāsītkalānidhiḥ |
kāntyauṣadhīnāmadhyakṣaḥ sarvāsāṃ ya udīryate || 9 ||
[Analyze grammar]

tato gavāmadhiṣṭhātrī sarvāsāmapi kāmadhuk |
havirddhānyabhavaddhenuḥ śītāṃśusadṛśadyutiḥ || 10 ||
[Analyze grammar]

aśvaḥ śveto'thāvirāsīddhayānāmadhidevatā |
airāvataśca nāgendraścaturddantaḥ śaśiprabhaḥ || 11 ||
[Analyze grammar]

pārijāto divyatarustarurājastato'bhavat |
maṇiratnaṃ kaustubhākhyaṃ padmarāgamabhūttataḥ || 12 ||
[Analyze grammar]

tato'bhavannapsaraso rūpalāvaṇyabhūmayaḥ |
surā devī tato jajñe sarvamādakadevatā || 13 ||
[Analyze grammar]

āsīdatha dhanuḥ śārṅgaṃ sarvaśastrādhidaivatam |
vādyādhidaivataṃ śaṃkhaḥ pāñcajanyastato'bhavat || 14 ||
[Analyze grammar]

tatra candraḥ pārijātastathaivāpsarasāṃ gaṇaḥ |
ādityapathamāśritya tasthurete tu tatkṣaṇam || 15 ||
[Analyze grammar]

vāruṇīmaśvarājaṃ ca daityeśā jagṛhurdrutam |
airāvataṃ devarājo jagrāhānumatāddhareḥ || 16 ||
[Analyze grammar]

kaustubhaśca dhanuḥ śaṃkho viṣṇumeva prapedire |
havirddhānīṃ tu te sarve tāpasebhyo dadustadā || 17 ||
[Analyze grammar]

mathyamānātpunaḥ sindhoḥ sākṣācchrīrabhavatsvayam |
ānandayantī svadṛśā trilokīṃ hatavarcasam || 18 ||
[Analyze grammar]

tāṃ grahītuṃ tu sarvepi surāsuranarādayaḥ |
aicchaṃstasyāḥ pratāpāttu śekentyetuṃ na kaścana || 19 ||
[Analyze grammar]

tatastāṃ padmahastatvācchrīṃ viditvaiva vāsavaḥ |
ānandaṃ paramaṃ prāpa brahmādyā ye ca tadvidaḥ || 20 ||
[Analyze grammar]

tāvattatrāmbudhiḥ sākṣādetya tāṃ haima āsane |
kanyā mameyamityuktvā gṛhītvāṅka upāviśat || 21 ||
[Analyze grammar]

punarabdhermathyamānādadhikaṃ balibhiśca taiḥ |
sudhārthibhirddhairyavadbhirapi naivābhavatsudhā || 22 ||
[Analyze grammar]

tadā śithilayatnāste nirāśā amṛtodbhave |
pramlānavaktrāḥ khinnāśca babhūvuḥ kāśyapā mune || 23 ||
[Analyze grammar]

dṛṣṭvā tathāvidhāṃstāṃśca bhagavānkaruṇānidhiḥ |
udyuktobhūtsvayaṃ brahmanmanthanāya hasanvibhuḥ || 24 ||
[Analyze grammar]

ratnakāñcīdṛḍhābaddhakakṣapītāmbaradyutiḥ |
dvābhyāṃ dvābhyāmahiṃ madhye dorbhyāmubhayatograhīt || 25 ||
[Analyze grammar]

dhṛtāhivadanā daityāstasthurekata eva te |
ekato dhṛtatatpucchā devāstasthustadākhilāḥ || 26 ||
[Analyze grammar]

tanmadhyagaśca bhagavānmamanthābdhiṃ sa līlayā |
dadāno nayanānanda cañcatkaravibhūṣaṇaḥ || 27 ||
[Analyze grammar]

brahmā saharṣipravarairantarikṣasthitastadā |
avākirattaṃ kusumaiḥ kurvañjayajayadhvanim || 28 ||
[Analyze grammar]

mathyamānāttataḥ sindhorjjajñe dhanvantariḥ pumān |
viṣṇoraṃśena gaurāṃgaḥ sudhākumbhaṃ kare dadhat || 29 ||
[Analyze grammar]

ghṛtādīnāṃ hi sarveṣāṃ rasānāṃ sāramuttamam |
amṛtaṃ tadgṛhītvā'sau śriyontikamupāyayau || 30 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye'mṛtamanthane caturdaśaratnotpattirnāma dvādaśo'dhyāyaḥ || 12 ||
[Analyze grammar]